1. ¿Bajcheʼ miʼ yubiñob i bʌ chaʼtiquil uxtiquil cheʼ miʼ loqʼuelob ti subtʼan? (Qʼuele jaʼel jiñi foto).

 JIÑI muʼ bʌ lac melben i yeʼtel Jehová mi lac wen mulan subtʼan come mi laj cʼuxbin Jehová i la com chaʼan jiñi lac piʼʌlob miʼ cʼotel i cʌñob. Cabʌl hermanojob miʼ wen mulañob subtʼan, pero an wocol bʌ miʼ yubiñob. ¿Chucoch? Come an mucʼoʼ bʌ ti quisin i mach mejlobic ti tʼan miʼ yubiñob. Yambʌ maʼañic miʼ mulañob majlel ti otot tac cheʼ mach pʌybilobic, ame mach yomic jiñi i yum otot chaʼan miʼ julaʼtʌntel. I an muʼ bʌ i ñaʼtañob chaʼan maʼañic mi caj i ñʌchʼtʌntelob. Tiʼ pejtelelob miʼ cʼuxbiñob Jehová, pero wocolʌch miʼ yubiñob chaʼan miʼ subeñob wen tʼan jiñi mach bʌ i cʌñʌyobic. Yujilob chaʼan wen ñuc i cʼʌjñibal ili eʼtel, jin chaʼan miʼ chʌn chaʼleñob subtʼan. ¡Wen tijicña miʼ yubin Jehová cheʼ miʼ qʼuel bajcheʼ miʼ chaʼleñob wersa!

2. ¿Chucoch mach yomic maʼ wubin a chʼijyemlel mi maʼañic maʼ wen ubin a tijicñʌyel ti subtʼan?

² ¿Ixcu jatet? ¿Wocol ba maʼ wubin chaʼan tijicña maʼ ñusan ti subtʼan? Mi cheʼʌchi, mach a wubin a chʼijyemlel. Cheʼ tsʼitaʼ an a bʌqʼuen tajol yom i yʌl chaʼan añʌch a pecʼlel. Tajol mach la comic chaʼan mi laj cʌlʌx qʼuejlel ti lac piʼʌlob o mach la comic  la cotsan lac bʌ ti leto (quera). Cheʼ jaʼel, tajol maʼañic mi lac mulan cheʼ maʼañic miʼ ñʌchʼtañoñobla come la com laj coltañob jiñi lac piʼʌlob. Jehová, jiñi lac Tat am bʌ ti panchan, miʼ chʼʌmbeñonla i sujm i yom i coltañonla (Is. 41:13). Ti ili estudio mi caj laj qʼuel joʼchajp muʼ bʌ i mejlel lac mel chaʼan mi lac ñumen ubin lac tijicñʌyel ti subtʼan.

TAJA A PʼɅTɅLEL TIʼ TʼAN DIOS

3. ¿Baqui tsiʼ taja i pʼʌtʌlel Jeremías chaʼan miʼ chaʼlen subtʼan?

³ Cʼʌlʌl ti wajali, jiñi i Tʼan Dios an i pʼʌtʼesa i wiñicob cheʼ bʌ yom miʼ tsʼʌctesañob jumpʼejl eʼtel wocol bʌ. Laʼ lac ñaʼtan tsaʼ bʌ ujti tiʼ tojlel jiñi xʼaltʼan Jeremías. Cheʼ bʌ Jehová tsiʼ choco majlel ti subtʼan, Jeremías tsiʼ chaʼle bʌqʼuen i tsiʼ yʌlʌ: «Mach cujilic tʼan. Maxto anic c jabilel» (Jer. 1:6). ¿Bajcheʼ tsiʼ mʌlbe jiñi i bʌqʼuen? Jiñi i tʼan Dios tsiʼ yʌqʼue i pʼʌtʌlel, i tsaʼto i yʌlʌ: «Tic pusicʼal tsaʼ caji cubin i tʼan cheʼ bajcheʼ cʼajc woli bʌ ti lejmel. Cheʼ jini maʼanic tsaʼ mejliyon ti ñʌjchʼel. Wersa tsac subu ti jamʌl» (Jer. 20:8, 9). Wocolʌch baqui miʼ chaʼlen subtʼan Jeremías, pero jiñi yom bʌ miʼ sub tsiʼ yʌqʼue i pʼʌtʌlel chaʼan miʼ tsʼʌctesan i yeʼtel.

4. ¿Chuqui mi lac taj cheʼ bʌ mi lac pejcan jiñi Biblia yicʼot mi lac wen ñaʼtan? (Colosenses 1:9, 10).

⁴ Ili ora jiñi i Tʼan Dios mucʼʌch i pʼʌtʼesañonla jaʼel. Cheʼ bʌ jiñi apóstol Pablo tiʼ tsʼijbubeyob majlel jiñi xñoptʼañob ti Colosas, tiʼ subeyob chaʼan jiñi i ñaʼtʌbalob tilem bʌ ti Jehová mi caj i coltañob chaʼan cheʼ miʼ melob «cheʼ bajcheʼ yom Jehová» i chaʼan miʼ melob «pejtelel chuqui wen» (pejcan Colosenses 1:9, 10). Junchajp chuqui wem bʌ yom melol jiñʌch jiñi subtʼan. Cheʼ bʌ mi lac pejcan jiñi Biblia i mi lac wen ñaʼtan chuqui miʼ yʌl, miʼ pʼʌtʼan lac ñopoñel ti Jehová i mi lac ñumen chʼʌmben i sujm chucoch ñucʌch i cʼʌjñibal cheʼ mi lac sub jiñi wen tʼan.

5. ¿Chuqui mi caj i coltañonla lac locʼsʌben i wenlel muʼ bʌ i yʌl jiñi Biblia?

⁵ Chaʼan mi lac tajben i wenlel muʼ bʌ i yʌl jiñi Biblia, mach orajic yom mi lac pejcan, yomʌch mi la cʌqʼuen i yorajlel chaʼan mi lac wen ñaʼtan yicʼot mi lac chʼʌmben i sujm muʼ bʌ i yʌl. ¿Chuqui miʼ mejlel lac mel mi tsaʼ lac taja jumpʼejl texto maʼañic bʌ mi lac chʼʌmben i sujm? Mach lac toʼol ñusan, laʼ lac sʌclʌben i sujmlel ti jiñi Índice de las publicaciones Watch Tower o ti jiñi Coltʌntel chaʼan estudio. Mi mucʼʌch a ñumen aqʼuen i yorajlel chaʼan maʼ  pejcan jiñi Biblia, mi caj a ñumen ñop muʼ bʌ i yʌl (1 Tes. 5:21). Cheʼ bajcheʼ jiñi mi caj a ñumen mulan a subeñob yañoʼ bʌ jiñi woli bʌ (choncol bʌ) a cʌn.

WEN CHAJPAN A BɅ CHAʼAN JIÑI SUBTʼAN

6. ¿Chucoch yomʌch mi lac wen chajpan lac bʌ chaʼan jiñi subtʼan?

⁶ Mi tsaʼ lac wen chajpa lac bʌ mach wen wocolic mi caj la cubin chaʼan mi lac subeñob wen tʼan jiñi lac piʼʌlob. Jesús tsiʼ chajpa jiñi xcʌntʼañob i chaʼan cheʼ bʌ muʼto caj i majlelob ti subtʼan (Luc. 10:1-11). Come tsaʼʌch i meleyob cheʼ bajcheʼ tsaʼ cʌntesʌntiyob, tijicña tsiʼ yubiyob chaʼan tsaʼ bʌ i meleyob ti subtʼan (Luc. 10:17).

7. ¿Bajcheʼ miʼ mejlel lac chajpan lac bʌ chaʼan jiñi subtʼan? (Qʼuele jaʼel jiñi foto).

⁷ ¿Bajcheʼ miʼ mejlel lac chajpan lac bʌ chaʼan jiñi subtʼan? Laʼ lac wen ñaʼtan bajcheʼ miʼ mejlel lac tsictesan muʼ bʌ i yʌl jiñi Biblia ti lac bajñel tʼan. Laʼ lac wʌn ñaʼtan chuqui miʼ mejlel i subeñoñobla jiñi lac piʼʌlob i bajcheʼ miʼ mejlel lac jacʼ. Cheʼ bajcheʼ jiñi, cheʼ yaʼix añonla ti subtʼan maʼañic mi caj laj cajel ti bʌqʼuen i wen jach mi caj lac chaʼlen tʼan.

8. ¿Chucoch jiñi xñoptʼañonbʌla lajalonla bajcheʼ pʼejt melbil bʌ ti lum?

⁸ Jiñi apóstol Pablo tsiʼ yʌlʌ jumpʼejl lajiya chaʼan jiñi eʼtel (troñel) muʼ bʌ lac mel. Tsiʼ yʌlʌ: «Lajalon lojon bajcheʼ pʼejt melbil bʌ ti lum am bʌ i chaʼan wen lets bʌ i tojol» (2 Cor. 4:7). ¿I chuquiyes jiñi wen lets i bʌ i tojol? Jiñʌch i subol jiñi wen tʼan chaʼan bʌ i Yumʌntel Dios (2 Cor. 4:1). I joñonla, muʼ bʌ lac sub jiñi wen tʼan, lajalonla bajcheʼ jiñi pʼejt melbil bʌ (pʌtbil bʌ) ti lum. ¿Chucoch? Cheʼ tiʼ yorajlel Pablo, jiñi xchoñoñelob miʼ chʼʌmob majlel ñuc tac bʌ i cʼʌjñibal ti pʼejt melbil bʌ ti lum, bajcheʼ bʌlñʌcʼʌl, vino o taqʼuin. Ti ili ora, Jehová an i yʌqʼueyonla chaʼan mi lac chʼʌm majlel wen lets bʌ i tojol, jiñʌch jiñi wen tʼan chaʼan bʌ i Yumʌntel. Yicʼot i coltaya mi caj i mejlel lac taj lac pʼʌtʌlel chaʼan mi lac tsʼʌctesan la queʼtel.

CʼAJTIBEN JEHOVÁ A CHʼEJLEL

9. ¿Chuqui miʼ mejlel lac mel chaʼan mi lac mʌlben lac bʌqʼuen? (Qʼuele jaʼel jiñi foto).

⁹ An i tajol miʼ mejlel lac bʌcʼñan laj contrajintel o chaʼan maʼañic mi lac ñʌchʼtʌntel. Pero ¿chuqui miʼ mejlel lac mel chaʼan jiñi lac bʌqʼuen maʼañic miʼ mʌlbeñonla? Laʼ lac  ñaʼtan jiñi oración tsaʼ bʌ i meleyob jiñi apóstolob cheʼ bʌ tsaʼ subentiyob chaʼan miʼ cʌyob subtʼan. Maʼañic tsiʼ yʌcʼʌyob chaʼan miʼ mʌlbeñob (jotbeñob) i bʌqʼuen, tsiʼ cʼajtiyob i coltʌntel ti Jehová chaʼan miʼ bej subob jiñi wen tʼan «yicʼotob i chʼejlel», i Jehová tsaʼʌch i coltayob (Hech. 4:18, 29, 31). Cheʼ bʌ mi la cubin chaʼan woliyonla (yʌquelonla) ti bʌqʼuen, laʼ laj cʼajtiben i coltaya Jehová chaʼan miʼ mejlel lac pʌsben cʼuxbiya jiñi lac piʼʌlob.

10. ¿Chuqui tac miʼ coltañonla chaʼan mi lac tsʼʌctesan jiñi lac subtʼan? (Isaías 43:10-12).

¹⁰ Jehová tiʼ sujtesayonla tiʼ Testigo (pejcan Isaías 43:10-12). Tsiʼ yʌcʼʌ i tʼan chaʼan mi caj i coltañonla chaʼan mi lac pʌs lac chʼejlel. Laʼ laj qʼuel chʌnchajp bajcheʼ miʼ coltañonla. Ñaxam bʌ, Jesús añʌch yicʼotonla cheʼ mi lac chaʼlen subtʼan (Mat. 28:18-20). I chaʼpʼejlel, Jehová tsiʼ yʌcʼʌ chaʼan jiñi i yángelob miʼ coltañoñobla (Apoc. 14:6). I yuxpʼejlel, Jehová miʼ yʌqʼueñonla chʼujul bʌ i yespíritu chaʼan miʼ coltañonla laj cʼajtesan jiñi cʌmbilix bʌ lac chaʼan (Juan 14:25, 26). I chʌmpʼejlel, Jehová miʼ yʌqʼueñonla la quermañujob chaʼan mach lac bajñelic mi la cubin lac bʌ cheʼ mi lac chaʼlen subtʼan. Tiʼ coltaya Jehová yicʼot jiñi hermanojob miʼ mejlel lac mʌlben jiñi bʌqʼuen.

LAʼ LAJ QʼUEXTAN BAJCHEʼ MI LAC CHAʼLEN SUBTʼAN I MACH LAC SɅT LAC TIJICÑɅYEL

11. ¿Chuqui miʼ mejlel a mel chaʼan maʼ ñumen tajob lac piʼʌlob? (Qʼuele jaʼel jiñi foto).

¹¹ Tajol maʼ wubin a chʼijyemlel cheʼ maʼañic maʼ taj lac piʼʌlob tiʼ yotot. Miʼ mejlel a cʼajtiben a bʌ: «¿Baqui añob? ¿Añoʼ ba tiʼ yeʼtel o ti mʌñoñel?» (Hech. 16:13). Tajol maʼ mejlel ti subtʼan ti calle. Juntiquil hermano i cʼabaʼ Joshua miʼ yʌl: «An i wen coltayon cheʼ mic sʌclan majqui mic subeñob wen tʼan cheʼ mic majlel ti mercado, ti ñuqui tienda tac yicʼot ti estacionamiento». Joshua yicʼot i yijñam, Bridget, an i qʼueleyob chaʼan miʼ ñumen tajob lac piʼʌlob cheʼ ti icʼan yicʼot ti domingo ti xinqʼuiñil (Efes. 5:15, 16).

12. ¿Bajcheʼ miʼ mejlel lac ñaʼtan muʼ bʌ i ñopob lac piʼʌlob yicʼot jiñi tema muʼ bʌ i mulañob?

¹² Cheʼ bʌ jiñi lac piʼʌlob maʼañic miʼ wen ñʌchʼtañoñobla yilal, laʼ lac ñop lac ñaʼtan chuqui muʼ bʌ i ñopob i chuqui tac ti tema yomob i ñaʼtan. Joshua yicʼot Bridget miʼ cʼʌñob  jiñi cʼajtiya muʼ bʌ i tilel ti jiñi tratado tac. Jumpʼejl ejemplo, cheʼ bʌ miʼ yʌcʼob jiñi tratado ¿Chuquiyes jiñi Biblia chaʼañet?, miʼ yʌlob: «An muʼ bʌ i ñaʼtañob chaʼan jiñi Biblia tilem ti Dios i an muʼ bʌ i yʌlob chaʼan maʼañic. Ixcu jatet, ¿chuqui maʼ ñaʼtan?». Cheʼ bajcheʼ ili miʼ mejlel i techob tʼan.

13. ¿Yaʼ ba cʌyʌl lac subtʼan ti jaytiquil miʼ ñʌchʼtañoñobla? (Proverbios 27:11).

¹³ Jiñi lac subtʼan mach yaʼic cʌyʌl ti jaytiquil miʼ ñʌchʼtañob jiñi wen tʼan. ¿Chucoch mi la cʌl bajcheʼ ili? Come jiñi ñuc bʌ i cʼʌjñibal jiñʌch cheʼ mi lac sub jiñi wen tʼan, i jiñʌch yom bʌ mi lac mel Jehová yicʼot i Yalobil (Hech. 10:42). Jin chaʼan, mach lac pensarin mi maʼañic majqui tsaʼ lac taja tiʼ yotot o mi mach yomic i ñʌchʼtañob jiñi wen tʼan. Miʼ mejlel la cubin lac tijicñʌyel come woli lac mel muʼ bʌ i mulan Jehová (pejcan Proverbios 27:11).

14. ¿Bajcheʼ yubil mi la cubin cheʼ bʌ yambʌ hermano miʼ taj juntiquil yom bʌ i ñumen cʌn jiñi Biblia?

¹⁴ Joñonla jaʼel miʼ mejlel lac taj lac tijicñʌyel cheʼ bʌ jiñi yambʌ hermanojob miʼ tajob juntiquil yom bʌ i ñumen cʌn. Jiñi Lac Tsictesʌbentel an i yʌlʌ chaʼan jiñi subtʼan lajal bajcheʼ i sʌclʌntel juntiquil alob sajtem bʌ. Cabʌlob jiñi muʼ bʌ i sʌclañob, i cheʼ bʌ miʼ tajob mach jiñic jach miʼ taj i tijicñʌyel jiñi tsaʼ bʌ i taja, tiʼ pejtelelob tijicña miʼ yubiñob. Cheʼʌch joñonla jaʼel, cheʼ mi lac chaʼlen subtʼan temel mi lac chaʼlen eʼtel. Ti lac pejtelel ñuc laj cʼʌjñibal chaʼan mi lac tajob jiñi lac piʼʌlob, i cheʼ bʌ an majqui miʼ tech majlel ti tempa bʌ ti lac pejtelel mi la cubin lac tijicñʌyel.

LAʼ LAC PɅS LAJ CʼUXBIYA

15. ¿Chuqui mi caj i coltañonla chaʼan mi lac ñumen ubin lac tijicñʌyel ti subtʼan? (Mateo 22:37-39; qʼuele jaʼel jiñi foto).

¹⁵ Mi mucʼʌch lac chʌn cʼajtesan chaʼan cheʼ bʌ mi lac chaʼlen subtʼan jiñʌch jiñi ñumen wem bʌ bajcheʼ mi lac pʌsben laj cʼuxbiya Jehová yicʼot yambʌ lac piʼʌlob, mi caj lac ñumen ubin lac tijicñʌyel (pejcan Mateo 22:37-39). Ñaʼtan bajcheʼ cʼamel mi caj i yubin i tijicñʌyel Jehová cheʼ bʌ miʼ qʼuel chaʼan woliyonla ti subtʼan. I ñaʼtan jaʼel chaʼan jiñi lac piʼʌlob wen tijicña mi caj i yubiñob cheʼ miʼ techob estudio. Mach a ñajʌtesan, pejtelel jiñi mucʼʌch bʌ i jacʼob mi caj i tajob i cuxtʌlel (Juan 6:40; 1 Tim. 4:16).

16. ¿Bajcheʼ miʼ mejlel la cubin lac tijicñʌyel ti subtʼan anquese maʼañic mi lac mejlel ti loqʼuel ti la cotot? Acʼʌ jumpʼejl ejemplo.

 ¹⁶ Mi maʼañic mi lac mejlel ti loqʼuel ti la cotot, laʼ lac ñaʼtan chuqui tac yambʌ miʼ mejlel lac mel chaʼan mi lac pʌsben laj cʼuxbiya Jehová yicʼot yambʌ lac piʼʌlob. Jiñʌch tsaʼ bʌ i meleyob Samuel yicʼot Dania ti jiñi pandemia chaʼan COVID-19. Come maʼañic tsaʼ mejliyob ti loqʼuel, tsiʼ chaʼleyob subtʼan ti teléfono, ti carta i tsiʼ yʌcʼʌyob estudio ti Zoom. Cheʼ jaʼel, Samuel tsiʼ chaʼle subtʼan yaʼ ti clínica baqui miʼ chʼʌm i tsʼac come an i chaʼan cáncer, i miʼ yʌl: «Cheʼ bʌ woli lac ñusan wocol, mi lac mejlel ti lujbʼan, mi laj cʌlʌx chaʼlen pensar i miʼ mejlel ti cʼuñʼan lac ñopoñel. Jin chaʼan ñuc i cʼʌjñibal chaʼan mi lac melben i yeʼtel Jehová come jiñʌch muʼ bʌ i yʌqʼueñonla lac tijicñʌyel». Ti jiñi bʌ ora, Dania tsaʼ yajli i maʼañic tsaʼ mejli i ñijcan i bʌ uxpʼejl uw, ti wiʼil, 6 uw tsaʼ ajñi ti silla de rueda. Dania miʼ yʌl: «Tsaʼ c chaʼle wersa bajcheʼ cʼamel mic mejlel, tsaʼ c sube wen tʼan jiñi enfermera muʼ bʌ i cʼotel i qʼuelon yicʼot jiñi muʼ bʌ i cʼotel i cʌybeñoñob c mʌñoñel. Cheʼ jaʼel, tsaʼ mejli c suben wen tʼan ti teléfono juntiquil xʼixic ñuc bʌ i yeʼtel ti jumpʼejl empresa muʼ bʌ i chon eʼtijib tac chaʼan doctorob». I sujmʌch chaʼan Samuel yicʼot Dania an cabʌl maʼañic bʌ miʼ mejlel i melob, pero tsiʼ chaʼleyob wersa i chaʼleñob subtʼan bajcheʼ cʼamel miʼ mejlelob, i jiñi tsiʼ yʌqʼueyob i tijicñʌyel.

17. ¿Chuqui yom mi lac mel chaʼan mi lac tajben i wenlel pejtelel tsaʼ bʌ laj cʌñʌ ti ili estudio?

¹⁷ Jiñi tsaʼ tac bʌ laj qʼuele mi caj i ñumen coltañonla cheʼ mucʼʌch lac laj mel. Lajal bajcheʼ mi lac chajpan bʌlñʌcʼʌl, yom mi lac luʼ otsʌben i xajb chaʼan sumuc miʼ loqʼuel. Jin chaʼan, mi mucʼʌch lac jacʼ pejtelel tsaʼ bʌ laj cʌñʌ ti ili estudio, mi caj lac mʌlben jiñi bʌqʼuen o quisin i mi caj lac ñumen ubin lac tijicñʌyel ti subtʼan.