¿BAJCHEʼ MIʼ MEJLEL LAC JISAN JIÑI TSʼAʼLEYA?
4 | Sʌclan a coltʌntel ti Dios
Jiñi Biblia miʼ yʌl:
«Muʼ bʌ i yʌcʼ jiñi espíritu ti lac tojlel jiñʌch cʼuxbiya, tijicñʌyel, ñʌchʼtʌlel, pijt, wem bʌ lac pusicʼal, la cutslel, lac ñopoñel, cheʼ xucʼulon jachla yicʼot i ticʼol lac bʌ» (GÁLATAS 5:22, 23).
¿Chuqui yom i yʌl?
Tiʼ coltaya Dios miʼ mejlel a locʼsan jiñi tsʼaʼleya ti a pusicʼal i cheʼ jaʼel miʼ cʼʌn i yespíritu chaʼan maʼ taj wen tac bʌ a melbal mach bʌ a tajayic ti a bajñelil. Jin chaʼan mi la com lac locʼsan ti lac pusicʼal jiñi tsʼaʼleya, ñumen wen cheʼ mi lac sʌclʌben i coltaya Dios. Mi cheʼʌch mi lac mel, cheʼ mi caj i yujtel ti lac tojlel bajcheʼ jiñi apóstol Pablo. Tiʼ tsʼijbu: «An c pʼʌtʌlel chaʼan chuqui jach mic mel wocolix i yʌlʌ jiñi muʼ bʌ i yʌqʼueñon c pʼʌtʌlel» (Filipenses 4:13). Cheʼ bajcheʼ jiñi mi caj i mejlel la cʌl: «Yaʼ tilem j coltʌntel ti lac Yum» (Salmo 121:2).
Miʼ mejlel a mel iliyi:
«Wajali wen jontolon […]. Pero Jehová tiʼ sujtesayon ti juntiquil quixtañu wen uts bʌ» (WALDO).
Cʼajtiben Jehová chaʼan miʼ yʌqʼueñet jiñi chʼujul bʌ i yespíritu yicʼot chaʼan miʼ coltañet a taj wen tac bʌ a melbal (Lucas 11:13). Ili tac jiñʌch cʼuxbiya, ñʌchʼtʌlel, pijt yicʼot i ticʼol lac bʌ, wen ñuc i cʼʌjñibal iliyi chaʼan mi lac mʌlben (jotben) jiñi tsʼaʼleya. Qʼuele chuqui miʼ yʌl jiñi Biblia chaʼan jiñi melbalʌl tac i qʼuele bajcheʼ miʼ mejlel ti tsictiyel ti a cuxtʌlel. Ñuc i cʼʌjñibal jaʼel cheʼ maʼ ñochtan jiñi lac piʼʌlob muʼ bʌ i chaʼleñob wersa i pʌsob tiʼ cuxtʌlel jiñi melbalʌl tac come jiñʌch muʼ bʌ caj i coltañetob chaʼan maʼ pʌs cʼuxbiya yicʼot maʼ mel chuqui tac wen (Hebreos 10:24).