1. Cheʼ bajcheʼ miʼ yʌl Hebreos 12:1, ¿chuqui yom mi lac mel chaʼan miʼ mʌjlel lac chaʼan jiñi ajñel?

 JIÑI Biblia miʼ yʌl chaʼan woliyonla (choncolonla) ti ajñel, i mi mucʼʌch la cujtesan mi caj lac taj jiñi lac majtan: Jiñi cuxtʌlel mach bʌ añic miʼ jilel (2 Tim. 4:7, 8). Yomʌch mi lac chaʼlen wersa chaʼan mi lac bej chaʼlen ajñel come tsʼitaʼ jachix yom chaʼan mi la cujtesan. ¿Chuqui mi caj i coltañonla chaʼan miʼ mʌjlel lac chaʼan? Jiñi apóstol Pablo, tsaʼ bʌ mʌjli i chaʼan jiñi ajñel, tsiʼ yʌlʌ: «Laʼ laj cʌy pejtelel jiñi laj cuch […], i mach lujbʼaconla ti jiñi ajñel baqui tsaʼ ochiyonla» (pejcan Hebreos 12:1).

2. ¿Chuqui yom i yʌl cheʼ yom mi «laj cʌy pejtelel jiñi laj cuch»?

² ¿Chuqui yom i yʌl cheʼ yom mi «laj cʌy pejtelel jiñi laj cuch»? Mach yomic i yʌl chaʼan maʼañix chuqui mi lac junyaj chʼʌm majlel. Yom bʌ i yʌl Pablo jiñʌch chaʼan yom mi laj cʌy jiñi mach bʌ añic i cʼʌjñibal, mucʼ jach bʌ i mʌctañonla yicʼot miʼ lujbʼesañonla. Pero an tacʌch yom bʌ mi laj cuch majlel, come mi tsaʼ laj cʌyʌ mi lac mejlel ti chojquel loqʼuel ti jiñi ajñel (2 Tim. 2:5). Laʼ laj qʼuel chuqui jiñi yomʌch bʌ mi laj cuch majlel.

3. a) Cheʼ bajcheʼ miʼ yʌl Gálatas 6:5, ¿chuquiyes jiñi yom bʌ mi lac chʼʌm majlel jujuntiquilonla? b) ¿Chuqui mi caj laj qʼuel ti ili estudio, i chucoch?

³ (Pejcan Gálatas 6:5). Pablo tsiʼ yʌlʌ chaʼan jujuntiquil xñoptʼan mi caj i chʼʌm majlel jiñi i cuch. ¿Chuqui woliʼ taj ti tʼan ilayi? Jiñʌch am bʌ ti lac wenta chaʼan mi lac mel tiʼ tojlel Dios i maʼañic majqui yambʌ miʼ mejlel i mel ti lac wenta. Ti ili estudio mi caj laj qʼuel chuqui tac jiñi yom bʌ mi lac chʼʌm majlel i chuqui mi caj i coltañonla chaʼan mi  lac mel. Cheʼ jaʼel, mi caj laj qʼuel baqui tac bʌ jiñi mach bʌ yomix mi lac chʼʌm majlel i bajcheʼ miʼ mejlel laj cʌy. Pero ñuc i cʼʌjñibal chaʼan mach ñumeñic ti pʼis chuqui mi lac chʼʌm majlel, cheʼ bajcheʼ jiñi mi caj i mejlel la cujtesan jiñi ajñel i mi lac taj laj cuxtʌlel.

4. ¿Chucoch mach alic bʌ laj cuch cheʼ tsaʼ la cʌcʼʌ lac bʌ ti Jehová? (Qʼuele jaʼel jiñi foto tac).

⁴ Cheʼ tsaʼ la cʌcʼʌ lac bʌ ti Jehová. Cheʼ bʌ tsaʼ la cʌcʼʌ lac bʌ ti Jehová tsaʼ lac sube chaʼan mi caj lac melben i yeʼtel (troñel) yicʼot mi caj lac chʼujutesan. I yomʌch mi lac tsʼʌctesan jiñi lac tʼan. La cujil chaʼan wen ñucʌch tsaʼ bʌ lac mele, pero mach jumpʼejlic al bʌ laj cuch, ¿chucoch? Come Jehová tsiʼ meleyonla chaʼan mi lac melben i yeʼtel, chaʼan mi lac mulan laj cʌn yicʼot lac chʼujutesan. I come tsiʼ meleyonla (pʌtʌyonla) tiʼ yejtal, miʼ mejlel lac lʌcʼtesan lac bʌ tiʼ tojlel yicʼot la cubin lac tijicñʌyel cheʼ mi lac mel chuqui yom (Sal. 40:8; Apoc. 4:11). Cheʼ jaʼel, cheʼ mi lac mel chuqui yom Jehová yicʼot mi lac lajin i Yalobil, miʼ tijicñesan lac pusicʼal (Mat. 11:28-30).

5. ¿Chuqui mi caj i coltañet a tsʼʌctesan a tʼan? (1 Juan 5:3).

 ⁵ ¿Chuqui mi caj i coltañet a chʼʌm majlel jiñi a cuch? Ñaxam bʌ, ñumen cʼuxbin Jehová. Cheʼ bajcheʼ jiñi, mach wocolic mi caj a wubin chaʼan maʼ jacʼben i tʼan. Jin chaʼan, wen ñaʼtan chuqui an i mele ti a tojlel yicʼot jiñi bendición tac muʼ bʌ caj a taj ti talto bʌ qʼuin, cheʼ bajcheʼ jiñi mi caj i pʼʌtʼan jiñi a cʼuxbiya ti Jehová (pejcan 1 Juan 5:3). I chaʼpʼejlel, lajin Jesús. Jesús tsaʼ mejli i melben i yeʼtel Jehová come tsiʼ cʼajtibe i coltaya yicʼot tsiʼ chʌn ñaʼta jiñi i majtan (Heb. 5:7; 12:2). Cheʼ bajcheʼ tsiʼ mele Jesús, cʼajtiben i coltaya Jehová i chʌn cʼajtesan chaʼan maʼ mejlel ti chumtʌl tiʼ pejtelel ora. Mi mucʼʌch a ñumen cʼuxbin Jehová yicʼot maʼ lajin Jesús, mi caj a mejlel a tsʼʌctesan jiñi a tʼan tsaʼ bʌ a wʌcʼʌ.

6. ¿Chucoch yomʌch mi lac tsʼʌctesan jiñi am bʌ ti lac wenta lac mel ti lac familia? (Qʼuele jaʼel jiñi foto tac).

⁶ Jiñi am bʌ ti lac wenta lac tsʼʌctesan ti lac familia. La cujil chaʼan yom mi laj cʼuxbin Jehová yicʼot Jesús, ñumento bajcheʼ jiñi lac familia (Mat. 10:37). Pero, ili mach yomic i yʌl chaʼan i melol i yeʼtel Jehová mi caj i mʌctañonla chaʼan mi lac tsʼʌctesan jiñi yom bʌ melol ti lac famillia. Tiʼ sujm, chaʼan Jehová yicʼot Jesús utsʼat miʼ qʼueloñobla, yomʌch mi lac tsʼʌctesan jiñi tsaʼ bʌ aqʼuentiyonla ti lac wenta jujuntiquilonla ti lac familia (1 Tim. 5:4, 8). Cheʼ bajcheʼ jiñi tijicña mi caj la cajñel. Jin chaʼan, jiñi ñujpuñemoʼ bʌ yom miʼ cʼuxbiñob i bʌ yicʼot miʼ qʼuelob i bʌ ti ñuc, jiñi tatʌlob yom miʼ cʼuxbiñob i yalobilob yicʼot miʼ cʌntesañob i jiñi xcolelob yom miʼ jacʼbeñob i tʼan i tat i ñaʼ, jiñʌch yom bʌ Jehová tiʼ tojlel jiñi familia tac chaʼan tijicña miʼ yajñelob (Efes. 5:33; 6:1, 4).

7. ¿Chuqui mi caj i coltañet a tsʼʌctesan jiñi am bʌ ti a wenta a mel ti a familia?

⁷ ¿Chuqui mi caj i coltañet a chʼʌm majlel jiñi a cuch? Chaʼlen wersa chaʼan maʼ jacʼ jiñi ticʼojel tac muʼ bʌ i chʼʌm tilel jiñi Biblia. Mach a mel bajcheʼ maʼ bajñel ñaʼtan, bajcheʼ ñʌmʌlob ti a cultura o cheʼ bajcheʼ miʼ yʌlob jiñi añoʼ bʌ i ñaʼtʌbal miʼ yʌlob (Pr. 24:3, 4). Cʼʌñʌ jiñi publicación tac am bʌ lac chaʼan, yaʼi miʼ tsictesan bajcheʼ miʼ mejlel a jacʼ jiñi principio tac am bʌ ti Biblia. Jumpʼejl ejemplo, yaʼ ti jw.org miʼ mejlel a taj ticʼojel tac chaʼan jiñi ñujpuñemoʼ bʌ, jiñi tatʌl ñaʼʌlob yicʼot jiñi xcolelob. b Acʼʌ ti a pusicʼal chaʼan maʼ jacʼ jiñi ticʼojel tac am bʌ ti Biblia, anquese a bajñel jach woli (yʌquel) a chaʼlen wersa ti a familia, pero mi caj a qʼuel chaʼan mi caj i luʼ tajob i wenlel, i Jehová mi caj i yʌqʼueñet i bendición (1 Ped. 3:1, 2).

8. ¿Chuqui miʼ yujtel mi mach weñic muʼ bʌ lac yajcan lac mel?

⁸ I wocolel cheʼ mach weñic chuqui mi lac yajcan lac mel. Jehová libre tsiʼ meleyonla chaʼan mi lac yajcan chuqui mi caj lac mel, i yom chaʼan jiñi muʼ bʌ lac mel miʼ yʌqʼueñonla lac tijicñʌyel. Pero mi mach weñic muʼ bʌ lac yajcan, maʼañic mi caj i cʌntañonla chaʼan maʼañic mi lac taj wocol (Gál. 6:7, 8). Jin chaʼan, mi mach weñic chuqui mi lac mel, mach weñic bajcheʼ mi lac chaʼlen tʼan yicʼot orajach chuqui tac mi lac mel, yom mi lac ñaʼtan chaʼan mucʼʌch caj lac taj wocol.  An i tajol muʼto lac chaʼ ñaʼtan lac bʌ chaʼan tsaʼ bʌ lac mele i mach tijicñayic mi la cubin lac bʌ. Pero iliyi miʼ mejlel i coltañonla chaʼan mi lac sub jiñi tsaʼ bʌ lac mele, mi lac tojʼesan lac bʌ i mi lac chaʼlen wersa chaʼan maʼañic mi lac chaʼ mel. Cheʼ bajcheʼ jiñi, mi caj lac bej chaʼlen ajñel chaʼan mi lac taj laj cuxtʌlel.

9. ¿Chuqui mi caj i coltañet mi mach weñic tsaʼ bʌ a yajca a mel? (Qʼuele jaʼel jiñi foto tac).

⁹ ¿Chuqui mi caj i coltañet a chʼʌm majlel jiñi a cuch? Ñaʼtan chaʼan mi tsaʼix a mele, maʼañix chuqui miʼ mejlel a mel. Jin chaʼan, mach a putun ñaʼtañix, mach a cʌlʌx ubin a chʼijyemlel, mach a wʌqʼuen tiʼ mul yambʌlob mi yomic maʼ sʌclan a tʼan chaʼan maʼ coltan a bʌ. Ñumen wen cheʼ maʼ ñaʼtan chaʼan tsaʼix ñajʌyiyet i maʼ sʌclan chuqui miʼ mejlel a mel chaʼan maʼ tojʼesan. Mi mach tijicñayic maʼ wubin chaʼan tsaʼ bʌ a mele, pejcan Jehová, suben jiñi a mul yicʼot cʼajtiben chaʼan miʼ ñusʌbeñet (Sal. 25:11; 51:3, 4). Mi an majqui tsaʼ lowo ti a tʼan o tsaʼ melbe mach bʌ weñic, cʼajtin chaʼan maʼ ñusʌbentel. I mi yomʌch maʼ qʼuel, pejcan jiñi ancianojob (Sant. 5:14, 15). Ñaʼtan jiñi tsaʼ bʌ a mele chaʼan maʼ cʌn pañimil i maʼañic maʼ chaʼ mel. Miʼ mejlel a ñop chaʼan Jehová mi caj i coltañet yicʼot mi caj i pʌsbeñet i pʼuntaya (Sal. 103:8-13).

10. ¿Chucoch jumpʼejlʌch al bʌ cuchʌl cheʼ ñumeñix ti pʼis muʼ bʌ lac pijtan ti lac tojlel? (Gálatas 6:4).

¹⁰ Cheʼ ñumeñix ti pʼis chuqui mi lac pijtan ti lac tojlel. Mi lac mel iliyi cheʼ bʌ mi lac lajeʼ lac bʌ yicʼot yambʌlob (pejcan Gálatas 6:4). Mi cheʼ ñʌmʌl lac mel bajcheʼ jiñi, miʼ mejlel ti tejchel i tsʌytsʌyñiyel lac pusicʼal, i tajol cheʼ mi caj i melob jaʼel jiñi yambʌlob (Gál. 5:26). Cheʼ la com lac mel cheʼ bajcheʼ cʼamel miʼ mel jiñi yambʌlob, tajol ñumeñix ti pʼis bajcheʼ mi caj lac ñop lac mel. Ñaʼtancu: Mi chʼijyem mi la cubin lac bʌ cheʼ jal miʼ majlel ti tsʼʌctiyel chuqui woli bʌ lac pijtan, ñumento mi caj la cubin lac chʼijyemlel cheʼ an chuqui mi lac pijtan maʼañic bʌ baʼ ora miʼ caj ti tsʼʌctiyel. Iliyi miʼ mejlel i cʼuñʼesañonla (Pr. 13:12; 24:10).

11. ¿Chuqui mi caj i coltañet chaʼan mach ñumeñic ti pʼis muʼ bʌ a pijtan ti a tojlel?

¹¹ ¿Chuqui mi caj i coltañet a cʌy jiñi a cuch? Mi Jehová mach ñumeñic ti pʼis chuqui miʼ pijtan ti a tojlel, mach cheʼic yom maʼ mel jaʼel (2 Cor. 8:12). Miʼ mejlel a ñop chaʼan Jehová maʼañic miʼ lajet yicʼot yambʌlob (Mat. 25:20-23). Miʼ wen qʼuel ti ñuc muʼ bʌ a mel: Cheʼ ti jumpʼejl a pusicʼal maʼ melben i yeʼtel, maʼ pʌs a xucʼtʌlel yicʼot maʼ cuch wocol. Ñaʼtan chaʼan maʼañic miʼ mejlel a mel pejtelel chuqui a wom, tajol tiʼ caj a jabilel, jumpʼejl cʼamʌjel o yambʌ wocol. Yom lajalet bajcheʼ Barzilái, mach a jacʼ jumpʼejl eʼtel mi a wujil chaʼan cʼamet i mach mejlic a tsʼʌctesan (2 S. 19:35, 36). O mele bajcheʼ Moisés, jacʼʌ a coltʌntel (Éx. 18:21, 22). Mi mucʼʌch a pʌs a pecʼlel, mach ñumeñic ti pʼis chuqui mi caj a pijtan ti a tojlel, i mi caj a mejlel a bej chaʼlen ajñel.

12. ¿Lac mul ba cheʼ jiñi yambʌlob mach weñic chuqui miʼ yajcañob i mel?

¹² Cheʼ lac mul mi la cubin chaʼan chuqui miʼ melob yambʌlob. Maʼañic miʼ mejlel lac yajcan chuqui mi caj i melob jiñi yambʌlob. I cheʼ bʌ miʼ tajob wocol tiʼ caj chuqui miʼ yajcañob i mel, mach tiʼ pejtelelic ora miʼ mejlel laj coltañob. Laʼcu lac ñaʼtan chaʼan juntiquil xcolel miʼ ñajtʼesan  i bʌ ti Jehová, jiñi i papá i mamá miʼ mejlel i wen ubiñob i chʼijyemlel. Pero mach yomic miʼ ñaʼtañob chaʼan jiñob i mul chaʼan chuqui tsiʼ mele i yalobil, ¿chucoch? Come mucʼ jach caj i chʼʌmob jumpʼejl al bʌ i cuch mach bʌ yomic Jehová chaʼan miʼ chʼʌmob majlel (Rom. 14:12).

13. ¿Chuqui miʼ mejlel i mel jiñi tatʌl mi mach weñic muʼ bʌ i yajcan i mel jiñi i yalobil?

¹³ ¿Chuqui mi caj i coltañet a cʌy jiñi a cuch? Cʼajtesan chaʼan Jehová libre tsiʼ meleyonla chaʼan mi lac yajcan chuqui mi caj lac mel, yaʼ ochem mi mucʼʌch caj lac melben i yeʼtel o maʼañic. Cheʼ jaʼel, Jehová yujil chaʼan xmulilonla. Yom bʌ jiñʌch chaʼan maʼ chaʼlen wersa a tsʼʌctesan jiñi a weʼtel bajcheʼ tatʌl. Mi jiñi a walobil miʼ cʌy i melben i yeʼtel Jehová, mach a mulic (Pr. 20:11). Pero tajol maʼ cʼajtiben a bʌ chuqui mach bʌ weñic tsaʼ mele. Mi cheʼ bajcheʼ jiñi, suben Jehová bajcheʼ yubil maʼ wubin i cʼajtiben chaʼan miʼ ñusʌbeñet. Jehová yujil chaʼan maʼañic miʼ mejlel a qʼuextan jiñi tsaʼix bʌ ñumi. I maʼañic miʼ pijtan chaʼan maʼ coltan jiñi a walobil ti jiñi wocol tac muʼ bʌ i taj. Pero cʼajtesan chaʼan mi mucʼʌch i chaʼlen wersa chaʼan miʼ chaʼ sujtel ti Jehová, utsʼat mi caj i chʼʌm (Luc. 15:18-20).

14. ¿Chucoch mach yomic mi laj cʌlʌx ubin lac chʼijyemlel chaʼan tsaʼ bʌ lac mele?

¹⁴ Cheʼ cʌlʌx chʼijyem mi la cubin lac bʌ chaʼan tsaʼ bʌ lac mele. I tilelʌch cheʼ chʼijyem mi la cubin lac bʌ cheʼ mi lac mel mach bʌ weñic. Pero cheʼ cʌlʌx chʼijyemix mi la cubin lac bʌ, woli lac chʼʌm jumpʼejl al bʌ laj cuch. I Jehová mach yomic chaʼan cheʼ mi la cujtel bajcheʼ jiñi. Miʼ mejlel lac ñop chaʼan tsaʼix i ñusʌbeyonla mi tsaʼix lac subu jiñi tsaʼ bʌ lac mele, mi lac chaʼ ñaʼtan lac bʌ i woli lac chaʼlen wersa chaʼan maʼañic mi lac chaʼ mel (Hech. 3:19). Jehová yom chaʼan mi laj cʌy laj cʌlʌx ubin lac chʼijyemlel come yujil chaʼan miʼ mejlel i ticʼlañonla. Miʼ mejlel i cʼuñʼesañonla i tajol mi caj laj cʌy lac chaʼlen  ajñel chaʼan mi lac taj laj cuxtʌlel (Sal. 31:10; 2 Cor. 2:7).

15. Mi maʼ cʌlʌx ubin a chʼijyemlel tiʼ caj tsaʼ bʌ a mele, ¿chuqui miʼ mejlel i coltañet? (1 Juan 3:19, 20, qʼuele jaʼel jiñi foto tac).

¹⁵ ¿Chuqui mi caj i coltañet a cʌy jiñi a cuch? Mi maʼ cʌlʌx ubin a chʼijyemlel chaʼan tsaʼ bʌ a mele, wen ñaʼtan chaʼan Jehová mucʼʌch i ñusʌbeñet a mul tiʼ sujm (Sal. 130:4). Cheʼ bʌ juntiquil miʼ ñaʼtan i bʌ ti jumpʼejl i pusicʼal, Jehová miʼ yʌcʼ i tʼan: «Joñon mi caj c ñusʌbeñob i mul» (Jer. 31:34). Ili yom i yʌl chaʼan cheʼ bʌ Jehová miʼ ñusʌbeñonla lac mul, maʼañic miʼ chʌn cʼajtesʌbeñonla. Jiñi wocol muʼ bʌ lac taj tiʼ caj chuqui mi lac mel, mach yomic i yʌl chaʼan maxto i ñusʌbeyonla. I mach a wen ubin a chʼijyemlel mi ili ora maʼañic maʼ mejlel a taj jumpʼejl privilegio ti congregación. Mi Jehová tsaʼix i ñusʌbeyet a mul, ¿chucoch maʼañic maʼ ñusʌben a bʌ jatet? (Pejcan 1 Juan 3:19, 20).

16. Chaʼan mi lac mʌl jiñi ajñel, ¿chuqui yom la cujil?

¹⁶ Chaʼan mi lac taj laj cuxtʌlel, yom mi lac jacʼ ili ticʼojel: «Chaʼlenla ajñel chaʼan mi laʼ mʌl» (1 Cor. 9:24). Junchajp muʼ bʌ caj i coltañonla jiñʌch cheʼ wen la cujil chuqui jiñi yom bʌ mi lac chʼʌm majlel yicʼot jiñi mach bʌ yomic. Ti ili estudio tsaʼix laj qʼuele chaʼpʼejl uxpʼejl ejemplo, pero añʌch yan tac bʌ. Jesús tsiʼ yʌlʌ chaʼan cabʌl jax chuqui miʼ mejlel ti ochel ti lac pusicʼal, tajol jiñi uchʼel yicʼot chaʼan mi lac jap chuqui mi lac jap o chuqui tac mi laj cʼojoʼtan ti laj cuxtʌlel (Luc. 21:34). Ili texto yicʼot yan tac bʌ miʼ mejlel i coltañonla chaʼan mi laj qʼuel chuqui yom mi lac mel chaʼan mi lac mʌl (jot) jiñi ajñel i mi lac taj laj cuxtʌlel.

17. ¿Chucoch miʼ mejlel lac ñop chaʼan mucʼʌch caj lac mʌl jiñi ajñel?

¹⁷ Miʼ mejlel lac ñop chaʼan mucʼʌch caj lac mʌl jiñi ajñel come Jehová mi caj i yʌqʼueñonla lac pʼʌtʌlel chaʼan mi la cujtesan (Is. 40:29-31). Jin chaʼan, mach yomic mi lac lujbʼan. Cheʼ yomonla bajcheʼ jiñi apóstol Pablo, tsiʼ chaʼle wersa chaʼan miʼ taj jiñi i majtan (Filip. 3:13, 14). I sujmʌch, maʼañic majqui mi caj i mejlel i ñusan lac wenta, pero Jehová mucʼʌch caj i coltañonla chaʼan mi lac chʼʌm majlel jiñi laj cuch yicʼot chaʼan mi laj cʌy jiñi mach bʌ i cʼʌjñibalic lac chaʼan (Sal. 68:19). Tiʼ coltaya Jehová mucʼʌch caj la cujtesan jiñi ajñel cʼʌlʌl tiʼ yujtibal.