1, 2. ¿Chucoch wen ñuc i cʼʌjñibal jiñi capítulo 8 i chaʼan Romanos tiʼ tojlel jiñi bombiloʼ bʌ?

TAJOL an pejcʌbil lac chaʼan Romanos 8:15-17 cheʼ tiʼ yorajlel chaʼan miʼ cʼajtesʌntel cheʼ bʌ tsaʼ chʌmi Jesús. Ili versículo tac miʼ tsictesan bajcheʼ miʼ cʼotel i ñaʼtañob jiñi bombiloʼ bʌ o yajcʌbiloʼ bʌ ti espíritu chaʼan mi caj i majlelob ti chumtʌl ti panchan. Ti Romanos 8:1 miʼ yʌl chaʼan jiñi bombiloʼ bʌ jiñobʌch «jini añoʼ bʌ ti Cristo Jesús». Pero ¿tsaʼ ba tsʼijbunti jiñi capítulo 8 i chaʼan Romanos chaʼan jach tiʼ tojlel jiñi bombiloʼ? ¿Muʼ ba i mejlel i coltan jaʼel jiñi wʌʼ bʌ mi caj i chumtʌlob ti Pañimil?

² Jiñi capítulo 8 i chaʼan Romanos tsaʼ tsʼijbunti tiʼ tojlel bombiloʼ bʌ. Ila miʼ yʌl chaʼan jiñi bombiloʼ bʌ miʼ yʌqʼuentelob jiñi «Espíritu» yicʼot woliyob (choncolob) ‹ti pijt jinto miʼ tsictiyel i yalobilob Dios cheʼ miʼ yʌqʼuentelob tsijiʼ bʌ i bʌcʼtal› (Romanos 8:23). Miʼ sujtelob tiʼ yalobilob  Dios cheʼ bʌ miʼ chaʼ chʼojyelob. Jehová tsaʼix i ñusʌbeyob i mul yicʼot muqʼuix i qʼuelob ti toj come tsiʼ yʌcʼʌ i tojol jiñi mulil, jin chaʼan miʼ mejlelob ti sujtel tiʼ yalobilob (Romanos 3:23-26; 4:25; 8:30).

3. ¿Chucoch jiñi añoʼ bʌ i pijtaya chaʼan miʼ chumtʌlob wʌʼ ti Pañimil yom miʼ pejcañob jaʼel jiñi capítulo 8 i chaʼan Romanos?

³ Pablo tsiʼ taja ti tʼan Abraham (Abrahán) yaʼ ti capítulo 4 i chaʼan Romanos. Abraham tsaʼ chumle cheʼ bʌ maxto julemic Jesús wʌʼ ti Pañimil. Anquese mach bombilic ti espíritu, Jehová tsiʼ qʼuele ti toj (pejcan Romanos 4:20-22). Ili ora jaʼel, Jehová miʼ qʼuel ti toj jiñi xucʼuloʼ bʌ añoʼ bʌ i pijtaya chaʼan miʼ chumtʌlob ila ti Pañimil. Jiñi ticʼojel tac am bʌ yaʼ ti capítulo 8 i chaʼan Romanos miʼ mejlel i coltan jaʼel jiñi xñoptʼañob, jin chaʼan yom miʼ pejcañob.

4. Cheʼ mi lac pejcan Romanos 8:21, ¿chuqui yom mi laj cʼajtiben lac bʌ?

⁴ Jehová miʼ yʌcʼ i tʼan yaʼ ti Romanos 8:21 chaʼan «pejtel jini melbil tac bʌ mi caj i yʌjqʼuel ti colel tiʼ pʼʌtʌlel chʌmel» (sajtel) yicʼot ti mulil. Ili yom i yʌl chaʼan muʼ bʌ caj i chumtʌl ti Paraíso mi caj i yajñelob ti «libre chaʼan tijicña miʼ yajñel[ob] yicʼot i ñuclel i yalobilob Dios». Yom mi laj cʼajtiben lac bʌ cheʼ mi lac pejcan ili versículo: «¿Muʼ ba j qʼuel c bʌ yaʼ ti tsijiʼ bʌ pañimil (mulawil)?». Laʼ laj qʼuel chuqui yom mi lac mel chaʼan yaʼʌch mi la cajñel.

5. ¿Chuqui tsiʼ taja ti tʼan Pablo yaʼ ti Romanos 8:4-13?

⁵ (Pejcan Romanos 8:4-13). Pablo tsiʼ taja ti tʼan chaʼchajp wiñicob xʼixicob (quixtañujob) yaʼ ti capítulo 8 i chaʼan Romanos. Tsiʼ yʌlʌ chaʼan jiñi «muʼ bʌ i jacʼbeñob i tsucul pusicʼal» yicʼot «muʼ bʌ i jacʼbeñob jini Espíritu». Miʼ mejlel lac ñaʼtan chaʼan Pablo tsiʼ taja ti tʼan jiñi mach bʌ xñoptʼañobic yicʼot jiñobʌch bʌyi. Pero Pablo tiʼ tsʼijbu ili carta tiʼ tojlel xñoptʼañob, jiñi ‹tsaʼ bʌ pʌjyiyob chaʼan miʼ yochelob ti chʼujul› (Romanos 1:7). Jin chaʼan, jiñi «muʼ bʌ i jacʼbeñob i tsucul pusicʼal» yicʼot «muʼ bʌ i jacʼbeñob jini Espíritu» xñoptʼañobʌch. Pero ¿chucoch mach lajalobic?

6, 7. a) ¿Chuqui tac yambʌ i sujmlel an jiñi tʼan tsaʼ bʌ chaʼlenti ti traducir ti Biblia chʼol bajcheʼ «tsucul pusicʼal»? b) ¿Chuqui woliʼ taj ti tʼan Romanos 8:4-13 cheʼ miʼ cʼʌn jiñi tʼan «tsucul pusicʼal»?

⁶ Jiñi tʼan am bʌ ti griego tsaʼ bʌ chaʼlenti ti traducir bajcheʼ «tsucul pusicʼal» yaʼ ti Romanos 8:4-13, mach junchajpic chuqui yom i yʌl. An i tajol woli (yʌquel) i taj ti tʼan lac bʌcʼtal o i bʌcʼtal juncojt añimal (Romanos 2:28, 1 Corintios 15:39, 50). Cheʼ jaʼel, miʼ taj ti tʼan chaʼan jiñi familia. Jumpʼejl ejemplo, yaʼ ti Romanos 9:3, jiñi tʼan am bʌ ti griego miʼ chaʼlen ti traducir yaʼ ti Biblia chʼol bajcheʼ «ñojteʼel».

⁷ Cheʼ jiñi, ¿chuqui yom i yʌl jiñi tʼan  «tsucul pusicʼal» am bʌ ti Romanos 8:4-13? Chaʼan mi lac ñaʼtan, laʼ laj qʼuel tsaʼ bʌ i yʌlʌ Pablo yaʼ ti Romanos 7:5: «Cheʼ bʌ tsaʼ lac jacʼbe lac tsucul pusicʼal, jini i colosojlel lac pusicʼal, ñijcʌbil chaʼan mandar, tsiʼ nijcayonla ti mulil chaʼan miʼ yʌcʼonla ti chʌmel». Pablo tiʼ tsictesa chaʼan jiñi «muʼ bʌ i jacʼbeñob i tsucul pusicʼal» jiñobʌch jiñi yaʼ jax bʌ añob i ñaʼtʌbal yicʼot ñijcʌbiloʼ bʌ tiʼ melol chuqui jach bajñel yomob.

8. ¿Chucoch tsiʼ sube Pablo jiñi xñoptʼañob bombiloʼ bʌ chaʼan mach yomic miʼ jacʼob «i tsucul pusicʼal»?

⁸ ¿Chucoch tsiʼ sube Pablo jiñi xñoptʼañob bombiloʼ bʌ chaʼan mach yomic miʼ jacʼob «i tsucul pusicʼal»? Come majqui jach miʼ mejlel i tech i ñumen acʼ ti ñuc chuqui bajñel yom. Jumpʼejl ejemplo, Pablo tsiʼ yʌlʌ chaʼan yaʼ ti Roma an hermanojob tsaʼ bʌ caji i melob chuqui miʼ bajñel mulañob. Tajol jiñʌch tsiʼ ñaʼta i yʌl chaʼan cojax tsaʼ caji i ñumen acʼob ti ñuc jiñi piʼleya, jiñi uchʼel yicʼot yambʌ ñusaqʼuin tac (Romanos 16:17, 18; Filipenses 3:18, 19; Judas 4, 8, 12). Ti Corinto, juntiquil xñoptʼan tsiʼ piʼle i «majañaʼ», i cabʌl ora cheʼ tsiʼ mele (1 Corintios 5:1). Jin chaʼan, jiñi xñoptʼañob cheʼ ti ñaxam bʌ siglo i cʼʌjñibalʌch i chaʼañob i ticʼojel Pablo chaʼan mach yomic miʼ jacʼob «i tsucul pusicʼal» (Romanos 8:5, 6). Ili ora i cʼʌjñibalʌch lac chaʼan jeʼel.

9. ¿Chuqui mach bʌ yomic i yʌl Romanos 8:6?

⁹ Ili ora, i cʼʌjñibal lac chaʼan jaʼel jiñi ticʼojel. Anquese añix ora laj cajel lac melben i yeʼtel (troñel) Jehová, miʼ mejlel lac tech lac jacʼben lac «tsucul pusicʼal». Pero Romanos 8:6 mach yomic i yʌl chaʼan mulil cheʼ mi lac ñaʼtan chuqui mi laj cʼux, la queʼtel, lac ñusaqʼuin o jiñi piʼleya. Ili tac mach lecojic. Jesús tsaʼʌch i chaʼle wem bʌ uchʼel jaʼel yicʼot tsaʼto i weʼsa yonlel quixtañu. An i tajol tsaʼʌch i yʌqʼue i yorajlel cʼaj o jeʼel. Cheʼ jaʼel, Pablo tsiʼ yʌlʌ chaʼan i cʼʌjñibalʌch jiñi piʼleya ti jumpʼejl ñujpuñel.

10. ¿Chuqui yom i yʌl cheʼ mi lac ‹chʌn jacʼ lac tsucul pusicʼal›?

¹⁰ ¿Chuqui yom i yʌl cheʼ mi lac ‹chʌn jacʼ lac tsucul pusicʼal›? Pablo tsiʼ taja ti tʼan chaʼan jin cheʼ junchajp jach baqui mi la cʌcʼ lac pensar. Juntiquil wen yujil bʌ tsiʼ yʌlʌ chaʼan lajalʌch bajcheʼ jiñi cojach bʌ miʼ ñaʼtañob chuqui bajñel yomob i jin jach miʼ chʌcʌ alob. Cojach ñumen ñuc miʼ qʼuelob chuqui bajñel yomob i jiñʌch miʼ sʌclañob.

11. ¿Chuqui tac miʼ mejlel lac ñumen acʼ ti ñuc?

¹¹ Jiñi xñoptʼañob ti Roma tsaʼʌch i wen ñaʼtayob chuqui woli bʌ i ñumen acʼob ti ñuc. ¿Jiñoʼ ba i «tsucul pusicʼal»? Yom mi laj qʼuel jaʼel chuqui jiñi ñumen ñuc bʌ ti lac tojlel. ¿Chuqui tac miʼ mejlel lac ñumen acʼ ti ñuc? Laʼ laj cʼajtiben lac bʌ: «¿Chuqui mic mulan c ñumen taj ti tʼan? ¿Chuqui mic ñumen mulan c mel?». An muʼ bʌ i cʼotel i cʌñob chaʼan cojach miʼ chʌcʌ ñaʼtañob i ñop jaychajp vino an, i wen chʼʌlob i yotot, i mʌñob pisil, i ñumen oqʼuesañob i taqʼuin o miʼ ñaʼtañob baqui miʼ majlelob ti xʌmbal. Mach lecojic tiʼ pejtelel  iliyi. Laʼ laj cʼajtesan chaʼpʼejl ejemplo chaʼan jiñi vino. Jesús tsiʼ sujtesa ti vino jiñi jaʼ cheʼ bʌ tsajñi ti jumpʼejl ñujpuñel, i Pablo tsiʼ sube Timoteo chaʼan miʼ jap «tsʼitaʼ vino» chaʼan i cʼamʌjel (1 Timoteo 5:23; Juan 2:3-11). Pero jiñi vino mach jiñic ñumen i cʼʌjñibal bʌ tsiʼ qʼueleyob. Ixcu joñonla, ¿chuqui mi lac ñumen acʼ ti ñuc?

12, 13. ¿Chucoch yom mi lac wen tsajin chuqui jiñi ñumen ñuc bʌ i cʼʌjñibal woli laj qʼuel?

¹² ¿Chucoch yom mi lac wen qʼuel chuqui woli bʌ lac ñumen acʼ ti ñuc? Pablo tsiʼ yʌlʌ: «Jini muʼ bʌ i chʌn jacʼ i tsucul pusicʼal miʼ yʌjqʼuel ti chʌmel» (Romanos 8:6). Mi tsaʼ lac jacʼbe lac «tsucul pusicʼal», tajol miʼ cʼotel laj cʌy Dios i ti wiʼil mi lac sʌt la cuxtʌlel. Pero ti lac pejtelel miʼ mejlel laj qʼuextan lac bʌ chaʼan mach cheʼic mi laj cujtel. ¿Cʼajal ba lac chaʼan jiñi wiñic am bʌ ti Corinto tsaʼ bʌ chaʼlenti ti expulsar? Tsiʼ qʼuexta i melbal. Tsiʼ cʌyʌ i mel chuqui yom i bʌcʼtal i tsaʼ chaʼ caji i melben i yeʼtel Jehová (2 Corintios 2:6-8).

¹³ Jiñi wiñic tsaʼʌch mejli i qʼuextan i melbal anquese tsiʼ jacʼʌ i «tsucul pusicʼal» i tsiʼ mele tsʌts bʌ mulil. Mi juntiquil hermano woliʼ cʌy i jacʼben i mandar Jehová, mucʼʌch i mejlel i cʌy jiñi woli bʌ i bajñel sʌclan mach bʌ weñic. Miʼ mejlel i taj i pʼʌtʌlel chaʼan miʼ tojʼesan i melbal cheʼ miʼ cʼajtesan i ticʼojel Pablo.

14, 15. a) ¿Baqui bʌ jiñi yom bʌ mi lac jacʼ? b) ¿Chuqui mach yomic i yʌl «cheʼ mi la cʌcʼ lac pensar ti espíritu»?

¹⁴ Cheʼ bʌ Pablo tsaʼ ujti i yʌl baqui bʌ i wocolel cheʼ mi lac jacʼben lac «tsucul pusicʼal», tsiʼ yʌlʌ: «Jini muʼ bʌ i chʌn jacʼ jini Espíritu miʼ yʌqʼuentel i cuxtʌlel yicʼot i ñʌchʼtilel i pusicʼal». Ili jiñʌch utsʼatax bʌ lac chobejtʌbal.

¹⁵ Pero cheʼ mi lac «chʌn jacʼ jiñi espíritu» mach yomic i yʌl chaʼan yaʼ jach mi caj lac chʌcʌ acʼ lac pensar tiʼ chaʼan bʌ Jehová yicʼot ti Biblia, i tiʼ pejtelel ora jin jach mi caj lac chʌcʌ al. Lajaloñʌchla jaʼel bajcheʼ yambʌlob. Jumpʼejl ejemplo, jiñi xñoptʼañob ti ñaxam bʌ siglo miʼ chaʼleñob uchʼel, miʼ ñujpuñelob, miʼ tajob i familia yicʼot miʼ chaʼleñob troñel (Marcos 6:3; 1 Tesalonicenses 2:9).

16. ¿Chuqui tsiʼ ñumen acʼʌ ti ñuc Pablo?

¹⁶ Pero Pablo yicʼot yambʌ xñoptʼañob ti ñaxam bʌ siglo maʼañic tsiʼ yʌcʼʌyob ti ñuc jiñi tac. Jumpʼejl ejemplo, la cujil chaʼan Pablo tsiʼ chaʼle eʼtel bajcheʼ xmel pisil bʌ otot. Pero mach jiñic tsiʼ yʌcʼʌ ti ñuc i yeʼtel. Tsaʼ bʌ i ñumen acʼʌ ti ñuc jiñʌch i melol i yeʼtel Dios. Tsiʼ wen acʼʌ i bʌ ti subtʼan yicʼot cʌntesa (pejcan Hechos 18:2-4; 20:20, 21, 34, 35). Jiñi hermanojob ti Roma yomʌch miʼ lajiñob Pablo, i cheʼʌch yom mi lac mel jaʼel (Romanos 15:15, 16).

17. ¿Chuqui mi caj lac taj mi mucʼʌch lac «chʌn jacʼ jiñi Espíritu»?

¹⁷ ¿Baqui bʌ wenlel tac mi caj lac taj mi mucʼʌch lac «chʌn jacʼ jini Espíritu»?  Romanos 8:6 miʼ yʌl: «Jini muʼ bʌ i chʌn jacʼ jini Espíritu miʼ yʌqʼuentel i cuxtʌlel yicʼot i ñʌchʼtilel i pusicʼal». Ili yom i yʌl chaʼan jin mi la cʌcʼ chaʼan Jehová miʼ tojʼesan lac pensar yicʼot i yespíritu i mi cʼotel laj cʌn chuqui miʼ ñaʼtan. Dios miʼ waʼchocon i tʼan chaʼan tijicña mi caj la cajñel ti ili ora i chaʼan mi caj i yʌqʼueñonla laj cuxtʌlel mach bʌ añic miʼ jilel cheʼ ti talto bʌ qʼuin.

18. ¿Bajcheʼ miʼ mejlel lac taj ñʌchʼtʌlel cheʼ mi lac «chʌn jacʼ jiñi Espíritu»?

¹⁸ Pablo tsiʼ yʌlʌ jaʼel chaʼan cheʼ mi lac «chʌn jacʼ jiñi Espíritu» mi lac taj ñʌchʼtʌlel. Ti lac pejtelel la com ñʌchʼtʌlel, ñumento i ñʌchʼtʌlel lac pensar. Pero mach ti lac pejtelelic mi lac taj. ¿Bajcheʼ miʼ mejlel lac taj ñʌchʼtʌlel cheʼ mi lac «chʌn jacʼ jiñi Espíritu»? Jehová mucʼʌch i mejlel i yʌqʼueñonla i ñʌchʼtʌlel lac pensar. Cheʼ jaʼel, ñʌchʼʌl mi lac mejlel ti ajñel ti lac familia yicʼot yambʌ hermanojob. Come luʼ xmulilonla, mi lac taj wocol yicʼot yambʌ hermanojob. Cheʼ miʼ yujtel bajcheʼ jiñi, mi la cʌcʼ ti ñuc ili i ticʼojel Jesús: «Ñaxan mele a bʌ a wicʼot a piʼʌl» (Mateo 5:24). Yom cʼajal lac chaʼan chaʼan jiñi la quermañojob mucʼʌch i melbeñob jaʼel i yeʼtel Jehová, «jini Dios muʼ bʌ i yʌqʼueñonla i ñʌchʼtilel lac pusicʼal» (Romanos 15:33; 16:20).

19. ¿Bajcheʼ yilal bʌ ñʌchʼtʌlel mi caj lac taj?

¹⁹ Mi mucʼʌch lac «chʌn jacʼ jiñi Espíritu», mi caj lac taj jiñi ñumen ñuc bʌ ñʌchʼtʌlel, jiñʌch ñʌchʼtʌlel la quicʼot Dios. Jiñi xʼaltʼan Isaías tsiʼ yʌlʌ chaʼan Jehová mi caj i cʌntan muʼ bʌ i ñopob yicʼot mi caj i yʌqʼueñob i ñʌchʼtʌlel tiʼ pejtelel ora (Isaías 26:3; pejcan Romanos 5:1, Jiñi tsijiʼ bʌ wen tʼañ chaʼañ estudio *).

20. Mi mucʼʌch lac jacʼ jiñi ticʼojel am bʌ ti capítulo 8 i chaʼan Romanos, ¿baqui bʌ jiñi majtañʌl muʼ bʌ caj lac taj?

²⁰ Ti lac pejtelel miʼ mejlel lac locʼsʌben i wenlel jiñi capítulo 8 i chaʼan Romanos, mach yʌlʌlic mi yaʼ ti panchan woli lac pijtan majlel ti chumtʌl o wʌʼ ti Pañimil. Tijicña mi la cubin cheʼ miʼ subeñonla jiñi Biblia chaʼan yom mi la cʌcʼ lac pusicʼal tiʼ melol i yeʼtel Jehová i mach jiñic chuqui bajñel la com. Mi mucʼʌch lac «chʌn jacʼ jiñi Espíritu», mi caj i mejlel lac taj ili ñuc bʌ majtañʌl: «Laj cuxtilel mach bʌ anic miʼ jilel ti lac Yum Cristo Jesús» (Romanos 6:23).