1. ¿Chuqui miʼ pijtan Jehová ti lac tojlel?

 ¿BAJCHEʼ yubil miʼ yubin i bʌ jumpʼejl xñujpuñel cheʼ bʌ miʼ yilan pañimil (chʼocʼan) i yalobil? Wen tijicñayob i miʼ wen cʼuxbiñob jiñi alʌl. Pero miʼ pijtañob chaʼan jiñi alʌl miʼ colel majlel. Mi maʼañiqui tajol miʼ cajelob ti pensar. Cheʼʌch Jehová jaʼel, wen tijicña miʼ yubin cheʼ miʼ qʼuel chaʼan woli (choncol) lac tech laj cʌn, pero maʼañic miʼ pijtan chaʼan tiʼ pejtelel ora lajalonla bajcheʼ alʌl (1 Cor. 3:1). Yom chaʼan mi laj colel majlel i mi lac taj lac ñaʼtʌbal (1 Cor. 14:20).

2. ¿Chuqui ti cʼajtiya tac mi caj i jajqʼuel ti ili estudio?

² Ti ili estudio mi caj laj qʼuelben i jacʼbal ili cʼajtiya tac: ¿Chuqui yom i yʌl cheʼ juntiquil xñoptʼan an i ñaʼtʌbal? ¿Chuqui yom mi lac mel chaʼan mi lac taj lac ñaʼtʌbal? ¿Chucoch i cʼʌjñibalʌch lac chaʼan jiñi bʌlñʌcʼʌl i chaʼan bʌ jiñi ñucobix bʌ? ¿I chucoch mach yomic mi lac ñaʼtan chaʼan wen añix lac ñaʼtʌbal?

¿CHUQUI YOM I YɅL CHEʼ JUNTIQUIL XÑOPTʼAN AN I ÑAʼTɅBAL?

3. ¿Chuqui miʼ yʌl jiñi Biblia chaʼan jiñi xñoptʼan añix bʌ i ñaʼtʌbal?

³ Jiñi Biblia miʼ yʌl chaʼan cheʼ bʌ juntiquil xñoptʼan añix i ñaʼtʌbal lajal bajcheʼ tsaʼix i taja i colel o ñuquix. Jin chaʼan, jiñi tʼan ti griego muʼ bʌ i chaʼlentel ti traducir bajcheʼ juntiquil  muʼ bʌ i taj majlel i ñaʼtʌbal miʼ mejlel ti ajlel jaʼel chaʼan miʼ taj i colel bajcheʼ wiñic, pero iliyi mach yomic i yʌl chaʼan jiñi am bʌ i ñaʼtʌbal jin jach jiñi añobix i jabilel (Efes. 4:13). Jin chaʼan, lajal bajcheʼ jiñi alʌl mi caj i colel majlel, joñonla jaʼel yom mi laj colel majlel tiʼ chaʼan bʌ Dios chaʼan mi lac ñumen lʌcʼtesan lac bʌ tiʼ tojlel i miʼ cʼotel lac taj lac ñaʼtʌbal. Pero iliyi mach yomic i yʌl chaʼan cheʼ bʌ tsaʼix lac taja lac ñaʼtʌbal yaʼ jaxʌl mi laj cʼotel. Yomʌch mi lac bej chaʼlen wersa chaʼan mi laj colel majlel (1 Tim. 4:15). Pero ¿bajcheʼ miʼ mejlel lac ñaʼtan chaʼan juntiquil xñoptʼan añix i ñaʼtʌbal mach yʌlʌyic jaypʼejl i jabilel?

4. ¿Bajcheʼ yilalob jiñi añoʼ bʌ i ñaʼtʌbal?

⁴ Jiñi xñoptʼañob añoʼ bʌ i ñaʼtʌbal miʼ jacʼob pejtelel chuqui miʼ yʌl Jehová, mach jiñic jach miʼ melob chuqui miʼ mulañob. Anquese xmulilobʌch i tajol miʼ melob mach bʌ weñic, pero miʼ chaʼleñob wersa chaʼan miʼ ñaʼtañob chuqui miʼ mulan Jehová yicʼot miʼ melob. I jujumpʼejl qʼuin miʼ bej chaʼleñob wersa chaʼan miʼ ñumen lajiñob bajcheʼ miʼ ñaʼtan Jehová (Efes. 4:22-24). Tsaʼix i cʌñʌyob i cʼʌn jiñi principio tac yicʼot i mandar tac Jehová, chaʼan wen chuqui miʼ yajcañob i mel, jin chaʼan mach cʼʌñʌlix añob i chaʼan jumpʼejl lista baqui miʼ yʌjlel jujunchajp yom bʌ miʼ melob. I cheʼ an chuqui miʼ cʼotel i ñaʼtañob miʼ chaʼleñob wersa chaʼan cheʼʌch miʼ melob (1 Cor. 9:26, 27).

5. ¿Chuqui miʼ mejlel ti ujtel tiʼ tojlel jiñi maxto bʌ añobic i ñaʼtʌbal? (Efesios 4:14, 15).

⁵ Pero jiñi maxto bʌ añobic i ñaʼtʌbal mach wocolic miʼ yʌcʼob i bʌ ti lotintel tiʼ tojlel wiñicob muʼ bʌ i cʼʌñob yac tac yicʼot wen yujilob jax bʌ bajcheʼ miʼ lotiñoñobla. Cheʼ jaʼel miʼ ñopob tʼan mucʼ jach bʌ i tech wocol o miʼ ñopbeñob i tʼan jiñi apóstatajob (pejcan Efesios 4:14, 15). a Tajol tsʌytsʌyñayob i pusicʼal, miʼ techob wocol, orajach miʼ michʼañob o mach wocolic miʼ yajlelob ti yac tac (1 Cor. 3:3).

6. ¿Chuqui ti ejemplo miʼ coltañonla lac chʼʌmben i sujm bajcheʼ mi lac taj majlel lac ñaʼtʌbal? (Qʼuele jaʼel jiñi foto tac).

⁶ Cheʼ bajcheʼ tsaʼix laj qʼuele, chaʼan mi lac taj majlel lac ñaʼtʌbal lajal bajcheʼ woli (yʌquel) laj colel majlel. Laʼcu lac ñaʼtan tiʼ tojlel  jiñi alʌlobto bʌ, yomto miʼ cʌntʌntelob yicʼot miʼ qʼuejlelob come cabʌl chuqui maxto bʌ yujilobic. Jumpʼejl ejemplo, mi juntiquil alʌ xchʼoc mi caj i ñumel ti calle, tajol jiñi i mamá mi caj i chucben i cʼʌb chaʼan mach i bajñelic miʼ ñumel. Pero cheʼ ñuquix cajel tajol i bajñelix mi caj i ñumel, pero jiñi i mamá muʼto i suben chaʼan miʼ wen qʼuel mi mach yaʼic tilel juncojt carro cheʼ mi caj i cʼaxel ti yambʌ calle. Cheʼ ñuquix i bajñelix mi caj i mejlel i cʌntan i bʌ. I cheʼʌch miʼ yujtel jaʼel cheʼ woli lac taj majlel lac ñaʼtʌbal: Jiñi maxto bʌ wen añobic i ñaʼtʌbal muʼto i bej coltʌntelob chaʼan maʼañic miʼ tajob wocol i chaʼan wen chuqui miʼ yajcañob i mel. Pero jiñi añobix bʌ i ñaʼtʌbal miʼ chʼʌmob ti ñuc jiñi principio tac am bʌ ti Biblia cheʼ bʌ an chuqui mi caj i melob, cheʼ bajcheʼ jiñi, miʼ qʼuelob chuqui miʼ ñaʼtan Jehová i wen chuqui miʼ melob.

7. ¿Mach ba yomix miʼ coltʌntelob jiñi añobix i ñaʼtʌbal?

⁷ ¿Yom ba i yʌl jiñi chaʼan jiñi añobix bʌ i ñaʼtʌbal mach i cʼʌjñibalix miʼ coltʌntelob? Mach cheʼiqui. An i tajol yomʌch miʼ cʼajtiñob i coltʌntel. Pero jiñi maxto bʌ i tajayob i colel tajol miʼ pijtañob chaʼan miʼ subentelob chuqui yom miʼ melob, pero jiñi tsaʼix bʌ i taja i colel mi caj i chʼʌm ti ñuc muʼ bʌ i subeñob jiñi hermanojob ñumen añobix bʌ i ñaʼtʌbal i yujil chaʼan jiñʌch mi caj i bajñel ñaʼtan chuqui mi caj i mel (Gál. 6:5).

8. ¿Chucoch mi la cʌl chaʼan jiñi añobix bʌ i ñaʼtʌbal mach junlajalobic?

⁸ Lajal bajcheʼ jiñi lac piʼʌlob ñucobix bʌ mach junlajalic bajcheʼ yilalob i ñiʼ i wut, jiñi xñoptʼañob añobix bʌ i ñaʼtʌbal mach junlajalic bajcheʼ yilalob i melbal (chaʼlibal). An ñumen ora bʌ miʼ ñaʼtañob chuqui yom miʼ melob, ñumen chʼejloʼ bʌ, muʼ bʌ i ñumen tʼoxob chuqui añob i chaʼan yicʼot an muʼ bʌ i ñumen chʼʌmbeñob i sujm bajcheʼ yubil miʼ yubin i bʌ yambʌlob. Tajol chaʼtiquil hermanojob an chuqui lajal bʌ woliʼ ñusañob i yom miʼ ñaʼtañob chuqui mi caj i melob, tajol mach lajalic muʼ bʌ caj i yajcañob i mel, pero jiñi mach yomic i yʌl chaʼan mach weñic. Jin chaʼan, maʼañic juntiquil muʼ bʌ caj i yʌl chaʼan jiñi tsaʼ bʌ i mele jiñi yambʌ mach weñic, mi caj i chaʼleñob wersa chaʼan tijicña miʼ yajñelob (Rom. 14:10; 1 Cor. 1:10).

¿CHUQUI YOM MI LAC MEL CHAʼAN MI LAC TAJ LAC ÑAʼTɅBAL?

9. ¿Yom ba i yʌl chaʼan cheʼ bajcheʼ miʼ ñumel majlel jiñi jabil mi caj lac taj majlel lac ñaʼtʌbal, chucoch?

⁹ Juntiquil alʌl miʼ colel majlel cheʼ bajcheʼ miʼ ñumel majlel jiñi jabil, pero mach cheʼic miʼ yujtel tiʼ tojlel juntiquil yom bʌ i taj i ñaʼtʌbal. Jumpʼejl ejemplo, jiñi hermanojob ti Corinto tsiʼ cʌñʌyob i sujmlel, cheʼ jiñi tsiʼ chʼʌmʌyob jaʼ, tsaʼ aqʼuentiyob jiñi chʼujul bʌ espíritu i cabʌl chuqui tsiʼ cʌñʌyob tiʼ tojlel jiñi apóstol Pablo (Hech. 18:8-11). Pero cheʼ bʌ ñumeñix chaʼpʼejl uxpʼejl jab an maxto bʌ i tajayob i ñaʼtʌbal (1 Cor. 3:2). Chaʼan mach cheʼic mi la cujtel bajcheʼ jiñi, ¿chuqui miʼ mejlel lac mel?

10. ¿Chuqui yom mi lac mel chaʼan mi lac taj lac ñaʼtʌbal? (Judas 20).

¹⁰ Mi la com lac taj lac ñaʼtʌbal yomʌch mi lac chaʼlen wersa lac sʌclan, mi maʼañic mi lac mel lajal bajcheʼ bej alʌlontola la com ajñel (Pr. 1:22). Mach la comic chaʼan lajalonla bajcheʼ juntiquil ñuquix bʌ muʼto bʌ i pijtan chaʼan miʼ subentel chuqui yom miʼ mel. Jiñi la com bʌ jiñʌch cheʼ mi lac chʼʌm ti lac wenta lac mel muʼ bʌ caj i coltañonla chaʼan mi laj colel majlel (pejcan Judas 20). Mi jatet maʼ wubin chaʼan maxto a taja a ñaʼtʌbal, cʼajtiben Jehová chaʼan miʼ yʌqʼueñet jiñi i «pʼʌtʌlel yicʼot jiñi i mulʌntel i melol chuqui miʼ mulan» (Filip. 2:13).

11. ¿Bajcheʼ miʼ coltañonla Jehová chaʼan mi lac taj lac ñaʼtʌbal? (Efesios 4:11-13).

 ¹¹ Jehová maʼañic miʼ pijtan chaʼan mi lac bajñel qʼuel bajcheʼ mi caj lac taj lac ñaʼtʌbal. Tsiʼ yʌqʼueyonla xcʌnta tiñʌmeʼob yicʼot xcʌntesajob muʼ bʌ i coltañoñobla chaʼan «mi lac taj laj colel bajcheʼ juntiquil wiñic añix bʌ i ñaʼtʌbal yicʼot mi lac taj ti tsʼʌcʌl jiñi i chanlel Cristo» (pejcan Efesios 4:11-13). Cheʼ jaʼel, miʼ yʌqʼueñonla jiñi chʼujul bʌ espíritu chaʼan an lac chaʼan «i ñaʼtʌbal Cristo» (1 Cor. 2:14-16). I tsiʼ yʌcʼʌ ti tsʼijbuntel jiñi chʌmpʼejl Evangelio muʼ bʌ i coltañonla lac ñumen cʌn tsaʼ bʌ i mele Jesús cheʼ bʌ tsaʼ ajñi ila ti Lum. Mi tsaʼ lac laji bajcheʼ miʼ chaʼlen pensar, bajcheʼ miʼ chaʼlen tʼan yicʼot chuqui tac miʼ mel, mi caj lac sujtel bajcheʼ juntiquil xñoptʼan añix bʌ ñaʼtʌbal.

¿CHUCOCH I CʼɅJÑIBALɅCH LAC CHAʼAN JIÑI BɅLÑɅCʼɅL I CHAʼAN BɅ JIÑI ÑUCOBIX BɅ?

12. ¿Baqui tac bʌ «jiñi ñaxan tac bʌ cʌntesa»?

¹² Chaʼan miʼ cʼotel lac taj lac ñaʼtʌbal, mach jiñic jach yom mi laj cʌytʌl la quicʼot «jiñi ñaxan tac bʌ cʌntesa». ¿Baqui tac bʌ jiñi? Cheʼ mi lac chaʼ ñaʼtan lac bʌ cheʼ an chuqui mi lac mel, jiñi lac ñopoñel, jiñi chʼʌmjaʼ yicʼot cheʼ mi caj i chaʼ chʼojyel jiñi chʌmeñoʼ bʌ (Heb. 6:1, 2). Ti lac pejtelel yomʌch mi lac ñop ili cʌntesa tac chaʼan mi lac mejlel ti sujtel ti xcʌntʼan i chaʼan Jesús. Jin chaʼan, jiñi apóstol Pedro tsiʼ pʌsbeyob iliyi jiñi lac piʼʌlob ti jiñi Pentecostés (Hech. 2:32-35, 38). Cheʼ jaʼel Pablo tsiʼ yʌlʌ chaʼan mi maʼañic mi lac ñop chaʼan mi caj i chaʼ chʼojyel jiñi chʌmeñoʼ bʌ, lajal bajcheʼ maʼañic mi lac ñop Cristo (1 Cor. 15:12-14). Pero mach jasʌlic yom mi la cubin ili cʌntesa tac.

13. ¿Chuqui yom mi lac mel chaʼan jiñi principio tac am bʌ ti Biblia miʼ coltañonla? (Hebreos 5:14, qʼuele jaʼel jiñi foto).

¹³ Mach cojach an lac chaʼan jiñi ñaxan tac bʌ cʌntesa, an lac chaʼan jaʼel jiñi bʌlñʌcʼʌl i chaʼañoʼ bʌ jiñi ñucobix bʌ. ¿Baqui tac bʌ? Jiñʌch jiñi principio tac muʼ bʌ i coltañonla lac chʼʌmben i sujm bajcheʼ miʼ ñaʼtan Jehová i mach jiñic jach jiñi i mandar tac. Pero chaʼan miʼ coltañonla yomʌch mi lac pejcan jiñi Biblia, mi lac wen ñaʼtan muʼ bʌ i yʌl i mi lac chaʼlen wersa lac mel cheʼ bajcheʼ woli laj  cʌn. Cheʼ bajcheʼ jiñi mi caj laj cʌn lac mel muʼ bʌ i mulan Jehová (pejcan Hebreos 5:14). b

14. ¿Chuqui tsiʼ mele Pablo chaʼan miʼ coltañob jiñi añoʼ bʌ ti Corinto?

¹⁴ Jiñi xñoptʼañob maxto bʌ añobic i ñaʼtʌbal wocol miʼ yubiñob chaʼan miʼ ñaʼtañob chuqui yom miʼ melob cheʼ bʌ jiñi Biblia maʼañic miʼ jamʌ al yom bʌ miʼ mejlel. Jin chaʼan, an muʼ bʌ i ñaʼtañob chaʼan miʼ mejlel i melob chuqui jach yomob. I an yambʌlob muʼ bʌ i wersa cʼajtiñob chuqui yom miʼ mejlel. Jumpʼejl ejemplo, jiñi xñoptʼañob ti Corinto wocol tsiʼ yubiyob chaʼan miʼ ñaʼtañob mi yom miʼ cʼuxob jiñi weʼel muʼ bʌ i mejlel chaʼan miʼ yʌqʼuentel jiñi dios tac melbil jach bʌ. Jin chaʼan, tsiʼ cʼajtibeyob Pablo chaʼan jin miʼ subeñob mi yom miʼ cʼuxob o maʼañic, pero Pablo tiʼ subeyob chaʼan jin miʼ mejlel i ñaʼtañob chuqui yom miʼ melob. Tsaʼ jach i pʌsbeyob principio tac muʼ bʌ i mejlel i coltañob, i cheʼ bajcheʼ jiñi tijicña miʼ chʌn ajñelob (1 Cor. 8:4, 7-9). Pablo tsiʼ cʌntesayob i cʼʌn jiñi i Tʼan Dios chaʼan miʼ ñaʼtañob chuqui yom miʼ melob, i mach muqʼuic jach i pijtañob chaʼan miʼ subentelob. Cheʼ bajcheʼ ili tsiʼ coltayob chaʼan miʼ tajob majlel i ñaʼtʌbal.

15. ¿Bajcheʼ tsiʼ colta jiñi xñoptʼañob hebreojoʼ bʌ jiñi carta tsaʼ bʌ i tsʼijbubeyob majlel Pablo?

¹⁵ An chuqui yambʌ mi laj cʌn ti jiñi carta tsaʼ bʌ i chocbe majlel Pablo jiñi xñoptʼañob hebreojoʼ bʌ. An tsaʼ bʌ i cʌyʌ i lʌcʼtesañob i bʌ ti Jehová, jin chaʼan tiʼ subeyob: «Jatetla lecheto yom mi laʼ wʌqʼuentel, mach jiñic bʌlñʌcʼʌl muʼ bʌ i cʼuxob jiñi ñucobix bʌ» (Heb. 5:12). Ili xñoptʼañob maʼañic tsaʼ caji i bej cʌñob jiñi tsijib tac bʌ cʌntesa i jin chaʼan maʼañic tsiʼ jacʼʌyob (Pr. 4:18). Cabʌl xñoptʼañob judíojoʼ bʌ miʼ yʌlob chaʼan yomto miʼ bej jajqʼuel jiñi i Mandar Moisés anquese Jesús añix 30 jab tsiʼ jisʌbe i cʼʌjñibal cheʼ bʌ tsiʼ yʌcʼʌ i bʌ ti chʌmel (Rom. 10:4; Tito 1:10). I wentʌlel tsaʼix i chʼʌmbeñob i sujm chaʼan qʼuexelix bajcheʼ mi caj i chʼujutesʌntel Jehová. Jin chaʼan, jiñi carta tsaʼ bʌ i choco majlel Pablo tsiʼ coltayob i qʼuel chaʼan jiñi i chʼujutesʌntel Jehová tsaʼ bʌ i teche Jesús ñumen wento bajcheʼ jiñi i Mandar Moisés. I jiñi mi caj i yʌqʼueñob i chʼejlel chaʼan miʼ bej chaʼleñob subtʼan anquese añob i contrajintel (Heb. 10:19-23).

 ¿CHUCOCH MACH YOMIC MI LAC ÑAʼTAN CHAʼAN WEN AÑIX LAC ÑAʼTɅBAL?

16. ¿Chuqui yom mi lac mel mi woli lac chaʼlen wersa lac taj lac ñaʼtʌbal?

¹⁶ Ti lac pejtelel yom mi lac chaʼlen wersa chaʼan mi lac taj majlel lac ñaʼtʌbal, pero yom mi laj cʌntan lac bʌ jaʼel chaʼan maʼañic mi lac sʌt. Jin chaʼan mach lac ñaʼtan chaʼan wen añix lac ñaʼtʌbal (1 Cor. 10:12). Ñuc i cʼʌjñibal chaʼan mi lac tsajin lac bʌ i mi laj qʼuel bajcheʼ yilal añonla (2 Cor. 13:5).

17. ¿Chuqui miʼ pʌsbeñonla jiñi carta tsaʼ bʌ i tsʼijbube majlel Pablo jiñi añoʼ bʌ ti Colosas?

¹⁷ Ti jiñi carta tsaʼ bʌ i tsʼijbube majlel jiñi añoʼ bʌ ti Colosas, Pablo tsiʼ yʌlʌ jaʼel chaʼan ñuc i cʼʌjñibal mi lac taj lac ñaʼtʌbal i maʼañic mi lac sʌt. Anquese ili xñoptʼañob añobix i ñaʼtʌbal, yomʌch tsajalob o miʼ cʌntañob i bʌ chaʼan maʼañic miʼ yʌcʼob i bʌ ti lotintel ti jiñi i ñaʼtʌbal ili pañimil (Col. 2:6-10). Cheʼ jaʼel Epafras, tsiʼ chʌn cʼajti ti oración tiʼ tojlel ili xñoptʼañob chaʼan maʼañic miʼ sʌtob i ñaʼtʌbal (Col. 4:12). ¿Chuqui miʼ pʌsbeñonla? Chaʼan Pablo yicʼot Epafras yujilob chaʼan yomʌch mi lac chaʼlen wersa, i chaʼan i cʼʌjñibalʌch i coltaya Jehová chaʼan maʼañic mi lac sʌt lac ñaʼtʌbal. Yomob chaʼan jiñi añoʼ bʌ ti Colosas miʼ chʌn pʌsob i ñaʼtʌbal cheʼ bʌ añob ti wocol.

18. ¿Chuqui miʼ mejlel ti ujtel mi juntiquil xñoptʼan miʼ sʌt i ñaʼtʌbal? (Qʼuele jaʼel jiñi foto).

¹⁸ Pablo tiʼ sube jiñi hebreojob chaʼan mi juntiquil xñoptʼan miʼ sʌt i ñaʼtʌbal mach utsʼatix mi caj i qʼuejlel ti Dios. Tajol ti ñaxan mi caj i ñusʌben i tʼan Jehová, xucʼu xucʼul mi caj i ñajtʼesan i bʌ tiʼ tojlel i maʼañix miʼ chaʼ ñaʼtan i bʌ mi muqʼuic i cʼajtin i ñusʌbentel ti Jehová. Pero jiñi hebreojob maʼañic tsiʼ cʌlʌx ñajtʼesayob i bʌ ti Jehová (Heb. 6:4-9). ¿Chuqui miʼ yujtel ili ora tiʼ tojlel jiñi inactivojoʼ bʌ o muʼ bʌ i chaʼlentelob ti expulsar, pero ti wiʼil miʼ chaʼ ñaʼtañob i bʌ? Come miʼ pʌsob i pecʼlel i mucʼʌch i chaʼ ñaʼtañob i bʌ, miʼ pʌsob chaʼan mach cheʼobic bajcheʼ tsaʼ bʌ i taja ti tʼan Pablo. Pero cheʼ bʌ miʼ chaʼ sujtelob ti Jehová yomʌch miʼ coltʌntelob (Ez. 34:15, 16). Jin chaʼan, tajol jiñi ancianojob mi caj i cʼajtibe ñob juntiquil hermano añix bʌ i ñaʼtʌbal chaʼan miʼ coltañob chaʼan miʼ chaʼ lʌcʼtesañob i bʌ ti Jehová.

19. ¿Chuqui la com bʌ lac taj?

¹⁹ Mi jatet a wom a taj a ñaʼtʌbal, chʌn chaʼlen wersa jinto maʼ taj. Laʼ lac chaʼlen wersa lac ñumen cʌn jiñi cʌntesa tac am bʌ ti Biblia yicʼot chaʼan cheʼʌch mi lac ñaʼtan bajcheʼ miʼ ñaʼtan Jehová. I mi tsaʼix a taja a ñaʼtʌbal chaʼlen wersa chaʼan maʼañic baʼ ora maʼ sʌt.