1. ¿Bajcheʼ tsiʼ pʌsʌ juntiquil chʼiton chaʼan mucʼʌch i ñop chaʼan mi caj i chaʼ chʼojyel jiñi chʌmeñoʼ bʌ?

 JUNTIQUIL chʼiton i cʼabaʼ Matthew an tsʌts bʌ i cʼamʌjel i mach junsujtelic jach an chaʼlenti ti operar. Cheʼ bʌ siete i jabilel an chuqui tsaʼ ujti cheʼ bʌ woli (choncol) i qʼuel jiñi Broadcasting yicʼot i familia. Cheʼ bʌ wolix i yujtel majlel jiñi Broadcasting, tsiʼ qʼueleyob jumpʼejl cʼay baqui miʼ loqʼuelob jiñi hermanojob woli bʌ (yʌquel bʌ) i pijtañob jiñi chʌmeñoʼ bʌ i chaʼan. b Cheʼ bʌ tsaʼ ujti, Matthew tsiʼ chucbe i cʼʌb i papá yicʼot i mamá i tiʼ subeyob: «Mamá, papá, ¿tsaʼ ba laʼ qʼuele? Mi tsaʼ chʌmiyon mucʼʌch caj c chaʼ cuxtʌyel. Muʼto laʼ pijtañon. Mach laʼ pensarin». ¿Bajcheʼ cʼamel i tijicñʌyel maʼ wʌl jiñi i papá yicʼot i mamá cheʼ bʌ tsiʼ qʼueleyob bajcheʼ cʼamel i ñopoñel jiñi chʼiton? Matthew yujil chaʼan i sujmʌch chaʼan mi caj i chaʼ chʼojyel jiñi chʌmeñoʼ bʌ.

2, 3. ¿Chucoch yomʌch mi lac wen ñaʼtan jiñi pijtaya chaʼan mi caj i chaʼ chʼojyel chʌmeñoʼ bʌ?

² Yomʌch mi lac chʌcʌ locʼsʌben i yorajlel chaʼan mi lac wen ñaʼtan jiñi chaʼ chʼojyel (Juan 5:28, 29). ¿Chucoch? Come mach la cujilic chuqui miʼ mejlel ti waʼ ujtel. Tajol mi lac taj tsʌts bʌ cʼamʌjel o an majqui miʼ chʌmel lac chaʼan (Ec. 9:11, 12; Sant. 4:13, 14). Jiñi lac pijtaya miʼ mejlel i coltañonla lac lʌtʼ jiñi wocol tac (1 Tes. 4:13). Jiñi Biblia miʼ yʌl chaʼan Jehová wen i cʌñʌyonla i miʼ wen cʼuxbiñonla (Luc. 12:7). Cheʼʌch mi caj i chaʼ cuxtesañonla cheʼ bajcheʼ yilalonla ti ñaxan come wen i cʌñʌyonla. I miʼ subeñonla chaʼan mi lac mejlel ti chumtʌl tiʼ pejtelel ora come miʼ wen cʼuxbiñonla. Muʼto i chaʼ cuxtesañonla mi tsaʼ chʌmiyonla.

 ³ Ti ili estudio mi caj laj qʼuel chucoch mucʼʌch lac ñop chaʼan mi caj i chaʼ chʼojyelob jiñi chʌmeñoʼ bʌ. Cheʼ jaʼel, mi caj i pʼʌtʼan jiñi lac ñopoñel cheʼ bʌ mi laj qʼuel jiñi relato baqui loqʼuem jiñi tʼan baqui chucul ili estudio: «Jiñi a weran mi caj i chaʼ cuxtʌyel» (Juan 11:23). Ti wiʼil, mi caj laj qʼuel chuqui miʼ mejlel lac mel chaʼan mi lac ñumen ñop ili pijtaya.

4. ¿Chuqui yom la cujil chaʼan mi lac ñop jiñi muʼ bʌ lac subentel? Alʌ jumpʼejl ejemplo.

⁴ Chaʼan mi lac ñop chuqui mi lac subentel, yom la cujil mi jiñi tsaʼ bʌ i yʌlʌ yomʌch i tsʼʌctesan yicʼot mi añʌch i pʼʌtʌlel o mucʼʌch i mejlel i mel. Laʼcu lac ñaʼtan chaʼan miʼ jejmel la cotot tiʼ caj jiñi icʼ jaʼal, i juntiquil la camigo miʼ subeñonla: «Mi caj j coltañet a chaʼ mel (pʌt) a wotot». La cujil chaʼan i sujmʌch woli bʌ i yʌl yicʼot yomʌch i coltañonla. Cheʼ jaʼel, la cujil chaʼan mucʼʌch i mejlel come yujilʌch mel otot yicʼot añʌch i yeʼtijib tac. Jin chaʼan mi lac ñop chuqui miʼ subeñonla. ¿Chucoch miʼ mejlel la cʌl chaʼan mi caj i chaʼ chʼojyelob jiñi chʌmeñoʼ bʌ? ¿Yomʌch ba i mel (chaʼlen) Dios iliyi yicʼot añʌch ba i pʼʌtʌlel?

5, 6. ¿Chucoch mi lac ñop chaʼan Jehová yomʌch i chaʼ cuxtesan jiñi chʌmeñoʼ bʌ?

⁵ ¿Yomʌch ba i chaʼ cuxtesan chʌmeñoʼ bʌ Jehová? Yomʌch. Cheʼ bʌ tsaʼ tsʼijbunti jiñi Biblia tsiʼ yʌcʼʌ chaʼan miʼ tajtʌl ti tʼan iliyi (Is. 26:19; Os. 13:14, TNM; Apoc. 20:11-13). I Jehová mucʼʌch i tsʼʌctesan chuqui miʼ yʌl (Jos. 23:14). Tiʼ sujm, yomʌch i chaʼ cuxtesan jiñi chʌmeñoʼ bʌ. ¿Chucoch mi la cʌl jiñi?

⁶ Laʼcu lac ñaʼtan tsaʼ bʌ i yʌlʌ Job. Mucʼʌch i ñop chaʼan, mi tsaʼ chʌmi, Jehová mi caj i chaʼ cuxtesan (Job 14:14, 15). I jiñʌch bej yom bʌ Jehová tiʼ tojlel jiñi i wiñicob tsaʼix bʌ chʌmiyob. Yom i chaʼ cuxtesañob i cʼocʼ yicʼot tijicña miʼ chumtʌlob. ¿I chuqui miʼ ñaʼtan Jehová tiʼ tojlel jiñi tsaʼix bʌ chʌmiyob i maʼañic tsaʼ mejli i cʌñob jiñi i sujmlel? Yomʌch i chaʼ cuxtesañob jaʼel (Hech. 24:15). Yom chaʼan miʼ sujtelob tiʼ yamigo i miʼ chumtʌlob tiʼ pejtelel ora (Juan 3:16). Tsiquil chaʼan Jehová yomʌch i chaʼ cuxtesan chʌmeñoʼ bʌ.

7, 8. ¿Chucoch mi lac ñop chaʼan Jehová añʌch i pʼʌtʌlel chaʼan miʼ cuxtesan jiñi chʌmeñoʼ bʌ?

⁷ ¿Am ba i pʼʌtʌlel Jehová chaʼan miʼ cuxtesan jiñi chʌmeñoʼ bʌ? Añʌch. Jiñʌch «jiñi Mach bʌ añic i pʼisol i pʼʌtʌlel» (Apoc. 1:8). Miʼ mejlel i mʌlben (jotben) pejtelel i contra, yicʼotto jiñi chʌmel (1 Cor. 15:26). Iliyi miʼ chʼejlʼesañonla yicʼot miʼ yʌqʼueñonla lac tijicñʌyel. Laʼ laj qʼuel tsaʼ bʌ ujti tiʼ tojlel jiñi hermana Emma Arnold. Jiñi hermana yicʼot i familia tsiʼ ñusayob tsʌts tac bʌ wocol cheʼ ti Segunda Guerra Mundial. Chaʼan miʼ yʌqʼuen i tijicñʌyel jiñi i yixicʼal tiʼ caj tsaʼ chʌmi cabʌl i familia yaʼ ti campos de concentración chaʼan nazijob, tsiʼ yʌlʌ: «Mi jiñi chʌmeñoʼ bʌ maʼañic baʼ ora miʼ mejlelob ti chaʼ cuxtʌyel yom i yʌl chaʼan jiñi chʌmel ñumen pʼʌtʌl, pero mach cheʼiqui». Maʼañic majqui ñumen pʼʌtʌl bajcheʼ Jehová. Jiñʌch tsiʼ yʌqʼueyonla laj cuxtʌlel, jin chaʼan miʼ mejlel i chaʼ cuxtesan jiñi chʌmeñoʼ bʌ.

⁸ Jehová maʼañic chuqui miʼ ñajʌyel i chaʼan, jiñʌch yambʌ muʼ bʌ i pʌsbeñonla chaʼan mucʼʌch i mejlel i chaʼ cuxtesan jiñi chʌmeñoʼ bʌ. Jiñi Biblia miʼ yʌl chaʼan miʼ pejcan tiʼ cʼabaʼ jujumpʼejl ecʼ (Is. 40:26). Jehová cʼajal i chaʼan pejtelel jiñi chʌmeñoʼ bʌ (Job 14:13; Luc. 20:37, 38). Luʼ cʼajal i chaʼan bajcheʼ yilalob jiñi muʼ bʌ caj  i chaʼ chʼojyelob, chuqui tac tsiʼ ñusayob yicʼot chuqui tac añob tiʼ ñaʼtʌbal.

9. ¿Chucoch maʼ ñop jiñi chaʼ chʼojyel?

⁹ Cheʼ bajcheʼ tsaʼix laj qʼuele, miʼ mejlel lac ñop chaʼan Jehová mucʼʌch caj i chaʼ cuxtesan jiñi chʌmeñoʼ bʌ come la cujil chaʼan yomʌch i mel yicʼot añʌch i pʼʌtʌlel. I añix i mele iliyi, jin chaʼan la cujil chaʼan mucʼʌch caj i tsʼʌctesan. Ti wajali, Jehová tsiʼ yʌqʼue i pʼʌtʌlel Jesucristo yicʼot yambʌ wiñicob chaʼan miʼ cuxtesañob chʌmeñoʼ bʌ. Laʼ laj qʼuel jumpʼejl relato muʼ bʌ i pʌs chaʼan Jesús tsiʼ chaʼ cuxtesa juntiquil i yamigo. Mi lac taj ti Juan capítulo 11.

10. ¿Chuqui tsaʼ ujti cheʼ bʌ Jesús mach yaʼic an ti Betania, i chuqui tsiʼ mele? (Juan 11:1-3).

¹⁰ (Pejcan Juan 11:1-3). Jesús an i yamigojob ti Betania: Lázaro yicʼot jiñi chaʼtiquil xchʼoc bʌ i yerañob, María yicʼot Marta (Luc. 10:38-42). Lázaro tsaʼ cʼamʼa tiʼ yujtibal majlel jiñi jabil 32, i Marta yicʼot María tsaʼ caji i wen pensariñob. Tsiʼ chocbeyob majlel tʼan Jesús, am bʌ tiʼ junwejlel jiñi Jordán, am bʌ chaʼpʼejl qʼuin i ñajtlel (Juan 10:40). Pero cheʼ bʌ Jesús tsiʼ yubi iliyi, Lázaro tsaʼix chʌmi. Anquese yujil chaʼan Lázaro tsaʼix chʌmi, tsaʼto cʌyle yambʌ chaʼpʼejl qʼuin yaʼ baqui an. Jin chaʼan, cheʼ bʌ tsaʼ cʼoti ti Betania chʌmpʼejlix qʼuin i chʌmel Lázaro. Jesús yom i mel junchajp muʼ bʌ caj i coltan i yamigojob yicʼot mi caj i yʌqʼuen i ñuclel Jehová (Juan 11:4, 6, 11, 17).

11. ¿Chuqui mi laj cʌn ti ili relato?

¹¹ ¿Chuqui mi laj cʌn ti ili relato? Cheʼ bʌ Marta yicʼot María tsiʼ chocbeyob majlel tʼan Jesús, maʼañic tiʼ subeyob chaʼan miʼ cʼotel ti Betania. Tsaʼ jach i subeyob chaʼan cʼam jiñi i yamigo (Juan 11:3). Cheʼic yom, Jesús tsaʼ mejli i chaʼ cuxtesan Lázaro anquese ñajt an. Pero tsaʼto majli cʼʌlʌl ti Betania chaʼan miʼ yajñel yicʼot jiñi i yamigajob, María yicʼot Marta. ¿Am ba juntiquil a wamigo yomʌch bʌ i coltañet anquese maʼañic maʼ cʼajtiben? Mi añʌch, a wujil chaʼan mi caj i coltañet cheʼ bʌ an wocol (Pr. 17:17). Mi mucʼʌch lac lajin Jesús, weñʌch bʌ amigojonla. Laʼ lac chaʼ qʼuel jiñi relato chaʼan mi laj qʼuel chuqui tsaʼ ujti ti wiʼil.

12. ¿Chuqui tsaʼ subenti Marta, i chucoch tsaʼ mejli i ñop chaʼan mucʼʌch caj i tsʼʌctiyel? (Juan 11:23-26).

¹² (Pejcan Juan 11:23-26). Marta ti ora tsaʼ majli i taj Jesús cheʼ bʌ tsiʼ yubi chaʼan lʌcʼʌlix an ti Betania. Tiʼ sube: «C Yum, cheʼ wʌʼic añet, maʼañic tsaʼ chʌmi jiñi queran» (Juan 11:21). I sujmʌch, cheʼ yomiqui tsaʼ mejli i lajmesan Lázaro, pero an chuqui ñumen ñuc bʌ yom i mel. Jesús tiʼ sube Marta: «Jiñi a weran mi caj i chaʼ cuxtʌyel». Cheʼ jaʼel, chaʼan miʼ pʼʌtʼesʌben i ñopoñel, tiʼ sube: «Joñoñʌch jiñi chaʼ chʼojyel yicʼot jiñi cuxtʌlel». Cheʼʌchi, Jehová tsiʼ yʌqʼue i pʼʌtʌlel Jesús chaʼan miʼ chaʼ cuxtesan chʌmeñoʼ bʌ. Ti jimbʌ ora, Jesús tsaʼix i chaʼ cuxtesa juntiquil xchʼoc yicʼot juntiquil chʼiton, tajol ti jin  jach bʌ qʼuin cheʼ bʌ tsaʼ chʌmiyob (Luc. 7:11-15; 8:49-55). Pero ¿muʼ ba caj i mejlel i chaʼ cuxtesan juntiquil chʌmpʼejlix bʌ qʼuin i chʌmel yicʼot wolix bʌ i cajel ti ocʼmʌn?

13. Cheʼ bajcheʼ miʼ yʌl Juan 11:32-35, ¿chuqui tsiʼ mele Jesús cheʼ bʌ tsiʼ qʼuele ti uqʼuel María yicʼot jiñi yañoʼ bʌ? (Qʼuele jaʼel jiñi dibujo).

¹³ (Pejcan Juan 11:32-35). Laʼcu lac ñaʼtan ili woli bʌ ti ujtel. María, jiñi yambʌ i yeran Lázaro, miʼ lʌcʼtesan i bʌ baʼan Jesús i jin jach miʼ yʌl jaʼel jiñi tsaʼ bʌ i yʌlʌ Marta: «C Yum, cheʼ wʌʼic añet, maʼañic tsaʼ chʌmi jiñi queran». María yicʼot jiñi yañoʼ bʌ wen chʼijyemob. Jesús tsiʼ yubi i chʼijyemlel jaʼel cheʼ bʌ tsiʼ qʼueleyob ti uqʼuel. Tsaʼto caji ti uqʼuel cheʼ bʌ tsiʼ qʼuelbe i wocol i yamigojob. Yujil chaʼan wen cʼuxʌch mi la cubin cheʼ bʌ an majqui miʼ chʌmel lac chaʼan i yomob i jisan lac chʼijyemlel.

14. ¿Chuqui miʼ pʌsbeñonla tiʼ tojlel Jehová jiñi tsaʼ bʌ i mele Jesús cheʼ bʌ tsiʼ qʼuele ti uqʼuel María?

¹⁴ Jiñi tsaʼ bʌ i mele Jesús cheʼ bʌ tsiʼ qʼuele ti uqʼuel María miʼ pʌsbeñonla chaʼan Jehová juntiquilʌch Dios muʼ bʌ i pʼuntañonla. ¿Chucoch mi la cʌl iliyi? Come, cheʼ bajcheʼ tsaʼ laj qʼuele yaʼ ti yambʌ estudio, Jesús miʼ pʌs chuqui miʼ ñaʼtan jiñi i Tat yicʼot bajcheʼ yubil miʼ yubin (Juan 12:45). Jin chaʼan, cheʼ bʌ mi lac pejcan chaʼan Jesús tsiʼ chaʼle uqʼuel cheʼ bʌ tsiʼ qʼuelbe i wocol i yamigojob, la cujil chaʼan Jehová cʼux miʼ yubin jaʼel cheʼ bʌ miʼ qʼuel lac wocol (Sal. 56:8). ¿Mach ba muqʼuic i yʌqʼueñonla lac mulan lac ñumen lʌcʼtesan lac bʌ tiʼ tojlel Jehová iliyi?

15. Cheʼ bajcheʼ miʼ yʌl Juan 11:41-44, ¿chuqui tsaʼ ujti yaʼ baqui mucul Lázaro? (Qʼuele jaʼel jiñi dibujo).

¹⁵ (Pejcan Juan 11:41-44). Jesús tsaʼ cʼoti yaʼ baqui mucul Lázaro i tsiʼ yʌlʌ chaʼan miʼ locʼsʌntel jiñi xajlel am bʌ yaʼ tiʼ tiʼ. Pero Marta tiʼ sube chaʼan tajol tuwix. Jesús tiʼ sube: «¿Maʼañic ba tsaʼ c subeyet chaʼan mi mucʼʌch a ñop mi caj i mejlel a qʼuel i ñuclel Dios?» (Juan 11:39, 40). Cheʼ jiñi, Jesús miʼ letsan i wut ti panchan i miʼ mel jumpʼejl oración tiʼ tojel i wut jiñi yaʼ bʌ añob. Yom i yʌqʼuen i ñuclel Jehová chaʼan jiñi muʼ bʌ caj i mel.  Cheʼ jiñi ti cʼam bʌ tʼan miʼ yʌl: «¡Lázaro, loqʼuen tilel!». I Lázaro miʼ loqʼuel. Jesús tsaʼ ujti i mel jumpʼejl ñuc bʌ milagro (qʼuele jiñi nota chaʼan estudio ti Juan 11:17).

16. ¿Bajcheʼ miʼ coltañonla jiñi relato am bʌ ti Juan capítulo 11 chaʼan mi lac ñumen ñop jiñi chaʼ chʼojyel?

¹⁶ Jiñi relato am bʌ ti Juan capítulo 11 miʼ coltañonla lac ñumen ñop ti jiñi chaʼ chʼojyel. Laʼ laj cʼajtesan chaʼan Jesús tiʼ sube Marta: «Jiñi a weran mi caj i chaʼ cuxtʌyel» (Juan 11:23). Cheʼ bajcheʼ Jehová, Jesús yomʌch yicʼot mucʼʌch i mejlel i tsʼʌctesan iliyi. Cheʼ tsiʼ chaʼle uqʼuel miʼ pʌs chaʼan yomʌch i jisan jiñi chʌmel yicʼot jiñi chʼijyemlel. Cheʼ bʌ Jesús tsiʼ cuxtesa Lázaro, tsiʼ chaʼ pʌsʌ chaʼan añʌch i pʼʌtʌlel chaʼan miʼ cuxtesan jiñi chʌmeñoʼ bʌ. Laʼcu lac ñaʼtan tsaʼ bʌ i cʼajtesʌbe Marta: «¿Maʼañic ba tsaʼ c subeyet chaʼan mi mucʼʌch a ñop mi caj i mejlel a qʼuel i ñuclel Dios?» (Juan 11:40). Cabʌl chuqui miʼ pʌsbeñonla chaʼan yomʌch mi lac ñop chaʼan Jehová mi caj i chaʼ cuxtesan jiñi chʌmeñoʼ bʌ. Pero ¿chuqui miʼ mejlel lac mel chaʼan mi lac ñumen ñop iliyi?

17. ¿Chuqui yom mi lac mel cheʼ bʌ mi lac pejcan jiñi relato tac chaʼan bʌ chaʼ chʼojyel?

¹⁷ Laʼ lac pejcan yicʼot laʼ lac wen ñaʼtan jiñi chaʼ chʼojyel tsaʼ bʌ ujti ti wajali. Yaʼ ti Biblia mi lac taj 8 relato chaʼan tsaʼ bʌ chaʼ chʼojyesʌntiyob ti wajali. c ¿Muʼ ba i mejlel lac chaʼlen ti estudiar jujumpʼejl? Cheʼ bʌ mi lac mel, laʼ laj cʼajtesan chaʼan jiñobʌch wiñicob, xʼixicob yicʼot alobob tsaʼʌch bʌ chumleyob ti wajali. Laʼ lac sʌclan chuqui miʼ mejlel laj cʌn i laʼ lac ñaʼtan bajcheʼ miʼ pʌsbeñonla chaʼan Dios yom i mucʼʌch i mejlel i chaʼ cuxtesan jiñi chʌmeñoʼ bʌ. I laʼ lac ñaʼtan jiñi chaʼ chʼojyel ñumen ñuc bʌ i cʼʌjñibal, jiñi i chaʼan bʌ Jesús. Yonlel lac piʼʌlob tsiʼ qʼueleyob cheʼ bʌ tsaʼix chaʼ chʼojyesʌnti, ili  chaʼ chʼojyel yaʼʌch baqui chucul lac ñopoñel (1 Cor. 15:3-6, 20-22).

18. ¿Bajcheʼ miʼ mejlel laj cʼʌn jiñi cʼay tac muʼ bʌ i taj ti tʼan jiñi chaʼ chʼojyel? (Qʼuele jaʼel jiñi nota).

¹⁸ Laʼ laj cʼʌn jiñi «cʼay tac chaʼan bʌ chʼujutesaya» muʼ bʌ i taj ti tʼan jiñi chaʼ chʼojyel (Efes. 5:19). d Ili cʼay tac miʼ pʼʌtʼesan lac ñopoñel ti jiñi chaʼ chʼojyel, i miʼ coltañonla lac ñumen ñop. Jin chaʼan, weñʌch cheʼ mi lac ñʌchʼtan, mi laj cʼʌyin yicʼot mi la cʌl chuqui tac miʼ pʌsbeñonla yaʼ ti lac chʼujutesaya ti familia. Laʼ laj cʌy ti lac jol yicʼot ti lac pusicʼal jiñi cʼay tac. Cheʼ bajcheʼ jiñi, jiñi i yespíritu Jehová mi caj i coltañonla laj cʼajtesan cheʼ bʌ mi lac ñusan jumpʼejl wocol o an majqui miʼ chʌmel lac chaʼan. Ili cʼay tac mi caj i pʼʌtʼesan yicʼot i ñuqʼuesan lac pusicʼal.

19. ¿Bajcheʼ miʼ mejlel lac ñaʼtan bajcheʼ yilal mi caj i chaʼ chʼojyelob jiñi chʌmeñoʼ bʌ? (Qʼuele jiñi recuadro « ¿Chuqui a wom a cʼajtiben?»).

¹⁹ Laʼ laj qʼuel lac bʌ yaʼ ti tsijiʼ bʌ pañimil. Jehová tsiʼ meleyonla chaʼan miʼ mejlel lac mel jiñi. Juntiquil hermana miʼ yʌl: «Mic wen ñaʼtan chaʼan yaʼix añon ti Paraíso i mi cubiben i yujtsʼil jiñi ñichteʼ tac». Laʼ lac wen ñaʼtan bajcheʼ miʼ cajel cheʼ bʌ mi laj cʌn jiñi i wiñicob Dios ti wajali. ¿Majqui jiñi a wom bʌ a ñumen cʌn? ¿Chuqui mi caj a cʼajtiben? Cheʼ jaʼel, laʼ lac ñaʼtan bajcheʼ miʼ cajel cheʼ bʌ mi laj qʼuel jiñi chʌmeñoʼ bʌ lac chaʼan. Ñaʼtan cheʼ bʌ maʼ pejcañob, cheʼ bʌ maʼ mecʼob yicʼot jiñi tijicñʌyel muʼ bʌ caj a wubin cheʼ bʌ maʼ chaʼ qʼuelob.

20. ¿Chuqui yom mi lac bej mel?

²⁰ Mi lac wen qʼuel ti ñuc cheʼ Jehová miʼ subeñonla chaʼan mi caj i chaʼ chʼojyesan jiñi chʌmeñoʼ bʌ. La cujil chaʼan mucʼʌch caj i tsʼʌctesan come yomʌch i mucʼʌch i mejlel i mel. Lajal bajcheʼ miʼ subeñonla ti jujuntiquil: «Mi caj i chaʼ chʼojyelob jiñi muʼ bʌ a cʼuxbiñob». Laʼ lac bej pʼʌtʼesan lac ñopoñel ti jiñi chaʼ chʼojyel. Mi mucʼʌch lac mel, mi caj lac ñumen lʌcʼtesan lac bʌ ti Jehová, jiñi tsaʼ bʌ i yʌqʼueyonla ili utsʼatax bʌ pijtaya.