1, 2. a) ¿Chuqui miʼ pʌs chaʼan jiñi quixtañujob miʼ chaʼleñob wersa chaʼan miʼ tajob i librejlel? b) ¿Baqui bʌ jiñi i wocolel tac?

ILI ora, miʼ wen ajlel chaʼan jiñi librejlel yicʼot chaʼan junlajal mi laj qʼuel lac bʌ. Ti cabʌl tejclum, an wiñicob xʼixicob (quixtañujob) muʼ bʌ i sʌclañob bajcheʼ miʼ mejlel ti jisʌntel jiñi ticʼlʌntel, tsʼaʼlentel yicʼot pʼumpʼuñiyel. Yambʌlob miʼ wersa cʼajtiñob i librejlel chaʼan miʼ yʌlob chuqui miʼ ñaʼtañob, miʼ melob (chaʼleñob) chuqui wen miʼ qʼuelob i miʼ chumtʌlob cheʼ bajcheʼ yomob. Pejtelel jiñi quixtañujob yomob i librejlel.

² Chaʼan miʼ mejlel i tajob miʼ melob marcha tac yicʼot miʼ tempañob i bʌ chaʼan miʼ contrajiñob yumʌl. Pero maʼañic miʼ tajob jiñi lon yomoʼ bʌ, i mucʼ jach i tajob wocol i an muʼto bʌ i chʌmelob (sajtelob). Mi lac chaʼ qʼuel chaʼan isujmʌch tsaʼ bʌ i tsʼijbu jiñi rey Salomón, chaʼan jiñi wiñicob miʼ «cʼʌñob i pʼʌtʌlel chaʼan miʼ jisañob i piʼʌlob» (Ec. 8:9).

3. ¿Chuqui miʼ mejlel lac mel chaʼan mi lac chumtʌl yicʼot isujm bʌ tijicñʌyel?

³ Jiñi xcʌntʼan Santiago tsiʼ taja ti tʼan bajcheʼ mi lac mejlel ti  chumtʌl yicʼot isujm bʌ tijicñʌyel. Tsiʼ yʌlʌ chaʼan jiñi tijicña bʌ quixtañu miʼ «wen qʼuel jini wen bʌ mandar, come jini mandar miʼ yʌcʼ ti colel» (Stg. 1:25). Jehová jiñʌch tsaʼ bʌ i yʌcʼʌ jiñi toj bʌ mandar, jin chaʼan jiñʌch ñumen yujil bʌ chuqui i cʼʌjñibal lac chaʼan chaʼan mi lac taj isujm bʌ tijicñʌyel. Jehová tsiʼ yʌqʼue Adán yicʼot Eva pejtelel chuqui i cʼʌjñibal bʌ chaʼan tijicña miʼ yajñelob, i tsiʼ yʌqʼueyob isujm bʌ librejlel.

4. ¿Bajcheʼ an i sujmlel cheʼ Adán yicʼot Eva libre tsaʼ ajñiyob? (Qʼuele jiñi dibujo am bʌ tiʼ tejchibal).

⁴ Jiñi ñaxam bʌ chaʼpʼejl capítulo chaʼan Génesis miʼ pʌs chaʼan yaʼ ti Paraíso maʼañic pʼumpʼuñiyel, bʌqʼuen yicʼot ticʼlʌntel. Ti wajali, Adán yicʼot Eva libre tsaʼ ajñiyob. Maʼañic tsiʼ cʼojoʼtayob i bʌl i ñʌcʼ, eʼtel (troñel), cʼamʌjel mi jiñic jiñi chʌmel. Pero jiñi quixtañujob ili ora mach cheʼic añob (Gn. 1:27-29; 2:8, 9, 15). Pero ¿junyajl libre ba tsaʼ ajñiyob? Laʼ laj qʼuel.

5. ¿Chuqui i cʼʌjñibal bʌ chaʼan librejonla, anquese cabʌl mach cheʼic miʼ ñaʼtañob?

⁵ An muʼ bʌ i ñaʼtañob chaʼan jiñi isujm bʌ librejlel yom i yʌl chaʼan miʼ mejlel lac mel pejtelel chuqui la com, i mach lac wentajic chuqui miʼ yujtel. Albil chaʼan i sujmlel jiñi librejlel jiñʌch cheʼ an ti lac wenta mi lac yajcan chuqui la com i cheʼʌch mi lac mel. Jumpʼejl enciclopedia miʼ yʌl: «Jiñi quixtañujob librejobʌch mi jiñi yumʌl tojʌch mi yʌcʼ mandar, miʼ cʼʌjñibalʌch yicʼot mach tsʌtsic» (The World Book Encyclopedia). Ili miʼ yʌqʼueñonla lac ñaʼtan chaʼan pejtelel quixtañu miʼ tajob wenlel cheʼ librejob, pero i cʼʌjñibalʌch cheʼ an jach baqui jaxʌl chuqui miʼ melob. Jiñi cʼajtiya jiñʌch, ¿majqui an tiʼ wenta chaʼan miʼ yʌcʼ toj bʌ mandar, am bʌ i cʼʌjñibal yicʼot mach bʌ ñumeñic ti pʼis?

6. a) ¿Chucoch Jehová jiñʌch ñumen am bʌ i librejlel? b) ¿Bajcheʼ yilal jiñi librejlel am bʌ lac chaʼan, i chucoch?

⁶ Junchajp yom bʌ mi laj cʼajtesan jin chaʼan cojach jiñi Jehová junyajl libre bʌ. Come jiñʌch tsaʼ bʌ i mele (pʌtʌ) pejtelel chuqui an, Mach bʌ Añic i Pʼisol i Pʼʌtʌlel i jiñʌch jiñi Rey ti panchan yicʼot pañimil (mulawil) (1 Ti. 1:17; Ap. 4:11). Laʼ laj cʼajtesan jiñi utsʼatax bʌ i tʼan jiñi rey David muʼ bʌ lac taj ti 1 Crónicas 29:11, 12 (pejcan). Yaʼi tsiʼ yʌlʌ bajcheʼ cʼamel i ñuclel Jehová. Pero pejtelel jiñi ángelob yaʼ ti panchan yicʼot quixtañujob ila ti Pañimil an jach baʼ jaxʌl i librejlelob. Yom mi lac ñaʼtan chaʼan cojach Jehová an tiʼ wenta chaʼan miʼ yʌl chuqui jiñi toj bʌ, i cʼʌjñibal bʌ yicʼot mach bʌ ñumeñic ti pʼis. I cheʼʌch tsiʼ mele cʼʌlʌl tiʼ cajibal pañimil.

7. Alʌ chuqui tac i tilelʌch bʌ tsiʼ yʌcʼʌ Jehová chaʼan mi lac mel i miʼ coltañonla chaʼan tijicña mi lac chumtʌl.

⁷ Adán yicʼot Eva wen librejobʌch, pero Jehová tsaʼʌch i yʌcʼʌ baqui jaxʌl chuqui yom miʼ melob. An tacʌch chuqui i tilelʌch bʌ tsiʼ yʌcʼʌ Jehová chaʼan miʼ melob, pejtelel iliyi miʼ pʌs chaʼan an jach baqui chililob. Jumpʼejl ejemplo, yom miʼ japob icʼ chaʼan cuxul miʼ yajñelob, miʼ chaʼleñob uchʼel, miʼ cʼajob i yoj yicʼot yan tac bʌ. Pero maʼañic tsiʼ ñaʼtayob chaʼan mach librejobic. Tiʼ sujm, Jehová tsiʼ wen chajpa chaʼan tijicña miʼ chumtʌlob, jinto jaʼel cheʼ miʼ melob ñʌmʌl bʌ i melob ti jujumpʼejl qʼuin (Sal. 104:14, 15; Ec. 3:12, 13). Ti lac pejtelel mi lac mulan lac jap sʌc bʌ icʼ, mi laj cʼux jiñi bʌlñʌcʼʌl muʼ bʌ lac mulan o mi lac chʼojyel cheʼ tsaʼix lac wen cʼaja laj co ti acʼʌlel, ¿ñomach? Cheʼ mi lac mel iliyi, mach chaʼañic wersa xicʼbilonla i mach wocolic  mi la cubin. Tiʼ sujm, mucʼʌch lac ñusan lac bʌ cheʼ mi lac mele tac, i miʼ mejlel lac ñaʼtan chaʼan cheʼʌch tsiʼ yubi jaʼel Adán yicʼot Eva.

8. ¿Baqui bʌ mandar tsiʼ yʌqʼue Jehová jiñi Adán yicʼot Eva, i chucoch?

⁸ Jehová tiʼ sube Adán yicʼot Eva chaʼan miʼ pʼojlesañob i bʌ i chaʼan miʼ cʌntañob ili Lum (Gn. 1:28). ¿Mach ba wen librejobix tsiʼ yubiyob i bʌ yicʼot ili mandar? Mach cheʼiqui. Jehová tsiʼ yʌcʼʌ chaʼan pejtelel jiñi quixtañujob miʼ mejlelob ti coltaya chaʼan ili Lum miʼ sujtel ti jumpʼejl paraíso baʼ miʼ mejlelob ti chumtʌl tiʼ pejtelel ora, cheʼ bajcheʼ ñaʼtʌbil i chaʼan (Is. 45:18). Ili ora, jiñi muʼ bʌ i ñaʼtañob chaʼan mach yomobic ñujpuñel yicʼot jiñi xñujpuñelob mach bʌ yomobic miʼ tilelob i yalobil maʼañobic tiʼ contra chuqui yom Dios. Pero cabʌl muʼ bʌ i ñujpuñelob i añob i yalobil anquese añʌch i wocolel tac (1 Co. 7:36-38, TNM). ¿Chucoch miʼ melob? Come i tilelʌch jiñi i mucʼʌch i yʌcʼ tijicñʌyel (Sal. 127:3). Cheʼ bajcheʼ mi laj qʼuel, i wentʌlel jiñi Adán yicʼot Eva miʼ ñusañob i bʌ tiʼ ñujpuñel yicʼot i yalobilob tiʼ pejtelel ora.

9. ¿Chucoch weñʌch yicʼot añʌch i cʼʌjñibal jiñi mandar tsaʼ bʌ i yʌcʼʌ Dios yaʼ ti Génesis 2:17?

⁹ Jehová tsiʼ yʌqʼue Adán yicʼot Eva yambʌ mandar, pero tiʼ subeyob baqui bʌ i wocolel cheʼ maʼañic miʼ jacʼob: «Jini teʼ muʼ bʌ i yʌqʼueñet a cʌn chuqui utsʼat yicʼot chuqui jontol mach a cʼux, come ti jini qʼuin cheʼ maʼ cʼuxben i wut wersa mi caj a chʌmel» (Gn. 2:17). ¿Mach ba weñic o lolom jach jiñi mandar tsaʼ bʌ i yʌcʼʌ? ¿Tsaʼ ba i chilbeyob i librejlel? Mach cheʼiqui. Cabʌl yujiloʼ bʌ chaʼan Biblia miʼ yʌlob chaʼan añʌch i sujmlel jiñi mandar. Jumpʼejl ejemplo, an muʼ bʌ i yʌl chaʼan Génesis 2:16, 17 miʼ cʌntesañonla chaʼan «cojach Dios yujil chuqui wen [...] yicʼot mach bʌ weñic [...] tiʼ tojlel wiñicob. Chaʼan miʼ mejlel i ñusañob i bʌ ti ‹chuqui wen› yom miʼ ñopob Dios yicʼot miʼ jacʼbeñob i tʼan. Mi mach cheʼic miʼ melob, jiñob mi caj i bajñel yajcañob chuqui wen [...] yicʼot chuqui mach weñic». Pero iliyi jiñʌch junchajp baqui mach chajpʌbilobic chaʼan miʼ melob.

10. ¿Chucoch mach lajalic cheʼ juntiquil miʼ mejlel i mel chuqui yom yicʼot cheʼ miʼ mejlel i yʌl chuqui wen yicʼot mach bʌ weñic?

¹⁰ An cabʌl muʼ bʌ i ñaʼtañob chaʼan jiñi i mandar Dios tsaʼ bʌ i yʌqʼue Adán miʼ mʌctan chaʼan libre miʼ mel chuqui yom. Pero iliyi mach isujmic. Mach lajalic cheʼ juntiquil miʼ mejlel i mel chuqui yom yicʼot cheʼ miʼ mejlel i yʌl chuqui wen yicʼot mach bʌ weñic. Adán yicʼot Eva librejob chaʼan miʼ ñaʼtañ mi yomob i jacʼben i tʼan Dios o maʼañic. Pero cojach Jehová an tiʼ wenta chaʼan miʼ yʌl chuqui jiñi wen bʌ yicʼot mach bʌ weñic. Iliyi jiñʌch yom bʌ i yʌl «jini teʼ muʼ bʌ i yʌcʼ ti cʌjñel chuqui utsʼat yicʼot chuqui jontol» am bʌ yaʼ ti pʌcʼʌbʌl Edén (Gn. 2:9). Yom mi laj cʌn chaʼan mach tiʼ pejtelelic ora la cujil baqui bʌ i wocolel jiñi muʼ bʌ lac ñaʼtan lac mel mi muqʼuic i mejlel lac wen ñaʼtan mi mucʼʌch caj lac tajben i wenlel. Jin chaʼan, ti bele ora mi lac taj wocol tiʼ caj chuqui mi lac yajcan lac mel anquese lon weñʌch chuqui ñaʼtʌbil lac chaʼan (Pr. 14:12). Iliyi cheʼʌch miʼ yujtel come pʼisbil jach bajcheʼ melbilonla. Jiñi mandar tsaʼ bʌ aqʼuenti Adán yicʼot Eva tsiʼ pʌsʌ chaʼan mucʼʌch i mejlelob ti ñoj ajñel ti libre cheʼ miʼ jacʼbeñob i tʼan Jehová. ¿Chuqui tsiʼ meleyob?

11, 12. ¿Chucoch tsiʼ yʌcʼʌ cabʌl wocol jiñi tsaʼ bʌ i meleyob Adán yicʼot Eva? Alʌ jumpʼejl ejemplo.

 ¹¹ Chʼijiyemtic jax yubil, pero Adán yicʼot Eva tsiʼ ñusʌbeyob i tʼan Dios. Eva tsiʼ jacʼbe i tʼan jiñi Satanás: «Mux i cajñel laʼ wut cheʼ mi laʼ cʼuxben i wut jini teʼ. Lajal mi caj laʼ wajñel bajcheʼ Dios. Mi caj laʼ cʌn chuqui tac utsʼat yicʼot chuqui tac jontol» (Gn. 3:5). Pero ¿ñumen libre ba tsaʼ ajñiyob Adán yicʼot Eva? Maʼañic. Tsaʼ bʌ i yʌlʌ Satanás maʼañic tsaʼ tsʼʌctiyi. Mach jalic tsiʼ cʌñʌyob chaʼan cheʼ maʼañic mi lac jacʼ lac tojʼesʌntel ti Dios i mi lac bajñel mel chuqui la com mucʼ jach lac taj wocol (Gn. 3:16-19). ¿Chucoch? Come Jehová maʼañic tsiʼ meleyonla chaʼan mi lac bajñel ñaʼtan chuqui jiñi wen yicʼot mach bʌ weñic (pejcan Proverbios 20:24; Jeremías 10:23).

¹² Laʼ laj qʼuel tiʼ tojlel juntiquil xñijca avión. Chaʼan wen jach miʼ cʼotel yaʼ baqui majlel mucʼ, yaʼʌch yom miʼ ñumel majlel yaʼ baqui wʌn albil. Cheʼ jaʼel, miʼ mejlel i qʼuel jiñi an tac bʌ tiʼ mal jiñi cabina chaʼan chuqui tac yom miʼ ñijcan i miʼ chaʼlen tʼan yicʼotob jiñi añoʼ bʌ tiʼ wenta jiñi avión wʌʼ ti lum. Pero mi maʼañic miʼ jacʼ ili coltʌntel i baqui jach miʼ ñumel, cabʌl wocol miʼ mejlel i taj. Lʌcʼʌ cheʼʌch tsiʼ mele Adán yicʼot Eva. Maʼañic tsiʼ jacʼbeyob i tʼan Dios i cabʌl wocol tsiʼ tajayob yicʼot i yalobilob: Jiñi mulil yicʼot chʌmel (Ro. 5:12). Mach chʌn librejobix come tsiʼ mulayob chumtʌl cheʼ bajcheʼ tsiʼ bajñel ñaʼtayob.

13, 14. ¿Bajcheʼ miʼ mejlel lac taj jiñi isujm bʌ librejlel?

¹³ Cabʌl muʼ bʌ i ñaʼtañob chaʼan ñumen wen miʼ ñusañob cheʼ ñumen librejobic. Pero tiʼ sujm, mi maʼañic i pʼisol jiñi lac librejlel wen an i wocolel, lajal bajcheʼ jumpʼejl cuchillo wen jay bʌ. Cheʼ librejonla añʌch i wenlel tac. Pero ¿bajcheʼ yilal maʼ wʌl ili pañimil mi maʼañic chuquito pʼisbil jach bʌ mi lac mel? Jiñi enciclopedia tsaʼ bʌ ajli yaʼ ti párrafo 5 miʼ yʌl chaʼan jiñi mandar tac wen tsʌtsʌch come chaʼañʌch  miʼ cʌntan jiñi quixtañujob i mach cʌlʌx librejobic chaʼan chuqui yomob i mel. Laʼ cu lac ñaʼtan pejtelel jiñi mandar acʼbil bʌ i chaʼan jiñi wiñicob yicʼot pejtelel jiñi abogadojob yicʼot juezob yom bʌ miʼ yʌcʼob ti cʌjñel yicʼot ti tsʼʌctesʌntel.

¹⁴ Jesucristo tsiʼ pʌsʌ bajcheʼ miʼ mejlel lac taj isujm bʌ lac librejlel. Tsiʼ yʌlʌ: «Mi maʼanic mi laʼ cʌy c tʼan, mero xcʌntʼañetla c chaʼan. Mi caj laʼ cʌn i sujmlel c tʼan. I sujmlel c tʼan mi caj i yʌqʼuetla ti colel» (Jn. 8:31, 32). An chaʼchajp yom bʌ mi lac mel chaʼan mi lac jacʼ ili ticʼojel. Ñaxam bʌ, yom mi lac jacʼ jiñi i sujmlel tsaʼ bʌ i pʌsʌ. I chaʼpʼejlel, yom mi lac sujtel ti xcʌntʼan. Mi cheʼʌch mi lac mel, librejonla tiʼ sujm. ¿Bajcheʼ? Jesús tsiʼ bej alʌ: «Pejtelel muʼ bʌ i chaʼleñob mulil, chombilobix ti mulil». I tsiʼ chaʼ alʌ: «Mi tsiʼ yʌcʼʌyetla ti colel i Yalobil Dios, colbiletla ti isujm» (Jn. 8:34, 36).

15. ¿Chucoch miʼ mejlel i yʌcʼonla ti libre tiʼ sujm jiñi tsaʼ bʌ i yʌlʌ Jesús?

¹⁵ Wen tsiquil chaʼan jiñi librejlel tsaʼ bʌ i yʌlʌ Jesús chaʼan mi caj i taj jiñi xcʌntʼañob i chaʼan, ñumen ñucʌch bajcheʼ muʼ bʌ i sʌclan jiñi quixtañujob ili ora ti política o ti yan tac bʌ. Cheʼ tsiʼ yʌlʌ «mi tsiʼ yʌcʼʌyetla ti colel i Yalobil Dios, colbiletla ti isujm», tsiʼ taja ti tʼan chaʼan jiñi quixtañujob librejob ti jiñi ñumen ñuc bʌ wocol: Jiñʌch tiʼ cʼʌb jiñi mulil. Jiñi mulil mach cojach miʼ yʌcʼonla lac mel mach bʌ weñic, miʼ mʌctañonla tiʼ melol chuqui wen o pejtelel muʼ bʌ i mejlel lac mel. Ili jiñʌch yom bʌ i yʌl cheʼ cʌchʌlonla ti mulil. Jiñʌch muʼ bʌ i yʌcʼonla ti cabʌl pensar, lac ñusan wocol i mi lac chʌmel (Ro. 6:23). Jiñi apóstol Pablo wen yujilʌch chuqui yom i yʌl iliyi (pejcan Romanos 7:21-25). Cheʼ ba ora mi lac loqʼuel tiʼ cʼʌb jiñi mulil, libre mi caj la cajñel tiʼ sujm cheʼ bajcheʼ tsaʼ cʌn ajñi Adán yicʼot Eva.

16. ¿Bajcheʼ miʼ mejlel lac taj jiñi «isujm bʌ librejlel»?

¹⁶ Cheʼ bʌ Jesús tsiʼ yʌlʌ chaʼan maʼañic mi laj cʌy i tʼan, yom i yʌl chaʼan an tac chuqui yom mi lac tsʼʌctesan chaʼan miʼ yʌcʼonla ti libre. Jiñi tsaʼix bʌ la cʌcʼʌ lac bʌ ti Dios mi laj cʌy chuqui bajñel la com i mi lac jacʼ pejtelel chuqui miʼ yʌl Jesús (Mt. 16:24). Cheʼ bajcheʼ tsiʼ yʌlʌ, tiʼ sujm mi caj la cajñel ti libre cheʼ ba ora miʼ yʌcʼ ti tsʼʌctiyel pejtelel jiñi wenlel muʼ bʌ i yʌcʼ jiñi i tojol mulil.

17. a) ¿Chuqui mi caj i yʌqʼuen i sujmlel yicʼot i tijicñʌyel laj cuxtʌlel? b) ¿Chuqui mi caj laj qʼuel ti yambʌ temaj?

¹⁷ Cheʼ mi lac jacʼ jiñi i cʌntesʌntel tac Jesús, mi caj i yʌqʼuen i sujmlel yicʼot i tijicñʌyel laj cuxtʌlel. Iliyi jiñʌch muʼ bʌ caj i locʼsañonla tiʼ cʼʌb jiñi mulil yicʼot chʌmel (pejcan Romanos 8:1, 2, 20, 21). Yaʼ ti yambʌ temaj mi caj laj qʼuel bajcheʼ miʼ mejlel laj cʼʌn ti wen jiñi lac librejlel ili ora chaʼan mi la cʌqʼuen i ñuclel Jehová tiʼ pejtelel ora, jiñi Dios libre bʌ tiʼ sujm.