1, 2. a) ¿Chucoch jiñi quixtañujob tiʼ yorajlel Pablo tsiʼ wen cʼojoʼtayob cheʼ maʼañobic ti libre? b) ¿Majqui miʼ mejlel i yʌqʼueñonla isujm bʌ librejlel tsiʼ yʌlʌ Pablo?

JIÑI chumuloʼ bʌ ti Roma chan tsiʼ yubiñob i bʌ come tsiʼ chʼʌmʌyob ti ñuc jiñi mandar tac, jiñi i melol (chaʼlentel) chuqui toj yicʼot chaʼan librejob. Pero pejtelel i pʼʌtʌlel yicʼot i ñuclel ili tejclum tsiʼ taja tiʼ coltaya jiñi wiñicob xʼixicob (quixtañujob) tsaʼ bʌ ajqʼuiyob ti majtan eʼtel (troñel). Cheʼ bʌ 30% chumuloʼ bʌ ti jiñi tejclum tsaʼ ajqʼuiyob ti majtan eʼtel. Jin chaʼan, jiñi quixtañujob yicʼot xñoptʼañob tsiʼ wen cʼojoʼtañob cheʼ cʌchʌlob yicʼot cheʼ maʼañobic ti libre.

² Jiñi apóstol Pablo cabʌl chuqui tiʼ tsʼijbu chaʼan jiñi librejlel. Pero maʼañic tsiʼ ñopo i tojʼesan jiñi wocol tac, bajcheʼ woli (choncol) i lon melob jiñi yambʌ quixtañujob. Pablo yicʼot yambʌ xñoptʼañob tsiʼ chaʼleyob wersa i coltan yambʌ quixtañujob chaʼan miʼ pʌsbeñob jiñi wen tʼan chaʼan i Yumʌntel Dios i chaʼan bajcheʼ cʼamel i cʼʌjñibal cheʼ Jesús tsiʼ yʌcʼʌ i cuxtʌlel. Jiñi Pablo tsiʼ yʌlʌ majqui miʼ mejlel i yʌqʼueñonla jiñi isujm bʌ librejlel. Jumpʼejl ejemplo, ti jiñi i chaʼpʼejlel carta tsaʼ bʌ i tsʼijbube  jiñi xñoptʼañob ti Corinto, wen jamʌl tsiʼ yʌlʌ: «Lac Yum jiñʌch Espíritu. Jini am bʌ i chaʼan i yEspíritu lac Yum librejix» (2 Co. 3:17).

3, 4. a) ¿Chuqui tsiʼ ñaxan alʌ Pablo cheʼ maxto i taja ti tʼan muʼ bʌ i yʌl 2 Corintios 3:17? b) ¿Chuqui yom mi lac mel chaʼan tijicña mi lac ñusan lac bʌ ti jiñi librejlel muʼ bʌ i yʌqʼueñonla Jehová?

³ Cheʼ jaʼel, ti ili carta tsaʼ bʌ tsʼijbunti tiʼ tojlel chumuloʼ bʌ ti Corinto, jiñi apóstol Pablo tsaʼix i ñaxan alʌ tsaʼ bʌ ujti tiʼ tojlel Moisés cheʼ bʌ tsaʼ jubi tilel ti jiñi wits Sinaí, yaʼ baqui tsajñi ti tʼan yicʼot i yángel Jehová. Tsʼʌyla lemla i cʼʌcʼal i wut. Cheʼ jiñi israelob tsiʼ qʼueleyob, tsiʼ wen bʌcʼñayob, jin chaʼan Moisés tsiʼ moso i wut ti pisil (Éx. 34:29, 30, 33; 2 Co. 3:7, 13). Pablo tiʼ tsictesa chaʼan cheʼ an majqui miʼ chaʼ sujtel ti Jehová, miʼ ‹locʼsʌbentel jini pisil› (2 Co. 3:16). ¿Chuqui yom i yʌl?

⁴ Cheʼ bajcheʼ tsaʼ laj cʌñʌ yaʼ ti yambʌ temaj, cojach Jehová jiñi tsaʼ bʌ i mele (pʌtʌ) pejtelel chuqui an, junyajl libre i maʼañic baʼ jaxʌl i librejlel. Jin chaʼan, miʼ mejlel lac ñaʼtan chaʼan tiʼ tojlel Jehová yicʼot jiñi chʼujul bʌ i yespíritu mi lac taj lac librejlel. Pero chaʼan mi lac ñusan lac bʌ i mi lac taj lac wenlel ti jiñi librejlel, yom mi lac sujtel tiʼ tojlel Jehová. Ili yom i yʌl chaʼan wen lʌcʼʌl yom mi la cajñel la quicʼot. Jiñi israelob tsaʼ bʌ i xʌñʌyob tiʼ tiquiñal lum, mach cheʼic tsiʼ qʼueleyob bajcheʼ miʼ qʼuel Jehová jiñi tsaʼ bʌ i ñusayob. Lajal bajcheʼ mʌcbilob i wut yicʼot i pusicʼal ti pisil. Cojach yomob i cʼʌn i librejlel chaʼan miʼ melob chuqui bajñel yomob (He. 3:8-10).

5. a) ¿Bajcheʼ yilal jiñi librejlel muʼ bʌ i yʌqʼueñonla jiñi chʼujul bʌ i yespíritu Jehová? b) ¿Bajcheʼ la cujil chaʼan miʼ mejlel i taj juntiquil am bʌ bajcheʼ xyaj eʼtel o an ti cárcel jiñi librejlel muʼ bʌ i yʌcʼ Jehová? c) ¿Baqui bʌ cʼajtiya tac yom mi lac tsajin?

⁵ Jiñi librejlel muʼ bʌ i yʌqʼueñonla jiñi chʼujul bʌ i yespíritu Jehová ñumen ñuc bajcheʼ jiñi librejlel muʼ bʌ lac taj cheʼ añonla bajcheʼ xyaj eʼtel. Jiñi i yespíritu Jehová miʼ coltañonla loqʼuel ti mulil yicʼot chʌmel (sajtel), cheʼ jaʼel yaʼ ti mach bʌ isujmic ñopbalʌl yicʼot i costumbre tac. Pejtelel iliyi, maʼañic miʼ mejlel i luʼ mel jiñi quixtañujob (Ro. 6:23; 8:2). Jiñʌch wen utsʼatax bʌ lac librejlel. Miʼ mejlel i taj jaʼel jiñi am bʌ bajcheʼ xyaj eʼtel o cʌjchem ti cárcel (Gn. 39:20-23). Ili cheʼʌch tsaʼ ujti tiʼ tojlel jiñi hermano Harold King. Cabʌl jab tsaʼ ajñi ti cárcel tiʼ caj chuqui miʼ ñop. Miʼ mejlel laj qʼuel yicʼot lac ñʌchʼtan tsaʼ bʌ i ñusa ti jiñi canal JW Broadcasting (VIDEO TAC > ENTREVISTA YICʼOT EXPERIENCIA TAC > MIʼ ÑUSAÑOB WOCOL TAC). Pero laʼ lac tsajin ili cʼajtiya tac: ¿Bajcheʼ mi lac pʌs chaʼan mucʼʌch laj qʼuel ti ñuc cheʼ librejonla? Yicʼot ¿chuqui miʼ mejlel lac mel chaʼan mi laj cʼʌn ti wen?

6. ¿Bajcheʼ tsiʼ pʌsʌ jiñi israelob chaʼan maʼañic tsiʼ qʼueleyob ti ñuc jiñi librejlel tsaʼ bʌ aqʼuentiyob ti Jehová?

⁶ Cheʼ an majqui miʼ yʌqʼueñonla utsʼatax bʌ lac majtan, mi lac wen aqʼuen wocolix i yʌlʌ. Jehová tsiʼ yʌqʼue i majtan jiñi israelob, i jiñʌch cheʼ bʌ tsiʼ locʼsayob yaʼ ti Egipto. ¿Bajcheʼ tsiʼ jacʼʌyob? Cheʼ añix chaʼpʼejl uxpʼejl uw i loqʼuelob bajcheʼ xyaj eʼtelob, tsaʼ caji i wen ñaʼtañob jiñi bʌlñʌcʼʌl am bʌ ti Egipto, i tsaʼ caji i michʼleñob Jehová tiʼ caj chuqui miʼ yʌqʼueñob. Tsaʼto i yʌlʌyob chaʼan yomob chaʼ sujtel ti Egipto. Tsaʼ bʌ i ñumen qʼueleyob ti ñuc jiñʌch jiñi chʌy, pepino, sandía, xwelux, cebolla yicʼot axux, i mach jiñic cheʼ libre tsaʼ ajñiyob chaʼan miʼ chʼujutesañob Jehová. Jin chaʼan, Jehová tsaʼ wen michʼa tiʼ tojlelob (Nm. 11:5, 6, 10; 14:3, 4). Ilayi, an chuqui wen ñuc bʌ i cʼʌjñibal miʼ mejlel laj cʌn.

7. a) ¿Bajcheʼ tsiʼ yʌcʼʌ ti ñuc Pablo jiñi i ticʼojel muʼ bʌ lac taj ti 2 Corintios 6:1? b) ¿Bajcheʼ miʼ mejlel lac mel joñonla?

 ⁷ Jiñi apóstol Pablo tiʼ sube jiñi xñoptʼañob chaʼan mach lolom jach yom mi laj qʼuel jiñi librejlel tsaʼ bʌ i yʌqʼueyonla Jehová tiʼ tojlel i Yalobil, Jesucristo (pejcan 2 Corintios 6:1). Laʼ laj cʼajtesan chaʼan Pablo tsiʼ yubi i chʼijiyemlel cheʼ an tiʼ pʼʌtʌlel mulil yicʼot chʌmel. Pero tsaʼʌch i yʌcʼʌ ti ñuc jiñi i ticʼojel, i tsiʼ yʌlʌ: «Wocolix i yʌlʌ Dios, Jesucristo lac Yum miʼ yʌcʼon ti colel». ¿Chucoch? Jiñʌch miʼ chaʼ al: «Come i pʼʌtʌlel jini Espíritu muʼ bʌ i yʌqʼueñonla laj cuxtʌlel ti Cristo Jesús tsiʼ coloyonla tiʼ pʼʌtʌlel mulil muʼ bʌ i yʌcʼonla ti chʌmel» (Ro. 7:24, 25; 8:2). Joñonla jaʼel mach lolomic yom mi laj qʼuel cheʼ Jehová tsiʼ locʼsayonla tiʼ pʼʌtʌlel mulil yicʼot chʌmel. Wocolix i yʌlʌ cheʼ tsiʼ tojo lac mul, miʼ mejlel lac melben i yeʼtel tiʼ sʌclel laj conciencia (Sal. 40:8).

8, 9. a) ¿Chuqui ti ticʼojel tsiʼ yʌcʼʌ jiñi apóstol Pedro chaʼan bajcheʼ yom mi laj cʼʌn lac librejlel? b) ¿Chuqui tac ti wocol miʼ mejlel lac taj ili ora?

⁸ Mach cojic jach yom mi la cʌcʼ wocolix yʌlʌ, yom mi lac wen qʼuel chaʼan mach lecojic mi laj cʼʌn jiñi lac librejlel. Jiñi apóstol Pedro tiʼ subeyonla chaʼan mach yomic mi lac mel chuqui bajñel la com chaʼan librejonla mi lac ñaʼtan (pejcan 1 Pedro 2:16). Ili tsaʼ bʌ i yʌlʌ miʼ mejlel i cʼajtesʌbeñonla tsaʼ bʌ i mele jiñi israelob yaʼ tiʼ tiquiñal lum. Ti ili ora, añʌch i cʼʌjñibal ti lac tojlel tsaʼ bʌ i yʌlʌ Pedro, tajol ñumento i cʼʌjñibal bajcheʼ ti jiñi bʌ ora. Satanás yicʼot i pañimil (mulawil) miʼ pʌsob chuqui tsijib tac bʌ miʼ loqʼuel, bajcheʼ jiñi pislel, bʌlñʌcʼʌl, ñusaqʼuin yicʼot ti yan tac bʌ. Chaʼan miʼ pʌsob jiñi, miʼ cʼʌñob wen utsʼatob jach bʌ quixtañujob chaʼan miʼ yʌqʼueñonla lac ñaʼtan chaʼan yomʌch mi lac mʌn, pero maʼañic i cʼʌjñibal lac chaʼan. Mach wocolic mi lac mejlel ti lotintel, i mi laj cʼʌn ti lecoj jiñi lac librejlel.

⁹ Jiñi i ticʼojel Pedro miʼ coltañonla jaʼel baqui wen ñuc i cʼʌjñibal lac chaʼan, bajcheʼ ti escuela o chaʼan jiñi eʼtel. Jumpʼejl ejemplo, yaʼ ti escuela jiñi xcolelob miʼ wen subentelob chaʼan yom miʼ bej chaʼleñob qʼueljun ti universidad. Miʼ subentelob chaʼan mi mucʼʌch i ñumen chajpañob i bʌ ti qʼueljun mi caj i tajob wem bʌ i yeʼtel yicʼot cabʌl taqʼuin. I an i tajol miʼ pʌsbentelob chaʼan ñumen on miʼ taj taqʼuin juntiquil tsaʼ bʌ i chaʼle qʼueljun ti universidad cheʼ bajcheʼ juntiquil mach bʌ añic. Tajol jiñi xcolelob yom bʌ miʼ yajcañob chuqui mi caj i melob tiʼ cuxtʌlel, mucʼʌch i cʼotel i mulañob pejtelel jiñi muʼ bʌ i pʌsbentelob. ¿Chuqui yom miʼ cʼajtesañob jiñi xcolelob yicʼot jiñi tatʌlob?

10. ¿Chuqui yom mi laj cʼajtesan cheʼ an chuqui woli lac yajcan lac mel?

¹⁰ Come jujuntiquil an ti lac wenta mi lac yajcan chuqui la com, tajol an muʼ bʌ i ñaʼtañob chaʼan miʼ mejlel i yajcañob chuqui jach yomob mi jiñi i conciencia maʼañic miʼ mʌctañob. Tajol miʼ ñaʼtañob bajcheʼ jiñi chaʼan tsaʼ bʌ i yʌlʌ Pablo tiʼ tojlel añoʼ bʌ ti Corinto chaʼan jiñi bʌlñʌcʼʌl: «¿Chucoch miʼ qʼuejlel ti mulil jini muʼ bʌ c mel ti pejtyel c pusicʼal chaʼan jach tiʼ tʼan i pusicʼal yambʌ?» (1 Co. 10:29, Jini wen bʌ tʼan). Isujmʌch chaʼan librejonla chaʼan mi lac yajcan chuqui ti qʼueljun mi laj cajel i chuqui mi caj lac mel ti laj cuxtʌlel. Pero yom mi laj cʼajtesan chaʼan an jach baqui jaxʌl librejonla, i pejtelel chuqui mi lac yajcan lac mel añʌch i wocolel. Jin chaʼan, Pablo tsiʼ yʌlʌ: «Pejtelel jini la com bʌ lac mel miʼ mejlel lac mel, pero mach utsʼatic mi tsaʼ lac mele tiʼ pejtelel. Come maʼanic i cʼʌjñibal tiʼ pejtelel chaʼan miʼ xucʼchocoñonla» (1 Co. 10:23). Ili miʼ coltañonla lac ñaʼtan chaʼan cheʼ an chuqui woli (yʌquel) lac yajcan  lac mel, mach jiñic ñumen ñuc i cʼʌjñibal chuqui bajñel la com.

11. ¿Chucoch tsiʼ locʼsayonla Dios tiʼ pʼʌtʌlel mulil yicʼot chʌmel?

¹¹ Cheʼ bʌ Pedro tsiʼ yʌlʌ chaʼan mach lecojic yom mi laj cʼʌn lac librejlel, tsiʼ yʌlʌ jaʼel chaʼan miʼ mejlel laj cʼʌn ti wen cheʼ ‹xʼeʼtelonla i chaʼan Dios›. Jin chaʼan, Jehová tsiʼ locʼsayonla tiʼ pʼʌtʌlel mulil yicʼot chʌmel tiʼ tojlel Jesús chaʼan mi la cʌcʼ laj cuxtʌlel tiʼ melol i yeʼtel.

12. ¿Chuqui ti ejemplo tsiʼ yʌqʼueyonla Noé yicʼot i familia?

¹² ¿Bajcheʼ miʼ mejlel laj cʼʌn ti wen jiñi lac librejlel chaʼan maʼañic miʼ mʌlbeñonla (jotbeñonla) chuqui bajñel la com yicʼot jiñi an tac bʌ ila ti pañimil? Jiñʌch cheʼ mi la cʌcʼ lac bʌ tiʼ chaʼan bʌ Dios (Gá. 5:16). Laʼ laj qʼuel tiʼ tojlel Noé yicʼot i familia. Anquese tsaʼ chumle ti jumpʼejl pañimil baqui wen an tsʼiʼlel yicʼot jontolil maʼañic tsaʼ yajliyob tiʼ melol cheʼ bajcheʼ jiñi quixtañujob muʼ bʌ i melob mach bʌ utsʼatic yicʼot chuqui miʼ bajñel mulañob tiʼ pusicʼal. ¿Bajcheʼ tsaʼ mʌjli i chaʼañob? Jiñʌch cheʼ tsiʼ meleyob pejtelel tsaʼ bʌ i subeyob Jehová: Tsiʼ meleyob jiñi arca, i tempañob i bʌl i ñʌcʼ yicʼot i chaʼan jiñi añimal tac, i tiʼ sube jiñi quixtañujob chaʼan mi caj ti jilel jiñi pañimil. Jiñi Biblia miʼ yʌl: «Cheʼʌch tsiʼ mele Noé. Tsiʼ chaʼle pejtelel chuqui tsiʼ yʌlʌ Dios» (Gn. 6:22). Noé yicʼot i familia cuxul tsaʼ cʌyleyob (He. 11: 7).

13. ¿Chuqui ti mandar tsiʼ yʌqʼueyonla Jehová?

¹³ ¿Chuqui ti mandar tsiʼ yʌqʼueyonla Jehová? Jiñi xcʌntʼañonbʌla i chaʼan Jesús wen la cujil chaʼan jiñʌch jiñi subtʼan (pejcan Lucas 4:18, 19). Ili ora, cabʌlob mʌcʌloʼ bʌ i wut tiʼ mul Satanás i añob tiʼ pʼʌtʌlel jiñi mach bʌ isujmic ñopbalʌl, ti taqʼuin yicʼot ti política (2 Co. 4:4). Joñonla an ñuc bʌ la queʼtel chaʼan mi lac lajin Jesús i mi laj coltan jiñi quixtañujob chaʼan miʼ cʌñob Jehová i miʼ melbeñob i yeʼtel, jiñi Dios chaʼan bʌ librejlel (Mt. 28:19, 20). Iliyi mach cʼuñic ti melol, añʌch cabʌl  wocol. An país tac baqui jiñi quixtañujob maʼañix miʼ mulañob i ñʌchʼtan jiñi wen tʼan, i an wen jontoloʼ bʌ. Jiñi cʼajtiya yom bʌ mi lac melben lac bʌ jiñʌch: ¿Muʼ ba lac mejlel laj cʼʌn jiñi lac librejlel chaʼan mi lac ñumen coltan jiñi eʼtel chaʼan bʌ i Yumʌntel Dios?

14, 15. ¿Chuqui an i ñaʼtayob i mel cabʌl hermanojob? (Qʼuele jiñi foto am bʌ tiʼ tejchibal).

¹⁴ Miʼ yʌqʼueñonla lac tijicñʌyel cheʼ mi laj qʼuel cabʌl hermanojob tsaʼix bʌ i chajpayob chaʼan mach cabʌlic i chubʌʼañob chaʼan miʼ yochelob bajcheʼ precursor come yujilob chaʼan lʌcʼʌlix i jilibal ili pañimil (1 Co. 9:19, 23). An yaʼʌch bʌ woliyob ti coltaya tiʼ congregación, pero an tsaʼix bʌ majliyob ti coltaya baqui ñumen yomto xsubtʼañob. Ti jiñi joʼpʼejl jab ñumeñix bʌ an ochemob bajcheʼ precursor ñumen ti 250 mil hermanojob. Ili ora, ñumen ti 1 millón 100 mil hermanojob ochemoʼ bʌ bajcheʼ precursor. ¡Wen utsʼatax cheʼ mi laj qʼuel chaʼan yonlelob woliʼ cʼʌñob i librejlel chaʼan miʼ melbeñob i yeʼtel Jehová! (Sal. 110:3).

¹⁵ ¿Chuqui tsiʼ colta ili hermanojob chaʼan miʼ melob bajcheʼ jiñi? Laʼ laj qʼuel tiʼ tojlel John yicʼot Judith. 30 jab tsiʼ chaʼle subtʼan ti cabʌl país. I miʼ yʌlob chaʼan cheʼ bʌ tsaʼ tejchi jiñi Cʌntesʌntel chaʼan Eʼtel ti Precursor, ti 1977, jiñi xcʌntesajob miʼ suben jiñi hermanojob chaʼan yom miʼ majlelob baqui yomto xsubtʼañob. John tsiʼ yʌlʌ chaʼan mach junsutelic jach tsiʼ qʼuexta i yeʼtel chaʼan maʼañic miʼ cʌy eʼtel bajcheʼ precursor tiʼ caj jiñi chubʌʼañʌl. Ti wiʼil, tsaʼ majliyob ti subtʼan ti yambʌ país. Yaʼi tsiʼ qʼueleyob chaʼan jiñi oración yicʼot i ñopoñelob (chʼujbiyajob) ti Jehová tsiʼ coltayob chaʼan miʼ mejlel i cʌñob yambʌ tʼan, miʼ ñʌmʼañob ti yambʌ cultura o baqui an tsʌñal o ticwal. ¿Bajcheʼ yilal miʼ qʼuel pejtelel jiñi jabil melbil bʌ i chaʼan i yeʼtel Jehová? John miʼ yʌl: «Tsaʼix c chaʼ taja c bʌ mi cubin ti jiñi ñumen wem bʌ eʼtel cʌmbil c chaʼan. Ñumen tsiquilix mij qʼuel Jehová mi cubin, cheʼ bajcheʼ juntiquil tatʌl wen am bʌ i cʼuxbiya. Wʌle ñumen cujilix chuqui yom i yʌl Santiago 4:8, baʼ miʼ yʌl: ‹Lʌcʼtesan laʼ bʌ baʼan Dios. Cheʼ jini mi caj i lʌcʼtesan i bʌ baʼ añetla›. Cujil chaʼan tajbilix c chaʼan woli bʌ c sʌclan: Chumtʌl ti tijicña yicʼot jiñi i sujmlel j cuxtʌlel».

16. ¿Bajcheʼ tsiʼ cʼʌñʌyob i librejlel cabʌl hermanojob?

¹⁶ An hermanojob pʼisbil jach bʌ miʼ mejlelob ti eʼtel bajcheʼ precursor tiʼ caj bajcheʼ woliʼ ñusañob. Pero cabʌlob muʼ bʌ i yotsañob i bʌ tiʼ melol otot tac baqui miʼ chʼujutesʌntel Jehová tiʼ pejtelel pañimil. Jumpʼejl ejemplo, jin cheʼ tsaʼ mejli jiñi tsijib central mundial, ti Warwick (Nueva York), cheʼ bʌ 27,000 hermanojob tsaʼ bʌ i chaʼleyob eʼtel. An tsajñiyoʼ bʌ chaʼpʼejl semana, an tsajñoʼ bʌ cabʌl uw, i an jumpʼejl bʌ jab o ñumento tsajñiyoʼ bʌ ti eʼtel. Ili hermanojob tsiʼ yʌcʼʌyob i cuxtʌlel tiʼ melol jiñi eʼtel. Tiʼ pejtelelob utsʼatax tsiʼ pʌsʌyob chaʼan bajcheʼ miʼ mejlel laj cʼʌn lac librejlel tiʼ chʼujutesʌntel Jehová yicʼot i ñuqʼuesʌntel.

17. ¿Chuqui mi caj i tajob ti talto bʌ qʼuin muʼ bʌ i cʼʌñob ti wen i librejlel tsaʼ bʌ aqʼuentiyob ti Dios?

¹⁷ Mi la cʌqʼuen wocolix i yʌlʌ Jehová cheʼ tsaʼ mejli laj cʌn yicʼot chaʼan librejonla chaʼan miʼ mejlel lac chʼujutesan. Tiʼ pejtelel chuqui mi lac yajcan lac mel, laʼ lac pʌs chaʼan mi laj qʼuel ti ñuc cheʼ librejonla. Mach yomic mi lac toʼol jisan o lecoj mi laj cʼʌn, laʼ laj cʼʌn ti wen chaʼan mi lac melben i yeʼtel Dios. Mi cheʼʌch mi lac mel miʼ mejlel lac ñop chaʼan mucʼʌch caj lac taj jiñi bendición albil bʌ i chaʼan ti ili tʼan: «Pejtel jini melbil tac bʌ mi caj i yʌjqʼuel ti colel tiʼ pʼʌtʌlel chʌmel. Mi caj i yochel ti libre chaʼan tijicña miʼ yajñel yicʼot i ñuclel i yalobilob Dios» (Ro. 8:21).