Chaʼan mi lac ñumen cʌn juntiquil quixtañu, wen jaʼel cheʼ la cujil chuqui an mele. Cheʼʌch jaʼel tiʼ tojlel Dios, miʼ a wom a ñumen cʌn, yom a wujil chuqui tac melbil i chaʼan. Mi caj i toj sajtel a pusicʼal cheʼ maʼ cʌn jiñi wenlel tac muʼ bʌ lac taj chaʼan jiñi melbil bʌ i chaʼan Dios yicʼot bajcheʼ miʼ taj i bʌ chaʼan jiñi talto bʌ qʼuin.

Jehová jiñʌch jiñi Cʼax ñuc bʌ tsaʼ bʌ i Meleyonla, «cʼʌlʌl tiʼ tejchibal pañimil tsiquil añʌch Dios, come tsiquil i melbal» (Romanos 1:20). «Diosʌch tsaʼ bʌ i mele pañimil ti cabʌl i pʼʌtʌlel. Tsiʼ xucʼchoco pañimil chaʼan cabʌl i ñaʼtʌbal. Tsiʼ lichʼi tac panchan jini wen yujil bʌ» (Jeremías 10:12). Pejtelel chuqui utsʼatax bʌ melbil (pʌtbil) i chaʼan, miʼ pʌsbeñonla chaʼan Dios miʼ wen cʼuxbiñonla.

Ñaʼtancu, cheʼ Jehová tsiʼ meleyonla (pʌtʌyonla) «tiʼ yejtal» miʼ pʌs chaʼan wen ñucʌch laj cuxtʌlel (Génesis 1:27). Ili miʼ coltañonla lac pʌs jiñi melbalʌl tac am bʌ i chaʼan, anquese mach ti tsʼʌcʌlic. Yicʼot jeʼel miʼ mejlel laj cʌn bajcheʼ miʼ chaʼlen pensar yicʼot i mandar tac. I cheʼ mucʼʌch lac tsajcan, ñumen tijicñayonla yicʼot mi lac tajben i sujmlel laj cuxtʌlel. Cheʼ jaʼel, mi lac mejlel ti sujtel tiʼ yamigo Dios.

Pejtelel chuqui tsiʼ mele ila ti Lum miʼ pʌs jaʼel chaʼan Jehová miʼ wen cʼuxbiñonla. Cheʼ bajcheʼ tsiʼ yʌlʌ jiñi apóstol Pablo, Dios «maʼanic tsiʼ cʌyʌ i tsictesan i bʌ ti wen bʌ i yeʼtel. Tsiʼ yʌqʼueyonla jaʼal tilem bʌ ti panchan yicʼot cʼajbal chaʼan mi lac ñajʼan. Tsiʼ tijicñesʌbeyonla lac pusicʼal» (Hechos 14:17). Cheʼ bʌ Dios tsiʼ mele ili Pañimil, mach cojach tsiʼ yʌcʼʌ chuqui i cʼʌjñibal lac chaʼan, tsiʼ yʌcʼʌ pejtelel chuqui yom chaʼan tijicña mi la cajñel. Ili tac miʼ tsʼitaʼ pʌs pejtelel chuqui mi caj i yʌqʼueñonla ti talto bʌ qʼuin.

Jehová tsiʼ mele ili Pañimil chaʼan jiñi wiñicob xʼixicob (quixtañujob) miʼ chumtañob tiʼ pejtelel ora. Jiñi Biblia miʼ yʌl chaʼan «tsiʼ yotsa pañimil tiʼ wenta winicob xʼixicob» i chaʼan «mach lolomic tsiʼ mele pañimil. Tsiʼ mele chaʼan i chumlib winicob» (Salmo 115:16; Isaías 45:18). ¿Majqui mi caj i chumtañob, i bajcheʼ jalel? Jiñi Biblia miʼ yʌl: «Mi caj i yʌqʼuentelob jini pañimil jini  tojoʼ bʌ. Mi caj i yajñelob tiʼ pejtelel ora» (Salmo 37:29).

Jin chaʼan Jehová tsiʼ mele Adán yicʼot Eva. Ili xñujpuñel tsaʼ ajqʼui ti jumpʼejl paraíso «chaʼan miʼ yʌcʼñan, chaʼan miʼ cʌntan» (Génesis 2:8, 15). Dios tsiʼ yʌqʼueyob ili utsʼatax bʌ eʼtel (troñel): «Laʼ pʼojliquetla. Butʼula jini pañimil. Cʼʌñʌla» (Génesis 1:28). Jin chaʼan, Adán yicʼot Eva tijicña tsaʼ mejliyob ti chumtʌl tiʼ pejtelel ora ila ti Pañimil cheʼ tsaʼic i jacʼbeyob i tʼan Dios. Pero mach cheʼic tsiʼ meleyob i tsiʼ sʌtʌyob jiñi i majtan, chaʼan miʼ tsijquelob ti jiñi «tojoʼ bʌ» muʼ bʌ «i yʌqʼuentelob jini pañimil». Pero cheʼ bajcheʼ mi caj laj qʼuel, jiñi tsaʼ bʌ i ñaʼta Dios chaʼan jiñi quixtañujob yicʼot ili Pañimil, maʼañic tsaʼ qʼuextʌyi tiʼ caj i ñusatʼañob. Pero laʼ lac ñaxan qʼuel yambʌ tsaʼ bʌ i mele Dios.

¿Chucoch tsiʼ yʌqʼueyonla Jehová jiñi Biblia? Ti ñaxan, come yom chaʼan mi laj cʌn (Proverbios 2:1-5). Isujmʌch, jiñi Biblia maʼañic miʼ jacʼbeñonla pejtelel laj cʼajtiya chaʼan bʌ Dios, i maʼañic jumpʼejl libro muʼ bʌ mejlel i mel (Eclesiastés 3:11). Pero pejtelel muʼ bʌ i yʌl jiñi Biblia miʼ coltañonla laj cʌn Dios. Mi cʼotel lac ñaʼtan bajcheʼ yilal cheʼ mi laj qʼuel bajcheʼ miʼ mel tiʼ tojlel quixtañujob. Mi lac taj laj qʼuel bajcheʼ yilal bʌ quixtañujob miʼ qʼuelob ti wen (Salmo 15:1-5). Mi laj cʌn bajcheʼ yilal bʌ chʼujutesaya miʼ mulan, i mandar tac chaʼan bajcheʼ yomonla yicʼot bajcheʼ yilal miʼ qʼuel jiñi chubʌʼañʌl tac. Yicʼot jaʼel, jiñi Biblia miʼ coltañonla lac ñumen cʌn ti wen Jehová cheʼ mi laj qʼuel bajcheʼ tsiʼ chaʼle tʼan yicʼot bajcheʼ yilal i melbal (chaʼlebal) i Yalobil, Jesucristo (Juan 14:9).

Jehová tsiʼ yʌqʼueyonla i Tʼan jaʼel chaʼan mi lac ñaʼtan bajcheʼ miʼ mejlel lac taj lac tijicñʌyel yicʼot i sujmlel laj cuxtʌlel. Yaʼi miʼ subeñonla chuqui yom mi lac mel chaʼan tijicñayonla ti lac familia, mi laj qʼuelben i wenlel chuqui mi lac mel yicʼot chaʼan maʼañic mi laj cʌlʌx chaʼlen pensar. Cheʼ bajcheʼ mi caj laj qʼuel ti wiʼil, jiñi Biblia miʼ jacʼ jiñi ñuc tac bʌ cʼajtiya ti laj cuxtʌlel, bajcheʼ: ¿Chucoch an cabʌl wocol? Yicʼot, ¿chuqui mi caj i yujtel ti lac tojlel ti talto bʌ qʼuin? Yicʼot jaʼel miʼ tsictesʌbeñonla chuqui an i mele Dios chaʼan miʼ tsʼʌctiyel jiñi ñaʼtʌbil bʌ i chaʼan.

An yambʌ chuqui miʼ pʌs chaʼan jiñi Biblia wen ñucʌch bʌ libro yicʼot chaʼan tilemʌch ti Dios. Anquese 40 wiñicob tiʼ tsʼijbuyob i tsaʼ jalʼa 1,600 jab ti tsʼijbuntel, junsujm jach chuqui miʼ taj ti tʼan come Diosʌch tsiʼ yʌcʼʌ ti tsʼijbuntel (2 Timoteo 3:16). Mach lajalic bajcheʼ yan tac bʌ libro wajalix bʌ ti tsʼijbunti jaʼel, come jiñi Biblia maʼañic wis qʼuextʌyem, i cheʼʌch miʼ pʌs cabʌl ñoxix bʌ tsʼijbujel i chaʼan Biblia. Cheʼ jaʼel, maʼañic mejlem ti jisʌntel, anquese an i wen ñopoyob i mʌctan chaʼan maʼañic miʼ chaʼlentel ti traducir, i pujquel yicʼot i pejcʌntel. Wʌle ora jiñʌch muʼ bʌ i ñumen chojñel yicʼot i pejcʌntel. Cheʼ añʌch lac chaʼan ili ora jiñi Biblia, miʼ pʌs chaʼan jiñi i Tʼan Dios «miʼ yajñel tiʼ pejtelel ora» (Isaías 40:8).

Laʼ laj qʼuel yambʌ chuqui tsiʼ mele Dios. Chaʼan miʼ pʌs chaʼan mucʼʌch caj i tsʼʌctiyel tsaʼ bʌ i ñaʼta, an chuqui wen ñuc bʌ majtañʌl tsiʼ yʌcʼʌ. Tsaʼix laj qʼuele chaʼan Dios yom chaʼan jiñi quixtañujob miʼ chumtʌlob tiʼ pejtelel ora ila ti Pañimil. Pero cheʼ bʌ Adán tsiʼ ñusʌbe i tʼan Dios i tsiʼ chaʼle mulil, maʼañic tsaʼ mejli ti chumtʌl tiʼ pejtelel ora, mi jiñic i yalobilob. «Tsaʼ ochi mulil ti pañimil chaʼan tiʼ mul juntiquil winic i cʼabaʼ Adán. Jini mulil tsiʼ yʌcʼʌ ti chʌmel pejtel winicob xʼixicob. Jini chaʼan mi lac chʌmel ti lac pejtelel, come tsaʼ lac chaʼle mulil ti lac pejtelel» (Romanos 5:12). Jiñi tsaʼ bʌ i ñaʼta Dios maʼañix miʼ caj ti tsʼʌctiyel yilal tiʼ caj jiñi ñusatʼan. Pero ¿chuqui tsiʼ mele Jehová?

Jiñi tsaʼ bʌ i mele Jehová miʼ pʌs jiñi wen tac bʌ i melbal. Toj chuqui tsiʼ mele cheʼ tsiʼ yʌqʼue i xotʼ i mul Adán yicʼot Eva chaʼañob i ñusatʼan, pero jiñi i cʼuxbiya tsiʼ ñijca chaʼan miʼ mel chuqui yom chaʼan i wenlel jiñi quixtañujob. Jehová tsiʼ cʼʌñʌ i ñaʼtʌbal chaʼan miʼ ñaʼtan yom bʌ miʼ mel chaʼan miʼ tojʼan jiñi wocol, i ti orajach tsiʼ yʌlʌ chuqui caj i mel (Génesis 3:15). Tiʼ tojlel i Yalobil, Jesucristo,  mi caj i locʼsañonla ti mulil yicʼot chʌmel (sajtel). ¿Chuqui yom i yʌl jiñi?

Chaʼan Jehová miʼ coltañonla loqʼuel tiʼ wocolel jiñi mulil tsaʼ bʌ i yotsa Adán, tsiʼ choco tilel Jesús ila ti Pañimil chaʼan miʼ cʌntesañonla bajcheʼ miʼ mejlel lac taj laj cuxtʌlel yicʼot chaʼan «miʼ yʌcʼ i bʌ ti chʌmel chaʼan i tojol i mul cabʌlob» a (Mateo 20:28; Juan 14:6). Jesús tsaʼ mejli i toj lac mul chaʼan miʼ coltañonla come mach xmulilic jaʼel, cheʼ bajcheʼ Adán, pero i bajñel tsaʼʌch i jacʼbe i tʼan Dios cʼʌlʌl tsaʼ chʌmi. I Jehová tsiʼ chaʼ tejchesa yicʼot tsiʼ pʌyʌ letsel ti panchan, come mach i wentʌlelic miʼ chʌmel. Cheʼ bajcheʼ jiñi, Jesús miʼ mejlel i yʌqʼuen jiñi quixtañujob maʼañic bʌ tsaʼ mejli i yʌcʼ Adán: Jiñi cuxtʌlel maʼañic bʌ i jilibal chaʼan jiñi muʼ bʌ i jacʼob tʼan. «Come cabʌlob tsaʼ qʼuejliyob ti mulil chaʼan tsiʼ ñusa mandar Adán. Cheʼ jaʼel cabʌlob miʼ qʼuejlelob ti toj chaʼan tsiʼ jacʼʌ mandar Cristo» (Romanos 5:19). Tiʼ coltaya i cuxtʌlel tsaʼ bʌ i yʌcʼʌ Jesús, Dios mi caj i tsʼʌctesan i tʼan: Jiñi quixtañujob mi caj i chumtʌlob tiʼ pejtelel ora ila ti Pañimil.

Cheʼ mi laj qʼuel bajcheʼ tsiʼ tojʼesa Jehová jiñi wocol tsaʼ bʌ tejchi tiʼ caj i mul Adán miʼ coltañonla lac ñumen cʌn. Mi laj cʌn chaʼan maʼañic chuqui miʼ mejlel i mʌctan Dios chaʼan miʼ tsʼʌctesan muʼ bʌ i ñaʼtan, tiʼ pejtelel ora «miʼ jolontesan» chuqui miʼ yʌl (Isaías 55:11). Miʼ pʌsbeñonla jaʼel bajcheʼ cʼamel miʼ cʼuxbiñonla. «Tsiʼ pʌsbeyonla i cʼuxbiya Dios cheʼ bʌ tsiʼ choco tilel ti pañimil cojach bʌ i Yalobil chaʼan mi lac taj laj cuxtʌlel ti Jesús. Jiñʌch mero cʼuxbiya. Mach joñonicla tsaʼ laj cʼuxbi Dios pero jini tsiʼ cʼuxbiyonla. Tsiʼ choco tilel i Yalobil chaʼan miʼ toj lac mul, chaʼan miʼ lajmel i michʼajel ti lac tojlel» (1 Juan 4:9, 10).

Dios ti jumpʼejl i pusicʼal tsiʼ yʌcʼʌ i Yalobil chaʼan ti lac pejtelel. Iliyi miʼ yʌqʼueñonla lac ñop chaʼan mi caj i «yʌqʼueñonla yicʼot Cristo pejtelel chuqui yom lac chaʼan» (Romanos 8:32). ¿Chuqui yan tac bʌ an i yʌlʌ Dios? Laʼ laj qʼuel.