1. ¿Chuqui jiñi mucʼʌch bʌ lac ñop?

 LA CUJIL chaʼan Jehová miʼ cʼuxbiñonla i yom chaʼan wen mi la cajñel (Rom. 8:35-39). Cheʼ jaʼel, la cujil chaʼan mucʼʌch i coltañonla cheʼ mi lac jacʼ jiñi principio tac (Is. 48:17, 18). Pero ¿ixcu mi tsiʼ tajayonla jumpʼejl wocol mach bʌ pijtʌbilic lac chaʼan?

2. ¿Chuqui ti wocol tac miʼ mejlel lac taj, i chuqui miʼ mejlel laj cʼajtiben lac bʌ?

² Pejtelel jiñi i wiñicob Jehová miʼ ñusañob wocol. Jumpʼejl ejemplo, tajol juntiquil lac familia miʼ yʌl o miʼ mel (chaʼlen) maʼañic bʌ mi lac mulan. Maʼañic miʼ wen mejlel lac melben i yeʼtel (troñel) Jehová tiʼ caj cʼamonla. Mi lac ñusan jumpʼejl wocol bajcheʼ icʼ jaʼal o yan tac bʌ. O tajol mi lac tsʼaʼlentel tiʼ caj lac ñopbal. I cheʼ bʌ mi lac ñusan ili wocol tac tajol mi laj cʼajtiben lac bʌ: «¿Chucoch woli (choncol) c ñusan iliyi? ¿Am ba chuqui mach bʌ weñic tsaʼ c mele? ¿Maʼañic ba woli (yʌquel) i yʌqʼueñon i bendición Jehová?». Mi an a wubi a bʌ bajcheʼ iliyi, mach cʼuñʼaquet. Cabʌl i wiñicob Jehová an i ñusayob jaʼel iliyi (Sal. 22:1, 2; Hab. 1:2, 3).

3. ¿Chuqui miʼ pʌsbeñonla Salmo 34:19?

 ³ (Pejcan Salmo 34:19). Ili versículo miʼ taj ti tʼan chaʼchajp ñuc bʌ i cʼʌjñibal: 1) Jiñi tojoʼ bʌ miʼ ñusañob wocol tac i 2) Jehová mucʼʌch i coltañob. Junchajp muʼ bʌ i mel Jehová jiñʌch cheʼ miʼ coltañonla chaʼan pʼisbil jach bajcheʼ yilal mi laj qʼuel ili pañimil (mulawil). I sujmʌch chaʼan Jehová miʼ yʌl chaʼan tijicñayonla cheʼ mi lac melben i yeʼtel, pero jiñi mach yomic i yʌl chaʼan maʼañic mi caj lac taj wocol (Is. 66:14). Yom chaʼan mi la cʌcʼ lac ñaʼtʌbal ti jiñi laj cuxtʌlel ti talto bʌ qʼuin, come jiñʌch yom bʌ i yʌqʼueñonla (2 Cor. 4:16-18). Pero wʌle, wolʌch i coltañonla jaʼel chaʼan miʼ ñumel majlel lac chaʼan jujumpʼejl qʼuin (Lm. 3:22-24).

4. ¿Chuqui mi caj laj qʼuel ti ili estudio?

⁴ Ti ili estudio, mi caj laj qʼuel ejemplo tac chaʼan i wiñicob Jehová tsaʼ bʌ chumleyob ti wajali yicʼot añoʼ bʌ ti ili ora. Cheʼ bajcheʼ mi caj laj qʼuel, mach tsiquilic miʼ waʼ tajonla wocol. Pero Jehová mucʼʌch i coltañonla tiʼ pejtelel ora mi mucʼʌch lac ñop tiʼ tojlel (Sal. 55:22). Cheʼ bʌ mi laj qʼuel majlel ili ejemplo tac, cʼajtiben a bʌ: «¿Chuqui tsaʼ c mele joñoñic tsaʼ c ñusa ili wocol? ¿Bajcheʼ miʼ coltañon chaʼan mic ñumen ñop ti Jehová? ¿Chuqui miʼ mejlel j cʌn?».

5. ¿Chuqui ti wocol tsiʼ taja Jacob tiʼ mul Labán? (Qʼuele jiñi dibujo am bʌ tiʼ tejchibal).

⁵ Ti wajali an i wiñicob Jehová tsaʼ bʌ i ñusayob wocol mach bʌ pijtʌbilic i chaʼañob. Laʼcu lac ñaʼtan tiʼ tojlel Jacob. Jiñi i papá tiʼ sube chaʼan miʼ ñujpuñel yicʼot juntiquil i yixicʼal (yixicpʼeñal) Labán, juntiquil i familia muʼ bʌ i chʼujutesan Jehová. I tiʼ sube chaʼan Jehová mi caj i yʌqʼuen cabʌl bendición (Gn. 28:1-4). Jin chaʼan, Jacob tsaʼʌch i jacʼʌ: Tsaʼ loqʼui ti Canaán i tsaʼ majli baqui chumul Labán, am bʌ chaʼtiquil i yixicʼal, Lea yicʼot Raquel. Jacob tsiʼ mulaj Raquel, jiñi ijtsʼiñʌl bʌ. Chaʼan miʼ mejlel i pʌy, 7 jab tsiʼ melbe i yeʼtel Labán (Gn. 29:18). Pero Labán tsiʼ loti come mach jiñic Raquel tsiʼ yʌqʼue i pʌy, jiñʌch Lea, jiñi chichʌl bʌ. Tiʼ jumpʼejlel semana tsaʼ mejli i pʌy Raquel, pero tsiʼ chaʼle eʼtel yambʌ 7 jab (Gn. 29:25-27). Pero mach jin jach tsiʼ ñusa jiñi. Labán tsiʼ ticʼla Jacob jaʼel tiʼ yeʼtel. ¡20 jab tsiʼ ticʼla! (Gn. 31:41, 42).

6. ¿Baqui tac bʌ yambʌ wocol tsiʼ ñusa Jacob?

⁶ Jacob tsiʼ ñusa yan tac bʌ wocol. Wen ñuc jiñi i familia, pero jiñi i yalobilob an i tajol mach yomic i qʼuelob i bʌ. Tsiʼ choñoyob José bajcheʼ xyaj eʼtel. Cheʼ jaʼel, chaʼtiquil i yalobil i cʼabaʼ Simeón yicʼot Leví tsiʼ meleyob mach bʌ weñic tiʼ wut i familia yicʼot tiʼ wut Jehová. Cheʼ jaʼel, jiñi i yijñam i cʼabaʼ Raquel tsaʼ chʌmi cheʼ bʌ tsiʼ yila pañimil (tsaʼ chʼocʼa) jiñi yambʌ i yalobil. I Jacob tsaʼ majli ti chumtʌl ti Egipto cheʼ bʌ wen ñoxix tiʼ caj jiñi wiʼñal tsaʼ bʌ ñumi (Gn. 34:30; 35:16-19; 37:28; 45:9-11, 28).

7. ¿Bajcheʼ tsiʼ pʌsʌ Jehová chaʼan tijicñayʌch yicʼot Jacob?

⁷ Jacob maʼañic tsiʼ cʌyʌ i ñop Jehová yicʼot jiñi albil tac bʌ i chaʼan anquese tsiʼ ñusa cabʌl wocol. I Jehová tsiʼ pʌsbe chaʼan tijicñayʌch yicʼot. Jumpʼejl ejemplo, anquese Labán tsiʼ wen loti, Jacob cabʌlʌch chuqui an i chaʼan tsaʼ tempʌyi come Jehová tsiʼ colta. Miʼ mejlel la cʌl chaʼan tijicña tsiʼ yubi cheʼ bʌ tsiʼ chaʼ qʼuele José, chʌmeñix bʌ tsiʼ lon ñaʼta. Tsaʼ bʌ i colta Jacob chaʼan miʼ mejlel i cuch pejtelel jiñi wocol jiñʌch cheʼ wen lʌcʼʌl an yicʼot Jehová (Gn. 30:43; 32:9, 10; 46:28-30). Joñonla jaʼel miʼ mejlel lac lʌtʼ baqui jach bʌ wocol mi wen lʌcʼʌlʌch añonla la quicʼot Jehová.

8. ¿Chuqui yom i mel tsiʼ yʌlʌ jiñi rey David?

 ⁸ Jiñi rey David maʼañic tsaʼ mejli i mel pejtelel chuqui tsiʼ mulaj. Jumpʼejl ejemplo, yom i melben (pʌtben) jumpʼejl i templo Jehová. Cheʼ bʌ tiʼ sube jiñi xʼaltʼan Natán, tsaʼ subenti: «Utsʼat maʼ mel pejtelel chuqui woli a ñaʼtan, come an a wicʼot lac Yum» (1 Cr. 17:1, 2). Mi lac ñaʼtan chaʼan David wen tijicña tsiʼ yubi cheʼ bʌ tsaʼ subenti iliyi. Tajol ti ora tsaʼ caji i chajpan bajcheʼ mi caj i mel jiñi eʼtel.

9. ¿Chuqui tsiʼ mele David cheʼ bʌ tsiʼ yubi chaʼan mach jiñic mi caj i mel jiñi templo?

⁹ Pero ti wiʼil, jiñi xʼaltʼan tsaʼ cʼoti i yʌl chaʼan mach cheʼic miʼ cajel bajcheʼ tsiʼ ñaʼta. Ti jin jach bʌ acʼʌlel, Jehová tiʼ sube Natán chaʼan mach jiñic David mi caj i mel jiñi templo, jiñʌch juntiquil i yalobil (1 Cr. 17:3, 4, 11, 12). ¿Chuqui tsiʼ mele David cheʼ bʌ tsiʼ yubi iliyi? Tsiʼ qʼuexta jiñi ñaʼtʌbil bʌ i chaʼan. Tsaʼ caji i tempan taqʼuin yicʼot jiñi muʼ tac bʌ caj i cʼʌn Salomón chaʼan miʼ mel jiñi templo (1 Cr. 29:1-5).

10. ¿Chuqui ti bendición tsaʼ aqʼuenti David?

¹⁰ Jehová tsiʼ mele jumpʼejl trato yicʼot David cheʼ bʌ tsaʼ ujti i suben chaʼan mach jiñic mi caj i mel jiñi templo: Tiʼ sube chaʼan juntiquil i pʼolbal mi caj i chaʼlen yumʌntel tiʼ pejtelel ora (2 S. 7:16). Yaʼ ti tsijiʼ bʌ pañimil, cheʼ bʌ Cristo miʼ chaʼlen yumʌntel Mil jab, David tijicña mi caj i yubin cheʼ bʌ miʼ subentel chaʼan jiñi Rey juntiquilʌch i pʼolbal. Ili relato miʼ pʌsbeñonla chaʼan Jehová miʼ mejlel i yʌqʼueñonla bendición tac mach bʌ pijtʌbilic lac chaʼan anquese maʼañic miʼ mejlel lac mel pejtelel chuqui la com.

11. ¿Chuqui ti bendición tac tsiʼ tajayob jiñi xñoptʼañob ti ñaxam bʌ siglo anquese jiñi Yumʌntel maʼañic tsaʼ tili cheʼ bʌ woliʼ pijtañob? (Hechos 6:7).

¹¹ Jiñi xñoptʼañob cheʼ ti ñaxam bʌ siglo tsiʼ ñusayob wocol tac mach bʌ pijtʌbilobic i chaʼan. Jumpʼejl ejemplo, yomob chaʼan miʼ tilel jiñi i Yumʌntel Dios, pero mach yujilobic jala (Hech. 1:6, 7). ¿Chuqui tsiʼ meleyob? Tsiʼ chʌn chaʼleyob subtʼan. Cheʼ bʌ tsiʼ qʼueleyob chaʼan woliʼ ñumen pujquel jiñi subtʼan, tsiʼ qʼueleyob chaʼan Jehová wolʌch i yʌcʼ i bendición (pejcan Hechos 6:7).

12. ¿Chuqui tsiʼ meleyob jiñi xñoptʼañob añoʼ bʌ ti Judea cheʼ bʌ tsaʼ ñumi wiʼñal?

¹² Cheʼ ti ñaxam bʌ siglo tsaʼ caji wiʼñal «tiʼ pejtelel pañimil» (Hech. 11:28). Ili wocol tsaʼʌch i ticʼla jaʼel jiñi xñoptʼañob. Jiñi tatʌlob tsiʼ pensariyob bajcheʼ mi caj i mʌcʼlañob i familia. I jiñi xcolelob yomoʼ bʌ i ñumen melben i yeʼtel Jehová tajol tsiʼ cʼajtibeyob i bʌ mi yomto miʼ bej pijtañob. Anquese tsiʼ ñusayob jiñi, tsaʼʌch i bej melbeyob i yeʼtel Jehová. Tsiʼ chaʼleyob wersa ti subtʼan i tsiʼ tʼoxbeyob chuqui añob i chaʼan jiñi hermanojob añoʼ bʌ ti Judea (Hech. 11:29, 30).

13. ¿Chuqui ti bendición tac tsiʼ tajayob jiñi hermanojob cheʼ bʌ tsaʼ ñumi wiʼñal?

¹³ ¿Chuqui ti bendición tac tsiʼ tajayob jiñi xñoptʼañob ti jimbʌ ora? Jiñi tsaʼ bʌ coltʌntiyob tsiʼ qʼueleyob chaʼan Jehová wolʌch i coltañob (Mat. 6:31-33). I tajol ñumen lʌcʼʌl tsiʼ yubiyob i bʌ tiʼ tojlel jiñi hermanojob tsaʼ bʌ i chaʼleyob coltaya. Cheʼ jaʼel, jiñi tsaʼ bʌ i yʌcʼʌyob i donación o yambʌ bajcheʼ tsiʼ chaʼleyob coltaya tijicña tsiʼ yubiyob (Hech. 20:35). Jehová tsiʼ yʌqʼueyob i bendición come tsaʼʌch i lʌtʼʌyob.

14. ¿Chuqui tsiʼ chaʼle Bernabé yicʼot Pablo, i chuqui tsaʼ ujti? (Hechos 14:21, 22).

¹⁴ Jiñi xñoptʼañob cheʼ ti ñaxam bʌ siglo tsaʼʌch i wen tajayob i tsʼaʼlentel, an i tajol mach pijtʌbilic i chaʼañob. Laʼ laj qʼuel tsaʼ bʌ ujti tiʼ tojlel Bernabé yicʼot Pablo cheʼ bʌ woliyob ti subtʼan ti Listra. Ti ñaxan, wen  tsaʼ ñʌchʼtʌntiyob. Pero ti wiʼil, jiñi muʼ bʌ i tsʼaʼleñob Pablo yicʼot Bernabé tsiʼ yʌcʼʌyob chaʼan jiñi lac piʼʌlob miʼ yʌcʼob i bʌ tiʼ contra, i an tsaʼ bʌ i juluyob ti xajlel Pablo i tsiʼ ñaʼtayob chaʼan tsaʼix chʌmi (Hech. 14:19). Pero Bernabé yicʼot Pablo an baqui yambʌ tsaʼ majliyob i tsiʼ bej chaʼleyob subtʼan. ¿Chuqui tsaʼ ujti? Tsaʼ sujtiyob «ti xcʌntʼan yonlel lac piʼʌlob» i tsiʼ pʼʌtʼesayob jiñi hermanojob tiʼ tʼan yicʼot tiʼ yejemplo (pejcan Hechos 14:21, 22). Bernabé yicʼot Pablo maʼañic tsaʼ lujbʼayob anquese tsiʼ tajayob i tsʼaʼlentel, i jiñi tsaʼʌch i colta cabʌl lac piʼʌlob. Mi joñonla jaʼel maʼañic mi laj cʼuñʼan i mi lac bej melben i yeʼtel Jehová, mi caj lac taj cabʌl bendición.

15. ¿Chuqui maʼ cʌn tiʼ tojlel jiñi hermano Alexander Macmillan?

¹⁵ Cheʼ bʌ anto yom chaʼan miʼ cʼotel 1914, jiñi i wiñicob Jehová an chuqui tsiʼ wen pijtayob. Juntiquil jiñʌch jiñi hermano Alexander Macmillan. Ti jimbʌ ora tsiʼ ñaʼta jaʼel chaʼan muqʼuix caj i majlel ti panchan. Ti jumpʼejl discurso tsaʼ bʌ i ñusa cheʼ ti septiembre ti 1914, tsiʼ yʌlʌ: «Iliyi tajol jiñʌch jiñi cojix bʌ discurso woli bʌ c ñusan». Pero mach cheʼic tsaʼ ujti. Ti wiʼil, tiʼ tsʼijbu: «Tajol an tsaʼ bʌ lac ñaʼta chaʼan muqʼuix caj lac majlel ti panchan». I tsiʼ bej alʌ: «I wentʌlel bʌ yom mi lac mel jiñʌch cheʼ mi lac bej melben i yeʼtel lac Yum». I jiñʌch tsaʼ bʌ i mele. Tsiʼ chʌn chaʼle subtʼan, tsiʼ colta cabʌl hermanojob añoʼ bʌ ti cárcel tiʼ caj i xucʼtʌlelob i maʼañic tsiʼ cʌyʌ tempa bʌ anquese wen ñoxix. Tsiʼ cʼʌñʌ ti wen jiñi tiempo cheʼ bʌ wolito i pijtan i majtan. ¿Bajcheʼ tsiʼ colta jiñi? Ti 1966, cheʼ bʌ tsʼitaʼ jax yom chaʼan miʼ chʌmel, tiʼ tsʼijbu: «Ili ora wen pʼʌtʌlʌch c ñopoñel cheʼ bajcheʼ cʼʌlʌl ti wajali». Tiʼ sujm, tsiʼ cʌybeyonla jumpʼejl wem bʌ ejemplo, ñumento jiñi wajalix bʌ cajel i pijtañob chaʼan miʼ jilel ili jontol bʌ pañimil (Heb. 13:7).

16. ¿Chuqui ti wocol tsiʼ taja jiñi hermano Jennings yicʼot i yijñam? (Santiago 4:14).

¹⁶ Cabʌl i wiñicob Jehová mach bʌ pijtʌbilobic i chaʼan miʼ cʼamʼañob. Jumpʼejl ejemplo, jiñi hermano Herbert Jennings tsiʼ yʌlʌ tiʼ experiencia chaʼan wen tijicña yicʼot i yijñam cheʼ añob bajcheʼ misionero ti Ghana. b Pero ti wiʼil tsaʼ tajbenti jumpʼejl cʼamʌjel. Jiñi hermano Jennings tsiʼ yʌlʌ chaʼan jiñi tsaʼ bʌ i ñusayob cheʼʌch bajcheʼ miʼ yʌl ti Santiago 4:14 (pejcan) baqui miʼ yʌl chaʼan mach la cujilic chuqui mi caj i yujtel ijcʼʌl. Tiʼ tsʼijbu: «Cujil lojon chaʼan jiñʌch woli bʌ lon c ñusan i tsaʼ c chajpa lojon c bʌ chaʼan mi lon j cʌy Ghana yicʼot jiñi lon camigojob, i mic chaʼ majlel lon ti Canadá [chaʼan mic chʼʌmeʼ jiñi tsʼac]». Jehová tsiʼ colta jiñi hermano Jennings yicʼot i yijñam chaʼan miʼ bej melbeñob i yeʼtel anquese wen wocol woliʼ ñusañob.

17. ¿Bajcheʼ an i colta yambʌ hermanojob i yejemplo jiñi hermano Jennings?

¹⁷ Jiñi tsaʼ bʌ i yʌlʌ jiñi hermano Jennings tiʼ experiencia añʌch i wen colta yañoʼ bʌ. Juntiquil hermana tiʼ tsʼijbu: «Maʼañic yambʌ tema wen cʼotem bʌ tic pusicʼal […]. Cheʼ bʌ tsaʼ j qʼuele chaʼan jiñi hermano Jennings tsiʼ cʌyʌ jiñi i privilegio chaʼan miʼ tsʼʌcan i bʌ tsiʼ coltayon chaʼan pʼisbil jach bajcheʼ yilal mij qʼuel jiñi woli bʌ c ñusan». Yambʌ hermano tiʼ tsʼijbu: «Ñumen ti 10 jab tsaʼ ajñiyon bajcheʼ anciano, pero tsaʼ j cʌyʌ come tsaʼ cʼamʼayon. Maʼañic j cʼʌjñibal mi  cubin c bʌ i jin chaʼan maʼañic mic mulan c pejcan jiñi experiencia tac […]. Pero tsiʼ wen coltayon cheʼ bʌ tsaʼ j qʼuele bajcheʼ tsiʼ chaʼle wersa jiñi hermano». Iliyi miʼ cʼajtesʌbeñonla chaʼan mucʼʌch i mejlel laj coltan yañoʼ bʌ cheʼ bʌ mi lac lʌtʼ jiñi wocol tac. Jin chaʼan, anquese mach cheʼic woli lac ñusan cheʼ bajcheʼ mi lac mulan, mucʼʌch i mejlel lac pʼʌtʼesan yañoʼ bʌ i mi laj coltañob i cuch (1 Ped. 5:9).

18. ¿Chuqui mi laj cʌn tiʼ tojlel jiñi hermana viuda bʌ ti Nigeria? (Qʼuele jiñi foto tac muʼ bʌ i pʌs jiñi experiencia).

¹⁸ Jiñi wocol tac bajcheʼ jiñi COVID-19 an i ticʼla cabʌl hermanojob. Jumpʼejl ejemplo, juntiquil hermana viuda bʌ ti Nigeria tsʼitaʼ jax chuqui miʼ cʼux yicʼot i taqʼuin. Ti jumpʼejl bʌ qʼuin, cheʼ bʌ cheʼ jax ya muchʼtʌl i yarroz, jiñi i chʼoc tsiʼ cʼajtibe chuqui mi caj i cʼuxob ti xinqʼuiñil. Jiñi hermana tiʼ sube chaʼan maʼañobix i taqʼuin yicʼot chuqui miʼ cʼuxob, pero yom miʼ lajiñob jiñi viuda ti Sarepta. Mi caj i chajpan jiñi cojix bʌ i yuchʼib i mi caj i ñop chaʼan Jehová mi caj i coltañob (1 R. 17:8-16). Cheʼ bʌ maxto i ñaʼtayob chuqui mi caj i cʼuxob ti xinqʼuiñil, jiñi hermanojob tsaʼ cʼoti i yʌqʼueñob i despensa. ¡Ñumen ti chaʼpʼejl semana mi caj i jalʼan jiñi bʌlñʌcʼʌl tsaʼ bʌ aqʼuentiyob! Jiñi hermana tsiʼ qʼuele chaʼan Jehová tsiʼ yubi chuqui tsiʼ yʌlʌ yicʼot i chʼoc. Tsiquil chaʼan mi mucʼʌch lac ñop ti Jehová, jiñi wocol tac miʼ mejlel i coltañonla chaʼan ñumen lʌcʼʌl mi la cubin lac bʌ tiʼ tojlel (1 Ped. 5:6, 7).

19. ¿Chuqui tsiʼ ñusa Alexéi Yershov?

¹⁹ Cabʌl hermanojob añix chaʼpʼej uxpʼejl jab caj i ñusañob jumpʼejl wocol tajol mach bʌ pijtʌbilic i chaʼañob: Jiñi tsʼaʼlentel. Laʼ laj qʼuel chuqui tsaʼ ujti tiʼ tojlel juntiquil hermano ti Rusia, Alexéi Yershov. Cheʼ bʌ tsiʼ chʼʌmʌ jaʼ ti 1994, librejobto jiñi Testigojob ti Rusia. Pero ti wiʼil, cabʌl chuqui tsaʼ qʼuextʌyi. Ti 2020, jiñi policíajob tsaʼ  ochiyob tiʼ yotot jiñi hermano Yershov i tsiʼ chʼʌmbeyob chuqui an i chaʼan. Ti wiʼil, jiñi añoʼ bʌ i yeʼtel tsiʼ jopʼbeyob i mul. I jiñi i mul chucul ti jumpʼejl video tsaʼ bʌ i chaʼle ti grabar juntiquil tsaʼ bʌ i poj pʌsʌ chaʼan yomʌch i cʌn jiñi i sujmlel. ¡Mach cheʼix yom yubil!

20. ¿Chuqui an i mele jiñi hermano Yershov chaʼan ñumen lʌcʼʌl an ti Jehová?

²⁰ ¿Am ba bajcheʼ coltʌbil i chaʼan jiñi ñusʌbil bʌ i chaʼan ili hermano? Añʌch. Ñumen lʌcʼʌlix an tiʼ tojlel Jehová. Miʼ yʌl: «Joñon quicʼot quijñam muqʼuix c ñumen chaʼlen lojon oración. Cujil chaʼan machic an quicʼot i coltaya Jehová, mach lʌjtʼic c chaʼan ili wocol». Miʼ bej al: «Am bʌ i coltayon c mʌlben (jotben) jiñi chʼijyemlel jiñʌch cheʼ mic chaʼlen ti estudiar jiñi Biblia. Mic wen ñaʼtan jiñi ejemplo tac chaʼan i wiñicob Jehová ti wajali. Ti Biblia an cabʌl relato muʼ bʌ i pʌs chucoch ñuc i cʼʌjñibal cheʼ maʼañic mi laj cʌlʌx chaʼlen pensar i mi lac ñop ti Jehová».

21. ¿Chuqui tsaʼ laj cʌñʌ ti ili estudio?

²¹ ¿Chuqui tsaʼ laj cʌñʌ ti ili estudio? Chaʼan Jehová chajpʌbil tiʼ pejtelel ora chaʼan miʼ coltañonla mi mucʼʌch lac ñop tiʼ tojlel, anquese mach la cujilic chuqui ti wocol miʼ mejlel lac waʼ taj. Cheʼ bajcheʼ miʼ yʌl jiñi texto baqui chucul ili estudio, «miʼ taj cabʌl wocol jini toj bʌ. Lac Yum miʼ yʌcʼ ti colel tiʼ pejtelel i wocol» (Sal. 34:19). Jin chaʼan, laʼ la cʌcʼ lac ñaʼtʌbal ti jiñi i pʼʌtʌlel Jehová chaʼan miʼ mejlel i coltañonla, i mach jiñic ti jiñi wocol tac. Cheʼ bajcheʼ jiñi, mi caj i mejlel la cʌl tsaʼ bʌ i yʌlʌ jiñi apóstol Pablo: «An c pʼʌtʌlel chaʼan chuqui jach mic mel wocolix i yʌlʌ jiñi muʼ bʌ i yʌqʼueñon c pʼʌtʌlel» (Filip. 4:13).