Jiñi i yorganización Jehová miʼ mel jun tac mach bʌ añic miʼ chojñel, jin chaʼan, an muʼ bʌ i ñaʼtañob chaʼan mucʼʌch i mejlelob i chaʼlen ti copiar i miʼ letsañob ti yan tac bʌ página chaʼan Internet o yaʼ baqui miʼ mejlel ti letsʌntel foto tac o video o yan tac bʌ. Pero iliyi mach weñic, come maʼañic miʼ chʼʌmob ti ñuc jiñi Términos y Condiciones de Uso * am bʌ ti lon c página chaʼan Internet, i añix i yʌcʼʌ cabʌl wocol. Ilayi jamʌ tsiquil miʼ yʌl chaʼan maʼañic majqui miʼ mejlel i letsan ti yambʌ página chaʼan Internet jiñi «foto tac, jun tac muʼ bʌ i mejlel i chaʼlentel ti descargar, marcas de productos, música, dibujo, video o temaj tac am bʌ ti ili página (mi yomic miʼ yotsʌntel yaʼ baqui miʼ letsʌntel foto, video o yan tac bʌ)». ¿Chucoch i cʼʌjñibalʌch miʼ jajqʼuel pejtelel iliyi?

Pejtelel chuqui an yaʼ ti lon c página chaʼan Internet coltʌbil ti derechos de autor. Jiñi tsaʼix bʌ i cʌyʌyob i sujmlel yicʼot jiñi muʼ bʌ i contrajiñon lojon miʼ ñopob i yotsan jiñi lon c jun tac yaʼ tiʼ página chaʼan Internet come yomob i tʌtsʼ loqʼuel jiñi i testigojob Jehová yicʼot yambʌ wiñicob xʼixicob (quixtañujob). Pero jiñi an tac bʌ i chaʼañob yaʼ tiʼ página ñaʼtʌbil chaʼan miʼ yʌqʼueñonla laj cʌy lac ñop i sujmlel (Sal. 26:4; Pr. 22:5). An quixtañujob muʼ bʌ i cʼʌñob lon c jun tac yicʼot jiñi logotipo chaʼan jw.org cheʼ an chuqui yomob i sub, tiʼ choñoñelob yicʼot ti aplicación tac muʼ bʌ i cʼʌjñel ti celular o tableta tac. Jiñi organización an i chaʼan mandar tac acʼbil bʌ ti yumʌl chaʼan miʼ mejlel i yʌlob bajcheʼ yom miʼ cʼʌjñel jiñi derecho de autor yicʼot jiñi marcas de productos (Pr. 27:12). Mi jiñi organización maʼañic chuqui miʼ yʌl cheʼ an majqui, anquese juntiquil Testigo, woli (yʌquel) i cʼʌn ti yan tac bʌ página chaʼan Internet pejtelel lon c chaʼan bʌ o woliʼ cʼʌñob tiʼ choñoñel jiñi logotipo chaʼan jw.org, tajol jiñi xʼeʼtelob ti melobʌjʌl maʼañic mi caj i yotsañob i bʌ cheʼ com lon c ticʼ majqui jach miʼ contrajiñon lojon o jiñi xchoñoñelob.

  Cheʼ miʼ chaʼlentel ti descargar jiñi jun tac ti yambʌ página mach bʌ jiñic jw.org añʌch i wocolel. Jehová cojach tsiʼ yʌqʼue tiʼ wenta jiñi «xucʼul bʌ xʼeʼtel am bʌ cabʌl i ñaʼtʌbal» chaʼan miʼ yʌcʼ jiñi chʼujul bʌ bʌlñʌcʼʌl (Mt. 24:45). Ili «xʼeʼtel» jin jach miʼ cʼʌn jiñi cojach bʌ página lon c chaʼan www.pr418.com, tv.pr418.com yicʼot wol.pr418.com chaʼan miʼ yʌcʼ jiñi chʼujul bʌ bʌlñʌcʼʌl. Cheʼ jaʼel, an jach uxpʼejl aplicación muʼ bʌ i cʼʌjñel ti celular yicʼot tableta tac, i jiñʌch iliyi: JW Language^®, JW Library^® yicʼot JW Library Sign Language^®. Ili aplicación yicʼot página tac maʼañic miʼ sub chaʼan bʌ choñoñel mi muqʼuic i xʌb i bʌ yicʼot i chaʼan bʌ ili pañimil. Mi yambʌ tac baqui miʼ tajtʌl jiñi chʼujul bʌ bʌlñʌcʼʌl, maʼañic miʼ mejlel lac ñop mi weñixto o mi maxto qʼuextʌbilic (Sal. 18:26; 19:8).

Cheʼ an majqui miʼ letsan jiñi lon c jun tac ti yan tac bʌ página chaʼan Internet baqui miʼ mejlel ti tsʼijbuntel chuqui jach bʌ tʼan, woliʼ coltañob jiñi tsaʼix bʌ i cʌyʌyob i sujmlel yicʼot jiñi muʼ bʌ i contrajiñon lojon chaʼan miʼ yotsañob lot tiʼ yorganización Jehová. An hermanojob mucʼobix ti aʼleya o leto ti Internet, pero ili mucʼ jach i ñumen bibʼesʌben i cʼabaʼ Jehová. Jiñi an tac bʌ ti Internet baqui miʼ mejlel lac tsʼijbun cʌytʌl lac tʼan, mach yaʼic baqui miʼ mejlel laj cʌntesañob ti «uts bʌ tʼan» jiñi mach bʌ wen yomobic i cʌn sujmlel (2 Ti. 2:23-25; 1 Ti. 6:3-5). Cheʼ jaʼel, an i cʼʌmbeyob i cʼabaʼ jiñi organización, jiñi Junmojt muʼ bʌ i pʌsob bij o tiʼ cʼabaʼ juntiquil ili hermanojob chaʼan miʼ melob cuenta tac ti Internet o yaʼ baqui miʼ mejlel ti letsʌntel foto tac o video. Tiʼ sujm, mi juntiquilic ochem bʌ ti jiñi Junmojt muʼ bʌ i pʌsob bij an i bajñel página ti Internet, miʼ muqʼuic i yochelob yaʼ baqui miʼ letsʌntel foto tac o video.

Cheʼ mi lon c suben jiñi quixtañujob chaʼan miʼ yochelob ti jw.org, mi lon c chaʼlen coltaya chaʼan miʼ sujbel jiñi «wen tʼan» (Mt. 24:14). Pejtelel jiñi eʼtijibʌl chaʼan subtʼan muʼ bʌ i mejlel ti juʼsʌntel ti celular o tableta, woliʼ bej weñʼesʌntel. I com lojon chaʼan miʼ tajob i wenlel pejtelel quixtañujob. Jin chaʼan, cheʼ bajcheʼ miʼ yʌl jiñi Condiciones de Uso, mucʼʌch i mejlel ti chojquel majlel ti correo jumpʼejl jun am bʌ ti lon c página o miʼ chojquel majlel jiñi dirección chaʼan miʼ juʼsan yaʼ ti jw.org. Cheʼ miʼ tajtʌl quixtañujob yomoʼ bʌ i cʌn i sujmlel i miʼ subentelob ochel yaʼ ti página chaʼan Internet, lajal bajcheʼ jiñʌch woliʼ yʌqʼuentelob i pejcan jiñi «xucʼul bʌ xʼeʼtel am bʌ cabʌl i ñaʼtʌbal», muʼ bʌ i yʌcʼ jiñi chʼujul bʌ bʌlñʌcʼʌl.