1, 2. a) ¿Bajcheʼ tsaʼ toʼol ticʼlʌnti Nabot yicʼot i yalobilob? b) ¿Baqui bʌ jiñi chaʼpʼejl melbalʌl mi caj laj qʼuel ti ili temaj?

TI JUMPʼEJL bʌ qʼuin, chaʼtiquil wiñic tsiʼ jopʼbeyob tsʌts bʌ i mul juntiquil wiñic. Anquese mach isujmic jiñi tsaʼ bʌ ajli, tsaʼ aqʼuenti i toj i mul i tsaʼ tsʌnsʌnti. Laʼ lac ñaʼtan bajcheʼ yubil tsiʼ yubiyob jiñi muʼ bʌ i mulañob chuqui toj cheʼ bʌ tsaʼ tsʌnsʌnti yicʼot cheʼ tsaʼ jujli ti xajlel i yalobilob. Ili toʼol ticʼlʌntel tsaʼʌch ujti tiʼ tojlel Nabot, juntiquil i wiñic Jehová, tsaʼ bʌ chumle cheʼ woli (choncol) ti yumʌntel jiñi rey Acab yaʼ ti Israel (1 Reyes 21:11-13; 2 Reyes 9:26).

² Ti ili temaj mi caj lac taj ti tʼan tsaʼ bʌ ujti tiʼ tojlel Nabot. Mi caj la cʌl jaʼel chuqui mach bʌ weñic tsiʼ mele juntiquil xucʼul bʌ anciano cheʼ ti ñaxam bʌ siglo. Iliyi mi caj i cʌntesañonla chaʼan yom mi lac pʌs lac pecʼlel yicʼot mi lac ñusan i sajtemal yambʌlob mi cheʼʌch la com laj qʼuel bajcheʼ miʼ qʼuel Jehová chuqui toj bʌ.

3, 4. ¿Bajcheʼ yilal i melbal jiñi Nabot, i chucoch maʼañic tsiʼ choño i tsʼusubil?

³ Nabot xucʼul tsaʼ ajñi tiʼ tojlel Jehová anquese cabʌl israelob tsiʼ tsajcʌbeyob i melbal jiñi jontol bʌ rey Acab yicʼot i yijñam, i cʼabaʼ Jezabel. Tsiʼ chʼujutesayob jiñi diosteʼ i cʼabaʼ Baal i maʼañic tsiʼ qʼuelob ti ñuc Jehová yicʼot i mandar tac. Pero ñumen ñuc bʌ tsiʼ qʼuele Nabot jiñʌch cheʼ wen miʼ yajñel tiʼ tojlel Jehová, mach jiñic i cuxtʌlel.

⁴ (Pejcan 1 Reyes 21:1-3). Acab tsiʼ mulabe i tsʼusubil Nabot. Jin chaʼan tsiʼ sube chaʼan yom i mʌnben o miʼ qʼuextʌben yicʼot yambʌ ñumen wem bʌ. Pero Nabot tsiʼ yʌlʌ chaʼan mach yomic. Tsiʼ sube: «Laʼ i coltañon lac Yum. Maʼanic mi caj cʌqʼueñet i lum c ñojteʼel». ¿Chucoch maʼañic tsiʼ jacʼʌ Nabot tsaʼ bʌ subenti? Come jiñi mandar tsaʼ bʌ aqʼuenti jiñi israelob miʼ yʌl chaʼan mach mejlic i choñob jiñi lum tsaʼ bʌ aqʼuentiyob i familia (Levítico 25:23; Números 36:7). Mi laj qʼuel chaʼan Nabot mucʼʌch i jacʼben i tʼan Jehová.

5. ¿Chuqui tsiʼ mele Jezabel chaʼan miʼ chilben i tsʼusubil Nabot?

⁵ Cheʼ bʌ Nabot maʼañic tsiʼ jacʼʌ i chon i tsʼusubil, jiñi rey Acab yicʼot i yijñam tsiʼ meleyob mach bʌ utsʼatic chaʼan miʼ chilbeñob. Jiñi yumʌl bʌ xʼixic Jezabel tiʼ sube chaʼtiquil wiñic chaʼan miʼ jopʼbeñob i mul Nabot, jin chaʼan tsaʼ tsʌnsʌnti yicʼot i yalobilob. ¿Chuqui tsiʼ mele Jehová cheʼ tsiʼ qʼuele chaʼan tsaʼ toʼol ticʼlʌntiyob?

6, 7. a) ¿Bajcheʼ tsiʼ pʌsʌ Jehová chaʼan miʼ mulan chuqui toj? b) ¿Chucoch jiñi i familia yicʼot i yamigojob Nabot tajol tsaʼʌch i yubiyob i tijicñʌyel?

⁶ Jehová ti ora tsiʼ choco majlel jiñi xʼaltʼan Elías chaʼan miʼ pejcan Acab. Elías tsiʼ sube Acab chaʼan juntiquilʌch xtsʌnsa yicʼot xujchʼ, i tsiʼ sube muʼ bʌ caj i mel Jehová tiʼ tojlel. ¿Chuqui tsiʼ sube? Chaʼan jiñi Acab, i yijñam yicʼot i yalobilob mi caj i tsʌnsʌntelob cheʼ bajcheʼ tsiʼ melbeyob Nabot yicʼot i yalobilob (1 Reyes 21:17-25).

⁷ Jiñi i familia Nabot yicʼot i yamigojob wen chʼijiyem tsiʼ yubiyob chaʼan tsaʼ bʌ i mele Acab. Pero tsaʼʌch i tajayob i tijicñʌyel cheʼ bʌ tsiʼ ñaʼtayob chaʼan Jehová tsaʼʌch i qʼuele tsaʼ bʌ ujti yicʼot chaʼan añʌch chuqui mi caj i mel. Pero jiñi i pecʼlelob yicʼot i chʼujbiyajob ti Jehová tajol tsaʼʌch tajle ti wocol tiʼ caj tsaʼ bʌ wiʼil ujti.

8. ¿Bajcheʼ tsiʼ jacʼʌ Acab cheʼ bʌ tsiʼ yubibe i tʼan Jehová, i chuqui tsaʼ ujti tiʼ tojlel?

⁸ Cheʼ bʌ Acab tsiʼ yubi chuqui mi caj i mel Jehová tiʼ tojlel, «tsiʼ jetʼ tsili i pislel. Tsaʼ caji i lʌp coxtal ti qʼuiñil yicʼot ti acʼʌlel. Tsiʼ chaʼle chʼajb. Wen chʼijiyem tsaʼ caji ti ajñel». Cheʼ bajcheʼ miʼ laj qʼuel, Acab tsiʼ peqʼuesa i bʌ. ¿Chuqui tsaʼ ujti tiʼ tojel? Jehová tsiʼ sube Elías: «Chaʼan  tiʼ caj tsiʼ peqʼuesa i bʌ tic tojlel, maʼanic mi caj cʌqʼuen ili wocol cheʼ cuxul to. Mux caj cʌqʼuen wocol i yalobilob Acab» (1 Reyes 21:27-29; 2 Reyes 10:10, 11, 17). Jehová miʼ qʼuel lac pusicʼal i yujil bajcheʼ yilalonla tiʼ sujmlel, jin chaʼan tsiʼ pʼunta Acab (Proverbios 17:3).

9. ¿Chucoch jiñʌch jiñi pecʼlel tajol tsaʼ bʌ i cʌnta i familia Nabot yicʼot i yamigojob?

⁹ ¿Chuqui tsaʼ ujti tiʼ tojlel i familia yicʼot i yamigojob Nabot cheʼ bʌ tsaʼ cʼoti i ñaʼtañob chaʼan maʼañic mi caj i yʌqʼuentelob i toj i mul jiñi i familia Acab? Tajol tsaʼ cʼunʼayob i ñopoñel (chʼujbiya) ti Dios. Mi cheʼʌch tsaʼ ujti, tsaʼ bʌ i coltayob jiñʌch i pecʼlel. ¿Chucoch? Come jiñʌch tsaʼ bʌ mejli i coltañob chaʼan miʼ chʌn melbeñob i yeʼtel (troñel) Jehová i yujilob chaʼan maʼañic baʼ ora miʼ mel mach bʌ utsʼatic (pejcan Deuteronomio 32:3, 4). Ti talto bʌ qʼuin, jiñi i familia Nabot mi caj i mejlel i qʼuel cheʼ bʌ miʼ chaʼ chʼojyel jiñi yambʌ i piʼʌlob. Cheʼ bajcheʼ jiñi mi caj i tsʼʌctesʌntel jiñi toj bʌ yom melol tiʼ tojlel Nabot yicʼot i yalobilob (Job 14:14, 15; Juan 5:28, 29). Juntiquil am bʌ i pecʼlel yujil chaʼan  «Dios mi caj i melonla yicʼot pejtel muʼ bʌ lac mel yicʼot pejtel jini mucul tac bʌ mi wen o mi jontol» (Eclesiastés 12:14). Jehová ñumen an chuqui yujil mach bʌ la cujilic joñonla. Jin chaʼan, jiñi lac pecʼlel miʼ cʌntañonla yicʼot miʼ coltañonla chaʼan maʼañic mi lac sʌt lac chʼujbiya ti Jehová.

10, 11. a) ¿Chuqui tac miʼ mejlel i yʌcʼ ti wocol jiñi lac ñopoñel? b) ¿Bajcheʼ miʼ coltañonla jiñi lac pecʼlel?

¹⁰ Ixcu joñonla, ¿bajcheʼ yilal mi caj laj qʼuel cheʼ bʌ jiñi ancianojob an chuqui miʼ ñaʼtañob tajol maʼañic bʌ mi lac wen chʼʌmben isujm o maʼañic mi lac wen mulan? Laʼ laj qʼuel ili ejemplo tac. Mi joñonla o yambʌ muʼ bʌ lac wen qʼuel ti ñuc miʼ chilbentel jumpʼejl eʼtel ti congregación, ¿chuqui mi caj lac mel? Ixcu mi tsaʼ chaʼlenti ti expulsar lac ñoxiʼal o la quijñam, la calobil o juntiquil wen bʌ la camigo, ¿chuqui mi caj lac mel mi maʼañic mi lac mulan bajcheʼ tsiʼ mele jiñi ancianojob? ¿Chuqui mi caj lac mel mi mach utsʼatic mi lac ñaʼtan cheʼ jiñi ancianojob miʼ ñusʌbeñob i mul juntiquil tsaʼ bʌ i chaʼle mulil? Ili jintacʌch muʼ bʌ i mejlel i yʌcʼ ti wocol lac ñopoñel ti Jehová yicʼot chaʼan bajcheʼ chajpʌbil i chaʼan i tejclum ili ora. ¿Bajcheʼ mi caj i coltañonla jiñi lac pecʼlel cheʼ bʌ mi lac ñusan bajcheʼ jiñi? Laʼ laj qʼuel chaʼchajp.

¹¹ Ti ñaxan, mi pecʼoñʌchla, mi caj lac ñaʼtan chaʼan mach luʼ la cujilic bajcheʼ an chuqui woli (yʌquel) ti ujtel. Anquese mi la cʌl chaʼan wen la cujilʌch, yom mi laj cʼajtesan chaʼan cojach Jehová yujil chuqui an tiʼ pusicʼal jiñi wiñicob xʼixicob (quixtañujob) (1 Samuel 16:7). Mi cʼajalʌch lac chaʼan, mi caj lac ñaʼtan chaʼan an jach baqui jaxʌlonla i chaʼan yom mi lac tojʼesan lac pensar. I chaʼpʼejlel, jiñi lac pecʼlel mi caj i coltañonla lac jacʼ tʼan yicʼot mi lac pijtan chaʼan Jehová miʼ tojʼesan jiñi wocol mi an laj qʼuele o an lac ñusa toʼol ticʼlʌntel. Jiñi Biblia miʼ yʌl: «Utsʼat miʼ cajelob ti ajñel jini muʼ bʌ i bʌcʼñañob Dios». Pero miʼ yʌl jaʼel chaʼan «mach utsʼatic miʼ yajñel jini xjontolil. Miʼ caj ti sʌc jilel» (Eclesiastés 8:12, 13). Jin chaʼan, ñumen wen cheʼ jiñi muʼ bʌ i ñusañob ili wocol miʼ chʌn pʌsob i pecʼlel (pejcan 1 Pedro 5:5).

12. ¿Chuqui mi caj laj qʼuel wʌleʼli, i chucoch?

¹² Cheʼ ti ñaxam bʌ siglo, jiñi xñoptʼañob ti Antioquía, yaʼ ti Siria, tsiʼ ñusayob jumpʼejl wocol baqui tsiʼ pʌsʌyob mi añobʌch i pecʼlel yicʼot mi yujilobʌch ñusʌntel mulil. Cheʼ mi lac tsajin majlel iliyi mi caj i coltañonla lac ñaʼtan mi tiʼ sujm mucʼʌch lac ñusan i mul yambʌlob. Mi caj lac chʼʌmben isujm jaʼel chucoch Jehová miʼ cʼʌn quixtañujob xmuliloʼ bʌ, pero maʼañic miʼ juʼsʌben i cʼʌjñibal i mandar tac chaʼan chuqui toj.

13, 14. a) ¿Baqui bʌ eʼtel tac ti subtʼan tsaʼ aqʼuenti jiñi apóstol Pedro? b) ¿Bajcheʼ tsiʼ pʌsʌ i chʼejlel?

 ¹³ Jiñi apóstol Pedro jiñʌch juntiquil anciano wen cʌmbil bʌ tiʼ tojlel xñoptʼañob cheʼ ti ñaxam bʌ siglo. Tsiʼ wen cʌñʌ Jesús yicʼot tsiʼ taja ñuc tac bʌ i yeʼtel ti subtʼan (Mateo 16:19). Jumpʼejl ejemplo, cheʼ ti jabil 36 tsaʼ aqʼuenti tiʼ wenta chaʼan miʼ suben wen tʼan jiñi Cornelio yicʼot i familia. ¿Chucoch ñuc i cʼʌjñibal tsaʼ bʌ i mele? Come Cornelio mach judíojic. Jiñʌch juntiquil mach bʌ melbilic i chaʼan jiñi tsep pʌchʌlel. Cheʼ bʌ Cornelio yicʼot jiñi i familia tsiʼ chʼʌmʌyob chʼujul bʌ espíritu, Pedro tsiʼ ñaʼta chaʼan mucʼʌch i mejlelob ti chʼʌmjaʼ yicʼot i sujtelob ti xñoptʼan. Tsiʼ yʌlʌ: «¿Mejl ba mi lac ticʼob ti chʼʌmjaʼ jini tsaʼ bʌ aqʼuentiyob jini Chʼujul bʌ Espíritu cheʼ bajcheʼ tsaʼ aqʼuentiyonla?» (Hechos 10:47).

¹⁴ Ti jabil 49, jiñi apóstolob yicʼot ancianojob ti Jerusalén tsiʼ tempayob i bʌ i tsiʼ ñaʼtayob mi yomʌch miʼ chaʼleñob tsep pʌchʌlel jiñi gentilob. Pedro yaʼʌch an jaʼel ti jiñi tempa bʌ. Tsiʼ pʌsʌ i chʼejlel, i tsiʼ cʼajtesʌbe jiñi hermanojob chaʼan qʼuelbil i chaʼan bajcheʼ tsiʼ chʼʌmʌyob chʼujul bʌ espíritu jiñi gentilob maʼañic bʌ tsiʼ chaʼleyob tsep pʌchʌlel. Tsaʼ bʌ i ñusa Pedro tsiʼ colta jiñi junmojt muʼ bʌ i pʌsob bij chaʼan utsʼat chuqui miʼ ñaʼtañob (Hechos 15:6-11, 13, 14, 28, 29). Miʼ mejlel lac ñaʼtan chaʼan jiñi xñoptʼañob judíojoʼ bʌ yicʼot gentiloʼ bʌ tsiʼ qʼueleyob ti ñuc jiñi i chʼejlel Pedro cheʼ tsiʼ yʌlʌ tsaʼ bʌ i qʼuele. Jiñi xñoptʼañob tsaʼʌch i qʼueleyob ti ñuc ili hermano come wen xucʼul yicʼot cabʌl i ñaʼtʌbal (Hebreos 13:7).

15. ¿Chuqui mach bʌ weñic tsiʼ mele Pedro cheʼ bʌ yaʼan ti Antioquía ti Siria? (Qʼuele jiñi dibujo am bʌ tiʼ tejchibal).

¹⁵ Cheʼ ñumeñix jiñi tempa bʌ yaʼ ti Jerusalén, Pedro tsaʼ majli ti julaʼ ti Antioquía yaʼ ti Siria. Jal tsaʼ comol ajñi yicʼot jiñi hermanojob gentiloʼ bʌ. Miʼ mejlel lac ñaʼtan chaʼan tsaʼʌch i tajayob i wenlel tiʼ cʌntesa Pedro yicʼot chaʼan cabʌl i ñaʼtʌbal. Pero mach ñaʼtʌbilic i chaʼañob cheʼ bʌ Pedro tsiʼ cʌyʌ uchʼel yicʼotob. ¡Toj sajtelob i pusicʼal yicʼot cʼux tsiʼ yubiyob cheʼ bʌ Pedro tsiʼ mele bajcheʼ jiñi! Cheʼ jaʼel, tiʼ caj jiñi, yambʌ judíojob cheʼ tsaʼ caji i melob bajcheʼ Pedro. Cheʼ to tsaʼ cʼoti i mel Bernabé jeʼel. Tsaʼ bʌ i mele Pedro tajol tsaʼ mejli i tʼox jiñi congregación, ¿chucoch tsiʼ taja i sajtemal ili anciano wen am bʌ i ñaʼtʌbal? Pero ñumen ñuc bʌ, ¿bajcheʼ miʼ mejlel i coltañonla ili ejemplo cheʼ bʌ juntiquil anciano miʼ melbeñonla o miʼ subeñonla mach bʌ tojic?

16. a) ¿Bajcheʼ tsaʼ tijqʼui Pedro? b) ¿Chuqui ti cʼajtiya tac miʼ mejlel lac mel?

¹⁶ (Pejcan Gálatas 2:11-14). Pedro tsiʼ bʌcʼña chuqui miʼ mejlel ti ajlel tiʼ tojlel (Proverbios 29:25). Yujilʌch chuqui miʼ ñaʼtan Jehová tiʼ tojlel jiñi gentilob. Pero tsaʼʌch i bʌcʼña chaʼan jiñi judíojob tsepbiloʼ bʌ i pʌchʌlel chʼoyoloʼ bʌ ti Jerusalén miʼ tech i yʌlob chucoch  miʼ ñochtan jiñi xñoptʼañob gentiloʼ bʌ. Jiñi apóstol Pablo tiʼ sube Pedro chaʼan chaʼchajp i pusicʼal woliʼ pʌs. ¿Chucoch cheʼ tiʼ sube bajcheʼ jiñi? Come Pablo tsiʼ yubi cheʼ bʌ Pedro tsiʼ colta jiñi gentilob yaʼ ti tempa bʌ tsaʼ bʌ mejli ti Jerusalén cheʼ ti jabil 49 (Hechos 15:12). ¿Chuqui tsiʼ mele jiñi gentilob cheʼ bʌ Pedro tsiʼ cʌyʌ i ñochtañob? ¿Tsaʼ ba cʼunʼayob tiʼ caj jiñi? ¿Tsaʼ ba i sʌtʌ i yeʼtel Pedro tiʼ caj tsaʼ bʌ i mele?

17. ¿Bajcheʼ tsiʼ taja i wenlel Pedro cheʼ bʌ Jehová tsiʼ ñusʌbe i mul?

¹⁷ Pedro tsaʼʌch i pʌsʌ i pecʼlel yicʼot tsaʼʌch jacʼbe i ticʼojel Pablo. Jiñi Biblia maʼañic miʼ yʌl chaʼan Pedro tiʼ sʌtʌ i yeʼtel ti congregación. Ti wiʼil, Jehová tsiʼ cʼʌñʌ Pedro chaʼan miʼ tsʼijbun chaʼpʼejl carta muʼ bʌ i mejlel lac taj yaʼ ti Biblia. Ti jiñi i chaʼpʼejlel carta, Pedro miʼ suben Pablo bajcheʼ «jini cʼuxbibil bʌ la quermano» (2 Pedro 3:15). Tajol tsaʼ bʌ i mele Pedro tsaʼʌch i lowo cabʌl xñoptʼañob gentiloʼ bʌ. Pero Jesús, i Jol jiñi congregación, tsiʼ chʌn cʼʌñʌ Pedro (Efesios 1:22). Cheʼ bʌ jiñi hermanojob tsiʼ ñusʌbeyob i mul Pedro, tiʼ tsajcʌbeyob i melbal Jesús yicʼot Jehová. Miʼ mejlel lac ñop chaʼan maʼañic tsaʼ cʼunʼayob tiʼ caj i sajtemal juntiquil wiñic.

18. ¿Baqui tac miʼ mejlel lac pʌs chaʼan cheʼʌch mi laj qʼuel bajcheʼ miʼ qʼuel Jehová chuqui toj bʌ?

¹⁸ Cheʼ ti ñaxam bʌ siglo, maʼañic mi juntiquilic anciano mach bʌ xmulilic ti jiñi congregación tac, i cheʼʌch jaʼel ti ili ora. Jiñi Biblia miʼ yʌl chaʼan ti lac pejtelel mi lac taj cabʌl lac sajtemal (Santiago 3:2). Ti lac pejtelel la cujil chaʼan cheʼʌchi. Pero ¿chuqui mi caj lac mel mi jiñi i sajtemal juntiquil hermano miʼ ticʼlañonla? ¿Muʼ ba caj lac mel chuqui toj cheʼ bajcheʼ Jehová? Jumpʼejl ejemplo, mi juntiquil anciano miʼ yʌl mach bʌ utsʼatic ti lac tojlel, ¿chuqui mi caj lac mel? ¿Muʼ ba caj laj cʼunʼan tiʼ cajach muʼ bʌ i subeñonla juntiquil anciano? ¿Ti ora ba mi caj lac ñaʼtan chaʼan mach ancianojic yom i wentʌlel, o muʼ ba caj lac ñaʼtan chaʼan jiñi i Jol congregación jiñʌch Jesús i mi lac pijtan chaʼan jin miʼ tojʼesan? ¿Cojach ba mi caj lac ñaʼtan i sajtemal jiñi hermano, o jiñʌch chaʼan cabʌlix jab i cajel i melben i yeʼtel Jehová tiʼ xucʼtʌlel? ¿Muʼ ba caj la cubin lac tijicñʌyel cheʼ bʌ juntiquil hermano chʌn ancianojʌch miʼ yajñel o tajol muʼ to i yʌqʼuentel yambʌ eʼtel tac, anquese tsiʼ mele mach bʌ weñic ti lac tojlel? Mi la cujilʌch ñusʌntel i mul yambʌlob, mi caj lac pʌs chaʼan cheʼʌch mi laj qʼuel bajcheʼ miʼ qʼuel Jehová chuqui toj bʌ (pejcan Mateo 6:14, 15).

19. ¿Chuqui yom bʌ mi lac mel?

¹⁹ Come mi lac mulan chuqui toj, la com chaʼan muqʼuix i cʼotel i yorajlel cheʼ bʌ Jehová miʼ jisan jiñi toʼol ticʼlʌntel muʼ bʌ lac ñusan tiʼ caj Satanás yicʼot ili i pañimil (mulawil) (Isaías 65:17). Jin chaʼan, cheʼ bʌ an chuqui mach utsʼatic mi lac melbentel, yom an lac pecʼlel i mi lac ñaʼtan chaʼan añʌch chuqui tac mach bʌ la cujilic yicʼot mi lac ñusʌben i mul jiñi yambʌ. Mi cheʼʌch mi lac mel, mi caj lac pʌs chaʼan cheʼʌch mi laj qʼuel bajcheʼ miʼ qʼuel Jehová chuqui toj bʌ.