Cheʼ an majqui com laj cʌn, tajol muʼ bʌ lac ñaxan cʼajtiben jiñʌch: «¿Chuqui a cʼabaʼ?». Cheʼ muqʼuic i mejlel laj cʼajtiben Dios jaʼel, ¿chuqui mi caj i jacʼbeñonla?

«Joñon Jehová. Jiñʌch j cʼabaʼ» (Isaías 42:8, TNM).

Come ñuc i cʼʌjñibal i chaʼan Dios. Maʼañic majqui tsiʼ yotsʌbe i cʼabaʼ Dios, jiñʌch tsiʼ bajñel yajca. Jehová miʼ yʌl: «Jiñʌch j cʼabaʼ tiʼ pejtelel ora. Cheʼ yom mic pejcʌntel tiʼ pejtelel ora» (Éxodo 3:15). Yaʼ ti Biblia, ñumento miʼ tajtʌl i cʼabaʼ Dios bajcheʼ jiñi título tac muʼ bʌ i yʌcʼ ti cʌjñel, bajcheʼ jiñi Mach bʌ Añic i Pʼisol i Pʼʌtʌlel, lac Tat, lac Yum o Dios, i ñumento cheʼ bajcheʼ i cʼabaʼ juntiquil quixtañu, bajcheʼ Abrahán, Moisés, David o Jesús. Tiʼ sujm, Jehová yom chaʼan mi laj cʌmben i cʼabaʼ. Jiñi Biblia miʼ yʌl: «Laʼ i ñopob [cʌñob] a cʼabaʼ come jatet jach c Yumet lojon. Cʼax ñuquet tiʼ pejtelel pañimil» (Salmo 83:18).

Come ñuc i cʼʌjñibal i chaʼan Jesús. Ti jiñi oración cʌmbil bʌ bajcheʼ padrenuestro, Jesús tsiʼ cʌntesa bajcheʼ yom miʼ chaʼleñob oración jiñi xcʌntʼañob i chaʼan, tsiʼ yʌlʌ: «Laʼ chʼujutesʌntic a cʼabaʼ» (Mateo 6:9). Cheʼ jaʼel, Jesús tiʼ sube Dios ti jumpʼejl oración: «C Tat, pʌsʌ i ñuclel a cʼabaʼ» (Juan 12:28). Ñuc bʌ i cʼʌjñibal i chaʼan Jesús jiñʌch cheʼ miʼ yʌqʼuen i ñuclel i cʼabaʼ Dios. Jin chaʼan tiʼ sube: «Tsaʼ cʌqʼueyob i cʌn a cʼabaʼ. Muʼ to caj c chʌn acʼ ti cʌjñel» (Juan 17:26).

Come ñuc i cʼʌjñibal i chaʼan jiñi i cʌñʌyoʼ bʌ Dios. Jiñi i wiñicob Dios ti wajali yujilob chaʼan jiñi i coltʌntelob yaʼʌch chucul tiʼ cʼabaʼ Dios. Juntiquil tsiʼ yʌlʌ: «I cʼabaʼ lac Yum [Jehová] i wentajʌch pʼʌtʌl bʌ otot tsʼajquibil bʌ. Muqʼuix i ñochtan ti ajñel jini toj bʌ. Muqʼuix i yochel i taj i coltʌntel».  I yambʌ tsiʼ yʌlʌ: «Majqui jach miʼ pejcañon tij cʼabaʼ mi caj i coltʌntel» (Proverbios 18:10; Joel 2:32). Jiñi Biblia miʼ pʌs chaʼan jiñi i cʼabaʼ Dios mi caj i yʌcʼ ti cʌjñel majqui jiñi i wiñicob. «Simón tsaʼ ujti i subeñetla bajcheʼ Dios tsaʼ caji i pʌsbeñob gentilob i yutslel i pusicʼal cheʼ bʌ tsiʼ yajca winicob xʼixicob chaʼan miʼ tsictesan i ñuclel i cʼabaʼ» (Hechos 15:14; Miqueas 4:5).

Miʼ yʌcʼ ti cʌjñel chaʼan maʼañic yambʌ bajcheʼ Dios. Jiñi wen yujiloʼ bʌ an i yʌlʌyob chaʼan jiñi cʼabaʼʌl Jehová yom i yʌl «Jiñʌch miʼ Mel chaʼan cheʼʌch miʼ Sujtel». Cheʼ bajcheʼ tsiʼ yʌcʼʌ i bʌ ti cʌjñel cheʼ tsiʼ chaʼle tʼan yicʼot Moisés miʼ coltañonla lac ñaʼtan chuqui yom i yʌl jiñi i cʼabaʼ. Dios tsiʼ yʌlʌ: «Joñon mic sujtesan c bʌ ti chuqui jach com c sujtesan c bʌ» (Éxodo 3:14, TNM). Jin chaʼan, jiñi i cʼabaʼ miʼ pʌsbeñonla chaʼan jiñʌch tsaʼ bʌ i Mele (Pʌtʌ) pejtelel chuqui an. Cheʼ jaʼel, miʼ cʌntesañonla chaʼan miʼ mejlel i sujtesan i bʌ o miʼ mejlel i sujtesan jiñi melbil tac bʌ i chaʼan ti chuqui jach chaʼan miʼ tsʼʌctesan chuqui ñaʼtʌbil i chaʼan. Anquese jiñi título tac am bʌ i chaʼan miʼ pʌs bajcheʼ cʼamel i pʼʌtʌlel, cojach jiñi i cʼabaʼ, Jehová, miʼ yʌcʼ ti cʌjñel bajcheʼ ñoj yilal yicʼot ti chuqui miʼ mejlel i sujtesan i bʌ.

Miʼ pʌsbeñonla chaʼan Dios miʼ chʼʌmonla ti ñuc. Jiñi yom bʌ i yʌl i cʼabaʼ Dios miʼ pʌsbeñonla chaʼan Dios miʼ cʼuxbin jiñi melbil tac bʌ i chaʼan yicʼot joñonla jaʼel. Cheʼ miʼ subeñonla i cʼabaʼ miʼ pʌsbeñonla chaʼan yom mi laj cʌn. Jiñʌch tsiʼ ñaxan mulaj i subeñonla i cʼabaʼ cheʼ maxto laj cʼajtibe. Tsiquil chaʼan Dios mach yomic chaʼan mi lac ñaʼtan chaʼan ñajt an ti lac tojlel o chaʼan mach mejlic lac sujtel tiʼ yamigo, yom bʌ jiñʌch cheʼ mi lac lʌcʼtesan lac bʌ tiʼ tojlel (Salmo 73:28).

Cheʼ mi laj cʼʌn i cʼabaʼ, mi lac pʌs chaʼan mucʼʌch laj qʼuel ti ñuc. Ñaʼtancu chaʼan a wom sujtel tiʼ yamigo juntiquil quixtañu i maʼ suben chaʼan miʼ pejcañet ti a cʼabaʼ. ¿Bajcheʼ mi caj a wubin a bʌ cheʼ mach yomic i cʼʌn a cʼabaʼ? Tajol mi caj a ñaʼtan chaʼan mach yom sujtel ti a wamigo. Cheʼʌch miʼ yujtel jeʼel tiʼ tojlel Jehová. Tsaʼix i subeyonla chuqui i cʼabaʼ i yom chaʼan mi laj cʼʌn. Cheʼ mucʼʌch lac mel (chaʼlen), mi lac pʌsben chaʼan la com lac lʌcʼtesan lac bʌ tiʼ tojlel. Jiñi Biblia miʼ yʌl chaʼan Dios yujil majqui woli (choncol) i ñaʼtʌben i cʼabaʼ (Malaquías 3:16).

Ñuc i cʼʌjñibal cheʼ la cujil chuqui i cʼabaʼ Dios chaʼan mi lac tech laj cʌn. Pero mach cojic jach jiñi, yomʌch mi laj cʌn bajcheʼ yilal jaʼel.