1, 2. a) ¿Bajcheʼ lajal ili pañimil yicʼot jiñi quixtañu muʼ bʌ caj i tsʌnsʌntel? (Qʼuele jiñi dibujo). b) Cheʼ bʌ miʼ jisʌntel ili pañimil, ¿bajcheʼ yubil mi caj i yubiñob jiñi añoʼ bʌ ti panchan yicʼot ti Pañimil?

ÑAʼTANCU iliyi. Yaʼ ti cárcel an juntiquil bʌbʌqʼuem bʌ xtsʌnsa muqʼuix bʌ caj i chʌmel (sajtel). Jiñi policíajob woli (choncol) i chucob majlel baqui mi caj i tsʌnsañob. Anquese cuxulto yicʼot wen cʼocʼ yilal, muqʼuix caj i chʌmel.

² Ili jontol bʌ pañimil (mulawil) lajalʌch bajcheʼ jiñi quixtañu muʼ bʌ caj i tsʌnsʌntel. Jiñi Biblia miʼ yʌl chaʼan ili pañimil mi caj i jilel (1 Juan 2:17). Jehová tsaʼix i ñaʼta i jisan, i cheʼʌch mi caj i mel. Pero mach lajalic mi caj i jisʌntel ili pañimil bajcheʼ jiñi quixtañu muʼ bʌ caj i tsʌnsʌntel. Tajol an muʼ bʌ i ñaʼtañob chaʼan mach tojic jiñi tsaʼ bʌ mejli tiʼ tojlel jiñi quixtañu, jin chaʼan mi caj i ñop i mʌctañob chaʼan maʼañic miʼ tsʌnsʌntel. Pero Jehová jiñʌch jiñi toj bʌ xmeloñel, i weñʌch cheʼ tsaʼix ñaʼta i jisan ili pañimil (Deuteronomio 32:4). I jilibal ili pañimil mach jalix mi caj i tilel. Cheʼ bʌ miʼ cʼotel i yorajlel, jiñi añoʼ bʌ ti panchan yicʼot Pañimil mi caj i yʌlob  chaʼan weñʌch tsaʼ bʌ i mele Jehová. ¡Wen tijicña mi caj i yubiñob!

3. ¿Baqui bʌ jiñi chʌnchajp wocol muʼ bʌ caj i jisan i Yumʌntel Dios?

³ ¿Chuqui mi caj i jisʌntel cheʼ bʌ miʼ tilel i jilibal ili pañimil? Lʌcʼʌlix mi caj i jilel tiʼ pejtelel mach bʌ weñic mi lac ñusan ti jujumpʼejl qʼuin. Ili wen tʼan yaʼʌch ochem ti jiñi «wen tʼan chaʼan i yumʌntel Dios» (Mateo 24:14). Ti ili temaj mi caj lac taj ti tʼan chʌnchajp wocol muʼ bʌ caj i jilel cheʼ ba ora miʼ tilel i Yumʌntel Dios. Jintacʌch iliyi: Jiñi jontoloʼ bʌ quixtañu, jiñi jontol bʌ organización tac, jiñi jontolil yicʼot cheʼ mach weñic bajcheʼ yilal chumulonla. Cheʼ bʌ mi lac tsajin majlel, mi caj laj qʼuel bajcheʼ miʼ ticʼlañonla, chuqui mi caj i mel Jehová chaʼan miʼ tojʼesan yicʼot chuqui mi caj i yotsan tiʼ qʼuexol.

4. ¿Bajcheʼ miʼ ticʼlañonla muʼ bʌ i melob jiñi jontoloʼ bʌ?

⁴ ¿Bajcheʼ miʼ ticʼlañonla? Jiñi apóstol Pablo tsiʼ yʌlʌ chaʼan ti jiñi cojix bʌ qʼuin «tal i yorajlel bʌbʌqʼuen tac bʌ». I tsiʼ yʌlʌ jaʼel chaʼan ñumen jontol mi caj i sujtelob jiñi wiñicob xʼixicob (quixtañujob) (2 Timoteo 3:1-5, 13). Woli (yʌquel) laj qʼuel ti tsʼʌctiyel tsaʼ bʌ wʌn ajli yaʼ ti Biblia, ¿ñomach? Cabʌl an lac taja wocol tiʼ caj jiñi jontol bʌ quixtañujob. An maʼañic bʌ miʼ mucob chuqui miʼ melob. Yañoʼ bʌ miʼ pʌsob chaʼan poj mucʼob ti coltaya, pero mach weñobic i pusicʼal. Anquese maʼan baʼ lac taja jiñi wocol, mucʼʌch i ticʼlañonla muʼ bʌ i melob jiñi jontol bʌ quixtañujob. ¿Mach ba bʌbʌqʼueñic mi laj qʼuel bajcheʼ miʼ ticʼlʌntel jiñi alobob, xñoxob yicʼot jiñi quixtañu mach añic miʼ mejlel i coltañob i bʌ? An quixtañujob jontoloʼ bʌ bajcheʼ juncojt bʌteʼel o cheʼob bajcheʼ xiba (Santiago 3:15). Pero tijicñayonla come jiñi Biblia miʼ yʌqʼueñonla lac pijtaya.

5. a) ¿Chuqui to miʼ mejlel i mel jiñi jontoloʼ bʌ ili ora? b) ¿Chuqui mi caj i chaʼleñob jiñi mach bʌ yomic i qʼuextañob i melbal?

⁵ ¿Chuqui mi caj i mel Jehová? Ili ora, Jehová woliʼ yʌqʼuen i yorajlel chaʼan jiñi jontoloʼ bʌ i melbal miʼ qʼuextañob i bʌ (Isaías 55:7). Anquese lʌcʼʌlix chaʼan miʼ jisʌntel ili jontol bʌ pañimil, Jehová maxto i chaʼle meloñel. Pero ¿chuqui mi caj i chaʼleñob jiñi mach bʌ yomic i qʼuextañob i melbal yicʼot jiñi muʼ bʌ coltañob ili pañimil cʼʌlʌl cheʼ bʌ miʼ tejchel jiñi ñuc bʌ wocol? Dios tsaʼix i yʌcʼʌ i tʼan chaʼan mi caj i jisañob wʌʼ ti pañimil (pejcan Salmo 37:10). Cabʌl miʼ mucob chuqui miʼ mel i mucʼʌch i tajob chuqui yomob (Job 21:7, 9). Pero jiñi Biblia miʼ cʼajtesʌbeñonla chaʼan i wut Dios «miʼ pʼis ti wenta pejtel chuqui mi lac chaʼlen. Ma’anic icʼchʼipan bʌ pañimil baʼ mach cʼotic i wut. Maʼanic baʼ miʼ mejlel i mucob i bʌ xjontolilob» (Job 34:21, 22). Jin chaʼan, maʼañic majqui miʼ mejlel i muc i bʌ tiʼ tojlel. Miʼ luʼ qʼuel muʼ bʌ i mel jiñi jontoloʼ bʌ. Cheʼ ñumeñix jiñi Armagedón, maʼañic mi caj lac chʌn qʼuelob, come tsaʼix jisʌntiyob (Salmo 37:12-15).

6. ¿Majqui cuxul mi caj i cʌytʌl cheʼ miʼ jisʌntel jiñi jontoloʼ bʌ, i chucoch jumpʼejlʌch wem bʌ tʼan iliyi?

⁶ ¿Majqui cuxul mi caj i cʌytʌl cheʼ bʌ miʼ jisʌntel jiñi jontoloʼ bʌ? Jehová miʼ yʌcʼ i tʼan: «Jini utsoʼ bʌ i pusicʼal mi caj i yʌqʼuentelob i wenlel. Tijicña mi caj i yubiñob cheʼ ñʌchʼʌlob i pusicʼal». Ti wiʼil miʼ yʌl: «Mi caj i yʌqʼuentelob jini pañimil jini  tojoʼ bʌ. Mi caj i yajñelob tiʼ pejtelel ora» (Salmo 37:11, 29). ¿Majqui jiñi «utsoʼ bʌ» yicʼot «tojoʼ bʌ»? Jiñi utsoʼ bʌ jiñʌch jiñi añoʼ bʌ i pecʼlel muʼ bʌ i cʌñob Jehová i miʼ jacʼbeñob i tʼan. Cʌmbilob jaʼel bajcheʼ jiñi tojoʼ bʌ come miʼ mulan i melob jiñi utsʼat bʌ miʼ yʌl Dios. Ili ora, ñumen an jontoloʼ bʌ quixtañu bajcheʼ jiñi tojoʼ bʌ. Pero ti jiñi tsijiʼ bʌ pañimil muʼ bʌ i yʌl Dios cojach mi caj i yajñel jiñi utsoʼ bʌ yicʼot tojoʼ bʌ. Jiñobʌch muʼ bʌ caj i sujtesañob ili Lum ti jumpʼejl paraíso.

7. ¿Bajcheʼ miʼ ticʼlañonla muʼ bʌ i mel jiñi jontol bʌ organización tac ti ili ora?

⁷ ¿Bajcheʼ miʼ ticʼlañonla? Cabʌl mach bʌ weñic miʼ yujtel ili ora mach i mulic chaʼtiquil uxtiquil quixtañu, jiñʌch i mul jiñi jontol bʌ organización tac. Cabʌl ñopbalʌl tac miʼ lotin yonlel wiñicob xʼixicob. Miʼ pʌsob mach bʌ isujmic tiʼ tojlel Dios yicʼot chaʼan chuqui mi caj i chaʼlen jiñi quixtañujob yicʼot ili Lum cheʼ ti talto bʌ qʼuin. Miʼ yʌlob chaʼan mach yomic mi lac ñop jiñi Biblia. Cheʼ jeʼel, an jontoloʼ bʌ yumʌl muʼ bʌ i chaʼleñob guerra tiʼ tojlel jiñi chʼoyoloʼ bʌ ti yambʌ tejclum. Ili yumʌlob miʼ ticʼlañob jiñi pʼumpʼuñoʼ bʌ yicʼot mach bʌ añic miʼ mejlel i coltañob i bʌ. Cheʼ to jaʼel, miʼ ñumen pʼojlel i chubʌʼañob yicʼot cʌlʌx ñuquix miʼ sujtelob come miʼ poj coltañob chaʼtiquil uxtiquil quixtañu yicʼot miʼ chʼʌmob taqʼuin chaʼan miʼ chaʼleñob lot. Cheʼʌch miʼ yujtel yicʼot jiñi ñuc bʌ choñoñelʌl tac jaʼel mucʼ jach i wen mulañob taqʼuin, mach i wentajic mi woliʼ jisan majlel chuqui an ila ti Lum yicʼot miʼ cʼʌn quixtañujob chaʼan yambʌlob miʼ ñumen tajob cabʌl i taqʼuin. Tiʼ sujm, cabʌl wocol am bʌ ili ora i mulobʌch jiñi jontol bʌ organización tac.

8. Cheʼ bajcheʼ miʼ yʌl jiñi Biblia, ¿chuqui mi caj i chaʼlen jiñi organización tac wen pʼʌtʌl bʌ yilal?

⁸ ¿Chuqui mi caj i mel Jehová? Jiñi ñuc bʌ wocol mi caj i tejchel cheʼ bʌ jiñi yumʌlob mi contrajiñob jiñi mach bʌ isujmic ñopbalʌl tac. Jiñi Biblia miʼ lajin bajcheʼ tsʼiʼlel bʌ xʼixic cʌmbil bʌ bajcheʼ jiñi Ñuc bʌ Babilonia (Apocalipsis 17:1, 2, 16; 18:1-4). Jiñi mach bʌ isujmic ñopbalʌl tac mi caj i junyajlel jisʌntel. Pero ¿chuqui mi caj i chaʼlen jiñi yambʌ organización tac jontol bʌ? Jiñi Biblia miʼ yʌl chaʼan ili organización tac lajal bajcheʼ pʼʌtʌl bʌ wits o lum tac joyol bʌ ti jaʼ (pejcan Apocalipsis 6:14). Pero miʼ yʌl jaʼel chaʼan mi caj i jisʌntel jiñi yumʌlob yicʼot yambʌ organización tac mach bʌ añic miʼ yʌcʼob i coltaya tiʼ Yumʌntel Dios. Ili mi caj i yujtel tiʼ jilibal jiñi ñuc bʌ wocol (Jeremías 25:31-33). Maʼañix baʼ ora miʼ chʌn cajel jontol bʌ organización tac.

9. ¿Chucoch mi lac ñop chaʼan wen chajpʌbil miʼ cajel ti ajñel jiñi tsijiʼ bʌ pañimil?

⁹ ¿Chuqui mi caj i yochel tiʼ qʼuexol jiñi jontol bʌ organización tac? ¿Muʼto ba i cajel jumpʼejl organización wʌʼ ti Pañimil cheʼ miʼ ñumel Armagedón? Jiñi Biblia miʼ yʌl: «Woli lac pijtan tsijiʼ bʌ panchan yicʼot tsijiʼ bʌ pañimil baʼ miʼ mejlel chuqui toj cheʼ bajcheʼ albil i chaʼan Dios» (2 Pedro 3:13). Jiñi ñoxix bʌ panchan jiñʌch jiñi jontol bʌ yumʌlob. I jiñi ñoxix bʌ pañimil jiñʌch jiñi quixtañujob am bʌ tiʼ cʼʌb. ¿Chuqui mi caj i yochel tiʼ qʼuexol cheʼ bʌ miʼ jisʌntel? Jiñʌch jiñi «tsijiʼ bʌ panchan yicʼot tsijiʼ bʌ pañimil». Jiñi tsijiʼ bʌ panchan jiñʌch jumpʼejl tsijiʼ bʌ yumʌl. Ili jiñʌch i Yumʌntel Dios, am bʌ tiʼ wenta Jesucristo yicʼot jiñi 144 mil reyob  muʼ bʌ caj i chaʼleñob yumʌntel yicʼot. Jiñi tsijiʼ bʌ pañimil jiñʌch jiñi quixtañujob muʼ bʌ i yumʌntelob tiʼ Yumʌntel Dios. Jesús yicʼot muʼ bʌ caj i chaʼleñob yumʌntel yicʼot, mi caj i pʌsob ti tsʼʌcʌl i melbal tac Jehová, mach bʌ añic miʼ mulan jiñi pucuchejel bʌ (1 Corintios 14:33, TNM). Jin chaʼan, wen chajpʌbil bajcheʼ mi caj i yajñel jiñi «tsijiʼ bʌ pañimil». Jiñi muʼ bʌ caj i yʌqʼuentelob i yeʼtel ti jiñi bʌ ora jiñʌch jiñi utsoʼ bʌ quixtañu muʼ bʌ caj i jacʼbeñob i tʼan Jesús yicʼot jiñi 144 mil (Salmo 45:16). Ñaʼtancu bajcheʼ yilal mi caj lac chumtʌl cheʼ bʌ jiñi jontol bʌ organización tac mi caj i qʼuextʌntel ti jumpʼejl organización muchʼul bʌ i maʼañic baʼ ora mi caj i mel mach bʌ weñic.

10. a) ¿Chuqui ti jontolil an yaʼ baqui chumulet? b) ¿Bajcheʼ miʼ ticʼlañet yicʼot a familia?

¹⁰ ¿Bajcheʼ miʼ ticʼlañonla? Ili ora wen cabʌl jax tsʼiʼlel, lot yicʼot jatsʼ o tsʌnsa. Jiñi ñusaqʼuin tac am bʌ ti pañimil wen miʼ yʌcʼ ti qʼuejlel iliyi, miʼ wajleñob i mandar Jehová jaʼel chaʼan chuqui wen o mach bʌ weñic miʼ yʌl (Isaías 5:20). Jiñi tatʌlob yom miʼ chaʼleñob wersa i cʌntañob i yalobil tiʼ pejtelel mach bʌ weñic. Jiñi isujm bʌ xñoptʼañonla, ti lac pejtelel yom mi lac chaʼlen wersa laj cʌntan bajcheʼ añonla la quicʼot Jehová ti ili pañimil mach bʌ añic miʼ qʼuel ti ñuc i mandar Dios.

11. ¿Chuqui mi laj cʌn ti jiñi tsaʼ bʌ i mele Jehová tiʼ tojlel Sodoma yicʼot Gomorra?

¹¹ ¿Chuqui mi caj i mel Jehová? Laʼ laj qʼuel tsaʼ bʌ i mele Jehová cheʼ bʌ tsiʼ qʼuele jiñi jontolil am bʌ ti Sodoma yicʼot Gomorra (pejcan 2 Pedro 2:6-8). Juntiquil toj bʌ wiñic i cʼabaʼ Lot, tsiʼ wen ubi wocol yicʼot i familia tiʼ caj jontolil muʼ bʌ i melob jiñi quixtañu. Dios tsiʼ jisa jiñi tejclum yicʼot jiñi jontolil. Ili tsiʼ mele chaʼan miʼ pʌs chuqui mi caj i chaʼleñob jiñi muʼ bʌ i melob mach bʌ weñic ili ora. Cheʼ bajcheʼ tsiʼ jisa Jehová jiñi tsʼiʼlel ti wajali, cheʼʌch mi caj i mel ili ora cheʼ bʌ mi caj i jisan ili jontol bʌ pañimil.

12. ¿Chuqui tac a wom a mel jatet cheʼ bʌ maʼañix jontolil?

¹² ¿Chuqui mi caj i yochel tiʼ qʼuexol jiñi jontolil? Yaʼ ti Paraíso cabʌl chuqui utsʼat mi caj i mejlel lac mel. Jumpʼejl ejemplo, mi caj lac sujtesan ili Lum ti jumpʼejl paraíso, mi caj lac mel la cotot yicʼot i chaʼan jiñi muʼ bʌ lac wen cʼuxbiñob. Cheʼ jaʼel, mi caj lac taj lac tijicñʌyel cheʼ miʼ chaʼ chʼojyelob yonlel chʌmeñoʼ bʌ i mi caj laj cʌntesañob tiʼ chaʼan bʌ Jehová yicʼot tiʼ pejtelel chuqui melbil i chaʼan tiʼ tojlel jiñi quixtañujob (Isaías 65:21, 22; Hechos 24:15). Mi caj lac wen taj lac tijicñʌyel tiʼ melol jiñi eʼtel (troñel) tac i mi caj i yʌqʼuen i ñuclel Jehová.

13. ¿Chuqui ti wocol tac an tiʼ caj jiñi tsaʼ bʌ ujti yaʼ ti pʌcʼʌbʌl Edén?

¹³ ¿Bajcheʼ miʼ ticʼlañonla? Ili ora, tiʼ caj jiñi jontolil yicʼot jontol bʌ organización tac wen wocol bajcheʼ chumulonla. Ti lac pejtelel miʼ ticʼlañonla jiñi guerra tac, pʼumpʼuñiyel, i tsʼaʼlentel yambʌlob, cʼamʌjel tac o jiñi chʌmel. Ili wocol tac tsaʼ tejchi cheʼ bʌ Satanás, Adán yicʼot Eva tsiʼ contrajiyob Jehová. Jin chaʼan ti lac pejtelel mi la cubin wocol.

14. ¿Chuqui mi caj i mel Jehová chaʼan miʼ tojʼesan bajcheʼ yilal chumulonla?

¹⁴ ¿Chuqui mi caj i mel Jehová? Laʼ lac ñaʼtan jiñi albil tac bʌ i chaʼan Jehová  chaʼan mi caj i tojʼesan bajcheʼ yilal chumulonla. Mi caj i jisan jiñi guerra tac (pejcan Salmo 46:8, 9). Mi caj i locʼsan jiñi cʼamʌjel tac (Isaías 33:24). Maʼañix mi cajel chʌmel (Isaías 25:8). Yicʼot mi caj i jisan jiñi pʼumpʼuñiyel (Salmo 72:12-16). Jehová mi caj i luʼ jisan jiñi muʼ bʌ i yʌqʼueñonla la quilan wocol ili ora. Cheʼ to jaʼel mi caj i jisan Satanás yicʼot i xibajob (Efesios 2:2).

15. ¿Chuqui mi caj i jilel ti Armagedón?

¹⁵ Ñaʼtancu bajcheʼ yilal chumtʌl ti jumpʼejl pañimil baqui maʼañix guerra, cʼamʌjel yicʼot chʌmel. Maʼañix mi caj laj qʼuel soldadojob yicʼot juloñib tac. Maʼañix mi caj laj cʼʌn hospital, doctorob yicʼot mucoñibʌl tac. Cheʼ jaʼel, maʼañix mi caj i chʌn cʼʌjñel policíajob yicʼot alarma tac come mi caj i jilel jiñi jontol bʌ quixtañujob. Tajol mach cʼʌñʌlix mi caj lac ñupʼ jiñi la cotot yicʼot llave. Mi caj i jilel tiʼ pejtelel muʼ bʌ i yʌcʼonla ti cʌlʌx pensal.

16, 17. a) ¿Bajcheʼ yubil mi caj i yubiñob i bʌ jiñi cuxuloʼ bʌ miʼ cʌytʌl cheʼ miʼ ñumel Armagedón? Alʌ jumpʼejl ejemplo. b) ¿Chuqui yom mi lac mel chaʼan cuxul mi laj cʌytʌl cheʼ miʼ jisʌntel ili jontol bʌ pañimil?

¹⁶ ¿Bajcheʼ yubil mi caj la cubin lac bʌ cheʼ miʼ tojʼesʌntel bajcheʼ yilal chumulonla? Wocol ti ñaʼtʌntel. Wajalix cajiyonla ti chumtʌl baqui cabʌl wocol, i tajol maʼañic mi laj cubin mi lujboñixla ti chumtʌl bajcheʼ iliyi. Jumpʼejl ejemplo, tajol jiñi lʌcʼʌl bʌ chumulob ti jumpʼejl carretera baʼ miʼ wen ñumel carro ñʌmʌlobix cheʼ mach ñʌchʼʌlic pañimil. I jiñi quixtañujob chumuloʼ bʌ tiʼ tʼejl baʼ miʼ chojquel basura tajol muqʼuix i ñʌmʼañob i yubiben i yujtsʼil. Pero wen tijicña mi caj i yubiñob cheʼ muqʼuic i jilel jiñi tuw bʌ yicʼot cheʼ ñʌchʼʌlix miʼ yajñel jiñi carretera. Cheʼ bʌ Jehová miʼ jisan miʼ tojʼesan bajcheʼ yilal chumulonla, wen tijicña mi caj la cubin jaʼel.

¹⁷ ¿Chuqui mi caj i yochel tiʼ qʼuexol lac lujbel muʼ bʌ laj cubin ili ora? Ti Salmo 37:11 miʼ yʌl chaʼan ti talto bʌ qʼuin «tijicña mi caj i yubiñob cheʼ ñʌchʼʌlob i pusicʼal». Tijicñayonla cheʼ la cujil chaʼan iliyi jiñʌch yom bʌ Jehová ti lac tojlel ¿ñomach? Pero ili ora, laʼ lac chaʼlen wersa chaʼan lʌcʼʌl mi la cajñel tiʼ tojlel Jehová yicʼot i yorganización. Laʼ lac wen ñaʼtan jiñi lac pijtaya chaʼan ti talto bʌ qʼuin, come wen ñucʌch. Yom mi lac ñop chaʼan isujmʌch yicʼot mi lac suben yambʌlob (1 Timoteo 4:15, 16; 1 Pedro 3:15). Mi mucʼʌch lac mel, cuxul mi caj laj cʌytʌl tiʼ jilibal ili jontol bʌ pañimil yicʼot tijicña mi caj lac chumtʌl tiʼ pejtelel ora.