1. a) ¿Chuqui ti wocol mi lac ñusan ili ora? b) ¿Chucoch wen tijicña miʼ yubin Jehová tiʼ tojlel jiñi xucʼul bʌ i wiñicob? (Qʼuele jiñi foto tac).

CHEʼ bajcheʼ la cujil, ili pañimil (mulawil) butʼul ti wocol. Cabʌletla, hermanojob, an tsʌts bʌ la cʼamʌjel. An woli bʌ laʼ cʌntan jiñi ñoxobix bʌ ti laʼ familia, anquese añix laʼ jabilel jaʼel. An yambʌlob woli (choncol) bʌ i chaʼleñob wersa i yʌqʼuen i familia i cʼʌjñibal bʌ i chaʼañob, i mach cabʌlic chubʌʼañʌl. La cujil chaʼan an cabʌlob mach bʌ jumpʼejlic jach jiñi wocol woli (yʌquel) i ñusañob. Pejtelel iliyi, miʼ wen lujbʼesañob i miʼ wen jisañob taqʼuin yicʼot i yorajlel am bʌ i chaʼañob. Anquese cheʼʌch woli laʼ ñusan, chʌn pʼʌtʌl laʼ chʼujbiya ti chuqui albil i chaʼan Dios ti muʼto bʌ caj i yujtel. Jehová wen tijicña miʼ yubin i bʌ ti laʼ tojlel.

2. a) ¿Bajcheʼ miʼ pʼʌtʼesañonla Isaías 40:29? b) ¿Baqui bʌ jiñi tsʌts bʌ wocol muʼ bʌ i mejlel i cʼotel lac mel?

² ¿Am ba i tajol maʼ wubin chaʼan woliʼ cʼunʼesañet jiñi wocol tac? Mi cheʼʌchi, mach a bajñelic. Jiñi Biblia miʼ taj ti tʼan lamital xucʼul bʌ i wiñicob Dios tsaʼ bʌ i ñaʼtayob chaʼan mach mejlobix i cuch jiñi wocol (1 R. 19:4; Job 7:7). Pero maʼañic tsiʼ lijiyob i bʌ, tsaʼʌch i cʼajtiyob i chʼejlel ti Jehová. Maʼañic tsaʼ cʌjyiyob ti Dios, come jiñʌch miʼ «pʼʌtʼesan jini cʼuñoʼ bʌ»  (Is. 40:29). Chʼijiyemtic ti alol, pero an hermanojob ili ora muʼ bʌ i ñaʼtañob chaʼan ñumen wen cheʼ «miʼ cʼajob i yoj tiʼ chaʼan bʌ Dios» chaʼan miʼ cuchob jiñi wocol tac, cheʼix miʼ qʼuelob bajcheʼ jumpʼejl cuchʌl i mach jumpʼejlix bendición. Jin chaʼan, miʼ cʌy i pejcañob i Biblia, i maʼañix miʼ majlelob ti tempa bʌ yicʼot ti subtʼan, ili jiñʌch yom bʌ Satanás.

3. a) ¿Chuqui miʼ mejlel lac mel chaʼan Satanás maʼañic miʼ cʼuñʼesañonla? b) ¿Chuqui mi caj laj qʼuel ti ili temaj?

³ Jiñi Diablo yujil chaʼan cheʼ mi lac wen melben i yeʼtel (troñel) Dios miʼ pʼʌtʼesañonla, i mach yomic bajcheʼ jiñi. Jin chaʼan, cheʼ bʌ lujbet o maʼañix chuqui a wom maʼ wubin, mach a ñajtʼesan a bʌ ti Jehová. Yom bʌ maʼ mel (chaʼlen) jiñʌch cheʼ maʼ ñumen lʌcʼtesan a bʌ tiʼ tojlel. Cʼajtesan chaʼan jiñi Biblia miʼ yʌl: «Mi caj i xucʼchocoñetla, mi caj i pʼʌtʼesañetla» (1 P. 5:10; Stg. 4:8). Ti ili temaj, mi caj laj qʼuel chaʼpʼejl wocol muʼ bʌ i mejlel i mʌctañonla chaʼan maʼañic mi lac wen melben i yeʼtel Dios. Mi caj la cʌl jaʼel bajcheʼ mi caj i coltañonla jiñi principio tac chaʼan mi lac lʌtʼ. Pero mi caj lac ñaxan qʼuel muʼ bʌ i yʌl Isaías 40:26-31, muʼ bʌ i cʌntesañonla bajcheʼ miʼ pʼʌtʼesañonla Jehová.

4. ¿Chuqui miʼ mejlel laj cʌn ti Isaías 40:26?

⁴ (Pejcan Isaías 40:26). Pejtelel jiñi ecʼ am bʌ ti panchan maʼañic majqui mejlem i tsic. Jiñi científicojob miʼ yʌlob chaʼan wʌʼ jach ti laj galaxia, jiñi Vía Láctea, tajol an ñumen ti 400 mil millón ecʼ tac. Jehová aqʼuebil i chaʼan i cʼabaʼ tiʼ pejtelel. ¿Chuqui miʼ cʌntesañonla iliyi? Chaʼan mi Dios miʼ qʼuel ti ñuc jiñi mach bʌ cuxulic i melbal tac, ¿bajcheʼ yilal miʼ qʼuelet maʼ wʌl, cheʼ jatet maʼ melben i yeʼtel chaʼañʌch maʼ cʼuxbin, i mach chaʼañic xicʼbilet i chaʼan? (Sal. 19:1, 3, 14). Jiñi cʼuxbibil bʌ lac Tat wen cʌmbil i chaʼañet. Jesús tsiʼ yʌlʌ: «Laj tsicbil i tsutsel laʼ jol» (Mt. 10:30). Juntiquil tsaʼ bʌ i tsʼijbu jiñi salmo miʼ yʌl: «Lac Yum miʼ qʼuel bajcheʼ miʼ ñusañob qʼuin jiñi tojoʼ bʌ» (Sal. 37:18). Ti yambʌ tʼan, wen yujil chuqui tac ti wocol woli a ñusan i miʼ mejlel i yʌqʼueñet a pʼʌtʌlel chaʼan maʼ cuch.

5. ¿Chucoch yomʌch mi lac ñop chaʼan Jehová mucʼʌch i mejlel i yʌqʼueñonla lac pʼʌtʌlel?

⁵ (Pejcan Isaías 40:28). Tilemʌch ti Jehová pejtelel jiñi pʼʌtʌlel. Jumpʼejl ejemplo, ñaʼtancu bajcheʼ cʼamel miʼ yʌqʼuen i pʼʌtʌlel jiñi Qʼuin. Juntiquil xtsʼijbaya i chaʼan Ciencia, i cʼabaʼ David Bodanis, tiʼ tsictesa chaʼan ti jujumpʼejl segundo an chuqui tac miʼ tojmel yaʼ ti Qʼuin cheʼ bʌ i pʼʌtʌlel bajcheʼ cabʌl millón bomba tac. Yambʌ científico tsiʼ qʼuele chaʼan «i pʼʌtʌlel jiñi Qʼuin muʼ bʌ i taj ti jumpʼejl segundo miʼ mejlel ti cʼʌjñel chaʼan miʼ coltan 200 mil jab jiñi quixtañujob». Mi Jehová miʼ yʌqʼuen i pʼʌtʌlel jiñi Qʼuin, ¿mach ba mejlic i yʌqʼueñonla lac pʼʌtʌlel jaʼel chaʼan mi laj cuch baqui jach bʌ wocol?

6. a) ¿Chucoch tsiʼ yʌlʌ Jesús chaʼan sejb i cuch? b) Ixcu joñonla, ¿bajcheʼ yilal miʼ coltañonla?

⁶ (Pejcan Isaías 40:29). Miʼ wen aqʼueñonla tijicñʌyel cheʼ mi lac melben i yeʼtel Jehová. Jesús tiʼ sube jiñi xcʌntʼañob i chaʼan: «Yuʼu a bicʼ chaʼan maʼ wochel wʌʼ tij qʼuech». I tsiʼ chaʼ alʌ: «Muqʼuix caj laʼ taj cʼaj o chaʼan laʼ pusicʼal. Come jini j qʼuech mach wocolic ti qʼuechol. Sejb a cuch muʼ bʌ cʌqʼueñet» (Mt. 11:28-30). ¡Wen isujmʌch ili tʼan tac! An i tajol, wen lujbonla cheʼ mi lac majlel ti tempa bʌ yicʼot ti subtʼan. Pero ¿mach ba isujmʌch cheʼ mi lac chaʼ sujtel ti la cotot ñumen chʼejlonla yicʼot chajpʌbilonla chaʼan i cuchol wocol? Wen isujmʌch chaʼan jiñi i cuch muʼ bʌ i yʌqʼueñonla Jesús sejb yicʼot mach wocolic ti qʼuechol.

7. Alʌ jumpʼejl experiencia muʼ bʌ i pʌs chaʼan isujmʌch jiñi tʼan am bʌ ti Mateo 11:28-30.

 ⁷ La laj qʼuel tiʼ tojlel juntiquil hermana muʼ bʌ i wen ubiben i wocolel jiñi cʌlʌx lujbel, cʌlʌx chʼijiyemlel yicʼot tsʌts bʌ cʼux jol. Miʼ mejlel lac chʼʌmben isujm chaʼan an i tajol maʼañic miʼ wen majlel ti tempa bʌ. Pero ti jumpʼejl bʌ qʼuin, tsiʼ chaʼle wersa majlel ti tempa bʌ, i ti wiʼil tiʼ tsʼijbu: «Jiñi cʌntesa tsiʼ taja ti tʼan cheʼ bʌ ñoj cʼuñonla mi la cubin lac bʌ. Jiñi hermano tsaʼʌch i chumta jiñi woli bʌ i tsictesan yicʼot wen jach bʌ tʼan tsiʼ cʼʌñʌ, i tsaʼto loqʼui i yaʼlel c wut. Tsaʼ c chʼʌmbe isujm chaʼan yaʼʌch yom añon ti tempa bʌ tac». Ili hermana wen tijicña tsiʼ yubi i bʌ cheʼ tsiʼ chaʼle wersa chaʼan miʼ majlel ti tempa bʌ.

8, 9. ¿Chuqui yom i yʌl Pablo cheʼ tsiʼ yʌlʌ «cheʼ baʼ ora cʼuñon pʼʌtʌlon»?

⁸ (Pejcan Isaías 40:30). Anquese cabʌl chuqui miʼ mejlel lac mel, an jach baqui jaxʌl miʼ mejlel lac mel ti lac bajñel pʼʌtʌlel. Jiñʌch yom bʌ mi lac ñaʼtan ti lac pejtelel. Laʼ lac ñaʼtan tiʼ tojlel jiñi apóstol Pablo. Anquese cabʌlʌch chuqui wen yujil melol, maʼañic tsaʼ mejli i mel pejtelel chuqui yom. Cheʼ bʌ tiʼ sube Dios i cʼojol tac, Dios tsiʼ jacʼbe: «Miʼ tsʼʌctiyel c pʼʌtʌlel tiʼ cʼunlel winic». Pablo tsaʼʌch i chʼʌmbe isujm i tsiʼ yʌlʌ: «Cheʼ baʼ ora cʼuñon pʼʌtʌlon» (2 Co. 12:7-10). ¿Chuqui jiñi yom bʌ i yʌl?

⁹ Pablo yujil chaʼan maʼañic chuqui miʼ wen mejlel i bajñel mel mi maʼañic i chaʼan i coltaya Dios. Jiñi chʼujul bʌ i yespíritu Dios miʼ mejlel i yʌqʼuen i pʼʌtʌlel cheʼ cʼun miʼ yubin i bʌ. Pero mach cojach jiñi. Miʼ mejlel i cʌntesan jaʼel chaʼan miʼ cʼotel i mel jiñi mach bʌ añic miʼ bajñel mejlel. Cheʼʌch mi la cujtel jaʼel. Wen la cujil chaʼan tiʼ coltaya Dios miʼ mejlel lac taj lac pʼʌtʌlel.

10. ¿Bajcheʼ tsiʼ colta Jehová jiñi David tiʼ cuchol wocol?

¹⁰ Jiñi salmista David mach junsujtel jach tsiʼ yubibe i pʼʌtʌlel i yespíritu Dios. Tiʼ tsʼijbu: «Chaʼan ti a pʼʌtʌlel miʼ mʌjlel c chaʼan anquese cabʌl j contrajob. Chaʼan ti jatet, c Dios, mi mejlel c tijpʼel ñumel ti junwejl tsʼajc» (Sal. 18:29). An wocol tac lajal bʌ bajcheʼ tsʼajc come maʼañic miʼ mejlel lac bajñel ñusan. Jin chaʼan la com i coltaya Jehová.

11. ¿Bajcheʼ miʼ coltañonla lac ñusan jumpʼejl wocol jiñi chʼujul bʌ espíritu?

¹¹ (Pejcan Isaías 40:31). Cheʼ bʌ jiñi xiyeʼ miʼ cʼʌjquel ti chan yicʼot ñajt miʼ chaʼlen wejlel, maʼañic miʼ bajñel cʼʌn i pʼʌtʌlel. Jiñi ticʌw icʼ muʼ bʌ i loqʼuel ti lum jiñʌch muʼ bʌ i coltan chaʼan miʼ chʼujyel letsel i maʼañic miʼ wen cʼʌn i pʼʌtʌlel. Jin chaʼan, cheʼ bʌ an tsʌts bʌ a wocol, cʼajtesan jiñi xiyeʼ. Chʌn cʼajtiben Jehová chaʼan miʼ yʌqʼueñet ‹jiñi chʼujul bʌ espíritu›, jiñi pʼʌtʌlel muʼ bʌ i chʼuyet letsel jaʼel (Jn. 14:26). Ñaʼtan chaʼan miʼ mejlel a cʼajtiben jin jach bajcheʼ ora a wom ti jujumpʼejl qʼuin. Laʼ lac ñaʼtan jumpʼejl wocol baqui yom mi lac wen cʼajtiben i coltaya Jehová: Cheʼ bʌ lecoj mi laj qʼuel lac bʌ yicʼot yambʌ hermano. ¿Chucoch miʼ mejlel ti ujtel iliyi?

12, 13. a) ¿Chucoch an i tajol lecoj miʼ qʼuelob i bʌ jiñi hermanojob? b) ¿Chuqui mi laj cʌn tiʼ tojlel Jehová jiñi ejemplo i chaʼan José?

¹² Come laj xmulilonla, añʌch chuqui lecoj bʌ miʼ mejlel ti tejchel la quicʼot yambʌ hermanojob. An i tajol juntiquil hermano miʼ subeñonla o miʼ mel mach bʌ muqʼuic lac mulan, i an i tajol joñonla mi lac michʼesañob. Ili jiñʌch jumpʼejl tsʌts bʌ wocol mi lac taj. Ilayi jiñʌch junchajp baqui miʼ cʌy Jehová chaʼan mi lac pʌs lac xucʼtʌlel yicʼot chaʼan mi lac ñop tem eʼtel yicʼot yambʌ hermanojob muʼ bʌ i cʼuxbintelob ti Dios jaʼel, anquese xmulilob.

¹³ Jehová maʼañic miʼ mʌctan chaʼan jiñi i wiñicob maʼañic miʼ ñusañob wocol, cheʼ bajcheʼ mi laj cʌn tiʼ tojlel José. Cheʼ bʌ  chʼitonto, tsaʼ pʌjyi majlel ti Egipto come jiñi i yerañob tsiʼ choñoyob tiʼ caj miʼ tsʼaʼleñob (Gn. 37:28). Dios cʼuxʌch tsiʼ yubi cheʼ tsiʼ qʼuele bajcheʼ woliʼ ticʼlʌntel i yamigo, juntiquil toj bʌ wiñic. Pero Dios maʼañic tsiʼ yotsa i bʌ. Cheʼ jaʼel, maʼañic chuqui tsiʼ mele cheʼ bʌ tsaʼ jopʼbenti i mul chaʼan tsiʼ ñopo i piʼlen i yijñam Potifar i cheʼ bʌ tsaʼ otsʌnti ti cárcel. Pero ¿tsaʼ ba i bajñel cʌyʌ José? Maʼañic. Jiñi Biblia miʼ yʌl chaʼan Jehová «tsiʼ yʌcʼʌ ti loqʼuel ti utsʼat pejtel chuqui tsiʼ mele José» (Gn. 39:21-23).

14. ¿Baqui bʌ jiñi i wenlel mi lac taj tiʼ chaʼan bʌ Dios yicʼot ti lac bʌcʼtal cheʼ mi laj cʌy michʼajel?

¹⁴ Laʼ laj qʼuel ti tojlel yambʌ juntiquil. Maʼañic cabʌlob jiñi ñusʌbiloʼ bʌ i chaʼan bajcheʼ yambʌ i yamigo Dios, i cʼabaʼ David. Pero maʼañic tsiʼ loto tiʼ pusicʼal pejtelel chuqui tsaʼ tumbenti. Tiʼ tsʼijbu: «Cʌyʌ a michʼajel. Mach yomic tsʌytsʌyña a pusicʼal. Jini woli bʌ ti michʼ miʼ tech mulil. Mach cheʼic yom maʼ mel» (Sal. 37:8). Ñuc bʌ i sujmlel chaʼan maʼ cʌy a michʼajel jiñʌch chaʼan maʼ lajin Jehová, come «maʼanic tsiʼ yʌqʼueyonla wocol cheʼ bajcheʼ cʼamel an lac mul» (Sal. 103:10). Cheʼ maʼ cʌy a michʼajel mucʼʌch i coltañet jaʼel ti a bʌcʼtal. Jiñi michʼajel miʼ mejlel i yʌcʼ ti letsel a presión yicʼot wocol maʼ jap icʼ, miʼ mejlel ti asiyel a wolmal, jiñi a páncreas yicʼot a soytaʼ. Cheʼ bʌ mi lac michʼan, maʼañic mi lac wen cʼʌn lac jol. Cheʼ bʌ tsaʼix ujtiyonla ti wen michʼajel, miʼ mejlel la cubin cabʌl chʼijiyemlel. Pero jiñi Biblia miʼ yʌl chaʼan cheʼ «ñʌchʼʌl lac pusicʼal cʼocʼonla yubil» (Pr. 14:30). Jin chaʼan, cheʼ bʌ juntiquil hermano miʼ lowonla, ¿chuqui mi caj i coltañonla chaʼan mi lac chaʼ utsʼesan lac bʌ? Jiñʌch cheʼ mi lac jacʼ chuqui miʼ yʌl jiñi Biblia.

15, 16. ¿Chuqui miʼ mejlel lac mel cheʼ an majqui miʼ lowonla?

¹⁵ (Pejcan Efesios 4:26). Mach toj sajtelic lac pusicʼal cheʼ miʼ ticʼlañonla yambʌ quixtañujob. Pero cheʼ juntiquil hermano o yambʌ lac familia miʼ melbeñonla i miʼ subeñonla muʼ bʌ i wen lowonla, muʼto i mejlel i jisañonla yubil. Laʼcu lac ñaʼtan chaʼan maʼañic miʼ lac ñajʌtesan chuqui tsaʼ tumbentiyonla. ¿Muʼ ba caj lac chʌn lot ti lac pusicʼal jiñi michʼajel? ¿O muʼ ba caj lac jacʼ jiñi ticʼojel muʼ bʌ i yʌcʼ jiñi Biblia i mi lac bʌcʼ tojʼesan jiñi wocol? Cheʼ bʌ cabʌl ora mi la cʌcʼ ti ñumel, ñumen wocol mi caj la cubin chaʼan mi la cutsʼesan lac bʌ yicʼot jiñi hermano.

¹⁶ Ñaʼtancu chaʼan an chuqui tiʼ subeyet juntiquil hermano i maʼañic miʼ mejlel a ñajʌtesan. ¿Chuqui mi caj i coltañet chaʼan tijicña mi laʼ chaʼ ajñel? Ti ñaxan, pejcan Jehová ti jumpʼejl a pusicʼal i cʼajtiben i coltaya  chaʼan utsʼat maʼ mejlel ti tʼan yicʼot jiñi hermano. Cʼajtesan chaʼan i yamigojʌch Dios jaʼel yicʼot mucʼʌch i cʼuxbintel (Stg. 2:23). Jehová wen jach bajcheʼ yilal tiʼ tojlel i yamigojob i miʼ pijtan chaʼan cheʼʌch yomonla jaʼel (Pr. 15:23; Mt. 7:12; Col. 4:6). Cheʼ jiñi, wen ñaʼtan chuqui mi caj a wʌl. Mach a bʌcʼ al chaʼan yʌlol jach i chaʼan jiñi hermano, cʼajtiben a bʌ mi yʌlol jach i chaʼan o maʼañic. Yom maʼ wʌcʼ ti ñuc chaʼan tajol añʌch chuqui tsaʼ mele jaʼel. Miʼ mejlel a tech a suben: «Tajol orajʌch cujil michʼ, pero, cheʼ tsaʼ pejcayon acʼbi, cheʼʌch tsaʼ cubi c bʌ bajcheʼ iliyi». Mi maʼañic miʼ tojʼan jiñi wocol sʌclan yambʌ i yorajlel chaʼan maʼ chaʼ pejcan. Cʼajtiben Jehová chaʼan laʼ i yʌqʼuen i bendición jiñi hermano. Cʼajtiben jaʼel chaʼan laʼ i coltañet a wʌcʼ ti ñuc wen tac bʌ i melbal jiñi tsaʼ bʌ i lowoyet. Mach yʌlʌyic chuqui miʼ yujtel, chʌn ñaʼtan chaʼan Jehová utsʼat mi caj i qʼuelet cheʼ maʼ chaʼlen wersa chaʼan tijicña maʼ chaʼ ajñel yicʼot jiñi hermano, come i yamigojʌch Dios.

17. a) Mi tsaʼ lac chaʼle mulil, ¿bajcheʼ miʼ coltañonla Jehová? b) ¿Chucoch yomʌch mi lac jacʼ laj coltʌntel?

¹⁷ An hermanojob muʼ bʌ i ñaʼtañob chaʼan mach i wentʌlelic miʼ melbeñob i yeʼtel Jehová come an i chaʼleyob tsʌts bʌ mulil. Cheʼ miʼ chaʼ wen ñaʼtañob jiñi tsaʼ bʌ i meleyob, miʼ mejlel i chilbeñob i ñʌchʼtʌlel, i tijicñʌyel yicʼot i pʼʌtʌlel. Jiñi rey David tsiʼ yʌlʌ chaʼan tsaʼ bʌ i ñusa: «Cheʼ maʼanic tsac subu c mul, tsaʼ caji ti jilel c bʌquel. Tsac chaʼle ajacñʌyel tiʼ pejtelel qʼuin. Come tsaʼ teñeyon ti a cʼʌb ti acʼʌlel yicʼot ti qʼuinil». Pero David tsiʼ ñusa i wocol bajcheʼ juntiquil wiñic chʼejl bʌ tiʼ chaʼan bʌ Dios, cheʼʌch bajcheʼ miʼ mulan Jehová. Tiʼ tsʼijbu: «Tsaʼ c subeyet c mul [...]. Jatet tsaʼ ñusʌbeyon c mul yicʼot c jontolil» (Sal. 32:3-5). Mi an a chaʼle tsʌts bʌ mulil, Jehová yom miʼ coltañet. Pero chaʼan maʼ mejlel ti chaʼ tojʼan, yomʌch maʼ jacʼ a coltʌntel tiʼ tojlel jiñi congregación (Pr. 24:16; Stg. 5:13-15). Mach yomic maʼ wen jalʼan, come yaʼʌch cʌyʌl a cuxtʌlel tiʼ pejtelel ora. Cheʼ jiñi, ¿chuqui miʼ mejlel a mel mi jiñi a conciencia miʼ chʌn ñaʼtʌbeñet a mul cheʼ bʌ Dios tsaʼix i ñusʌbeyet?

18. ¿Bajcheʼ miʼ coltan jiñi muʼ bʌ i yubiñob chaʼan maxto ñusʌbentiyob i mul ti Dios tsaʼ bʌ i ñusa Pablo?

¹⁸ Pablo an i tajol tsaʼʌch i wen cʼojoʼta i bʌ tiʼ caj mach bʌ wentaquic tsiʼ mele. Tsiʼ yʌlʌ: «Joñon mach lajalic c ñuclel yicʼot yañoʼ bʌ apóstolob. Mach utsʼatonic cheʼ bʌ tsaʼ pʌjyiyon ti apóstol, come tsac ticʼla xñoptʼañob i chaʼan Dios». Pero tsiʼ chaʼ alʌ: «Wʌle apóstolon chaʼan tiʼ yutslel i pusicʼal Dios» (1 Co. 15:9, 10). Anquese Pablo tsiʼ taja i sajtemal, Jehová tsaʼʌch i qʼuele ti ñuc. I tsiʼ mulaj chaʼan Pablo miʼ ñaʼtan chaʼan cheʼʌchi. Mi tsaʼix a junyajlel cʌyʌ a mul yicʼot mi cʌlʌx tsʌts tsaʼ bʌ a mele i tsaʼ sube jiñi ancianojob, yom maʼ ñop chaʼan Jehová mi caj i pʼuntañet. Jin chaʼan, ñopo chaʼan Jehová tsaʼix i ñusʌbeyet, i chʼʌmʌ ti ñuc (Is. 55:6, 7).

19. ¿Baqui bʌ jiñi texto chaʼan ili jabil 2018, i chucoch ñucʌch i cʼʌjñibal?

¹⁹ Cheʼ woliʼ lʌcʼtiyel i yorajlel i jilibal ili pañimil, la cujil chaʼan ñumento mi caj i pʼojlel wocol. Pero miʼ mejlel a ñop chaʼan Jehová mi caj i yʌqʼueñet i cʼʌjñibal bʌ a chaʼan chaʼan chʌn xucʼul maʼ wajñel, come «miʼ chaʼ pʼʌtʼesan jini cʼuñoʼ bʌ. Miʼ chaʼ aqʼueñob i wersa jini mach bʌ pʼʌtʌlobix» (Is. 40:29; Sal. 55:22; 68:19). Ti ili jabil 2018, mi caj lac chʌn cʼajtesan ili ñuc bʌ i sujmlel cheʼ mi lac majlel ti tempa bʌ tac i mi laj qʼuel jiñi texto chaʼan ili jabil: «Jini muʼ bʌ i chʌn pijtañob lac Yum [Jehová] chaʼan miʼ coltʌntelob mi caj i chaʼ tajob i pʼʌtʌlel» (Is. 40:31).