1, 2. ¿Chuqui tsaʼ ujti tiʼ tojlel Pablo yicʼot Silas ti Filipos? (Qʼuele jiñi dibujo).

LɅCʼɅ ojlil acʼʌlelix yaʼ ti Filipos. Pablo yicʼot Silas, chaʼtiquil misionerojob, yaʼañob ti jiñi cárcel ñumen añix bʌ ti xoʼtʌl. Tsaʼ otsʌbentiyob i yoc ti tocol bʌ teʼ yicʼot wen cʼuxyajobix i pat chaʼan tsaʼ jajtsʼiyob (Hch. 16:23, 24). Mach jalic tsaʼ ñumi jiñi qʼuin. Pablo yicʼot Silas mach ñaʼtʌbilic i chaʼañob cheʼ bʌ jiñi wiñicob xʼixicob (quixtañujob) tsiʼ tempayob i bʌ chaʼan miʼ tujcʼañob ñumel ti mercado i miʼ pʌyob majlel yaʼ ti melobʌjʌl. Tsaʼ tsilbentiyob i pislel yicʼot tsaʼ wen jajtsʼiyob ti asiyal (Hch. 16:16-22). ¡Tsaʼ toʼol ticʼlʌntiyob! Pablo yaʼʌch tsiʼ yila pañimil (chʼocʼa) ti Roma i yom wem bʌ meloñel miʼ lon ujtel tiʼ tojlel. *

² Cheʼ bʌ Pablo yaʼto an ti cárcel, tajol tsiʼ ñaʼta bajcheʼ tsiʼ ñusa jiñi qʼuin. Tajol tsiʼ ñaʼta jaʼel jiñi yaʼ bʌ chumulob ti Filipos. Tsaʼ ñumi ti cabʌl tejclum baqui jiñi judíojob añʌch baqui miʼ mejlelob i chʼujutesan Dios cʌmbil bʌ bajcheʼ sinagoga. Pero ti Filipos maʼañic sinagoga. Jin chaʼan, jiñi judíojob miʼ majlel i tempañob  i bʌ ti tʼejl jumpʼejl jaʼ am bʌ tiʼ yochib jiñi tejclum (Hch. 16:13, 14). Maʼañic jumpʼejl sinagoga i chaʼañob come tajol maʼañic 10 wiñicob judíojoʼ bʌ, come jiñʌch muʼ bʌ i cʼajtintel chaʼan miʼ mejlel. Jiñi yaʼ bʌ chumulob ti Filipos wen tijicñayobʌch wʌle cheʼ yaʼʌch tsiʼ yilayob pañimil ti Roma (Hch. 16:21). Tajol jin chaʼan tsiʼ ñaʼtayob chaʼan Pablo yicʼot Silas mach romanojobic. Anquese cheʼ tsiʼ ñaʼtayob, mach weñic bajcheʼ tsiʼ meleyob (chaʼleyob) tiʼ tojlelob.

3. a) ¿Chucoch maʼañic tsiʼ wen ñaʼta Pablo woli bʌ i ñusan cheʼ tsaʼ otsʌnti ti cárcel? b) Pero ¿chuqui tsiʼ mele?

³ Pablo tajol tsiʼ ñaʼta jaʼel bajcheʼ tsaʼ cʼoti yaʼ ti Filipos. Cheʼ bʌ anto yom chaʼpʼejl uxpʼejl uw, yaʼan ti Asia Menor, am bʌ ti junwejlel jiñi mar Egeo. Jiñi chʼujul bʌ espíritu tsiʼ mʌcta chaʼan maʼañic miʼ majlel ti subtʼan baqui tsiʼ lon ñaʼta. Lajal bajcheʼ yambʌ baqui woli (choncol) i choc majlel (Hch. 16:6, 7). Pero ¿baqui? Pablo tsaʼ mejli i ñaʼtan cheʼ bʌ yaʼan ti Troas. Juntiquil wiñic tiʼ sube ti ñajal: «Laʼ ti Macedonia». Wen tsiquil tsiʼ qʼuele jiñi apóstol chuqui yom bʌ Dios, jin chaʼan ti orajach tsaʼ majli ti Macedonia (pejcan Hechos 16:8-10). Cheʼ tsaʼ cʼoti, mach wen jalic tsaʼ ñumi cheʼ tsaʼ otsʌnti ti cárcel. ¿Chucoch tsiʼ yʌcʼʌ Jehová chaʼan cheʼ miʼ yujtel? ¿Jal ba mi caj i cʌytʌl yaʼ ti cárcel? Anquese maʼañic tsiʼ ñaʼta chuqui tsiʼ ñusa, maʼañic tsiʼ cʌyʌ chaʼan miʼ jilel i ñopoñel ti Dios yicʼot i tijicñʌyel. Yaʼ ti Biblia miʼ yʌl chaʼan Pablo yicʼot Silas tsaʼ caji i melbeñob oración Jehová yicʼot tsaʼ caji i cʼʌyiñob (Hch. 16:25). Miʼ mejlel la cʌl chaʼan tsiʼ tajayob i ñʌchʼtʌlel i pusicʼal ti Dios.

4, 5. a) ¿Chucoch lajal miʼ mejlel la cʌl jiñi woli bʌ lac ñusan cheʼ bajcheʼ tsiʼ ñusa Pablo? b) ¿Bajcheʼ tsaʼ qʼuextʌyi jiñi tsaʼ bʌ i ñusayob?

⁴ ¿Am ba la cubi lac bʌ bajcheʼ Pablo? Tajol tsaʼ laj cʼajtibe Jehová chaʼan miʼ coltañonla lac ñaʼtan chuqui yom mi lac mel i cheʼʌch woli (yʌquel) lac mel tsaʼ laj qʼuele bajcheʼ woliʼ subeñonla jiñi chʼujul bʌ espíritu. Pero ti wiʼil mach cheʼic tsaʼ loqʼui bajcheʼ tsaʼ lac ñaʼta. Tajol tsaʼ tili wocol o an chuqui tsaʼ ujti tsaʼ bʌ i qʼuexta bajcheʼ chumulonla (Ec. 9:11). Mi woli lac ñaʼtan chucoch tsiʼ yʌcʼʌ ti ujtel Jehová bajcheʼ jiñi, ¿chuqui mi caj i coltañonla chaʼan mi laj cuch yicʼot mi lac chʌn ñop Jehová? Chaʼan mi lac ñaʼtan, laʼ lac chaʼ qʼuel tiʼ tojlel Pablo yicʼot Silas.

⁵ Cheʼ bʌ woliyob to ti cʼay, an chuqui tac tsaʼ ujti mach bʌ pijtʌbilic i chaʼañob. Ti ñaxan, tsaʼ ujti ñuc bʌ yujquel lum. Ti wiʼil, tsaʼ jajmi jiñi cárcel yicʼot tsaʼ jijti jiñi cadena baqui cʌchʌlob. Cheʼ bʌ jiñi xcʌntaya tsiʼ qʼuele iliyi, tsiʼ ñopo i tsʌnsan i bʌ, pero Pablo tsiʼ mʌcta. Cheʼ jiñi, jiñi xcʌntaya yicʼot i familia tsaʼ sujtiyob ti xcʌntʼan i tsiʼ chʼʌmʌyob jaʼ. Cheʼ bʌ wen sʌcʼan to, jiñi juezob tiʼ sube jiñi xcʌcholeñob chaʼan miʼ majlel i colob Pablo yicʼot Silas, i wen jach miʼ subeñob loqʼuel ti Filipos. Cheʼ bʌ jiñi juezob tsiʼ ñaʼtayob chaʼan mach weñic bajcheʼ tsiʼ meleyob, tsaʼ majli i tajob Pablo yicʼot Silas chaʼan jiñob miʼ pʌyob loqʼuel. Pero Pablo yicʼot Silas tsaʼ ñaxan majliyob i qʼuel jiñi Lidia, juntiquil hermana maxto bʌ wen jalic i chʼʌmʌ jaʼ. Cheʼ jaʼel, tsaʼto i pʼʌtʼesayob jiñi yambʌ hermanojob yaʼ bʌ chumulob (Hch. 16:26-40). ¡Ti orajach tsaʼ qʼuextʌyi tsaʼ bʌ ujti tiʼ tojlelob!

6. ¿Chuqui mi caj laj qʼuel ti ili temaj?

⁶ ¿Chuqui miʼ cʌntesañonla ili tsaʼ bʌ ujti? Chaʼan Jehová miʼ mejlel i mel jiñi mach bʌ pijtʌbilic lac chaʼan, jin chaʼan, mach yomic mi laj cʌlʌx cʼojoʼtan cheʼ woli lac ñusan wocol. Pablo maʼañic tsiʼ ñajʌtesa tsaʼ bʌ i qʼuele. La cujil chaʼan cheʼʌchi come an chuqui tiʼ tsʼijbube majlel jiñi hermanojob ti Filipos chaʼan jiñi tsic pusicʼal, i chaʼan jiñi  ñʌchʼtʌlel muʼ bʌ i yʌcʼ Dios. Ti ili temaj mi caj lac ñaxan qʼuel tsaʼ bʌ i yʌlʌ Pablo ti Filipenses 4:6, 7, Jini wen bʌ tʼan (pejcan) *. Ti wiʼil, mi caj laj qʼuel muʼ bʌ i yʌl jiñi Biblia tiʼ tojlel quixtañujob tsaʼ bʌ i qʼueleyob ñuc tac bʌ chuqui tsiʼ mele Jehová. Tiʼ yujtibal, mi caj laj qʼuel bajcheʼ miʼ coltañonla laj cuch wocol jiñi ‹i ñʌchʼtyʌsʌntyel lac pusicʼal tyʌlem bʌ ti Dios› yicʼot mi lac ñop Jehová.

7. a) ¿Chuqui yom bʌ i pʌsben Pablo jiñi hermanojob ti Filipos? b) ¿Chuqui mi laj cʌn joñonla?

⁷ ¿Chuqui tsiʼ ñaʼta jiñi hermanojob ti Filipos cheʼ bʌ tsiʼ pejcayob jiñi jun tsaʼ bʌ i choco cʼotel Pablo? Tsaʼʌch i chaʼ cʼajtesayob wʌle tsaʼ bʌ i ñusa Pablo yicʼot Silas yaʼ ti Filipos yicʼot chaʼan bajcheʼ tsaʼ coltʌntiyob ti Jehová. ¿Chuqui yom bʌ i pʌs jiñi Pablo? Chaʼan mach yomic miʼ cʼojoʼtañob i bʌ, i chaʼan mi mucʼʌch i melbeñob oración Dios, mi caj i yʌqʼuentelob i ñʌchʼtʌlel i pusicʼal. Pero Pablo tsiʼ yʌlʌ jaʼel chaʼan jiñi i ñʌchʼtʌlel lac pusicʼal muʼ bʌ i yʌcʼ Dios «mach chʼujbi i saj chʼʌmʼen isujm» jiñi quixtañujob. Ila woliʼ yʌl chaʼan ñumen ñuc to i wenlel jiñi i ‹ñʌchʼtyʌlel lac pusicʼal tyʌlem bʌ ti Dios› cheʼ bajcheʼ mi lac lon ñaʼtan. ¿Chuqui miʼ pʌsbeñonla iliyi? Anquese an i tajol maʼañic mi lac wis tajben i tsʼʌcal lac wocol, Jehová mucʼʌch caj i coltañonla. Miʼ mejlel i mel ñuc tac bʌ muʼ bʌ i yʌcʼ ti toj sajtel lac pusicʼal (pejcan 2 Pedro 2:9).

8, 9. a) Anquese Pablo tsaʼ toʼol ticʼlʌnti yaʼ ti Filipos, ¿chuqui wem bʌ tsaʼ tajle tiʼ caj jiñi? b) ¿Chucoch tsaʼʌch i ñopoyob jiñi hermanojob ti Filipos tsaʼ bʌ i tsʼijbu Pablo?

⁸ Jiñi hermanojob ti Filipos tsaʼʌch i wen ñuqʼuesʌbeyob i pusicʼal cheʼ tsiʼ chaʼ cʼajtesayob jiñi añix bʌ 10 jab tsaʼ ujti. Tsaʼ bʌ i tsʼijbu Pablo isujmʌch. Anquese Jehová tsiʼ yʌcʼʌ ti ujtel jiñi tʌcʼlʌntel, cheʼ bajcheʼ iliyi tsaʼ mejli ti «coltʌntel yicʼot i waʼchocontel jiñi wen tʼan tiʼ tojlel yumʌlob» (Fil. 1:7, TNM). Jiñi juezob ti Filipos muqʼuix i ñaxan wen ñaʼtañob cheʼ bʌ an chuqui yomob i tumben jiñi congregación yaʼ ti tejclum. Cheʼ bʌ Pablo tsiʼ yʌlʌ chaʼan yaʼʌch tsaʼ coli ti Roma, tajol jiñʌch tsaʼ bʌ i yʌcʼʌ jaʼel chaʼan jiñi Lucas miʼ mejlel ti cʌytʌl i bej coltan jiñi hermanojob ti Filipos cheʼ bʌ Pablo yicʼot Silas tsaʼix sujtiyob.

⁹ Cheʼ bʌ jiñi hermanojob ti Filipos tsiʼ pejcʌbeyob i jun Pablo, wen yujilob chaʼan jiñʌch woli ti tʼan juntiquil am bʌ i ñusa wocol. Wen tsʌts chuqui tac tsiʼ ñusa Pablo i tsiʼ pʌsʌ chaʼan añʌch yicʼot jiñi ñʌchʼtʌlel tilem bʌ ti Dios. Cheʼ bʌ tiʼ tsʼijbu jiñi jun, yaʼix an tiʼ yotot am bʌ ti Roma, i cʌntʌbilix ti xʼeʼtelob, pero tsiʼ chʌn pʌsʌ chaʼan añʌch yicʼot jiñi ñʌchʼtʌlel tilem bʌ ti Dios (Fil. 1:12-14; 4:7, 11, 22).

10, 11. ¿Chuqui yom mi lac mel cheʼ an chuqui mi lac wen cʼojoʼtan, i chuqui miʼ mejlel lac pijtan?

¹⁰ ¿Chuqui miʼ mejlel lac mel chaʼan maʼañic mi lac chaʼlen mel pusicʼal i mi lac taj lac ñʌchʼtʌlel tilem bʌ ti Dios? Tsaʼ bʌ i sube Pablo jiñi hermanojob ti Filipos miʼ cʌntesañonla chaʼan muʼ bʌ i lajmesan laj cʼojol jiñʌch cheʼ mi lac mel oración. Jin chaʼan, cheʼ jajayajl an chuqui mi laj cʼojoʼtan, laʼ lac chaʼlen oración (pejcan 1 Pedro 5:6, 7). Cheʼ jaʼel, yom mi lac mel ti jumpʼejl lac pusicʼal i mi lac ñop chaʼan Jehová miʼ qʼuelonla ti ñuc. Laʼ la cʌqʼuen wocolix i yʌlʌ jaʼel chaʼan jiñi bendición tac muʼ bʌ i yʌqʼueñonla. Cheʼ mi laj cʼajtesan chaʼan Jehová miʼ mejlel i mel «ñumen ñuc bʌ i yeʼtel  bajcheʼ pejtelel chuqui mi laj cʼajtiben yicʼot pejtelel muʼ bʌ lac ñaʼtan», ñumento mi caj lac ñop (Ef. 3:20).

¹¹ Tajol toj sajtel lac pusicʼal cheʼ mi laj qʼuel muʼ bʌ i mel Jehová chaʼan miʼ coltañonla, cheʼ bajcheʼ tsaʼ ujti tiʼ tojlel Pablo yicʼot Silas ti Filipos. Tajol mach wen ñuquic muʼ bʌ caj laj qʼuel miʼ yujtel, pero jiñʌch muʼ bʌ caj i coltañonla (1 Co. 10:13). Pero ili mach yomic i yʌl chaʼan maʼañic chuqui mi caj lac mel, chaʼan jin jach mi caj lac pijtan chaʼan Jehová miʼ jisan lac wocol. Yomʌch mi lac mel jaʼel cheʼ bajcheʼ mi laj cʼajtin ti oración (Ro. 12:11). Cheʼ bajcheʼ ili, woli lac pʌs chaʼan la comʌch laj coltʌntel, i Jehová mi caj i yʌqʼueñonla i bendición. Pero yom mi laj cʼajtesan jaʼel chaʼan ñumento miʼ mejlel i yʌqʼueñonla cheʼ bajcheʼ mi laj cʼajtiben o bajcheʼ mi lac pijtan miʼ mel. An i tajol toj sajtel lac pusicʼal o mach pijtʌbilic lac chaʼan muʼ bʌ i mel ti lac tojlel. Laʼ laj qʼuel relato tac am bʌ ti Biblia muʼ bʌ i ñumen coltañonla lac ñop chaʼan chuqui miʼ mejlel i mel Jehová chaʼañonla.

12. a) ¿Chuqui tsiʼ mele Ezequías cheʼ bʌ jiñi rey i chaʼan Asiria tsiʼ yʌlʌ chaʼan mi caj i jisan? b) ¿Chuqui mi laj cʌn chaʼan tsaʼ bʌ i mele Jehová ti jiñi wocol?

¹² Yaʼ ti Biblia miʼ yʌl chaʼan Jehová an chuqui tac tsiʼ mele mach bʌ añic majqui pijtʌbil i chaʼan. Jumpʼejl ejemplo, cheʼ tiʼ yorajlel Ezequías, jiñi rey Senaquerib i chaʼan bʌ Asiria tsiʼ jisa Judá yicʼot yan tac bʌ tejclum, pero Jerusalén maʼañic chuqui tsiʼ tumbe (2 R. 18:1-3, 13). Ti wiʼil, Senaquerib tsiʼ yʌlʌ chaʼan mucʼʌch caj i jisan jaʼel. ¿Chuqui tsiʼ mele Ezequías? Tsiʼ pejca Jehová ti oración yicʼot tsiʼ cʼajtibe ticʼojel jiñi xʼaltʼan Isaías (2 R. 19:5, 15-20). Tsiʼ chʼʌmbe isujm jaʼel woli bʌ ti ujtel i tsiʼ tojo cheʼ bajcheʼ woliʼ cʼajtin Senaquerib (2 R. 18:14, 15). Ti wiʼil, Ezequías tsiʼ yʌcʼʌ ti ñumen pʼʌtʼesʌntel i tsʼajquil jiñi tejclum (2 Cr. 32:2-4). ¿Chuqui tsaʼ ujti? Jehová tsiʼ choco jubel juntiquil ángel i ti jumpʼejl jach acʼʌlel tiʼ tsʌnsa 185 mil soldadojob. Ezequías mach wis pijtʌbilic i chaʼan bajcheʼ tsaʼ ujti (2 R. 19:35).

13. a) ¿Chuqui mi laj cʌn chaʼan tsaʼ bʌ ujti tiʼ tojlel José? b) ¿Chuqui tsaʼ ujti tiʼ tojlel Sara?

¹³ Laʼ laj qʼuel tsaʼ bʌ ujti tiʼ tojlel José, cheʼ bʌ xcolel to. Cheʼ bʌ yaʼ cʌchʌl ti Egipto, maʼañic tsiʼ wis ñaʼta mi jin mi caj i sujtel ti jiñi i chaʼticlel wiñic ñumen pʼʌtʌl bʌ yaʼ ti país. Maʼañic tsiʼ ñaʼta jeʼel mi Jehová mi caj i cʼʌn chaʼan miʼ coltan i familia tiʼ yorajlel wiʼñal (Gn. 40:15; 41:39-43; 50:20). Tiʼ sujm, ñumento tsiʼ mele Jehová cheʼ bajcheʼ pijtʌbil i chaʼan José. Laʼ lac ñaʼtan jaʼel tiʼ tojlel Sara, i mamá i tatuch José. ¿Ñaʼtʌbil ba i chaʼan jaʼel jiñi Sara mi Jehová muʼto caj i yʌqʼuen i yalobil cheʼ añix i jabilel? Maʼañic tsiʼ wis ñaʼta mi ñumento muʼ  bʌ caj i taj, i yʌcʼ ti pañimil jiñi Isaac (Gn. 21:1-3, 6, 7).

14. ¿Chuqui miʼ mejlel lac pijtan tiʼ tojlel Jehová?

¹⁴ Wen tsiquil chaʼan maʼañic mi lac pijtan jumpʼejl milagro tiʼ tojlel Jehová yicʼot miʼ jisan pejtelel lac wocol cheʼ maxto añoñicla ti tsijib pañimil (mulawil). Cheʼ jaʼel, maʼañic mi lac wersa cʼajtiben i mel chuqui wen ñuc bʌ ti laj cuxtʌlel. Pero la cujil chaʼan tsaʼʌch i mele wen ñuc tac bʌ chaʼan miʼ coltan i wiñicob ti wajali. I Dios maʼañic qʼuextʌyem (pejcan Isaías 43:10-13). Ili miʼ ñumen coltañonla lac ñop tiʼ tojlel. La cujil chaʼan chuqui jach mi caj i mel chaʼan miʼ yʌqʼueñonla lac pʼʌtʌlel i miʼ tsʼʌctiyel chuqui yom (2 Co. 4:7-9). ¿Chuqui mi laj cʌn tiʼ tojlel Ezequías, José yicʼot Sara? Chaʼan Jehová miʼ mejlel i coltañonla lac ñusan tsʌts tac bʌ wocol mi chʌn xucʼuloñʌchla.

15. a) ¿Chuqui miʼ mejlel lac mel chaʼan maʼañic miʼ jilel lac ñʌchʼtʌlel tilem bʌ ti Dios cheʼ añonla ti wocol? b) ¿Chuqui miʼ coltañonla chaʼan mi lac sujtel tiʼ yamigo Dios?

¹⁵ Cheʼ bʌ añonla ti wocol, ¿chuqui miʼ mejlel lac mel chaʼan maʼañic miʼ jilel lac ñʌchʼtʌlel tilem bʌ ti Dios? Yom mi laj cʌntan bajcheʼ añonla la quicʼot Jehová. Ili cojach miʼ mejlel lac mel «ti Cristo Jesús», come tsiʼ yʌcʼʌ i cuxtʌlel chaʼan miʼ locʼsañonla ti mulil. Jiñi i tojol mulil jiñʌch junchajp wen ñuc bʌ melbil bʌ i chaʼan Jehová. Miʼ cʼʌn chaʼan miʼ ñusʌbeñonla lac mul, cheʼ bajcheʼ jiñi, utsʼat miʼ yajñel laj conciencia yicʼot mi lac mejlel ti sujtel tiʼ yamigo (Jn. 14:6; Stg. 4:8; 1 P. 3:21).

16. Tsictesan bajcheʼ miʼ coltañonla jiñi ñʌchʼtʌlel tilem bʌ ti Dios.

¹⁶ ¿Bajcheʼ mi caj i coltañonla jiñi i ñʌchʼtʌlel lac pusicʼal tilem bʌ ti Jehová mach bʌ «chʼujbi i saj chʼʌmʼen isujm» quixtañujob? Jiñi Biblia miʼ yʌl: «Mi quej i cʌñʌtyʌbeñetla laʼ pusicʼal yicʼot laʼ pensal ti Cristo Jesús» (Fil. 4:7, Jini wen bʌ tʼan). Jiñi tʼan «cʌñʌtyʌbeñetla» ti wajali miʼ cʼʌjñel chaʼan miʼ yʌjlel jiñi eʼtel (troñel) muʼ bʌ i mel soldadojob cheʼ miʼ cʌntañob jiñi tejclum. Cheʼʌch añob jaʼel jiñi chumuloʼ bʌ ti Filipos. Tijicña miʼ wʌyelob come yujilob chaʼan añob i cʌntʌntel. Cheʼ lajal jaʼel cheʼ bʌ an lac chaʼan jiñi ñʌchʼtʌlel tilem bʌ ti Dios, tijicña an lac pensar yicʼot lac pusicʼal. La cujil chaʼan woliʼ cʌntañonla Jehová yicʼot utsʼat yom mi la cajñel (1 P. 5:10). Cheʼ la cujil iliyi, miʼ cʌntañonla chaʼan maʼañic mi laj cʌlʌx chaʼlen cʼojol yicʼot bʌqʼuen.

17. ¿Chuqui mi caj i coltañonla chaʼan maʼañic mi lac bʌcʼñan jiñi talto bʌ qʼuin?

¹⁷ Jiñi wiñicob xʼixicob lʌcʼʌlix mi caj i ñusañob jiñi ñuc bʌ wocol maʼañic bʌ baʼ ora ujtem, i maʼañic bʌ baʼ ora mi caj i chaʼ ujtel (Mt. 24:21, 22). Mach la cujilic chuqui mi caj i yujtel ti lac tojlel, pero mach yomic mi lac wen bʌcʼñan. Anquese mach la cujilic pejtelel chuqui mi caj i mel Jehová, la cujilʌch bajcheʼ yilal bʌ Dios. Tsaʼix laj qʼuele tsaʼ bʌ i mele tiʼ tojlel i wiñicob wajali, i tsaʼ laj qʼuele chaʼan mucʼʌch i tsʼʌctesan chuqui miʼ ñaʼtan, anquese an chuqui miʼ yujtel. An i tajol miʼ mel mach bʌ pijtʌbilic lac chaʼan. Cheʼ jajayajl an chuqui miʼ mel Jehová chaʼan miʼ coltañonla, jiñʌch bajcheʼ miʼ mejlel la cubin i ñʌchʼtʌlel lac pusicʼal mach bʌ «chʼujbi i saj chʼʌmʼen isujm» quixtañujob.