1. ¿Chuqui yom miʼ mel chaʼtiquil quixtañu chaʼan miʼ sujtelob tiʼ yamigojob i bʌ?

CHAʼAN chaʼtiquil quixtañu miʼ sujtelob tiʼ yamigojob i bʌ, yom miʼ tem ñusañob qʼuin i yʌlob chuqui miʼ ñaʼtañob, bajcheʼ yubil miʼ yubiñob i bʌ yicʼot chuqui an i ñusayob. Pero chaʼan mi lac sujtel tiʼ yamigo Jesús, tajol wocolʌch mi la cubin. Laʼ laj qʼuel chucoch.

2. ¿Baqui bʌ jiñi ñaxam bʌ i sujmlel chaʼan wocolʌch mi la cubin chaʼan mi lac sujtel tiʼ yamigo Jesús?

² Ñaxam bʌ i sujmlel, maʼañic baqui ora an laj qʼuele Jesús. Cheʼʌch tsaʼ ujti tiʼ tojlel jiñi xñoptʼañob ti ñaxam bʌ siglo. Anquese i sujmʌch, jiñi apóstol Pedro tiʼ subeyob: «Maʼanic tsaʼ laʼ qʼuele Jesús, pero mi laʼ cʼuxbin. Maʼanic woli laʼ qʼuel wʌle, pero woli laʼ ñop» (1 P. 1:8). Jin chaʼan, mach i cʼʌjñibal mi laj qʼuel Jesús chaʼan mi lac sujtel tiʼ yamigo.

3. ¿Baqui bʌ jiñi chaʼpʼejlel i sujmlel?

³ I chaʼpʼejlel i sujmlel, maʼañic mi lac mejlel ti tʼan yicʼot Jesús. Cheʼ bʌ mi lac mel oración, jiñʌch Jehová mi lac pejcan. I sujmʌch chaʼan mi lac mel tiʼ cʼabaʼ Jesús, pero mach jiñic mi lac pejcan. Jesús mach yomic chaʼan jin mi lac pejcan come jiñi oración ochen ti lac chʼujutesaya, i cojach jin Jehová yom mi lac chʼujutesan (Mt. 4:10). Pero mejlʌch lac pʌs chaʼan mi laj cʼuxbin Jesús.

4. a) ¿Baqui bʌ jiñi i yuxpʼejlel i sujmlel? b) ¿Chuqui mi caj laj qʼuel ti ili estudio?

⁴ I yuxpʼejlel i sujmlel, maʼañic miʼ mejlel lac ñusan qʼuin yicʼot  Jesús come chumul ti panchan. Anquese i sujmʌch, cabʌl chuqui miʼ mejlel laj cʌn tiʼ tojlel Jesús. Ti ili estudio, mi caj laj qʼuel chʌnchajp yom bʌ mi lac mel chaʼan mi lac sujtel ti wem bʌ i yamigo. Pero laʼ lac ñaxan qʼuel chucoch ñuc i cʼʌjñibal cheʼ yom mi lac sujtel ti wem bʌ i yamigojonla Cristo.

5. ¿Chucoch yom mi lac sujtel tiʼ yamigo Jesús? (Qʼuele jiñi recuadro « Cheʼ i yamigojonla Jesús, mi lac sujtel tiʼ yamigo Jehová» yicʼot « ¿Bajcheʼ yom mi laj qʼuel Jesús?»).

⁵ Yom wem bʌ i yamigojonla Jesús chaʼan wen miʼ qʼuelonla Jehová. ¿Chucoch cheʼ mi la cʌl? Laʼ laj qʼuel chaʼchajp i sujmlel. Ñaxam bʌ, Jesús tiʼ sube iliyi jiñi xcʌntʼañob i chaʼan: «C Tat jaʼel miʼ cʼuxbiñetla, come jatetla mi laʼ cʼuxbiñon» (Jn. 16:27). I tiʼ bej alʌ: «Maʼanic majch miʼ cʼotel baʼan c Tat, jini jach am bʌ tic wenta» (Jn. 14:6). Cheʼ la com sujtel tiʼ yamigo Jehová, pero mach wem bʌ i yamigojonla Jesús lajal bajcheʼ la com ochel ti jumpʼejl otot cheʼ maʼañic mi lac ñumel tiʼ tiʼ. Jesús tsiʼ cʼʌñʌ jumpʼejl lajiya lajal bʌ cheʼ bʌ tsiʼ yʌlʌ chaʼan jiñʌch i ‹tiʼ baʼ miʼ yochel tiñʌmeʼ› (Jn. 10:7). I chaʼchajplel, Jesús tsiʼ pʌsʌ jiñi wen tac bʌ i melbal i Tat. Tiʼ subeyob jiñi xcʌntʼañob i chaʼan iliyi: «Jini tsaʼ bʌ i qʼueleyon, tsaʼix i qʼuele c Tat» (Jn. 14:9). Junchajp ñuc bʌ i cʼʌjñibal chaʼan miʼ cʼotel laj cʌn Jehová jiñʌch cheʼ mi laj cʌn Jesús. Cheʼ bʌ miʼ cʼotel lac ñumen cʌn, ñumento mi caj laj cʼuxbin. Cheʼ bʌ mi lac ñumen lʌcʼtesan lac bʌ tiʼ tojlel Jesús, mi caj lac ñumen cʼuxbin jiñi i Tat.

6. ¿Baqui bʌ yambʌ i sujmlel chaʼan yom mi lac sujtel tiʼ yamigo Jesús?

⁶ Yom i yamigojonla Jesús chaʼan miʼ  jajqʼuel jiñi la coración tac. Ili yom i yʌl chaʼan mach cojach yom ñʌmʌl la cʌlben «i cʼabaʼ Jesús» cheʼ bʌ mi la cujtesan la coración. Yom mi lac chʼʌmben i sujm bajcheʼ miʼ cʼʌn Jehová jiñi Jesús chaʼan miʼ jacʼ la coración tac. Jesús tiʼ sube jiñi apóstolob i chaʼan iliyi: «Pejtelel chuqui tac mi laʼ cʼajtiben c Tat tij cʼabaʼ, mi caj c chaʼlen» (Jn. 14:13). Jehová jiñʌch muʼ bʌ i ñʌchʼtan yicʼot muʼ bʌ i jacʼ jiñi la coración tac, pero an i cʌybe tiʼ wenta i Yalobil chaʼan miʼ mel chuqui yom (Mt. 28:18). Cheʼ bʌ muʼto caj i jacʼbeñonla la coración, miʼ qʼuel mi tsaʼʌch lac jacʼbe i ticʼojel tac Jesús. Jumpʼejl ejemplo, Jesús tsiʼ yʌlʌ: «Mi woli laʼ ñusʌben i mul laʼ piʼʌlob, laʼ Tat ti panchan miʼ ñusʌbeñetla laʼ mul. Pero mi mach mi laʼ ñusʌbeñob i mul laʼ piʼʌlob, maʼanic miʼ ñusʌbeñetla laʼ mul laʼ Tat jaʼel» (Mt. 6:14, 15). Tiʼ sujm, yomʌch mi lac pʌsben la cutslel yambʌlob cheʼ bajcheʼ Jehová yicʼot Jesús miʼ pʌsbeñonla.

7. ¿Chuqui yom mi lac mel chaʼan mi lac tajben i wenlel jiñi i tojol laj coltʌntel tsaʼ bʌ i yʌcʼʌ Jesús?

⁷ Cojach jiñi wem bʌ i yamigojob Jesús tsʼʌcʌl mi caj i tajbeñob i wenlel jiñi i tojol laj coltʌntel. ¿Bajcheʼ la cujil? Jesús tsiʼ yʌlʌ chaʼan mi caj «yʌcʼ i bʌ ti chʌmel chaʼan i piʼʌlob» (Jn. 15:13). Jiñi i wiñicob Dios tsaʼ bʌ ajñiyob cheʼ bʌ maxto tilemic Jesús ila ti Pañimil muʼto caj i cʌñob yicʼot i cʼuxbiñob. Jiñi wiñicob xʼixicob tojoʼ bʌ bajcheʼ Abrahán, Sara, Moisés o Rahab mi caj i chaʼ tejchelob, pero muʼto caj i sujtelob tiʼ yamigo Jesús jaʼel chaʼan miʼ tajob jiñi i cuxtʌlel maʼañic bʌ i jilibal (Jn. 17:3; Hch. 24:15; He. 11:8-12, 24-26, 31).

8, 9. Cheʼ bajcheʼ miʼ yʌl Juan 15:4, 5, ¿chuqui miʼ mejlel lac mel cheʼ i yamigojonla Jesús, i chucoch yom temel mi lac bej ajñel yicʼot?

⁸ Mi lac tem chaʼlen eʼtel (troñel) yicʼot Jesús ti subtʼan yicʼot cheʼ mi laj cʌntesan yambʌlob chaʼan jiñi wen tʼan chaʼan bʌ i Yumʌntel Dios. Cheʼ baqui ora tsajñi ila ti Lum, tiʼ cʌntesa jiñi i sujmlel chaʼan bʌ Dios. Cʼʌlʌl cheʼ bʌ tsaʼix chaʼ sujti ti panchan, bajcheʼ i Jol congregación, woli (choncol) i chʌn qʼuel ili eʼtel. Miʼ qʼuel yicʼot miʼ chʼʌm ti ñuc cheʼ mi lac chaʼlen wersa laj coltan jiñi wiñicob xʼixicob (quixtañujob) chaʼan miʼ cʌñob yicʼot miʼ cʌñob jiñi i Tat. Ili eʼtel cojach miʼ mejlel lac mel tiʼ coltaya Jehová yicʼot Jesús (pejcan Juan 15:4, 5).

⁹ Jiñi Biblia tsiquil miʼ pʌsbeñonla chaʼan yom mi laj cʼuxbin Jesús chaʼan wen miʼ qʼuelonla Jehová. Jin chaʼan, laʼ laj qʼuel chʌnchajp ñuc bʌ i cʼʌjñibal chaʼan mi lac sujtel tiʼ yamigo Jesús.

10. ¿Chuqui ñaxan yom mi lac mel chaʼan mi lac sujtel tiʼ yamigo Jesús?

¹⁰ Ñaxam bʌ, laʼ laj cʌn Jesús. Jin chaʼan, laʼ lac pejcan jiñi libro i chaʼan Mateo, Marcos, Lucas yicʼot Juan. Cheʼ mi lac wen ñaʼtan jiñi relato tac chaʼan i cuxtʌlel Jesús i cheʼ mi laj qʼuel bajcheʼ tsiʼ pʌsbe i yutslel jiñi quixtañujob, mi caj laj cʼuxbin yicʼot laj qʼuel ti ñuc. Jumpʼejl ejemplo, maʼañic tsiʼ qʼuele jiñi xcʌntʼañob bajcheʼ xyaj eʼtelob i chaʼan, anquese i Yumobʌch. Tsiʼ qʼuele bajcheʼ i yamigojob, i tiʼ subeyob chuqui miʼ pensalin yicʼot bajcheʼ miʼ yubin i bʌ (Jn. 15:15). Cʼux tsiʼ yubi chuqui miʼ ñusañob yicʼot tsiʼ chaʼle uqʼuel yicʼotob (Jn. 11:32-36). Jinto jaʼel jiñi i contrajob tsiʼ qʼueleyob chaʼan i yamigojob jiñi muʼ bʌ jacʼob jiñi tsaʼ bʌ i yʌlʌ (Mt. 11:19). Mi cheʼ mi laj qʼuel yambʌlob cheʼ bajcheʼ tsiʼ qʼuele jiñi xcʌntʼañob, wen mi caj la cajñel yicʼotob, mi caj lac ñumen taj lac tijicñʌyel, mi  caj lac ñumen cʼuxbin yicʼot lac ñumen qʼuel ti ñuc jiñi Cristo.

11. ¿Baqui bʌ jiñi i chaʼpʼejlel yom bʌ mi lac mel chaʼan mi lac sujtel tiʼ yamigo Jesús, i chucoch ñuc i cʼʌjñibal?

¹¹ I chaʼpʼejlel, laʼ lac chaʼlen pensar yicʼot laʼ lac pʌs lac melbal bajcheʼ Jesús. Cheʼ bʌ miʼ cʼotel lac ñumen cʌn, ñumen wem bʌ amigojonla mi caj lac sujtel yicʼot (1 Co. 2:16). ¿Bajcheʼ miʼ mejlel lac lajin? Laʼ laj qʼuel jumpʼejl ejemplo. Ñumen ñuc bʌ i cʼʌjñibal tsiʼ qʼuele jiñʌch cheʼ miʼ coltan yambʌlob, mach jiñic cheʼ miʼ mel chuqui bajñel yom (Mt. 20:28; Ro. 15:1-3). Come cheʼ miʼ ñaʼtan bajcheʼ jiñi, cabʌl chuqui miʼ mel tiʼ tojlelob yicʼot miʼ ñusʌbeñob i mul. Mach ti orajic miʼ michʼan chaʼan chuqui miʼ yʌjlel tiʼ tojlel (Jn. 1:46, 47). Maʼañic tsiʼ ñaʼta mach bʌ weñic tiʼ tojlel juntiquil quixtañu tiʼ caj chaʼan tsiʼ mele mach bʌ weñic wajali (1 Ti. 1:12-14). Ñucʌch i cʼʌjñibal cheʼ mi lac lajiben i melbal come tsiʼ yʌlʌ: «Cheʼ jini, pejtelel winicob mi caj i ñaʼtañob xcʌntʼañetla c chaʼan cheʼ mi laʼ cʼuxbin laʼ bʌ» (Jn. 13:35). Jin chaʼan, laʼ laj cʼajtiben lac bʌ: Cheʼ bajcheʼ Jesús, ¿muʼ ba c chaʼlen wersa chaʼan wen mi cajñel quicʼot quermañujob?

12. ¿Baqui bʌ jiñi i yuxpʼejlel ñuc bʌ i cʼʌjñibal chaʼan mi lac sujtel tiʼ yamigo Jesús, i bajcheʼ mi lac mel?

¹² I yuxpʼejlel, laʼ laj coltan jiñi i yermañujob Cristo. Cheʼ an chuqui mi lac mel tiʼ tojlel i yermañujob yajcʌbiloʼ bʌ, Cristo miʼ qʼuel chaʼan jiñʌch woli lac melben (Mt. 25:34-40). Junchajp bajcheʼ miʼ mejlel laj coltañob jiñʌch cheʼ mi lac mel jiñi eʼtel tsaʼ bʌ i subeyob jiñi xcʌntʼañob i chaʼan: Cheʼ mi lac sub jiñi i Yumʌntel Dios i mi lac sutqʼuin ti xcʌntʼan yambʌlob (Mt. 28:19, 20; Hch. 10:42). Ñucʌch i cʼʌjñibal i coltaya jiñi ‹yambʌ tiñʌmeʼ› chaʼan jiñi i yermañujob Cristo miʼ tsʼʌctesañob jiñi subtʼan woli bʌ i mejlel tiʼ pejtelel pañimil ili ora (Jn. 10:16). Mi ochemonla ti jiñi yambʌ tiñʌmeʼ, cheʼ mi lac mel ili eʼtel mi lac pʌs chaʼan mi laj cʼuxbin jiñi yajcʌbiloʼ bʌ yicʼot jiñi Jesús.

13. ¿Bajcheʼ miʼ mejlel lac jacʼ jiñi ticʼojel tsaʼ bʌ i yʌcʼʌ Jesús ti Lucas 16:9?

¹³ Cheʼ jaʼel, mi lac sujtel tiʼ yamigo Jehová yicʼot Jesús cheʼ bʌ mi la cʌcʼ taqʼuin chaʼan mi laj coltan jiñi eʼtel añoʼ bʌ tiʼ wenta (pejcan Lucas 16:9). Jumpʼejl ejemplo, miʼ mejlel la cʌcʼ taqʼuin chaʼan jiñi eʼtel tiʼ pejtelel pañimil chaʼan mi laj coltan jiñi subtʼan ti ñajt tac bʌ lum, chaʼan miʼ mejlel yicʼot miʼ tojʼesʌntel i yotlel tac chʼujutesaya yicʼot jiñi hermanojob muʼ bʌ i yubiñob wocol tiʼ caj icʼ jaʼal o yan tac bʌ. Cheʼ jaʼel, miʼ mejlel la cʌcʼ taqʼuin yaʼ ti laj congregación yicʼot laj coltan jiñi hermanojob i cʼʌjñibal bʌ i chaʼañob (Pr. 19:17). Cheʼ bajcheʼ ili, mi laj coltan jiñi yermañujob Cristo.

14. Cheʼ bajcheʼ miʼ yʌl Efesios 4:15, 16, ¿baqui bʌ jiñi i chʌmpʼejlel yom bʌ mi lac mel chaʼan mi lac sujtel tiʼ yamigo Jesús?

¹⁴ I chʌmpʼejlel, laʼ lac jacʼ jiñi tsaʼ bʌ i ñaʼtayob i mel jiñi ancianojob. Mi caj i pʼʌtʼan bajcheʼ an la quicʼot Jesús, i jol jiñi congregación, cheʼ mi laj coltan jiñi hermanojob tsaʼ bʌ waʼchocontiyob chaʼan miʼ cʌntañonla (pejcan Efesios 4:15, 16). Jumpʼejl ejemplo, jiñi i yorganización Jehová woliʼ qʼuel mi weñʌch woliʼ cʼʌjñel jiñi i Yotlel tempa bʌ tac. Jin chaʼan, an congregación tac tsaʼ bʌ xʌjbi yicʼot an wen qʼuejli bajcheʼ cʼamel i ñuclel baqui miʼ chaʼlentel subtʼan. Wocolix i yʌlʌ jiñi, maʼañix miʼ wen cʼʌjñel taqʼuin. Cheʼ jaʼel, an xsubtʼañob tsaʼ bʌ cajiyob ti ñʌmʼan ti yambʌ congregación. Tajol ili xucʼul bʌ hermanojob ti cabʌl jab tsiʼ tempayob i bʌ ti jumpʼejl congregación  i wen ñʌmʌlobix yicʼot jiñi hermanojob. Pero tsaʼ subentiyob chaʼan mi cajel i coltañob yambʌ congregación. Wen tijicña miʼ yubin i bʌ Jesús cheʼ bʌ ili xucʼul bʌ xcʌntʼañob mucʼʌch i jacʼob chuqui miʼ subentelob.

15. ¿Chuqui mi caj i yujtel ti lac tojlel bajcheʼ la camigo Jesús ti talto bʌ qʼuin?

¹⁵ Jiñi xñoptʼañob yajcʌbiloʼ bʌ ti chʼujul bʌ espíritu miʼ pijtañob chaʼan miʼ yajñelob yicʼot Jesús tiʼ pejtelel ora yicʼot chaʼan miʼ tem chaʼleñob eʼtel tiʼ Yumʌntel Dios. Mi caj i qʼuelob, mi caj i pejcañob yicʼot mi caj i tem ñusañob qʼuin (Jn. 14:2, 3). Cheʼ jaʼel, jiñi woli bʌ i pijtañob chumtʌl ila ti Pañimil mi caj i cʼuxbintelob yicʼot mi caj i cʌntʌntelob ti Jesús. Anquese maʼañic mi caj i qʼuelob, ti jujumpʼejl qʼuin mi caj i yajñelob bajcheʼ ñumen wem bʌ amigojob yicʼot Jesús cheʼ bʌ woli i ñusañob i cuxtʌlel yaʼ ti tsijiʼ bʌ pañimil (Is. 9:6, 7).

16. ¿Chuqui ti bendición tac mi lac taj cheʼ i yamigojonla Jesús?

¹⁶ Cheʼ bʌ mi lac jacʼ ochel tiʼ yamigo Jesús, mi lac taj cabʌl bendición. Jumpʼejl ejemplo, ili ora miʼ cʼuxbiñonla yicʼot miʼ coltañonla. Cheʼ jaʼel, mi lac mejlel ti chumtʌl tiʼ pejtelel ora. I cheʼ la camigo Jesús mi lac taj ñumen wem bʌ la camigo: Jiñi i Tat, Jehová. Wen utsʼatax cheʼ i yamigojonla Jesús.