1. ¿Chucoch jiñi chʼʌmjaʼ jiñʌch junchajp ñuc bʌ i cʼʌjñibal? (Qʼuele jiñi foto).

TI JUJUMPʼEJL jab, yonlel wiñicob xʼixicob (quixtañujob) muʼ bʌ i techob i chʼʌm estudio chaʼan Biblia miʼ chaʼleñob chʼʌmjaʼ. An cabʌl xcolelobto o chutobto bʌ. Tajol jiñi i tatob añobix tiʼ sujmlel cheʼ bʌ tsaʼ coliyob. Ixcu jatet, ¿tsaʼix baʼ chaʼle chʼʌmjaʼ? Mi cheʼʌchi, ubin a tijicñʌyel. Iliyi jiñʌch junchajp ñuc bʌ i cʼʌjñibal yom bʌ miʼ melob jiñi xñoptʼañob chaʼan miʼ tajob i coltʌntel (Mt. 28:19, 20; 1 P. 3:21).

2. ¿Chucoch mach yomic maʼ bʌcʼñan a wʌqʼuen a bʌ Dios?

² Cheʼ chʼʌmʌlix a chaʼan jaʼ mucʼʌch i mejlel a taj cabʌl bendición, pero añʌch chuqui tac yom maʼ mel jaʼel. ¿Chucoch? Come cheʼ bʌ tsaʼ chaʼle chʼʌmjaʼ, tsaʼ melbentiyet ili cʼajtiya: «Chaʼan tsaʼix a qʼuele ti ñuc jiñi i cuxtʌlel tsaʼ bʌ i yʌcʼʌ Cristo, ¿tsaʼix baʼ cʌyʌ a mul yicʼot tsaʼix baʼ wʌcʼʌ a bʌ ti Jehová chaʼan maʼ melben i yeʼtel?», i jatet tsaʼ wʌlʌ chaʼan tsaʼʌch. Tsaʼ wʌcʼʌ a tʼan chaʼan mi caj a cʼuxbin Jehová i chaʼan ñaxan mi caj a wʌcʼ ti ñuc cheʼ maʼ  melben i yeʼtel. ¿Yom ba maʼ ñaʼtan chaʼan mach weñic chuqui tsaʼ mele? Maʼañic. Cheʼ maʼ wʌcʼ a bʌ ti Jehová jiñʌch ñumen wem bʌ miʼ mejlel a mel. ¿Anto ba yambʌ? Mi maʼañic maʼ melben i yeʼtel (troñel) Jehová, maʼ wochel tiʼ wenta Satanás. I mach yomic maʼ taj a coltʌntel. Yom bʌ jiñʌch chaʼan maʼañic maʼ mejlel ti chumtʌl tiʼ pejtelel ora, i maʼ wochel tiʼ wenta chaʼan maʼ tsʼaʼlen i yumʌntel Jehová.

3. ¿Chuqui tac wem bʌ tajbil a chaʼan cheʼ tsaʼ wʌcʼʌ a bʌ ti Jehová?

³ Ñaʼtancu tiʼ pejtelel chuqui wem bʌ tajbil a chaʼan cheʼ tsaʼ wʌcʼʌ a bʌ ti Jehová i tsaʼ chaʼle chʼʌmjaʼ. Come añetix tiʼ wenta Jehová, miʼ mejlel a wʌl ti jumpʼejl a pusicʼal: «Lac Yum an quicʼot. Maʼanic mi caj c bʌcʼñan chuqui miʼ tumbeñoñob winicob» (Sal. 118:6). Cheʼ añonla tiʼ tojlel Dios yicʼot miʼ qʼuelonla ti wen maʼañic yambʌ ñumen ñuc bʌ.

4, 5. a) ¿Chucoch mi la cʌl chaʼan ti jujuntiquil an ti lac wenta cheʼ mi la cʌcʼ lac bʌ ti Jehová? b) ¿Chuqui tac ti wocol mi lac ñusan ti lac pejtelel?

⁴ Mi chʼʌmʌlix a chaʼan jaʼ, mach yomic maʼ ñaʼtan chaʼan jiñi a cʼuxbiya ti Jehová lajal bajcheʼ jumpʼejl lum muʼ bʌ a mejlel ti cʌybentel ti a tat. Anquese yaʼto chumulet a wicʼot a tat a ñaʼ, maʼañobic tiʼ wenta chaʼan miʼ mejlel a taj a coltʌntel, jatetʌch an ti a wenta. ¿Chucoch yomʌch maʼ ñaʼtan iliyi? Come mach a wujilic chuqui tac ti wocol mi caj a ñusan ti talto bʌ qʼuin. Jumpʼejl ejemplo, tajol chutetto tsaʼ chaʼle chʼʌmjaʼ. Pero mi xcoleletix tajol qʼuexelix bajcheʼ maʼ wubin a bʌ i yambʌlix chuqui tac maʼ ñusan. Juntiquil xcʼalʌl 18 bʌ i jabilel tsiʼ yʌlʌ: «Cheʼ bʌ chutetto, maʼañic maʼ michʼan cheʼ i testigojet Jehová ti caj maʼañic maʼ mejlel a mʌcʼ pastel chaʼan cumpleaño ti escuela. Pero cheʼ maʼ taj majlel a jabilel i maʼ tech a wubin ti a bʌcʼtal chaʼan wen a wom piʼleya, ti jumpʼejl a pusicʼal yom maʼ ñop chaʼan jiñʌch ñumen wem bʌ cheʼ maʼ jacʼben i mandar Dios».

⁵ Tiʼ sujm mach cojach miʼ tajob wocol jiñi xcolelob. Jiñi ñucobix bʌ miʼ chaʼleñob chʼʌmjaʼ mucʼʌch i ñusañob wocol jaʼel mach bʌ pijtʌbilic i chaʼañob. Tajol wocol tiʼ ñujpuñelob, chaʼan jumpʼejl cʼamʌjel o tiʼ yeʼtelob. Mach yʌlʌlic jaypʼejl lac jabilel, ti lac pejtelel mi lac taj wocol tac baqui yomʌch mi lac pʌs lac xucʼtilel ti Jehová (Stg. 1:12-14).

6. a) ¿Chuqui yom i yʌl cheʼ ti tsʼʌcʌl tsaʼ wʌcʼʌ a bʌ ti Jehová? b) ¿Chuqui maʼ cʌn ti Filipenses 4:11-13?

⁶ Cheʼ maʼ chʌn cʼajtesan chaʼan ti tsʼʌcʌl tsaʼ wʌcʼʌ a bʌ ti Jehová, mi caj i coltañet chaʼan chʌn xucʼul maʼ wajñel tiʼ pejtelel wocol. Ili yom i yʌl chaʼan tsaʼ wʌqʼue a tʼan jiñi Yumʌl bʌ ti panchan yicʼot ti pañimil chaʼan maʼañic mi caj a cʌy a melben i yeʼtel anquese jiñi a tat a ñaʼ o a wamigojob miʼ cʌyob (Sal. 27:10). Tiʼ pejtelel ora miʼ mejlel a cʼajtiben Jehová chaʼan miʼ coltañet a taj a pʼʌtʌlel chaʼan maʼ tsʼʌctesan jiñi a tʼan tsaʼ bʌ a wʌcʼʌ (pejcan Filipenses 4:11-13).

7. ¿Chuqui yom i yʌl cheʼ yom maʼ mel chuqui utsʼat tiʼ ‹tsiltsilñiyel a pusicʼal yicʼot bʌqʼuen› chaʼan maʼ taj a coltʌntel?

⁷ Jehová yom chaʼan maʼ sujtel tiʼ yamigo. Pero yomʌch maʼ chaʼlen wersa chaʼan chʌn utsʼat maʼ wajñel a wicʼot i maʼ mejlel a taj a coltʌntel. Cheʼ jaʼel ti Filipenses 2:12 miʼ yʌl: «Tiʼ tsiltsilñʌyel laʼ pusicʼal yicʼot bʌqʼuen yom mi laʼ chʌn chaʼlen chuqui utsʼat chaʼan miʼ tsictiyel woli laʼ coltʌntel». Ili tʼan miʼ pʌs chaʼan yom maʼ wen ñaʼtan yom bʌ maʼ mel chaʼan utsʼat maʼ chʌn ajñel a wicʼot Jehová yicʼot chʌn xucʼul maʼ wajñel anquese maʼ taj wocol. Mach a ñaʼtan chaʼan luʼ a wujilix. Cʼajtesan chaʼan añʌch yajlemoʼ bʌ anquese añix ora tsiʼ techeyob i melben i yeʼtel Dios. Cheʼ jiñi, ¿chuqui mi caj i coltañet a taj a coltʌntel?

8. a) ¿Chuqui yom i yʌl jiñi estudio ti lac bajñelil? b) ¿Chucoch ñuc i cʼʌjñibal mi lac mel?

⁸ Chaʼan mi lac sujtel tiʼ yamigo Jehová, yom mi lac ñʌchʼtʌben i tʼan yicʼot mi lac pejcan. Junchajp ñuc bʌ i cʼʌjñibal bajcheʼ mi lac ñʌchʼtan jiñʌch cheʼ mi lac mel jiñi estudio ti lac bajñelil, yaʼ ochem cheʼ mi lac pejcʌben i Tʼan Dios yicʼot jiñi jun tac chucul bʌ ti Biblia, i mi lac wen ñaʼtan chuqui mi lac pejcan. Cheʼ maʼ pejcan jiñi Biblia, cʼajtesan chaʼan mach chaʼañic jach maʼ lot ti a jol muʼ bʌ a pejcan, cheʼ bajcheʼ maʼ mel ti escuela cheʼ bʌ a wom a ñusan ti wen jumpʼejl examen. Iliyi lajalʌch bajcheʼ mi lac majlel ti xʌmbal baqui miʼ mejlel lac sʌclan yicʼot mi lac taj chuqui tsijib tac bʌ tiʼ tojlel Jehová. Iliyi mi caj i coltañet a lʌcʼtesan a bʌ tiʼ tojlel, i mi caj i lʌcʼtesan i bʌ baʼ añet (Stg. 4:8).

9. ¿Chuqui an a cʼʌñʌ cheʼ maʼ mel jiñi estudio ti a bajñelil?

⁹ Jiñi organización i chaʼan Jehová an i yʌcʼʌ cabʌl laj coltʌntel chaʼan maʼ mejlel a chajpan bajcheʼ maʼ mel jiñi estudio ti a bajñelil. Laʼ laj qʼuel ejemplo tac am bʌ yaʼ ti página i chaʼan Internet www.pr418.com/es. Cheʼ maʼ wochel yaʼ ti sección «Jóvenes», mi caj a taj baqui miʼ yʌl «Actividades para estudiar la Biblia», muʼ bʌ i mejlel i coltañet a cʌn chuqui miʼ cʌntesañonla jiñi relato tac am bʌ ti Biblia. Ti jiñi sección miʼ mejlel a taj jaʼel jiñi guías de estudio «¿Qué enseña realmente la Biblia?», muʼ bʌ i coltañet a pʼʌtʼesan a ñopoñel (chʼujbiya) ti Dios yicʼot maʼ tsictesan chuqui ñopol a chaʼan. Cheʼ jaʼel, yaʼ ti revista ¡Despertad! i chaʼan abril, 2009, miʼ mejlel a taj yan tac bʌ chuqui miʼ mejlel a mel yaʼ ti temaj baqui miʼ yʌl «Los jóvenes preguntan. ¿Cómo disfrutar la lectura de la Biblia?». Cheʼ maʼ pejcan jiñi Biblia yicʼot jun tac i maʼ wen ñaʼtan muʼ bʌ i yʌl, jiñʌch muʼ bʌ caj i coltañet tiʼ melol chuqui utsʼat chaʼan maʼ taj a coltʌntel (pejcan Salmo 119:105).

10. ¿Chucoch yomʌch miʼ mel oración jiñi xñoptʼan chʼʌmʌlix bʌ i chaʼan jaʼ?

¹⁰ Tsaʼix laj qʼuele chaʼan cheʼ mi lac pejcan jiñi Biblia mi lac ñʌchʼtʌben i tʼan Jehová. Pero yom mi lac melben oración mi la com tʼan la quicʼot. Jiñi oración mach cheʼic jach yom mi laj qʼuel bajcheʼ jumpʼejl costumbre o jumpʼejl eʼtijibʌl muʼ bʌ laj cʼʌn chaʼan wen  miʼ loqʼuel chuqui la com. Jiñi oración jiñʌch bajcheʼ mi lac mejlel ti tʼan la quicʼot jiñi tsaʼ bʌ i luʼ Mele chuqui an. Jehová yom i ñʌchʼtañet (pejcan Filipenses 4:6). Mi an chuqui maʼ cʼojoʼtan, jiñi Biblia miʼ yʌqʼueñet ili ticʼojel: «Aqʼuen a cuch lac Yum» (Sal. 55:22). ¿Muʼ baʼ ñop chaʼan mucʼʌch caj i coltañet iliyi? Ili jiñʌch coltʌbil bʌ i chaʼan yonlel hermanojob, i miʼ mejlel a ñop chaʼan jiñʌch mi caj i coltañet jaʼel.

11. ¿Chucoch ti bele ora yom maʼ wʌqʼuen wocolix i yʌlʌ Jehová?

¹¹ Tiʼ pejtelel ora yom mi lac melben oración Jehová, mach jiñic jach cheʼ la com coltʌntel. Jiñi Biblia miʼ yʌl: «Subenla Dios wocolix i yʌlʌ» (Col. 3:15). Tajol jin jach mi lac wen ñaʼtan jiñi lac wocol i miʼ ñajʌyel lac chaʼan jiñi bendición tac tajbil bʌ lac chaʼan. ¿Ixcu cheʼ muqʼuic a wʌl ti a pusicʼal chaʼan ti jujumpʼejl qʼuin maʼ ñaʼtan uxchajp chucoch yom maʼ wʌqʼuen wocolix i yʌlʌ Jehová? Juntiquil xcʼalʌl i cʼabaʼ Abigail, tsaʼ bʌ i chaʼle chʼʌmjaʼ cheʼ 12 i jabilel, miʼ yʌl: «Miʼ cʌl maʼañic yambʌ yom bʌ mi lac wen aqʼuen wocolix i yʌlʌ, cojach Jehová. Ti jujumucʼ yom mi la cʌqʼuen wocolix i yʌlʌ chaʼan pejtelel chuqui aqʼuebil i chaʼañonla. Mic wen mulan j cʼajtesan jumpʼejl tʼan tsaʼ bʌ cubi ti ajlel: ‹Laʼcu lac ñaʼtan chaʼan ti jumpʼejl bʌ qʼuin cheʼ mi lac tejchel cojach mi lac taj laj qʼuel jiñi tsaʼix bʌ i yʌqʼueyonla Jehová ti yambʌ qʼuin, pero tsaʼix la cʌqʼue wocolix i yʌlʌ chaʼan jiñi. ¿Cabʌlto ba chuqui an lac chaʼan cheʼ jiñi?›».

12, 13. ¿Chucoch yomʌch maʼ ñaʼtan bajcheʼ an a qʼuele chaʼan Jehová utsʼatʌch?

¹² Jehová tsiʼ colta i ñusan tsʌts tac bʌ wocol jiñi rey David. Jin chaʼan, David wen yujil chucoch tsiʼ yʌlʌ ili tʼan: «Ñopola utsʼat lac Yum. Ñaʼtanla, tijicña jini muʼ bʌ i taj i coltʌntel ti lac Yum» (Sal. 34:8). Ili versículo miʼ pʌs chaʼan i cʼʌjñibalʌch cheʼ maʼ ñop a qʼuel ti a cuxtʌlel chaʼan utsʼatʌch i melbal Jehová. Cheʼ maʼ pejcan jiñi Biblia yicʼot jiñi jun tac loqʼuem bʌ yaʼi, i cheʼ maʼ majlel ti tempa bʌ tac, miʼ mejlel a cʌn cabʌlob am bʌ i qʼuelbeyob i coltaya Dios chaʼan xucʼul miʼ chʌn ajñelob. Pero cheʼ bajcheʼ woli (choncol) a colel majlel tiʼ chaʼan bʌ Jehová, jatetʌch yom maʼ qʼuel jaʼel i pʼʌtʌlel Jehová ti a cuxtʌlel. ¿Bajcheʼ an a qʼuele chaʼan utsʼatʌch Jehová?

¹³ Tiʼ pejtelel xñoptʼañonbʌla an junchajp bajcheʼ qʼuelbil lac chaʼan chaʼan Jehová utsʼatʌch yicʼotonla. Miʼ pʌyonla chaʼan mi lac lʌcʼtesan lac bʌ tiʼ tojlel yicʼot tiʼ Yalobil. Jesús tiʼ yʌlʌ: «Maʼ majch chʼujbi i yochel tic chaʼan mi maʼ miʼ ñaxan nijcʌbentyel i pusicʼal chaʼan tic Tyat tsaʼ bʌ i chocoyon tyʌlel» (Jn. 6:44, Jini wen bʌ tʼan). ¿Pʌybil ba i chaʼañet Jehová maʼ wʌl? Juntiquil xcolel tajol miʼ ñaʼtan: «Jehová tsaʼʌch i pʌyʌ jiñi c tatob, i joñon woli jach c tsajcañob». Pero cheʼ tsaʼ wʌcʼʌ a bʌ ti Jehová i tsaʼ chaʼle chʼʌmjaʼ, tsaʼ pʌsʌ chaʼan lʌcʼʌl a wom ajñel a wicʼot. Wʌle wen i cʌñʌyetix. Jiñi Biblia miʼ yʌl: «Mi an majch miʼ cʼuxbin Dios, cʌmbil jini winic ti Dios» (1 Co. 8:3). Chʌn qʼuele ti ñuc yaʼ baqui acʼbil i chaʼañet Jehová tiʼ yorganización.

14, 15. ¿Chucoch miʼ mejlel i pʼʌtʼesan a ñopoñel jiñi subtʼan?

¹⁴ Cheʼ maʼ tsajin bajcheʼ coltʌbil i chaʼañet cheʼ maʼ wʌcʼ ti cʌñol ti subtʼan yicʼot ti escuela jiñi ñopol bʌ a chaʼan, maʼ taj a qʼuel chaʼan Jehová utsʼatʌch. An wocol bʌ miʼ yubiñob chaʼan miʼ chaʼleñob subtʼan ti escuela come mach yujilobic bajcheʼ mi caj i jacʼbentelob. Tajol cheʼʌch ñusʌbil a chaʼan. Ñumen wocolto mi cabʌlob woli (yʌquel) bʌ a pejcañob. ¿Chuqui miʼ mejlel i coltañet?

¹⁵ Ti ñaxan, ñaʼtan chucoch maʼ ñop jiñi cʌmbil bʌ a chaʼan. Yaʼ ti página chaʼan Internet  www.pr418.com/es, miʼ tilel jiñi guías de estudio am bʌ ti cabʌl tʼan tac chaʼan miʼ coltañet a ñaʼtan chucoch maʼ ñop yicʼot bajcheʼ miʼ mejlel a tsictesan. ¿Ixcu cheʼ muqʼuic a wʌqʼuen i yorajlel chaʼan maʼ sʌclan? Cheʼ ti jumpʼejlʌch a pusicʼal maʼ ñop yicʼot maʼ wen chajpan a bʌ, mi caj a mulan a wʌcʼ ti cʌjñel i cʼabaʼ Jehová (Jer. 20:8, 9).

16. ¿Chuqui miʼ mejlel i coltañet chaʼan maʼañic maʼ bʌcʼñan a tsictesan jiñi ñopol bʌ a chaʼan?

¹⁶ Pero tajol muʼto a bej chaʼlen bʌqʼuen chaʼan maʼ tsictesan chuqui cʌmbil a chaʼan anquese wen chajpʌbiletʌch. Juntiquil xcʼalʌl tsaʼ bʌ i chaʼle chʼʌmjaʼ cheʼ bʌ 13 jaxto i jabilel, miʼ yʌl: «Cujil chuqui mic ñop, pero an i tajol wocol miʼ cubin chaʼan mic tsictesan». ¿Chuqui miʼ mel? Miʼ yʌl chaʼan miʼ chaʼlen wersa chaʼan cheʼʌch miʼ chaʼlen tʼan bajcheʼ ñʌmʌl. Miʼ chaʼ al: «Jiñi c piʼʌlob ti clase maʼañic miʼ bʌcʼñañob i yʌl chuqui yomob. Ixcu joñon, ¿chuqui yom mic bʌcʼñan? Jin chaʼan, cheʼ bʌ an chuqui woli cʌl, ti ora jach mi cotsan c tʼan: ‹Ti yambʌ qʼuin cheʼ bʌ woliyon ti cʌntesa chaʼan Biblia...›. Cheʼ jiñi, mic chaʼ al majlel chuqui quepel cʌl. Anquese mach yoque loqʼuemic ti Biblia jiñi muʼ bʌ cʌl, añʌch muʼ bʌ i mulañob i bej ñaʼtan yicʼot miʼ cʼajtibeñoñob chuqui mic mel cheʼ mic pʌs i chaʼan bʌ Biblia. Cheʼ mic wen mel bajcheʼ iliyi, mic ñumen sʌt majlel c bʌqʼuen. Tijicña mi cubin jajayajl mi cʌcʼ ti cʌñol jiñi i sujmlel».

17. ¿Chucoch yomʌch mi lac pʌs chaʼan mucʼʌch lac ñop chaʼan isujmʌch chuqui woli la cʌl?

¹⁷ Mi mucʼʌch a chʼʌm ti ñuc jiñi yañoʼ bʌ cheʼʌch mi caj i melob ti a tojlel. Juntiquil xcʼalʌl am bʌ 17 i jabilel i cʼabaʼ Olivia, chutto bʌ tiʼ chaʼle chʼʌmjaʼ, miʼ yʌl: «Tiʼ pejtelel ora tsaʼ c bʌcʼña chaʼan mi tsaʼ c taja ti tʼan jiñi Biblia, jiñi yambʌlob miʼ mejlel i subeñoñob chaʼan ñumeñoñix ti pʼis». Pero tsaʼ caji ti qʼuextʌyel majlel. Maʼañix tsaʼ caji i yʌcʼ ti ñuc jiñi i bʌqʼuen, tsiʼ ñaʼta: «Cabʌl xcolelob mach wen i cʌñʌyobic jiñi i testigojob Jehová, joñon jach i cʌñʌyon lojon. Jin chaʼan, yaʼʌch cʌyʌl ti lac melbal chuqui miʼ ñaʼtañob ti lac tojlel. Mi ñʌchʼʌlon jachla i maʼañic baʼ ora mi lac subeñob muʼ bʌ lac ñop i yicʼot jach lac bʌqʼuen mi lac pejcañob, tajol miʼ ñaʼtañob chaʼan mach wen tijicñayonla cheʼ Testigojonla. Tajol muʼto i michʼañob cheʼ miʼ qʼuelob chaʼan maʼañic mi lac wen ñop yilal woli bʌ la cʌl. Pero cheʼ miʼ qʼuelob chaʼan mucʼʌch lac wen ñop chuqui woli lac subeñob yicʼot wen jach mi lac chaʼlen tʼan, tajol mi caj i qʼueloñobla ti ñuc».

18. ¿Chuqui yom maʼ mel chaʼan maʼ taj a coltʌntel?

¹⁸ Tsaʼix laj qʼuele chaʼan wen ñucʌch i cʼʌjñibal cheʼ jatetʌch maʼ chaʼlen wersa chaʼan maʼ taj a coltʌntel. Jin chaʼan, yom maʼ pejcan jiñi Biblia i maʼ wen ñaʼtan muʼ bʌ i yʌl, maʼ pejcan Dios ti oración yicʼot maʼ ñaʼtan jiñi bendición tac aqʼuebil bʌ i chaʼañet. Ili mi caj i coltañet a wen ñaʼtan mi a wamigojʌch Jehová. Jiñʌch muʼ bʌ caj i ñijcan a pusicʼal chaʼan maʼ tsictesan chuqui ñopol a chaʼan (pejcan Salmo 73:28).

19. ¿Chucoch yomʌch mi lac chaʼlen wersa chaʼan mi lac taj laj coltʌntel?

¹⁹ Jesús tsiʼ yʌlʌ: «Mi an majqui yom i tsajcañon, laʼ i cʌy chuqui yom tiʼ bajñel pusicʼal. Laʼ i chʼʌm i cruz [«teʼ», TNM]. Laʼ i tsajcañon» (Mt. 16:24). Wen tsiquil chaʼan i tsajcʌntel Jesús yom i yʌl chaʼan mi la cʌcʼ laj cuxtʌlel ti Jehová i mi lac chaʼlen chʼʌmjaʼ. Cheʼ bajcheʼ ili, miʼ mejlel lac taj cabʌl bendición ili ora yicʼot jiñi cuxtʌlel maʼañic bʌ i jilibal albil bʌ i chaʼan Dios yaʼ ti tsijiʼ bʌ pañimil. Jin chaʼan, an cabʌl chucoch yom mi lac chaʼlen wersa chaʼan mi lac mel chuqui utsʼat chaʼan mi lac taj laj coltʌntel.