1. ¿Chucoch mi lac mulan cheʼ jiñi lac piʼʌlob yujilob pijt?

 TI LAC pejtelel mi lac mulan cheʼ jiñi lac piʼʌlob yujilob pijt. Mi laj qʼuel ti ñuc cheʼ mach orajic miʼ michʼañob yicʼot cheʼ miʼ ñusʌbeñoñobla lac sajtemal. I mi laj qʼuel ti ñuc jaʼel cheʼ bʌ jiñi tsaʼ bʌ i yʌqʼueñonla estudio maʼañic tsaʼ lujbʼa cheʼ bʌ an chuqui wocol tsaʼ la cubi chaʼan mi lac chʼʌmben i sujm o chaʼan mi lac jacʼ muʼ bʌ i yʌl jiñi Biblia. Pero jiñi ñumen ñuc bʌ jin cheʼ Jehová miʼ wen pʌsbeñonla i pijt (Rom. 2:4).

2. ¿Chucoch an i tajol wocol mi la cubin chaʼan mi lac pʌs lac pijt?

² I sujmʌch chaʼan mi lac mulan cheʼ jiñi yambʌlob miʼ pʌsob i pijt, pero cheʼ bʌ joñonla yom mi lac pʌs tajol wocol mi la cubin. Jumpʼejl ejemplo, laʼcu lac ñaʼtan chaʼan woli (choncol) lac pijtan carro, pero mach ti orajic miʼ ñumel i tardejix mi caj laj cʼotel yaʼ baqui mi caj lac majlel, ¿chuqui mi lac mel? O tajol orajach mi lac michʼan cheʼ bʌ an majqui miʼ melbeñonla mach bʌ weñic. O cheʼ bʌ mi laj qʼuel chaʼan maʼañic tsiquil tilel jiñi tsijiʼ bʌ pañimil (mulawil), tajol mi lac ñaʼtan chaʼan Jehová wolix i jalʼan. ¿Mach ba muqʼuic lac mulan chaʼan ñumen la cujil pijt? Ti ili estudio mi caj laj cʌn bajcheʼ yilal jiñi yujil bʌ pijt, chucoch ñuc i cʼʌjñibal cheʼ la cujil pijt i chuqui mi caj i coltañonla chaʼan mi lac pʌs.

3. ¿Chuqui miʼ mel jiñi yujil bʌ pijt cheʼ bʌ an chuqui miʼ melbentel mach bʌ weñic?

³ Laʼ laj qʼuel chʌnchajp bajcheʼ yilal jiñi yujil bʌ pijt. Ñaxam bʌ, mach orajic miʼ michʼan. Cheʼ bʌ an majqui miʼ melben mach bʌ weñic, wen jach bajcheʼ miʼ jacʼ i maʼañic miʼ chaʼ sutqʼuin cheʼ bajcheʼ woli (yʌquel) i melbentel.  O cheʼ bʌ mach wen tijicñayic miʼ yubin i bʌ come lujb o an chuqui woliʼ ñusan, mach tsʌtsic mi caj i pejcan o i jacʼben i tʼan yambʌlob. I jiñi Biblia cheʼʌch miʼ pʌs jaʼel, ti Éxodo 34:6 miʼ yʌl chaʼan Jehová yujil pʼuntaya, uts yicʼot jal miʼ michʼan.

4. ¿Chuqui miʼ mel jiñi yujil bʌ pijt cheʼ bʌ an chuqui woliʼ jalʼan?

⁴ I chaʼpʼejlel, maʼañic miʼ lujbʼan i pijtan cheʼ bʌ an chuqui woliʼ jalʼan (Mat. 18:26, 27). An cabʌl bajcheʼ miʼ mejlel lac pʌs iliyi. Jumpʼejl ejemplo, cheʼ bʌ an chuqui woli lac subentel, wen jach mi lac ñʌchʼtan jiñi woli bʌ ti tʼan i maʼañic mi lac tsʼocben i tʼan (Job 36:2). Cheʼ jaʼel, cheʼ bʌ juntiquil estudiante wocol miʼ yubin chaʼan miʼ chʼʌmben i sujm jumpʼejl tema o chaʼan miʼ mel cheʼ bajcheʼ woliʼ cʌn, mi lac chaʼlen wersa lac bej coltan i maʼañic mi laj cʌy.

5. ¿Bajcheʼ yambʌ mi lac pʌs chaʼan la cujil pijt?

⁵ I yuxpʼejlel, miʼ ñaxan wen ñaʼtan chuqui mi caj i mel. I sujmʌch chaʼan añʌch orajach bʌ yom miʼ mejlel. Pero cheʼ an chuqui wen ñuc bʌ i cʼʌjñibal, mach jilsajtic mi caj i waʼ mel chaʼan ora miʼ yujtel. Miʼ ñaxan wen ñaʼtan bajcheʼ yom miʼ mejlel i miʼ yʌqʼuen i yorajlel chaʼan wen miʼ mel.

6. ¿Chuqui miʼ mel jiñi yujil bʌ pijt cheʼ miʼ ñusan wocol tac?

⁶ I chʌmpʼejlel, miʼ cuch jiñi wocol tac i maʼañic miʼ sʌt i tijicñʌyel. Ili mach yomic i yʌl chaʼan maʼañic miʼ mejlel lac suben juntiquil wem bʌ la camigo bajcheʼ yubil mi la cubin lac bʌ o chuqui ti wocol woli lac ñusan. Pero jiñi yujil bʌ pijt mi caj i chaʼlen wersa chaʼan chʌn tijicña miʼ melben i yeʼtel (troñel) Jehová anquese an wocol tac (Col. 1:11). Jiñi i cuchol wocol ñucʌch i cʼʌñibal chaʼan mi lac pʌs lac pijt. Tsaʼix laj qʼuele chʌnchajp muʼ bʌ i pʌs jiñi yujil bʌ pijt i cheʼʌch luʼ com lac mel. ¿Chucoch? Laʼ laj qʼuel.

7. Cheʼ bajcheʼ miʼ yʌl Santiago 5:7, 8, ¿chucoch wen ñuc i cʼʌjñibal cheʼ la cujil pijt? (Qʼuele jaʼel jiñi dibujo).

⁷ Mi la com chumtʌl tiʼ pejtelel ora yom la cujil pijt. Cheʼ bajcheʼ tsiʼ meleyob jiñi i wiñicob Dios wajali, yom mi lac chʌn pijtan jinto miʼ tsʼʌctiyel pejtelel albil bʌ i chaʼan Jehová (Heb. 6:11, 12). Jiñi Biblia miʼ yʌl chaʼan lajalonla bajcheʼ juntiquil xpacʼ (pejcan Santiago 5:7, 8). Jiñi xpacʼ mach yujilic jala mi caj i lotben i wut jiñi tsaʼ bʌ i pʌcʼʌ, pero yujil chaʼan mi caj i cʼotel i yorajlel. Jin chaʼan miʼ chʌn cʌntan yicʼot miʼ yʌcʼñan. I jiñʌch yom bʌ mi lac mel jaʼel, yom mi lac chaʼlen wersa lac melben i yeʼtel Jehová anquese mach la cujilic jala mi caj i tilel i jilibal (Mat. 24:42). Jin chaʼan, mi lac chʌn pʌs lac pijt come la cujil chaʼan Jehová mi caj i tsʼʌctesan pejtelel albil bʌ i chaʼan. Pero mi tsaʼ lujbʼa lac pijtan miʼ mejlel lac ñajtʼesan lac bʌ tiʼ tojlel, i tajol jiñix mi caj lac sʌclan muʼ bʌ i jumucʼ acʼ tijicñʌyel wʌʼ ti pañimil. Pero mi mucʼʌch laj cuch jinto miʼ tilel i jilibal cuxul mi caj la cajñel tiʼ pejtelel ora (Mi. 7:7; Mat. 24:13).

8. ¿Bajcheʼ miʼ coltañonla chaʼan wen mi la cajñel la quicʼot yambʌlob cheʼ la cujil pijt? (Colosenses 3:12, 13).

⁸ Cheʼ la cujil pijt miʼ coltañonla chaʼan wen mi la cajñel la quicʼot yambʌlob. Jumpʼejl ejemplo, cheʼ bʌ an majqui woli ti tʼan yicʼotonla mi lac wen ñʌchʼtan chuqui miʼ yʌl (Sant. 1:19). Cheʼ jaʼel, mi caj lac chaʼlen coltaya chaʼan chʌn an ñʌchʼtʌlel. Cheʼ bʌ lujbonla o an bajcheʼ yubil woli la cubin, mach bajcheʼic jach mi caj lac chaʼlen tʼan chaʼan maʼañic mi lac low yambʌlob. I mi an majqui tsiʼ melbeyonla mach bʌ weñic mach ti orajic mi caj lac michʼan o mi lac chaʼ sutqʼuin tsaʼ bʌ i melbeyonla. Cheʼ bajcheʼ miʼ yʌl jiñi Biblia ,mi caj lac chʌn cuchben lac bʌ lac sajtemal yicʼot mi caj lac ñusʌben lac bʌ lac mul tiʼ pejtelel lac pusicʼal (pejcan Colosenses 3:12, 13).

9. ¿Bajcheʼ miʼ coltañonla chaʼan wen chuqui mi lac yajcan lac mel cheʼ la cujil pijt? (Proverbios 21:5).

⁹ Cheʼ la cujil pijt miʼ coltañonla chaʼan wen chuqui mi lac yajcan lac mel. Maʼañic mi caj lac waʼ jacʼ lac mel chuqui jach mi lac subentel. Mi caj lac ñaxan aqʼuen i yorajlel chaʼan mi lac wen ñaʼtan chuqui jiñi ñumen wem bʌ chaʼañonla (pejcan Proverbios 21:5). Jumpʼejl ejemplo, mi woli lac sʌclan jumpʼejl eʼtel, tajol orajach la com lac chʼʌm jiñi ñaxam bʌ muʼ bʌ lac taj anquese miʼ mʌctañonla ti lac tempa bʌ yicʼot subtʼan. Pero mi la cujil pijt mi caj lac ñaxan wen qʼuel baqui an jiñi eʼtel, jaypʼejl ora mi caj lac chaʼlen eʼtel yicʼot mi maʼañic miʼ mʌctañonla chaʼan mi la cajñel la quicʼot lac familia yicʼot mi lac melben i yeʼtel Jehová.

10. ¿Chuqui miʼ mejlel lac mel chaʼan mi lac bej pʌs lac pijt?

¹⁰ Laʼ laj cʼajtiben Jehová chaʼan miʼ coltañonla lac ñumen pʌs lac pijt. Come ili jiñʌch jumpʼejl melbalʌl (chaʼlibal) muʼ bʌ i yʌcʼ jiñi espíritu, laʼ laj cʼajtiben Jehová chaʼan miʼ yʌqʼueñonla jiñi chʼujul bʌ espíritu yicʼot chaʼan miʼ coltañonla lac taj jiñi melbalʌl tac muʼ bʌ i yʌcʼ (Gál. 5:22, 23). Mi an chuqui woli lac ñusan i wocol woli la cubin chaʼan mi lac pʌs lac pijt, laʼ lac chʌn cʼajtin jiñi chʼujul bʌ espíritu (Luc. 11:9, 13). Cheʼ jaʼel, miʼ mejlel lac suben Jehová chaʼan miʼ coltañonla laj  qʼuel jiñi wocol cheʼ bajcheʼ miʼ qʼuel. I cheʼ bʌ tsaʼix ujti lac pejcan, laʼ laj qʼuel chuqui miʼ mejlel lac mel chaʼan mi lac pʌs lac pijt. Mi maʼañic mi laj cʌy laj cʼajtiben i coltaya Jehová i mi lac chaʼlen wersa, xucʼu xucʼul mi caj i mejlel lac ñumen pʌs ili melbalʌl.

11, 12. ¿Bajcheʼ an i pʌsʌ Jehová chaʼan wen yujil pijt?

¹¹ Laʼ lac wen ñaʼtan tiʼ tojlel tsaʼ bʌ i pʌsʌyob pijt. Yaʼ ti Biblia miʼ yʌjlel tiʼ tojlel cabʌl lac piʼʌlob tsaʼ bʌ i pʌsʌyob pijt. Mi tsaʼ la cʌqʼue i yorajlel chaʼan mi lac wen ñaʼtan bajcheʼ tsiʼ pʌsʌyob ili melbalʌl mi caj i coltañonla chaʼan mi lac pʌs jaʼel. Laʼ lac ñaxan qʼuel tiʼ tojlel jiñi ñumen yujil bʌ pijt, Jehová.

¹² Satanás tsiʼ bibʼesʌbe i cʼaba Jehová i tsiʼ yʌlʌ chaʼan mach weñic bʌ yumʌl yicʼot mach yujilic cʼuxbiya. ¿Chuqui tsiʼ mele Jehová? Maʼañic tsiʼ waʼ jisa Satanás ti jiñi jach bʌ ora. Tsiʼ yʌcʼʌ ti ñumel cabʌl ora chaʼan miʼ tsictiyel chaʼan jiñʌch yom bʌ miʼ chaʼlen yumʌntel. I cʼʌlʌl ti jimbʌ ora woliʼ pʌs i pijt anquese miʼ bibʼesʌntel i cʼabaʼ. Añʌch i wenlel cheʼ Jehová an i pʌsʌ i pijt come yonlel lac piʼʌlob woliʼ lʌcʼtesañob i bʌ tiʼ tojlel i miʼ mejlelob ti chumtʌl tiʼ pejtelel ora (2 Ped. 3:9, 15). Cheʼ bʌ mi lac ñaʼtan pejtelel jiñi wenlel tajbil bʌ cheʼ Jehová an i pʌsʌ i pijt, miʼ coltañonla chaʼan mach wocolic mi la cubin chaʼan mi lac bej pijtan jinto cheʼ bʌ miʼ chʼʌm tilel i jilibal.

13. ¿Bajcheʼ tsiʼ pʌsʌ Jesús chaʼan yujilʌch pijt cheʼ bajcheʼ i Tat? (Qʼuele jaʼel jiñi foto).

¹³ Jesús tsiʼ pʌsʌ jaʼel chaʼan yujil pijt. Miʼ mejlel lac ñaʼtan chaʼan an i tajol wocolʌch tsiʼ yubi, ñumento tiʼ tojlel jiñi xtsʼijbayajob yicʼot fariseojob (Juan  8:25-27). Pero, cheʼ bajcheʼ i Tat, Jesús mach ti orajic tsaʼ michʼa. Cheʼ bʌ jiñi i contrajob tsiʼ pʼajayob maʼañic tsiʼ chaʼle pʼajoñel (1 Ped. 2:23). Tsiʼ chʌn cuchu jiñi wocol tac, jin chaʼan jiñi Biblia miʼ subeñonla: «Wen ñaʼtanla ti jiñi tsaʼ bʌ i wen lʌtʼʌ i pʼajtʌl tiʼ tojlel jiñi xmulilob» (Heb. 12:2, 3). Tiʼ coltaya Jehová, joñonla jaʼel miʼ mejlel lac pʌs lac pijt i mi laj cuch baqui jach bʌ wocol miʼ tilel.

14. ¿Chuqui mi laj cʌn tiʼ tojlel Abrahán? (Hebreos 6:15, qʼuele jaʼel jiñi foto).

¹⁴ Tajol mi lac ñaʼtan chaʼan i wentʌlel tsaʼix tili i jilibal ili pañimil o mi lac ñaʼtan chaʼan maʼañix mi caj laj qʼuel. Jin chaʼan, ¿chuqui mi caj i coltañonla chaʼan mi lac chʌn pijtan? Laʼ lac ñaʼtan tiʼ tojlel Abrahán. Cheʼ bʌ Jehová tiʼ sube chaʼan mi caj i sujtesan i pʼolbal ti jumpʼejl ñuc bʌ tejclum, Abrahán añix 75 i jabilel i maʼañic mi juntiquilic i yalobil (Gn. 12:1-4). ¿Tsaʼ ba i qʼuele bajcheʼ tsaʼ tsʼʌctiyi tsaʼ bʌ i sube Jehová? Tsaʼʌch, pero mach tsʼʌcʌlic. Cheʼ bʌ tsaʼix i cʼaxta jiñi jaʼ Éufrates, tsaʼto i pijta 25 jab chaʼan miʼ tilel i yalobil, Isaac. I cheʼ jiñi, tsiʼ pijta yambʌ 60 jab chaʼan miʼ qʼuel i butsob, Esaú yicʼot Jacob (pejcan Hebreos 6:15). Pero Abrahán maʼañic tsiʼ qʼuele bajcheʼ tsaʼ sujti ti ñuc bʌ tejclum jiñi i pʼolbalob yicʼot bajcheʼ tsaʼ ochiyob ti jiñi Lum tsaʼ bʌ wʌn subentiyob. Anquese cheʼ bajcheʼ jiñi, Abrahán tsaʼ sujti ti wem bʌ i yamigo Jehová (Sant. 2:23). Ñaʼtancu bajcheʼ mi caj i yubin i bʌ Abrahán cheʼ bʌ miʼ chaʼ chʼojyel i miʼ yubin chaʼan cabʌl lac piʼʌlob tsiʼ tajayob cabʌl bendición come tsaʼʌch i wen ñopo Jehová  i tsiʼ chʌn pʌsʌ i pijt (Gn. 22:18). ¿Chuqui mi laj cʌn? Anquese ili ora tajol maʼañic mi caj lac luʼ qʼuel bajcheʼ miʼ tsʼʌctiyel jiñi albil bʌ i chaʼan Jehová, pero mi mucʼʌch lac pʌs lac pijt cheʼ bajcheʼ Abrahán, miʼ mejlel lac ñop chaʼan Jehová mi caj i yʌqʼueñonla bendición ili ora i ñumento yaʼ ti tsijiʼ bʌ pañimil (Mar. 10:29, 30).

15. ¿Chuqui miʼ mejlel a tsajin cheʼ bʌ maʼ chaʼlen estudio ti a bajñelil?

¹⁵ Yaʼ ti Biblia miʼ yʌjlel tiʼ tojlel cabʌl lac piʼʌlob tsaʼ bʌ i pʌsʌyob pijt (Sant. 5:10). ¿Ixcu cheʼ muqʼuic a tsajin (wen qʼuel) ili relato tac? b Jumpʼejl ejemplo, David xcolelto cheʼ bʌ tsaʼ yajcʌnti chaʼan miʼ yochel bajcheʼ rey ti Israel, pero tsaʼto i pijta cabʌl jab chaʼan miʼ chʼʌm i yeʼtel. Simeón yicʼot Ana xucʼul tsiʼ melbeyob i yeʼtel Jehová anquese jalto tsiʼ pijtayob chaʼan miʼ qʼuelob jiñi Mesías (Luc. 2:25, 36-38). Cheʼ bʌ maʼ pejcan ili relato tac cʼajtiben a bʌ: «¿Chuqui tsiʼ colta chaʼan miʼ chʌn pijtan? ¿Baqui tac bʌ i wenlel tsiʼ taja cheʼ bʌ tsiʼ pʌsʌ ili melbalʌl? ¿Bajcheʼ miʼ mejlel c lajin?». Cheʼ jaʼel, cabʌl chuqui miʼ mejlel laj cʌn tiʼ tojlel jiñi maʼañic bʌ tsiʼ pʌsʌyob pijt (1 S. 13:8-14). Miʼ mejlel a cʼajtiben a bʌ: «¿Chucoch maʼañic tsiʼ pʌsʌyob pijt? ¿Baqui bʌ wocol tsiʼ tajayob?».

16. ¿Baqui tac bʌ i wenlel cheʼ la cujil pijt?

¹⁶ Laʼ lac ñaʼtan jiñi wenlel tac muʼ bʌ lac taj cheʼ la cujil pijt. Cheʼ la cujil pijt tijicñayonla yicʼot maʼañic mi lac sʌt lac ñʌchʼtʌlel, jin chaʼan miʼ mejlel la cʌl chaʼan miʼ coltañonla chaʼan cʼocʼ mi la cajñel yicʼot maʼañic bajcheʼ yubil mi la cubin. Cheʼ jaʼel, miʼ coltañonla chaʼan wen mi la cajñel la quicʼot yambʌlob yicʼot chaʼan ñumen temel miʼ yajñel jiñi congregación. Mi mach ti orajic mi lac michʼan, maʼañic mi caj i ñumen tsʌtsʼan jiñi wocol (Sal. 37:8; Pr. 14:29). I jiñi ñumen ñuc bʌ jiñʌch cheʼ woli lac lajin Jehová, jiñi lac Tat am bʌ ti panchan, i mi caj lac ñumen lʌcʼtesan lac bʌ tiʼ tojlel.

17. ¿Chuqui jiñi yom bʌ mi lac mel?

¹⁷ Añʌch cabʌl i wenlel cheʼ la cujil pijt i jiñʌch jumpʼejl utsʼatax bʌ melbalʌl. Anquese an i tajol wocol chaʼan mi lac pʌs, Jehová mi caj i coltañonla chaʼan mi lac bej pʌs ili melbalʌl. Cheʼ bʌ wolito lac chʌn pijtan chaʼan miʼ tilel jiñi tsijiʼ bʌ pañimil, miʼ mejlel lac ñop chaʼan «lac Yum woliʼ cʌntan jini woli bʌ i bʌcʼñañob, woli bʌ i pijtañob i coltʌntel ti lac Yum» (Sal. 33:18). Jin chaʼan, laʼ lac chʌn pʌs lac pijt.