1, 2. a) ¿Bajcheʼ miʼ taj i bʌ jiñi cʼuxbiya yicʼot lac ñopoñel? b) ¿Chuqui ti cʼajtiya tac mi caj laj qʼuel?

JEHOVÁ jiñʌch lac Tat, i miʼ yʌcʼ i tʼan chaʼan jiñi xucʼuloʼ bʌ i wiñic mi caj i yʌqʼueñob bendición. Ili jiñʌch junchajp bajcheʼ miʼ pʌsbeñonla i cʼuxbiya Jehová. Mi laj cʼuxbin Dios «come ñaxan tsiʼ cʼuxbiyonla» (1 Juan 4:19). Jiñi cʼuxbiya miʼ taj i bʌ yicʼot lac ñopoñel (chʼujbiya) ti Dios. Cheʼ mi lac ñumen cʼuxbin Dios, miʼ ñumen colel lac ñopoñel tiʼ tojlel yicʼot mi lac ñop chaʼan Jehová mucʼʌch caj i yʌqʼuen i majtan jiñi muʼ bʌ i cʼuxbin (pejcan Hebreos 11:6).

² Jehová yom i yʌqʼuen i chobejtʌbal jiñi i wiñicob. Ili miʼ yʌqʼueñonla lac ñaʼtan bajcheʼ yilal yicʼot chuqui miʼ mel. Chaʼan tsʼʌcʌl lac ñopoñel ti Dios, yom mi lac ñop chaʼan jiñi muʼ bʌ i sʌclañob Jehová ti jumpʼejl i pusicʼal mucʼʌch caj i yʌqʼuentelob i majtan. ¿Chucoch cheʼ mi la cʌl? Come cheʼ mucʼʌch lac ‹ñop Dios, xucʼul lac pusicʼal mi lac pijtan› (Hebreos 11:1). Cheʼ añʌch lac chʼujbiya ti Dios, ti jumpʼejl lac  pusicʼal mi lac ñop chaʼan mi caj i yʌqʼuen bendición jiñi xucʼuloʼ bʌ. ¿Chuqui ti wenlel mi lac taj cheʼ mi lac ñop chaʼan mi caj lac taj lac chobejtʌbal? ¿Baqui bʌ i chobejtʌbal tsiʼ yʌqʼue Jehová jiñi xucʼul bʌ i wiñicob ti wajali? ¿Bajcheʼ miʼ mel ili ora? Laʼ laj qʼuel.

3. ¿Chuqui ti tʼan mi lac taj yaʼ ti Malaquías 3:10?

³ Jehová tsaʼix i yʌcʼʌ i tʼan chaʼan jiñi xucʼul bʌ i wiñicob mi caj i tajob i chobejtʌbal. Cheʼ jaʼel, mi caj i yʌqʼueñonla i bendición mi mucʼʌch lac chaʼlen wersa lac melben i yeʼtel. Jehová miʼ subeñonla: «Qʼuel[ela] xucʼulon. Mi caj c jambeñetla jini panchan chaʼan mi cʌqʼueñetla pejtel chuqui laʼ wom. Ñopola ti isujm» (Malaquías 3:10). Cheʼ mucʼʌch lac ñop bajcheʼ miʼ yʌl, woliyʌch (choncolʌch) la cʌcʼ ti ñuc i tʼan.

4. ¿Chucoch miʼ mejlel lac ñop tsaʼ bʌ i yʌlʌ Jesús ti Mateo 6:33?

⁴ Jesús tsiʼ sube jiñi xcʌntʼañob i chaʼan chaʼan Dios mi caj i yʌqʼueñob i cʼʌjñibal bʌ i chaʼañob mi ñaxan miʼ yʌcʼob tiʼ cuxtʌlel jiñi Yumʌntel (pejcan Mateo 6:33). Jesús tsiʼ yʌlʌ bajcheʼ iliyi come yujil chaʼan Dios miʼ tsʼʌctesan i tʼan tiʼ pejtelel ora (Isaías 55:11). I mucʼʌch i mejlel lac ñop jaʼel. Mi wen añʌch lac ñopoñel ti Jehová, mi caj i tsʼʌctesan ili tʼan: «Maʼanic mi caj a cʌytʌl ti mebaʼ. Maʼanic mi caj j cʌyet» (Hebreos 13:5). Iliyi miʼ coltañonla lac ñop tsaʼ bʌ i yʌlʌ Jesús ti Mateo 6:33.

5. ¿Chucoch miʼ tijicñesan lac pusicʼal tsaʼ bʌ i sube Pedro jiñi Jesús?

 ⁵ Jiñi apóstol Pedro tsiʼ cʼajtibe Jesús: «Tsaj cʌyʌ lojon pejtelel chuqui an c chaʼan lojon chaʼan mic tsajcañet lojon. ¿Chuqui mi caj c taj lojon?» (Mateo 19:27). Jesús maʼañic tsiʼ tiqʼui Pedro chaʼan ili cʼajtiya. Tsaʼ bʌ i mele, tsiʼ sube jiñi xcʌntʼañob chaʼan Jehová mi caj i yʌqʼueñob bendición chaʼan chuqui jach miʼ melob tiʼ tojlel. Anquese jiñi apóstolob yicʼot yambʌ xñoptʼañob temel miʼ cajelob ti yumʌntel ti panchan yicʼot Jesús cheʼ ti talto bʌ qʼuin, pero tsiʼ yʌlʌ jaʼel chaʼan mucʼʌch caj i tajob i chobejtʌbal ili ora: «Jujuntiquil tsaʼ bʌ i cʌyʌ i yotot, mi i yʌscuñob, mi i yijtsʼiñob, mi i tat, mi i ñaʼ, mi i yalobilob, mi i lumal, chaʼan tij cʼabaʼ mi caj i taj yambʌ joʼcʼal i ñumel bajcheʼ jini tsaʼ bʌ i cʌyʌ. Mi caj i taj jaʼel i cuxtʌlel mach bʌ anic miʼ jilel» (Mateo 19:29). Ili ora, jiñi xñoptʼañonbʌla mi lac taj lac tat lac ñaʼ, la calobilob, la querañob, lac chichob yicʼot la quijtsʼiñob yaʼ ti congregación. Ili bendición tac muʼ bʌ lac taj ñumen ñuc bajcheʼ jiñi muʼ bʌ laj cʌy chaʼan i Yumʌntel Dios.

6. Cheʼ mi lac ñaʼtan chaʼan Jehová mi caj i yʌqʼuen i chobejtʌbal jiñi xucʼuloʼ bʌ, ¿bajcheʼ miʼ coltañonla?

⁶ Cheʼ mi lac ñaʼtan chaʼan Jehová mi caj i yʌqʼuen i chobejtʌbal jiñi xucʼuloʼ bʌ tiʼ tojlel, miʼ coltañonla laj cuch jiñi wocol tac. Mach cojach wʌle mi lac taj cabʌl bendición, ti talto bʌ qʼuin mi caj lac taj ñumen ñuc tac bʌ bendición (1 Timoteo 4:8). Miʼ coltañonla ti ajñel ti lac xucʼtʌlel cheʼ ti jumpʼejl lac pusicʼal mi lac ñop chaʼan Jehová miʼ «yʌqʼuen i chobejtʌbal majqui jach miʼ tsajcan» (Hebreos 11:6).

7. ¿Chuqui miʼ mel ti lac tojlel jiñi lac pijtaya?

⁷ Jesús tsiʼ yʌlʌ tiʼ Cʌntesa yaʼ ti Bujtʌl: «Laʼ ñucʼac laʼ pusicʼal. Melela ti tijicña laʼ pusicʼal, come ñuc laʼ chobejtʌbal ti panchan, come cheʼ jaʼel tsiʼ ticʼlayob xʼaltʼañob wajali» (Mateo 5:12). An muʼ bʌ caj i tajob i chobejtʌbal ti panchan. Pero an cabʌlob wʌʼ bʌ mi caj i tajob i chobejtʌbal chaʼan miʼ chumtʌlob ti Pañimil cheʼ sujtemix ti Paraíso. Jiñi chobejt muʼ bʌ caj i tajob mucʼʌch i wen aqʼueñob i tijicñʌyel (Salmo 37:11; Lucas 18:30). Jiñi Biblia miʼ yʌl chaʼan jiñi lac pijtaya: «Xnijca barcojob miʼ cʼʌñob colem tsucul tyaqʼuin muʼ bʌ i choc ochel ti jaʼ chaʼan maʼan miʼ bej nijcʌyel barco. Ti lajoñel cheʼ mi lac bej pensalin laj cotyʌntyel [pijtaya] miʼ xucʼchocontyel lac pusicʼal» (Hebreos 6:17-20, Jini wen bʌ tʼan). Tiʼ sujm, jiñi lac pijtaya miʼ xucʼchocoñonla yicʼot miʼ yʌqʼueñonla lac pʼʌtʌlel chaʼan miʼ mejlel lac ñusan wocol tac.

8. ¿Bajcheʼ miʼ coltañonla jiñi lac pijtaya chaʼan maʼan mi lac wen cʼojoʼtan lac bʌ?

⁸ Jiñi lac pijtaya miʼ coltañonla jaʼel chaʼan maʼan mi lac wen cʼojoʼtan lac bʌ. Lajal bajcheʼ jumpʼejl pomada tsʌwan tsʌwan bʌ miʼ cʼotel ti lac pʌchʌlel, jiñi albil bʌ i chaʼan Dios miʼ yʌqʼueñonla i ñʌchʼtʌlel lac pusicʼal. Cheʼ mi lac ñaʼtan  chaʼan Jehová mi caj i coltañonla mi tsaʼ lac luʼ cʌybe tiʼ wenta laj cuch yicʼot chuqui mi laj cʼojoʼtan, miʼ yʌqʼueñonla lac tijicñʌyel (Salmo 55:22). Miʼ mejlel lac ñop chaʼan Jehová «miʼ mel ñumen ñuc bʌ i yeʼtel [cheʼ] bajcheʼ pejtelel chuqui mi laj cʼajtiben» (Efesios 3:20). Ili yom i yʌl chaʼan ñumento miʼ yʌqʼueñonla Jehová cheʼ bajcheʼ mi laj cʼajtiben.

9. ¿Chuqui yom mi lac mel mi la com i bendición Jehová?

⁹ Ti jumpʼejl lac pusicʼal yom mi lac ñop Jehová yicʼot mi lac jacʼben i tʼan mi la com i bendición. Moisés tsiʼ sube jiñi israelob: «Lac Yum mi caj i yʌqʼueñetla cabʌl bendición yaʼ baʼ mi laʼ majlel ti chumtʌl. Jini jach yom chʌn xucʼul mi laʼ wubiben i tʼan lac Yum Dios. Yom mi laʼ jacʼben pejtel i mandar woli bʌ c subeñetla. Lac Yum Dios mi caj i yʌqʼueñetla bendición cheʼ bajcheʼ tsiʼ subeyetla» (Deuteronomio 15:4-6). ¿Muʼ ba lac wen ñop chaʼan Jehová mi caj i yʌqʼueñonla i bendición mi xucʼulonla tiʼ tojlel? Cabʌl chucoch yomʌch mi lac ñop.

10, 11. ¿Bajcheʼ tsiʼ yʌqʼue i chobejtʌbal José jiñi Jehová?

¹⁰ Jiñi Biblia tsaʼ tsʼijbunti chaʼan miʼ coltañonla. Yaʼi miʼ mejlel laj cʌn bajcheʼ tsiʼ yʌqʼue i bendición Jehová jiñi xucʼul bʌ i wiñicob ti wajali (Romanos 15:4). Jumpʼejl ejemplo jiñʌch José. Ti ñaxan, jiñi i yerañob tsiʼ choñoyob bajcheʼ mozo. Ti wiʼil, jiñi i yijñam i yum ti eʼtel tsiʼ jopʼbe i mul, jin chaʼan tsaʼ otsʌnti ti mʌjquibʌl yaʼ ti Egipto. ¿Tsaʼ ba cʌjyi ti Jehová? Maʼañic. Jiñi Biblia miʼ yʌl: «Yaʼan lac Yum yicʼot. Tsiʼ pʌsbe i yutslel i pusicʼal». Miʼ chaʼ al: «Come yaʼan lac Yum yicʼot. Tsiʼ yʌcʼʌ ti loqʼuel ti utsʼat pejtel chuqui tsiʼ mele José» (Génesis 39:21-23). Anquese José an ti tsʌts bʌ wocol, tsiʼ chʌn pijta i coltʌntel ti Jehová.

¹¹ ¿Bajcheʼ tsiʼ yʌqʼue i chobejtʌbal José jiñi Jehová? Faraón tsiʼ yʌcʼʌ ti loqʼuel José yaʼ ti mʌjquibʌl, cheʼ jiñi tsiʼ yʌqʼue jiñi ñumen ñuc bʌ i yeʼtel ti Egipto (Génesis 41:1, 37-43). José tsiʼ taja chaʼtiquil i yalobil, jiñi ñaxam bʌ tsiʼ yotsʌbe i cʼabaʼ bajcheʼ Manasés, «come tsiʼ yʌlʌ: Dios tsiʼ yʌcʼʌ ti ñajʌyel tic pusicʼal pejtel wocol bʌ queʼtel yicʼot pejtelel c chʼijiyemlel chaʼan c piʼʌlob tiʼ yotot c tat». Jiñi ijtsʼiñʌl bʌ tsiʼ yotsʌbe i cʼabaʼ bajcheʼ Efraín, «come tsiʼ yʌlʌ: Dios tsiʼ yʌqʼueyon c chubʌʼan ti jini lum baʼ tsa cubi wocol» (Génesis 41:51, 52). Jehová tsiʼ yʌqʼue i chobejtʌbal José come xucʼul tsaʼ ajñi. Cheʼ bajcheʼ jiñi, tsaʼ mejli i coltan jiñi israelob yicʼot egiptojob tiʼ yorajlel wiʼñal. Pero José wen yujil chaʼan tilemʌch ti Jehová jiñi bendición tac (Génesis 45:5-9).

12. ¿Chuqui tsiʼ colta Jesús chaʼan xucʼul miʼ yajñel?

¹² Yambʌ tsaʼ bʌ i jacʼbe i tʼan Dios anquese tsiʼ ñusa cabʌl wocol jiñʌch Jesucristo, i Jehová tsaʼʌch i yʌqʼue i chobejtʌbal. ¿Chuqui tsiʼ colta chaʼan xucʼul miʼ yajñel? Jiñi i Tʼan Dios miʼ yʌl: «Come tsiʼ qʼuele jini tijicña bʌ woli bʌ i  pijtan. Jini chaʼan tsiʼ yʌcʼʌ i bʌ ti quisin» (Hebreos 12:2). Jesús tsiʼ taja jiñi tijicñʌyel cheʼ tsiʼ sʌqʼuesʌbe i cʼabaʼ Dios. Jin chaʼan, utsʼat tsaʼ qʼuejli tiʼ Tat yicʼot tsaʼ aqʼuenti yambʌ i chobejtʌbal. Jiñi Biblia miʼ yʌl chaʼan Jesús «tsaʼ buchle tiʼ ñoj Dios yaʼ tiʼ yumʌntel». Miʼ yʌl jaʼel chaʼan «tsiʼ yʌqʼue cʼax cabʌl i ñuclel» yicʼot «tsiʼ yʌqʼue ñumen ñuc bʌ i cʼabaʼ cheʼ bajcheʼ pejtelel ñucoʼ bʌ am bʌ i yeʼtel» (Filipenses 2:9).

13, 14. ¿Bajcheʼ yilal miʼ qʼuel Jehová muʼ bʌ lac mel tiʼ tojlel?

¹³ Miʼ mejlel lac ñop chaʼan Jehová miʼ qʼuel ti ñuc tiʼ pejtelel muʼ bʌ lac mel tiʼ tojlel. Cheʼ bʌ an chuqui maʼañic miʼ mejlel lac mel mi la cubin, miʼ chʼʌmben isujm. Miʼ coltañonla jaʼel cheʼ woli (yʌquel) laj cʼojoʼtan la queʼtel o chaʼan bajcheʼ mi caj lac mʌcʼlan lac familia. Mi wen chʼijiyemonla o an laj cʼamʌjel muʼ bʌ i mʌctañonla tiʼ melol i yeʼtel cheʼ bajcheʼ cʼamel la com, mucʼʌch i chʼʌmben isujm. Miʼ mejlel lac ñop chaʼan Jehová mucʼʌch i qʼuelonla ti ñuc cheʼ xucʼulonla tiʼ tojlel anquese mi lac taj wocol (pejcan Hebreos 6:10, 11).

¹⁴ Yom mi laj cʼajtesan chaʼan Jehová jiñʌch muʼ bʌ i ñʌchʼtan la coración cheʼ bʌ mi lac pejcan (Salmo 65:2). Chaʼan xucʼul mi la cajñel, «lac Tat jaʼel muʼ bʌ i pʼuntañonla, muʼ bʌ i ñuqʼuesan lac pusicʼal tiʼ pejtelel wocol» mi caj i yʌqʼueñonla chuqui i cʼʌjñibal lac chaʼan. Tajol miʼ cʼʌn jiñi hermanojob chaʼan miʼ coltañonla (2 Corintios 1:3). Wen tijicña Jehová cheʼ lac pʌs lac pʼuntaya yicʼot mi laj coltan yambʌlob. Jiñi Biblia miʼ yʌl: «Jini muʼ bʌ i yʌqʼuen pobre chuqui anto yom i chaʼan woliʼ yʌqʼuen lac Yum ti majan. Mi caj i chaʼ qʼuextʌbentel bajcheʼ cʼamel tsiʼ yʌqʼue» (Proverbios 19:17; Mateo 6:3, 4). Jin chaʼan, cheʼ mi lac pʌs la cutslel yicʼot mi laj coltan la quermañojob, choncol jach lac majñʌben Jehová i miʼ yʌcʼ i tʼan chaʼan mucʼʌch caj i yʌqʼueñonla lac chobejtʌbal.

15. ¿Baqui bʌ a chobejtʌbal woli a pijtan? (Qʼuele jiñi dibujo am bʌ tiʼ tejchibal).

¹⁵ Jiñi bombiloʼ bʌ o yajcʌbiloʼ bʌ ti espíritu woliʼ pijtañob chaʼan Jesús miʼ yʌqʼueñob ‹jini corona muʼ bʌ caj i tsictesan chaʼan toj i pusicʼalob› (2 Timoteo 4:7, 8). Anquese mach lajalic lac pijtaya bajcheʼ jiñi, mach laj cʼojoʼtan. Cabʌlob ochemoʼ bʌ ti jiñi ‹yambʌ tiñʌmeʼ› woliʼ pijtañob chumtʌl tiʼ pejtelel ora wʌʼ ti Pañimil i «tijicña mi caj i yubiñob cheʼ ñʌchʼʌlob i pusicʼal» (Juan 10:16; Salmo 37:11).

16. ¿Chucoch miʼ tijicñesan lac pusicʼal 1 Juan 3:19, 20?

¹⁶ An i tajol mi lac ñaʼtan chaʼan mach cabʌlic woli bʌ lac mel tiʼ tojlel Jehová. O tajol mi laj cʼajtiben lac bʌ mi tijicñayʌch Jehová chaʼan woli bʌ lac mel. O mi lac ñaʼtan chaʼan mach wen ñuquix laj cʼʌjñibal chaʼan muʼto la cʌqʼuentel lac chobejtʌbal. Pero yom mi laj cʼajtesan chaʼan «ñumen ñuc Dios bajcheʼ lac pusicʼal. Yujil pejtelel chuqui an» (pejcan 1 Juan 3:19, 20). Mi chaʼañʌch an lac ñopoñel ti Jehová yicʼot mi laj cʼuxbin cheʼ woli lac melben i yeʼtel, laʼ lac ñaʼtan chaʼan mucʼʌch caj i yʌqʼueñonla i bendición anquese  mach wen ñuquic yilal jiñi woli bʌ lac mel (Marcos 12:41-44).

17. ¿Baqui bʌ lac chobejtʌbal mi lac taj ili ora?

¹⁷ Anquese chumulonla ti ili jontol bʌ pañimil (mulawil), Jehová miʼ yʌqʼueñonla lac chobejtʌbal jaʼel ili ora. ¿Bajcheʼ? Miʼ yʌqʼueñonla cabʌl chʼujul bʌ i bʌl lac ñʌcʼ, ñʌchʼtʌlel yicʼot jumpʼejl lac familia am bʌ tiʼ pejtelel pañimil muʼ bʌ i cʼuxbiñoñobla, cheʼʌch bajcheʼ tsiʼ wʌn alʌ Jesús (Isaías 54:13; Marcos 10:29, 30). Cheʼ jaʼel, cheʼ mi lac chaʼlen wersa lac sʌclan Dios, miʼ yʌqʼueñonla lac ñʌchʼtʌlel yicʼot lac tijicñʌyel (Filipenses 4:4-7).

18, 19. ¿Bajcheʼ yubil mi la cubin cheʼ mi lac ñaʼtan jiñi bendición tac muʼ bʌ i yʌqʼueñonla Jehová?

¹⁸ Jehová an i yʌqʼue i chobejtʌbal i wiñicob tiʼ pejtelel pañimil. Jumpʼejl ejemplo, juntiquil hermana i cʼabaʼ Bianca chʼoyol bʌ ti Alemania, miʼ yʌl: «Mic wen aqʼuen wocolix i yʌlʌ Jehová come an i coltayon tic wocol tac i maʼañic miʼ cʌyon. Wen wocol jax bajcheʼ an ili pañimil. Pero cʌntʌbil mi cubin c bʌ ti Jehová cheʼ mic melben i yeʼtel. Cheʼ an chuqui mic mel tiʼ tojlel, ñumento miʼ yʌqʼueñon i bendición».

¹⁹ Laʼ laj cʌl tiʼ tojlel Paula, juntiquil hermana chʼoyol bʌ ti Canadá am bʌ 70 i jabilel. Mach cabʌlic chuqui miʼ mejlel i mel come mach tojic tiʼ pat. Miʼ yʌl chaʼan anquese maʼañic miʼ wen mejlel i ñijcan i bʌ, mucʼʌch i mejlel ti subtʼan. Miʼ yʌl: «Mic chaʼlen subtʼan ti teléfono yicʼot baqui tac jach an quixtañu. Chaʼan mic taj c tijicñʌyel, an jumpʼejl c jun baqui tsʼijbubil c chaʼan texto tac loqʼuem bʌ Biblia yicʼot yambʌ tʼan tac tajbil bʌ c chaʼan ti lac jun tac, i mic bixel pejcan. Mi cʌl chaʼan jiñʌch jiñi ‹c jun chaʼan bʌ j coltʌntel›. Cheʼ mi la cʌcʼ lac pensar ti chuqui tac albil i chaʼan Jehová, maʼañic miʼ jalʼan lac chʼijiyemlel. Jehová chʌcʌ chajpʌbil chaʼan miʼ coltañonla, mach yʌlʌlic baqui bʌ wocol woli lac ñusan». Tajol mach cheʼic lac wocol bajcheʼ Bianca yicʼot Paula. Pero tajol miʼ tilel ti lac pensar jaʼel tiʼ pejtelel aqʼuebil bʌ i chaʼañonla Jehová yicʼot aqʼuebil bʌ i chaʼan yambʌlob. Cheʼ mi lac ñaʼtan chuqui tac aqʼuebil i chaʼañonla Dios ili ora yicʼot muʼ bʌ caj i yʌqʼueñonla ti talto bʌ qʼuin, miʼ wen ñuqʼuesan lac pusicʼal.

20. Mi mucʼʌch lac chaʼlen wersa lac melben i yeʼtel Jehová, ¿chuqui miʼ mejlel lac ñop?

²⁰ Mach wis ñajʌyiconla chaʼan Jehová mi caj i yʌqʼueñonla lac chobejtʌbal cheʼ mi lac pejcan ti jumpʼejl lac pusicʼal. Miʼ mejlel lac ñop chaʼan mi caj lac «taj chuqui tac albil i chaʼan Dios» mi mucʼʌch lac ‹meleʼ chuqui yom› (Hebreos 10:35, 36). Jin chaʼan, laʼ lac chʌn pʼʌtʼesan lac ñopoñel tiʼ tojlel yicʼot laʼ lac chaʼlen wersa lac melben i yeʼtel. Mi cheʼʌch mi lac mel, miʼ mejlel lac ñop chaʼan mucʼʌch caj i yʌqʼueñonla lac chobejtʌbal (pejcan Colosenses 3:23, 24).