COME añonla «ti cojix bʌ qʼuin tac» jiñi lac wocol woli (choncol) i ñumen tsʌtsʼan majlel, jin chaʼan, jiñi i wiñiconbʌla Jehová i cʼʌjñibal mi lac chaʼlen pijt (2 Ti. 3:1-5). Ti ili pañimil jiñi wiñicob xʼixicob (quixtañujob) ti isujm miʼ bajñel cʼuxbiñob i bʌ, mach utsʼat miʼ tojʼesañob i wocol i maʼañic miʼ ticʼob i bʌ. Ili quixtañujob maʼañic miʼ pʌsob i pijt, jin chaʼan pejtelel xñoptʼañonbʌla yom mi la cʼajtiben lac bʌ: «¿Lajalix ba quicʼot jiñi quixtañujob mach bʌ yujilob pijt? ¿Chuqui yom i yʌl cheʼ la cujil pijt? ¿Chuqui yom mic mel chaʼan ti bele ora mic pʌs tic melbal jiñi pijt?».

Yaʼ ti Biblia, cheʼ miʼ yʌjlel jiñi pijt mach cojach yom i yʌl chaʼan mi lac lʌtʼ tsʌts bʌ wocol. Juntiquil yujil bʌ pijt miʼ cuch wocol come an chuqui woli (yʌquel) i pijtan. Yom i yʌl chaʼan yom miʼ tojʼan jiñi wocol. Cheʼ bʌ la cujil pijt mach cojach mi lac ñaʼtan jiñi lac wenlel, mucʼʌch lac ñaʼtañob yambʌlob jaʼel. Cheʼto jaʼel jiñi mach bʌ weñic chuqui miʼ melob ti lac tojlel. Maʼañic miʼ cʼotel lac ñaʼtan chaʼan maʼañix baʼ ora mi caj lac pejcan jiñi quixtañu i mi lac pijtan chaʼan miʼ tojʼan. Jin chaʼan, maʼañic miʼ yʌcʼ ti toj sajtel lac pusicʼal cheʼ bʌ jiñi i Tʼan Dios miʼ yʌl chaʼan jiñi pijt yaʼʌch tilem ti jiñi cʼuxbiya (1 Co. 13:4). * Cheʼ jaʼel, yaʼ ochem ti jiñi i «wut muʼ bʌ i yʌcʼ jiñi espíritu» (Gá. 5:22, 23, TNM). Cheʼ jiñi, ¿chuqui yom mi lac mel chaʼan mi lac taj jiñi pijt?

Chaʼan la cujil pijt, yom mi laj cʼajtiben i yespíritu Jehová chaʼan miʼ coltañonla, come miʼ yʌqʼuen jiñi muʼ bʌ i ñopob (Lc. 11:13). Anquese wen pʼʌtʌl jiñi i yespíritu yomʌch mi lac chaʼlen wersa jaʼel, i mi lac pʌs ti lac melbal chuqui mi laj cʼajtin (Sal. 86:10, 11). Ili yom i yʌl, chaʼan yom mi lac chaʼlen wersa lac pʌs chaʼan la cujil pijt ti jujumpʼejl qʼuin, i chaʼan miʼ yochel jiñi pijt ti lac melbal. Cheʼ jaʼel, anto chuqui yom bʌ mi lac mel chaʼan jiñi pijt muqʼuix i cʌytʌl ti lac melbal. ¿Chuqui yom i yʌl jiñi?

Miʼ mejlel lac taj lac pijt cheʼ bʌ mi lac tsajin yicʼot mi lac lajin jiñi toj bʌ ejemplo i chaʼan bʌ Jesús. Cheʼ bʌ jiñi apóstol Pablo tsiʼ yʌlʌ chaʼan jiñi ‹tsijiʼ bʌ lac pusicʼal›, yaʼ bʌ ochem jiñi pijt, tiʼ sube jiñi xñoptʼañob: «Laʼ i ñijcan laʼ pusicʼal i ñʌchʼtʌlel Cristo» (Col. 3:10; 3:12, 15, TNM). Chaʼan jiñi ñʌchʼtʌlel miʼ «ñijcan» lac pusicʼal, yom mi lac lajin i ñopoñel (chʼujbiya) Jesús chaʼan Dios mi caj i tojʼesan jiñi wocol tac. Mi mucʼʌch lac tsajcʌben i melbal cristo maʼañic chuqui mi caj i yʌqʼueñonla lac sʌt lac pijt i mach yʌlʌyic chuqui miʼ yujtel ti lac tojlel (Jn. 14:27; 16:33).

 Ti lac pejtelel la comix chaʼan miʼ tilel jiñi tsijiʼ bʌ pañimil (mulawil). Pero mi lac ñumen pʌs lac pijt cheʼ bʌ mi lac ñaʼtan chaʼan Jehová an i pʌsʌ i pijt ti lac tojlel. Jiñi Chʼujul bʌ Tsʼijbujel miʼ yʌl: «Lac Yum maʼanic miʼ jalitesan i mel chuqui albil i chaʼan cheʼ bajcheʼ miʼ lon alob chaʼtiquil uxtiquil. Woliʼ pijtañonla come mach yomic miʼ sajtel mi juntiquilic. Yom mi laj cʌy lac mul ti lac pejtelel» (2 P. 3:9). Cheʼ bʌ mi lac ñaʼtan chaʼan Jehová an i pʌsʌ i pijt, miʼ coltañonla chaʼan mi lac ñumen pʌs lac pijt tiʼ tojlel yambʌlob (Ro. 2:4). ¿Baqui tac yom mi lac pʌs lac pijt?

An cabʌl bajcheʼ miʼ yʌjqʼuel ti wocol jiñi lac pijt. Jumpʼejl ejemplo, yom la cujil pijt chaʼan maʼañic mi lac waʼ otsan lac tʼan cheʼ bʌ woliyob ti tʼan yambʌlob tajol mi lac ñaʼtan chaʼan wen ñuc i cʼʌjñibal chuqui mi caj la cʌl (Stg. 1:19). Cheʼ jaʼel, yom la cujil pijt cheʼ bʌ an la quicʼot hermanojob maʼañic bʌ mi lac mulabeñob i melbal. Chaʼan mach lecojic mi laj qʼuelob, yom mi lac ñaʼtan chaʼan Jehová yicʼot Jesús yujilob pijt cheʼ bʌ an laj cʼunlel tac. Mach jin jach miʼ qʼuelob jiñi mach bʌ toj lac melbal. Tiʼ sujm, jiñʌch miʼ qʼuelob jiñi wem bʌ lac melbal yicʼot cheʼ mi lac chaʼlen wersa lac tojʼesan lac bʌ (1 Ti. 1:16; 1 P. 3:12).

Cheʼ jaʼel miʼ yʌjqʼuel ti wocol jiñi lac pijt cheʼ bʌ an majqui miʼ yʌl chaʼan tsaʼ la cʌlʌ o tsaʼ lac mele mach bʌ weñic. Cheʼ miʼ yujtel jiñi, orajach mi lac michʼan yicʼot mi laj coltan lac bʌ. Pero jiñi i Tʼan Dios miʼ subeñonla chuqui yom mi lac mel: «Jini muʼ bʌ i cuch wocol ñumen utsʼatʌch i pusicʼal bajcheʼ jini chan bʌ miʼ mel i bʌ. Mach a bʌcʼ michʼan, come i tilel jini tontojob cheʼʌch miʼ melob» (Ec. 7:8, 9). Cheʼto jaʼel, mi mach isujmic jiñi woli bʌ i yʌjlel ti lac tojlel, yom la cujil pijt chaʼan mi lac ñaʼtan bajcheʼ mi caj lac jacʼ. Cheʼʌch tsiʼ mele Jesús cheʼ bʌ tsiʼ yʌlʌyob lot tac tiʼ tojlel (Mt. 11:19).

Jiñi tatʌlob yom yujilob pijt cheʼ bʌ miʼ qʼuelob chaʼan i yalobilob yomob coltʌntel chaʼan mach tac bʌ weñic i melbal yicʼot cheʼ mach toj chuqui miʼ mulañob. Laʼ lac ñaʼtan tsaʼ bʌ ujti tiʼ tojlel Mattias am bʌ ti Betel yaʼ ti Europa. Cheʼ bʌ xcolelto, miʼ wajlentel tiʼ pejtelel ora yaʼ ti escuela chaʼan i ñopoñel. Jiñi i tatob maʼañic tsiʼ wis ñaʼtayob choncol bʌ i ñusan. Pero tsaʼ caji i qʼuelob chaʼan maʼañix miʼ wen ñop jiñi i sujmlel. Gillis, jiñi tatʌl, miʼ cʼajtesan: «Tsaʼ lon c wen pʌsʌ lon c pijt». Mattias miʼ mel cʼajtiya bajcheʼ ili: «¿Majqui jiñi Dios? ¿I tʼañʌch ba Dios jiñi Biblia? ¿Bajcheʼ mi lac ñaʼtan chaʼan jiñʌch Dios miʼ subeñonla chuqui yom mi lac mel?». Cheʼ jaʼel miʼ cʼajtiben i tat: «¿Chucoch mach weñic mij qʼuejlel cheʼ mach lajalic mic ñop bajcheʼ muʼ bʌ laʼ ñop jatetla?».

Gillis miʼ yʌl: «An i tajol jiñi lon j calobil michʼ miʼ pejcañon lojon, pero mach tiʼ tojlelic i ñaʼ o tic tojlel, jiñʌch tiʼ tojlel jiñi i sujmlel, mi yʌqʼuen i mul chaʼan tsʌts woliʼ ñusan i cuxtʌlel». ¿Chuqui tsiʼ mele Gillis? Miʼ yʌl: «Tsaʼ buchle tac quicʼot i cabʌl ora tsaʼ lon c chaʼle tʼan. Mic ñʌchʼtan chuqui tac miʼ yʌl i an i tajol mic  melben cʼajtiya tac chaʼan mic ñaʼtan bajcheʼ miʼ yubin i bʌ yicʼot chuqui miʼ pensalin. An chuqui tiʼ tsictesʌbe chaʼan ñaxan miʼ pensalin i cheʼ jiñi mi lon c chaʼ chaʼlen tʼan. An i tajol, mic suben chaʼan miʼ yʌqʼueñon chaʼpʼejl uxpʼejl qʼuin chaʼan mic wen ñaʼtan jiñi tsaʼ bʌ i subeyon. Wocolix i yʌlʌ chaʼan tsaʼ lon chaʼle tʼan tac, Mattias tsiʼ teche i chʼʌmben isujm yicʼot i chʼujbin jiñi cʌntesa chaʼan i tojol mulil, i yumʌntel Jehová yicʼot jiñi i cʼuxbiya Dios. Cabʌl ora tsaʼ ñumi, i an i tajol mach cʼuñic ti melol, pero jiñi i cʼuxbiya ti Jehová xucʼu xucʼul tsaʼ coli majlel. Jiñi quijñam yicʼot joñon wen tijicñayon lojon chaʼan jiñi pijt tsaʼ bʌ lon c pʌsbe Mattias cheʼ bʌ xcolelto come tsiʼ colta yicʼot tsaʼ cʼoti ti pusicʼal».

Cheʼ bʌ Gillis yicʼot i yijñam woliʼ ñop i coltañob i yalobil tsiʼ ñopoyob chaʼan Jehová mi caj i coltañob. Gillis miʼ yʌl: «An i tajol tsaʼ c sube Mattias chaʼan i ñaʼ yicʼot joñon mi lon c wen cʼuxbin, jin chaʼan, mi lon j cʼajtiben Jehová chaʼan miʼ coltan». Ili tatʌlob wen tijicña miʼ yubiñob i bʌ chaʼan tsiʼ pʌsbeyob i pijt i yalobil.

Jiñi isujm bʌ xñoptʼañob yom yujilob pijt cheʼ bʌ miʼ cʌntan jiñi i familiajob o i yamigojob woli bʌ i ñusañob cʼamʌjel maʼañix bʌ i tsʼʌcal. Laʼ laj qʼuel tsaʼ bʌ ujti tiʼ tojlel Ellen, * chʼoyol bʌ ti Europa.

Añix cheʼ bʌ waxʌcpʼejl jab, jiñi i ñoxiʼal Ellen chaʼyajl tsiʼ taja cʼamʌjel ti jol tsaʼ bʌ i ticʼla, come maʼañix chuqui miʼ pʼuntan, maʼañix miʼ yubin tijicñʌyel mi chʼijiyemlel. Iliyi wen wocolʌch miʼ yubin Ellen. Miʼ yʌl: «An c wen pʌs c pijt yicʼot an c chaʼle cabʌl oración». I miʼ bej al: «Jiñi texto muʼ bʌ c wen mulan i miʼ ñumen coltañob jiñʌch Filipenses 4:13 muʼ bʌ i yʌl: ‹Miʼ mejlel j cuch tiʼ pejtelel chuqui jach wocolix i yʌlʌ jiñi muʼ bʌ i yʌqʼueñon c pʼʌtʌlel›». * Wocolix i yʌlʌ jiñi pʼʌtʌlel, Ellen miʼ bej pʌs i pijt yicʼot miʼ ñop chaʼan Jehová jiñʌch mi caj i coltan (Sal. 62:5, 6).

Jiñi ñumen yujil bʌ pijt jiñʌch Jehová (2 P. 3:15). Ti Biblia, an cabʌl baqui mi lac taj chaʼan bajcheʼ Jehová tsiʼ pʌsʌ chaʼan yujil pijt (Neh. 9:30; Is. 30:18). Jumpʼejl ejemplo, laʼ laj qʼuel bajcheʼ tsiʼ jacʼbe Abrahán cheʼ bʌ tsiʼ melbe cʼajtiya tac chaʼan mi caj i jisan Sodoma. Jehová tsiʼ ñʌchʼta Abrahán i maʼañic tsiʼ ñʌchʼchoco cheʼ bʌ woliʼ suben pejtelel chuqui miʼ cʼojoʼtan. Cheʼ jaʼel, tsiʼ pʌsʌ chaʼan tsaʼʌch i ñʌchʼta come tsiʼ chaʼ alʌ chuqui tac tsiʼ yʌlʌ Abrahán, i tsiʼ yʌqʼue i tʼan chaʼan maʼañic miʼ caj i jisan Sodoma mi tsiʼ taja lujuntiquil wiñicob tojoʼ bʌ i melbal (Gn. 18:22-33). ¡Iliyi jiñʌch ñumen ñuc bʌ ejemplo chaʼan pijt yicʼot ticʼ bʌ!

Jiñi pijt jiñʌch yom bʌ mi lac pʌs ti lac melbal, jiñi tsijiʼ bʌ lac pislel yom bʌ mi lac xoj jiñi xñoptʼañonbʌla. Mi mucʼʌch lac chaʼlen wersa chaʼan mi lac pʌs ti lac melbal jiñi pijt, mi caj i yʌqʼuen i ñuclel jiñi lac Tat am bʌ ti panchan, jiñi yujil bʌ cʼuxbiya yicʼot yujil bʌ pijt, i mi caj la cajñel la quicʼot jiñi muʼ bʌ i «chaʼleñob pijt tiʼ xucʼtʌlel i pusicʼal woli bʌ i ñopob» (He. 6:10-12).