1, 2. ¿Chucoch yom wen tsajilonla i wiñiconbʌla Dios? (Qʼuele jiñi foto tac).

CABΛL doctorob yicʼot enfermerajob miʼ coltañob añoʼ bʌ i cʼamʌjel muʼ bʌ i mejlel lac toyben lac bʌ, i cheʼʌch miʼ melob (chaʼleñob) come yomob i coltan cʼamoʼ bʌ. Pero, mi mach yomobic i toybeñob jiñi cʼamʌjel yomʌch miʼ wen cʌntañob i bʌ. Lajal jaʼel jiñi i wiñiconbʌla Jehová, chumulonla yicʼot mucʼonla ti eʼtel (troñel) yicʼot yambʌ wiñicob xʼixicob (quixtañujob) mach bʌ lajalobic i melbal bajcheʼ i chaʼan Dios. Yom wen tsajilonla mi mach la comic chaʼan miʼ toyonla.

² Ti ili cojix bʌ qʼuin, jiñi quixtañujob miʼ ñusʌbeñob i mandar Jehová chaʼan chuqui tac wen yicʼot mach bʌ weñic. Yaʼ tiʼ chaʼpʼejlel carta i chaʼan Timoteo, jiñi apóstol Pablo tiʼ tsictesa bajcheʼ yilalob jiñi quixtañujob maʼañic bʌ miʼ chʼujutesañob Dios. Jiñi i melbalob ñumento mi caj i qʼuejlel cheʼ woli (choncol) i bej lʌcʼtiyel i jilibal ili pañimil (mulawil) (pejcan 2 Timoteo 3:1-5, 13). Anquese machʌch utsʼatic mi laj qʼuel, mucʼʌch i mejlel lac tech lac lajin bajcheʼ miʼ ñaʼtañob, miʼ chaʼleñob tʼan o chuqui miʼ melob (Pr. 13:20). Jin chaʼan, ila ti temaj mi caj laj qʼuel bajcheʼ qʼuexel i melbal jiñi quixtañujob ili ora yicʼot i melbal jiñi i wiñicob Dios. Mi caj laj qʼuel jaʼel chuqui miʼ mejlel lac mel chaʼan maʼañic mi lac toy jiñi  lecoj bʌ melbalʌl tac i mi laj coltañob i cʌn Dios jiñi yambʌlob.

3. ¿Majqui mi caj i pʌsob jiñi melbalʌl tac muʼ bʌ i yʌjlel ti 2 Timoteo 3:2-5?

³ Cheʼ bajcheʼ qʼuelbil lac chaʼan, jiñi apóstol Pablo tsiʼ yʌlʌ chaʼan cheʼ ti cojix bʌ qʼuin «tal i yorajlel bʌbʌqʼuen tac bʌ», o wen wocol jax bʌ. Cheʼ jiñi, tsiʼ yʌlʌ 18 melbalʌl tac muʼ bʌ caj i wen qʼuejlel ili ora mach bʌ utsʼatic. Yaʼ ti Romanos 1:29-31 miʼ yʌjlel yan tac bʌ melbalʌl lʌcʼʌ lajal bʌ yicʼot. Pero am bʌ yaʼ ti Timoteo ñumen cabʌl muʼ bʌ i yʌl i miʼ cʼʌn tʼan tac maʼañic bʌ baqui miʼ chaʼ ajlel yaʼ ti Tsʼijbujel Griego. Yaʼ ti jun i chaʼan bʌ Timoteo, Pablo tsiʼ teche i yʌl «come jujuntiquil...». Ilayi tsiʼ taja ti tʼan jiñi wiñicob yicʼot xʼixicob, come junlajal miʼ mejlel i pʌsob jiñi melbalʌl tac tsaʼ bʌ i yʌlʌ. Pero mach tiʼ pejtelelobic mi caj i sujtelob bajcheʼ jiñi. Jiñi xñoptʼañob wen qʼuexelobʌch (pejcan Malaquías 3:18).

4. ¿Bajcheʼ yilal juntiquil cʼax ñuc bʌ miʼ pʌs i bʌ?

⁴ Cheʼ bʌ Pablo ujtemix i yʌl chaʼan cabʌl muʼ bʌ caj i bajñel cʼuxbiñob i bʌ yicʼot mi caj i cʼuxbiñob taqʼuin, tsiʼ yʌlʌ jaʼel chaʼan cabʌl «mi caj i chañʼesañob i bʌ, ñuc mi caj i qʼuelob i bʌ», yicʼot chaʼan ‹cʼax ñuc mi caj i pʌsob i bʌ›. Jiñi quixtañujob cheʼoʼ bʌ bajcheʼ iliyi, ñuc miʼ qʼuelob i bʌ tiʼ caj chuqui yujilob, bajcheʼ yilalob, i taqʼuiñob o chaʼan wen bajcheʼ chumulob, i miʼ mulañob cheʼ jiñi yambʌlob miʼ tsajcañob yicʼot miʼ qʼuelob ti ñuc. Juntiquil wen yujil bʌ tsiʼ yʌlʌ chaʼan jiñi muʼ bʌ i chanʼesan i bʌ miʼ pʌs chaʼan jin jach miʼ bajñel chʼujutesan i bʌ, i mach jiñic Dios. An muʼ bʌ i yʌlob chaʼan jiñi chanʼesa bʌ ñoj biʼitic jax, i juntiquil cheʼ bʌ bajcheʼ iliyi muʼto i michʼan cheʼ miʼ taj i qʼuel yambʌ muʼ bʌ i chanʼesan i bʌ.

5. ¿Chuqui an ujtem tiʼ tojlel chaʼtiquil uxtiquil i wiñicob Dios?

⁵ Cheʼ bajcheʼ miʼ yʌl jiñi Biblia, Jehová miʼ tsʼaʼlen «jini muʼ bʌ i chañʼesan i bʌ» (Pr. 6:16, 17). Jiñi chanʼesa bʌ miʼ ñajtesañonla ti Dios (Sal. 10:4). I jiñʌch junchajp am bʌ i chaʼan jiñi Diablo (1 Ti. 3:6). Pero chʼijiyemtic jax, come añʌch i wiñicob Dios cʼotem bʌ i pʌsob ili melbalʌl. Juntiquil jiñʌch Uzías. Ili rey i chaʼan Judá cabʌl jab xucʼul tsaʼ ajñi ti Dios, pero yaʼ ti Biblia miʼ yʌl chaʼan «cheʼ cabʌlix i pʼʌtʌlel, tsaʼ caji i chanʼesan i bʌ. Cabʌl tsiʼ taja i sajtemal, come tsiʼ ñusʌbe i tʼan lac Yum Dios. Tsaʼ ochi tiʼ yotot lac Yum chaʼan miʼ pulben pom yaʼ ti pulʌntib». Cheʼ añix jabil ñumen, jiñi rey Ezequías tsiʼ chanʼesa i bʌ jaʼel, pero mach wen jalic (2 Cr. 26:16; 32:25, 26).

6. a) ¿Chuqui tsaʼ mejli i yʌcʼ chaʼan David miʼ chanʼesan i bʌ? b) ¿Chuqui tsiʼ colta David chaʼan maʼañic miʼ cʌy i pʌs i pecʼlel?

⁶ An muʼ bʌ i chanʼesañob i bʌ tiʼ caj bajcheʼ yilalob, chaʼan wen cʌmbilob, yujilob chaʼan música, chaʼan wen pʼʌtʌlob o wen tsajcʌbilob. David cheʼʌch yilal bajcheʼ iliyi, pero tsiʼ pʌsʌ i pecʼlel. Jumpʼejl ejemplo, cheʼ tiʼ tsʌnsa Goliat, jiñi rey Saúl tiʼ sube chaʼan miʼ mejlel i pʌyben i yixicʼal. Pero David tsiʼ jacʼʌ: «C rey, mach ñuconic. Mach cʌmbilic c tat tiʼ pejtelel Israel chaʼan mic ñijʼalin jini rey» (1 S. 18:18). ¿Chuqui tsiʼ colta David chaʼan maʼañic miʼ cʌy i pʌs i pecʼlel? Jiñʌch cheʼ tsiʼ ñaʼta chaʼan Dios tsiʼ pʌsʌ i pecʼlel jaʼel yicʼot tsiʼ qʼuele ti ñuc, i jin chaʼan cabʌl chuqui yujil yicʼot tajbil i chaʼan (Sal. 113:5-8). Wen yujil chaʼan jiñʌch Jehová tsaʼ bʌ i yʌqʼue pejtelel chuqui wem bʌ (laja yicʼot 1 Corintios 4:7).

7. ¿Chuqui mi caj i coltañonla lac pʌs lac pecʼlel?

⁷ Cheʼ bajcheʼ David, ili ora mi lac chaʼlen wersa chaʼan mi lac pʌs lac pecʼlel jaʼel. Wen utsʼatax cheʼ la cujil chaʼan Jehová an i pecʼlel anquese jiñʌch jiñi Yumʌl bʌ ti panchan yicʼot ti pañimil (Sal. 18:35). Mucʼʌch lac chʼʌm ti ñuc ili i ticʼojel Dios: «Lʌpʌla tsijiʼ bʌ laʼ pusicʼal yujil bʌ pʼuntaya yicʼot cʼuxbiya. Qʼuele laʼ bʌ ti pecʼ. Yom uts laʼ pusicʼal. Cuchula wocol» (Col. 3:12). La cujil chaʼan jiñi am bʌ i cʼuxbiya, «maʼanic miʼ sub i bʌ ti ñuc. Maʼanic  miʼ mel i bʌ ti chan tiʼ tojlel i piʼʌlob» (1 Co. 13:4). I yom mi laj cʼajtesan chaʼan lajal bajcheʼ jiñi wiñicob tajol miʼ cʼotel i ñopob Dios cheʼ miʼ qʼuelob ‹utsʼat bʌ i melbal› i yijñam, jiñi quixtañujob tajol mi caj i mulañob i cʌn Jehová cheʼ miʼ qʼuelob chaʼan an lac pecʼlel (1 P. 3:1).

8. a) ¿Bajcheʼ yilal miʼ qʼuejlel ili ora cheʼ jiñi xcolelob miʼ ñusʌbeñob i tʼan i tat i ñaʼ? b) ¿Chuqui miʼ yʌl jiñi Tsʼijbujel tiʼ tojlel xcolelob?

⁸ Pablo tiʼ tsictesa jaʼel bajcheʼ yilal mi caj i qʼuejlel jiñi quixtañujob ti ili cojix bʌ qʼuin. Jumpʼejl ejemplo, tsiʼ yʌlʌ chaʼan jiñi xcolelob mi caj i ñusʌbeñob i tʼan i tat i ñaʼ. Ili ora, an libro tac, película yicʼot programa ti televisión baʼ miʼ pʌstʌl chaʼan iliyi mach lecojic. Pero tiʼ sujm, jiñi ñusatʼan miʼ cʼunʼesan jumpʼejl familia. Ili cheʼʌch miʼ ñaʼtʌntel cʼʌlʌl ti wajali. Yaʼ ti Grecia, mi juntiquil wiñic tsiʼ jatsʼʌ i tat, wen lets miʼ toj i mul. I tiʼ mandar jiñi Roma miʼ yʌjlel chaʼan cheʼ bʌ juntiquil wiñic miʼ jatsʼ i tat lajalʌch i tsʌtslel bajcheʼ tsʌnsa. Yaʼ ti Tsʼijbujel Hebreo yicʼot i Tsʼijbujel Griego miʼ yʌl chaʼan jiñi xcolelob yom miʼ qʼuelob ti ñuc i tat i ñaʼ (Éx. 20:12; Ef. 6:1-3).

9. ¿Chuqui mi caj i coltan jiñi colelob chaʼan miʼ jacʼbeñob i tʼan i tat i ñaʼ?

⁹ ¿Chuqui miʼ mejlel i mel jiñi xcolelob chaʼan maʼañic miʼ ñusʌbeñob i tʼan i tat i ñaʼ bajcheʼ yambʌlob? Yom miʼ ñaʼtañob chuqui tac melbil i chaʼañob jiñi i tat i ñaʼ tiʼ tojlelob. Cheʼ jaʼel, cheʼ miʼ chʼʌmbeñob isujm chaʼan Dios, jiñi lac Tat, yom chaʼan mi lac jacʼben i tʼan lac tat lac ñaʼ, mucʼʌch caj i qʼuelob ti ñuc. Cheʼ bʌ jiñi xcolelob wen chuqui miʼ yʌlob tiʼ tojlel i tat i ñaʼ, mi caj i coltan yambʌ xcolelob chaʼan miʼ qʼuelob ti ñuc i tatob jaʼel. Cheʼ jiñi tatʌlob maʼañic miʼ cʼuxbiñob i yalobil, wocol mi caj i yubiñob chaʼan miʼ jacʼob tʼan jiñi i yalobilob. Pero cheʼ jiñi xcolelob mucʼʌch i cʼuxbintelob miʼ yubin tiʼ tat i ñaʼ, mi caj i chaʼleñob wersa chaʼan wen chuqui miʼ melob i maʼañic miʼ ñusʌbeñob i tʼan. Juntiquil Testigo xcolel to bʌ i cʼabaʼ Austin miʼ yʌl: «Isujm, añʌch i tajol com c mel mi cubin jiñi muʼ bʌ i subeñon c papá chaʼan maʼañic, pero mach ñumeñic ti pʼis bajcheʼ miʼ ticʼoñob, miʼ subeñoñob chucoch miʼ yʌcʼob yicʼot chʌn wen jach miʼ jacʼob cheʼ bʌ com c pejcañob. Pejtelel iliyi tsiʼ coltayon chaʼan mic jacʼbeñob i tʼan. Tiʼ pejtelel ora tsiʼ chʼʌmʌyoñob ti ñuc, jin chaʼan tsaʼ c mulaj c mel chuqui wen tiʼ tojlelob».

10, 11. a) ¿Bajcheʼ yilal jiñi melbalʌl tac muʼ bʌ i pʌs chaʼan jiñi quixtañujob maʼañic miʼ cʼuxbiñob yambʌyob? b) ¿Baqui jaxʌl mi caj i cʼotel i cʼuxbiya jiñi isujm bʌ xñoptʼañob?

¹⁰ Pablo tsiʼ yʌlʌ yambʌ lecoj tac bʌ melbalʌl, chaʼan an cabʌl maʼañic bʌ mi caj i cʼuxbiñob jiñi yambʌyob. Cheʼ bʌ ujtemix i yʌl chaʼan jiñi xcolelob «mi caj ñusʌbeñob i tʼan i tat i ñaʼ», tsiʼ yʌlʌ chaʼan maʼañic miʼ yʌcʼob wocolix i yʌlʌ, cheʼʌch yilal jiñi maʼañic bʌ miʼ qʼuelob ti ñuc cheʼ miʼ melbentelob chuqui wem bʌ tiʼ tojlel yambʌlob. Mi caj i chaʼleñob pʼajoñel yicʼot miʼ yʌcʼob i piʼʌlob tiʼ cʼʌb i contra come mi caj i yʌlob cʼux tac bʌ tʼan muʼ bʌ i ticʼlan yambʌlob, cheʼto tiʼ tojlel Dios. Cheʼ jaʼel, an xʼuʼyajob come mi caj i yʌlob mach bʌ isujmic tiʼ tojlel yambʌlob chaʼan jach yomob i ticʼlan. *

¹¹ Jiñi muʼ bʌ i chʼujutesañob Jehová mach lajalobic bajcheʼ yambʌ quixtañujob come miʼ pʌsob isujm bʌ cʼuxbiya ti yambʌyob. Ili cheʼʌch ujtem cʼʌlʌ wajali. Jesús tsiʼ yʌlʌ chaʼan jiñi ñumen ñuc bʌ mandar am bʌ tiʼ Mandar Moisés jiñʌch cheʼ miʼ cʼuxbiñob Dios yicʼot i piʼʌlob. Ili cojix bʌ yaʼ ochem ti jiñi cʼuxbiya cʌmbil bʌ bajcheʼ agápe (Mt. 22:37-39). Tsiʼ yʌlʌ jaʼel chaʼan muʼ bʌ caj i yʌcʼ ti cʌjñel jiñi i sujm bʌ xñoptʼañob jiñʌch cheʼ  junlajal miʼ cʼuxbiñob i bʌ (pejcan Juan 13:34, 35). Cheʼ jaʼel, muʼto caj i cʼuxbiñob i contrajob (Mt. 5:43, 44).

12. ¿Bajcheʼ tsiʼ pʌsʌ Jesús chaʼan mucʼʌch i cʼuxbin yambʌlob?

¹² Jesús tsiʼ pʌsʌ chaʼan miʼ wen cʼuxbin i piʼʌlob. Tsajñi ti subtʼan chaʼan i Yumʌntel Dios ti jujumpʼejl tejclum. Tiʼ tsʼʌca xpotsʼob, mach bʌ weñobic i yoc, añoʼ bʌ i tsoy yicʼot xcojcob, i tsaʼto i tejchesa jiñi chʌmeñoʼ bʌ (Lc. 7:22). Tsaʼto cʼoti i yʌcʼ i cuxtʌlel tiʼ tojlel wiñicob xʼixicob, anquese tsaʼʌch wen tsʼaʼlenti. Wen tsiquil tsiʼ pʌsʌ jiñi cʼuxbiya am bʌ i chaʼan i Tat. Ili ora, jiñi i testigojob Jehová miʼ tsajcʌbeñob i melbal Jesús yicʼot miʼ cʼuxbiñob yambʌ i piʼʌlob.

13. ¿Chuqui miʼ mejlel ti ujtel cheʼ mi lac pʌs laj cʼuxbiya?

¹³ Jiñi cʼuxbiya muʼ bʌ lac pʌs miʼ mejlel i coltan yambʌlob chaʼan miʼ cʌñob jiñi lac Tat am bʌ ti panchan. Jumpʼejl ejemplo, juntiquil wiñic yaʼ ti Tailandia tsajñi ti uxpʼejl bʌ qʼuin colem tempa bʌ i tsiʼ wen mulaj cheʼ tsiʼ qʼuele chaʼan jiñi hermanojob juntemel miʼ cʼuxbiñob i bʌ. Cheʼ tsaʼ sujti tiʼ yotot, tsiʼ cʼajti chaʼan chaʼyajl miʼ yʌqʼuentel estudio ti jumpʼejl semana. Tiʼ sube i familia chaʼan jiñi wen tʼan, i tsiʼ ñusa ñaxam bʌ asignación yaʼ ti Yotlel Tempa bʌ cheʼ an jaxto 6 uw i yajñel ti colem tempa bʌ. Mi la com lac ñaʼtan mi wolʌch (yʌquelʌch) lac pʌsben cʼuxbiya jiñi yambʌlob, laʼ laj cʼajtiben lac bʌ: «¿Muʼ ba c chaʼlen wersa j coltan jiñi yambʌlob tic familia, ti congregación yicʼot yaʼ baqui mucʼon ti subtʼan? ¿Muʼ ba cʌqʼuen wersa chaʼan mij qʼuel jiñi yambʌlob cheʼ bajcheʼ miʼ qʼuel Jehová?».

14, 15. a) ¿Bajcheʼ yilal i melbal miʼ yʌjlel cabʌl quixtañu? b) ¿Chuqui melbil i chaʼan cabʌlob?

¹⁴ Ti ili cojix bʌ qʼuin, jiñi quixtañujob mi caj i pʌsob yambʌ lecoj bʌ melbalʌl tac, jin chaʼan yom mi lac tʌtsʼ lac bʌ tiʼ tojlelob. Jumpʼejl ejemplo, cabʌl mach bʌ i cʌñʌyobic Dios mi caj i tsʼaʼleñob chuqui utsʼat. An yambʌ Biblia tac baqui miʼ yʌl chaʼan «mi caj i sujtelob tiʼ contra chuqui wem bʌ». Jiñi quixtañujob maʼañic miʼ ticʼob i pusicʼal yicʼot wen jontolob. Yicʼot jaʼel, bʌbʌqʼuen jax i melbalob, o miʼ melob chuqui yom tiʼ pusicʼal i maʼañic miʼ ñaʼtañob chuqui miʼ mel, cheʼʌch bajcheʼ  miʼ chaʼlentel ti traducir jaʼel jiñi tʼan tsaʼ bʌ ñaxan cʼʌjñi ti wajali.

¹⁵ Ili ora, an utsʼatax bʌ profecía ti Biblia woli bʌ ti tsʼʌctiyel. Ti ili profecía miʼ yʌl chaʼan jiñi quixtañujob cheʼ bʌ i melbalob bajcheʼ añimal tac, mi caj i qʼuextʌyel (pejcan Isaías 11:6, 7). Ilayi miʼ yʌl chaʼan jiñi jontol bʌ bʌteʼel tac bajcheʼ bʌteʼel tsʼiʼ yicʼot bajlum ti ñʌchʼtʌlel mi caj i yajñel yicʼot jiñi uts bʌ añimal tac bajcheʼ jiñi tʌñʌmeʼ yicʼot alʌ tat wacax. I miʼ yʌl chaʼan baqui jach mi caj i yajñel jiñi ñʌchʼtʌlel, come «mi caj i bujtʼel pañimil ti winicob xʼixicob muʼ bʌ i cʌñob lac Yum [Jehová]» (Is. 11:9). Jiñi añimal tac maʼañic miʼ mejlel i cʌñob i chaʼan bʌ Jehová, jin chaʼan ili profecía yom i yʌl chaʼan bajcheʼ mi caj i qʼuextañob i melbal jiñi quixtañujob.

16. ¿Bajcheʼ coltʌbil i chaʼan jiñi Biblia chaʼan miʼ qʼuextañob i melbal jiñi quixtañujob?

¹⁶ Cabʌl lajal bʌ i melbalob bajcheʼ bʌteʼel tsʼiʼ, tsaʼix i qʼuextayob i melbal i chumulobix ti ñʌchʼtʌlel yicʼot yambʌ i piʼʌlob. Yaʼ ti sección «La Biblia les cambió la vida» miʼ yʌjlel tiʼ tojlelob, muʼ bʌ i tilel yaʼ www.pr418.com/es. Jiñi cʌmbilix bʌ i chaʼañob Jehová yicʼot woliʼ melbeñob i yeʼtel, mach lajalobic bajcheʼ jiñi muʼ bʌ i lon chʼujutesañob Dios, pero maʼañic miʼ cʌmbeñob i pʼʌtʌlel tiʼ cuxtʌlel. Miʼ poj alob chaʼan miʼ chʼujutesañob Dios, pero tiʼ melbalob miʼ pʌs chaʼan mach isujmic. An hermanojob wen jontoloʼ bʌ ti wajali, pero tsaʼix i xojoyob jiñi ‹tsijiʼ bʌ i pusicʼal melbil bʌ ti toj ti isujm chaʼan chʼujul mi yajñelob cheʼ bajcheʼ yom Dios› (Ef. 4:23, 24). Cheʼ jiñi quixtañujob miʼ cʌñob majlel i chaʼan bʌ Dios, miʼ cʼotel i ñaʼtañob chaʼan yomʌch miʼ jacʼbeñob i mandar tac. Jiñʌch muʼ bʌ i coltañob i qʼuextan majlel chuqui miʼ ñopob, chuqui miʼ ñaʼtañob yicʼot miʼ melob. Iliyi wocolʌch ti melol, pero mucʼʌch i mejlel come jiñi chʼujul bʌ espíritu miʼ coltan jiñi yomoʼ bʌ i mel chuqui yom Dios ti jumpʼejlob i pusicʼal.

17. ¿Chuqui miʼ mejlel lac mel chaʼan maʼañic mi lac toyben i lecoj bʌ melbal jiñi quixtañujob?

¹⁷ Ili ora, ñumen tsiquilix majqui woliʼ melbeñob i yeʼtel Dios yicʼot jiñi maʼañic bʌ woliʼ melob. Joñonla, woli bʌ lac melben i yeʼtel Dios, yom mi lac wen cʌntan lac bʌ chaʼan maʼañic mi lac toyben jiñi lecoj bʌ i melbal yambʌlob. La com lac jacʼben i ticʼojel Jehová baqui miʼ yʌl chaʼan yom mi lac tʌtsʼ lac bʌ tiʼ tojel jiñi cheʼoʼ bʌ i melbal bajcheʼ miʼ yʌl 2 Timoteo 3:2-5. Tiʼ sujm, mach mejlic lac junyajlel tʌtsʼ lac bʌ tiʼ tojlelob, come tajol mi lac tem chaʼlen eʼtel yicʼotob, mi lac majlel ti escuela o chumulob ti la cotot. Mucʼʌch bʌ i mejlel lac mel jiñʌch cheʼ maʼañic mi lac ñaʼtan o mi lac mel bajcheʼob. ¿Bajcheʼ miʼ mejlel lac mel? Jiñʌch cheʼ mi lac pejcan jiñi Biblia yicʼot mi lac sʌclan la camigojob yomoʼ bʌ i melbeñob i yeʼtel Jehová, i cheʼ jiñi ñumen lʌcʼʌl mi la cajñel ti Dios.

18. ¿Bajcheʼ miʼ mejlel i coltan yambʌlob tiʼ chaʼan bʌ Dios cheʼ bajcheʼ mucʼonla ti tʼan yicʼot bajcheʼ yilal lac melbal?

¹⁸ Yom mi lac chaʼlen wersa laj coltañob jaʼel jiñi quixtañujob tiʼ chaʼan bʌ Jehová. Laʼ lac sʌclʌben i yorajlel chaʼan mi lac chaʼlen subtʼan i laʼ laj cʼajtiben i coltaya Jehová chaʼan utsʼat chuqui mi la cʌl ti wen jach bʌ i yorajlel. Laʼ lac suben yambʌlob chaʼan i testigojonla Jehová. Cheʼ bajcheʼ jiñi, jiñi wem bʌ lac melbal mi caj i yʌcʼ ti ñuc Dios, mach joñoñicla. Cʌntesʌbilonla chaʼan yom «mi laj cʌy pejtelel chuqui mach tojic, yicʼot i colosojlel lac pusicʼal yicʼot i chaʼan bʌ pañimil, chaʼan mi lac wen ñaʼtan chuqui yom, chaʼan toj mi la cajñel ti ili ora» (Tit. 2:11-14). Mi mucʼʌch lac tsajcʌben i melbal Jehová yicʼot mi lac jacʼben i tʼan, jiñi quixtañujob mi caj i qʼueloñobla i tajol mi caj i yʌlob: «Mi caj c majlel lojon quicʼotetla, come tsaʼ cubi lojon chaʼan laʼ wicʼot Dios» (Zac. 8:23, TNM).