Ti jiñi estudio tsaʼ laj qʼuele chaʼan jiñi ñumen ñuc bʌ i cʼʌjñibal ti lac tojlel yicʼot tiʼ tojlel jiñi ángelob jiñʌch i sʌqʼuesʌntel i cʼabaʼ Jehová, i an chaʼchajp chuqui ochem: Ñaxam bʌ, mi Jehová jiñʌch ñumen wem bʌ yumʌl, i jiñi yambʌ jiñʌch mi xucʼulʌch mi caj la cajñel tiʼ tojlel Jehová.

Pero ¿chucoch miʼ yʌjlel ili ora chaʼan jiñi ñumen ñuc bʌ i cʼʌjñibal jiñʌch cheʼ miʼ sʌqʼuesʌntel i cʼabaʼ Jehová? Laʼ laj qʼuel uxchajp.

Ñaxam bʌ, Satanás tsiʼ bibʼesʌbe i cʼabaʼ Jehová. Yaʼ ti pʌcʼʌbʌl, Satanás tsiʼ melbe jumpʼejl cʼajtiya Eva tsaʼ bʌ i yʌcʼʌ ti ñaʼtʌntel chaʼan Dios maʼañic miʼ yʌcʼ chuqui an i chaʼan yicʼot chaʼan ñumeñix ti pʼis chuqui miʼ cʼajtin. Cheʼ bajcheʼ jiñi, tsiʼ yʌcʼʌ ti ñaʼtʌntel chaʼan Jehová juntiquilʌch xlot i tsiʼ bibʼesʌbe i cʼabaʼ. Ti jimbʌ ora tsaʼ sujti ti «Diablo», come tsiʼ yʌlʌ mach tac bʌ i sujmic (Juan 8:44). Eva tsiʼ ñopbe i lot tac Satanás, tsiʼ ñusʌbe i tʼan Dios i maʼañic tsiʼ coltʌbe i cʼabaʼ Jehová (Gn. 3:1-6). Ili ora, Satanás woli (choncol) i bej al lot tac tiʼ tojlel Jehová i jiñi muʼ bʌ i ñopbeñob i tʼan maʼañic miʼ jacʼbeñob i mandar tac. Jin chaʼan, joñonla mach tijicñayic mi la cubin cheʼ miʼ bibʼesʌntel i cʼabaʼ Jehová. Pejtelel jiñi wocol am bʌ ili ora yaʼʌch tsaʼ tejchi ti jiñi lot tac.

I chaʼpʼejlel, Jehová mi caj i yʌcʼ ti sʌqʼuesʌntel i cʼabaʼ yicʼot chaʼan miʼ qʼuejlel ti ñuc. Jiñʌch ñumen ñuc bʌ i cʼʌjñibal tiʼ tojlel, jin chaʼan tsiʼ yʌlʌ: «Muqʼuix c chaʼ acʼ ti cʌjñel [«sʌqʼuesʌntel», TNM] j cʼabaʼ» (Ez. 36:23). Cheʼ jaʼel, cheʼ bʌ Jesús tsiʼ pʌsʌ bajcheʼ yom mi lac chaʼlen oración, tsiʼ yʌlʌ: «Laʼ sʌqʼuesʌntic a cʼabaʼ». Ili miʼ pʌs chaʼan junchajp wen ñuc bʌ i cʼʌjñibal yom bʌ mi laj cʼajtin ti oración jiñʌch chaʼan miʼ sʌqʼuesʌntel i cʼabaʼ Jehová (Mat. 6:9). Jiñi Biblia mach junsujtelic jach miʼ yʌl chaʼan yom miʼ qʼuejlel ti ñuc i cʼabaʼ Jehová. Laʼ laj qʼuel chaʼpʼejl uxpʼejl ejemplo. «Subenla i ñuclel i cʼabaʼ lac Yum cheʼ bajcheʼ yom miʼ subentel» (1 Cr. 16:29; Sal. 96:8). «Cʼʌyibenla i cʼabaʼ come ñuc» (Sal. 66:2). «Mi caj c sub i ñuclel a cʼabaʼ ti pejtelel ora» (Sal. 86:12). Cheʼ bʌ Jesús yaʼan yaʼ ti templo ti Jerusalén, tsiʼ cʼajtibe i Tat: «Ñuqʼuesan jiñi a cʼabaʼ», i Jehová tsiʼ jacʼʌ: «Tsaʼix c ñuqʼuesa i mi caj c chaʼ ñuqʼuesan» (Juan 12:28). a

I yuxpʼejlel, jiñi yom bʌ Jehová jiñʌch chaʼan miʼ qʼuejlel ti ñuc i cʼabaʼ tiʼ pejtelel ora. Laʼcu lac ñaʼtan, cheʼ bʌ tsaʼix ñumi jiñi Mil jab i yumʌntel Cristo yicʼot jiñi cojix bʌ prueba, ¿chuqui mi caj i ñaʼtañob jiñi wiñicob  xʼixicob yicʼot jiñi ángelob chaʼan i cʼabaʼ Jehová? Ti jimbʌ ora tsiquil mi caj i qʼuelob chaʼan cojach Jehová jiñi ñumen wem bʌ yumʌl. ¿Muʼto ba caj i qʼuejlel mi xucʼulobʌch o mach xucʼulobic jiñi lac piʼʌlob? Maʼañix, come ti jimbʌ ora junyaj tojobix i tsaʼix ñumi i chaʼañob jiñi cojix bʌ prueba. Chaʼañix miʼ chumtʌlob tiʼ pejtelel ora. Pejtelel wiñicob xʼixicob yicʼot jiñi ángelob cojach mi caj i chʼujutesañob Jehová bajcheʼ jiñi ñuc bʌ yumʌl. ¿I bajcheʼ yilal mi caj i cʌytʌl i cʼabaʼ?

Jehová mi caj i junyaj sʌqʼuesan i cʼabaʼ. Cheʼ jaʼel, mi caj i bej qʼuejlel ti ñuc yaʼ ti panchan yicʼot ila ti pañimil (mulawil) come cabʌl chuqui ñuc tac bʌ mi caj i bej mel. Jumpʼejl ejemplo, Jesús mi caj i pʌs i pecʼlel i mi caj i chaʼ aqʼuen i yumʌntel jiñi i Tat, «cojach Dios mi caj i chaʼlen yumʌntel tiʼ pejtelel chuqui an» (1 Cor. 15:28). Cheʼ jaʼel, jiñi muʼ bʌ caj i chumtʌlob ila ti pañimil «mi caj i sujtelob bajcheʼ jiñi i yalobilob Dios» (Rom. 8:21). Jehová mi caj i junyaj tsʼʌctesan jiñi ñaʼtʌbil bʌ i chaʼan, jiñʌch cheʼ temel miʼ yajñel bajcheʼ jumpʼejl familia jiñi i yalobilob ila ti Lum yicʼot ti panchan (Efes. 1:10).

Ti lac pejtelel añonbʌla wʌʼ ti Lum yicʼot añoʼ bʌ ti panchan mi caj lac bej aqʼuen i ñuclel i cʼabaʼ Jehová. Cheʼ bajcheʼ tsiʼ yʌlʌ David: «Laʼ chʼujutesʌntic [o, laʼ qʼuejlic ti ñuc] lac Yum Dios [...]. Chʼujutesan i cʼabaʼ am bʌ i ñuclel ti pejtelel ora» (Sal. 72:18, 19). Cabʌl chuqui mi caj laj cʌn muʼ bʌ caj i ñijcañonla chaʼan mi lac bej aqʼuen i ñuclel i cʼabaʼ Jehová.

Tiʼ sujm, jiñi i cʼabaʼ Jehová miʼ pʌs bajcheʼ yilal bʌ Dios. Cheʼ bʌ mi lac ñaʼtan jiñi i cʼabaʼ mi lac ñaʼtan jiñi i cʼuxbiya (1 Juan 4:8). Ti lac pejtelel mi caj laj cʼajtesan chaʼan Jehová tsiʼ meleyonla (pʌtʌyonla) chaʼañʌch i cʼuxbiya i tsiʼ yʌcʼʌ i tojol lac mul. I jiñʌch i cʼuxbiya jaʼel tsaʼ bʌ i ñijca chaʼan miʼ pʌs chaʼan juntiquilʌch toj bʌ yumʌl. I mi caj laj qʼuel bajcheʼ Jehová mi caj i bej pʌsbeñonla i cʼuxbiya. Tiʼ pejtelel ora mi caj lac mulan lac ñumen lʌcʼtesan lac bʌ tiʼ tojlel yicʼot mi la cʌqʼuen i ñuclel i cʼabaʼ (Sal. 73:28).