JIÑI apóstol Pablo tsiʼ taja ti tʼan 9 melbalʌl wen utsʼatax bʌ miʼ yʌcʼ jiñi chʼujul bʌ espíritu (Gá. 5:22, 23, TNM). Pejtelel ili melbalʌl jiñʌch «i wut muʼ bʌ i yʌcʼ jiñi espíritu» * i yaʼʌch ochem ti jiñi ‹tsijiʼ bʌ i pusicʼal› muʼ bʌ i xoj jiñi xñoptʼan (Col. 3:10). Cheʼ bʌ juntiquil miʼ yʌcʼ chaʼan jiñi chʼujul bʌ espíritu miʼ mel i yeʼtel (troñel) tiʼ tojlel, miʼ tech i pʌs i yʌcʼbal jiñi espíritu, lajal bajcheʼ juntejc teʼ muʼ bʌ i yʌcʼ i wut cheʼ bʌ wen cʌntʌbilʌch (Sal. 1:1-3).

Jiñi ñaxam bʌ tsiʼ yʌlʌ Pablo jiñʌch cʼuxbiya. ¿Wen am ba i cʼʌjñibal ili melbalʌl? Pablo tsiʼ yʌlʌ chaʼan mi maʼañic i cʼuxbiya, ‹maʼañic i cʼʌjñibal› (1 Co. 13:2). Pero ¿chuquiyes jiñi cʼuxbiya, i bajcheʼ miʼ mejlel lac taj yicʼot lac pʌs ti jujumpʼejl qʼuin?

Wocolʌch chaʼan miʼ mejlel lac tsictesan i sujmlel jiñi cʼuxbiya, pero jiñi Biblia miʼ yʌl bajcheʼ miʼ pʌstʌl iliyi. Jumpʼejl ejemplo, miʼ yʌl chaʼan «jini yujil bʌ cʼuxbiya jal miʼ cuchben i mul yañoʼ bʌ, wen uts i pusicʼal», «tijicña miʼ yubin chaʼan jiñi isujm bʌ. Miʼ ñusan pejtel wocol, miʼ ñop pejtelel chuqui tac isujm, miʼ chaʼlen pijtaya tiʼ xucʼtʌlel i pusicʼal, miʼ ñusan ti utsʼat pejtelel chuqui tac miʼ yujtel». Cheʼ jaʼel, jiñi am bʌ i cʼuxbiya, wen cʼux miʼ yubin yicʼot miʼ qʼuel ti ñuc yambʌlob i juntiquilʌch xucʼul bʌ la camigo. Pero jiñi maʼañic bʌ i cʼuxbiya tsʌytsʌyña i pusicʼal, miʼ chanʼesan i bʌ, lecoj i melbal, miʼ bajñel ñaʼtan i bʌ, yujil michʼ yicʼot maʼañic miʼ ñusʌben i mul yañoʼ bʌ. Ili mach bʌ weñic melbalʌl tac yicʼot muʼ bʌ i ticʼlañonla mach jiñic la com bʌ, la com bʌ jiñʌch lac pʌs jiñi cʼuxbiya «maʼañic [bʌ] miʼ sajcan chuqui yom tiʼ bajñel[il]» (1 Co. 13:4-8, Jiñi tsijiʼ bʌ wen tʼañ chaʼañ estudio).

Dios «cʼuxbiyajʌch». Jiñʌch Jehová muʼ bʌ pʌs bajcheʼ yilal jiñi cʼuxbiya (1 Jn. 4:8). Pejtel chuqui melbil i chaʼan Jehová miʼ pʌs chaʼan cheʼʌchi. Jiñi ñumen ñuc bʌ cʼuxbiya tsiʼ pʌsʌ jiñʌch cheʼ tsiʼ choco tilel i Yalobil ti Pañimil chaʼan miʼ ñusan wocol yicʼot miʼ chʌmel ti laj caj. Jiñi apóstol Juan tiʼ tsʼijbu: «Tsiʼ pʌsbeyonla i cʼuxbiya Dios cheʼ bʌ tsiʼ choco tilel ti pañimil cojach bʌ i Yalobil chaʼan mi lac taj laj cuxtʌlel ti Jesús. Jiñʌch mero cʼuxbiya. Mach joñonicla tsaʼ laj cʼuxbi Dios pero jini tsiʼ cʼuxbiyonla. Tsiʼ choco tilel i Yalobil chaʼan miʼ toj lac mul, chaʼan miʼ lajmel i michʼajel ti lac tojlel» (1 Jn. 4:9, 10). Chaʼan i cʼuxbiya Dios, tsaʼ ñusʌbentiyonla lac mul, an lac pijtaya yicʼot mi lac mejlel ti chumtʌl tiʼ pejtelel ora.

Jesús tsiʼ pʌsʌ i cʼuxbiya tiʼ tojlel jiñi wiñicob xʼixicob (quixtañujob) cheʼ bʌ tsiʼ jacʼʌ tilel wʌʼ ti pañimil (mulawil) chaʼan miʼ tsʼʌctesan chuqui yom Dios. Pablo tiʼ tsictesa: «Wʌle sʌqʼuesʌbilonixla cheʼ bajcheʼ yom Dios chaʼan tsiʼ yʌcʼʌ i bʌcʼtal Jesucristo cheʼ junyajl jach tsaʼ chʌmi chaʼañonla»  (He. 10:9, 10). Ili jiñʌch bajcheʼ juntiquil quixtañu miʼ ñumen pʌs i cʼuxbiya. Jesús tsiʼ yʌlʌ: «Jiñʌch ñuc bʌ cʼuxbiya cheʼ an majch miʼ yʌcʼ i bʌ ti chʌmel chaʼan i piʼʌlob. Maʼanic majch ñumen cabʌl i cʼuxbiya bajcheʼ jini» (Jn. 15:13). ¿Muʼ ba i mejlel lac pʌs laj cʼuxbiya jaʼel bajcheʼ Jehová yicʼot Jesús anquese xmulilonla? Mucʼʌch. Laʼ laj qʼuel bajcheʼ.

Pablo miʼ subeñonla: «Tsajcanla i melbal Dios, come cʼuxbibil bʌ i yalobiletla. Tiʼ pejtelel chuqui mi laʼ mel cʼuxbin laʼ bʌ cheʼ bajcheʼ tsiʼ cʼuxbiyonla Cristo. Tsiʼ yʌcʼʌ i bʌ ti chʌmel chaʼañonla» (Ef. 5:1, 2). Chaʼan maʼañic miʼ jilel laj cʼuxbiya, yomʌch mi lac chʌcʌ pʌs ti bajcheʼ jach ora. Jiñi cʼuxbiya tsiquil ti lac melbal, mach ti lac tʼañic jach. Juan tiʼ tsʼijbu: «Calobilob, mach yomic mi lac chaʼlen cʼuxbiya ti lac tʼan jach mi ti lac subal jach. Laʼ lac chaʼlen cʼuxbiya ti isujm ti lac melbal» (1 Jn. 3:18). Jumpʼejl ejemplo, jiñi laj cʼuxbiya tiʼ tojlel Jehová yicʼot quixtañujob jiñʌch miʼ ñijcañonla chaʼan mi lac sub jiñi «wen tʼan chaʼan i yumʌntel Dios» (Mt. 24:14; Lc. 10:27). Tsiquil laj cʼuxbiya jaʼel cheʼ la cujil pijt, an i yutslel lac pusicʼal yicʼot mi lac ñusʌben i mul yambʌlob. Jin chaʼan, jiñi Biblia miʼ subeñonla: «Pʼuntan laʼ piʼʌlob. Ñusʌben laʼ bʌ laʼ mul cheʼ bajcheʼ Dios tsiʼ ñusʌbeyetla laʼ mul ti Cristo» (Ef. 4:32).

Pero cheʼ an lac chaʼan jiñi isujm bʌ cʼuxbiya, mach yomic i yʌl chaʼan maʼañic chuqui miʼ mejlel lac mel. Jumpʼejl ejemplo, an tatʌlob tajol muʼ bʌ i yʌqʼueñob pejtel chuqui yom i yalobil chaʼan miʼ cʌy uqʼuel. Pero jiñi mucʼʌch bʌ i cʼuxbiñob i yalobilob, mi caj i yʌqʼueñob ticʼojel cheʼ i cʼʌjñibalʌch. Jehová cʼuxbiyajʌch jaʼel, pero «miʼ juʼsʌben i pusicʼal [o miʼ ticʼ] majqui jach miʼ cʼuxbin» (He. 12:6). Jin chaʼan, woli (choncol) lac pʌs cʼuxbiya cheʼ an majqui mi lac ticʼ cheʼ i cʼʌjñibalʌch mi laj qʼuel (Pr. 3:11, 12). Pero yom mi lac ñaʼtan chaʼan luʼ xmulilonla i an i tajol maʼañic mi lac pʌs cʼuxbiya. Jin chaʼan, an tacʌch baqui yom mi lac ñumen weñʼan. Laʼ laj qʼuel uxchajp muʼ bʌ mejlel i coltañonla.

Ñaxan. Laʼ laj cʼajtiben chʼujul bʌ i yespíritu Dios. Jesús tsiʼ yʌlʌ chaʼan Jehová miʼ yʌqʼuen «chʼujul bʌ espíritu jini muʼ bʌ i cʼajtibeñob» (Lc. 11:13). Cheʼ mi laj cʼajtiben chʼujul bʌ i yespíritu yicʼot mi lac chaʼlen wersa «xʌmbal ti jini Espíritu», mi caj lac ñumen pʌs jiñi laj cʼuxbiya (Gá. 5:16). Jumpʼejl ejemplo, jiñi ancianojob miʼ mejlel i cʼajtibeñob chʼujul bʌ i yespíritu Jehová chaʼan miʼ mejlel i pʌsob cʼuxbiya cheʼ miʼ yʌcʼob ticʼojel loqʼuem bʌ ti Biblia. Cheʼ jaʼel, jiñi tatʌlob miʼ mejlel i cʼajtibeñob i yespíritu Dios chaʼan wen jach miʼ mejlel i ticʼob i yalobil.

I chaʼpʼejlel. Laʼ lac wen ñaʼtan bajcheʼ tsiʼ pʌsʌ i cʼuxbiya Jesús anquese tsaʼ wen ticʼlʌnti (1 P. 2:21, 23). Tsaʼ bʌ i mele Jesús miʼ mejlel i coltañonla jaʼel cheʼ an chuqui mi lac tumbentel o mi lac toʼol ticʼlʌntel. Ti jiñi bʌ ora, wen cheʼ muqʼuic lac ñaʼtan: «¿Chuqui miʼ mel Jesús cheʼ jiñiqui?». Juntiquil hermana i cʼabaʼ Leigh, tsiʼ wen colta ili cʼajtiya cheʼ an chuqui tsaʼ tumbenti. Miʼ yʌl: «Ti jumpʼejl bʌ qʼuin jiñi c piʼʌl ti eʼtel mach weñic chuqui tiʼ tsʼijbu tic tojlel yicʼot chaʼan queʼtel, i tsiʼ chocbe majlel ti correo yambʌ c piʼʌlob ti eʼtel. Wen cʼux tsaʼ cubi. Pero tsaʼ j cʼajtibe c bʌ: ‹¿Chuqui miʼ mel Jesús cheʼ jiñiqui?›. Cheʼ tsaʼ ujti c wen ñaʼtan iliyi, tsaʼ c ñajʌtesa i maʼañic tsaʼ cʌcʼʌ ti ñuc. Ti wiʼil, tsaʼ cubi chaʼan tsaʼ wen cʼamʼa yicʼot wen boʼoyem. Tsaʼ cʼoti c ñaʼtan chaʼan mach tsajalic i chaʼan tsaʼ bʌ i mele. Cheʼ bʌ tsaʼ c wen ñaʼta bajcheʼ tsiʼ pʌsʌ i cʼuxbiya Jesús cheʼ woli (yʌquel) i ticʼlʌntel, tsiʼ coltayon c lajiben i melbal yicʼot mic pʌsben j cʼuxbiya jiñi c piʼʌl ti eʼtel». Mi mucʼʌch lac lajin Jesús, tiʼ pejtelel ora mi caj lac pʌs cʼuxbiya.

I yuxpʼejlel. Laʼ laj cʌcʼ lac bʌ tiʼ tojlel yambʌlob. Ili cʼuxbiya jiñʌch muʼ bʌ i yʌcʼ ti cʌjñel jiñi i sujm bʌ xñoptʼañob (Jn. 13:34, 35). Jiñi Biblia miʼ subeñonla chaʼan yom ‹lajal lac ñaʼtʌbal› bajcheʼ Jesús.  Cheʼ bʌ tsajñi ila ti Pañimil, tsiʼ luʼ cʌyʌ chuqui an i chaʼan ti panchan i ti jumpʼejl i pusicʼal tsiʼ yʌcʼʌ i bʌ ti chʌmel (sajtel) (Fil. 2:5-8). Cheʼ mi lac lajin bajcheʼ tsiʼ mele, cheʼʌch mi caj lac ñaʼtan yicʼot la cubin lac bʌ bajcheʼ Jesús, i ñaxan mi caj la cʌcʼ ti ñuc chuqui yom yambʌlob. ¿Bajcheʼ miʼ coltañonla cheʼ mi lac pʌs jiñi cʼuxbiya?

An cabʌl i wenlel muʼ bʌ lac taj cheʼ mi lac pʌs jiñi cʼuxbiya. Laʼ laj qʼuel chaʼpʼejl.

• LA QUERMAÑOJOB TIʼ PEJTELEL PAÑIMIL. Cheʼ mi lac majlel ti yambʌ congregación tac la cujil chaʼan jiñi la quermañojob mi caj i yotsañoñobla tiʼ yotot, come mi lac tem cʼuxbin lac bʌ. Jiñʌch ñuc bʌ bendición cheʼ jiñi la quermañojob tiʼ pejtelel pañimil miʼ cʼuxbiñoñobla (1 P. 5:9). Ili cʼuxbiya cojach mi lac taj tiʼ tejclum Jehová.

• ÑɅCHʼTɅLEL. Cheʼ mi laj cuchben lac bʌ lac sajtemal yicʼot cʼuxbiya, ‹ñʌchʼʌl mi la cajñel ti jumpʼejl jach lac pusicʼal› (Ef. 4:2, 3). Ili ñʌchʼtʌlel mi lac taj la cubin ti tempa bʌ tac yicʼot ti colem tempa bʌ tac, i maʼañic yambʌ baqui miʼ mejlel lac taj ila ti pañimil (Sal. 119:165; Is. 54:13). Cheʼ mi lac chaʼlen wersa chaʼan wen mi la cajñel yicʼot yambʌlob, mi lac pʌs chaʼan mi lac wen cʼuxbiñob yicʼot mi la cʌqʼuen i tijicñʌyel lac Tat am bʌ ti panchan (Sal. 133:1-3; Mt. 5:9).

Pablo tsiʼ yʌlʌ chaʼan jiñi «laj cʼuxbiya miʼ ñijcañonla ti coltaya» (1 Co. 8:1). ¿Chuqui yom i yʌl ili tʼan? Pablo tiʼ tsictesa yaʼ ti capítulo 13 ti jiñi ñaxam bʌ jun i chaʼan corintiojob. Ti ñaxan, jiñi cʼuxbiya miʼ sʌclan chaʼan utsʼat miʼ yajñel yambʌlob (1 Co. 10:24; 13:5). Cheʼ jaʼel, come yujil pijt, miʼ chʼʌmben isujm yicʼot uts, jiñʌch muʼ bʌ i chaʼlen coltaya chaʼan wen miʼ yajñel jiñi familia tac yicʼot muchʼul miʼ yajñel jiñi hermanojob (Col. 3:14).

Jiñi ñumen utsʼatax bʌ cʼuxbiya yicʼot muʼ bʌ i coltañonla jiñʌch laj cʼuxbiya tiʼ tojlel Dios. Come an ili cʼuxbiya, jiñi quixtañujob mach bʌ lajalobic i cultura, i colorlelob i pʌchʌlel yicʼot i tʼañob junmujchʼob yicʼot tijicñayob woliʼ chʼujutesañob Jehová i comol woliʼ melbeñob i yeʼtel (Sof. 3:9). Laʼ lac chaʼlen wersa chaʼan ti jujumpʼejl qʼuin mi lac pʌs ili wen utsʼatax bʌ i wut jiñi espíritu.