TI JIÑI jabil tsaʼ bʌ ñumi, yonlel i testigojob Jehová añoʼ bʌ tiʼ petol pañimil (mulawil) tsaʼ waʼchocontiyob bajcheʼ anciano yicʼot siervo ministerial. Mi jatet tsaʼ aqʼuentiyet jaʼel jiñi eʼtel (troñel), mic ñaʼtan lojon chaʼan wen tijicñayetʌch.

Tajol tsʼitaʼ an a bʌqʼuen, pero jiñi i tilelʌch. Juntiquil hermano i cʼabaʼ Jason, miʼ yʌl: «Cheʼ bʌ tsaʼ waʼchocontiyon bajcheʼ anciano, tsaʼ c ñaʼta chaʼan mach mejlic c tsʼʌctesan ili eʼtel». Moisés yicʼot Jeremías tsiʼ yubiyob chaʼan mach mejlic i tsʼʌctesañob jiñi eʼtel tsaʼ bʌ aqʼuentiyob ti Jehová (Éx. 4:10; Jer. 1:6). ¿Am ba a wubi a bʌ bajcheʼ jiñi? ¿Chuqui miʼ mejlel a mel (chaʼlen) chaʼan maʼañic miʼ mʌctañet jiñi bʌqʼuen, i maʼ ñumen colel tiʼ chaʼan bʌ Dios? Laʼ laj qʼuel tiʼ tojlel Timoteo (Hch. 16:1-3).

Cheʼ bʌ Pablo tsiʼ pʌyʌ majlel Timoteo ti subtʼan bajcheʼ misionero, tajol an jaxto cheʼ bʌ 20 i jabilel. Ti ñaxan, tajol tsiʼ chaʼle bʌqʼuen yicʼot wocol tsiʼ yubi chaʼan miʼ tsʼʌctesan jiñi tsijib eʼtel tsaʼ bʌ aqʼuenti ti congregación (1 Ti. 4:11, 12; 2 Ti. 1:1, 2, 7). Pero cheʼ ñumeñix 10 jab, Pablo tiʼ sube jiñi congregación am bʌ ti Filipos: «Mi cʌl mach jalic mi caj i coltañon lac Yum Jesús, chaʼan mic choc tilel Timoteo baʼ añetla [...]. Come maʼanic yambʌ c piʼʌl ilayi lajal bajcheʼ Timoteo» (Fil. 2:19, 20).

¿Bajcheʼ tsaʼ sujti ti juntiquil anciano wen cʌmbil bʌ jiñi Timoteo? Laʼ laj qʼuel wʌcchajp muʼ bʌ i mejlel a cʌn tiʼ tojlel.

1. Tiʼ sʌcla bajcheʼ miʼ coltan jiñi yambʌlob. Pablo tiʼ sube jiñi hermanojob añoʼ bʌ ti Filipos: «Timoteo [miʼ] ñaʼtan laʼ wenlel ti jumpʼejl i pusicʼal» (Fil. 2:20). Timoteo ti jumpʼejl i pusicʼal tsiʼ ñaʼta bajcheʼ miʼ coltan yambʌlob. Tsiʼ pʼʌtʼesayob tiʼ chaʼan bʌ Dios, i chuqui jach tsiʼ mele chaʼan miʼ coltañob.

Juntiquil hermano añix bʌ 20 jab i cajel bajcheʼ anciano i cʼabaʼ William, miʼ suben jiñi tsaʼ jaxto bʌ tsijib waʼchocontiyob chaʼan ili eʼtel: «Yom maʼ cʼuxbin jiñi hermanojob. Acʼʌ a ñaʼtʌbal ti chuqui i cʼʌjñibal i chaʼañob i mach jin jach yom maʼ ñaʼtan bajcheʼ yom miʼ mejlel o miʼ chajpʌntel jiñi eʼtel tac ti congregación». Jin chaʼan, mach cheʼic yomet bajcheʼ juntiquil xñijca autobús orajach bʌ yom cʼotel yaʼ baqui miʼ cottʌl i maʼañic miʼ lot jiñi wiñicob xʼixicob (quixtañujob).

2. Tsiʼ yʌcʼʌ ti ñaxan i chaʼan bʌ Jehová. Cheʼ bʌ Pablo tsaʼ ujti i yʌl bajcheʼ yilal i melbal Timoteo, tsiʼ yʌlʌ: «Tiʼ pejtelelob miʼ ñaʼtañob i bajñel wenlel. Maʼanic miʼ ñaʼtañob chuqui yom Cristo Jesús» (Fil. 2:21). Pablo tiʼ tsʼijbu ili tʼan tac cheʼ bʌ yaʼan ti Roma, yaʼi tsiʼ qʼuele chaʼan jiñi hermanojob jin jach añob tiʼ ñaʼtʌbal jiñi i yeʼtelob. Miʼ mejlel la cʌl chaʼan jasʌl miʼ yubiñob cheʼ miʼ tsʼitaʼ aqʼueñob i yorajlel jiñi i chaʼan bʌ Dios. Pero Timoteo mach cheʼic tsiʼ mele. Cheʼ miʼ qʼuel chaʼan muʼto i ñumen mejlel ti subtʼan, lajalʌch i melbal bajcheʼ Isaías, tsaʼ bʌ i yʌlʌ: «Um baʼ añon c Yum. Chocoyon majlel» (Is. 6:8).

¿Chuqui miʼ mejlel a mel chaʼan maʼ tsʼʌctesan ti wen jiñi a weʼtel yicʼot jiñi i chaʼan bʌ Dios? Ñaxam bʌ, qʼuele chuqui ñumen ñuc i cʼʌjñibal. Pablo tsiʼ yʌlʌ chaʼan yom la cujil i cʌñol «chuqui ñumen wen» (Fil. 1:10). Wen qʼuele chaʼan jiñʌch maʼ ñumen acʼ ti ñuc jiñi ñumen i cʼʌjñibal bʌ tiʼ wut Dios. I chaʼpʼejlel, mach a sʌclan cabʌl chubʌʼañʌl. Mach a mel pejtelel muʼ bʌ i toʼol jisʌbeñet a pʼʌtʌlel yicʼot miʼ chilbeñet i yorajlel am bʌ a chaʼan. Pablo tiʼ sube Timoteo: «Mach maʼ jacʼben i colosojlel [tsuculel] a pusicʼal cheʼ bajcheʼ  yambʌ chʼiton winicob. Tsajcan chuqui toj, yicʼot cʼuxbiya, yicʼot i ñʌchʼtʌlel a pusicʼal» (2 Ti. 2:22).

3. Tsiʼ chaʼle tsʌts bʌ eʼtel tiʼ chaʼan bʌ Jehová. Pablo tiʼ cʼajtesʌbeyob jiñi añoʼ bʌ ti Filipos: «Laʼ wujil an cabʌl i cʼʌjñibal Timoteo. Cheʼ bajcheʼ chʼiton miʼ coltan i tat ti eʼtel, tsiʼ coltayon Timoteo tiʼ pucol jini wen tʼan» (Fil. 2:22). Timoteo mach juntiquilic xtsʼuʼlel. Temel tsiʼ wen chaʼle eʼtel yicʼot Pablo, i jin chaʼan tsaʼ sujtiyob ti wem bʌ i yamigojob i bʌ.

An cabʌl eʼtel tiʼ yorganización Dios, eʼtel tac muʼ bʌ i wen aqʼueñet tijicñʌyel yicʼot miʼ ñumen lʌcʼtesañet tiʼ tojlel jiñi hermanojob. Jin chaʼan, acʼʌ ti a ñaʼtʌbal chaʼan tiʼ pejtelel ora cabʌl chuqui maʼ mel tiʼ «yeʼtel lac Yum» (1 Co. 15:58).

4. Tsiʼ mele cheʼ bajcheʼ tsiʼ cʌñʌ. Pablo tiʼ sube Timoteo: «Jatet tsaʼix a ñopo j cʌntesa yicʼot c melbal, yicʼot jini com bʌ c mel, yicʼot c ñopbal, yicʼot bajcheʼ mij cuchben i mul yañoʼ bʌ, yicʼot j cʼuxbiya, yicʼot i xucʼtʌlel c pusicʼal ti pijt» (2 Ti. 3:10). Timoteo tsiʼ mele cheʼ bajcheʼ tsiʼ cʌñʌ, cheʼ bajcheʼ jiñi tsaʼ mejli i taj yambʌ ñuc tac bʌ eʼtel (1 Co. 4:17).

¿Am ba juntiquil hermano wen añix bʌ i ñaʼtʌbal muʼ bʌ a qʼuel bajcheʼ juntiquil xcoltaya a chaʼan? Mi maʼañic, ¿chucoch maʼañic maʼ sʌclan juntiquil? Jiñi hermano Tom, cabʌlix bʌ jab i cajel bajcheʼ anciano, miʼ yʌl: «Juntiquil anciano cabʌlix bʌ i ñaʼtʌbal tsiʼ chʼʌmʌyon ti ñuc i tsaʼ sujti ti xcʌntesa c chaʼan. Ti bele ora tsaʼ j cʼajtibe ticʼojel tac, i tsaʼʌch c chʼʌmʌ ti ñuc tiʼ pejtelel. Jiñi tsaʼʌch i coltayon».

5. Tsiʼ bej chajpa i bʌ tiʼ chaʼan bʌ Dios. Pablo tiʼ sube Timoteo: «Chajpan a pusicʼal chaʼan chʼujul maʼ wajñel» (1 Ti. 4:7). Juntiquil xʼajñel añʌch majqui miʼ chajpan, pero yomʌch miʼ bajñel chajpan i bʌ jaʼel. Pablo tsiʼ chaʼ sube Timoteo: «Pejcʌbeñob i tsʼijbujel Dios. Chaʼlen subtʼan yicʼot cʌntesa [...]. Chʌn mele a weʼtel. Yom bʌxet tiʼ melol chaʼan miʼ laj qʼuelob utsʼat wolaʼ wajñel» (1 Ti. 4:13-15).

Jatet mucʼʌch a mejlel ti ñumen weñʼan jaʼel. Yomʌch maʼ bej colel majlel tiʼ chaʼan bʌ Dios. Chʌn mele cheʼ bajcheʼ miʼ yʌl majlel jiñi organización. Tsajilet chaʼan maʼañic maʼ cʌlʌx qʼuel a bʌ ti ñuc. Mach a ñaʼtan chaʼan wen a wujilix i mach cʼʌñʌlix maʼ wen aqʼuen i yorajlel chaʼan maʼ sʌclan bajcheʼ yom maʼ tojʼesan jumpʼejl wocol. Cheʼ bajcheʼ Timoteo, «cʌntan a bʌ» yicʼot «chʌn chaʼlen cʌntesa ti toj» (1 Ti. 4:16).

6. Tsiʼ ñopo jiñi coltaya muʼ bʌ i yʌcʼ i yespíritu Jehová. Cheʼ bʌ Pablo woli (choncol) i taj ti tʼan chaʼan i subtʼan Timoteo, tiʼ sube: «Cʌntan jini utsʼat tac bʌ tsaʼ bʌ i yʌcʼʌ ti a wenta jini Chʼujul bʌ Espíritu» (2 Ti. 1:14). Chaʼan Timoteo miʼ mejlel i cʌntan i subtʼan, tsaʼʌch i ñopo jiñi i coltaya i yespíritu Jehová.

Donald, añix bʌ cabʌl jab i cajel bajcheʼ anciano, miʼ yʌl: «Jiñi hermanojob waʼchocobiloʼ bʌ tiʼ yeʼtel yomʌch miʼ qʼuelob ti ñuc bajcheʼ añob yicʼot Jehová i miʼ cʌntañob, cheʼʌch mi caj i ñumen pʼʌtʼañob. Mi mucʼʌch i cʼajtibeñob chʼujul bʌ i yespíritu Dios yicʼot añob i chaʼan i yʌcʼbal ili espíritu, cheʼobʌch bajcheʼ jumpʼejl bendición tiʼ tojlel i yermañojob» (Sal. 84:7; 1 P. 4:11).

Utsʼatax cheʼ cabʌl hermanojob maxto bʌ wen jalic i waʼchocontelob, cheʼ bajcheʼ jatet, woli (yʌquel) i colelob majlel tiʼ chaʼan bʌ Dios. Jiñi hermano tsaʼ bʌ la cʌlʌ tiʼ tejchibal, miʼ yʌl: «Cʼʌlʌl bajcheʼ tsaʼ c teche eʼtel ti anciano cabʌlix chuqui cʌmbil c chaʼan i wʌle maʼañix c bʌqʼuen mi cubin. Tijicña mi cubin c bʌ chaʼan jiñi queʼtel, i jumpʼejlʌch ñuc bʌ c majtan mij qʼueleʼ».

Ixcu jatet, ¿muʼ ba caj a bej colel majlel tiʼ chaʼan bʌ Dios? Acʼʌ ti a ñaʼtʌbal chaʼan maʼ tsajcʌben i melbal Timoteo. Cheʼ bajcheʼ jiñi, lajalʌch bajcheʼ jumpʼejl bendición mi caj a sujtel tiʼ tejclum Jehová.