1. ¿Bajcheʼ tac miʼ mejlel lac chaʼlen eʼtel la quicʼot Jehová?

CHEʼ bʌ Jehová tsiʼ meleyonla (pʌtʌyonla), tsiʼ mulaj chaʼan mi lac chaʼlen eʼtel (troñel) la quicʼot chaʼan miʼ tsʼʌctiyel jiñi tsaʼ bʌ ñaʼta i mel. Anquese wʌle xmulilonla, jiñi i wiñiconbʌla Jehová mi lac mejlel lac chaʼlen eʼtel la quicʼot tiʼ pejtelel ora. Jumpʼejl ejemplo, jiñi Biblia miʼ yʌl chaʼan ‹xʼeʼtelonla yicʼot Dios› cheʼ mi lac chaʼlen subtʼan yicʼot mi lac sutqʼuiñob ti xcʌntʼan wiñicob xʼixicob (quixtañujob) (1 Co. 3:5-9). Jiñʌch wen ñuc bʌ lac majtan cheʼ jiñi wen pʼʌtʌl bʌ tsaʼ bʌ i Meleyonla miʼ qʼuelonla ti utsʼat cheʼ xʼeʼtelonla i chaʼan ti jiñi ñuc bʌ i yeʼtel. An cabʌl bajcheʼ miʼ mejlel lac chaʼlen eʼtel la quicʼot Jehová. Ti ili temaj mi cajel laj qʼuel bajcheʼ tac: Cheʼ mi laj coltan lac familia yicʼot hermanojob, cheʼ mi lac pʌy ti la cotot jiñi yambʌlob, cheʼ mi laj coltan jiñi i yorganización Jehová ti baqui jach bʌ eʼtel yicʼot cheʼ mi lac ñuqʼuesan jiñi la queʼtel tiʼ chaʼan bʌ Dios (Col. 3:23).

2. ¿Chucoch mach yomic mi lac lajin chuqui mi lac mel tiʼ tojlel Jehová yicʼot muʼ bʌ i mel yambʌlob?

² Cheʼ woli (choncol) laj qʼuel majlel ili temaj mach lac lajin jiñi eʼtel muʼ bʌ lac melben Jehová cheʼ bajcheʼ miʼ melob yambʌlob. Mach yomic miʼ ñajʌyel chaʼan jiñi lac jabilel, laj cʼocʼlel, chuqui mi lac ñusan yicʼot la cujil bʌ melol, mach lajalic. Jiñi apóstol Pablo  tiʼ tsʼijbu: «Ti jujuntiquiletla bajñel cʌñʌ laʼ bʌ. Qʼuele mi utsʼat a melbal. Tijicñesan a pusicʼal mi wen melbil, pero mach maʼ chañʼesan a bʌ tiʼ tojlel yañoʼ bʌ chaʼan a melbal» (Gá. 6:4).

3. ¿Chucoch miʼ mejlel laj cʌl chaʼan woliyob ti tem eʼtel yicʼot Jehová jiñi muʼ bʌ i cʌntañob i familia?

³ Jehová miʼ pijtan chaʼan jiñi i wiñicob miʼ cʌntañob i familia. Jumpʼejl ejemplo, an muʼ bʌ i chaʼleñob eʼtel chaʼan miʼ mʌcʼlañob i familia. An ñaʼʌlob muʼ bʌ i cʌntañob alʌl to bʌ i yalobilob tiʼ yotot. An xñoptʼañob muʼ bʌ i cʌntañob i tatob añobix bʌ i jabilel. Iliyi ñucʌch i cʼʌjñibal chaʼan miʼ mejlel. Jiñi Biblia miʼ yʌl: «Mi an juntiquil mach bʌ anic miʼ cʌntan jini mero i piʼʌlob yicʼot jini añoʼ bʌ tiʼ yotot, tsaʼix i cʌyʌ i ñop. Ñumen lecojʌch bajcheʼ juntiquil mach bʌ anic miʼ ñop Dios» (1 Ti. 5:8). Mi an ti lac wenta jiñi eʼtel tac, tajol maʼañic mi caj lac ñumen aqʼuen i yorajlel lac mel (chaʼlen) jiñi chʼujul tac bʌ eʼtel cheʼ bajcheʼ la com. Pero mach la cubin lac chʼijiyemlel. Jehová miʼ mulan cheʼ mi laj cʌntan jiñi lac familia (1 Co. 10:31).

4. ¿Bajcheʼ mi mejlel i yʌcʼob ti ñaxan i Yumʌntel Dios jiñi tatʌlob, i baqui bʌ wenlel miʼ tajob?

⁴ Jiñi tatʌlob xñoptʼañoʼ bʌ miʼ tem chaʼleñob eʼtel yicʼot Jehová cheʼ miʼ coltañob i yalobil chaʼan miʼ tajob eʼtel tac tiʼ chaʼan bʌ Dios. Ti wiʼil, jiñi alʌlob miʼ sujtelob ti xʼeʼtelob i chaʼan Dios tiʼ pejtelel ora i ñajt miʼ cʌyob i familia chaʼan miʼ chaʼleñob coltaya. An muʼ bʌ i yochelob bajcheʼ misionerojob, yambʌ bajcheʼ precursorob chaʼan miʼ chaʼleñob coltaya baqui yomto xsubtʼañob yicʼot an muʼ bʌ i chaʼleñob eʼtel ti Betel. Come ñajt baqui añob, jiñi i familiajob maʼañic miʼ mejlel i wen qʼuelob. Pero jiñi tatʌlob maʼañic bʌ miʼ bajñel ñaʼtañob i bʌ miʼ ñuqʼuesʌbeñob i pusicʼal i yalobilob chaʼan maʼañic miʼ cʌy i melbeñob i yeʼtel Jehová. ¿Chucoch? Come miʼ yubiñob i tijicñʌyel chaʼan jiñi i yalobilob woli (yʌquel) i yʌcʼob ti ñaxan i Yumʌntel Dios (3 Jn. 4). Tajol jiñi tatʌlob cheʼ miʼ yubiñob i bʌ bajcheʼ Ana, tsaʼ bʌ i yʌlʌ chaʼan tsiʼ majñʌbe Jehová jiñi i yalobil. Cheʼ bʌ jiñi tatʌlob miʼ coltañob Jehová bajcheʼ jiñi, miʼ yubiñob i tijicñʌyel (1 S. 1:28).

5. ¿Bajcheʼ mi lac mejlel laj coltan jiñi añoʼ bʌ ti laj congregación? (Qʼuele jiñi foto tac am bʌ tiʼ tejchibal).

⁵ ¿Chuqui miʼ mejlel lac mel miʼ maʼañic la queʼtel tac bajcheʼ tsaʼ bʌ ajli? Tajol miʼ mejlel laj coltan jiñi hermanojob añobix bʌ i jabilel, cʼamoʼ bʌ o añoʼ bʌ yambʌ i wocol tac. Cheʼ jaʼel, miʼ mejlel laj coltañob jiñi muʼ bʌ i cʌntañob jiñi hermanojob. La laj qʼuel majqui yom coltʌntel yaʼ ti laj congregación. Jumpʼejl ejemplo, tajol juntiquil hermana woliʼ cʌntan i tat añix bʌ i jabilel. ¿Chucoch maʼañic mi lac ñusaqʼuin la quicʼot jiñi tatʌl chaʼan jiñi hermana miʼ qʼuel chuqui tac yambʌ yom miʼ mel? O tajol mi la cʌcʼ lac bʌ chaʼan an majqui mi lac pʌy majlel ti tempa bʌ tac o mi lac julaʼtan juntiquil tiʼ familia am bʌ ti hospital, mi lac chaʼlen mʌñoñel o yan tac bʌ. Mi cheʼʌch mi lac mel, tajol cheʼʌch woli lac chaʼlen eʼtel la quicʼot Jehová chaʼan miʼ jacʼben i yoración jiñi hermanojob (pejcan 1 Corintios 10:24).

6. ¿Chuqui yom i yʌl jiñi pʼuntaya?

⁶ Jiñi xʼeʼtelob i chaʼan Dios cʌmbilob chaʼan miʼ pʌyob tiʼ yotot yambʌlob (He. 13:2). Ti Biblia mi lac taj cabʌl relato muʼ bʌ i cʌntesañonla chaʼan yom mi lac pʌy ti laj cotot yambʌlob (Gn. 18:1-5). Miʼ mejlel laj coltan yambʌlob cheʼ bʌ mucʼʌch i mejlel lac mel, i mach yʌlʌlic mi «choncol i chʼujbiñob Dios jaʼel» o maʼañic (Gá. 6:10, Jini wen bʌ tʼan).

7. ¿Chucoch yom mi lac pʌyob ti la cotot jiñi muʼ bʌ i melbeñob i yeʼtel Dios tiʼ pejtelel ora cheʼ miʼ julaʼtañob laj congregación?

⁷ Mi lac chaʼlen eʼtel la quicʼot Jehová  cheʼ bʌ mi lac pʌyob ti la cotot jiñi muʼ bʌ i melbeñob i yeʼtel Dios tiʼ pejtelel ora cheʼ miʼ julaʼtañob laj congregación (pejcan 3 Juan 5, 8). Jiñi muʼ bʌ i cʼotelob ti julaʼ miʼ yʌcʼ chaʼan mi lac «tem ñuqʼuesʌben lac bʌ lac pusicʼal» (Ro. 1:11, 12). Laʼ laj qʼuel tsaʼ bʌ ujti tiʼ tojlel jiñi hermano Olaf. Cheʼ bʌ xcolelto, juntiquil superintendente i chaʼan circuito maxto bʌ añic i yijñam tsiʼ julaʼta jiñi i congregación, pero maʼañic baqui miʼ cʌytʌl. Olaf tsiʼ cʼajtibe jiñi i tatob mach bʌ testigojobic, mi mucʼʌch i mejlel ti cʌytʌl tiʼ yototob jiñi hermano. Tsiʼ yʌlʌyob chaʼan mucʼʌch, pero tiʼ subeyob chaʼan Olaf miʼ cajel ti wʌyel ti sillón. Pero tsaʼʌch cʼʌjñibʌyi tsaʼ bʌ i mele. Olaf wen utsʼatax tsiʼ ñusa jiñi semana. Miʼ yʌl: «Wen sʌcʼan tac mi lon c tejchel i mi lon j cʌl temaj tac wen ñuc tac bʌ i cʼʌjñibal cheʼ woliyon lojon ti uchʼel. Jiñi tsaʼ bʌ c ñusa tsiʼ ñijcʌbeyon c pusicʼal chaʼan mic melben i yeʼtel Jehová tiʼ pejtelel ora». Ti jiñi 40 jab ñumeñix bʌ, Olaf an i chaʼle eʼtel bajcheʼ misionero ti cabʌl país.

8. ¿Chucoch yom mi lac pʌs la cutslel anquese maʼañic miʼ qʼuelob ti ñuc yilal? Alʌ jumpʼejl ejemplo.

⁸ Cabʌl bajcheʼ miʼ mejlel lac pʌsbeñob la cutslel jiñi mach bʌ laj cʌñʌyobic, anquese ti ñaxan maʼañic miʼ qʼuelob ti ñuc. Laʼ laj qʼuel jumpʼejl ejemplo. Ti España, juntiquil hermana woliʼ yʌqʼuen estudio juntiquil xʼixic tilem bʌ ti Ecuador i cʼabaʼ Yésica, cheʼ jiñi, ili xʼixic tsaʼ caji ti uqʼuel i jiñi hermana tsiʼ cʼajtibe chuqui woliʼ chaʼlen. Yésica tiʼ sube chaʼan wen pʼumpʼuñob cheʼ bʌ maxto yaʼic añob ti España, i ti jumpʼejl bʌ qʼuin maʼañic chuqui miʼ cʼuxob. Cojach miʼ yʌqʼuen i jap jaʼ jiñi i yalʌ chʼoc. Cheʼ bʌ woliʼ ñop i wʌychocon, tsaʼ caji ti oración. Pero mach wen jalic tsaʼ ñumi, tsaʼ cʼotiyob chaʼtiquil hermanajob. Yésica mach weñic tsiʼ jacʼʌ i tiʼ tsili jiñi revista tsaʼ bʌ i yʌqʼueyob. Tsiʼ yʌlʌ: «¿Jimba mi cajel cʌqʼuen i cʼux calʌ chʼoc iliyi?». Jiñi hermanajob tsiʼ lon ñopoyob i ñʌchʼchocon, pero maʼañic tsaʼ mejliyob. Mach wen jalic tsaʼ ñumi i jiñi hermanajob tsiʼ cʌybeyob bʌlñʌcʼʌl tiʼ yotot. Wʌle, jiñi Yésica miʼ yubin i tijicñʌyel cheʼ miʼ cʼajtesan jiñi i yutslel tsaʼ bʌ i pʌsʌ jiñi hermanajob, anquese miʼ yubin i chʼijiyemlel jaʼel come maʼañic tsiʼ qʼuele ti ñuc cheʼ bʌ Dios tsiʼ jacʼbe i yoración bajcheʼ jiñi. Pero ti jumpʼejl i pusicʼal tsaʼix i ñaʼta i melben i yeʼtel Jehová. Wocolix i yʌlʌ chaʼan jiñi hermanajob tsiʼ pʌsʌyob i yutslel (Ec. 11:1, 6).

9, 10. a) ¿Baqui tac bʌ eʼtel tsaʼ mejli wajali yaʼ ti Israel baqui tsaʼ cʼajtinti xcoltayajob? b) ¿Baqui tac bʌ eʼtel yom miʼ mejlel ti congregación?

⁹ Ti wajali, yaʼ ti Israel tsaʼ cʼajtinti majqui yom i chaʼleñob coltaya (Éx. 36:2; 1 Cr. 29:5; Neh. 11:2). Ti ili ora jaʼel, an cabʌl bajcheʼ miʼ mejlel la cʌcʼ i yorajlel lac chaʼan, lac chubʌʼan yicʼot chuqui la cujil melol chaʼan mi laj coltañob jiñi la quermañojob. Mi mucʼʌch lac chaʼlen coltaya mi cajel la cubin lac tijicñʌyel yicʼot mi caj lac taj cabʌl bendición.

¹⁰ Jiñi i Tʼan Dios miʼ suben jiñi wiñicob chaʼan miʼ chaʼleñob eʼtel yicʼot Jehová i miʼ chaʼleñob wersa chaʼan miʼ yochelob bajcheʼ anciano o siervo ministerial (1 Ti. 3:1, 8, 9; 1 P. 5:2, 3). Muʼ bʌ i melob bajcheʼ iliyi miʼ mulañob i coltan jiñi hermañojob ti chuqui i cʼʌjñibal bʌ i chaʼañob yicʼot tiʼ chaʼan bʌ Dios. (Hch. 6:1-4). ¿Am ba i cʼajtibeyoñobla jiñi ancianojob chaʼan mi la cochel bajcheʼ acomodador, chaʼan mi laj qʼuel jiñi jun tac o mi laj qʼuel baqui tac miʼ yujtel jiñi subtʼan, o chaʼan mi lac chaʼlen coltaya tiʼ sʌqʼuesʌntel i Yotlel Tempa bʌ o yan tac bʌ eʼtel? Jiñi hermanojob muʼ bʌ i chaʼleñob coltaya miʼ wen ubiñob i tijicñʌyel cheʼ miʼ melob ili eʼtel.

11. ¿Bajcheʼ tsiʼ coltayob juntiquil hermana jiñi i yamigajob tsaʼ bʌ i taja tiʼ melol i Yotlel Tempa bʌ tac?

¹¹ Jiñi muʼ bʌ i melob eʼtel tac tiʼ chaʼan bʌ  i yorganización Jehová miʼ tajob i yamigojob. Laʼ laj qʼuel tsaʼ bʌ ujti tiʼ tojlel Margie, juntiquil hermana am bʌ i chaʼle eʼtel 18 jab tiʼ melol i Yotlel Tempa bʌ tac. Cabʌl jab tsiʼ wen cʌntesa jiñi hermanajob xcolelobto bʌ. Jiñi hermana miʼ yʌl chaʼan cheʼʌch miʼ ñuqʼuesʌbeñob i bʌ i pusicʼal tiʼ chaʼan bʌ Dios (Ro. 1:12). I cheʼ bʌ tsiʼ ñusa wocol tac, jiñi i yamigajob tsiʼ wen coltayob. ¿Am baʼ chaʼle coltaya tiʼ melol i Yotlel Tempa bʌ? Miʼ mejlel lac mel anquese la cujil melol o maʼañic jumpʼejl eʼtel.

12. ¿Bajcheʼ mi lac mejlel ti coltaya cheʼ bʌ miʼ yujtel wocol tac bajcheʼ icʼ jaʼal?

¹² Jiñi wocol tac bajcheʼ jiñi icʼ jaʼal miʼ mejlel i yʌcʼ chaʼan jiñi xñoptʼañob miʼ tem chaʼleñob eʼtel yicʼot Jehová cheʼ miʼ coltañob jiñi hermanojob muʼ bʌ i tajob ili wocol tac. Jumpʼejl ejemplo, miʼ mejlel i yʌcʼob taqʼuin chaʼan jiñi añoʼ bʌ ti jiñi wocol (Jn. 13:34, 35; Hch. 11:27-30). Cheʼ jaʼel, miʼ mejlel i chaʼleñob coltaya chaʼan miʼ sʌqʼuesʌntel o i tojʼesʌntel tsaʼ bʌ jejmi tac. Juntiquil hermana ti Polonia i cʼabaʼ Gabriela tsaʼ jejmi i yotot cheʼ bʌ tsaʼ ñumi butʼjaʼ. Pero tsiʼ yubi i tijicñʌyel cheʼ bʌ tsaʼ cʼoti jiñi hermanojob tilemoʼ bʌ ti lʌcʼʌl bʌ congregación tac chaʼan miʼ coltañob. Miʼ yʌl: «Mach comic j cʌl chuqui tac tsaʼ c sʌtʌ, come mucʼ jach i jilel jiñi chubʌʼañʌl tac. Mic mulan j cʌl chuqui tac tsaʼ c taja. Tsaʼ bʌ c ñusa miʼ yʌqʼueñon c ñaʼtan chaʼan cheʼ añon tiʼ yorganización Jehová jiñʌch ñuc bʌ majtañʌl yicʼot baqui mic taj c tijicñʌyel». Cabʌl hermanojob tsaʼ bʌ coltʌntiyob cheʼ bʌ tsiʼ tajayob jiñi wocol, miʼ yʌlob chaʼan tsaʼ bʌ i ñusayob tsiʼ wen pʼʌtʼesayob. Jiñi muʼ bʌ i coltañob Jehová ti jiñi eʼtel, miʼ wen tajob i tijicñʌyel (pejcan Hechos 20:35; 2 Corintios 9:6, 7).

13. ¿Bajcheʼ miʼ pʼʌtʼesan laj cʼuxbiya ti Jehová cheʼ mi la cʌcʼ lac bʌ chaʼan mi lac chaʼlen coltaya? Alʌ jumpʼejl ejemplo.

¹³ Juntiquil hermana i cʼabaʼ Stephanie yicʼot yambʌ xsubtʼañob tsiʼ yubiyob i tijicñʌyel cheʼ bʌ tsiʼ coltayob yambʌ Testigojob tsaʼ bʌ loqʼuiyob tiʼ país tiʼ caj jiñi guerra i tsaʼ cʼotiyob ti putsʼel ti Estados Unidos. Tsiʼ chaʼleyob coltaya i sʌclan yicʼot i tojʼesan jiñi otot tac baqui mi caj i cʌytʌlob jiñi hermanojob. Jiñi hermana miʼ yʌl:«Tsiʼ ñijca lon c pusicʼal cheʼ bʌ tsiʼ tajayob i tijicñʌyel yicʼot cheʼ tsiʼ qʼueleyob ti ñuc chaʼan bajcheʼ jiñi  hermanojob tsiʼ pʌsbeyob i cʼuxbiya. Miʼ lon ñaʼtañob chaʼan joñon lojon tsaʼ lon c chaʼle coltaya, pero tiʼ sujm jiñʌch tsaʼ bʌ i ñumen coltayon lojon. Jiñi cʼuxbiya, muchʼtʌlel yicʼot jiñi ñopoñel (chʼujbiya) am bʌ lon j qʼuele, an i ñumen pʼʌtʼesa lon j cʼuxbiya ti Jehová. Iliyi an i ñumen aqʼueyon lon j qʼuel ti ñuc pejtelel jiñi muʼ bʌ i yʌqʼueñonla tiʼ yorganización Jehová».

14, 15. a) ¿Bajcheʼ tsiʼ jacʼʌ jiñi xʼaltʼan Isaías? b) Jiñi xñoptʼañonbʌla, ¿bajcheʼ miʼ mejlel lac lajin Isaías?

¹⁴ ¿La com ba lac ñumen chaʼlen eʼtel la quicʼot Jehová? Cheʼ bʌ jiñi organización miʼ subeñonla majlel yaʼ baqui yom xʼeʼtelob, ¿muʼ ba lac mulan majlel ti chumtʌl ti yambʌ tejclum? Tiʼ sujm, jiñi i wiñiconbʌla Dios mach xicʼbiloñicla chaʼan mi lac majlel ti ñajt i mi laj cʌy la cotot chaʼan mi lac pʌs la cutslel. Pero an hermanojob mucʼʌch bʌ i mejlelob ti majlel ti ñajt chaʼan miʼ melbeñob i yeʼtel Jehová. Cheʼʌch miʼ ñaʼtañob bajcheʼ jiñi xʼaltʼan Isaías. Jehová tsiʼ cʼajti: «¿Majqui mi caj c choc majlel baʼan c chaʼañoʼ bʌ? ¿Majqui yom majlel i sub c tʼan?», i jiñi xʼaltʼan tsiʼ jacʼʌ: «Um baʼ añon c Yum. Chocoyon majlel» (Is. 6:8). ¿Cheʼ ba mi lac mulan lac jacʼ jeʼel cheʼ bʌ miʼ cʼajtintel coltaya i maʼañic chuqui miʼ mʌctañonla chaʼan mi lac mel? ¿Chuqui tac ti eʼtel yomto bʌ miʼ mejlel ili ora?

¹⁵ Cheʼ mi la cʌl chaʼan jiñi subtʼan yicʼot mi lac sutqʼuiñob ti xñoptʼan jiñi quixtañujob, Jesús tsiʼ yʌlʌ: «Isujm, wen cabʌl cʼajbal pero maʼanic cabʌl xʼeʼtelob. Jini chaʼan cʼajtibenla i Yum cʼajbal ti wocol tʼan chaʼan miʼ choc majlel xʼeʼtelob tiʼ cʼajbal» (Mt. 9:37, 38). ¿Mejl ba la cochel bajcheʼ precursor baqui yomto miʼ sujbel jiñi wen tʼan? O ¿muʼ ba i mejlel laj coltan yambʌ chaʼan miʼ mel jiñi? Cabʌl hermanojob mi chaʼleñob eʼtel bajcheʼ precursor baqui yomto xsubtʼañob i cheʼ bajcheʼ jiñi miʼ pʌsob i cʼuxbiya ti Jehová yicʼot tiʼ piʼʌlob. ¿Anto ba bajcheʼ miʼ mejlel lac ñumen melben i yeʼtel Jehová? Mi mucʼʌch lac mel iliyi, mi caj lac taj cabʌl tijicñʌyel.

16, 17. ¿Bajcheʼ tac mi lac ñumen melben i yeʼtel Jehová?

¹⁶ ¿Muʼ bʌ lac mulan lac chaʼlen coltaya chaʼpʼejl uxpʼejl qʼuin ti jumpʼejl semana o chaʼpʼejl uxpʼejl uw ti Betel o tiʼ melol i Yotlel Tempa bʌ? Ili ora, anto yom cabʌl hermanojob chaʼan miʼ chaʼleñob coltaya ti baqui jach miʼ subentelob majlel yicʼot baqui jach bʌ eʼtel miʼ yʌqʼuentelob i mel. Tajol miʼ mejlel lac chaʼlen eʼtel yaʼ baqui yomto coltʌntel anquese mach bʌ lajalic yicʼot la cujil bʌ melol. Tiʼ sujm, Jehová miʼ qʼuel ti ñuc jiñi muʼ bʌ i cʌyob i chubʌʼan chaʼan miʼ chaʼleñob coltaya ti baqui jach bʌ eʼtel miʼ subentelob (Sal. 110:3).

¹⁷ Mi la com lac ñumen chajpan lac bʌ chaʼan mi lac melben i yeʼtel Jehová, tajol miʼ mejlel lac tsʼʌctesan chuqui tac miʼ cʼajtintel chaʼan mi lac majlel ti jiñi Cʌntesʌntel chaʼan xSubtʼañob chaʼan bʌ i Yumʌntel Dios. Yaʼi miʼ chajpʌntel wiñicob xʼixicob muʼ bʌ i chaʼleñob subtʼan tiʼ pejtelel ora chaʼan jiñi i yorganización Jehová miʼ mejlel i ñumen cʼʌñob. Muʼ bʌ i cʼajtiñob majlel ti ili cʌntesʌntel yom miʼ jacʼob i mel baqui jach bʌ eʼtel cheʼ bʌ miʼ yujtel jiñi cʌntesʌntel. ¿La comʌch ba majlel ti ili cʌntesʌntel, i cheʼ jiñi, mi lac ñumen taj eʼtel tac tiʼ tejclum Dios? (1 Co. 9:23).

18. ¿Chuqui ti wenlel mi lac taj cheʼ mi lac chaʼlen eʼtel la quicʼot Jehová tiʼ jujumpʼejl qʼuin?

¹⁸ Jiñi i wiñiconbʌla Jehová la com lac pʌs la cutslel, laj cʼuxbiya yicʼot mi laj qʼuelob ti ñuc jiñi yambʌlob ti jujumpʼejl qʼuin. Iliyi miʼ yʌqʼueñonla lac taj lac tijicñʌyel yicʼot lac ñʌchʼtʌlel (Gá. 5:22, 23). Mach yʌlʌlic chuqui woli lac ñusan, miʼ mejlel lac taj lac tijicñʌyel cheʼ mi lac lajin i yutslel Jehová yicʼot cheʼ ochemonla ti jiñi muʼ bʌ i melbeñob i yeʼtel (Pr. 3:9, 10).