1, 2. ¿Chuqui yom mi lac mel cheʼ bʌ wolito lac pijtan jiñi tsijiʼ bʌ pañimil?

 WEN tijicña mi la cubin cheʼ Jehová an i yʌlʌ chaʼan mi caj i jisan ili jontol bʌ pañimil (2 Ped. 3:13). Mach la cujilic jala mi caj i tsʼʌctiyel, pero muʼ bʌ laj qʼuel ti lac joytilel miʼ pʌsbeñonla chaʼan tsʼitaʼ jax yom (Mat. 24:32-34, 36; Hech. 1:7).

² Mach yʌlʌyic jalix tsaʼ sujtiyonla bajcheʼ Testigo, ti lac pejtelel yom mi lac pʼʌtʼesan lac ñopoñel ti jiñi albil bʌ i chaʼan Jehová. ¿Chucoch? Come miʼ mejlel ti cʼuñʼan jiñi lac ñopoñel. Jiñi apóstol Pablo tsiʼ yʌlʌ chaʼan cheʼ miʼ jilel majlel jiñi lac ñopoñel jiñʌch «jiñi mulil muʼ bʌ i mʌctañonla» (Heb. 12:1). Chaʼan mach cheʼ mi la cujtel yom mi lac chʌn tsajin chuqui tac miʼ pʌs chaʼan lʌcʼʌlix jiñi tsijiʼ bʌ pañimil (Heb. 11:1).

3. ¿Chuqui mi caj laj qʼuel ti ili estudio?

³ Ti ili estudio mi caj laj qʼuel uxchajp muʼ bʌ caj i coltañonla lac ñumen ñop chaʼan mucʼʌch caj i tilel jiñi tsijiʼ bʌ pañimil: 1) Mi lac wen ñaʼtan jiñi i tojol laj coltʌntel 2) mi lac  ñaʼtan jiñi i pʼʌtʌlel Jehová yicʼot 3) mi lac mel muʼ bʌ i lʌcʼtesañonla ti Jehová. Cheʼ jiñi, mi caj laj qʼuel chaʼan tsaʼ bʌ subenti Habacuc miʼ pʼʌtʼesan lac ñopoñel jaʼel. Pero laʼ lac ñaxan qʼuel chucoch yomʌch mi lac ñop chaʼan mucʼʌch caj i tilel jiñi tsijiʼ bʌ pañimil.

¿CHUCOCH YOM PʼɅTɅL LAC ÑOPOÑEL?

4. ¿Baqui tac yom mi lac pʌs chaʼan pʼʌtʌlʌch lac ñopoñel?

⁴ Ti jujumpʼejl qʼuin cabʌl jax chuqui mi lac mel baqui yom mi lac pʌs mi pʼʌtʌlʌch lac ñopoñel. Jumpʼejl ejemplo, mi lac yajcan la camigojob, lac ñusaqʼuin, mi muʼto laj cajel ti clase, mi la com ñujpuñel, la calobilob yicʼot chuqui ti eʼtel mi caj lac mel. «¿Chuqui miʼ pʌs jiñi muʼ tac bʌ c mel? ¿Muʼ ba i pʌs chaʼan mucʼʌch c ñop chaʼan lʌcʼʌlix jiñi tsijib pañimil? ¿O cheʼ mic mel bajcheʼ miʼ ñaʼtan yambʌlob chaʼan yom jach mi lac ñusan lac bʌ ti laj cuxtʌlel come maʼañic yambʌ?» (Mat. 6:19, 20; Luc. 12:16-21). Mi mucʼʌch lac wen ñop chaʼan lʌcʼʌlix jiñi tsijib pañimil wen chuqui mi caj lac mel.

5, 6. ¿Chucoch yom chʌn pʼʌtʌl lac ñopoñel cheʼ bʌ mi lac ñusan wocol tac? Acʼʌ jumpʼej ejemplo.

⁵ Cheʼ jaʼel, mi lac ñusan wocol tac bajcheʼ tsʼaʼlentel, cʼamʌjel o yan tac bʌ muʼ bʌ i mejlel i cʼuñʼesañonla. I yomʌch mi lac pʌs chaʼan pʼʌtʌl lac ñopoñel. Tajol ti ñaxan weñʌch mi lac ñusan majlel jiñi wocol, pero mi tsaʼ jalʼa yomʌch pʼʌtʌl jiñi lac ñopoñel chaʼan mi lac lʌtʼ i tijicña mi lac bej melben i yeʼtel Jehová (Rom. 12:12; 1 Ped. 1:6, 7).

⁶ Cheʼ bʌ woli lac ñusan jumpʼejl wocol, tajol mi lac ñaʼtan chaʼan Jehová maʼañic mi caj i chʼʌm tilel jiñi tsijib pañimil. Pero mach yomic i yʌl chaʼan mach pʼʌtʌlic lac ñopoñel. Laʼ la cʌl jumpʼejl ejemplo. Cheʼ bʌ i yorajlel cabʌl tsʌñal, tajol mi lac ñaʼtan chaʼan mach talic i yorajlel ticwal. Pero mucʼʌch. Cheʼ miʼ yujtel jaʼel cheʼ bʌ wen chʼijyemonla, tajol mi lac ñaʼtan chaʼan mach talic jiñi tsijiʼ bʌ pañimil. Pero mi pʼʌtʌlʌch lac ñopoñel, mi lac ñop chaʼan Jehová mi caj i tsʼʌctesan i tʼan (Sal. 94:3, 14, 15; Heb. 6:17-19). Jiñi mi caj i coltañonla chaʼan mi lac bej acʼ ti ñaxan jiñi lac chʼujutesaya ti Jehová.

7. ¿Chuqui mach bʌ yomic mi lac mel?

⁷ Yomʌch pʼʌtʌl lac ñopoñel chaʼan mi lac chaʼlen subtʼan. Cheʼ bʌ mi lac suben lac piʼʌlob chaʼan bʌ jiñi tsijiʼ bʌ pañimil, miʼ yʌlob chaʼan utsʼatʌch yubil pero maʼañic miʼ ñopob (Mat. 24:14; Ez. 33:32). Pero mach yomic mi lac lajiñob cheʼ bʌ miʼ ñaʼtañob bajcheʼ jiñi. Jin chaʼan, yomʌch mi lac bej pʼʌtʼesan lac ñopoñel. Laʼ laj qʼuel uxchajp muʼ bʌ i mejlel lac mel.

LAʼ LAC WEN ÑAʼTAN JIÑI I TOJOL LAJ COLTɅNTEL

8, 9. ¿Bajcheʼ miʼ pʼʌtʼesan lac ñopoñel cheʼ mi lac chaʼlen ti meditar jiñi i tojol laj coltʌntel?

⁸ Junchajp bajcheʼ mi lac pʼʌtʼesan lac ñopoñel jiñʌch cheʼ mi lac wen ñaʼtan i tojol laj coltʌntel come jiñi miʼ yʌqʼueñonla lac ñop chaʼan mucʼʌch caj i tsʼʌctiyel albil bʌ i chaʼan Dios. Wen ñuc i cʼʌjñibal cheʼ mi lac ñaʼtan pejtelel chuqui tsaʼ mejli chaʼan miʼ yʌjqʼuel laj coltʌntel i chucoch tsaʼ mejli. Cheʼ bajcheʼ jiñi mi caj lac ñumen ñop chaʼan Jehová mi caj i chʼʌm tilel jiñi tsijib pañimil i chaʼan mi caj lac mejlel ti chumtʌl tiʼ pejtelel ora. ¿Chucoch mi la cʌl jiñi?

⁹ Laʼcu lac ñaʼtan pejtelel tsaʼ bʌ ujti chaʼan miʼ tojtʌl lac mul. Jehová tsiʼ choco tilel ila ti Lum jiñi wen cʼuxbibil bʌ i Yalobil, jiñi ñumen wem bʌ i yamigo, chaʼan miʼ yilan pañimil bajcheʼ juntiquil toj bʌ wiñic. Cheʼ bʌ Jesús wʌʼan ti pañimil tsiʼ wen ila wocol yicʼot  pʼumpʼumtic tiʼ tsʌnsayob. Jehová wen lets tsiʼ tojo. Jehová maʼañic tsiʼ yʌcʼʌ i Yalobil chaʼan miʼ yilan wocol cheʼ chaʼañic jach miʼ jumucʼ aqʼueñonla lac tijicñʌyel (Juan 3:16; 1 Ped. 1:18, 19). Añʌch chuqui mi caj i mel chaʼan mi lac mejlel ti chumtʌl tiʼ pejtelel ora ti jiñi tsijiʼ bʌ pañimil come Jehová wen lets tsiʼ tojo.

CHEʼ MI LAC ÑAʼTAN I PʼɅTɅLEL JEHOVÁ

10. Cheʼ bajcheʼ miʼ yʌl Efesios 3:20, ¿chuqui miʼ mejlel i mel Jehová?

¹⁰ Cheʼ mi lac ñaʼtan jiñi i pʼʌtʌlel Jehová mi pʼʌtʼesan lac ñopoñel. Añʌch i pʼʌtʌlel chaʼan miʼ laj tsʼʌctesan muʼ bʌ i yʌl. I sujmʌch, jiñi lac piʼʌlob maʼañic miʼ ñopob chaʼan mi lac mejlel ti chumtʌl ti jumpʼejl tsijib pañimil. Pero Jehová mucʼʌch i mejlel i mel jiñi ñuc tac bʌ come maʼañic i Pʼisol i pʼʌtʌlel (Job 42:2; Mar. 10:27). Mucʼʌch i mejlel i yʌl chaʼan mi caj i chʼʌm tilel tsijiʼ bʌ pañimil (pejcan Efesios 3:20).

11. Alʌ jumpʼejl ñuc bʌ promesa albil bʌ i chaʼan Jehová (qʼuele jiñi recuadro « Ñuc tac bʌ promesa tsaʼ bʌ i tsʼʌctesa Jehová»).

¹¹ Laʼcu lac ñaʼtan chuqui tiʼ sube Jehová i wiñicob ti wajali mach bʌ tsʼʌctiyic yilal. Tiʼ sube Abrahán yicʼot Sara chaʼan mi caj i yʌcʼob juntiquil i yalobil anquese ñoxobix (Gn. 17:15-17). Cheʼ jaʼel, tiʼ sube Abrahán chaʼan jiñi i pʼolbal mi caj i chʼʌm jiñi tejclum Canaán. Pero jiñi israelitajob cabʌl jab tsaʼ ajñiyob bajcheʼ esclavo ti Egipto i tajol tsiʼ ñaʼtayob chaʼan maʼañic baqui ora mi caj i tsʼʌctiyel jiñi. Pero tsaʼʌch tsʼʌctiyi. Cheʼ bʌ ñumeñix cabʌl jab, Jehová tiʼ sube Elisabet chaʼan mi caj i tilel juntiquil i yalobil anquese wen ñoxix. Cheʼ jaʼel, tiʼ sube María, juntiquil xchʼoc maxto bʌ piʼlebilic, chaʼan mi caj i yʌcʼ ti pañimil juntiquil i yalobil. Cheʼ bajcheʼ jiñi mi caj i mejlel ti tsʼʌctiyel jumpʼejl profecía tsaʼ bʌ ajli yaʼ ti pʌcʼʌbʌl Edén (Gn. 3:15).

12. ¿Chuqui miʼ pʌsbeñonla Josué 23:14 yicʼot Isaías 55:10, 11 chaʼan i pʼʌtʌlel Jehová?

¹² Mi lac taj laj qʼuel bajcheʼ cʼamel i pʼʌtʌlel Jehová cheʼ bʌ mi laj qʼuel pejtelel tsaʼ bʌ i yʌlʌ i bajcheʼ tiʼ tsʼʌctesa. lli miʼ coltañonla lac ñumen ñop chaʼan mucʼʌch caj i chʼʌm tilel jiñi tsijiʼ bʌ pañimil (pejcan Josué 23:14; Isaías 55:10, 11). Cheʼ bajcheʼ jiñi mi caj i mejlel lac ñumen coltan yambʌlob chaʼan miʼ ñopob chaʼan mucʼʌch caj i tilel jiñi tsijiʼ bʌ pañimil, Jehová tsiʼ yʌlʌ tiʼ tojlel jiñi tsijiʼ bʌ panchan yicʼot pañimil: «Ili tʼan tac […] xucʼulʌch yicʼot i sujmʌch» (Apoc. 21:1, 5).

LAʼ LAC MEL MUʼ BɅ I ÑUMEN LɅCʼTESAÑONLA TI JEHOVÁ

13. ¿Bajcheʼ miʼ pʼʌtʼesan lac ñopoñel jiñi tempa bʌ tac?

¹³ I yuxchajplel muʼ bʌ i ñumen pʼʌtʼesan lac ñopoñel jiñʌch cheʼ mi lac mel muʼ bʌ i ñumen lʌcʼtesañonla ti Jehová. Jumpʼejl ejemplo, laʼ lac ñaʼtan bajcheʼ miʼ coltañonla jiñi tempa bʌ tac. Anna, b cabʌl bʌ bajcheʼ an i melbe i yeʼtel Jehová, miʼ yʌl: «Jiñi tempa bʌ tac lajalʌch bajcheʼ jumpʼejl ancla muʼ bʌ i xucʼchocon c ñopoñel. Anquese mach ñoj weñic bajcheʼ miʼ chaʼlen cʌntesa jiñi hermano o maʼañic chuqui tsijiʼ bʌ miʼ yʌl añʌch chuqui mic ñʌchʼtan muʼ bʌ i coltañon c ñumen chʼʌmben i sujm jiñi Biblia, i bajcheʼ jiñi miʼ ñumen pʼʌtʼan c ñopoñel». Jiñi comentario tac muʼ bʌ la cubin ti tempa bʌ tac mucʼʌch i pʼʌtʼesañonla jaʼel (Rom. 1:11, 12; 10:17).

14. ¿Bajcheʼ miʼ pʼʌtʼesan lac ñopoñel jiñi subtʼan?

¹⁴ Miʼ pʼʌtʼan lac ñopoñel jaʼel cheʼ mi  lac chaʼlen subtʼan (Heb. 10:23). Barbara, ñumeñix bʌ 70 jab ochen bajcheʼ Testigo, miʼ yʌl: «Jiñi subtʼan an i wen pʼʌtʼesa c ñopoñel. Mij qʼuel chaʼan miʼ ñumen pʼʌtʼan c ñopoñel cheʼ bʌ mic ñumen al i chaʼan bʌ Jehová yicʼot jiñi albil tac bʌ i chaʼan».

15. ¿Bajcheʼ miʼ pʼʌtʼan lac ñopoñel cheʼ bʌ mi lac chaʼlen estudio? (Qʼuele jaʼel jiñi dibujo tac).

¹⁵ Laʼ laj qʼuel yambʌ muʼ bʌ i pʼʌtʼesan lac ñopoñel: Jiñi estudio. Susan miʼ yʌl chaʼan miʼ coltan cheʼ an jumpʼejl i horario. Miʼ yʌl: «Ti domingo mic chajpan c bʌ chaʼan Lac Tsictesʌbentel ti yambʌ semana. Ti lunes yicʼot ti martes, mic chajpan c bʌ chaʼan jiñi tempa bʌ muʼ bʌ i mejlel ti semana. I ti yan tac bʌ qʼuin añix yambʌ chuqui mic chaʼlen ti estudiar». Miʼ ñumen colel majlel i ñopoñel Susan come cheʼʌch miʼ mel bajcheʼ an i horario. Irene, añix bʌ cabʌl jab yaʼan ti central mundial, miʼ pʼʌtʼan majlel i ñopoñel cheʼ bʌ miʼ chaʼlen ti estudiar jiñi profecía tac. Miʼ yʌl: «Miʼ toj sajtel c pusicʼal cheʼ bʌ mij qʼuel bajcheʼ miʼ tsʼʌctiyel majlel jiñi profecía tac». c

«MELEL MI CAJ I BɅCʼ TILEL»

16. ¿Bajcheʼ la cujil chaʼan mucʼʌch i coltañonla jaʼel jiñi tsaʼ bʌ subenti Habacuc? (Hebreos 10:36, 37).

¹⁶ Cabʌlob wajalix bʌ caj i pijtañob chaʼan miʼ tilel i jilibal pañimil. An muʼ bʌ i ñaʼtañob chaʼan tsaʼix jalʼa. Jehová miʼ chʼʌmben i sujm bajcheʼ yubil miʼ yubin i wiñicob. Jin chaʼan, tiʼ sube jiñi xʼaltʼan Habacuc: «Anquese jal to mi caj i yujtel pejtel iliyi, pero wersa mi caj i luʼ tsʼʌctiyel cheʼ tiʼ yorajlel. Mach cujilic lot. Mi woliʼ jalʼan yubil, yom xucʼul maʼ chʌn pejcan, come melel mi caj i bʌcʼ tilel cheʼ tiʼ yorajlel» (Hab. 2:3). ¿I chaʼan jach ba Habacuc iliyi, o miʼ coltañonla jaʼel ili ora? Jehová tsiʼ ñijca jiñi apóstol Pablo chaʼan miʼ cʼʌn ili tʼan tac chaʼan miʼ coltan jiñi xñoptʼañob  woli bʌ i pijtañob jiñi tsijiʼ bʌ pañimil (pejcan Hebreos 10:36, 37). Anquese woliʼ jalʼan mi la cubin, yom mi laj cʼajtesan chaʼan «melel mi caj i bʌcʼ tilel cheʼ tiʼ yorajlel».

17. ¿Bajcheʼ tsiʼ jacʼʌ juntiquil hermana jiñi ticʼojel tsaʼ bʌ aqʼuenti Habacuc?

¹⁷ Yonlelob cabʌlix bʌ jab yʌxʌlob i yo cheʼ bajcheʼ miʼ yʌl Jehová. Laʼ laj qʼuel chuqui tsaʼ bʌ ujti tiʼ tojlel jiñi hermana Louise, tsaʼ bʌ i teche i melben i yeʼtel Jehová ti 1939. Miʼ yʌl: «Tsaʼ c ñaʼta chaʼan talix jiñi Armagedón i maʼañix mi caj c taj 18 c jabilel. Pero mach cheʼic tsaʼ ujti. Tsaʼ bʌ i coltayon tiʼ pejtelel ili jabil jiñʌch cheʼ tsaʼ c pejca chaʼan tiʼ tojlel Noé, Abrahán, José yicʼot yambʌ i wiñicob Jehová tsaʼ bʌ i pijtayob chaʼan miʼ yʌqʼuentelob jiñi tsaʼ bʌ subentiyob. Tsaʼ bʌ i coltayon yicʼot yambʌlob chaʼan mic chʌn cʼajtesan chaʼan lʌcʼʌlix jiñi tsijiʼ bʌ pañimil jiñʌch cheʼ chʌn yʌxʌl lon co». Tajol yonlel i wiñicob Jehová añix bʌ ora caj i melbeñob i yeʼtel cheʼʌch miʼ ñaʼtañob jaʼel.

18. ¿Bajcheʼ miʼ coltañonla jiñi melbil tac bʌ chaʼan mi lac ñop chaʼan Jehová mi caj i chʼʌm tilel jiñi tsijiʼ bʌ pañimil?

¹⁸ I sujmʌch chaʼan maxto chumuloñicla ti jiñi tsijiʼ bʌ pañimil, pero laʼ lac ñaʼtan jiñi an tac bʌ: Jiñi ecʼ tac, jiñi teʼ tac, añimal tac yicʼot jiñi quixtañujob. Anquese maxto añic ti ñaxan, maʼañic majqui miʼ yʌl chaʼan maʼañic ili ora come Jehová tsiʼ mele (Gn. 1:1, 26, 27). Jiñi lac Dios an i yʌlʌ chaʼan mi caj i mel tsijiʼ bʌ pañimil, i mucʼʌch caj i tsʼʌctesan i tʼan. Mi caj lac chumtʌl tiʼ pejtelel ora i maʼañix mi caj laj cʼamʼan. Cheʼ bʌ miʼ tsʼʌctiyel jiñi, mi caj laj qʼuel jiñi tsijiʼ bʌ pañimil cheʼ bajcheʼ mi laj qʼuel jiñi an tac bʌ ili ora (Is. 65:17; Apoc. 21:3, 4).

19. ¿Bajcheʼ miʼ mejlel lac pʼʌtʼesan lac ñopoñel?

¹⁹ Cheʼ bʌ wolito lac pijtan miʼ tilel jiñi tsijiʼ bʌ pañimil, laʼ lac chaʼlen wersa lac pʼʌtʼesan jiñi lac ñopoñel. Laʼ lac wen ñaʼtan jiñi i tojol laj coltʌntel, laʼ lac ñaʼtan i pʼʌtʌlel Jehová yicʼot laʼ lac mel muʼ bʌ i ñumen lʌcʼtesañonla tiʼ tojlel. Mi mucʼʌch lac mel iliyi, mi caj la cochel ti jiñi «muʼ bʌ caj i yʌqʼuentelob jiñi tsaʼ bʌ wʌn ajli tiʼ caj añob i ñopoñel yicʼot i pijt» (Heb. 6:11, 12; Rom. 5:5).