DIOS mach cheʼic tsiʼ mulaj jiñi laj cuxtʌlel bajcheʼ mi laj qʼuel ili ora. Tsiʼ mulaj chaʼan jiñi Lum miʼ bujtʼel ti wiñicob xʼixicob (quixtañujob) muʼ bʌ i chʼʌmob ti ñuc i yumʌntel, miʼ tajob i wenlel chaʼan i ticʼojel tac yicʼot miʼ lajibeñob jiñi utsʼatax bʌ i melbal tac. Cheʼ jaʼel, miʼ chumtʌlob tiʼ ñʌchʼtʌlel, tijicña miʼ yajñelob yicʼot i familia, chaʼan cabʌl chuqui miʼ cʌñob yicʼot miʼ sujtesañob ti jumpʼejl Paraíso ili Lum.

• «Miʼ yujtesan guerra cʼʌlʌl tiʼ pejtelel pañimil» (Salmo 46:9).

• «I yorajlelix maʼ jisan jini muʼ bʌ i jisañob pañimil» (Apocalipsis 11:18).

• «Maʼanix mi juntiquilic muʼ bʌ caj i yʌl: ‹Cʼamon›» (Isaías 33:24).

• «Tijicñayob jini yajcʌbiloʼ bʌ c chaʼan, come i chaʼañobʌch pejtelel i wut i yeʼtel» (Isaías 65:22).

¿Bajcheʼ mi caj i tsʼʌctiyel ili profecía tac? Dios tsiʼ waʼchoco i Yalobil, Jesús, bajcheʼ Rey ti jumpʼejl Yumʌntel toj bʌ yaʼ ti panchan chaʼan miʼ mel i yeʼtel (troñel) ila tiʼ Pañimil. Jiñi Biblia miʼ suben bajcheʼ i Yumʌntel Dios (Daniel 2:44). Miʼ yʌl jaʼel tiʼ tojlel Jesús: «Lac Yum Dios mi caj i yʌqʼuen i yeʼtel ti Rey. [...] Maʼanic mi caj i jilel i yumʌntel» (Lucas 1:32, 33).

Cheʼ bʌ wʌʼto an ti Lum, Jesús tsiʼ mele cabʌl milagro tac chaʼan miʼ pʌs chaʼan cheʼ baqui ora miʼ chaʼlen yumʌntel, jiñi wiñicob xʼixicob wen mi caj i chumtʌlob.

• Tsiʼ lajmesa baqui jach bʌ cʼamʌjel, i cheʼʌch tsiʼ pʌsʌ chaʼan miʼ mejlel i junyajlel jisan (Mateo 9:35).

• Tsiʼ ñʌjchʼesa icʼ jaʼal, i cheʼʌch tsiʼ pʌsʌ chaʼan miʼ mejlel i ticʼ i pʼʌtʌlel tac ili Pañimil (Marcos 4:36-39).

• Tsiʼ mʌcʼla cabʌl wiñicob xʼixicob, i cheʼʌch tsiʼ pʌsʌ chaʼan miʼ mejlel i yʌqʼueñonla chuqui i cʼʌjñibal lac chaʼan (Marcos 6:41-44).

• Ti jumpʼejl ñujpuñel tiʼ sujtesa jiñi jaʼ ti vino, i cheʼʌch tsiʼ pʌsʌ chaʼan mi caj lac ñusan ti wen jiñi laj cuxtʌlel cheʼ bʌ miʼ chaʼlen yumʌntel (Juan 2:7-11).

¿Chuqui yom maʼ mel chaʼan maʼ taj pejtelel ñaʼtʌbil bʌ i chaʼan Dios tiʼ tojlel jiñi muʼ bʌ i cʼuxbiñob? An jumpʼejl ‹bij› yom bʌ maʼ tsajcan. Jiñi Biblia miʼ yʌl chaʼan jiñʌch jumpʼejl ‹bijlel baʼ mi lac taj laj cuxtʌlel›, i mach cabʌlobic muʼ bʌ i tajob (Mateo 7:14).

¿Chuqui yom i yʌl jiñi bij muʼ bʌ i yʌqʼueñonla laj cuxtʌlel maʼañic bʌ i jilibal? Jiñʌch pejtelel chuqui miʼ subeñonla lac mel Dios. Miʼ subeñonla: «Joñon a Yumon, a Dioson muʼ bʌ j cʌntesañet chaʼan maʼ taj chuqui wen. Joñon mic tojʼesañet ti a bijlel baʼ yom maʼ chaʼlen xʌmbal» (Isaías 48:17). Cheʼ mi la cajñel ti jiñi bij jiñʌch ñumen wem bʌ bajcheʼ mi lac chumtʌl.

 Jesús tsiʼ yʌlʌ: «Joñon i bijlelon isujmlelon, i cuxtʌlelon» (Juan 14:6). Cheʼ mi lac ñop jiñi i cʌntesa tac Jesús yicʼot mi lac lajin tsaʼ bʌ i mele, miʼ lʌcʼtesañonla ti Dios i ñumen wen bajcheʼ mi lac chumtʌl.

¿Bajcheʼ miʼ mejlel lac taj jiñi bij? Anquese an cabʌl ñopbalʌl o bij tac, Jesús tsiʼ yʌlʌ: «Mach ti pejtelobic muʼ bʌ i pejcañoñob tiʼ yum mi caj i yochelob tiʼ yumʌntel jini am bʌ ti panchan. Jini jach muʼ bʌ i melob bajcheʼ yom c Tat ti panchan mi caj i yochelob» (Mateo 7:21). Cheʼ jaʼel, tsiʼ yʌlʌ: «Tiʼ wut jach mi laʼ cʌn lot bʌ xʼaltʼañob» (Mateo 7:16). Jiñi Biblia miʼ mejlel i coltañet a ñaʼtan baqui bʌ jiñi i sujm bʌ ñopbalʌl (Juan 17:17).

¿Chuqui yom maʼ mel chaʼan maʼ wajñel ti jiñi bij? Yom miʼ cʼotel a cʌn jiñi tsaʼ bʌ i yʌqʼueyonla laj cuxtʌlel. Yom maʼ ñaʼtan majqui, chuqui i cʼabaʼ, bajcheʼ yilal, chuqui woli (choncol) i mel yicʼot chuqui miʼ pijtan ti lac tojlel. *

Dios mach cojach yom chaʼan mi lac chaʼlen eʼtel, mi laj cʼux lac waj, mi lac ñusan lac bʌ i mi lac taj lac familia. Yom chaʼan miʼ cʼotel laj cʌn yicʼot mi lac sujtel tiʼ yamigo. Cheʼ mi lac jacʼben i tʼan, mi lac pʌs chaʼan mi laj cʼuxbin. Jesús tsiʼ yʌlʌ: «Jiñʌch i cuxtʌlel mach bʌ anic miʼ jilel, cheʼ miʼ cʌñetob jini mero Dios, jini cojach bʌ» (Juan 17:3).

Chaʼan maʼ wʌqʼuen i tijicñʌyel jiñi i sujm bʌ Dios, tajol an chuqui yom maʼ qʼuextan ti a cuxtʌlel. Anquese wocolʌch, ili utsʼatax bʌ xʌmbal miʼ tejchel cheʼ añʌch chuqui mi lac ñaxan mel. Mi an a cʼajtiya i chaʼan bʌ Dios, cʼajtin jumpʼejl estudio loqʼuem bʌ ti Biblia yaʼ ti lon c página i chaʼan Internet www.pr418.com/ctu. Jiñi i testigojonbʌlon Jehová mi caj lon c mulan lon c julaʼtañet yaʼ baqui a wom yicʼot bajcheʼ ora maʼ mulan.