¿Majqui jiñi Dios?
Cabʌl quixtañujob miʼ yʌlob chaʼan miʼ ñopob Dios, pero cheʼ mi laj cʼajtibeñob majqui Dios, mach junlajalic miʼ jacʼob. An muʼ bʌ i ñopob chaʼan juntiquilʌch wen tsʌts bʌ xmeloñel, muʼ bʌ i mulan i yʌqʼuen i xotʼ i mul jiñi quixtañujob tiʼ caj miʼ melob mach bʌ weñic. Yambʌlob miʼ yʌlob chaʼan Dios yujil cʼuxbiya, i chaʼan mach yʌlʌyic chuqui mi lac mel, tiʼ pejtelel ora miʼ ñusʌbeñonla lac mul. I an muʼ bʌ i yʌlob chaʼan Dios wen ñajt an ti lac tojlel, i mach i wentajic jiñi quixtañujob. Come mach lajalic bajcheʼ miʼ ñaʼtʌntel, tajol jiñi yambʌlob miʼ ñaʼtañob chaʼan mach mejlic laj cʌn Dios.
¿Am ba i cʼʌjñibal cheʼ mi laj cʌn Dios? Añʌch. Cheʼ a cʌñʌ ti wen jiñi Dios miʼ mejlel i yʌqʼuen i sujmlel a cuxtʌlel (Hechos 17:26-28). Cheʼ maʼ ñumen lʌcʼtesan a bʌ tiʼ tojlel, mi caj i ñumen cʼuxbiñet yicʼot mi caj i ñumen coltañet (Santiago 4:8). Mi tsaʼ cʼoti a cʌn ti wen Dios, mi caj a mejlel ti chumtʌl tiʼ pejtelel ora (Juan 17:3).
¿Bajcheʼ miʼ mejlel a cʌn Dios? Ñaʼtancu juntiquil a wen cʌñʌ bʌ, juntiquil wem bʌ a wamigo. ¿Bajcheʼ tsaʼ sujtiyetla ti wem bʌ laʼ wamigo laʼ bʌ? Tiʼ sujm, tsaʼ ñaxan cʌmbe i cʼabaʼ, ti wiʼil, tsaʼ caji a cʌn bajcheʼ yilal i melbal tac, chuqui miʼ mulan i chuqui maʼañic, tsaʼ bʌ i mele yicʼot yomto bʌ i mel. Jiñi tsaʼ bʌ a cʌñʌ majlel tsiʼ yʌcʼʌ chaʼan maʼ ñumen lʌcʼtesan a bʌ tiʼ tojlel.
Lajal jaʼel tiʼ tojlel Dios, jatet miʼ mejlel a cʌn cheʼ maʼ sʌclʌben i jacʼbal ili cʼajtiya tac.
Ili revista tsaʼ mejli chaʼan maʼ cʌn baqui bʌ i jacʼbal miʼ yʌcʼ jiñi Biblia chaʼan ili cʼajtiya tac. Jiñi yambʌ temaj tac mi caj i coltañet a cʌn majqui jiñi Dios yicʼot bajcheʼ miʼ coltañet cheʼ maʼ sujtel tiʼ yamigo.