1. ¿Bajcheʼ chajpʌbil jiñi i yorganización Jehová cheʼ ti ñaxam bʌ siglo?

 CHEʼ bʌ Jehová miʼ yʌqʼuen jumpʼejl eʼtel jiñi i wiñicob, miʼ pijtan chaʼan wen miʼ melob (1 Cor. 14:33). Jumpʼejl ejemplo, yom chaʼan miʼ sujbel jiñi wen tʼan tiʼ pejtelel pañimil (mulawil), i an i yʌqʼue tiʼ wenta Jesús chaʼan miʼ mel ili eʼtel, i jiñʌch miʼ qʼuel chaʼan wen chajpʌbil bajcheʼ miʼ mejlel (Mat. 24:14). Cheʼ ti ñaxam bʌ siglo, yaʼ ti Jerusalén an junmojt apóstolob yicʼot ancianojob añoʼ bʌ tiʼ wenta i ñaʼtañob chuqui yom miʼ mejlel ti congregación tac (Hech. 15:2; 16:4). I ti jiñi congregación tac an ancianojob muʼ bʌ i subeñob chuqui yom miʼ melob jiñi hermanojob (Hech. 14:23). Come jiñi hermanojob tsaʼʌch i jacʼʌyob, jiñi Biblia miʼ yʌl chaʼan «jiñi congregación tac tsaʼ bej pʼʌtʼa majlel tiʼ ñopoñel i ti jujumpʼejl qʼuin tsaʼ coli majlel» (Hech. 16:5).

2. ¿Chuqui an i mele Jehová tiʼ tojlel i tejclum cʼʌlʌl ti 1919?

² Jehová an i wen colta jiñi i tejclum chaʼan chajpʌbil chuqui miʼ mel. Cheʼ ti 1919, Jesús tsaʼ caji i cʼʌn junmojt wiñicob ungidojoʼ bʌ chaʼan miʼ chajpañob jiñi subtʼan yicʼot miʼ cʼʌñob jiñi Biblia chaʼan miʼ tojʼesañob majlel jiñi i tejclum Dios (Luc. 12:42). a I tsiquil chaʼan Jehová wolʌch i yʌcʼ i bendición ti ili eʼtel woli bʌ (choncol bʌ) i mejlel (Is. 60:22; 65:13, 14).

3, 4. a) Alʌ jumpʼejl ejemplo muʼ bʌ i pʌs chaʼan añʌch i wenlel cheʼ wen chajpʌbil jiñi organización. b) ¿Chuqui mi caj laj qʼuel ti ili estudio?

 ³ Mi mach wen chajpʌbilic jiñi organización, maʼañic mi caj i mejlel lac tsʼʌctesan jiñi eʼtel (troñel) tsaʼ bʌ i yʌqʼueyonla Jesús (Mat. 28:19, 20). Laʼcu lac ñaʼtan iliyi, mi ti jiñi congregación mach wen chajpʌbilic bajcheʼ mi lac chaʼlen subtʼan, jujuntiquil mi caj i chaʼlen subtʼan baqui jach yom i tajol junsujm jach baqui mi caj lac chaʼlen subtʼan. ¿Muʼ ba lac ñaʼtan chuqui ti wenlel mi lac taj cheʼ wen chajpʌbil jiñi organización?

⁴ Jesús woli (yʌquel) i bej chajpan jiñi i tejclum Jehová ti ili ora. I lʌcʼʌ lajal miʼ mel cheʼ bajcheʼ tsiʼ mele cheʼ bʌ wʌʼan ti Pañimil yicʼot jiñi xcʌntʼañob i chaʼan. Ti ili estudio mi caj laj qʼuel jiñi ejemplo tsaʼ bʌ i pʌsʌ Jesús yicʼot bajcheʼ woliʼ bej mel jiñi organización. Cheʼ jaʼel mi caj laj qʼuel bajcheʼ mi lac pʌs chaʼan mucʼʌch lac ñop muʼ bʌ i yʌl jiñi i yorganización Jehová.

JIÑI ORGANIZACIÓN CHEʼɅCH MIʼ MEL CHEʼ BAJCHEʼ TSIʼ MELE JESÚS

5. ¿Bajcheʼ miʼ lajin jiñi i yorganización Jehová tsaʼ bʌ i mele Jesús? (Juan 8:28).

⁵ Jesús tsiʼ cʌñʌ tiʼ tojlel i Tat chuqui yom bʌ miʼ mel yicʼot yom bʌ miʼ yʌl. Jiñi i yorganización Jehová cheʼʌch miʼ mel jaʼel ili ora. Jiñi cʌntesa tac yicʼot jiñi ticʼojel tac muʼ bʌ i yʌcʼ yaʼʌch loqʼuem tiʼ Tʼan Dios (pejcan Juan 8:28; 2 Tim. 3:16, 17). Cheʼ jaʼel, mi lac chʌn cʼajtesʌbentel chaʼan mi lac pejcan jiñi Biblia yicʼot mi lac mel cheʼ bajcheʼ woli laj cʌn. ¿Baqui bʌ i wenlel mi lac taj cheʼ mucʼʌch lac mel iliyi?

6. ¿Bajcheʼ miʼ coltañonla cheʼ mi lac pejcan jiñi Biblia?

⁶ Cheʼ mi laj cʼʌn jiñi lac jun tac chaʼan mi lac pejcan jiñi Biblia mucʼʌch i wen coltañonla, ¿chucoch? Come miʼ mejlel lac lajeʼ muʼ bʌ i yʌl jiñi i Tʼan Dios yicʼot muʼ bʌ i yʌl jiñi organización. Cheʼ bʌ mi laj qʼuel chaʼan chuculʌch ti Biblia muʼ bʌ lac subentel, mi lac ñumen ñop muʼ bʌ i yʌl jiñi i yorganización Jehová (Rom. 12:2).

7. ¿Chuqui tsiʼ mele Jesús, i chuqui miʼ mel jiñi i yorganización Jehová ili ora?

⁷ Jesús tiʼ subu jiñi «wen tʼan chaʼan jiñi i Yumʌntel Dios» (Luc. 4:43, 44). I tsiʼ yʌlʌ chaʼan jiñʌch yom bʌ miʼ melob jiñi xcʌntʼañob (Luc. 9:1, 2; 10:8, 9). Ti ili ora, ti lac pejtelel mi lac sub jiñi wen tʼan chaʼan Yumʌntel, mach yʌlʌyic baqui añonla o chuqui tac ti eʼtel mi lac mel tiʼ yorganización Jehová.

8. ¿Baqui bʌ jiñi ñuc bʌ lac majtan an lac chaʼan?

⁸ Jumpʼejlʌch wen ñuc bʌ lac majtan cheʼ mi lac subeñob jiñi wen tʼan chaʼan i Yumʌntel Dios jiñi lac piʼʌlob. Mach tiʼ pejtelelobic miʼ mejlel i melob ili eʼtel. Jumpʼejl ejemplo, cheʼ bʌ Jesús tsajñi ila ti Lum maʼañic tsiʼ yʌcʼʌ chaʼan jiñi xibajob miʼ yʌcʼob ti cʌjñel chaʼan Jesús i yalobilʌch Dios (Luc. 4:41). Ti ili ora, mi juntiquil lac piʼʌl yom loqʼuel ti subtʼan yicʼot i testigojob Jehová, añʌch chuqui yom miʼ ñaxan tsʼʌctesan. Ixcu joñonla, ¿bajcheʼ mi lac pʌs chaʼan mucʼʌch laj qʼuel ti ñuc cheʼ mi lac sub jiñi wen tʼan chaʼan i Yumʌntel Dios? Jiñʌch cheʼ mi lac suben wen tʼan majqui jach mi lac taj. Cheʼ bajcheʼ Jesús, la com chaʼan jiñi wen tʼan miʼ cʼotel tiʼ pusicʼal jiñi lac piʼʌlob. Miʼ mejlel la cʌl chaʼan jiñi subtʼan lajal bajcheʼ pacʼ, yomʌch mi lac pʌcʼ yicʼot mi lac mul chaʼan miʼ colel (Mat. 13:3, 23; 1 Cor. 3:6).

9. ¿Chuqui an i mele jiñi organización chaʼan miʼ yʌcʼ ti cʌjñel i cʼabaʼ Dios?

⁹ Jesús tsiʼ yʌcʼʌ ti cʌjñel i cʼabaʼ Dios, i tsaʼto i yʌlʌ ti oración: «Tsaʼ cʌqʼueyob i cʌn a cʼabaʼ» (Juan 17:26). Jiñi i yorganización Jehová an i chaʼle wersa chaʼan pejtelel lac piʼʌlob miʼ  cʌñob i cʼabaʼ Dios. Junchajp am bʌ i coltayob jiñʌch jiñi Traducción del Nuevo Mundo, añix bʌ chaʼlenti ti traducir ñumen ti 270 tʼan tac, an tsʼʌcʌlix bʌ yicʼot maxto bʌ tsʼʌcʌlic. Ti ili traducción miʼ tilel i cʼabaʼ Dios cheʼ bajcheʼ an ti jiñi ñoxix tac bʌ tsʼijbujel. Jiñi apéndice A4 yicʼot A5 miʼ tsictesan chucoch tsaʼ chaʼ otsʌnti jiñi i cʼabaʼ Dios. I jiñi apéndice C ti jiñi Biblia de estudio, miʼ yʌl chuqui tac miʼ pʌs chaʼan jiñi i cʼabaʼ Dios yom miʼ tilel 237 veces ti jiñi Tsʼijbujel Griego. b

10. ¿Chuqui miʼ pʌsbeñonla tsaʼ bʌ ujti tiʼ tojlel juntiquil xʼixic ti Myanmar?

¹⁰ Cheʼ bajcheʼ Jesús, la com chaʼan cabʌl lac piʼʌlob miʼ cʼotel i cʌñob i cʼabaʼ Dios. Ti Myanmar, juntiquil hermana tsiʼ pejca juntiquil xʼixic 67 jix bʌ i jabilel i tsiʼ pʌsbe chuqui i cʼabaʼ Dios. Jiñi xʼixic tsiʼ wen ubi i tijicñʌyel i tsaʼto i chaʼle uqʼuel, tsiʼ yʌlʌ: «Cojaxto woli cubiben jiñi i cʼabaʼ Dios [ . . . ]. Tsaʼix a pʌsbeyon jiñi wen ñuc bʌ i cʼʌjñibal». Ili miʼ pʌsbeñonla chaʼan jiñi lac piʼʌlob miʼ mejlel ti qʼuextʌyel i cuxtʌlelob cheʼ miʼ cʌñob i cʼabaʼ Dios.

LAʼ LAC PɅS CHAʼAN MI LAJ QʼUEL TI ÑUC MUʼ BɅ I YɅL JIÑI ORGANIZACIÓN

11. ¿Bajcheʼ miʼ pʌsob jiñi ancianojob chaʼan mucʼʌch i ñopob pejtelel muʼ bʌ i yʌl jiñi organización? (Qʼuele jaʼel jiñi foto tac).

¹¹ ¿Bajcheʼ miʼ mejlel i pʌsob jiñi ancianojob chaʼan mucʼʌch i qʼuelob ti ñuc muʼ bʌ i yʌl jiñi organización? Junchajp jiñʌch cheʼ miʼ pejcañob jiñi instrucción tac muʼ bʌ i yʌqʼuentelob i miʼ chaʼleñob wersa i jacʼ. Jumpʼejl ejemplo, miʼ subentelob bajcheʼ yom miʼ ñusʌntel jiñi asignación tac yicʼot bajcheʼ yom miʼ mejlel jiñi oración ti tempa bʌ. Cheʼ jaʼel, miʼ subentelob bajcheʼ yom miʼ cʌntañob jiñi i tiñʌmeʼ Jehová. Cheʼ bʌ jiñi ancianojob miʼ jacʼob ili instrucción tac, jiñi hermanojob miʼ yubiñob chaʼan mucʼʌch i cʼuxbintelob yicʼot wen cʌntʌbilob.

12. a) ¿Chucoch yomʌch mi lac jacʼ muʼ bʌ i yʌlob jiñi ancianojob? (Hebreos 13:7, 17). b) ¿Chucoch mach jiñic yom mi laj qʼuel chuqui tac mach bʌ weñic miʼ melob jiñi ancianojob?

¹² Cheʼ bʌ jiñi ancianojob an chuqui miʼ subeñoñobla, laʼ lac jacʼ ti wen, cheʼ bajcheʼ jiñi mach wocolic mi caj i yubiñob chaʼan miʼ tsʼʌctesañob i yeʼtel. Jiñi Biblia miʼ yʌl chaʼan yom mi lac jacʼbeñob i tʼan jiñi muʼ bʌ i tojʼesañoñobla majlel (pejcan Hebreos 13:7, 17). An i tajol wocolʌch come jiñi ancianojob xmulilob. Pero laʼ laj cʼajtesan chaʼan mi jin jach tsaʼ caji laj qʼuel chuqui tac mach bʌ weñic miʼ melob, mi caj lac mel chuqui yomob jiñi laj contrajob, ¿chucoch? Come mi mach weñic chuqui mi lac ñaʼtan tiʼ tojlel jiñi ancianojob maʼañix mi caj lac ñop ti jiñi organización, i jiñʌch yomoʼ bʌ jiñi laj contrajob. Pero ¿chuqui yom mi lac mel chaʼan mi laj cʌntan lac bʌ i maʼañic mi la cʌcʼ lac bʌ ti lotintel?

MACH LA CɅCʼ CHAʼAN AN MAJQUI MIʼ LOTIÑONLA

13. ¿Chuqui yomob chaʼan mi lac ñaʼtan jiñi laj contrajob?

¹³ Jiñi laj contrajob yomob chaʼan mi lac ñaʼtan chaʼan mach weñic chuqui tac miʼ mel jiñi organización. Jumpʼejl ejemplo, jiñi Biblia miʼ yʌl chaʼan jiñi i wiñicob Jehová yom sʌcob tiʼ melbal (chaʼlibal), tiʼ bʌcʼtal yicʼot tiʼ chʼujutesaya. Cheʼ jaʼel, miʼ yʌl chaʼan majqui jach miʼ mel mach bʌ weñic i maʼañic miʼ chaʼ ñaʼtan i bʌ, miʼ chaʼlentel ti expulsar (1 Cor. 5:11-13; 6:9, 10). Come joñonla mi lac jacʼ iliyi, jiñi laj contrajob miʼ yʌlob chaʼan jontolonla (mañajonla) yicʼot chaʼan ñumeñix ti pʼis bajcheʼ mi lac mel.

14. ¿Baqui tilem jiñi lot tac muʼ bʌ i yʌjlel tiʼ tojlel jiñi organización?

 ¹⁴ Laʼ laj cʼajtesan baqui tilem jiñi lot tac. Satanás «i tatʌch jiñi lot», i jiñʌch woliʼ yʌl mach bʌ weñic tiʼ tojlel jiñi organización (Juan 8:44; Gn. 3:1-5). Maʼañic miʼ toj sajtel lac pusicʼal cheʼ miʼ cʼʌn jiñi lac piʼʌlob chaʼan miʼ puc jiñi lot tac come cheʼʌch tsiʼ mele jaʼel cheʼ ti ñaxam bʌ siglo.

15. ¿Chuqui tsiʼ yʌlʌyob jiñi ñucoʼ bʌ i yeʼtel ti ñopbalʌl tiʼ tojlel Jesús yicʼot jiñi xcʌntʼañob i chaʼan?

¹⁵ Satanás tsiʼ cʼʌñʌ chaʼtiquil uxtiquil lac piʼʌlob chaʼan miʼ yʌlob lot tac tiʼ tojlel Jesús, anquese jiñʌch i Yalobil Dios, toj yicʼot tsiʼ mele milagro tac. Jumpʼejl ejemplo, jiñi añoʼ bʌ i yeʼtel ti ñopbalʌl tac tsiʼ yʌlʌyob chaʼan Jesús miʼ choc loqʼuel xibajob «tiʼ pʼʌtʌlel i yum xibajob» (Mar. 3:22). I cheʼ bʌ tsiʼ chucuyob Jesús, jiñi añoʼ bʌ i yeʼtel ti ñopbal tac tsiʼ yʌlʌyob chaʼan tsiʼ pʼajbe (ñiqʼuisube) i cʼabaʼ Dios i tiʼ subeyob jiñi lac piʼʌlob chaʼan miʼ cʼajtiñob chaʼan miʼ tsʌnsʌntel (Mat. 27:20). Ti wiʼil, cheʼ bʌ jiñi xcʌntʼañob i chaʼan Jesús tsaʼ cajiyob ti subtʼan, jiñi i contrajob «tsiʼ ñijcʌbeyob i pusicʼal jiñi lac piʼʌlob» «i tsiʼ yʌcʼʌyob tiʼ contra jiñi hermanojob» (Hech. 14:2, 19). Jiñi La Atalaya 1 de diciembre chaʼan 1998, tsiʼ taja ti tʼan Hechos 14:2, baqui tsiʼ yʌlʌ chaʼan jiñi judíojob maʼañic bʌ tsiʼ ñopoyob jiñi wen tʼan, tsaʼto caji i pucob lot tac chaʼan jiñi yambʌ lac piʼʌlob miʼ yʌcʼob i bʌ tiʼ contra jiñi hermanojob.

16. ¿Chuqui yom mi laj cʼajtesan mi tsaʼ la cubi miʼ yʌjlel mach bʌ weñic tiʼ tojlel jiñi organización?

¹⁶ Satanás maʼañic baʼ i cʌyʌ lot, cʼʌlʌl ili ora woliʼ lotin «pejtelel lac piʼʌlob ti pañimil» (Apoc. 12:9). Jin chaʼan, mi tsaʼ la cubi mach bʌ weñic tiʼ tojlel jiñi organización o tiʼ tojlel jiñi hermanojob waʼchocobiloʼ bʌ  yom mi laj cʼajtesan chaʼan cheʼʌch tsiʼ meleyob tiʼ tojlel Jesús yicʼot tiʼ tojlel jiñi xcʌntʼañob i chaʼan ti ñaxam bʌ siglo. Jiñi Biblia tsaʼix i wʌn alʌ chaʼan jiñi i testigojob Jehová mi caj i contrajintelob i mi caj i yʌjlel lot tac tiʼ tojlelob (Mat. 5:11, 12). Jiñi laj contrajob maʼañic mi caj i mejlel i lotiñoñobla cheʼ mucʼʌch lac ñaʼtan baqui miʼ tilel jiñi lot tac yicʼot mi laj cʌntan lac bʌ. Laʼ laj qʼuel chuqui yom mi lac mel.

17. ¿Chuqui yom mi lac mel mi woliʼ yʌjlel chuqui mach bʌ sujmic? (2 Timoteo 1:13; qʼuele jaʼel jiñi recuadro « Mi an chuqui maʼ wubin miʼ yʌjlel, ¿chuqui yom maʼ mel?»).

¹⁷ Mach lac ñop chuqui tac mach bʌ i sujmic. Jiñi apóstol Pablo jamʌ tsiquil tsiʼ yʌlʌ chuqui yom bʌ mi lac mel. Ti 1 Timoteo 1:3, 4 tsiʼ yʌlʌ: «Mi yomicto miʼ ñʌchʼtañob jiñi mach tac bʌ i sujmic muʼ bʌ i yʌjlel». Cheʼ jaʼel, tiʼ sube Timoteo: «Mach a ñʌchʼtan jiñi mach bʌ i sujmic tac muʼ bʌ i yʌjlel maʼañic bʌ miʼ yʌqʼuen i ñuclel Dios» (1 Tim. 4:7). Laʼcu lac ñaʼtan iliyi, mi juntiquil alʌl an chuqui miʼ taj ti piso, miʼ lot i miʼ yotsan tiʼ yej, pero juntiquil ñuquix bʌ maʼañic baʼ ora mi caj i mel jiñi come yujil chaʼan mach sʌquix i mejlel i ticʼlan. Jin chaʼan, joñonla maʼañic mi lac ñop chuqui tac mach bʌ i sujmic, cojach mi lac ñop jiñi «i sujm bʌ tʼan» (pejcan 2 Timoteo 1:13).

18. ¿Bajcheʼ miʼ mejlel lac pʌs chaʼan mi laj qʼuel ti ñuc jiñi organización?

¹⁸ Tsaʼix laj qʼuele uxchajp bajcheʼ jiñi i yorganización Jehová cheʼʌch miʼ mel bajcheʼ tsiʼ mele Jesús, pero mach cojach jiñi. Cheʼ bʌ maʼ pejcan jiñi Biblia mi caj a taj yan tac bʌ. Bej coltan jiñi hermanojob chaʼan miʼ ñumen qʼuelob ti ñuc jiñi organización. Chʌn melben i yeʼtel Jehová i mach a wʌcʼ chaʼan an chuqui miʼ ñajtʼesañet ti jiñi organización woli bʌ i cʼʌn chaʼan miʼ tsʼʌctesan chuqui albil i chaʼan (Sal. 37:28). Laʼ lac wen qʼuel ti ñuc cheʼ miʼ mejlel lac melben i yeʼtel Jehová ti jumpʼejl organización baqui an cʼuxbiya yicʼot xucʼtʌlel.