ANQUESE jiñi ñaxam bʌ lac tatob tsiʼ ñusayob tʼan i tsiʼ cʌybeyonla jiñi mulil yicʼot chʌmel (sajtel), jiñi ñaʼtʌbil bʌ i chaʼan Dios tiʼ tojlel jiñi wiñicob xʼixicob (quixtañujob) maʼañic qʼuextʌyem. Yaʼ ti Biblia, Dios miʼ chʌn subeñonla chaʼan maʼañic qʼuextʌyem chuqui ñaʼtʌbil i chaʼan.

• «Mi caj i yʌqʼuentelob jini pañimil jini tojoʼ bʌ. Mi caj i yajñelob tiʼ pejtelel ora» (Salmo 37:29).

• «Lac Yum mi caj i junyajlel jisan jini pʼʌtʌl bʌ muʼ bʌ i yʌcʼonla ti chʌmel. Cheʼ jini maʼanix majqui mi caj i chʌmel tiʼ pejtelel ora. Lac Yum Dios mi caj i sujcubeñonla i yaʼlel lac wut» (Isaías 25:8).

• «Mi caj i jisan jaʼel jini cojix bʌ laj contra muʼ bʌ i yʌcʼ ti chʌmel lac bʌcʼtal» (1 Corintios 15:26).

• «Maʼanix majch miʼ caj ti chʌmel. Maʼanix ucʼtaya mi uqʼuel mi wocol tiʼ pejtelel ora» (Apocalipsis [Revelación] 21:4).

¿Chuqui mi caj i mel Dios chaʼan mi junyajlel jisan jiñi chʌmel? Cheʼ bajcheʼ tsaʼix laj qʼuele, jiñi Biblia miʼ yʌl chaʼan ‹jini tojoʼ bʌ mi caj i yajñelob tiʼ pejtelel ora› ila ti Pañimil. Pero miʼ yʌl jaʼel chaʼan «maʼanic ti pañimil mi juntiquilic muʼ bʌ i mel chuqui utsʼat tiʼ pejtelel ora. Maʼanic toj bʌ mach bʌ anic miʼ wis chaʼlen mulil» (Eclesiastés 7:20). ¿Yom ba i yʌl iliyi chaʼan Dios maʼañix mi caj i chʼʌm ti ñuc i mandar chaʼan mi lac mejlel ti chumtʌl tiʼ pejtelel ora? Maʼañic, come ‹mach yujilic lot› (Tito 1:2). Cheʼ jiñi, ¿chuqui mi caj i mel chaʼan miʼ tsʼʌctesan jiñi ñaʼtʌbil bʌ i chaʼan tiʼ tojlel jiñi quixtañujob?

Jiñi cʼuxbiya jiñʌch tsaʼ bʌ i ñijcʌbe i pusicʼal Jehová chaʼan miʼ locʼsañonla tiʼ pʼʌtʌlel jiñi chʌmel cheʼ bʌ tsiʼ yʌcʼʌ i tojol laj coltʌntel. Cheʼ bʌ jiñi Biblia miʼ taj ti tʼan i tojol laj coltʌntel, yom i yʌl chaʼan jiñʌch i tojol muʼ bʌ i yʌjqʼuel chaʼan chuqui tsaʼ sajti o chaʼan miʼ mejlel chuqui toj bʌ. Jiñi i tojol laj coltʌntel yom lajal cheʼ bajcheʼ tsaʼ bʌ sajti. Come ti lac pejtelel laj xmulilonla yicʼot mi lac chʌmel, jiñi Biblia miʼ yʌl: «Maʼanic majch mi mejlel i tojben i mul i piʼʌl chaʼan miʼ loqʼuel tiʼ pʼʌtʌlel mulil. Mach mejlic i yʌqʼuen Dios i tojol i mul, come wen letsem i tojol i cuxtʌlel. Mach mejlic i toj tiʼ pejtelel ora» (Salmo 49:7, 8).

Cheʼ bʌ an majqui miʼ chʌmel maʼañic miʼ mejlel i bajñel coltan i bʌ yicʼot maʼañic miʼ mejlel i tojben i mul yambʌlob, cojach miʼ bajñel toj i mul (Romanos 6:7). Wen i cʼʌjñibal bʌ lac chaʼan jiñʌch cheʼ juntiquil toj bʌ yicʼot mach bʌ añic i mul miʼ yʌcʼ i cuxtʌlel chaʼan miʼ toj lac mul (Hebreos 10:1-4).

Ili jiñʌch tsaʼ bʌ i mele Dios. Tsiʼ choco tilel i Yalobil, jiñi Jesús, ila ti Pañimil chaʼan miʼ yajñel bajcheʼ toj bʌ wiñic (1 Pedro 2:22). Jesús tsiʼ yʌlʌ chaʼan tsaʼ tili «chaʼan miʼ yʌcʼ i bʌ ti chʌmel chaʼan i tojol i mul cabʌlob» (Marcos 10:45). Tsaʼ chʌmi chaʼan miʼ jisan jiñi chʌmel yicʼot chaʼan mi lac mejlel ti chumtʌl tiʼ pejtelel ora (Juan 3:16).

Ili ora wen bʌbʌqʼuen jax bajcheʼ chumulonla, ili miʼ pʌsbeñonla chaʼan chumuloñixla «ti cojix bʌ qʼuin tac» ti ili jontol bʌ pañimil (mulawil), cheʼ bajcheʼ miʼ yʌl jiñi Biblia (2 Timoteo 3:1). Jiñi cojix bʌ qʼuin mi caj i jilel cheʼ «tiʼ qʼuiñilel meloʼ mulil, cheʼ miʼ tojob i mul jini winicob xʼixicob muʼ bʌ i ñusañob Dios» (2 Pedro 3:3, 7). Pero jiñi muʼ bʌ  i cʼuxbiñob Dios maʼañic mi caj i jisʌntelob i cheʼ jaʼel «maʼanic miʼ jilel i cuxtʌlel» (Mateo 25:46).

Cheʼ jaʼel, cabʌl lac piʼʌlob muʼ bʌ caj i chaʼ tejchesʌntelob mi caj i mejlelob ti chumtʌl tiʼ pejtelel ora. Jesús mucʼʌch i mejlel i chaʼ chʼojyesan jiñi chʌmeñoʼ bʌ. Cheʼ bʌ tsajñi ti jumpʼejl tejclum i cʼabaʼ Naín, jiñi i pʼuntaya tsiʼ ñijcʌbe i pusicʼal chaʼan miʼ chaʼ aqʼuen i cuxtʌlel i yalobil juntiquil mebaʼ xʼixic (Lucas 7:11-15). Jiñi apóstol Pablo tsiʼ yʌlʌ jaʼel: «Añʌch c pijtaya ti Dios, [...] come tal i yorajlel cheʼ mi caj i chʼojyelob jini chʌmeñoʼ bʌ, jini tojoʼ bʌ yicʼot jini mach bʌ tojobic» Ili pijtaya jiñʌch muʼ bʌ i pʌs chaʼan bajcheʼ Dios miʼ wen cʼuxbin jiñi quixtañujob (Hechos 24:15).

Yonlel lac piʼʌlob mi caj i mejlelob ti chumtʌl tiʼ pejtelel ora. Jiñi Biblia miʼ yʌl: «Mi caj i yʌqʼuentelob jini pañimil jini tojoʼ bʌ. Mi caj i yajñelob tiʼ pejtelel ora» (Salmo 37:29). Cheʼ miʼ tsʼʌctiyel iliyi mi caj i yʌlob yicʼot i tijicñʌyel jiñi tʼan añix bʌ 2 mil jab tsiʼ yʌlʌ jiñi apóstol Pablo: «¿Bacan i cʼuxel cheʼ mi lac chʌmel? ¿Bacan miʼ mʌjlel i chaʼan jini mucoñibʌl?» (1 Corintios 15:55). Ti jimbʌ ora, mi caj jilel jiñi chʌmel.