1, 2. ¿Bajcheʼ miʼ cʼʌn chuqui an i chaʼan Jehová?

JEHOVÁ yujil i tʼoxol chuqui an i chaʼan. Yaʼʌch tilem pejtelel am bʌ lac chaʼan. Jiñʌch i yum jiñi oro, plata yicʼot pejtelel chuqui tac an ti Pañimil, cheʼ jaʼel, miʼ yʌcʼ chuqui tac yom chaʼan an cuxtʌlel ila ti Lum (Sal. 104:13-15; Hag. 2:8). Jiñi i Tʼan Dios miʼ yʌl chaʼan ti wajali Jehová tsiʼ cʼʌñʌ tac iliyi chaʼan miʼ coltan i wiñicob.

² Jumpʼejl ejemplo, Jehová tsiʼ yʌqʼue jiñi israelob maná yicʼot jaʼ ti jiñi cuarenta jab cheʼ bʌ yaʼañob ti jiñi i tiquiñal lum (Éx. 16:35). Cheʼ bajcheʼ laj cujil, «maʼanic chuqui anto yom i chaʼañob» (Neh. 9:20, 21). Tiʼ tojlel jiñi xʼaltʼan Eliseo, Jehová tsiʼ mele milagro cheʼ bʌ tsiʼ pʼojlesʌbe i yaceite juntiquil toj bʌ mebaʼ xʼixic. Cheʼ bajcheʼ iliyi, jiñi xʼixic tsaʼ mejli i toj pejtelel i bet yicʼot tsaʼto cʌyle tsʼitaʼ i taqʼuin chaʼan miʼ cʼʌn yicʼot i yalobilob (2 R. 4:1-7). Jehová tsiʼ yʌqʼue i pʼʌtʌlel Jesús jaʼel chaʼan miʼ pʼojlesan bʌlñʌcʼʌl yicʼot to miʼ mejlel i taj taqʼuin ti jumpʼejl milagro (Mt. 15:35-38; 17:27).

3. ¿Chuqui mi caj laj cʌn ti ili temaj?

³ Jehová miʼ mejlel i cʼʌn chuqui tac jach chaʼan miʼ cʌntan pejtelel chuqui cuxul bʌ ila ti Pañimil. Anquese cheʼ bajcheʼ jiñi, miʼ suben i wiñicob chaʼan miʼ cʼʌñob i chubʌʼan tiʼ coltʌntel i  yorganización (Éx. 36:3-7; pejcan Proverbios 3:9). ¿Chucoch miʼ pijtan Jehová chaʼan mi laj cʼʌn chuqui aqʼuebil i chaʼañonla chaʼan mi la cʌqʼuen jaʼel? ¿Bajcheʼ tsiʼ yʌcʼʌyob i coltaya ti taqʼuin jiñi i wiñicob Dios ti wajali chaʼan jiñi isujm bʌ chʼujutesaya? ¿Bajcheʼ miʼ cʼʌn jiñi organización jiñi taqʼuin muʼ bʌ i yʌjqʼuel? Ti ili temaj, mi caj laj cʌmben i jacʼbal ili cʼajtiya tac.

4. ¿Chuqui mi lac pʌsben Jehová cheʼ mi laj coltʌben tiʼ yeʼtel?

⁴ ¿Chucoch mi la cʌqʼuen Jehová jiñi am bʌ lac chaʼan? Come mi laj cʼuxbin yicʼot mi laj qʼuel ti ñuc pejtelel chuqui melbil i chaʼan ti lac tojlel. Cheʼ mi lac ñaʼtan iliyi, miʼ wen aqʼueñonla lac tijicñʌyel. Lajalʌch mi la cubin lac bʌ bajcheʼ jiñi rey David cheʼ bʌ tiʼ tsictesa chuqui tac yom chaʼan miʼ mejlel jiñi templo. Tsiʼ yʌlʌ chaʼan pejtelel chuqui an lac chaʼan tilemʌch ti Jehová, i jin chaʼan, pejtelel chuqui mi la cʌqʼuen yaʼ loqʼuem ti aqʼuebil tac bʌ i chaʼañonla (pejcan 1 Crónicas 29:11-14).

5. Cheʼ an chuqui mi la cʌcʼ i maʼañic chuqui mi lac chaʼ pijtan, ¿bajcheʼ miʼ pʌs jiñi Biblia chaʼan ochemʌch ti lac chʼujutesaya ti Dios?

⁵ Yambʌ chucoch yom mi la cʌqʼuen am bʌ lac chaʼan Jehová jin cheʼ yaʼ ochem ti lac chʼujutesaya. Jiñi apóstol Juan tsiʼ yubi tiʼ ñajal cheʼ bʌ jiñi i wiñicob Dios ti panchan woli (choncol) i yʌlob: «Utsʼat c Yum lojon. Yom miʼ sujbel a ñuclel yicʼot a cʼuxbintel yicʼot a pʼʌtʌlel, come jatet tsaʼ mele pejtelel chuqui tac an. Tiʼ pejtelel tsaʼ mejli chaʼan cheʼʌch a wom. Tsaʼ laj aqʼue i cuxtʌlel» (Ap. 4:11). Tiʼ sujm, cojach yom miʼ yʌqʼuentel i ñuclel Jehová, jin chaʼan yom mi la cʌqʼuen chuqui ñumen wem bʌ an lac chaʼan. Cheʼ tiʼ yorajlel Israel, Jehová tiʼ sube Moisés chaʼan jiñi tejclum yom miʼ mel (chaʼlen) uxpʼejl qʼuiñijel ti jumpʼejl jab. Jiñi Mandar tsiʼ yʌlʌ: «Mach yomic toʼol meqʼuel laʼ cʼʌb mi laʼ tilel» (Dt. 16:16). Cheʼ bajcheʼ mi laj qʼuel, jiñi israelob wolʌch i chʼujutesañob Jehová jaʼel cheʼ bʌ miʼ yʌqʼueñob i chubʌʼan ti jiñi qʼuiñijel tac. Ili ora, wolʌch lac chʼujutesan Dios jaʼel cheʼ bʌ an chuqui mi la cʌcʼ, i maʼañic chuqui mi lac chaʼ pijtan. Cheʼ mi lac mel iliyi, mi laj qʼuel ti ñuc yicʼot mi laj coltan jiñi eʼtel (troñel) woli bʌ i mejlel wʌʼ ti jumpʼejl parte i yorganización Jehová ila ti Lum.

6. ¿Chucoch utsʼatʌch cheʼ mi la cʌcʼ chuqui an lac chaʼan? (Qʼuele jiñi foto am bʌ tiʼ tejchibal).

⁶ Utsʼatʌch cheʼ an chuqui mi la cʌcʼ tiʼ yutslel lac pusicʼal i mach cojach chaʼan mi la cʌqʼuentel (pejcan Proverbios 29:21). Jumpʼejl ejemplo, laʼ lac ñaʼtan chaʼan juntiquil alob miʼ lot majlel jiñi taqʼuin muʼ bʌ i yʌqʼuentel tiʼ tat i ñaʼ, i miʼ chaʼ cʼʌn chaʼan miʼ mʌnbeñob i majtan. ¿Mach ba tijicñayic mi caj i yubiñob jiñi tatʌlob? O laʼ lac ñaʼtan juntiquil xcolel ochem bʌ bajcheʼ precursor chumul bʌ yicʼot i tat i ñaʼ, pero miʼ coltañob ti taqʼuin jaʼel. Tajol jiñi tatʌlob maʼañic miʼ pijtañob miʼ yʌqʼuentelob taqʼuin, pero mucʼʌch i chʼʌmob come yujilob chaʼan jiñi i yalobil miʼ qʼuel ti ñuc pejtelel chuqui melbil i chaʼañob tiʼ tojlel. Cheʼ jaʼel, Jehová yujil chaʼan utsʼatʌch cheʼ mi la cʌqʼuen lac chubʌʼan.

7, 8. a) ¿Bajcheʼ tsiʼ chaʼleyob coltaya jiñi i wiñicob Jehová ti wajali ti jujumpʼejl eʼtel tsaʼ bʌ chajpʌnti? b) ¿Bajcheʼ tsiʼ chaʼleyob coltaya i wiñicob Jehová chaʼan miʼ chʼujutesañob Dios?

⁷ Yaʼ ti Biblia mi lac taj ejemplo tac muʼ bʌ i pʌs chaʼan jiñi i wiñicob Dios tsiʼ yʌcʼʌyob i chubʌʼan. An i tajol, tsiʼ chaʼleyob coltaya ti jumpʼejl eʼtel ñaʼtʌbilix bʌ. Jumpʼejl ejemplo, chaʼan miʼ mejlel jiñi tabernáculo, Moisés tiʼ sube jiñi israelob chaʼan miʼ tempañob chuqui añob i chaʼan, i cheʼʌch tsiʼ mele jaʼel jiñi rey David chaʼan miʼ mejlel jiñi templo (Éx. 35:5; 1 Cr. 29:5-9). Cheʼ ti yorajlel jiñi rey Jehoás, jiñi xmotomajob tsiʼ cʼʌñʌyob jiñi taqʼuin tsaʼ bʌ i yʌcʼʌ jiñi tejclum chaʼan miʼ tojʼesʌbeñob i  templo Jehová (2 R. 12:4, 5). Cheʼ ti ñaxam bʌ siglo, jiñi xñoptʼañob tsiʼ yubiyob chaʼan jiñi hermanojob ti Judea yomob coltʌntel come woliʼ ñusañob wiʼñal. Jiñi Biblia miʼ yʌl chaʼan tsiʼ coltayob cheʼ bajcheʼ cʼamel tsaʼ mejli ti jujuntiquilob (Hch. 11:27-30).

⁸ An yambʌ i wiñicob Dios tsaʼ bʌ i yʌcʼʌyob i chubʌʼan chaʼan miʼ coltañob jiñi waʼchocobiloʼ bʌ ti Jehová. Yaʼ tiʼ Mandar Moisés, miʼ yʌl chaʼan jiñi levíjob maʼañic miʼ yʌqʼuentelob i lum bajcheʼ yambʌ tribu tac. Jin chaʼan, jiñi tejclum miʼ yʌcʼob jiñi diezmo tiʼ tojlel jiñi levíjob. Ili tsiʼ yʌcʼʌ chaʼan jiñi levíjob miʼ yʌcʼob i pusicʼal tiʼ yeʼtelob yaʼ ti tabernáculo (Nm. 18:21). Cheʼ ñumeñix cabʌl jab, Jesús yicʼot jiñi xcʌntʼañob i chaʼan tsiʼ tajayob i wenlel tiʼ tojlel jiñi xʼixicob tsaʼ bʌ i pʌsbeyob i yutslel cheʼ tsiʼ «cʼʌñʌyob i chubʌʼan chaʼan miʼ weʼsañob» (Lc. 8:1-3).

9. ¿Baqui loqʼuem pejtelel tsaʼ bʌ i yʌcʼʌyob jiñi i wiñicob Dios ti wajali?

⁹ Pejtelel jiñi tsaʼ bʌ ajqʼui, mach junsujmic baqui tsaʼ loqʼui. Jumpʼejl ejemplo, cheʼ bʌ tsaʼ mejli jiñi tabernáculo yaʼ tiʼ tiquiñal Lum, tajol tsaʼ bʌ i yʌcʼʌyob jiñi israelob jiñʌch tsaʼ bʌ i chʼʌmʌyob loqʼuel ti Egipto (Éx. 3:21, 22; 35:22-24). Cheʼ ti ñaxam bʌ siglo, an xñoptʼañob tsaʼ bʌ i choñoyob chuqui añob i chaʼan, bajcheʼ lum o i yototob, i jiñi i tojol tsiʼ yʌqʼueyob jiñi apóstolob. Jiñi taqʼuin tsaʼ tʼoxbentiyob jiñi yomoʼ bʌ coltʌntel (Hch. 4:34, 35). An yambʌlob tsaʼ bʌ i tʼoxoyob i taqʼuin i ti bele ora miʼ yʌcʼob chaʼan miʼ chaʼleñob coltaya ti jiñi eʼtel tac i chaʼan bʌ Dios (1 Co. 16:2). Wen tsiquil chaʼan jiñi wen añoʼ bʌ i chubʌʼan o maʼañic, junlajal tsiʼ yʌcʼʌyob cheʼ bajcheʼ tsaʼ mejliyob i mel (Lc. 21:1-4).

10, 11. a) ¿Bajcheʼ miʼ mejlel lac lajibeñob i pʼejwlel jiñi i wiñicob Dios ti wajali? b) ¿Bajcheʼ yubil maʼ wubin cheʼ maʼ chaʼlen coltaya ti jiñi eʼtel i chaʼan bʌ Dios?

¹⁰ Tajol ili qʼuin yom miʼ yʌjqʼuel taqʼuin chaʼan miʼ mejlel jumpʼejl eʼtel wʌn ñaʼtʌbilix bʌ. Jiñi laj congregación tajol woliʼ ñaʼtan i tojʼesan jiñi i Yotlel lac Tempa bʌ o chaʼan miʼ mejlel jumpʼejl tsijiʼ bʌ. O tajol mi lac subentel chaʼan yom taqʼuin chaʼan miʼ tojʼesʌntel jiñi sucursal, miʼ chajpʌntel pejtelel chuqui yom ti colem tempa bʌ o chaʼan miʼ coltʌntel jiñi hermanojob baʼ tsaʼ ujti tsʌts bʌ wocol bajcheʼ icʼ jaʼal. Jiñi lac taqʼuin miʼ cʼʌjñibʌyel chaʼan miʼ coltʌntel jiñi misionerojob, precursorob especial, superintendentejob i chaʼan circuito yicʼot jiñi mucʼoʼ bʌ ti eʼtel yaʼ ti central mundial yicʼot yambʌ sucursal tac am bʌ tiʼ petol pañimil (mulawil). Cheʼ jaʼel, tajol jiñi laj congregación chajpʌbilix i chaʼan jaypʼejl taqʼuin miʼ yʌcʼ chaʼan miʼ coltʌntel jiñi eʼtel chaʼan i melol i Yotlel Tempa bʌ yicʼot i chaʼan Colem Tempa bʌ tac, muʼ bʌ i coltan cabʌl hermanojob tiʼ pejtelel pañimil.

¹¹ Ti lac pejtelel mi lac mejlel ti coltaya ti jiñi eʼtel woli bʌ i yʌcʼ Jehová ti ili cojix bʌ qʼuin. Joñon jach la mi lac ñaʼtan jaypʼejl taqʼuin mi la cʌcʼ, come maʼañic majqui miʼ qʼuel cheʼ bʌ mi la cotsan yaʼ ti caja tac am bʌ tiʼ Yotlel Tempa bʌ o cheʼ mi lac choc majlel ti Internet yaʼ ti www.pr418.com/ctu. Tajol mi lac ñaʼtan chaʼan maʼañic miʼ wen cʼʌjñibʌyel jiñi taqʼuin muʼ bʌ la cʌcʼ. Pero ti isujm, jiñi taqʼuin acʼbil bʌ ili ora, mach yaʼic jach tilem ti jiñi on bʌ miʼ yʌcʼob, yonlel yaʼʌch tilem ti jiñi tsʼitaʼ jach bʌ miʼ yʌcʼob. Tiʼ pejtelel jiñi hermanojob, cheʼto jaʼel jiñi mach bʌ wen añobic i chaʼan, lajalobʌch bajcheʼ jiñi xñoptʼañob ti Macedonia cheʼ ti ñaxam bʌ siglo. Ili hermanojob tsiʼ wersa cʼajtiyob chaʼan miʼ mejlelob ti coltaya jaʼel cheʼ miʼ yʌcʼob i taqʼuin, i ti jumpʼejlob i pusicʼal tsiʼ pʌsʌyob i pʼejwlel «anquese cʼax pobrejob» (2 Co. 8:1-4).

12. ¿Chuqui miʼ mel jiñi organización chaʼan wen jach bajcheʼ miʼ cʼʌjñel jiñi taqʼuin?

¹² Jiñi Junmojt muʼ bʌ i pʌsob bij miʼ  chaʼlen wersa chaʼan wen jach yicʼot tsajibil bajcheʼ miʼ cʼʌjñel i taqʼuin jiñi organización (Mt. 24:45). Ili hermanojob ñaxan miʼ chaʼleñob oración yicʼot miʼ wen chajpañob bajcheʼ mi caj i cʼʌjñel (Lc. 14:28). Ti wajali, jiñi taqʼuin miʼ yʌjqʼuel tiʼ wenta xucʼul bʌ wiñicob. Jiñʌch muʼ bʌ i wen qʼuelob chaʼan pejtelel jiñi taqʼuin cojach miʼ cʼʌjñel chaʼan i chʼujutesʌntel Jehová. Jumpʼejl ejemplo, ti jumpʼejl bʌ qʼuin, Esdras tsiʼ chʼʌmʌ majlel ti Jerusalén cabʌl oro, plata yicʼot yan tac bʌ, am bʌ i tojol ili ora cheʼ bʌ 1,700 millón ti peso (100 millón ti dólar) tsaʼ bʌ i yʌcʼʌ jiñi rey ti Persia. Esdras tsiʼ qʼuele iliyi bajcheʼ i majtan Jehová, jin chaʼan tsiʼ wen tsictesa bajcheʼ yom miʼ cʌntʌntel yaʼ ti bʌbʌqʼuen bʌ bij baqui miʼ ñumelob (Esd. 8:24-34). Cheʼ ñumeñix cabʌl jab, jiñi apóstol Pablo tsiʼ tempa taqʼuin chaʼan miʼ coltan jiñi hermanojob ti Judea yicʼot tsiʼ wen qʼuele chaʼan cheʼ miʼ tʼoxob jiñi añoʼ bʌ tiʼ wenta, miʼ melob «chuqui toj, mach cojic jach tiʼ wut lac Yum, pero tiʼ wut winicob xʼixicob jaʼel» (pejcan 2 Corintios 8:18-21). Ili ora, jiñi organización cheʼʌch woliʼ mel bajcheʼ Esdras yicʼot Pablo. Jin chaʼan, miʼ tsictesan bajcheʼ yom miʼ cʼʌjñel jiñi taqʼuin muʼ bʌ i yʌjqʼuel.

13. ¿Chucoch an chuqui tac qʼuextʌbil i chaʼan jiñi organización?

¹³ An i tajol, an familia tac yom bʌ miʼ qʼuextañob bajcheʼ miʼ cʼʌñob taqʼuin chaʼan mach ñumeñic miʼ cʼʌñob cheʼ bajcheʼ cʼamel miʼ tajob. O tajol yom miʼ sʌclañob chuqui miʼ mejlel i melob chaʼan miʼ ñumen melbeñob i yeʼtel Jehová. Lʌcʼʌl cheʼʌch miʼ yujtel tiʼ yorganización Jehová jeʼel. Maxto wen jalic tilel, tsaʼ mejli cabʌl eʼtel. Jin chaʼan, an i tajol ñumento tsaʼ cʼʌjñi taqʼuin cheʼ bajcheʼ miʼ tempʌntel. Jin chaʼan, jiñi organización miʼ sʌclan bajcheʼ yom melol chaʼan tsʼitaʼ jach miʼ jilel taqʼuin i maʼañic miʼ wen pʼojlel eʼtel. Cheʼ bajcheʼ ili, ñumen utsʼat bajcheʼ miʼ cʼʌjñel jiñi taqʼuin.

14-16. a) ¿Bajcheʼ woliʼ cʼʌjñibʌyel jiñi taqʼuin muʼ bʌ la cʌcʼ? b) ¿Bajcheʼ an i yʌqʼueyet a wenlel pejtel chuqui melbil bʌ i chaʼan jiñi organización?

¹⁴ Cabʌl hermanojob añix bʌ ora i cajel i melbeñob i yeʼtel Jehová miʼ yʌlob chaʼan tajbil i chaʼañob cabʌl bendición wʌʼ tiʼ yorganización. I añʌch chucoch cheʼ miʼ yʌlob. Jumpʼejl ejemplo, ti jiñi jabil tac ñumen bʌ tilel tsaʼ mejli jiñi página chaʼan Internet www.pr418.com/ctu yicʼot jiñi canal JW Broadcasting. Cheʼ jaʼel, jiñi Traducción del Nuevo Mundo de las Santas Escrituras muqʼuix i tajtʌl ti cabʌl tʼan tac. Cheʼ ti 2014 yicʼot 2015, tsaʼ mejli jaʼel jiñi colem tempa bʌ tac internacional bʌ i cʼabaʼ «Laʼ lac chʌn sajcan ti ñaxan i Yumʌntel Dios» tsaʼ bʌ mejli ti colem  tac bʌ estadio ti 14 tejclum. Wen tijicña tsiʼ yubiyob i bʌ jiñi yaʼ bʌ tempʌbilob.

¹⁵ Cabʌlob muʼ bʌ i yʌcʼob wocolix i yʌlʌ chaʼan chuqui tac utsʼatax bʌ melbil i chaʼan i yorganización Jehová. Jumpʼejl ejemplo, jumpʼejl xñujpuñel woliyoʼ bʌ ti coltaya ti alʌ tejclum am bʌ ti Asia, utsʼatax tsaʼ bʌ i yʌlʌ chaʼan jiñi canal JW Broadcasting: «An i tajol c bajñel jach mi cubin lon c bʌ i mach wocolic miʼ ñajʌyel lon c chaʼan baqui cʼʌlʌl cʼotem jiñi i yeʼtel Jehová. Pero cheʼ mij qʼuele lon jiñi canal JW Broadcasting, orajach mij cʼajtesan lojon chaʼan an quermaño lon tiʼ pejtelel pañimil. Jiñi hermanojob baʼ añon lojon wen tijicñayob cheʼ an jiñi JW Broadcasting. Ti bele ora mi cubin lon miʼ yʌlob chaʼan jiñi programa ti jujumpʼejl uw miʼ ñumen lʌcʼtesañob yicʼotob jiñi Junmojt muʼ bʌ i pʌsob bij. Ili ora, wen tijicña miʼ yubiñob i bʌ cheʼ añob tiʼ yorganización Dios».

¹⁶ Tiʼ pejtelel pañimil woliʼ mejlel o i tojʼesʌntel cheʼ bʌ 2,500 i Yotlel Tempa bʌ. Cheʼ bʌ jiñi hermanojob ti jumpʼejl congregación ti Honduras tsaʼ caji i techob i cʼʌn jiñi tsijib i Yotlel Tempa bʌ, tiʼ tsʼijbuyob: «Wen tijicñayon lojon cheʼ añon lon tiʼ familia Jehová am bʌ ti panchan yicʼot ti Pañimil, yicʼot cheʼ an lon quermañojob tiʼ pejtelel pañimil. Cheʼ bajcheʼ iliyi, tsaʼ mejli lon c taj jiñi wen com bʌ lojon: Jumpʼejl i Yotlel Tempa bʌ». An cabʌlob cheʼʌch bʌ miʼ yʌlob jaʼel cheʼ miʼ yʌqʼuentelob tiʼ tʼan jiñi Biblia yicʼot yambʌ jun tac, cheʼ miʼ coltʌntelob baʼ miʼ yujtel tsʌts bʌ wocol cheʼ bajcheʼ icʼ jaʼal o cheʼ miʼ qʼuelbeñob i wenlel jiñi subtʼan baqui an cabʌl wiñicob xʼixicob (quixtañujob) yaʼ baʼ chumulob.

17. ¿Bajcheʼ la cujil chaʼan Jehová woliʼ coltan i yorganización ili ora?

¹⁷ Cabʌl mach bʌ Testigojobic maʼañic miʼ wen ñopob chaʼan miʼ mejlel lac mel cabʌl eʼtel cojach ti jiñi taqʼuin muʼ bʌ i yʌjqʼuel. Juntiquil ñuc bʌ xʼeʼtel ti empresa tsiʼ julaʼta jiñi imprenta, toj sajtel i pusicʼal cheʼ tsiʼ yubi chaʼan mach tojbilobic jiñi yaʼ bʌ mucʼob ti eʼtel, chaʼan jin jach miʼ cʼʌjñel jiñi taqʼuin muʼ bʌ i yʌjqʼuel i maʼañic miʼ mejlel campaña chaʼan miʼ tempʌyel taqʼuin. Tsiʼ yʌlʌ chaʼan mach isujmic yubil cheʼ mucʼʌch i mejlel lac mel jiñi eʼtel. Ili tʼan isujmʌch, come la cujil chaʼan cojach miʼ mejlel tiʼ coltaya Jehová (Job 42:2).

18. a) ¿Baqui bʌ bendición tac mi lac taj cheʼ mi laj coltan i Yumʌntel Dios? b) ¿Bajcheʼ miʼ mejlel laj cʌntesan la calobilob yicʼot jiñi tsijiʼoʼ bʌ chaʼan miʼ yʌcʼob i chubʌʼan jaʼel?

¹⁸ Jehová miʼ yʌcʼ chaʼan mi lac chaʼlen coltaya ti jiñi ñuc bʌ eʼtel chaʼan i Yumʌntel. Mi cheʼʌch mi lac mel, miʼ yʌqʼueñonla i tʼan chaʼan mi caj lac taj cabʌl bendición (Mal. 3:10). Cheʼ jaʼel, miʼ yʌl chaʼan jiñi muʼ bʌ i pʌs i pʼejwlel miʼ taj i wenlel (pejcan Proverbios 11:24, 25). Yicʼot jaʼel, tijicñayonla come «ñumen tijicña jini muʼ bʌ i yʌcʼ majtañʌl bajcheʼ jini muʼ bʌ i chʼʌm i majtan» (Hch. 20:35). Yambʌ jiñʌch cheʼ miʼ mejlel laj cʌntesan ti lac tʼan yicʼot lac melbal la calobilob yicʼot tsijiʼoʼ bʌ chaʼan miʼ mejlel i yʌcʼob i chubʌʼan jaʼel i miʼ tajob cabʌl bendición.

19. ¿Bajcheʼ tsiʼ coltayet ili temaj?

¹⁹ Pejtelel chuqui an lac chaʼan tilem ti Jehová. Cheʼ mi la cʌcʼ lac taqʼuin mi lac pʌsben laj cʼuxbiya yicʼot mi la cʌqʼuen wocolix i yʌlʌ chaʼan chuqui melbil i chaʼan ti lac tojlel (1 Cr. 29:17). Cheʼ bʌ jiñi israelob tsiʼ yʌcʼʌyob i chubʌʼan chaʼan miʼ mejlel jiñi templo, «wen tijicña tsiʼ yubiyob pejtelel jini winicob, come ti pejtelel tsiʼ yʌcʼʌyob cheʼ bajcheʼ tilem tiʼ pusicʼalob. Jujuntiquil tsiʼ yʌqʼueyob i majtan lac Yum» (1 Cr. 29:9). Laʼ lac chʌn ubin lac tijicñʌyel jaʼel cheʼ mi la cʌqʼuen Jehová chuqui tajbil tac lac chaʼan tiʼ tojlel.