1. ¿Chuqui jiñi paraíso espiritual, i chuqui yom mi lac mel?

 ILI ora, ila ti Pañimil an jumpʼejl paraíso baqui woli (choncol) i mejlel cabʌl eʼtel, yaʼ chumulob cabʌl lac piʼʌlob muʼ bʌ i yubiñob i tijicñʌyel yicʼot ñʌchʼtʌlel, i mach yomobic loqʼuel yaʼi. Cheʼ jaʼel, yomob chaʼan miʼ yochelob yambʌ lac piʼʌlob. ¿Chuqui woli lac taj ti tʼan? Jiñʌch jiñi paraíso espiritual. a

2. ¿Chucoch wen utsʼatax cheʼ an jiñi paraíso espiritual?

² Wen utsʼatax cheʼ mi lac ñaʼtan chaʼan Jehová an i yʌcʼʌ chaʼan tijicña mi lac chʼujutesan anquese ila ti pañimil (mulawil) an cabʌl tsʼaʼlentel yicʼot jontolil (1 Juan 5:19; Apoc. 12:12). Jehová yujil chaʼan jiñi i pañimil Satanás miʼ yʌqʼueñonla cabʌl wocol. Come miʼ wen cʼuxbiñonla, yom i coltañonla chaʼan mi lac melben i yeʼtel (troñel) ti lac tijicñʌyel. Jiñi Biblia miʼ yʌl chaʼan jiñi paraíso espiritual lajal bajcheʼ lac «putsʼib» yicʼot «bajcheʼ pʌcʼʌbʌl mulbil bʌ ti jaʼ» (Is. 4:6; 58:11). Jiñi ochemonbʌla ti jiñi paraíso espiritual tijicñayonla i maʼañic chuqui mi lac bʌcʼñan anquese chumuloñixla ti jiñi cojix tac bʌ qʼuin (Is. 54:14; 2 Tim. 3:1).

3. ¿Bajcheʼ tsaʼ ñaxan tsʼʌctiyi muʼ bʌ i yʌl Isaías 65?

 ³ Ti jiñi capítulo 65 chaʼan Isaías, Jehová tsiʼ yʌlʌ bajcheʼ yilal miʼ cajel jiñi paraíso espiritual. Ili tʼan tac tsaʼ ñaxan tsʼʌctiyi cheʼ ti jabil 537. Ti jimbʌ ora, jiñi judíojob tsaʼ bʌ i chaʼ ñaʼtayob i bʌ tsaʼ loqʼuiyob ti Babilonia i tsaʼ chaʼ majliyob tiʼ lumal. Yicʼot i coltaya Jehová tsiʼ tojʼesayob Jerusalén i tsaʼ chaʼ sujti ti utsʼatax bʌ tejclum. Cheʼ jaʼel, tsiʼ tojʼesayob jiñi templo chaʼan miʼ chaʼ chʼujutesañob Jehová (Is. 51:11; Zac. 8:3).

4. ¿Bajcheʼ woliʼ tsʼʌctiyel ili ora muʼ bʌ i yʌl Isaías 65?

⁴ Yambʌ bajcheʼ tsaʼ tsʼʌctiyi tsaʼ bʌ i yʌlʌ Isaías jiñʌch cheʼ bʌ jiñi i tejclum tsaʼ loqʼui ti jiñi Ñuc bʌ Babilonia ti 1919. Cʼʌlʌl ti jiñi bʌ ora, jiñi paraíso espiritual tsaʼ caji ti colel i jiñi muʼ bʌ i subob jiñi i Yumʌntel Dios ili ora añob ti cabʌl congregación. Cabʌl lac piʼʌlob wen jontoloʼ bʌ (mañajoʼ bʌ) yicʼot tsaʼ bʌ i meleyob mach tac bʌ weñic tsiʼ cʌyʌyob i tsaʼ caji i pʌsob jiñi tsijiʼ bʌ i melbalob cheʼ bajcheʼ yom Dios (Efes. 4:24). I sujmʌch, jiñi bendición tac muʼ bʌ i yʌl Isaías mi caj i junyajlel tsʼʌctiyel yaʼ ti tsijiʼ bʌ pañimil. Pero ti ili ora wolix (yʌquelix) laj qʼuel jiñi bendición tac. Laʼ laj qʼuel baqui tac bʌ i chucoch mach yomic mi lac loqʼuel yaʼ ti paraíso espiritual.

JIÑI BENDICIÓN MUʼ BɅ LAC TAJ YAʼ TI PARAÍSO ESPIRITUAL

5. Cheʼ bajcheʼ miʼ yʌl Isaías 65:13, ¿chuqui ti bendición mi lac taj cheʼ añonla ti jiñi paraíso espiritual?

⁵ Wen mʌcʼlʌbilonla. Isaías miʼ yʌl chaʼan jiñi añoʼ bʌ ti jiñi paraíso espiritual mach cheʼic chumulob bajcheʼ jiñi añoʼ bʌ ti pañimil (pejcan Isaías 65:13). ¿Chucoch? Come jiñi i wiñicob Jehová añob i chaʼan jiñi chʼujul bʌ espíritu, jiñi Biblia yicʼot cabʌl publicación tac muʼ bʌ i coltañonla chaʼan mi lac weʼsan lac bʌ yicʼot chaʼan tijicñayonla (laja yicʼot Apocalipsis 22:17). Jiñi mach bʌ ochemobic ti jiñi paraíso espiritual miʼ ñusañob wiʼñal, tiquin tiʼ yicʼot quisin. Maʼañic miʼ mejlel i lʌcʼtesañob i bʌ tiʼ tojlel Dios (Am. 8:11).

6. ¿Chuqui miʼ taj ti tʼan Joel 2:21-24, i chuqui yom i yʌl chaʼañonla?

⁶ Ti jumpʼejl profecía, Joel tsiʼ yʌlʌ chaʼan Jehová mi caj i yʌqʼuen chuqui i cʼʌjñibal i chaʼan i tejclum, bajcheʼ vino, aceite yicʼot trigo (Joel 2:21-24). Ili yom i yʌl chaʼan Jehová tsiʼ yʌqʼue chuqui i cʼʌjñibal i chaʼan jiñi i tejclum, i yaʼ ochem jiñi i cʌntesʌntelob. ¿I bajcheʼ miʼ mel ili ora? Miʼ yʌqʼueñonla jiñi Biblia, lac publicación tac, lac página chaʼan internet, lac tempa bʌ yicʼot jiñi colem tempa bʌ, i cheʼ bajcheʼ jiñi miʼ mejlel lac weʼsan lac bʌ i pʼʌtʌl mi la cajñel.

7. ¿Chucoch wen tijicñayonla? (Isaías 65:14).

⁷ Wen tijicñayonla. Jiñi xñoptʼañonbʌla mi la cʌqʼuen wocolix i yʌlʌ Dios yicʼot wen tijicñayonla (pejcan Isaías 65:14). ¿Chucoch cheʼ mi la cubin lac bʌ bajcheʼ jiñi? Come yaʼ ti Biblia mi lac taj jiñi i sujmlel yicʼot jiñi wen tac bʌ tʼan muʼ bʌ i tijicñesañonla. Cheʼ jaʼel, an lac chaʼan jumpʼejl pijtaya come Jesús tsiʼ yʌcʼʌ i cuxtʌlel chaʼañonla. Wen tijicñayonla cheʼ mi la cʌl iliyi la quicʼot la quermañujob (Sal. 34:8; 133:1-3).

8. ¿Baqui bʌ jiñi chaʼchajp ñumen tsiquil bʌ yaʼ ti paraíso espiritual?

⁸ Yaʼ ti paraíso espiritual an chaʼchajp ñumen tsiquil bʌ: Jiñi cʼuxbiya yicʼot cheʼ temel añonla. I jiñi cʼuxbiya «mucʼʌch i tem lac piʼʌlob». Yaʼ ti tsijiʼ bʌ pañimil mi caj lac ñumen qʼuel jiñi cʼuxbiya yicʼot ñumen temel mi caj laj cajñel (Col. 3:14). Juntiquil hermana miʼ yʌl bajcheʼ yilal an cheʼ bʌ tsiʼ cʌñʌ jiñi Testigojob: «Ti ñaxan, mach tijicñayoñic, mi jiñicto quicʼot jiñi c familia. Pero cheʼ bʌ tsaʼ j cʌñʌ jiñi Testigojob tsaʼ j qʼuele bajcheʼ  yilal jiñi i sujm bʌ cʼuxbiya». Pejtelel majqui yom i yubin i tijicñʌyel yom miʼ yochel yaʼ ti paraíso espiritual. Anquese jiñi lac piʼʌlob mach weñic bajcheʼ miʼ qʼueloñobla, laʼ cujil chaʼan Jehová yicʼot jiñi i familia am bʌ ti panchan yicʼot ti pañimil utsʼat miʼ qʼuelonla (Is. 65:15).

9. ¿Chuqui mi caj chaʼlen pejtelel muʼ bʌ i yʌcʼonla ti wocol? (Isaías 65:16, 17).

⁹ Mi la cubin i ñʌchʼtʌlel lac pusicʼal. Isaías 65:14 miʼ yʌl bajcheʼ yilal mi caj i ñusañob jiñi maʼañic bʌ miʼ yochelob yaʼ ti paraíso espiritual: «Mi caj laʼ chaʼlen uqʼuel chaʼan chʼijyem laʼ pusicʼal, come maʼanic laʼ coltʌntel». Ixcu joñonla, ¿chuqui mi caj i chaʼlen pejtelel muʼ bʌ i yʌcʼonla ti wocol? Jehová miʼ yʌcʼ i tʼan: «Maʼanix i ñaʼtʌntel wocol am bʌ ti yambʌ ora» (pejcan Isaías 65:16, 17). Jehová mi caj i jisan jiñi wocol tac i mi caj i yʌqʼueñonla lac ñajʌtesan tsaʼ tac bʌ lac ñusa.

10. ¿Chucoch jumpʼejlʌch bendición cheʼ añonla la quicʼot jiñi hermanojob? (Qʼuele jaʼel jiñi foto).

¹⁰ Anquese la cujil chaʼan yaʼto ti tsijiʼ bʌ pañimil mi caj i junyajl jilel pejtelel jiñi lac wocol, ili ora mucʼʌch i mejlel la cubin i ñʌchʼtʌlel lac pusicʼal. Cheʼ bʌ mi lac majlel ti tempa bʌ muʼto i jumucʼ ñajʌyel lac chaʼan jiñi lac wocol tac. ¿Pero chuqui miʼ mejlel lac mel chaʼan ti lac pejtelel chʌn tijicñayonla? Jiñʌch cheʼ mi lac pʌs jiñi melbalʌl tac muʼ bʌ i yʌcʼ jiñi espíritu, bajcheʼ jiñi cʼuxbiya, jiñi tijicñʌyel, ñʌchʼtʌlel, la cutslel yicʼot cheʼ xucʼulon jachla (Gál. 5:22, 23). ¡Wen utsʼatax cheʼ añonla tiʼ yorganización Jehová! Mi yaʼʌch mi lac chʌn ajñel, mi caj laj qʼuel bajcheʼ miʼ tsʼʌctesan i tʼan Jehová cheʼ bʌ tsiʼ yʌlʌ chaʼan mi caj i mel «tsijiʼ bʌ panchan yicʼot tsijiʼ bʌ pañimil».

11. Cheʼ bajcheʼ miʼ yʌl Isaías 65:18, 19, ¿bajcheʼ yubil mi la cubin lac bʌ cheʼ añonla yaʼ ti paraíso espiritual?

¹¹ Mi lac wen qʼuel ti ñuc woli bʌ i mel Jehová. Isaías miʼ tsictesan chaʼan cabʌl chucoch miʼ mejlel la cubin lac tijicñʌyel. Jehová jiñʌch tsaʼ bʌ i mele jiñi paraíso espiritual (pejcan Isaías 65:18, 19). Jehová miʼ cʼʌñonla chaʼan mi lac suben yambʌ lac piʼʌlob chaʼan miʼ loqʼuelob ti ili pañimil lajal bʌ bajcheʼ jumpʼejl desierto i mi laj coltañob chaʼan miʼ yochelob ti congregación, lajal bʌ bajcheʼ jumpʼejl paraíso. ¡Wen tijicñayonla cheʼ añonla tiʼ sujmlel! Jin chaʼan, wen la com lac suben yambʌ lac piʼʌlob jiñi bendición tac am bʌ lac chaʼan (Jer. 31:12).

12. ¿Bajcheʼ maʼ wubin a bʌ cheʼ maʼ pejcan muʼ bʌ i yʌl Isaías 65:20-24, i chucoch?

¹² Jiñi añonbʌla ti jiñi paraíso espiritual mi  lac wen qʼuel ti ñuc jiñi lac pijtaya yicʼot miʼ wen aqʼueñonla lac tijicñʌyel. ¡Ñaʼtancu bajcheʼ yilal miʼ cajel yaʼ ti tsijiʼ bʌ pañimil! Jiñi Biblia miʼ yʌl: «Yaʼi maʼanix miʼ chʌmelob alʌlob, mi jinic winic maxto bʌ ñoxobic». I miʼ bej al: «Winicob mi caj i waʼchocoñob i yotot. Yaʼi mi caj i chumtʌlob. Maʼanic majch mi caj i chilbeñob. Cheʼ miʼ pʌcʼob tsʼusubil, mi caj i cʼuxbeñob i wut». Cheʼ jaʼel: «Mach lolomic jach mi caj i chaʼleñob eʼtel» come Dios mi caj i yʌqʼueñob i bendición. Dios miʼ yʌcʼ i tʼan chaʼan mi caj i cʌntañob yicʼot mi caj i coltañob chaʼan tijicña miʼ yajñelob. Cheʼ bʌ jiñi i wiñicob woliyobto ti tʼan, Dios yujilix chuqui i cʼʌjñibal i chaʼañob i mi caj i laj aqʼueñob (Is. 65:20-24; Sal. 145:16).

13. ¿Cheʼ bajcheʼ miʼ pʌs Isaías 65:25 chuqui yom miʼ melob jiñi lac piʼʌlob yomoʼ bʌ i melben i yeʼtel Jehová?

¹³ An ñʌchʼtʌlel yicʼot maʼañic chuqui mi lac bʌcʼñan. Cabʌl lac piʼʌlob jontolob ti ñaxan, lajalob i melbal (chaʼlibal) bajcheʼ jontol bʌ añimal, pero tiʼ coltaya jiñi chʼujul bʌ espíritu tsiʼ chaʼleyob wersa chaʼan miʼ qʼuextañob i melbal (pejcan Isaías 65:25; Rom. 12:2; Efes. 4:22-24). I sujmʌch chaʼan luʼ xmulilonla i mi lac mel mach bʌ weñic, pero Jehová an i mele jumpʼejl milagro cheʼ an i yʌcʼʌ chaʼan yonlel lac piʼʌlob mach bʌ junlajalobic temel miʼ yajñelob yicʼot miʼ pʌsbeñob i bʌ cʼuxbiya (Tito 2:11). ¡Cojach Jehová, jiñi Dios mach bʌ añic i pʼisol i pʼʌtʌlel, miʼ mejlel i mel bajcheʼ jiñi!

14. ¿Bajcheʼ tsaʼ tsʼʌctiyi tiʼ tojlel juntiquil hermano muʼ bʌ i yʌl Isaías 65:25?

¹⁴ ¿Tiʼ sujm ba miʼ mejlel laj qʼuextan lac melbal? Mucʼʌch. Laʼcu lac ñaʼtan tiʼ tojlel juntiquil wiñic, cheʼ 20 i jabilel muqʼuix i wen mel mach bʌ weñic yicʼot miʼ wen chaʼlen tsʼiʼlel. Mach junsujtelic jach tsaʼ otsʌnti ti cárcel tiʼ caj i melbal, tsiʼ wen chaʼle xujchʼ, muʼto i xujchʼin carro tac. Cheʼ jaʼel miʼ wen mulan i tech jatsʼ yicʼot yambʌ lac piʼʌlob. Pero cheʼ bʌ tsiʼ cʌñʌ muʼ bʌ i yʌl jiñi Biblia i tsaʼ caji ti majlel ti tempa bʌ tac, tsaʼ cʼoti i qʼuel chaʼan añʌch chuqui wem bʌ miʼ mejlel i mel tiʼ cuxtʌlel, miʼ melben i yeʼtel Jehová yaʼ ti paraíso espiritual. I cheʼ bʌ tsaʼix i chʼʌmʌ jaʼ tsiʼ wen ñaʼta chaʼan tsaʼʌch tsʼʌctiyi tiʼ tojlel muʼ bʌ i yʌl Isaías 65:25. Ti ñaxan lajal bajcheʼ wen jontol bʌ bajlum, pero ti wiʼil tsaʼ sujti bajcheʼ juncojt tiñʌmeʼ.

15. ¿Chucoch la com laj coltan yambʌ lac piʼʌlob chaʼan miʼ yochelob jaʼel yaʼ ti paraíso espiritual, i bajcheʼ mi lac mel?

¹⁵ Ti Isaías 65:13 miʼ tech i yʌl: «Jini chaʼan lac Yum Dios woliʼ subeñetla». I jiñi versículo 25 miʼ yʌl tiʼ yujtibal: «Cheʼen lac Yum». Pejtelel muʼ bʌ i yʌl Jehová mucʼʌch i tsʼʌctesan (Is. 55:10, 11). Jehová tsiʼ yʌlʌ chaʼan miʼ cajel jumpʼejl paraíso espiritual i wolix i tsʼʌctiyel ili ora. Tsiʼ mele jumpʼejl utsʼatax bʌ familia baqui an tijicñʌyel. Maʼañic chuqui mi lac bʌcʼñan yicʼot an ñʌchʼtʌlel, anquese ili ora wen an jontolil (Sal. 72:7). Jin chaʼan mi lac chaʼlen wersa lac sutqʼuin ti xcʌntʼan yambʌ lac piʼʌlob come la com chaʼan miʼ yochelob jaʼel ti jiñi i familia Jehová (Mat. 28:19, 20).

YOM BɅ MI LAC MEL CHAʼAN JIÑI LAC PIʼɅLOB MIʼ MULAÑOB OCHEL YAʼ TI PARAÍSO ESPIRITUAL

16. ¿Chuqui muʼ bʌ i ñijcañob jiñi lac piʼʌlob chaʼan miʼ mulañob ochel yaʼ ti paraíso espiritual?

¹⁶ Ti lac pejtelel añʌch chuqui miʼ mejlel lac tsʼitaʼ mel chaʼan jiñi yambʌ lac piʼʌlob miʼ mulañob ochel yaʼ ti paraíso espiritual. ¿Chuquiyes? Yom mi lac lajin Jehová. Maʼañic miʼ wersa suben lac piʼʌlob chaʼan miʼ melob chuqui yom, wen jach bajcheʼ miʼ pʌyob tilel tiʼ tojlel (Jer. 31:3; Juan 6:44). Cheʼ bʌ miʼ cʌñob majqui Jehová yicʼot bajcheʼ yilal  i utsobʌch i pusicʼal miʼ mulañob i ñumen i lʌcʼtesañob i bʌ tiʼ tojlel. ¿Chuqui miʼ mejlel lac mel joñonla chaʼan cheʼ bʌ jiñi lac piʼʌlob miʼ qʼueloñobla mucʼʌch i mulañob ochel yaʼ ti paraíso espiritual?

17. ¿Chuqui miʼ mejlel lac mel chaʼan jiñi lac piʼʌlob miʼ mulañob ochel ti jiñi paraíso espiritual?

¹⁷ Junchajp bajcheʼ mi laj coltan lac piʼʌlob chaʼan miʼ mulañob ochel yaʼ ti paraíso espiritual jiñʌch cheʼ mi lac pʌsbeñob laj cʼuxbiya yicʼot la cutslel jiñi la quermañujob. Ti wajali yaʼ ti Corinto, tajol cheʼ bʌ chaʼtiquil uxtiquil lac piʼʌlob tsaʼ cʼotiyob ti tempa bʌ, tsiʼ yʌlʌyob: «Tiʼ sujm Dios añʌch yicʼotetla». I cheʼʌch la com chaʼan miʼ yʌlob jaʼel jiñi lac piʼʌlob muʼ bʌ i cʼotelob ti lac tempa bʌ (1 Cor. 14:24, 25; Zac. 8:23). Jin chaʼan ñuc i cʼʌjñibal cheʼ mi lac jacʼ ili ticʼojel: «Yom mi laʼ wajñel ti laʼ ñʌchʼtʌlel laʼ wicʼot yambʌlob» (1 Tes. 5:13).

18. ¿Chuqui miʼ mejlel i coltan jiñi lac piʼʌlob chaʼan miʼ mulañob ochel ti jiñi organización?

¹⁸ Cheʼ jaʼel, mi lac mejlel lac chaʼlen wersa chaʼan mi lac chʌn qʼuelob jiñi hermanojob cheʼʌch bajcheʼ miʼ qʼuelob Jehová. Jin chaʼan, jin mi laj qʼuel wem bʌ i melbalob i mach jiñic chuqui mach bʌ weñic miʼ melob, come ti wiʼil luʼ tojix mi caj lac sujtel i maʼañix majqui mi caj i mel mach bʌ weñic. Mi tsaʼ lac taja wocol la quicʼot juntiquil hermano, wen jach miʼ mejlel lac tojʼesan cheʼ mi lac jacʼ ili ticʼojel: «Yom utsetla laʼ wicʼot yambʌlob, pʌsben laʼ bʌ pʼuntaya, i yom mi laʼ ñusʌben laʼ bʌ laʼ mul tiʼ pejtelel laʼ pusicʼal» (Efes. 4:32). Pejtelel muʼ bʌ i mulañob chaʼan cheʼ miʼ melbentelob bajcheʼ ili mi caj i yochelob yaʼ ti paraíso espiritual. b

 LAʼ CHɅN AJÑICONLA TI JIÑI PARAÍSO ESPIRITUAL

19. a) ¿Chuqui an i yʌlʌyob jiñi tsaʼ bʌ cʌn loqʼuiyob ti jiñi paraíso espiritual? (Qʼuele jiñi recuadro « Tsaʼ cʌn loqʼuiyob, pero tsaʼ chaʼ ochiyob»). b) ¿Chuqui mach la comic chaʼan miʼ yujtel ti lac tojlel? (Qʼuele jaʼel jiñi dibujo).

¹⁹ ¡Mi lac wen qʼuel ti ñuc cheʼ añonla ti paraíso espiritual! Ili ora ñumen utsʼatax i ñumen cabʌlix woli bʌ i melbeñob i yeʼtel Jehová yaʼi. Jin chaʼan, laʼ lac chʌn aqʼuen wocolix i yʌlʌ cheʼ tsiʼ mele jiñi paraíso chaʼañonla. Pejtelel jiñi yomoʼ bʌ chaʼan wen mʌcʼlʌbilob, chaʼan tijicñayob, chaʼan ñʌchʼʌlob i pusicʼal i maʼañic chuqui miʼ bʌcʼñañob yom miʼ yochelob ti ili paraíso i maʼañic miʼ wis loqʼuelob. Pero yomʌch mi laj cʌntan lac bʌ, come Satanás woli ti wersa chaʼan miʼ locʼsañonla ti ili utsʼatax bʌ paraíso (1 Ped. 5:8; Apoc. 12:9). Mach laj cʌy chaʼan miʼ mʌlbeñonla (jotbeñonla). Laʼ lac chaʼlen wersa chaʼan mi laj cʌntan jiñi paraíso espiritual chaʼan utsʼatax, sʌc yicʼot an ñʌchʼtʌlel.