LAʼ la cʌl chaʼan yaʼañonla ti México cheʼ tiʼ jilibal noviembre ti 1932. Ili ora, ñumen ti jumpʼejl millón chumulob ti ili tejclum, i maxto jali tsaʼ tsijib otsʌnti jiñi semáforo tac. Pero an chuqui ñumen ñuc bʌ woli (choncol) ti sujbel. Jiñi xtʼañob ti televisión woli (yʌquel) i wen tsajiñob muʼ bʌ caj i yujtel ti ili semana. Yaʼañob baqui miʼ cottʌl jiñi tren, chuculob i chaʼan jiñi i cámara tac come woliʼ pijtañob chaʼan miʼ cʼotel juntiquil wiñic ñuc bʌ i cʼʌjñibal, jiñʌch jiñi Joseph F. Rutherford, am bʌ tiʼ wenta jiñi Sociedad Watch Tower. Jiñi Testigojob woliʼ pijtañob jaʼel jiñi hermano, come mi caj i cʼotel ti jiñi uxpʼejl bʌ qʼuin colem tempa bʌ.

Jiñi revista The Golden Age (ili ora jiñʌch ¡Despertad!) tsiʼ yʌlʌ: «Tiʼ sujm, ili colem tempa bʌ mi caj i chʌn cʼajtesʌntel come cheʼʌch bajcheʼ tsaʼ tejchi ti colel jiñi i sujmlel yaʼ ti México». Ti jiñi colem tempa bʌ, tsaʼ jach cʼotiyob 150 wiñicob xʼixicob (quixtañujob), pero ¿chucoch wen ñuc i cʼʌjñibal?

Cheʼ bʌ maxto mejli jiñi colem tempa bʌ, maxto wen cabʌlic jacʼbil bʌ i chaʼañob jiñi wen tʼan. Cʼʌlʌl ti jabil 1919 tsaʼ mejli jiñi colem tempa bʌ tac, pero ti wiʼil, jiñi congregación tac tsaʼ jili majlel. Cheʼ ti 1929, tsaʼ tejchi jumpʼejl sucursal yaʼ ti México. Tsaʼ ñaʼtʌnti chaʼan iliyi mi caj i coltan jiñi subtʼan, pero tsaʼ tejchi wocol. Jumpʼejl ejemplo, cheʼ tsaʼ ajli chaʼan mach yomix miʼ xʌjbel jiñi subtʼan yicʼot choñoñelʌl tac, juntiquil colportor (precursor) tsaʼ wen michʼa yicʼot tsiʼ cʌyʌ jiñi organización, i tsaʼ caji i bajñel mel i yalʌ grupo chaʼan miʼ chajpañob jiñi Biblia. Cheʼ jaʼel, tsaʼ waʼchoconti yambʌ superintendente i chaʼan sucursal, come jiñi yambʌ an chuqui mach weñic tsiʼ mele. Jiñi i testigojob Jehová xucʼuloʼ bʌ yomʌch miʼ pʼʌtʼesʌntelob ti jiñi bʌ ora.

Jiñi hermano Rutherford tsiʼ wen pʼʌtʼesa jiñi hermanojob cheʼ bʌ tsiʼ julaʼtayob. Tsiʼ ñusa chaʼpʼejl discurso yaʼ ti colem tempa bʌ, i yaʼ ti radio joʼpʼejl tsiʼ ñusa. Ti jiñi bʌ ora, cojax to tsaʼ cʼʌjñi jiñi radio chaʼan miʼ sujbel jiñi wen tʼan ti ili país. Cheʼ bʌ tsaʼ ujti jiñi colem tempa bʌ, jiñi tsijib superintendente i chaʼan sucursal jiñix tsaʼ cʌyle tiʼ wenta chaʼan miʼ qʼuel jiñi subtʼan. Cʼʌlʌl ti jiñi bʌ ora, jiñi hermanojob tsiʼ yubiyob chaʼan Jehová wolʌch i yʌqʼueñob i bendición yicʼot tsaʼ caji i chʌn melbeñob i yeʼtel tiʼ chʼejlel.

Cheʼ bʌ tsaʼ ñumi jumpʼejl jab, tsaʼ ujti chaʼpʼejl colem tempa bʌ ti ili país, tsaʼ ujti yaʼ ti Veracruz i jiñi yambʌ ti ciudad de México. Jiñi hermanojob tsaʼ caji i qʼuelbeñob i wenlel i subtʼañob. Cheʼ ti 1931, an jach 82 xsubtʼañob, pero cheʼ ñumeñix 10 jab, tsaʼ wen pʼojliyob. Ti 1941, cheʼ bʌ 1000 quixtañujob tsaʼ bʌ cʼotiyob ti colem tempa bʌ tsaʼ bʌ ujti yaʼ ti ciudad de México.

Cheʼ ti 1943, jiñi Testigojob tsiʼ cʼʌñʌyob wel wel jun tac yaʼ ti calle chaʼan miʼ subob jiñi colem tempa bʌ am bʌ i cʼabaʼ bajcheʼ «Libre bʌ Tejclum», tsaʼ bʌ  mejli ti yambʌ 12 tejclum ti ili país. * Jiñi jun tac miʼ jocʼchocoñob tiʼ quejlab, jumpʼejl tiʼ tojelob i wut, i yambʌ tiʼ patob. Jiñi Testigojob tsaʼ caji i cʼʌñob jiñi jun tac cʼʌlʌl cheʼ ti 1936.

Jiñi revista muʼ bʌ i mejlel ti México i cʼabaʼ La Nación tsiʼ yʌlʌ chaʼan jiñi tsaʼ bʌ i mele jiñi Testigojob tsaʼʌch i tajbeyob i wenlel. Tsiʼ yʌlʌ: «Ti ñaxam bʌ qʼuin tsaʼ subentiyob chaʼan yom miʼ ñumen pʌyob cʼotel yambʌ quixtañujob. I cheʼ tiʼ yijcʼʌlel maʼañix tsaʼ luʼ ochiyob yaʼ baqui woliʼ tempañob i bʌ». Jiñi Iglesia Católica tsaʼ wen michʼa, jin chaʼan tsaʼ caji i contrajin jiñi Testigojob. Pero jiñi hermanojob tsaʼ chʌn loqʼuiyob ti subtʼan ti calle come wen añob i chʼejlel. Jiñi revista La Nación tsiʼ yʌlʌ chaʼan jiñi quixtañujob tsiʼ qʼuele «wiñicob yicʼot xʼixicob lajaloʼ bʌ bajcheʼ ‹sandwich› woliyoʼ bʌ ti subtʼan». Jiñi revista tsiʼ pʌsʌ jumpʼejl foto baqui woliyob ti subtʼan jiñi hermanojob yaʼ ti ciudad de México. Tiʼ yebal jiñi foto miʼ yʌl: «Butʼul i chaʼañob jiñi bij tac».

Ti jiñi bʌ ora, cabʌl Testigojob miʼ chaʼleñob wersa chaʼan miʼ majlelob ti colem tempa bʌ tac muʼ bʌ i yujtel ti México. An cabʌl ñajt bʌ chumulob, i maʼañic miʼ cʼotel tren o carro tac. Jiñi Testigojob miʼ cʼʌñob mula o cabʌl qʼuin miʼ xʌñob chaʼan miʼ cʼotelob yaʼ baqui miʼ cottʌl jiñi tren chaʼan miʼ majlelob ti colem tempa bʌ.

Yonlel hermanojob mach wen añobic i taqʼuin, i maʼañix miʼ jastiyel chaʼan miʼ tojob i ñumib cheʼ miʼ chaʼ sujtelob. Cabʌl miʼ cʼotelob tiʼ yotot yambʌ hermanojob, i jiñi hermanojob wen tijicñayob cheʼ miʼ cʼotelob. An yaʼ bʌ miʼ wʌyelob tiʼ Yotlel Tempa bʌ. Ti jumpʼejl bʌ qʼuin, tsaʼ cʌyle 90 hermanojob yaʼ ti sucursal, tiʼ lʌtsʌyob 20 cartón chaʼan i wʌyiʼob ti jujuntiquil, i tiʼ tsoloyob i bʌ ti wʌyel. Jiñi Anuario miʼ yʌl chaʼan jiñi hermanojob wen tijicña tsiʼ yubiyob i bʌ i tsiʼ yʌlʌyob jaʼel chaʼan ñumen wen yicʼot wen qʼuixin tsaʼ wʌyiyob, mach cheʼic bajcheʼ wʌyel ti toʼol piso.

Jiñi hermanojob wen tijicña miʼ yubiñob cheʼ miʼ cʼotelob, jin chaʼan miʼ chaʼleñob wersa chaʼan maʼañic miʼ cʌyob i bʌ ti jiñi colem tempa bʌ tac. Jiñi añix bʌ lʌcʼʌ jumpʼejl millón hermanojob jaʼel ili ora wʌʼ ti México, cheʼʌch woliʼ chʌn melob. * cheʼ ti 1949, jiñi sucursal am bʌ ti México tsiʼ yʌlʌ: «Anquese jiñi hermanojob tajbil i chaʼañob wocol, maʼañic sʌtbil i chaʼañob i chʼejlel tiʼ subol jiñi ñopol bʌ i chaʼañob. Cheʼ miʼ yujtel jujumpʼejl colem tempa bʌ, miʼ wen tajob ti tʼan tsaʼ bʌ i cʌñʌyob yicʼot miʼ chʌcʌ cʼajtiñob: ‹¿Jala miʼ cajel yambʌ laj colem tempa bʌ?›». Ili ora, jiñi tsaʼ bʌ ajli cheʼʌch miʼ chʌn ujtel jaʼel. (Jiñi lotbil bʌ yaʼ ti sucursal i chaʼan Centroamérica).