1. ¿Chucoch mi la cʌl chaʼan wen ñuc woli bʌ i yujtel ili ora?

TI ILI ora an chuqui ñuc bʌ woli (choncol) ti ujtel. Cheʼ bajcheʼ tsiʼ wʌn alʌ jiñi Biblia Jehová woli (yʌquel) i tempan yonlel wiñicob xʼixicob chʼoyoloʼ bʌ «tiʼ pejtelel tejclum tac, ti jujunmojt winicob, tiʼ pejtelel lum yicʼot tiʼ pejtelel tʼan tac». Iliyi sujtem «ti colem tejclum» come yaʼ ochemob ñumen ti 8 millón wiñicob xʼixicob (quixtañujob) tijicñayoʼ bʌ yicʼot «miʼ chaʼlibeñob i yeʼtel [Dios] ti qʼuiñil ti acʼʌlel ti mal i Templo» (Ap. 7:9, 15; Is. 60:22). Maʼañic ba ora qʼuelbil lac chaʼan bajcheʼ wʌle cheʼ cabʌl quixtañujob miʼ cʼuxbiñob Dios yicʼot i piʼʌlob.

2. ¿Bajcheʼ yilal bʌ cʼuxbiya an i chaʼan jiñi ñajt bʌ añob ti Dios? (Qʼuele jiñi dibujo).

² Jiñi Biblia tsiʼ wʌn alʌ jaʼel chaʼan ili ora an muʼ bʌ caj i pʌsob yan tac bʌ cʼuxbiya muʼ bʌ i yʌcʼ ti cʌjñel chaʼan ñajt añob ti Dios. Jiñi apóstol Pablo tiʼ tsʼijbu chaʼan «ti cojix bʌ qʼuin», cabʌl muʼ bʌ caj «i bajñel cʼuxbi[ñob] i bʌ», «mi caj i mulañob taqʼuin» yicʼot «miʼ mulañob pejtel chuqui tac yom i pusicʼal. Maʼanic miʼ cʼuxbiñob Dios» (2 Ti. 3:1-4). Ili cʼuxbiya mach lajalic bajcheʼ jiñi cʼuxbiya am bʌ i chaʼan jiñi xñoptʼañob. Jiñi mucʼ jach i bajñel ñaʼtañob i bʌ maʼañic miʼ tajob tijicñʌyel.  Cheʼ jaʼel, jiñi cʼuxbiya miʼ yʌqʼueñob i ñaʼtan chaʼan cojach yom miʼ bajñel ñaʼtañob i bʌ i miʼ yʌcʼob ti wocol yambʌlob.

3. ¿Chuqui mi caj laj cʌn ti ili temaj, i chucoch?

³ Pablo yujil chaʼan mucʼʌch caj i wen pʼojlel cheʼ tac bʌ cʼuxbiya bajcheʼ ili i miʼ mejlel i yotsan ti wocol jiñi xñoptʼañonbʌla. Jin chaʼan, tsiʼ yʌlʌ chaʼan yom mi lac tʌtsʼ lac bʌ ti tojlel muʼ bʌ i pʌsob ili cʼuxbiya (2 Ti. 3:5). Anquese wocolʌch chaʼan mi lac tʌtsʼ lac bʌ tiʼ tojlel cheʼoʼ bʌ bajcheʼ iliyi. Jin chaʼan, ¿chuqui miʼ mejlel lac mel chaʼan maʼañic mi lac toyben i melbal jiñi quixtañujob yicʼot mi lac chaʼlen wersa chaʼan utsʼat miʼ qʼuelonla Jehová, jiñi Dios am bʌ i cʼuxbiya? La laj qʼuel chucoch mach lajalic jiñi cʼuxbiya yom bʌ Dios chaʼan mi lac pʌs yicʼot jiñi cʼuxbiya muʼ bʌ i yʌjlel ti 2 Timoteo 3:2-4. Ili mi caj i coltañonla chaʼan mi lac wen tsajin lac bʌ yicʼot mi laj qʼuel bajcheʼ miʼ mejlel lac taj jiñi cʼuxbiya muʼ bʌ caj i yʌqʼueñonla lac tijicñʌyel.

4. ¿Chucoch la cujil chaʼan mach mulilic cheʼ mi lac bajñel cʼuxbin lac bʌ?

⁴ Cheʼ bajcheʼ tsaʼix laj qʼuele, Pablo tiʼ tsʼijbu: «Come jujuntiquil mi caj i bajñel cʼuxbin i bʌ». ¿Yom ba i yʌl iliyi chaʼan mach weñic cheʼ mi lac bajñel cʼuxbin lac bʌ? Maʼañic. I tilelʌch cheʼ mi laj cʼuxbin lac bʌ, i añʌch i cʼʌjñibal, come Jehová cheʼʌch tsiʼ meleyonla. Jesús tsiʼ yʌlʌ: «Cʼuxbin a piʼʌlob cheʼ bajcheʼ maʼ bajñel cʼuxbin a bʌ» (Mr. 12:31). Mi maʼañic mi lac bajñel cʼuxbin lac bʌ, mach mejlic laj cʼuxbin yambʌlob. Cheʼ jaʼel, jiñi Biblia miʼ yʌl: «Yom miʼ cʼuxbiñob i yijñam winicob cheʼ bajcheʼ miʼ bajñel cʼuxbiñob i bʌcʼtal. Jini muʼ bʌ i cʼuxbin i yijñam woliʼ bajñel cʼuxbin i bʌ. Maʼanic winic muʼ bʌ i tsʼaʼlen i bʌcʼtal. Miʼ weʼesan, miʼ cʌntan ti utsʼat» (Ef. 5:28, 29). Jin chaʼan, weñʌch cheʼ mucʼʌch laj cʼuxbin lac bʌ.

5. ¿Bajcheʼ yilal jiñi quixtañu cʌlʌxix bʌ miʼ cʼuxbin i bʌ?

⁵ Jiñi muʼ bʌ i bajñel cʼuxbiñob i bʌ muʼ bʌ i yʌl 2 Timoteo 3:2 mach tojic, come mach jiñic wem bʌ cʼuxbiya. Jiñi i bajñel jach bʌ miʼ cʼuxbiñob i bʌ, ñumeñix ti pʼis bajcheʼ yilal miʼ qʼuelob i bʌ (pejcan Romanos 12:3, Jiñi tsijiʼ bʌ wen tʼañ chaʼañ estudio) *. Miʼ cʌlʌx cʼojoʼtañob i bʌ, i mach tiʼ tojlelic yambʌlob. I cheʼ bʌ an chuqui mach weñic miʼ mel, an i tajol miʼ yʌqʼuen i mul yambʌlob chaʼan maʼañic chuqui miʼ subentel. Jiñi i bajñelob jach bʌ miʼ wen cʼuxbiñob i bʌ mach tijicñayobic.

6. ¿Baqui bʌ i wenlel cheʼ mi laj cʼuxbin Dios?

⁶ An wen yujiloʼ bʌ muʼ bʌ i ñaʼtañob chaʼan cheʼ bʌ Pablo tsiʼ taja ti tʼan bajcheʼ yilal i melbal jiñi quixtañujob ti ili cojix bʌ qʼuin, ñaxan tsiʼ yʌlʌ jiñi cʼuxbiya ti lac bʌjach bʌ come jiñʌch baqui miʼ tejchel jiñi yambʌ melbalʌl tac muʼ bʌ i wiʼil ajlel. Pero jiñi muʼ bʌ i cʼuxbiñob Dios, yambʌyʌch i melbalob. Jiñi Biblia miʼ yʌl chaʼan i cʼuxbintel Dios miʼ yʌcʼ tijicñʌyel, ñʌchʼtʌlel, pijt, wenlel, i yutslel lac pusicʼal, ñopoñel (chʼujbiya), utslel yicʼot i ticʼol lac bʌ (Gá. 5:22, 23, TNM). Juntiquil tsaʼ bʌ i tsʼijbu jiñi salmo, tsiʼ cʼʌyi: «Tijicña miʼ yajñelob jini winicob xʼixicob [...] come i chaʼañob Dios» (Sal. 144:15). Jehová juntiquilʌch Dios tijicña bʌ, i cheʼobʌch jiñi i wiñicob jaʼel. Cheʼ jaʼel, jiñi i wiñicob Dios tijicñayob come miʼ yʌcʼob i bʌ chaʼan miʼ coltañob yambʌlob, mach cheʼobic bajcheʼ jiñi i bajñel jach bʌ miʼ cʼuxbiñob i bʌ i cojach yomob chaʼan miʼ yʌqʼuentel (Hch. 20:35).

7. Mi la com lac ñaʼtan bajcheʼ an laj cʼuxbiya ti Dios, ¿chuqui yom mi laj cʼajtiben lac bʌ?

⁷ ¿Bajcheʼ miʼ mejlel lac ñaʼtan mi cojach joñonla woli lac ñumen cʼuxbin lac bʌ, i mach jiñic Dios? Laʼ lac ñaʼtan jiñi ticʼojel am bʌ ti Filipenses 2:3, 4, baqui miʼ yʌl: «Mach yomic chuqui mi laʼ wis mel tiʼ tsʌytsʌyñʌyel laʼ pusicʼal chaʼan mi laʼ  chañʼesan laʼ bʌ. Pero yom pecʼ mi laʼ mel laʼ bʌ. Yom ñumen ñuc mi laʼ qʼuel laʼ piʼʌlob cheʼ bajcheʼ mi laʼ bajñel qʼuel laʼ bʌ. Mach jinic jach laʼ bajñel wenlel yom mi laʼ ñaʼtan pero i wenlel laʼ piʼʌlob jaʼel». Miʼ mejlel laj cʼajtiben lac bʌ: «¿Woli ba cʌcʼ ti ñuc ili ticʼojel? ¿Tiʼ sujm ba woliyon ti wersa chaʼan mic mel chuqui yom Dios? ¿Muʼ ba c sʌclan bajcheʼ tac miʼ mejlel j coltan yambʌlob yaʼ ti congregación yicʼot ti subtʼan?». An i tajol wocolʌch chaʼan mi la cʌcʼ lac bʌ ti coltʌntel yambʌyob. Tajol yomʌch mi lac chaʼlen cabʌl wersa yicʼot mi laj cʌy chuqui tac mi lac mulan. Pero cojach miʼ wen aqʼueñonla lac tijicñʌyel cheʼ la cujil chaʼan utsʼat añonla tiʼ tojlel jiñi Yumʌl bʌ ti panchan yicʼot ti pañimil.

8. ¿Chuqui melbil i chaʼan cabʌl hermanojob chaʼañob i cʼuxbiya ti Dios?

⁸ An hermanojob cʌybil bʌ i chaʼañob ñuc tac bʌ eʼtel (troñel) baʼ miʼ mejlel i wen tajob taqʼuin, come miʼ cʼuxbiñob Dios yicʼot yomob i ñumen melben i yeʼtel. Juntiquil hermana i cʼabaʼ Ericka tsiʼ taja i yeʼtel bajcheʼ doctora, pero maʼañic tiʼ sʌcla i ñuclel ti jiñi eʼtel. Tsaʼ bʌ i mele, tsaʼ ochi ti precursora regular i tsajñi ti coltaya yicʼot i ñoxiʼal ti yan tac bʌ país. Miʼ yʌl: «Cabʌl chuqui utsʼatax bʌ ñusʌbil lon c chaʼan ti yan tac bʌ tʼan, i tajbil lon c chaʼan cabʌl camigojob. Pejtelel iliyi wen aqʼuebil i chaʼañon lojon c tijicñʌyel. Bej mucʼoñʌch ti eʼtel bajcheʼ doctora, pero muʼ bʌ i ñumen aqʼueñon c tijicñʌyel jiñʌch cheʼ mij cʼʌn jiñi i yorajlel c chaʼan yicʼot c pʼʌtʌlel chaʼan mij cʌntesan yambʌlob tiʼ chaʼan bʌ Dios yicʼot cheʼ mij coltan jiñi congregación».

9. ¿Chucoch maʼañic miʼ mejlel i tajob i tijicñʌyel jiñi muʼ bʌ i cʼuxbiñob taqʼuin?

⁹ Pablo tsiʼ taja ti tʼan jaʼel jiñi muʼ bʌ i cʼuxbiñob o «i mulañob taqʼuin». Añix ora, juntiquil precursor ti Irlanda tiʼ sube i Tʼan Dios juntiquil wiñic. Jiñi wiñic tsiʼ chʼʌmʌ i cartera, tsiʼ locʼsa i taqʼuin i tsiʼ yʌlʌ ti chʼejl bʌ tʼan: «¡Jiñi c dios jiñʌch iliyi!». Cabʌl wiñicob xʼixicob cheʼʌch miʼ ñaʼtañob bajcheʼ ili wiñic, anquese tajol maʼañic miʼ jamʌ alob. Miʼ cʼuxbiñob jiñi taqʼuin yicʼot muʼ bʌ i mejlel i yʌqʼueñob. Pero jiñi Biblia miʼ wʌn al: «Jini am bʌ i woʼlel chaʼan taqʼuin maʼanic mi caj i jastiyel ti taqʼuin» (Ec. 5:10). Jiñi muʼ bʌ i cʼuxbiñob taqʼuin chʌn jin jach yomob i ñumen taj, i ti bele ora miʼ sʌclañob bajcheʼ miʼ tajob. Pero cojach miʼ tajob «cabʌl wocol» (1 Ti. 6:9, 10).

10. ¿Chuqui tsiʼ yʌlʌ Agur chaʼan jiñi chubʌʼañʌl tac yicʼot jiñi pʼumpʼuñiyel?

¹⁰ Isujmʌch, ti lac pejtelel an i cʼʌjñibal lac chaʼan jiñi taqʼuin, come miʼ mejlel la cʌl chaʼan mucʼʌch i cʌntañonla (Ec. 7:12). Pero mi jin jach an lac chaʼan jiñi i cʼʌjñibal bʌ, ¿mucʼʌch ba i mejlel lac taj lac tijicñʌyel? Muʼcu (pejcan Eclesiastés 5:12). Agur, i yalobil Jaqué, tsiʼ cʼajtibe Dios: «Mach a wotsañon ti pobre, mach a wotsañon ti rico. Cojach yom maʼ wʌqʼueñon chaʼan jasʌlon ti jujumpʼejl qʼuin». Mucʼʌch i mejlel lac ñaʼtan chucoch mach yomic cheʼ pʼumpʼun. Tiʼ tsictesa chaʼan mach yomic i chaʼlen xujchʼ, come cheʼʌch miʼ bibʼesʌben i cʼabaʼ Dios. Pero ¿chucoch maʼañic tsiʼ cʼajti ochel ti rico? Tiʼ sube Dios: «Ame c ñusañet cheʼ ñajonix, ame c sub ¿bacʼan tsiquil lac Yum?» (Pr. 30:8, 9). Tajol cʌmbil lac chaʼan quixtañujob muʼ bʌ i qʼuelob ti ñuc i chubʌʼan i mach jiñix Dios.

11. ¿Chuqui tsiʼ yʌlʌ Jesús chaʼan jiñi taqʼuin?

¹¹ Muʼ bʌ i mulañob taqʼuin mach utsʼatic miʼ yajñelob tiʼ tojlel Dios. Jesús tsiʼ yʌlʌ: «Maʼanic xʼeʼtel muʼ bʌ mejlel i yuman chaʼtiquil yumʌl. Miʼ tsʼaʼlen juntiquil yumʌl, miʼ cʼuxbin yambʌ. Miʼ jacʼben i tʼan juntiquil, miʼ ñusʌben i tʼan yambʌ. Mach mejlic laʼ yuman Dios cheʼ woli laʼ yuman chubʌʼañʌl». Jesús tsaʼ jaxto ujti i yʌl: «Mach mi laʼ tempan laʼ chubʌʼan ti pañimil baʼ miʼ jisan motsoʼ, baʼ miʼ  caj ti taʼ, baʼ miʼ yochelob xujchʼ i xujchʼiñob loqʼuel. Tempan laʼ chubʌʼan ti panchan baʼ maʼanic miʼ jisan motsoʼ, baʼ maʼanic miʼ caj ti taʼ, baʼ maʼanic miʼ yochelob xujchʼ i xujchʼiñob loqʼuel» (Mt. 6:19, 20, 24).

12. ¿Chucoch mach wen wocolic ti melol i yeʼtel Jehová cheʼ mach cabʌlic lac chubʌʼan? Acʼʌ jumpʼejl ejemplo.

¹² An qʼuelbil i chaʼan cabʌlob chaʼan tijicñayob cheʼ mach cabʌlic i chubʌʼañob, cheʼ jaʼel, ñumen an i yorajlel i chaʼañob tiʼ melol i yeʼtel Jehová. Ti Estados Unidos, juntiquil hermano i cʼabaʼ Jack an colem bʌ i yotot yicʼot an i choñoñel, pero tsiʼ choño chaʼan miʼ yochel ti precursor yicʼot i yijñam. Tiʼ tsictesa: «Mach cʼuñic cheʼ tsaʼ lon j cʌyʌ wen utsʼatax bʌ cotot lojon yicʼot jiñi c lum lojon. Cabʌl jabil cheʼ mucʼon ti wen eʼtel, michʼon mic sujtel ti cotot tiʼ caj chuqui miʼ yujtel ti queʼtel. Pero jiñi quijñam, am bʌ bajcheʼ precursora, joy qʼuin tijicña. Miʼ subeñon: ‹An wem bʌ c yum ti eʼtel›. Wʌle cheʼ añoñix jaʼel bajcheʼ precursor, muqʼuix c tem melben lojon i yeʼtel Jehová».

13. ¿Chuqui mi caj i coltañonla lac ñaʼtan bajcheʼ yilal mi laj qʼuel jiñi taqʼuin?

¹³ ¿Chuqui mi caj i coltañonla lac ñaʼtan bajcheʼ yilal mi laj qʼuel jiñi taqʼuin? Yom mi lac wen cʼajtiben lac bʌ: «¿Muʼ ba c pʌs chaʼan mic chʼʌm ti ñuc chuqui miʼ yʌl jiñi i Tʼan Dios? ¿Jim ba mic ñumen mulan c taj taqʼuin? ¿Muʼ ba c wen qʼuel ti ñuc jiñi chubʌʼañʌl tac i mach jiñic bajcheʼ yilal añon tiʼ tojlel Jehová yicʼot yambʌlob? ¿Mucʼʌch ba c wen ñop chaʼan Jehová mi caj i yʌqʼueñon chuqui i cʼʌjñibal c chaʼan?». Yom mi lac wen cʼajtesan chaʼan Jehová maʼañic mi caj i wis cʌy jiñi muʼ bʌ i wen ñopob (Mt. 6:33).

14. ¿Bajcheʼ yilal yom mi laj qʼuel jiñi muʼ bʌ lac mulan?

¹⁴ Cheʼ bajcheʼ tsaʼ wʌn ajli, ili ora an cabʌl muʼ bʌ i wen «mulañob pejtel chuqui tac yom i pusicʼal». Lajal bajcheʼ maʼañic i wocolel cheʼ wen jach bajcheʼ mi laj qʼuel jiñi taqʼuin yicʼot bajcheʼ mi laj qʼuel lac bʌ, maʼañic i wocolel jaʼel cheʼ la com lac tsʼitaʼ mel chuqui tac mi lac mulan. An muʼ bʌ i yʌlob chaʼan yom mi laj cʌy pejtelel chuqui mi lac mulan yicʼot bajcheʼ chumulonla. Pero mach cheʼic miʼ cʌntesañonla Jehová. Jiñi Biblia miʼ suben pejtel jiñi xucʼul bʌ i wiñicob: «Cucu, chaʼlen weʼel yicʼot uchʼel yicʼot i tijicñʌyel a pusicʼal» (Ec. 9:7).

15. ¿Chuqui yom i yʌl jiñi tʼan miʼ «mulañob pejtel chuqui tac yom i pusicʼal»?

 ¹⁵ Cheʼ bʌ 2 Timoteo 3:4 miʼ yʌl chaʼan jiñi muʼ bʌ i mulañob pejtel chuqui tac yomob, wolʌch i taj ti tʼan jiñi muʼ bʌ i cʌyob Dios. Ili texto maʼañic miʼ yʌl chaʼan mi caj i ñumen cʼuxbiñob chuqui tac yomob ti pusicʼal, i mach jiñic Dios, come miʼ yʌcʼ ti ñaʼtʌntel chaʼan muqʼuixto i tsʼitaʼ cʼuxbiñob Dios jaʼel. Muʼ bʌ i yʌl jiñʌch chaʼan «maʼanic miʼ cʼuxbiñob Dios». Wen ñuc bʌ ticʼojel tiʼ tojlel jiñi muʼ bʌ i cʌlʌx mulañob chuqui yomob. Jiñi tʼan miʼ «mulañob pejtel chuqui tac yom i pusicʼal» mi wen tsictesan tiʼ tojlel muʼ bʌ i pʌjyelob tiʼ «mulʌntel jiñi am bʌ ti pañimil» (Lc. 8:14).

16, 17. ¿Bajcheʼ yilal tsiʼ qʼuele Jesús pejtel chuqui tac mi lac mulan?

¹⁶ Jesús wen jach bajcheʼ tsiʼ qʼuele pejtel chuqui tac mi lac mulan. Tsajñi ti jumpʼejl «qʼuiñijel chaʼan ñujpuñijel» yicʼot cheʼ «Leví tsiʼ mele qʼuin tiʼ yotot» (Jn. 2:1-10; Lc. 5:29). Cheʼ bʌ tsaʼ jili vino ti jiñi qʼuiñijel chaʼan ñujpuñijel, tsiʼ mele jumpʼejl milagro i tiʼ sujtesa ti vino jiñi jaʼ. Ti yambʌ qʼuin, cheʼ bʌ jiñi quixtañujob tsiʼ chaʼleyob wulwul tʼan tiʼ tojlel chaʼan tiʼ caj uchʼel, tiʼ tsictesa chaʼan mach weñic bajcheʼ woliʼ ñaʼtañob (Lc. 7:33-36).

¹⁷ Jesús maʼañic tsiʼ cʌlʌx acʼʌ i bʌ tiʼ melol chuqui jach miʼ bajñel mulan. Tsiʼ ñaxan acʼʌ ti ñuc Jehová i tsiʼ chaʼle wersa chaʼan miʼ coltan yambʌlob. Cheʼ jaʼel, ti jumpʼejl i pusicʼal tsiʼ yʌcʼʌ i bʌ ti chʌmel (sajtel) chaʼan cabʌl miʼ tajob i coltʌntel. Jesús tiʼ sube jiñi xcʌntʼañob i chaʼan: «Tijicñayetla cheʼ miʼ tsʼaʼleñetla winicob cheʼ miʼ ticʼlañetla, cheʼ miʼ pʌqʼuetla ti jujunchajp jontolil chaʼan tsaʼ laʼ ñopoyon. Laʼ ñucʼac laʼ pusicʼal. Melela ti tijicña laʼ pusicʼal, come ñuc laʼ chobejtʌbal ti panchan, come cheʼ jaʼel tsiʼ ticʼlayob xʼaltʼañob wajali» (Mt. 5:11, 12).

18. ¿Baqui bʌ cʼajtiya mi caj i coltañonla lac ñaʼtan bajcheʼ cʼamel mi laj cʼuxbin jiñi muʼ bʌ lac mulan?

¹⁸ ¿Chuqui mi caj i coltañonla lac ñaʼtan bajcheʼ cʼamel mi laj cʼuxbin jiñi muʼ bʌ lac mulan? Laʼ laj cʼajtiben lac bʌ: «¿Ñumen ñuc ba mij qʼuel jiñi ñusaqʼuin bajcheʼ jiñi tempa bʌ tac yicʼot subtʼan? ¿Ti jumpʼejl ba c pusicʼal mij cʌy chuqui tac mic mulan chaʼan com c melben i yeʼtel Dios? Cheʼ bʌ mic yajcan jumpʼejl ñusaqʼuin, ¿muʼ ba j cʼajtiben c bʌ mi mucʼʌch i mulan Jehová?». Mi mucʼʌch laj cʼuxbin Dios, maʼañic mi caj lac mel la cujil bʌ chaʼan miʼ tsʼaʼlen, mi jiñicto muʼ bʌ lac ñaʼtan chaʼan mucʼʌch i tsʼaʼlen (pejcan Mateo 22:37, 38).

19. ¿Majquiyob jiñi maʼañic bʌ ba ora mi caj i tajob isujm bʌ tijicñʌyel?

¹⁹ Ili i pañimil (mulawil) Satanás añix cheʼ bʌ 6 mil jab i cajel i yʌqʼuen wocol jiñi quixtañujob. Ti ili cojix bʌ qʼuin, jiñi Pañimil butʼul ti quixtañu jin jach bʌ miʼ bajñel ñaʼtañob i bʌ, miʼ ñaʼtañob taqʼuin yicʼot chuqui tac miʼ mulañob. Yaʼ jach añob tiʼ pusicʼal chuqui bajñel yomob yicʼot muʼ bʌ i mejlel i tajob. Ili quixtañujob maʼañic ba ora miʼ mejlel i tajob isujm bʌ tijicñʌyel. Pero jiñi Biblia miʼ yʌl: «Tijicña muʼ bʌ i taj i coltʌntel tiʼ Dios Jacob. Ñʌchʼʌl i pusicʼal woliʼ pijtan lac Yum, come jiñʌch i Dios» (Sal. 146:5).

20. ¿Bajcheʼ an i yʌqʼueyet a tijicñʌyel jiñi a cʼuxbiya ti Dios?

²⁰ Jiñi i wiñiconbʌla Jehová mi lac ñumen cʼuxbin ti jujumpʼejl qʼuin. I ti jujumpʼejl jab cabʌl quixtañu miʼ cʼotelob i cʌn yicʼot miʼ cʼuxbiñob. Ili jiñʌch junchajp muʼ bʌ i pʌs chaʼan wolʌch i mel i yeʼtel jiñi i Yumʌntel Dios i chaʼan lʌcʼʌlix mi caj i chʼʌm tilel bendición tac. Cheʼ mi lac mel chuqui yom Jehová yicʼot utsʼat miʼ qʼuelonla jiñʌch muʼ bʌ i yʌqʼueñonla isujm bʌ tijicñʌyel wʌle yicʼot tiʼ pejtelel ora. Yaʼ ti yambʌ temaj mi caj laj qʼuel bajcheʼ qʼuexel jiñi melbalʌl tac muʼ bʌ i pʼol jiñi cʼuxbiya ti lac bʌ jach bʌ yicʼot jiñi wen tac bʌ melbalʌl muʼ bʌ i pʌsob i wiñicob Dios.