ILI tsaʼ bʌ i yʌlʌ jiñi rey Salomón miʼ pʌs bajcheʼ yubil mi la cubin lac bʌ ti lac pejtelel. Come mach wen jalic cuxulonla, jiñi wiñicob xʼixicob (quixtañujob) an i sʌclayob ti bele ora bajcheʼ miʼ mejlel i chumtʌlob ti cabʌl jab. An cabʌl cuento yicʼot leyenda tac muʼ bʌ i pʌs chaʼan cheʼʌchi.

Laʼ lac ñaʼtan tiʼ tojlel juntiquil rey i chaʼan Sumeria i cʼabaʼ Gilgamés. Ti jumpʼejl libro i chaʼan Gilgamés miʼ poj yʌjlel tiʼ tojlel chaʼan tsaʼ ñumi baqui bʌbʌqʼuen tac chaʼan miʼ sʌclan muʼ bʌ i yʌcʼ chaʼan maʼañic baʼ ora mi lac chʌmel (sajtel), pero maʼañic tsiʼ taja.

Añix cheʼ bʌ 2,400 jab cheʼ bʌ jiñi científicojob ti wajali, chʼoyoloʼ bʌ ti china, tsiʼ ñopoyob i mel (pʌt) jumpʼejl tsʼac japbil bʌ muʼ bʌ i tamʼesan laj cuxtʌlel, tsaʼ bʌ i tsʼitaʼ otsʌbeyob mercurio yicʼot arsénico, lajal bʌ bajcheʼ jaʼ. Miʼ ñaʼtʌntel chaʼan tsaʼ chʌmiyob chaʼtiquil uxtiquil reyob cheʼ tsiʼ japʌyob jiñi tsʼac. Ti wajali, yaʼ ti Europa, jiñi científicojob tsiʼ ñopo i cʼʌñob jiñi oro chaʼan miʼ bucʼob, tsiʼ ñaʼtayob chaʼan jiñʌch miʼ mejlel i coltañob chaʼan jal cuxulob.

Lajal bajcheʼ ti wajali tiʼ sʌclayob «jumpʼejl tsʼac japbil bʌ chaʼan miʼ tamʼesan laj cuxtʌlel», wʌle bʌ ora, jiñi científicojob woli (choncol) i bej chaʼleñob wersa i sʌclan chuqui tiʼ caj mi lac ñoxʼan. Pejtelel chuqui an i meleyob miʼ pʌs chaʼan jiñi quixtañujob miʼ bej ñopob chaʼan ti jumpʼejl bʌ qʼuin an chuqui mi caj i coltañonla chaʼan maʼañix mi lac ñoxʼan yicʼot mi lac chʌmel. Pero ¿chuqui an i tajayob?

Jiñi científicojob muʼ bʌ i tsajiñob lac célula an i wen tsictesayob chucoch mi lac ñoxʼan yicʼot mi lac chʌmel. Ti jiñi jabil tac ñumen bʌ tilel, jiñi científicojob an i meleyob chaʼan jiñi célula tac am bʌ i chaʼan jiñi añimal tac yicʼot quixtañujob miʼ bej jalʼan. Jin chaʼan, an quixtañujob wen añoʼ bʌ i taqʼuin am bʌ i coltayob jiñi científicojob chaʼan miʼ sʌclañob chuqui tiʼ caj mi lac chʌmel. ¿Chuqui an i tajayob chaʼan jiñi?

Woliʼ chaʼleñob wersa chaʼan jal cuxulonla. An científicojob muʼ bʌ i yʌlob chaʼan mi lac ñoxʼan tiʼ caj i tiʼ tac jiñi cromosoma (muʼ bʌ i tajtʌl tiʼ xiñil jiñi lac célula). Jiñi i tiʼ tac jiñʌch muʼ bʌ i cʌntan pejtelel muʼ bʌ i pʌs bajcheʼ yilalonla mi caj la cajel cheʼ bʌ jiñi lac célula tac miʼ tʼox i bʌ. Pero cheʼ miʼ yujtel iliyi, i tiʼ tac jiñi cromosoma miʼ jilel majlel. Ti wiʼil, jiñi  lac célula tac maʼañix miʼ chʌn tʼox i bʌ, cheʼ jiñi, muqʼuix laj cajel ti ñoxʼan.

Elizabeth Blackburn, tsaʼ bʌ aqʼuenti jiñi majtañʌl Nobel ti 2009, tsiʼ taja yicʼot i piʼʌlob ti eʼtel (troñel) jiñi muʼ bʌ i coltan i tiʼ tac jiñi cromosoma chaʼan maʼañic miʼ jilel majlel, i cheʼ jiñi, maʼañic miʼ ñoxʼan majlel jiñi lac célula tac. Pero tsaʼʌch i toj alʌyob chaʼan jiñi i tiʼ tac jiñi cromosoma maʼañic miʼ coltan jiñi quixtañujob chaʼan jal cuxulob.

I tojʼesʌntel jiñi célula tac. Cheʼ bʌ jiñi lac célula tac muqʼuix i ñoxʼan yicʼot maʼañix miʼ tʼox i bʌ, maʼañix miʼ chʌn coltan jiñi lac bʌcʼtal, jin chaʼan, miʼ lac sijtʼel, mi lac taj cʼuxyajiyel yicʼot yan tac bʌ. Maxto wen jali, jiñi científicojob chʼoyoloʼ bʌ ti Francia an i tojʼesayob jiñi célula tac tsaʼ bʌ i locʼsʌbeyob jiñi ñoxobix bʌ, i an ñumeñobix bʌ ti 100 i jabilel. Jiñi am bʌ tiʼ wenta jiñi eʼtel, jiñi maestro Jean-Marc Lemaître tsiʼ yʌlʌ chaʼan miʼ mejlel i coltʌntel jiñi célula tac chaʼan maʼañic miʼ ñoxʼan.

Yonlel científicojob miʼ yʌlob chaʼan anquese an tsʼac tac muʼ bʌ i coltañonla chaʼan maʼañic mi lac ñoxʼan, jiñi quixtañujob maʼañic mi caj i mejlelob ti chumtʌl ti cabʌl jab. I sujmʌch chaʼan jiñi laj cuxtʌlel tsaʼ caji ti ñumen weñʼan cheʼ ti 1801, wocolix i yʌlʌ chaʼan poco sʌcʼʌlonla, jiñi tsʼac tac chaʼan maʼañic mi laj cʼamʼan, antibiótico yicʼot vacuna tac. An científicojob muʼ bʌ i ñopob chaʼan cheʼ bajcheʼ cʼamel mi lac chumtʌl ili ora, yaʼʌch baqui jaxʌl o i wentʌlel yom miʼ cʼotel laj cuxtʌlel.

Añix cheʼ bʌ 3,500 jab, juntiquil xtsʼijbaya i chaʼan Biblia i cʼabaʼ Moisés tsiʼ yʌlʌ: «I ñajtlel lojon c jabilel jiñʌch lujumpʼejl i chʌncʼal (70). Mi pʼʌtʌlon lojon, mic taj lojon chʌncʼal jab [80]. Mic ñusan lojon tsʌts tac bʌ eʼtel yicʼot wocol. Miʼ jilel lojon c jabilel ti ora. Mic chʌmel lojon» (Salmo 90:10). Anquese jiñi quixtañujob an i chaʼleyob wersa chaʼan miʼ tamʼesañob laj cuxtʌlel, mi lac bej pijtan chaʼan miʼ yujtel ti lac tojlel tsaʼ bʌ i yʌlʌ Moisés.

An ajc muʼ bʌ i mejlel ti chumtʌl ñumen ti 150 jab yicʼot colem teʼ tac bajcheʼ jiñi chʼujteʼ muʼ bʌ i jalʼan ñumen ti 1,000 jab. Cheʼ mi lac lajin laj cuxtʌlel yicʼot yan tac bʌ, i tilelʌch cheʼ mi laj cʼajtiben lac bʌ: «¿Anto ba i sujmlel cheʼ cojach mi lac taj 70 o 80 lac jabilel?».