1, 2. ¿Chucoch an tatʌlob muʼ bʌ i wen cʼojoʼtañob cheʼ jiñi i yalobilob yomobix i yʌcʼob i bʌ ti Jehová yicʼot i chaʼleñob chʼʌmjaʼ?

TI JUJUMPʼEJL jab yonlel muʼ bʌ i tech i pejcañob jiñi Biblia miʼ yʌcʼob i bʌ ti Jehová i miʼ chʼʌmob jaʼ. Cabʌl jiñʌch jiñi xcolelob tsaʼ bʌ coliyob cheʼ xñoptʼañobix i tat i ñaʼ, i tsiʼ yajcayob i mel (chaʼlen) jiñi ñumen wem bʌ (Sal. 1:1-3). Tiʼ sujm, jiñi tatʌlob Testigojoʼ bʌ, miʼ wen mulañob cheʼ muqʼuic i cʼotel i chʼʌmob jaʼ i yalobilob (laja yicʼot 3 Jn. 4).

² Pero jiñi tatʌlob añʌch chuqui miʼ cʼojoʼtañob. Tajol cʌmbilob i chaʼan xcolelob tsaʼ bʌ i chʼʌmʌyob jaʼ, pero ti wiʼil maʼañix tsaʼ caji i wen ñopob chaʼan añʌch i wenlel cheʼ miʼ jacʼob i mandar Dios. An tsaʼ bʌ i junyajlel cʌyʌyob i melben i yeʼtel (troñel) Jehová. Jin chaʼan, jiñi tatʌlob miʼ wen bʌcʼñañob cheʼ jiñi i yalobilob miʼ qʼuextañob i pensar cheʼ tsaʼix i chʼʌmʌyob jaʼ i maʼañix miʼ qʼuelob ti ñuc jiñi i sujmlel. Ili jiñʌch tsaʼ bʌ ujti tiʼ tojlel jiñi congregación am bʌ ti Éfeso cheʼ ti ñaxam bʌ siglo. Jesús tiʼ sube: «Maʼanix mi laʼ wen cʼuxbiñon cheʼ bajcheʼ ti ñaxan» (Ap. 2:4). ¿Chuqui miʼ mejlel i melob  jiñi tatʌlob chaʼan mach cheʼic miʼ yujtel i yalobilob i miʼ bej ‹colelob majlel chaʼan i coltʌntel›? (1 P. 2:2). Laʼ laj qʼuel tiʼ tojlel Timoteo.

3. a) ¿Jalixqui tsaʼ sujti ti xñoptʼan Timoteo, i chuqui tsiʼ mele yicʼot jiñi tsaʼ bʌ i cʌñʌ? b) ¿Baqui bʌ jiñi uxchajp tsaʼ bʌ subenti Timoteo tiʼ tojlel Pablo?

³ Tajol Timoteo tsiʼ cʌñʌ i cʌntesa Jesús cheʼ ti jabil 47, cheʼ cojachto tsaʼ cʼoti Pablo yaʼ ti Listra. Timoteo xcolelto ti jiñi bʌ ora, pero tsaʼʌch i pʌsʌ tiʼ melbal tsaʼ bʌ i cʌñʌ, i cheʼ bʌ ñumeñix chaʼpʼejl jab, tsaʼ caji i piʼlen ti subtʼan Pablo bajcheʼ misionero. Cheʼ bʌ ñumeñix 16 jab, Pablo tiʼ tsʼijbube iliyi: «Pero jatet, chʌn cʼajtesan pejtelel tsaʼ bʌ a cʌñʌ yicʼot cheʼ tsaʼ ñijcʌbentiyet a pusicʼal chaʼan maʼ ñop, come a wujil majqui tiʼ tojlelob tsaʼ cʌñʌ, i chaʼan cʼʌlʌl cheʼ chutet to tsaʼ cʌñʌ jiñi chʼujul bʌ tsʼijbujel tac [jiñi Tsʼijbujel Hebreo], muʼ bʌ i yʌqʼueñet a ñaʼtʌbal chaʼan maʼ taj a coltʌntel chucul bʌ ti a ñopoñel ti Cristo Jesús» (2 Ti. 3:14, 15, TNM). Laʼ lac wen tsajin ili uxchajp tsaʼ bʌ i yʌlʌ: 1) «Tsaʼ cʌñʌ jiñi chʼujul bʌ tsʼijbujel tac», 2) «tsaʼ ñijcʌbentiyet a pusicʼal chaʼan maʼ ñop» yicʼot 3) «muʼ bʌ i yʌqʼueñet a ñaʼtʌbal chaʼan maʼ taj a coltʌntel chucul bʌ ti a ñopoñel ti Cristo Jesús».

4. ¿Chuqui an a cʼʌñʌ chaʼan miʼ mejlel a cʌntesan jiñi chuttoʼ bʌ a walobilob? (Qʼuele jiñi foto am bʌ tiʼ tejchibal).

⁴ Jiñi tatʌlob xñoptʼañoʼ bʌ yomob chaʼan jiñi i yalobilob miʼ cʌñob jiñi «chʼujul bʌ tsʼijbujel tac», yaʼ bʌ ochem wʌle jiñi Tsʼijbujel Hebreo yicʼot jiñi Tsʼijbujel Griego. Cheʼʌch bajcheʼ cʼamel miʼ mejlelob, jiñi alpʼeñelob miʼ mejlel i tsʼitaʼ cʌñob jaʼel jiñi relato tac am bʌ ti Biblia yicʼot muʼ bʌ i tajtʌlob ti tʼan. Jiñi i yorganización Jehová an i mele ti cabʌl tʼan jiñi libro, folleto yicʼot video tac chaʼan jiñi tatʌlob miʼ coltañob i yalobil. ¿Baqui tac bʌ miʼ mejlel a wʌl? Yom mi laj cʼajtesan chaʼan ñumen lʌcʼʌl mi caj la cajñel tiʼ tojlel Jehová cheʼ mi laj cʌn jiñi Chʼujul bʌ Tsʼijbujel.

5. a) ¿Chuqui yom i yʌl cheʼ miʼ ñijcʌntel lac pusicʼal chaʼan mi lac ñop? b) ¿Chucoch miʼ mejlel laj cʌl chaʼan tsaʼʌch i wen ñopo Timoteo chaʼan Jesús jiñʌch jiñi Mesías?

⁵ Mach cojicach yom maʼ pʌsbeñob jiñi chʼujul bʌ tsʼijbujel a walobilob, yom bʌ i yʌl, jiñi muʼ bʌ i tajtʌlob ti tʼan yicʼot relato tac am bʌ ti Biblia. Cheʼ jaʼel, Timoteo tsaʼ ‹ñijcʌbenti i pusicʼal chaʼan miʼ ñop›. Ili tʼan ti griego yom i yʌl cheʼ «an chuqui miʼ ñijcan lac pusicʼal chaʼan mi lac wen ñop» yicʼot cheʼ «mi lac wen ñop chaʼan isujmʌch muʼ bʌ lac subentel». Timoteo tsiʼ cʌñʌ jaʼel jiñi Tsʼijbujel Hebreo cheʼ alʌlto. Pero cheʼ ñumeñix cabʌl jab, tsiʼ wen ñopo chaʼan Jesús jiñʌch jiñi Mesías. Come tsaʼʌch i wen ñopo, tsiʼ chaʼle chʼʌmjaʼ yicʼot tsiʼ piʼle ti subtʼan Pablo bajcheʼ misionero.

6. ¿Bajcheʼ miʼ mejlel i mel juntiquil tatʌl chaʼan jiñi i yalobil miʼ cʼotel i wen ñop muʼ bʌ i cʌn yaʼ ti Biblia?

⁶ ¿Bajcheʼ miʼ mejlel i mel juntiquil tatʌl chaʼan miʼ ñijcʌben i pusicʼal i yalobil, lajal bajcheʼ Timoteo? Yom miʼ pʌs chaʼan yujilʌch pijt. Jiñi i yalobil mach ti orajic mi caj i ñop muʼ bʌ i cʌntesʌntel, i maʼañic mi caj i ñop jaʼel tiʼ cajach chaʼan jiñi i tatob mucʼʌch i ñopob. Jiñi alobob yomʌch miʼ ‹wen ñaʼtañob mi jiñʌch mero isujm bʌ woli bʌ ti subentel› chaʼan miʼ taj i ñopoñel (chʼujbiya) ti Biblia (pejcan 1 Tesalonicenses 5:21). Wen ñuc i cʼʌjñibal cheʼ jiñi tatʌlob miʼ coltañob i yalobil, ñumento cheʼ miʼ melob cʼajtiya tac. Laʼ laj qʼuel jumpʼejl ejemplo.

7, 8. a) ¿Bajcheʼ miʼ pʌs juntiquil tatʌl chaʼan yujilʌch pijt cheʼ miʼ cʌntesan i yalobil? b) ¿Baqui ora an a pʌsʌ chaʼan a wujilʌch pijt tiʼ tojlel a walobilob?

⁷ Juntiquil hermano i cʼabaʼ Thomas an  juntiquil i yixicʼal (yixicpʼeñal) 11 bʌ i jabilel. Miʼ yʌl chaʼan an i tajol jiñi i yixicʼal miʼ mel cʼajtiya tac bajcheʼ iliyi: «¿Tsaʼ bʌ i cʼʌñʌ Jehová jiñi evolución chaʼan miʼ mel pejtelel jiñi cuxul tac bʌ?» yicʼot «¿Chucoch maʼañic mi lac majlel ti votación mi muqʼuic lac mel yan tac bʌ chaʼan mi laj coltan lac tejclum?». An i tajol, Thomas maʼañic chuqui miʼ yʌl chaʼan maʼañic miʼ toʼol suben chuqui yom miʼ ñop. Yujil chaʼan ñumen wen cheʼ xucʼu xucʼul miʼ tsictesʌben chaʼan miʼ ñop, i mach jiñic cheʼ ora miʼ pʌsben.

⁸ Wen an i cʼʌjñibal cheʼ yujilob pijt jiñi xñoptʼañob. Jiñi Thomas yujil chaʼan yomʌch miʼ pʌs ili melbalʌl chaʼan miʼ coltan i yixicʼal (Col. 3:12). Miʼ ñaʼtan chaʼan yom miʼ yʌqʼuen i yorajlel yicʼot miʼ chaʼleñob tʼan. Yom miʼ ñijcʌben i pensar i yixicʼal chaʼan miʼ wen ñop chaʼan isujmʌch woli (choncol) bʌ i cʌn yaʼ ti Biblia. Miʼ yʌl: «Joñon quicʼot quijñam com lon c ñaʼtan mi jiñi lon quixicʼal mucʼʌch i ñop woli bʌ i cʌn i mi añʌch i sujmlel miʼ ñaʼtan, ñumento cheʼ ñuc i cʼʌjñibal woli bʌ i cʌn. I weñʌch cheʼ miʼ mel cʼajtiya tac. Cheʼ machic miʼ cʼajtin chaʼan woli bʌ i ñop, miʼ mejlel c wen cʼojoʼtan».

9. ¿Bajcheʼ miʼ mejlel i melob jiñi tatʌlob chaʼan miʼ pʌsbeñob i yalobil jiñi i sujmlel am bʌ ti Biblia?

⁹ Cheʼ yujilob pijt jiñi tatʌlob, jiñi i yalobilob cʼunteʼ cʼunteʼ miʼ ñaʼtañob bajcheʼ cʼamel i «jawtilel, yicʼot i ñajtlel, yicʼot i chanlel, yicʼot i tamlel» jiñi i ñopoñelob (Ef. 3:18). Yom miʼ qʼuelob jaypʼejl i jabilelob chaʼan miʼ ñaʼtañob bajcheʼ cʼamel mi caj i cʌntesañob. Cheʼ jiñi alobob miʼ wen ñopob muʼ bʌ i cʌñob, ñumen wen mi caj i tsictesʌbeñob i piʼʌlob ti escuela yicʼot yambʌlob chuqui ñopol i chaʼan (1 P. 3:15). Jumpʼejl ejemplo, ¿mejl ba i tsictesañob yaʼ ti Biblia chucoch miʼ lac chʌmel (sajtel)? ¿Añʌch ba i sujmlel miʼ ñaʼtañob? * Jiñi tatʌlob yomʌch yujilob pijt chaʼan miʼ cʌntesañob i yalobil chaʼan muʼ bʌ i yʌl jiñi Biblia, i añʌch i wenlel cheʼ miʼ melob bajcheʼ jiñi (Dt. 6:6, 7).

10. ¿Chuqui ñuc bʌ i cʼʌjñibal yom miʼ mel jiñi tatʌlob?

¹⁰ Ti isujm, ñuc i cʼʌjñibal cheʼ jiñi tatʌlob miʼ pʌsob tiʼ melbal muʼ bʌ i cʌñob chaʼan jiñi i yalobilob miʼ ñopob jaʼel. Stephanie, am bʌ uxtiquil xchʼoc bʌ i yalobil, miʼ yʌl: «Cheʼ wen chutob to, an j cʼajtibe c bʌ: ‹¿Muʼ ba c tsictesʌbeñob chucoch mic ñop chaʼan añʌch Jehová i chaʼan tojʌch chuqui miʼ mel yicʼot añʌch i cʼuxbiya? ¿Jamʌ tsiquil ba miʼ qʼuelob chaʼan mucʼʌch j cʼuxbin?›. Mach mejlic c pijtan chaʼan mucʼʌch i ñopob mi maʼañic mic ñop».

11, 12. ¿Chuqui yom i yʌl cheʼ an lac ñaʼtʌbal, i chucoch miʼ mejlel la cʌl chaʼan mach yʌlʌyic jaypʼejl i jabilel juntiquil quixtañu?

¹¹ Cheʼ bajcheʼ tsaʼix laj qʼuele, Timoteo cʌmbil i chaʼan am bʌ yaʼ ti Chʼujul bʌ Tsʼijbujel yicʼot wen ñopol i chaʼan jiñi tsaʼ bʌ i cʌñʌ. Pero ¿chuqui yom i yʌl Pablo cheʼ bʌ tsiʼ sube chaʼan jiñi chʼujul bʌ tsʼijbujel miʼ ‹yʌqʼuen i ñaʼtʌbal chaʼan miʼ taj i coltʌntel›?

¹² Ti jiñi libro Perspicacia, yaʼ ti volumen 2 miʼ tsictesan chaʼan yaʼ ti Biblia, jiñi lac ñaʼtʌbal «jiñʌch cheʼ mi laj cʼʌn jiñi cʌmbil bʌ lac chaʼan yicʼot am bʌ lac ñusa chaʼan mi lac tojʼesan wocol, maʼañic mi lac taj wocol, mi lac taj chuqui la com lac mel o mi la cʌqʼuen ticʼojel yañoʼ bʌ. Mach lajalic  bajcheʼ jiñi tontojlel». Jiñi Biblia miʼ yʌl chaʼan jiñi xcolelob ‹tsʌts chucul i tontojlelob tiʼ pusicʼal› (Pr. 22:15). Pero cheʼ an lac ñaʼtʌbal yom i yʌl chaʼan an laj colel. Chaʼan miʼ taj i colel juntiquil quixtañu mach yʌlʌyic jaypʼejl i jabilel, i cʼʌjñibal bʌ jiñʌch cheʼ miʼ bʌcʼñan Jehová yicʼot miʼ jacʼben i mandar (pejcan Salmo 111:10).

13. ¿Bajcheʼ miʼ mejlel i pʌs jiñi xcolel chaʼan añʌch i ñaʼtʌbal chaʼan miʼ taj i coltʌntel?

¹³ Jiñi xcolelob tsaʼix bʌ i bej tajayob majlel i colel tiʼ chaʼan bʌ Dios mach cheʼobic «bajcheʼ i yopol teʼ muʼ bʌ i ñijcan icʼ» tiʼ caj chuqui miʼ mulañob o chaʼan miʼ xijqʼuelob tiʼ piʼʌlob (Ef. 4:14). Woli (yʌquel) i ñumen tajob majlel i colel chaʼan miʼ mejlelob i ‹cʌn chuqui wen yicʼot chuqui mach weñic› (He. 5:14). Cheʼ wen chuqui miʼ yajcañob i mel anquese maʼañic miʼ qʼuejlelob tiʼ tat i ñaʼ o tiʼ tojlel yañoʼ bʌ, miʼ pʌsob chaʼan woliyʌch i tajob i colel (Fil. 2:12). Chaʼan miʼ tajob i coltʌntel, ñuc i cʼʌjñibal cheʼ añob i ñaʼtʌbal (pejcan Proverbios 24:14). ¿Chuqui miʼ mejlel i mel juntiquil tatʌl chaʼan miʼ coltañob i taj i ñaʼtʌbal i yalobilob? Ñaxan yom miʼ wen qʼuel mi woliyʌch i pʌsben i yalobilob chaʼan miʼ chʼʌmob ti ñuc muʼ bʌ i yʌl jiñi Biblia. Yom miʼ pʌs tiʼ tʼan yicʼot tiʼ melbal chaʼan cheʼʌch chumul cheʼ bajcheʼ miʼ yʌl tiʼ Tʼan Dios (Ro. 2:21-23).

14, 15. a) ¿Chuqui yom miʼ ñaxan ñaʼtan jiñi xcolel yom bʌ i chʼʌmjaʼ? b) ¿Bajcheʼ miʼ mejlel a coltan a walobil chaʼan miʼ ñaʼtan baqui bʌ i wenlel tac cheʼ miʼ jacʼ jiñi mandar tac am bʌ ti Biblia?

¹⁴ Cheʼ jaʼel, jiñi tatʌlob mach cojicach miʼ suben i yalobilob chuqui wen o mach bʌ weñic. Chaʼan miʼ coltañob, yom miʼ melbeñob cʼajtiya tac bajcheʼ iliyi: «¿Chucoch mach weñic miʼ qʼuejlel yaʼ ti Biblia jiñi wen utsʼatax bʌ yilal? ¿Chuqui miʼ coltañet a ñop chaʼan jiñi mandar tac am bʌ ti Biblia mucʼʌch i yʌqʼueñet a wenlel?» (Is. 48:17, 18).

¹⁵ Cheʼ bʌ juntiquil alob miʼ yʌl chaʼan yom chʼʌmjaʼ, jiñi tatʌlob yom miʼ yʌqʼueñob i ñaʼtan chuqui tac yom miʼ melob. ¿Bajcheʼ miʼ qʼuel? ¿Baqui tac bʌ i wenlel? ¿Baqui tac bʌ i wocolel? ¿Chucoch ñumen on jiñi wenlel muʼ bʌ i tajtʌl bajcheʼ jiñi  wocol tac? (Mr. 10:29, 30). Jiñi chʼiton yom miʼ wen ñaʼtan ili cʼajtiya tac cheʼ maxto i chʼʌmʌ jaʼ. Mi jiñi tatʌlob miʼ coltañob i ñaʼtan baqui tac bʌ wenlel cheʼ miʼ jacʼ tʼan yicʼot baqui tac bʌ i wocolel cheʼ maʼañic miʼ mel, mi caj i ñop chaʼan utsʼatʌch cheʼ tiʼ pejtelel ora miʼ jacʼ jiñi mandar tac am bʌ ti Biblia (Dt. 30:19, 20).

16. ¿Chuqui yom miʼ mel jiñi tatʌlob cheʼ miʼ tejchel tile bixel bʌ i pusicʼal i yalobilob cheʼ chʼʌmbilix i chaʼañob jaʼ?

¹⁶ ¿Chuqui miʼ mejlel i mel jiñi tatʌlob cheʼ miʼ tejchel tile bixel bʌ i pusicʼal i yalobilob cheʼ chʼʌmbilix i chaʼañob jaʼ? Jumpʼejl ejemplo, juntiquil xcolel miʼ mejlel i tech i mulan an tac bʌ ti pañimil (mulawil) o miʼ tech i cʼajtiben i bʌ mi weñixto cheʼ miʼ bej jacʼ jiñi principio tac am bʌ ti Biblia (Sal. 73:1-3, 12, 13). Yom miʼ wen ñaʼtañob mi mucʼʌch caj i coltañob i yalobil chaʼan miʼ bej melbeñob i yeʼtel Jehová o maʼañic cheʼ bajcheʼ yilal miʼ pʌsob. Mach yomic maʼ chaʼlen leto a wicʼot, anquese chutto o xcolelix. Yom maʼ wʌqʼuen i ñaʼtan chaʼan mucʼʌch a cʼuxbin yicʼot a wom a coltan.

17, 18. Cheʼ miʼ tejchel tilel bixel bʌ tiʼ pusicʼal juntiquil xcolel, ¿chuqui miʼ mejlel i mel jiñi tatʌlob chaʼan miʼ coltan?

¹⁷ Tiʼ sujm, jiñi xcolel chʼʌmʌlix bʌ i chaʼan jaʼ tsiʼ waʼchoco i tʼan ti Jehová chaʼan mi caj i cʼuxbin yicʼot mi caj i melben i yeʼtel (pejcan Marcos 12:30). Dios miʼ chʼʌm ti ñuc jiñi lac tʼan muʼ bʌ la cʌcʼ, i jiñi muʼ bʌ i yʌcʼob i cuxtʌlel tiʼ tojlel cheʼʌch yom miʼ melob jaʼel (Ec. 5:4, 5). Jiñi tatʌlob yom miʼ sʌclʌbeñob i yorajlel chaʼan wen jach miʼ chaʼ cʼajtesʌbeñob i yalobil. Pero yom miʼ ñaxan wen pejcañob chuqui tac albil i chaʼan jiñi organización tiʼ tojlel jiñi tatʌlob. Jiñʌch muʼ bʌ caj i coltañob i tsictesan chaʼan wen ñucʌch i cʼʌjñibal cheʼ i testigojonla Jehová yicʼot jiñi bendición tac muʼ bʌ lac taj.

¹⁸ Jumpʼejl ejemplo, jiñi tatʌlob miʼ mejlel i tajob ticʼojel tac yaʼ ti libro Los jóvenes preguntan, volumen 1, ti jiñi apéndice baʼ miʼ yʌl «Los padres preguntan». Miʼ yʌl: «Mach a waʼ ñaʼtan chaʼan maʼañix chuqui yom a walobil chaʼan bʌ i ñopbal. Yonlel xcolelob an jach chuqui yom i tojʼesañob chuqui miʼ yubiñob tiʼ pusicʼal». Tajol miʼ ticʼlʌntelob ti yambʌ i piʼʌlob, i bajñel jach miʼ yubiñob i bʌ o miʼ yubiñob i chʼijiyemlel cheʼ miʼ qʼuelob yambʌ xcolelob orajach bʌ woliʼ tajob i colel yaʼ ti congregación. Yaʼ ti apéndice miʼ bej al: «Ili wocol tac maʼañic mi caj i jisʌben chuqui ñopol i chaʼan. Ili muʼ bʌ i ñusan jiñi xcolel mucʼ jach i yʌcʼ chaʼan bej tsʌts miʼ yubin i tsʼʌctesʌntel cheʼ bajcheʼ ñopol i chaʼan, tajol jumucʼ jach». Jiñi apéndice miʼ yʌl chuqui yom miʼ mel jiñi tatʌlob cheʼ miʼ tejchel tilel bixel bʌ i pusicʼal jiñi i yalobilob chaʼan i sujmlel.

19. ¿Bajcheʼ miʼ mejlel i coltañob i yalobil jiñi tatʌlob chaʼan miʼ tajob i ñaʼtʌbal muʼ bʌ i yʌcʼ coltʌntel?

¹⁹ Jiñʌch wen ñuc bʌ eʼtel i chaʼan jiñi tatʌlob cheʼ miʼ cosañob i yalobil tiʼ ‹cʌntesʌbal lac Yum› Jehová (Ef. 6:4). Cheʼ bajcheʼ tsaʼix laj qʼuele, mach cojach yom miʼ pʌsbeñob muʼ bʌ i yʌl jiñi Biblia, yomʌch miʼ coltañob i ñop ti jumpʼejlob i pusicʼal chuqui miʼ cʌñob. Chaʼan jiñi xcolelob miʼ yʌcʼob i cuxtʌlel ti Jehová i ti jumpʼejlob i pusicʼal miʼ melbeñob i yeʼtel, yomʌch miʼ cʼotel i wen ñopob chuqui miʼ cʌñob. Jiñi tatʌlob miʼ mejlel i coltañob i yalobil chaʼan miʼ tajob i ñaʼtʌbal muʼ bʌ i yʌcʼ coltʌntel, i cʼʌjñibalʌch jiñi Biblia, jiñi chʼujul bʌ espíritu yicʼot cheʼ miʼ chaʼleñob wersa bajcheʼ tatʌlob.