1, 2. a) ¿Chuqui tiʼ caj miʼ chaʼleñob pensal jiñi i wiñicob Dios? (Qʼuele jiñi dibujo am bʌ tiʼ tejchibal). b) ¿Chuqui mi caj laj qʼuel ti ili temaj?

ILI ora, Satanás «woli ti pam ñumel cheʼ bajcheʼ colem bajlum woli bʌ ti jujuj tʼan. Woliʼ chijtan i colojm chaʼan miʼ cʼux» (1 Pedro 5:8; Apocalipsis 12:17). Jin tiʼ caj cheʼ ti lac pejtelel mi lac boʼoyel. Jinto jiñi i wiñicob Dios miʼ wen chaʼleñob pensal jaʼel. Ti wajali, an xñoptʼañob tsaʼ bʌ i wen chaʼleyob mel pusicʼal cheʼ woli (choncol) i ñusañob wocol. Jumpʼejl ejemplo, jiñi Biblia miʼ yʌl chaʼan jiñi rey David an i tajol tsiʼ wen chaʼle mel pusicʼal (Salmo 55:2). Jiñi apóstol Pablo tsiʼ wen ñaʼta jaʼel jiñi hermanojob añoʼ bʌ tiʼ pejtelel congregación tac (2 Corintios 11:28). Pero ¿chuqui miʼ mejlel lac mel mi cʌlʌxix woliyonla (yʌquelonla) ti pensal?

² Jiñi lac Tat am bʌ ti panchan tsiʼ colta i yubiñob i tijicñʌyel jiñi i wiñicob ti wajali tsaʼ bʌ i wen chaʼleyob mel pusicʼal. Jehová cheʼʌch yom i mel ti lac tojlel jaʼel ili ora. Jiñi Biblia miʼ subeñonla: «Acʼʌ tiʼ wenta Dios pejtelel laʼ cʼojʼol, come woliʼ cʌntañetla» (1 Pedro 5:7). Ti ili temaj mi caj laj qʼuel  chʌnchajp muʼ bʌ caj i coltañonla lac ñʌchʼchocon lac pusicʼal. Ñaxam bʌ, jiñi oración. I chaʼpʼejlel, mi lac pejcʌben i Tʼan Dios yicʼot mi lac wen ñaʼtan muʼ bʌ i yʌl. I yuxpʼejlel, mi laj cʌy chaʼan miʼ coltañonla jiñi chʼujul bʌ i yespíritu Jehová. I chʌmpʼejlel, mi lac suben juntiquil wen laj cʌñʌ bʌ bajcheʼ yubil mi la cubin. Laʼ lac ñaʼtan baqui la com ñumen weñʼan ti jiñi chʌnchajp muʼ bʌ caj laj qʼuel.

3. ¿Bajcheʼ miʼ mejlel laj cʌyben Jehová jiñi laj cuch?

³ Yom bʌ mi lac ñaxan mel chaʼan mi lac ñʌchʼchocon lac pusicʼal jiñʌch cheʼ mi lac pejcan Jehová ti oración ti jumpʼejl lac pusicʼal i mi laj cʌyben tiʼ wenta laj cuch. Cheʼ bʌ an chuqui mi laj cʼojoʼtan, jiñi lac Tat ti panchan yom chaʼan mi lac suben bajcheʼ yubil mi la cubin. David tsiʼ cʼajtibe Jehová ti wocol tʼan: «Dios, ubibeñon coración». Ti wiʼil tsiʼ chaʼ alʌ: «Aqʼuen a cuch lac Yum. Jini mi caj i cuchbeñet majlel» (Salmo 55:1, 22). Mach yomix mi lac wen cʼojoʼtan mi tsaʼix lac chaʼle wersa lac tojʼesan lac wocol. Muʼ bʌ caj i coltañonla jiñʌch cheʼ ti jumpʼejl lac pusicʼal mi lac pejcan Jehová. Pero ¿bajcheʼ miʼ mejlel i ñʌchʼchocon lac pusicʼal jiñi oración? (Salmo 94:18, 19).

4. ¿Chucoch ñucʌch i cʼʌjñibal jiñi oración cheʼ an chuqui mi laj cʼojoʼtan?

⁴ (Pejcan Filipenses 4:6, 7). ¿Bajcheʼ miʼ jacʼbeñonla Jehová cheʼ mi lac chʌcʌ pejcan ti jumpʼejl lac pusicʼal? Jehová miʼ coltañonla la cubin lac tijicñʌyel yicʼot chaʼan maʼañic miʼ tilel lecoj bʌ lac pensar muʼ bʌ mejlel i lowonla. Cheʼ mi lac suben Dios chuqui mi laj cʼojoʼtan o mi an chuqui mi lac bʌcʼñan, miʼ yʌqʼueñonla i ñʌchʼtʌlel lac pusicʼal. An cabʌl hermanojob tajbil bʌ i chaʼañob jiñi ñʌchʼtʌlel, i mucʼʌch i mejlel lac taj jaʼel. Jiñi ‹i ñʌchʼtʌlel lac pusicʼal chʼoyol bʌ ti Dios› miʼ coltañonla lac ñusan lac wocol tac. Jehová miʼ yʌl chaʼan mach yomic mi lac chaʼlen bʌqʼuen come mi caj i yajñel ti lac tʼejl chaʼan miʼ pʼʌtʼesañonla yicʼot miʼ coltañonla (Isaías 41:10). Mucʼʌch i mejlel lac chʼujbiben i tʼan Jehová.

5. ¿Bajcheʼ miʼ mejlel i coltañonla lac taj i ñʌchʼtʌlel lac pusicʼal jiñi i Tʼan Dios?

⁵ Cheʼ mi lac pejcan jiñi Biblia yicʼot mi lac wen ñaʼtan muʼ bʌ i yʌl, jiñʌch i chaʼchajplel bajcheʼ mi lac taj ñʌchʼtʌlel. ¿Chucoch miʼ mejlel i coltañonla jiñi Biblia? Come jiñʌch i Tʼan Dios, i miʼ yʌcʼ ñuc tac bʌ ticʼojel yicʼot i tojel bʌ chaʼan laj cuxtʌlel. Jin chaʼan, laʼ lac wen ñaʼtan muʼ bʌ i yʌl Dios yicʼot bajcheʼ miʼ mejlel i coltañonla i ticʼojel tac cheʼ bʌ an chuqui mi laj cʼojoʼtan. Cheʼʌch mi caj i mejlel lac ñʌchʼchocon lac pusicʼal, i tajol maʼañix mi caj lac chʌn cʼojoʼtan lac bʌ. Jehová miʼ yʌl chaʼan yom mi lac pejcʌben i Tʼan chaʼan mi lac taj lac  chʼejlel i maʼañic chuqui mi lac bʌcʼñan (Josué 1:7-9).

6. ¿Bajcheʼ miʼ coltañonla ili ora jiñi i tʼan Jesús?

⁶ Yaʼ tiʼ Tʼan Dios miʼ mejlel laj cʌn jaʼel bajcheʼ yilal tsiʼ pejca Jesús jiñi yambʌlob. Jiñi wiñicob xʼixicob (quixtañujob) tsiʼ wen mulayob i ñʌchʼtʌben i tʼan Jesús come tsiʼ tajayob i pʼʌtʼesʌntel yicʼot tijicñʌyel, ñumento jiñi cʼuñoʼ bʌ i pusicʼal yicʼot añoʼ bʌ i chʼijiyemlel (pejcan Mateo 11:28-30). Jesús tsiʼ wen acʼʌ ti ñuc bajcheʼ yubil miʼ yubin yambʌlob (Marcos 6:30-32). Tsiʼ colta jaʼel jiñi apóstolob i chaʼan, i cheʼʌch mi caj i mel ti lac tojlel jaʼel. Anquese mach wʌʼix an la quicʼot Jesús bajcheʼ tsaʼ ajñi yicʼot jiñi apóstolob, mucʼʌch i coltañonla cheʼ bajcheʼ tsiʼ yʌlʌ. Jiñʌch jiñi Rey, i choncol i chʌn pʌsbeñonla i yutslel cʼʌlʌl yaʼ ti panchan. Jin chaʼan, cheʼ bʌ an chuqui mi laj cʼojoʼtan, mi lac ñop chaʼan Jesús mi caj i coltañonla baqui ora wen miʼ qʼuel. Jesús miʼ yʌqʼueñonla lac pijtaya yicʼot lac chʼejlel, i jiñʌch miʼ coltañonla lac ñʌjchʼesan laj cʼojol (Hebreos 2:17, 18; 4:16).

7. ¿Bajcheʼ tac miʼ coltañonla jiñi chʼujul bʌ i yespíritu Dios?

⁷ Laʼ laj qʼuel jiñi i yuxchajplel bajcheʼ miʼ mejlel lac ñʌchʼchocon laj cʼojol. Jesús tsiʼ yʌcʼʌ i tʼan chaʼan mi tsaʼ laj cʼajtibe chʼujul bʌ espíritu i Tat, mucʼʌch caj i yʌqʼueñonla (Lucas 11:10-13). Ili chʼujul bʌ espíritu jiñʌch i pʼʌtʌlel Dios mach bʌ añic i pʼisol i pʼʌtʌlel, i miʼ coltañonla chaʼan mi lac pʌs wen tac bʌ lac melbal cheʼ bajcheʼ i melbal Dios (Colosenses 3:10). Ili melbalʌl tac jiñʌch muʼ bʌ i yʌl jiñi Biblia bajcheʼ «i yʌcʼbal jini Espíritu» (pejcan Gálatas 5:22, 23). Cheʼ mi lac pʌs wen tac bʌ lac melbal, utsʼat mi caj la cajñel la quicʼot yambʌlob i maʼañic chuqui mi caj lac wen cʼojoʼtan. Laʼ laj qʼuel bajcheʼ tac miʼ coltañonla i yʌcʼbal jiñi espíritu.

8-12. ¿Bajcheʼ miʼ mejlel i coltañonla i yʌcʼbal jiñi espíritu?

⁸ Cʼuxbiya, tijicñʌyel yicʼot ñʌchʼtʌlel. Maʼañic chuqui mi laj cʼojoʼtan cheʼ mucʼʌch laj qʼuel ti ñuc yambʌlob, mi lac pʌsbeñob laj cʼuxbiya yicʼot la cutslel. Cheʼ mi lac pʌs bajcheʼ iliyi, maʼañic mi caj i toʼol tejchel michʼlel yicʼot chʼijiyemlel. Ti ñʌchʼtʌlel mi caj la cajñel la quicʼot yambʌlob (Romanos 12:10).

⁹ I cuchol wocol, pʼuntaya yicʼot coltaya. Jiñi Biblia miʼ yʌl: «Yom mi laʼ coltan laʼ piʼʌlob tiʼ yutslel laʼ pusicʼal. Pʼuntan laʼ piʼʌlob. Ñusʌben laʼ bʌ laʼ mul» (Efesios 4:32). Cheʼ mi lac jacʼ ili ticʼojel, ñʌchʼʌl mi la cajñel la quicʼot yambʌlob yicʼot maʼañic chuqui mi caj laj cʼojoʼtan. Mach wocolic mi caj laj cubin jaʼel chaʼan mi lac ñusan jumpʼejl wocol tiʼ caj xmulilonla.

¹⁰ I xucʼtʌlel lac pusicʼal. Ili ora, jiñi chubʌʼañʌl tac yicʼot taqʼuin miʼ yʌqʼueñonla laj cʼojoʼtan lac bʌ (Proverbios 18:11). ¿Chuqui yom mi lac mel chaʼan maʼañic mi laj cʌlʌx cʼojoʼtan? Yom mi lac jacʼ i ticʼojel jiñi apóstol Pablo cheʼ miʼ yʌl chaʼan ‹yom tijicña mi la cajñel yicʼot chuqui tac an lac chaʼan›. Mi jumpʼejlʌch i xucʼlib lac pusicʼal ti Jehová, mi caj lac ñop chaʼan mucʼʌch caj i yʌqʼueñonla chuqui i cʼʌjñibal  lac chaʼan. Jehová miʼ yʌcʼ i tʼan: «Maʼanic mi caj a cʌytʌl ti mebaʼ. Maʼanic mi caj j cʌyet». Jin chaʼan miʼ mejlel la cʌl bajcheʼ Pablo: «Lac Yum jiñʌch caj Coltaya. Maʼanic mi caj c bʌcʼñan chuqui miʼ tumbeñon winicob» (Hebreos 13:5, 6).

¹¹ La cutslel yicʼot i ticʼol lac pusicʼal. ¿Bajcheʼ miʼ coltañonla ili chaʼpʼejl melbalʌl? Mi añʌch lac chaʼan, maʼañic mi caj lac mel o la cʌl muʼ bʌ i yʌqʼueñonla lac chaʼ ñaʼtan lac bʌ ti wiʼil. Cheʼ jaʼel, maʼañic chucoch mi caj lac michʼan, mi la cʌʼlen o mi lac pʼaj yambʌlob (Efesios 4:31).

¹² Yom pecʼonla chaʼan miʼ mejlel la cʌcʼ ti ñuc jiñi «pʼʌtʌl bʌ i cʼʌb Dios» yicʼot mi laj cʌyben tiʼ wenta tiʼ pejtelel laj cʼojol (1 Pedro 5:6, 7). Mi añʌch lac pecʼlel, Jehová mi caj i coltañonla yicʼot i cʌntañonla. Cheʼ mucʼʌch laj cʌn chaʼan an chuqui miʼ mejlel lac mel i an chuqui maʼañic bʌ miʼ mejlel lac mel, tsiquil chaʼan mach wolic lac bajñel qʼuel lac bʌ ti ñuc. Maʼañic chuqui mi caj laj cʌlʌx cʼojoʼtan come woli lac ñop chaʼan Dios miʼ coltañonla (Miqueas 6:8).

13. ¿Chuqui i sujmlel jiñi i tʼan Jesús: «Mach mi laʼ mel laʼ pusicʼal»?

¹³ Jesús tsiʼ yʌcʼʌ ili ticʼojel: «Mach mi laʼ mel laʼ pusicʼal» (pejcan Mateo 6:34). Pero ¿chuqui i sujmlel tsaʼ bʌ i yʌlʌ Jesús? Mach yomic i yʌl chaʼan i wiñicob Dios maʼañic ba ora yom miʼ cʼojoʼtañob i bʌ. Tsaʼix laj cʌñʌ chaʼan jiñi rey David yicʼot jiñi apóstol Pablo an i tajol cheʼʌch tsiʼ yubiyob i bʌ. Yom bʌ Jesús jiñʌch chaʼan jiñi xcʌntʼañob i chaʼan miʼ chʼʌmbeñob isujm chaʼan maʼañic i cʼʌjñibal cheʼ mi laj cʌlʌx cʼojoʼtan lac bʌ, come maʼañic mi caj i jisan lac wocol. Ti bele ora mi caj lac taj wocol, jin chaʼan mach lac chʌn ñaʼtan chuqui tsaʼix bʌ lac ñusa o tajol muʼto bʌ caj lac ñusan come mucʼ jach caj lac ñumen cʼojoʼtan. ¿Bajcheʼ miʼ mejlel i coltañonla i ticʼojel Jesús chaʼan maʼañic mi laj cʌlʌx cʼojoʼtan lac bʌ?

14. ¿Bajcheʼ miʼ mejlel lac xucʼchocon lac pusicʼal cheʼ bajcheʼ David?

¹⁴ Tsaʼ bʌ lac mele ti wajali, tajol jiñʌch miʼ yʌcʼonla ti mel pusicʼal. Anquese añix ora tsaʼ ujti tajol muʼto i chʌn aqʼueñonla lac chʼijiyemlel. Jiñi rey David cheʼʌch tsiʼ yubi i bʌ cheʼ bʌ tsiʼ chaʼ ñaʼta mach bʌ wentaquic tsiʼ mele. Cheʼ bʌ tsiʼ taja tac ti tʼan i mul, tsiʼ yʌlʌ chaʼan tsiʼ wen aqʼue i chʼijiyemlel yicʼot chaʼan maʼañix i pʼʌtʌlel (Salmo 38:3, 4, 8, 18). Pero an chuqui utsʼat bʌ tsiʼ mele, lajal bʌ miʼ mejlel lac  mel jaʼel. Tsiʼ ñopo chaʼan Jehová mi caj i pʼuntan yicʼot mi caj i ñusʌben i mul. David tsiʼ wen taja i tijicñʌyel cheʼ bʌ Jehová tsiʼ ñusʌbe i mul (pejcan Salmo 32:1-3, 5).

15. a) ¿Chuqui yambʌ mi laj cʌn tiʼ tojlel jiñi rey David? b) ¿Chuqui miʼ mejlel lac mel chaʼan maʼañic mi laj cʌlʌx mel lac pusicʼal? (Qʼuele jiñi recuadro « Chaʼan maʼañic maʼ cʌlʌx chaʼlen pensal»).

¹⁵ An i tajol jin mi laj cʼojoʼtan woli bʌ ti ujtel. Jumpʼejl ejemplo, cheʼ bʌ David tiʼ tsʼijbu jiñi Salmo 55, an i bʌqʼuen come woliʼ sʌclʌntel chaʼan miʼ tsʌnsʌntel (Salmo 55:2-5). Pero mach jiñic tsiʼ yʌcʼʌ chaʼan miʼ cʌy i ñop Jehová. David tsiʼ cʼajtibe i coltaya Jehová ti wocol tʼan. Pero yujil chaʼan an chuqui yom miʼ mel jaʼel chaʼan miʼ lajmel jiñi i wocol (2 Samuel 15:30-34). An yambʌ chuqui mi laj cʌn tiʼ tojlel David. Yom mi lac chaʼlen wersa chaʼan mi lac lajmesan lac wocol yicʼot mi lac ñop chaʼan Jehová mi caj i coltañonla, chaʼan jiñi chʼijiyemlel maʼañic miʼ jisañonla.

16. ¿Bajcheʼ miʼ pʼʌtʼan lac ñopoñel cheʼ mi lac ñaʼtan chuqui i sujmlel i cʼabaʼ Dios?

¹⁶ An i tajol mi laj cʼojoʼtan jaʼel chuqui miʼ cajel ti talto bʌ qʼuin. Pero mach yomic mi laj cʌlʌx cʼojoʼtan maxto bʌ ujtemic, come ti wiʼil mach cheʼic miʼ yujtel cheʼ bajcheʼ tsaʼ lac lon ñaʼta. Yom mi laj cʼajtesan jaʼel chaʼan Jehová miʼ mejlel i chʼʌm tiʼ wenta chuqui lecoj miʼ yujtel. Miʼ pʼʌtʼan lac ñopoñel (chʼujbiya) cheʼ mi lac ñaʼtan baqui bʌ i sujmlel i cʼabaʼ. I cʼabaʼ Dios yom i yʌl «Jiñʌch miʼ Mel chaʼan cheʼʌch miʼ Sujtel» (Éxodo 3:14, TNM). Jiñi i sujmlel i cʼabaʼ Dios miʼ pʌs chaʼan mi caj i tsʼʌctesan tiʼ pejtelel chuqui ñaʼtʌbil i chaʼan ti lac tojlel. Jin chaʼan, mach yomic mi laj cʌlʌx cʼojoʼtan chuqui miʼ cajel ti talto bʌ qʼuin. Mi lac ñop chaʼan Dios mi caj i yʌqʼueñob bendición jiñi xucʼuloʼ bʌ tiʼ tojlel yicʼot mi caj i coltañob i yubin i ñʌchʼtʌlel chaʼan chuqui ñusʌbil i chaʼañob yicʼot woli bʌ i ñusañob, cheʼ jaʼel, chaʼan jiñi muʼto bʌ caj i ñusañob.

17, 18. ¿Bajcheʼ miʼ coltañonla cheʼ mi lac suben chuqui mi laj cʼojoʼtan juntiquil wen la cʌñʌ bʌ?

¹⁷ I chʌnchajplel muʼ bʌ i coltañonla lac ñʌchʼchocon lac pusicʼal jiñʌch cheʼ mi lac suben juntiquil wen laj cʌñʌ bʌ chuqui mi laj cʼojoʼtan yicʼot bajcheʼ yubil mi la cubin. Jiñi lac ñoxiʼal o la quijñam, wem bʌ la camigo o juntiquil anciano miʼ mejlel  i coltañonla chaʼan woli bʌ lac ñusan. Jiñi Biblia miʼ yʌl: «Lac chʼijiyemlel miʼ juʼsʌbeñonla lac pusicʼal, pero jini wen bʌ tʼan miʼ yʌqʼueñonla tijicña bʌ lac pusicʼal» (Proverbios 12:25). Miʼ yʌl jaʼel chaʼan mach utsʼatic miʼ loqʼuel chuqui mi lac ñaʼtan lac mel cheʼ maʼañic mi laj cʼajtin laj coltʌntel (Proverbios 15:22).

¹⁸ Jiñi tempa bʌ ti congregación miʼ coltañonla lac ñusan lac wocol. Ti jujumpʼejl semana an la quicʼot la quermañojob muʼ bʌ i yʌcʼoñobla ti ñuc yicʼot yomoʼ bʌ i tijicñesan lac pusicʼal (Hebreos 10:24, 25). Cheʼ mi «lac tem ñuqʼuesʌben lac bʌ lac pusicʼal» miʼ yʌqʼueñonla lac pʼʌtʌlel chaʼan miʼ mejlel lac ñusan wocol tac (Romanos 1:12).

19. ¿Chucoch maʼ ñop chaʼan cheʼ lʌcʼʌl maʼ wajñel a wicʼot Jehová mucʼʌch caj i pʼʌtʼesañet cheʼ maʼ ñusan wocol?

¹⁹ Ti jumpʼejl congregación am bʌ ti Canadá, juntiquil anciano tsiʼ cʌñʌ chaʼan ñuc i cʼʌjñibal cheʼ mi laj cʌyben tiʼ wenta Jehová jiñi laj cuch. Ili hermano mucʼ ti eʼtel (troñel) bajcheʼ maestro, i jiñi miʼ wen boʼoyesan. I an jumpʼejl i cʼamʌjel tilem bʌ tiʼ caj cʌlʌx pensal. ¿Baqui miʼ taj i pʼʌtʌlel chaʼan miʼ chʌn chaʼlen wersa? Miʼ chaʼlen wersa chaʼan chʌn lʌcʼʌl miʼ yajñel tiʼ tojlel Jehová. Miʼ suben i yijñam jaʼel bajcheʼ yubil miʼ yubin yicʼot an wem bʌ i yamigojob. Jiñi yambʌ ancianojob yicʼot jiñi superintendente i chaʼan circuito coltʌbil i chaʼañob chaʼan lajal yom miʼ qʼuel chuqui miʼ yujtel cheʼ bajcheʼ miʼ qʼuel Jehová. Cheʼ jaʼel, juntiquil doctor tsiʼ colta bajcheʼ yom miʼ ñusan majlel i cʼamʌjel. Jiñi hermano tsaʼ cʼoti i cʌn chaʼan yom miʼ wen chajpan bajcheʼ ora miʼ wʌyel i chaʼan yom miʼ mel ejercicio. Xucʼu xucʼul tsiʼ cʌñʌ i ñusan ti wen i wocol. Wʌle muqʼuix i cʌyben tiʼ wenta Jehová jiñi maʼañic bʌ miʼ bajñel mejlel i ñusan.

20. a) ¿Bajcheʼ miʼ mejlel laj cʌyben Jehová tiʼ pejtelel laj cʼojol? b) ¿Chuqui mi caj laj qʼuel ti yambʌ temaj?

²⁰ Tsaʼix laj qʼuele ti ili temaj chaʼan ñuc i cʼʌjñibal mi laj cʌyben tiʼ wenta Jehová tiʼ pejtelel laj cʼojol cheʼ mi lac mel oración, mi lac pejcʌben i tʼan yicʼot mi lac wen ñaʼtan muʼ bʌ i yʌl. Yom mi laj cʌy jaʼel chaʼan miʼ coltañonla jiñi chʼujul bʌ i yespíritu Dios, mi lac chaʼlen tʼan la quicʼot wen laj cʌñʌ bʌ yicʼot mi lac majlel ti tempa bʌ tac. Yaʼ ti yambʌ temaj mi caj laj qʼuel bajcheʼ miʼ coltañonla jiñi lac chobejtʌbal albil bʌ i chaʼan Jehová chaʼan mi caj i yʌqʼueñonla (Hebreos 11:6).