Dios tiʼ sube: «Ti jini qʼuin cheʼ maʼ cʼuxben i wut wersa mi caj a chʌmel» (Génesis 2:17). Mi mucʼʌch caj i ñoxʼan yicʼot i chʌmel (sajtel) jiñi Adán, maʼañic i cʼʌjñibal cheʼ tiʼ sube jiñi. Adán yujil chaʼan mi maʼañic miʼ cʼuxben i wut jiñi teʼ, maʼañic miʼ caj ti chʌmel.

Jiñi Adán yicʼot Eva mach cʼʌñʌlic miʼ cʼuxbeñob i wut jiñi teʼ chaʼan cuxul miʼ yajñelob come yaʼ ti pʌcʼʌbʌl an yambʌ teʼ tac muʼ bʌ i yʌcʼ i wut (Génesis 2:9). Machic tsiʼ cʼuxbeyob i wut jiñi teʼ, tsiʼ jacʼbeyob i tʼan yubil jiñi tsaʼ bʌ i yʌqʼueyob i cuxtʌlel yicʼot tsiʼ chʼʌmʌyob ti ñuc chaʼan jiñʌch Dios am bʌ tiʼ wenta chaʼan miʼ subeñob chuqui yom miʼ melob.

Chaʼan miʼ cʼotel lac chʼʌmben i sujm chucoch tsaʼ chʌmiyob Adán yicʼot Eva an chuqui yom mi lac tsajin come jiñʌch tsaʼ bʌ i teche jiñi lac wocol cʼʌlʌl ili ora. Satanás, juntiquil jontol bʌ ángel, tsiʼ cʼʌñʌ juncojt lucum chaʼan miʼ yʌl ñuc bʌ lot. Jiñi Biblia miʼ yʌl: «Ñumen pʼipʼ i pusicʼal jini lucum bajcheʼ pejtelel yan tac bʌ bʌteʼel tsaʼ bʌ i mele lac Yum Dios. Jini lucum tsiʼ sube jini xʼixic: ¿Isujm ba tsiʼ yʌlʌ Dios: Mach yomic mi laʼ cʼuxben i wut pejtel jini teʼ am bʌ ti jini pʌcʼʌbʌl?» (Génesis 3:1).

Eva tsiʼ jacʼbe: «Miʼ mejlel j cʼux lojon i wut jini teʼ tac am bʌ ti pʌcʼʌbʌl. Pero Dios tsiʼ yʌlʌ: Mach yomic mi laʼ cʼux i wut jini teʼ am bʌ ti yojlil jini pʌcʼʌbʌl. Mach laʼ tʌl ame chʌmiquetla». Cheʼ jiñi, jiñi lucum tsiʼ yʌlʌ: «Maʼanic mi caj laʼ chʌmel. Yujil Dios mux i cajñel laʼ wut cheʼ mi laʼ cʼuxben i wut jini teʼ. Lajal mi caj laʼ wajñel bajcheʼ Dios. Mi caj laʼ cʌn chuqui tac utsʼat yicʼot chuqui tac jontol». Yicʼot ili tʼan tac, Satanás tsiʼ yʌcʼʌ ti ñaʼtʌntel chaʼan Jehová juntiquil xlot yicʼot chaʼan woli (choncol) i mʌctañob i mel chuqui wen (Génesis 3:2-5).

Eva tsaʼ yajli tiʼ yac Satanás. Tsaʼ caji i wen qʼuel jiñi teʼ chaʼan utsʼatax, i tʼojol jax. Jin chaʼan tsiʼ tucʼbe i wut yicʼot tsaʼ caji i cʼux. Jiñi Biblia miʼ yʌl chuqui tsaʼ bej ujti: «Tsiʼ yʌqʼue i ñoxiʼal. Tsiʼ cʼuxu jaʼel» (Génesis 3:6).

¡Chʼijiyem jax tsiʼ yubi i bʌ Dios cheʼ bʌ tsiʼ qʼuele chaʼan jiñi cʼuxbibil bʌ i yalobilob tsiʼ yajcayob i ñusʌben i tʼan! ¿Chuqui tsiʼ mele? Jehová tiʼ sube Adán: «Mi caj a chaʼlen buʼlich chaʼan wersa eʼtel chaʼan maʼ taj a waj, cʼʌlʌl maʼ sujtel ti lum, come tsac meleyet ti tsʼubejn. Tsʼubeñet. Mi caj a chaʼ sujtel ti tsʼubejn» (Génesis 3:17-19). I cheʼʌch  tsaʼ ujti, «anix joʼcʼal i yuxbajcʼ yicʼot lujumpʼejl i chaʼcʼal (930) i jabilel Adán cheʼ bʌ tsaʼ chʌmi» (Génesis 5:5). Cheʼ bʌ tsaʼ chʌmi, maʼañic baqui tsaʼ majli, mi yaʼicto ti panchan. Cheʼ bʌ maxto i mele Jehová ti tsʼubejn, Adán maxto cuxulic, i cheʼ baqui ora tsaʼ chʌmi tsaʼ chaʼ sujti ti tsʼubejn, yom bʌ i yʌl, chaʼan tsaʼ jili. ¡Pʼumpʼum jax chuqui tsaʼ ujti tiʼ tojlel!

Come maʼañic tsiʼ jacʼbeyob i tʼan Dios, Adán yicʼot Eva tiʼ sʌtʌyob toj bʌ i bʌcʼtal yicʼot maʼañix tsaʼ mejliyob ti chumtʌl tiʼ pejtelel ora. Ti jiñi bʌ ora an chuqui tsaʼ ujti tiʼ tojlelob: Tsaʼix caji i tajob i sajtemal yicʼot tsaʼ sujtiyob ti xmulil. Mach jiñob jach tsaʼ caji i tajob wocol cheʼ bʌ maʼañic tsiʼ jacʼʌyob tʼan, jiñi i pʼolbalob tsaʼ sujtiyob ti xmulil jeʼel. Romanos 5:12 miʼ yʌl: «Tsaʼ ochi mulil ti pañimil chaʼan tiʼ mul juntiquil winic i cʼabaʼ Adán. Jini mulil tsiʼ yʌcʼʌ ti chʌmel pejtel winicob xʼixicob. Jini chaʼan mi lac chʌmel ti lac pejtelel, come tsaʼ lac chaʼle mulil ti lac pejtelel».

Jiñi Biblia miʼ yʌl chaʼan jiñi chʌmel lajal bajcheʼ jumpʼejl pisil muʼ bʌ i bʌcʼ tiʼ pejtelel jiñi tejclum tac yicʼot bajcheʼ jumpʼejl jalbil bʌ muʼ bʌ i mos tiʼ pejtelel jiñi país tac (Isaías 25:7, TNM). Ili yom i yʌl chaʼan maʼañic miʼ mejlel lac putsʼtan jiñi mulil yicʼot jiñi chʌmel. Cheʼʌchi, woli (yʌquel) i chʌmelob yonlel quixtañujob tiʼ caj Adán (1 Corintios 15:22). Pero wʌle bʌ ora, mi lac mejlel laj cʼajtiben lac bʌ jiñi tsaʼ bʌ cʼajtibe i bʌ Pablo: «¿Majqui mi caj i locʼsañon tiʼ pʼʌtʌlel jini tsucul bʌ c pusicʼal muʼ bʌ i yʌcʼon ti chʌmel?». ¿Majqui miʼ mejlel i coltañonla? (Romanos 7:24).