¿I tojel ba cheʼ mi lac mulan chumtʌl tiʼ pejtelel ora? Jiñʌchi. Jiñi Biblia miʼ yʌl chaʼan Dios jiñʌch tsaʼ bʌ i yotsa ti lac pusicʼal (Eclesiastés 3:11, TNM). Cheʼ jaʼel, miʼ yʌl chaʼan «cʼuxbiyajʌch Dios» (1 Juan 4:8). Cheʼ mi lac chʼʌm ti ñuc iliyi, ¿am ba i sujmlel cheʼ Dios tsiʼ meleyonla chaʼan mi lac mulan chumtʌl tiʼ pejtelel ora mi maʼañic mi caj i tsʼʌctiyel lac chaʼan?

Maʼañic majqui yom chʌmel (sajtel). Jiñi Biblia miʼ yʌl chaʼan jiñi chʌmel juntiquilʌch «laj contra» (1 Corintios 15:26). An i tajol mi lac chʌmel cheʼ maxto wen añic lac jabilel, yambʌlob jalixto cuxulob, pero ti wiʼil mi caj lac luʼ chʌmel. Cabʌl wiñicob xʼixicob (quixtañujob) maʼañic miʼ mulañob i ñaʼtan chaʼan mi caj i chʌmelob, mucʼ jach i bʌcʼñañob. ¿Muʼ ba cajel lac mʌlben (jotben) ti jumpʼejl bʌ qʼuin ili laj contra?

¿A wujil ba chaʼan Dios maʼañic baqui ora tsiʼ mulaj chaʼan mi lac chʌmel? Jiñi libro chaʼan Génesis miʼ pʌs chaʼan Dios tsiʼ mulaj chaʼan cuxulonla tiʼ pejtelel ora ila ti Pañimil. Jehová * utsʼat tsiʼ chajpa ili pañimil chaʼan wen miʼ chumtʌlob jiñi wiñicob xʼixicob yicʼot i tijicñʌyel. Cheʼ jiñi, tsiʼ mele jiñi ñaxam bʌ wiñic i cʼabaʼ Adán i tsiʼ yʌcʼʌ yaʼ ti pʌcʼʌbʌl Edén. Ti wiʼil, Dios «tsiʼ qʼuele pejtel i melbal. Awilan, wen utsʼat» (Génesis 1:26, 31).

Adán tsaʼ mejli tiʼ yejtal Dios, juntiquil toj bʌ wiñic (Deuteronomio 32:4). Cheʼ jeʼel, jiñi i yijñam i cʼabaʼ  Eva wen i tʼojol jax yicʼot toj i pensar. Jehová tiʼ subeyob: «Laʼ pʼojliquetla. Butʼula jini pañimil. Cʼʌñʌla. Laʼ i yumañetla jini chʌy yicʼot jini mut yicʼot pejtel cuxul tac bʌ muʼ bʌ ti xʌmbal ti pañimil» (Génesis 1:28).

Yomʌch miʼ ñumel cabʌl i yorajlel chaʼan jiñi i pʼolbal Adán yicʼot Eva miʼ butʼob ili Pañimil. Chaʼan miʼ tsʼʌctesañob jiñi ñaʼtʌbil bʌ i chaʼan Dios, Eva yom miʼ tilel i yalobilob yicʼot miʼ bej p’ojlelob jinto miʼ bujtʼel pejtelel Pañimil (Isaías 45:18). Mi jiñi Adán yicʼot Eva maʼañic mi caj i qʼuelob cheʼ bʌ miʼ tsʼʌctesan chuqui ñaʼtʌbil i chaʼan Dios chaʼan ili Pañimil yicʼot chaʼan cojach cuxul mi caj i yajñelob chaʼan miʼ qʼuelob i yalobilob yicʼot i butsob (mamob), ¿am ba i sujmlel cheʼ Dios tsiʼ yʌqʼueyob jiñi mandar?

Ñaʼtancu chaʼan cheʼ yom miʼ cʌntañob jiñi añimal tac. Adán yom miʼ yotsʌben i cʼabaʼ jiñi añimal tac i mach ti orajic tsaʼ ujti i mel (Génesis 2:19). Cheʼ jeʼel, chaʼan miʼ ñaʼtan bajcheʼ mi caj i cʌntan pejtelel jiñi cuxul tac bʌ yom miʼ wen cʌñob, jin chaʼan yom miʼ yʌqʼuen cabʌl i yorajlel.

Jin chaʼan, jiñi chaʼpʼejl mandar tsaʼ bʌ i yʌqʼue Dios jiñi Adán yicʼot Eva chaʼan yom miʼ cʌntañob jiñi añimal tac yicʼot miʼ butʼob jiñi Pañimil miʼ pʌs chaʼan Dios tsiʼ meleyob chaʼan miʼ chumtʌlob tiʼ pejtelel ora. Jiñi Adán cabʌl jab tsaʼ chumle.

Jiñi Biblia miʼ yʌl chaʼan cheʼ bʌ maxto tilemic jiñi Butʼjaʼ, jiñi quixtañujob cabʌlto jab cuxulob, mach cheʼic bajcheʼ ili ora. Ti Génesis 5:5 miʼ yʌl: «Anix joʼcʼal i yuxbajcʼ yicʼot lujumpʼejl i chaʼcʼal (930) i jabilel Adán cheʼ bʌ tsaʼ chʌmi». Yicʼot miʼ taj ti tʼan wʌctiquil wiñicob ñumen bʌ ti 900 jab cuxulob: Jiñi Set, Enós, Quenán, Jared, Matusalén yicʼot Noé, añix bʌ 600 i jabilel cheʼ bʌ tsaʼ tili jiñi Butʼjaʼ (Génesis 5:6-27; 7:6; 9:29) ¿Chucoch tsaʼ mejliyob ti chumtʌl ti cabʌl jab?

Ili wiñicob tsaʼ yilayob pañimil cheʼ bʌ maxto wen jalic tiʼ sʌtʌyob toj bʌ i bʌcʼtal jiñi Adán yicʼot Eva. Tajol jiñʌch tsaʼ bʌ i coltayob chaʼan bej jalixto cuxulob. Pero ¿bajcheʼ miʼ taj i bʌ cheʼ la comʌch toj bʌ lac bʌcʼtal yicʼot cheʼ la com chumtʌl cabʌl jabil? Yicʼot ¿bajcheʼ mi caj i jilel jiñi chʌmel? Chaʼan mi lac jacʼ ili cʼajtiya tac yom mi lac ñaxan ñaʼtan chucoch mi lac ñoxʼan yicʼot mi lac chʌmel.