Jiñi tsaʼ bʌ i tsʼijbu Mateo yicʼot Lucas tiʼ tojlel Jesús cheʼ woliʼ colel majlel mach lajalic, come Mateo tsiʼ ñumen taja ti tʼan tsaʼ bʌ ujti tiʼ tojlel José, pero Lucas tsiʼ ñumen taja ti tʼan María.

Mateo miʼ yʌl bajcheʼ tsiʼ jacʼʌ José cheʼ bʌ tsaʼ cʼoti i ñaʼtan chaʼan María cʌntʌbil i chaʼan i yalʌl. Miʼ yʌl jaʼel bajcheʼ juntiquil ángel tiʼ tsictesʌbe jiñi woli bʌ ti ujtel yicʼot bajcheʼ tsiʼ jacʼʌ tsaʼ bʌ subenti (Mt. 1:19-25). Mateo miʼ tsictesan jaʼel chaʼan juntiquil ángel tiʼ sube José ti ñajal chaʼan yom miʼ putsʼel majlel ti Egipto yicʼot i familia, i tsaʼʌch i jacʼʌ. Cheʼ jaʼel, miʼ yʌl chaʼan juntiquil ángel tiʼ sube chaʼ sujtel ti Israel, i tsaʼʌch i jacʼʌ, tsaʼ majli ti chumtʌl ti Nazaret (Mt. 2:13, 14, 19-23). Yaʼ ti ñaxam bʌ chaʼpʼejl capítulo ti Evangelio i chaʼan Mateo, an 9 baqui miʼ yʌjlel i cʼabaʼ José, pero jiñi i cʼabaʼ María 6 jach.

Muʼ bʌ i ñumen taj ti tʼan Lucas jiñʌch bajcheʼ juntiquil ángel tsiʼ julaʼta María. Chaʼan tsajñi i julaʼtan Elisabet i tsiʼ yʌlʌ tʼan tac tsaʼ bʌ i yʌqʼue i ñuclel Jehová (Lc. 1:26-56). Miʼ yʌl jaʼel chaʼan Simeón tiʼ sube María jiñi wocol tac muʼ bʌ caj i ñusan Jesús. I cheʼ bʌ Lucas woliʼ tsictesan tsaʼ bʌ ujti cheʼ bʌ 12 jaxto i jabilel Jesús i tsajñi ti templo yicʼot i familia, jiñʌch tsiʼ taja ti tʼan tsaʼ bʌ i yʌlʌ María, mach jiñic tsaʼ bʌ i yʌlʌ José. Tsaʼ bʌ ujti yaʼ ti templo tsaʼʌch i wen colta María (Lc. 2:19, 34, 35, 48, 51). Yaʼ ti ñaxam bʌ chaʼpʼejl capítulo chaʼan Evangelio i chaʼan Lucas, an 19 baqui miʼ yʌjlel i cʼabaʼ María, pero i cʼabaʼ José 9 jach. Cheʼ bajcheʼ mi laj qʼuel, Mateo tsiʼ ñumen taja ti tʼan tsaʼ bʌ i ñaʼta yicʼot i mele José, pero Lucas tsiʼ ñumen taja ti tʼan tsaʼ bʌ ñaʼta yicʼot i mele María.

Mateo yicʼot Lucas mach lajalic jiñi cʼabaʼʌl tac tsaʼ bʌ i tsʼijbuyob jaʼel cheʼ tsiʼ tajayob ti tʼan i ñojteʼelob María yicʼot José. Mateo tsiʼ taja ti tʼan i ñojteʼelob José. Ili miʼ pʌs chaʼan Jesús, jiñi i majan alob José, jiñʌch mero am bʌ tiʼ wenta chaʼan miʼ chʼʌmben i buchlib jiñi rey David. ¿Chucoch? Come José tilemʌch tiʼ pʼolbal David, tiʼ tojlel i yalobil i cʼabaʼ Salomón (Mt. 1:6, 16). Pero Lucas miʼ taj ti tʼan i ñojteʼelob María i miʼ pʌs chaʼan Jesús an tiʼ wenta miʼ chʼʌmben i buchlib jiñi rey David come mero loqʼuemʌch «tiʼ pʼolbal», o i chʼichʼelʌch miʼ mejlel la cʌl (Ro. 1:3). ¿Chucoch? Come María tilem tiʼ pʼolbal jiñi rey David tiʼ tojlel i yalobil i cʼabaʼ Natán (Lc. 3:31, 32). Mi Helí jiñʌch i papá María, ¿chucoch tsiʼ yʌlʌ Lucas chaʼan José jiñʌch i yalobil Helí? Come ti wajali cojach miʼ tsʼijbubentelob i cʼabaʼ jiñi wiñic yaʼ ti jun baʼ miʼ pʌs majqui i ñojteʼelob. Jin chaʼan, cheʼ bʌ Lucas miʼ yʌl chaʼan José i yalobil Helí, yom bʌ i yʌl, jiñʌch chaʼan i ñij’al (Lc. 3:23).

Jiñi i cʼabaʼ i ñojteʼelob José yicʼot María tsaʼ bʌ i tsʼijbu Mateo yicʼot Lucas miʼ pʌs chaʼan Jesús jiñʌch jiñi Mesías wʌn albil bʌ. Wen cʌmbil chaʼan Jesús tilem tiʼ pʼolbal David, jin chaʼan jiñi fariseojob yicʼot saduceojob maʼañic tsiʼ yʌlʌyob chaʼan mach cheʼiqui. Ili ora, jiñi cʼabaʼʌl tac tsʼijbubil bʌ cʌytʌl miʼ chʌn pʼʌtʼesan lac ñopoñel yicʼot miʼ pʌsbeñonla chaʼan Dios mucʼʌch caj i tsʼʌctesan jiñi albil bʌ i chaʼan.