JIÑI ejemplo muʼ bʌ caj laj qʼuel miʼ pʌs chaʼan an i tajol tsaʼʌch cʼʌjñi. Ti Deuteronomio 24:14, 15 miʼ yʌl: «Mach yomic maʼ pʼumpʼun ticʼlan a winic chaʼan pʼumpʼun, mi a piʼʌlʌch o mi ñajt bʌ chʼoyol tsaʼ bʌ tili ti chumtʌl ti a tejclum [...], [ame] mux caj i pejcan lac Yum chaʼan jontolet. Cheʼ jini mi caj a taj a mul».

Yaʼ tiʼ tʼejl jiñi tejclum Asdod, tsaʼ tajle i xejpʼil ucʼum melbil bʌ cheʼ maxto cʼotemic jiñi jabil 600 cheʼ bʌ maxto tilemic Cristo (m.t.C.). Ti ili tsaʼ bʌ tajle miʼ yʌl jumpʼejl wocol lajal bʌ bajcheʼ miʼ yʌl ti Deuteronomio 24. Miʼ ñaʼtʌntel chaʼan ili muʼ bʌ i yʌjlel jiñʌch tiʼ tojlel juntiquil xʼeʼtel mach bʌ tsʼʌcʌlic tsiʼ yʌcʼʌ i wut jiñi pacʼ albil i chaʼan i yum ti eʼtel. Miʼ yʌl: «Cheʼ bʌ jiñi a wiñic [jiñi xʼeʼtel] tsaʼix ujti i tempan i wut jiñi pacʼ yaʼ tiʼ yajñib, i yalobil jiñi Shobay i cʼabaʼ Hoshayahu tsaʼ tili baʼañon i tsiʼ chʼʌmbe i pislel jiñi a wiñic. [...] Pejtelel jiñi woliyoʼ bʌ ti eʼtel quicʼot jiñi qʼuin [...] miʼ mejlel i yʌlob chaʼan isujmʌch chuqui woli cʌl. Mach wis añic c mul. [...] Mi jiñi gobernador miʼ qʼuel chaʼan maʼañic tiʼ wenta chaʼan miʼ chaʼ sutqʼuibentel i pislel a wiñic, laʼ i mel chaʼan i pʼuntaya. Mach ñʌchʼʌlic jach yom maʼ cʌytʌl cheʼ maʼ qʼuel chaʼan maʼañic i pislel miʼ cʌytʌl a wiñic».

Jiñi yujil bʌ chaʼan historia, i cʼabaʼ Simon Schama miʼ yʌl chaʼan iliyi «ñumen anto chuqui miʼ pʌsbeñonla, mach cojach chaʼan jiñi xʼeʼtel yom miʼ chaʼ sutqʼuibentel i pislel». I miʼ chaʼ al: «Miʼ pʌsbeñonla jaʼel chaʼan jiñi xʼeʼtel i cʌñʌyʌch jiñi mandar am bʌ yaʼ ti Tsʼijbujel, ñumento jiñi mandar chaʼan bʌ mel bʌ muʼ bʌ i yʌjlel ti Levítico yicʼot Deuteronomio baʼ miʼ yʌl chaʼan mach yomic miʼ ticʼlʌntel jiñi pʼumpʼuñoʼ bʌ».