• «Jiñi c ñoxiʼal woli jach i lotiñon mi cubin».

• «Mic ñaʼtan chaʼan mach utsʼatix miʼ qʼuelon jiñi c ñoxiʼal i maʼan j cʼʌjñibal mi cubin c bʌ».

• «C bajñel jach woli cubin wocol come maʼañic majqui miʼ mejlel c suben chuqui woli c ñusan».

• «Tsaʼ cʼoti c ñaʼtan chaʼan mach i wentajoñix Jehová».

Ili tʼan tac miʼ pʌs bajcheʼ cʼamel wocol miʼ yubin juntiquil xʼixic cheʼ bʌ jiñi i ñoxiʼal miʼ qʼuel pornografía. I mi añix cabʌl ora cajel i mucu mel, tajol jiñi xʼixic miʼ yubin chaʼan maʼañix miʼ mejlel i ñop tiʼ tojlel i ñoxiʼal. Juntiquil xʼixic tsiʼ yʌlʌ: «Mach j cʌñʌyix c ñoxiʼal tsaʼ cubi, tsaʼ j cʼajtibe c bʌ mi anto chuqui yambʌ woli (choncol) i mucu mel».

Mi jiñi a ñoxiʼal miʼ qʼuel pornografía, ili tema mi caj i wen coltañet. a Mi caj i qʼuejlel principio tac am bʌ ti Biblia muʼ bʌ caj i wen ñuqʼuesan a pusicʼal, mi caj i pʌsbeñet chaʼan Jehová maʼañic mi caj i bajñel cʌyet. Cheʼ jaʼel, mi caj i coltañet chaʼan maʼ chaʼ taj a tijicñʌyel i chʌn lʌcʼʌl maʼ wajñel ti Jehová. b

Tajol maʼañic miʼ mejlel a mʌctan jiñi a ñoxiʼal chaʼan maʼañic miʼ qʼuel pornografía, pero an tacʌch chuqui miʼ mejlel a mel chaʼan maʼ wubin a ñʌchʼtʌlel yicʼot chaʼan tijicñayet.

Mach a ñaʼtan chaʼan a mul. Tajol juntiquil xʼixic miʼ ñaʼtan chaʼan jin i mul cheʼ jiñi i ñoxiʼal miʼ qʼuel pornografía. Jiñʌch tsaʼ bʌ ujti tiʼ tojlel Alicia c, tsiʼ cʼajtibe i bʌ: «¿Chucoch jiñi c ñoxiʼal miʼ mulan i qʼuel yambʌ xʼixicob i mach joñoñic?». I an muʼ bʌ i ñaʼtañob chaʼan cheʼ miʼ michʼañob o chʼijyem miʼ yubiñob i bʌ tiʼ caj chuqui woli (yʌquel) i melob i ñoxiʼal miʼ yutsi tsʌtsʼesañob jiñi wocol. Daniela miʼ yʌl: «Mic wen michʼan come jiñi c ñoxiʼal maʼañic miʼ cʌy i qʼuel pornografía i tsaʼ c ñaʼta chaʼan tiʼ caj jiñi woli c ñumen jem lon c ñujpuñel».

Mi cheʼ maʼ wubin a bʌ bajcheʼ jiñi, cʼajtesan chaʼan Jehová maʼañic miʼ ñaʼtan chaʼan a mul chaʼan woli bʌ i mel a ñoxiʼal. Santiago 1:14 miʼ yʌl: «Jujuntiquil miʼ qʼuelbentel i pusicʼal cheʼ miʼ pʌjyel i miʼ chujquel ti chuqui bajñel yom i pusicʼal»  (Rom. 14:12; Filip. 2:12). Tiʼ sujm, Jehová miʼ qʼuel ti ñuc cheʼ xucʼul maʼ wajñel (2 Cr. 16:9).

Tajol juntiquil xʼixic miʼ ñaʼtan chaʼan jiñi i ñoxiʼal miʼ qʼuel pornografía come maʼañix woliʼ mulan o mach chʌn utsʼatix miʼ qʼuel, pero jiñi mach i sujmic. Cheʼ jaʼel, miʼ yʌjlel chaʼan jiñi muʼ bʌ i qʼuel pornografía miʼ tejchel leco bʌ i pensar yicʼot ñumeñix ti pʼis chuqui miʼ ñaʼtan tiʼ tojlel juntiquil xʼixic. Jin chaʼan, cheʼ bʌ miʼ chaʼlen piʼleya mach tijicñayic miʼ yubin come mach cheʼic miʼ yujtel bajcheʼ miʼ pijtan.

Mach a cʌlʌx ñaʼtan. Catalina miʼ yʌl chaʼan jin jach an tiʼ ñaʼtʌbal cheʼ jiñi i ñoxiʼal miʼ qʼuel pornografía. Francisca miʼ yʌl: «Mic wen chaʼlen pensar cheʼ mach cujilic baqui an jiñi c ñoxiʼal, maʼañic miʼ mejlel c locʼsan tic ñaʼtʌbal. Mach tijicñayic mic ñusan jumpʼejl qʼuin». I an yambʌ muʼ bʌ i yʌlob chaʼan quisintic miʼ yubiñob cheʼ bʌ yaʼañob yicʼotob yambʌ hermanojob yujiloʼ bʌ chuqui woliʼ yujtel. I an i bajñeloʼ bʌ miʼ yubiñob i bʌ come miʼ ñaʼtañob chaʼan maʼañic majqui miʼ chʼʌmben i sujm jiñi wocol woli bʌ i ñusañob.

Añʌch i sujmlel cheʼ cheʼʌch maʼ wubin a bʌ bajcheʼ jiñi, pero mi jin jach maʼ chʌcʌ ñaʼtan mi caj i ñumen aqʼueñet a chʼijyemlel. Jin chaʼan, ñumen lʌcʼtesan a bʌ ti Jehová come jiñʌch muʼ bʌ caj i yʌqʼueñet a pʼʌtʌlel chaʼan maʼ bej cuch (Sal. 62:2; Efes. 6:10).

Mi caj i wen coltañet cheʼ maʼ pejcan jiñi Biblia yicʼot maʼ wen ñaʼtan chuqui miʼ yʌl. Yaʼi miʼ yʌl chaʼan bʌ xʼixicob tsaʼ bʌ i yubiyob i chʼijyemlel, pero cheʼ bʌ tiʼ subeyob Jehová bajcheʼ miʼ yubiñob i bʌ tsiʼ chaʼ tajayob i tijicñʌyel. Tajol maʼañic tsaʼ jisʌbentiyob jiñi i wocol, pero tsaʼʌch i yʌqʼueyob ñʌchʼtʌlel. Ñaʼtan tiʼ tojlel Ana, cheʼ bʌ wen chʼijyem tsiʼ yubi i bʌ jal tsiʼ pejca Jehová. Jiñi tsiʼ colta chaʼan miʼ chaʼ ubin i ñʌchʼtʌlel anquese mach yujilic chuqui mi caj i yujtel (1 S. 1:10, 12, 18; 2 Cor. 1:3, 4).

Cʼajtin a coltʌntel ti ancianojob come lajalob bajcheʼ «putsʼibʌl chaʼan ñuqui icʼ» yicʼot bajcheʼ «chʼentun muʼ bʌ i mʌctan sutujt icʼ» (Is. 32:2). Tajol mi caj i subeñetob chaʼan maʼ chaʼlen tʼan yicʼot juntiquil hermana chaʼan maʼ suben chuqui woli a ñusan i miʼ ñuqʼuesʌbeñet a pusicʼal (Pr. 17:17, TNM).

Tajol maʼ cʼajtiben a bʌ: «¿Am ba chuqui miʼ mejlel c mel chaʼan mij coltan jiñi c ñoxiʼal?». Tajol añʌch. Jiñi Biblia miʼ yʌl chaʼan ñumen wen cheʼ  chaʼtiquilonla chaʼan miʼ mejlel lac mʌlben (jotben) jumpʼejl wocol (Ec. 4:9-12). An estudio tac muʼ bʌ i pʌs chaʼan juntiquil yom bʌ i cʌy i qʼuel pornografía yomʌch miʼ coltʌntel tiʼ tojlel i piʼʌl, jiñi miʼ mejlel i coltan chaʼan miʼ chaʼ pʼʌtʼan i ñujpuñel.

Junchajp mejl bʌ i coltañet a ñaʼtan mi mucʼʌch caj i mejlel a coltan jiñi a ñoxiʼal jiñʌch mi tiʼ sujmʌch yom i cʌy i qʼuel pornografía i mi mucʼʌch caj i chaʼlen wersa. Ñaʼtan ili cʼajtiya tac: ¿Tsaʼix ba i cʼajtibe i coltaya Jehová yicʼot jiñi ancianojob? (2 Cor. 4:7; Sant. 5:14, 15). ¿Añix ba chuqui woliʼ mel chaʼan maʼañix miʼ qʼuel pornografía? ¿Pʼisbil jach ba bajcheʼ miʼ cʼʌn internet i miʼ cʌntan i bʌ chaʼan maʼañic chuqui miʼ ñijcan i chaʼ qʼuel pornografía? (Pr. 27:12). ¿Yomʌch ba chaʼan maʼ coltan i maʼañic chuqui mi caj i mucbeñet? Mi cheʼʌchi, tajol mi caj i mejlel a coltan.

¿Pero bajcheʼ miʼ mejlel a mel? Laʼ lac ñaʼtan tiʼ tojlel juntiquil hermana i cʼabaʼ Feliciana. Jiñi i ñoxiʼal tsaʼ caji i qʼuel pornografía cheʼ chutto. ¿Chuqui miʼ mel ili hermana chaʼan jiñi i ñoxiʼal miʼ cʼajtiben i coltaya cheʼ bʌ yom i chaʼ qʼuel pornografía? Iván, jiñi i ñoxiʼal, miʼ yʌl: «Miʼ mejlel c jamʌ suben jiñi quijñam bajcheʼ yubil mi cubin c bʌ. Miʼ wen pʌsbeñon i yutslel yicʼot miʼ coltañon chaʼan maʼañic mic chaʼ qʼuel pornografía. Cheʼ jaʼel, miʼ chʌcʌ cʼajtibeñon bajcheʼ yubil mi cubin c bʌ i miʼ coltañon chaʼan tsajil (xucʼul) jach bajcheʼ mij cʼʌn jiñi internet». I sujmʌch, Feliciana cʼux miʼ yubin cheʼ jiñi i ñoxiʼal miʼ mulan i qʼuel pornografía. Miʼ yʌl: «Anquese cʼux mi cubin i mic michʼan, cujil chaʼan jiñi maʼañic mi caj i coltan c ñoxiʼal. Jin chaʼan, cheʼ bʌ tsaʼix ujti c chaʼlen tʼan quicʼot Iván, chajpʌbilix miʼ yubin i bʌ jaʼel chaʼan miʼ coltañon chaʼan bajcheʼ yubil woli cubin c bʌ».

Mi mucʼʌch laʼ comol chaʼlen tʼan mi caj i coltan jiñi a ñoxiʼal, pero cheʼ jaʼel mi caj i coltañet chaʼan maʼ chaʼ ñopben i tʼan jiñi a ñoxiʼal. Cheʼ bʌ juntiquil wiñic maʼañic miʼ muc chuqui woliʼ mel o bajcheʼ yubil miʼ yubin i bʌ, miʼ coltan chaʼan jiñi i yijñam maʼañic miʼ cʌlʌx chaʼlen pensar.

¿Muʼ ba i mejlel a mel jaʼel iliyi? Mi cheʼʌchi, tajol miʼ mejlel laʼ comol pejcan ili tema. ¿Chuqui yom miʼ mel jiñi a ñoxiʼal? Yom miʼ mulan i cʌy i qʼuel pornografía yicʼot miʼ chaʼlen wersa chaʼan maʼ chaʼ ñopben i tʼan. Mach yomic miʼ michʼan cheʼ ba ora jatet a wom a wʌl chaʼan iliyi. Yom miʼ chaʼlen wersa chaʼan miʼ chʼʌmben i sujm bajcheʼ yubil maʼ wubin a bʌ. Ixcu jatet, ¿chuqui miʼ mejlel a mel? Chaʼlen wersa chaʼan maʼ coltan yicʼot chaʼan maʼ chaʼ ñopben i tʼan. Ñuc i cʼʌjñibal chaʼan ti laʼ chaʼticlel mi laʼ ñaʼtan chucoch jiñi lac piʼʌlob miʼ qʼuelob pornografía i chuqui miʼ mejlel i coltañob chaʼan miʼ cʌyob. d

Mi wocol mi laʼ wubin chaʼan maʼañic mi laʼ michʼan cheʼ bʌ mi laʼ wʌl chaʼan bʌ iliyi, tajol miʼ mejlel  laʼ suben juntiquil anciano laʼ cʌñʌyix bʌ chaʼan yaʼ miʼ yajñel laʼ wicʼot cheʼ bʌ mi caj laʼ chaʼlen tʼan. Anquese jiñi a ñoxiʼal maʼañix miʼ qʼuel pornografía, tajol jatet mach ti orajic mi caj a chaʼ ñopben i tʼan. Ñopo a qʼuel bajcheʼ woliʼ ñumen weñʼan majlel jiñi a ñujpuñel. Chʌn chaʼlen wersa, miʼ mejlel a ñop chaʼan xucʼu xuxʼul jiñi a ñujpuñel mi caj i chaʼ pʼʌtʼan (Ec. 7:8; 1 Cor. 13:4).

¿Ixcu mi jiñi a ñoxiʼal miʼ chaʼ qʼuel pornografía? ¿Yom ba i yʌl jiñi chaʼan maʼañix miʼ ñaʼtan i bʌ i maʼañix ba ora mi caj i cʌy jiñi vicio? Mach cheʼiqui, tajol tiʼ pejtelel ora yom mi caj i chaʼlen wersa chaʼan maʼañic miʼ qʼuel. Chaʼan maʼañic miʼ chaʼ yajlel yomʌch miʼ chaʼlen wersa i miʼ mel jiñi tsaʼix tac bʌ la cʌlʌ. Tajol yomto miʼ bej mel anquese miʼ ñaʼtan chaʼan maʼañic mi caj i chaʼ yajlel. Anquese miʼ ñumel cabʌl jab i maʼañic miʼ qʼuel pornografía muʼto i mejlel ti chaʼ yajlel, mi tsaʼ ujti bajcheʼ jiñi tajol anto chuqui yom miʼ ñumen mel chaʼan miʼ cʌntan i bʌ (Pr. 28:14; Mat. 5:29; 1 Cor. 10:12). Yom miʼ qʼuextan i ñaʼtʌbal i miʼ tsʼaʼlen jiñi mach bʌ weñic, i yaʼ ochem jiñi pornografía yicʼot jiñi masturbación (Efes. 4:23; Sal. 97:10; Rom. 12:9). ¿Yomʌch ba i mel pejtelel iliyi? Mi mucʼʌch i chaʼlen wersa i miʼ mel pejtelel iliyi, mi caj i cʌy i qʼuel pornografía. e

¿Ixcu mi jiñi a ñoxiʼal maʼañic miʼ chaʼlen wersa chaʼan miʼ cʌy i qʼuel pornografía? Mi cheʼ bajcheʼ jiñi, tajol mi caj i wen aqʼueñet a chʼijyemlel, cʼux mi caj a wubin i tajol muʼto a michʼan, pero laj cʌyʌ tiʼ cʼʌb Jehová. Jiñi mi caj i coltañet chaʼan maʼ taj a ñʌchʼtʌlel (1 Ped. 5:7). Chʌn pejcan i Tʼan Dios, chaʼlen oración i wen ñaʼtan chuqui maʼ pejcan, jiñi mi caj i coltañet chaʼan maʼ ñumen lʌcʼtesan a bʌ ti Jehová i maʼañic mi caj i cʌyet jaʼel. Salmo 34:18 miʼ yʌl chaʼan «lʌcʼʌl an lac Yum baʼan chʼijiyemoʼ bʌ i pusicʼal» i yom i chaʼ aqʼueñob i tijicñʌyel. Chaʼlen wersa chaʼan wen a melbal (chaʼlibal), sʌclan a coltʌntel ti ancianbojob i mach a sʌt a pijtaya. Tajol jiñi a ñoxiʼal ti wiʼil mi caj i qʼuextan i melbal (Rom. 2:4; 2 Ped. 3:9).