LAʼ cu lac ñaʼtan chaʼan an majqui miʼ subeñet tiʼ tojlel juntiquil xcʼay tsaʼ bʌ wen cʌjñi. I tajol an jumpʼejl i cʼay muʼ bʌ a wen mulʌben. Miʼ subeñet chaʼan jiñi xcʼay, cheʼ bʌ xcʼalʌlto, miʼ mulan cʼay, tsaʼ caji i wen ñop i xucʼu xucʼul tsaʼ caji i ñumen cʌn majlel. Tiʼ wiʼil, tsaʼ majli ti tejclum tac chaʼan miʼ chaʼlen cʼay ti qʼuiñijel tac, i cheʼ bajcheʼ jiñi, tsaʼ caji ti wen cʌjñel majlel. Pero miʼ subeñet chaʼan tsaʼ ñoxʼa i tsaʼ chʌmi (sajti).

Tiʼ sujm tsaʼʌch ujti jiñi, pero jiñi xcʼay chʌmeñix. Mi muqʼuic i subeñetob tiʼ tojlel juntiquil maestro, doctor o chaʼan yambʌ quixtañu wen cʌmbil bʌ cheʼʌch miʼ yujtelob jaʼel. Anquese cabʌl chuqui tsaʼ cʼoti i mel (chaʼlen) cheʼ bʌ cuxulto, tajol mi laj cʼajtiben lac bʌ chuquito tsaʼ bej mejli i mel cheʼ machic tsaʼ chʌmi.

Chʼijiyemtic jax, pero ti lac pejtelel mi caj lac chʌmel jaʼel (Eclesiastés 9:5). Anquese an lac chaʼle wersa, maʼañic miʼ mejlel lac putsʼtan jiñi ñoxlel yicʼot chʌmel. Cheʼ jaʼel, miʼ mejlel lac chʌmel tiʼ caj jumpʼejl cʼamʌjel o an chuqui mi lac chaʼlen. Cheʼ bajcheʼ miʼ yʌl jiñi Biblia, ‹lajal laj cuxtʌlel bajcheʼ i yowix jaʼ. Poj tsiquil jumucʼ. Ti wiʼil mach tsiquilix› (Santiago 4:14).

An wiñicob xʼixicob (quixtañujob) muʼ bʌ i ñaʼtañob chaʼan mach laj cʌñʌyic chuqui mi caj i yujtel ti laj cuxtʌlel yicʼot chaʼan maʼañic i sujmlel, jin chaʼan mi yʌlob: «Laʼ lac chaʼlen weʼel uchʼel, come mach jalix mi caj lac chʌmel» (1 Corintios 15:32). Pero tiʼ sujm, cheʼ mi yʌlob iliyi, miʼ ñaʼtañob chaʼan mucʼʌch caj i chʌmelob. Ti lac pejtelel mi cʼotel laj cʼajtiben lac bʌ mi añʌch i sujmlel jiñi laj cuxtʌlel, ñumento cheʼ woli (choncol) lac ñusan tsʌts bʌ wocol. ¿Baqui miʼ mejlel lac tajben i jacʼbal jiñi cʼajtiya?

Yonlel quixtañujob miʼ sʌclañob ti jiñi ciencia. Jiñi am bʌ i locʼsayob jiñi científicojob yicʼot doctorob an i coltayonla chaʼan bej cuxulonla, i an yambʌlob woli (yʌquel) bʌ i sʌclañob chuqui yom melol chaʼan mi lac mejlel ti chumtʌl ti cabʌl jab. Anquese woli melob jiñi, an cʼajtiya tac yomto bʌ i jacʼbal: ¿Chucoch mi lac ñoxʼan yicʼot mi lac chʌmel? ¿Maʼañix ba mi caj lac chʌmel baʼ ora? Ti jiñi temaj tac muʼ bʌ caj i tilel mi caj lac tsajin yicʼot mi caj lac jacʼ ili cʼajtiya: ¿Am ba i sujmlel jiñi laj cuxtʌlel?