1, 2. ¿Chuqui mi cajel ti ili jabil 2018 muʼ bʌ caj i tempan cabʌl quixtañu, i chucoch wen ñuc i cʼʌjñibal? (Qʼuele jiñi foto).

CHEʼ ti 31 i chaʼan marzo, 2018, cheʼ wolix (choncolix) i bʌjlel Qʼuin, cabʌl i wiñicob Dios yicʼot yambʌ wiñicob xʼixicob (quixtañujob) mi caj i tempañob i bʌ chaʼan miʼ melob i Cena lac Yum. Jiñi i Cʼajtesʌntel i chʌmel Jesús, junyajl jach bʌ miʼ mejlel ti jujumpʼejl jab, wen utsʼatax bajcheʼ miʼ tempan jiñi quixtañujob, i maʼañic yambʌ tempa bʌ muʼ bʌ i mejlel i mel (chaʼlen) bajcheʼ iliyi.

² Jehová yicʼot Jesús wen tijicñayob cheʼ miʼ qʼuelob chaʼan yonlel quixtañu tiʼ petol pañimil (mulawil) miʼ yajñelob ti ili ñuc bʌ tempa bʌ. Jiñi Biblia tsiʼ wʌn alʌ chaʼan yonlel «winicob xʼixicob» maʼañic bʌ majqui miʼ mejlel i tsic ‹chʼoyoloʼ bʌ tiʼ pejtelel tejclum, ti jujunmojt winicob, tiʼ pejtelel lum yicʼot tiʼ pejtelel tʼan tac› mi caj i yʌlob: «Yujil coltaya lac Dios buchul bʌ tiʼ yeʼtel yicʼot jini Tiñʌmeʼ» (Ap. 7:9, 10). Wen utsʼatax ti qʼuelol cheʼ yonlel quixtañu miʼ yʌqʼueñob i ñuclel Jehová yicʼot Jesús ti jujumpʼejl jab cheʼ miʼ Cʼajtesʌntel i chʌmel Jesús.

3. ¿Chuqui ti cʼajtiya tac mi caj i jajqʼuel ti ili temaj?

³ Ti ili temaj mi caj laj qʼuelben i jacʼbal chʌmpʼejl cʼajtiya. Ñaxam  bʌ, ¿bajcheʼ miʼ mejlel lac chajpan lac bʌ chaʼan i Cʼajtesʌntel i chʌmel Jesús yicʼot mi lac tajben i wenlel? I chaʼpʼejlel, ¿chucoch mucʼʌch i coltan i wiñicob Dios chaʼan temel miʼ yajñelob? I yuxpʼejlel, ¿chuqui miʼ mejlel lac mel chaʼan chʌn temelob jiñi i wiñicob Dios? I chʌmpʼejlel, ¿muʼ ba caj i cʼotel i yorajlel chaʼan maʼañix mi caj i chʌn mejlel? Mi cheʼʌchi, ¿jalaqui?

4. ¿Chucoch ñucʌch i cʼʌjñibal cheʼ mi la cajñel ti ili tempa bʌ?

⁴ ¿Chucoch ñucʌch i cʼʌjñibal cheʼ mi la cajñel ti ili tempa bʌ? Yom mi laj cʼajtesan chaʼan jiñi tempa bʌ tac jiñʌch junchajp bajcheʼ mi lac chʼujutesan Dios. Miʼ mejlel lac ñaʼtan chaʼan Jehová yicʼot Jesús mucʼʌch i wen chʼʌmob ti ñuc majqui miʼ chaʼleñob wersa chaʼan maʼañic miʼ cʌyob i bʌ ti ili tempa bʌ ñumen ñuc bʌ i cʼʌjñibal ti jumpʼejl jab. La com chaʼan yaʼʌch añonla ti ili tempa bʌ, cojach mi an ñoj ñuc bʌ chuqui miʼ mejlel i mʌctañonla o tsʌts bʌ cʼamʌjel. Cheʼ mi lac pʌs ti lac melbal chaʼan wen ñucʌch i cʼʌjñibal jiñi tempa bʌ tac, mi lac ñumen aqʼuen i ñaʼtan Jehová chaʼan yaʼʌch yom i yʌcʼ laj cʼabaʼ tiʼ «juñilel lac ñaʼtʌntel», o baʼ «tsʼijbubil i cʼabaʼ jini añoʼ bʌ i cuxtʌlel». Ilayi yaʼʌch an i cʼabaʼ jiñi yom bʌ i yʌqʼuen Jehová jiñi cuxtʌlel tiʼ pejtelel ora (Mal. 3:16; Ap. 20:15).

5. Cheʼ maxto cʼotemic i yorajlel i Cʼajtesʌntel i chʌmel Jesús, ¿chuqui miʼ mejlel lac mel chaʼan mi laj qʼuel bajcheʼ añonla ti lac chʼujbiya?

⁵ Cheʼ maxto cʼotemic i yorajlel i Cʼajtesʌntel i chʌmel Jesús, miʼ mejlel la cʌqʼuen i yorajlel oración yicʼot mi lac wen tsajin bajcheʼ añonla la quicʼot Jehová (pejcan 2 Corintios 13:5). ¿Bajcheʼ miʼ mejlel lac mel? Pablo tsiʼ yʌlʌ chaʼan yom mi laj qʼuel bajcheʼ añonla ti lac chʼujbiya. Cheʼ bajcheʼ jiñi, yom mi laj cʼajtiben lac bʌ: «¿Mucʼʌch ba c ñop chaʼan añon tiʼ tejclum Jehová chaʼan mic melben i yeʼtel (troñel)? ¿Mucʼʌch ba c chaʼlen wersa loqʼuel ti subtʼan i mic pʌs jiñi wen tʼan chaʼan bʌ i Yumʌntel Dios? ¿Muʼ ba c pʌs tic melbal chaʼan mucʼʌch c ñop chaʼan chumuloñix ti cojix bʌ qʼuin i chaʼan lʌcʼʌlix i jilibal i yumʌntel Satanás? ¿Woli (yʌquel) ba c chʌn ñop Jehová yicʼot Jesús cʼʌlʌl bajcheʼ tsaʼ cʌcʼʌ c bʌ ti Dios?» (Mt. 24:14; 2 Ti. 3:1; He. 3:14). Cheʼ mi lac wen ñaʼtʌben i jacʼbal ili cʼajtiya tac, mi caj i coltañonla lac ñaʼtan bajcheʼ mero añonla.

6. a) ¿Chuqui jiñi cojach bʌ miʼ mejlel i yʌqʼueñonla laj cuxtʌlel maʼañic bʌ i jilibal? b) ¿Bajcheʼ miʼ chajpan i bʌ juntiquil anciano cheʼ lʌcʼʌlix jiñi ñuc bʌ qʼuin ti jujumpʼejl jab? c) ¿Bajcheʼ miʼ mejlel lac tsajcʌben i melbal jiñi hermano?

⁶ Junchajp bajcheʼ miʼ mejlel lac chajpan lac bʌ jiñʌch cheʼ mi lac pejcan yicʼot mi lac wen ñaʼtan temaj tac muʼ bʌ i taj ti tʼan chucoch ñuc i cʼʌjñibal jiñi i Cʼajtesʌntel i chʌmel Jesús (pejcan Juan 3:16; 17:3). Cojach mi caj lac taj laj cuxtʌlel maʼañic bʌ i jilibal cheʼ miʼ cʼotel laj cʌn Jehová yicʼot mi la cʌcʼ lac ñopoñel (chʼujbiya) ti Jesús, jiñi cojach bʌ i Yalobil. Chaʼan mi lac wen chajpan lac bʌ, miʼ mejlel lac sʌclan jiñi temaj tac muʼ bʌ i coltañonla lac ñumen lʌcʼtesan lac bʌ tiʼ tojlelob. Laʼ laj qʼuel muʼ bʌ i mel juntiquil anciano añix bʌ cabʌl i ñaʼtʌbal. Añix ora i loto tilel temaj tac muʼ bʌ i loqʼuel ti Lac Tsictesʌbentel baʼ miʼ taj ti tʼan chaʼan i Cʼajtesʌntel i chʌmel Jesús yicʼot bajcheʼ an i pʌsbeyonla cʼuxbiya Jehová yicʼot Jesús. Ti jujumpʼejl jab, cheʼ anto yom chaʼpʼejl uxpʼejl semana chaʼan jiñi ñuc bʌ qʼuin, miʼ chaʼ pejcan jiñi temaj tac yicʼot miʼ wen ñaʼtan chucoch ñucʌch i cʼʌjñibal. An i tajol, miʼ lot jiñi tsijib tac bʌ temaj muʼ bʌ i taj ti tʼan iliyi. An i qʼuele chaʼan cheʼ miʼ pejcan ili temaj tac, yicʼot jiñi capítulo tac chaʼan Biblia yajcʌbil bʌ chaʼan jiñi semana i miʼ wen ñaʼtan muʼ bʌ i pejcan, cabʌl chuqui tsijib tac bʌ miʼ cʼotel i cʌn ti jajabil. Pero jiñi ñumen ñuc bʌ miʼ taj i qʼuel jiñʌch cheʼ miʼ bej ñucʼan i cʼuxbiya ti Jehová yicʼot Jesús. Cheʼ mi lac chajpan  lac bʌ jaʼel bajcheʼ jiñi hermano, mi caj i coltañonla chaʼan miʼ cʼotel lac ñumen cʼuxbiñob yicʼot laj qʼuelob ti ñuc, i cheʼʌch mi caj lac ñumen taj lac wenlel ti jiñi ñuc bʌ qʼuin.

7. a) ¿Chuqui tsiʼ cʼajti Jesús ti oración ti jiñi acʼʌlel cheʼ cojaxto tsaʼ mejli jiñi i Cena lac Yum? b) ¿Bajcheʼ la cujil chaʼan Jehová añʌch i jacʼʌ jiñi oración?

⁷ Ti jiñi acʼʌlel cheʼ cojaxto tsaʼ mejli jiñi i Cena lac Yum, Jesús tsiʼ cʼajti ti oración chaʼan utsʼat juntemel miʼ yajñelob jiñi xcʌntʼañob i chaʼan, lajal bajcheʼ temel an yicʼot i Tat (pejcan Juan 17:20, 21). Tiʼ sujm, Jehová añʌch i jacʼʌ ili oración tsaʼ bʌ i mele i Yalobil. Jiñi tempa bʌ chaʼan i Cʼajtesʌntel i chʌmel Jesús wen tsiquil miʼ pʌs chaʼan cojach jiñi i testigojob Jehová juntemel añob. Ti ili qʼuin, ti cabʌl país yicʼot bajcheʼ jach bʌ yilal quixtañujob miʼ tempañob i bʌ i miʼ pʌsob chaʼan mucʼʌch i ñopob chaʼan Jehová tsiʼ choco tilel i Yalobil. An tejclum tac baqui mach ñʌmʌlic ti mejlel o mach weñic miʼ qʼuejlel cheʼ jiñi quixtañujob mach bʌ lajalobic i colorlel i pʌchʌlel miʼ tempañob i bʌ. Pero Jehová yicʼot Jesús utsʼat miʼ qʼuelob cheʼ miʼ tempañob i bʌ.

8. ¿Chuqui tsaʼ subenti Ezequiel ti Jehová?

⁸ Jiñi i wiñiconbʌla Jehová maʼañic miʼ toj sajtel lac pusicʼal cheʼ juntemelonla. Jehová cheʼʌch tsiʼ wʌn alʌ tiʼ tojlel jiñi xʼaltʼan Ezequiel. Tsiʼ taja ti tʼan chaʼtsʼijt teʼ, jiñi teʼ «i yejtal [bʌ] Judá» yicʼot jiñi «i yejtal [bʌ] israelob», mi caj i temob i bʌ i juntsʼijt jax mi caj i yajñel (pejcan Ezequiel 37:15-17). Ti jiñi sección «Jiñi xpejcaya juñob miʼ cʼajtibeñob i bʌ», yaʼ ti La Atalaya i chaʼan julio, 2016, tiʼ tsictesa: «Jehová tiʼ sube Ezequiel jumpʼejl tʼan tsaʼ bʌ i yʌqʼue i pijtaya: Tsiʼ yʌqʼue i tʼan chaʼan mi caj i chaʼ muchʼchocon jiñi tejclum Israel cheʼ miʼ chaʼ cojlelob sujtel ti jiñi Lum tsaʼ bʌ wʌn Subentiyob. Cheʼ bajcheʼ ili, tsiʼ wʌn alʌ chaʼan Dios mi caj i muchʼchocon i tejclum jaʼel ili ora».

9. ¿Bajcheʼ mi laj qʼuel miʼ tsʼʌctiyel ti jujumpʼejl jab jiñi profecía tsaʼ bʌ i yʌlʌ Ezequiel?

⁹ Cheʼ ti 1919, Jehová tsiʼ ñaxan chajpa yicʼot quepecña tsaʼ caji i tempan jiñi bombiloʼ bʌ, jiñʌch jiñi teʼ «i yejtal [bʌ] Judá». Ti wiʼil, yonlel quixtañujob wʌʼ bʌ añob i pijtaya ila ti Lum, lajaloʼ bʌ bajcheʼ jiñi «i yejtal [bʌ] israelob», tsaʼ caji i temob i bʌ yicʼotob. Jehová tsiʼ wʌn alʌ chaʼan ili chaʼtsʼijt teʼ juntsʼijt jax mi caj i sujtesan ti cʼʌb (Ez. 37:18-20). Jehová tsiʼ yʌcʼʌ chaʼan jiñi bombiloʼ bʌ yicʼot jiñi yambʌ tiñʌmeʼob ‹junmojt jach miʼ luʼ ajñelob› (Jn. 10:16; Zac. 8:23, TNM). Ili ora, ili chaʼmojtob temel woliʼ melbeñob i yeʼtel jiñi Rey Jesucristo. Yaʼ ti profecía i chaʼan Ezequiel, Dios tiʼ sube Jesús bajcheʼ «jini c Winic David» (Ez. 37:24, 25). Ti jujumpʼejl jab, jiñi tsaʼ bʌ i yʌlʌ Ezequiel wen tsiquilʌch cheʼ bʌ jiñi bombiloʼ bʌ yicʼot yambʌ tiñʌmeʼob junlajal miʼ tempañob i bʌ chaʼan miʼ cʼajtesañob i chʌmel Cristo. Pero ¿chuqui miʼ mejlel lac mel ti jujuntiquil chaʼan maʼañic miʼ sajtel jiñi muchʼtʌlel yicʼot ñumen muchʼulonla?

10. ¿Chuqui miʼ mejlel lac mel chaʼan chʌn temel miʼ yajñel jiñi i tejclum Dios?

¹⁰ Junchajp muʼ bʌ i mejlel lac mel chaʼan chʌn temel miʼ yajñel i tejclum Dios jiñʌch cheʼ mi lac pʌs lac pecʼlel. Jesús tiʼ sube jiñi xcʌntʼañob i chaʼan cheʼ tsajñi wʌʼ ti Pañimil chaʼan yom miʼ pʌsob i pecʼlel (Mt. 23:12). Wʌʼ ti pañimil jiñi yambʌ lac piʼʌlob miʼ ñaʼtañob chaʼan ñumen ñucob bajcheʼ yambʌlob. Pero mi joñonla mi lac pʌs lac pecʼlel, mi caj laj qʼuel ti ñuc jiñi la quermañojob waʼchocobiloʼ bʌ ti congregación. Mi la com chaʼan chʌn temel miʼ yajñel jiñi congregación, yomʌch wen xjacʼtʼañonla. Pero ñumen ñuc bʌ i cʼʌjñibal jin cheʼ Jehová utsʼat miʼ qʼuel cheʼ mi lac pʌs lac pecʼlel, come «miʼ contrajin jini muʼ bʌ  i chañʼesan i bʌ. Miʼ yʌqʼuen i yutslel i pusicʼal jini muʼ bʌ i peqʼuesan i bʌ» (1 P. 5:5).

11. ¿Chucoch miʼ coltañonla chaʼan chʌn muchʼul mi la cajñel yicʼot yambʌlob cheʼ mi lac wen ñaʼtan yom bʌ i yʌl jiñi caxlan waj yicʼot jiñi vino?

¹¹ Jiñi i chaʼchajplel muʼ bʌ i mejlel lac mel jiñʌch cheʼ mi lac wen ñaʼtan chuqui yom i yʌl jiñi caxlan waj yicʼot jiñi vino muʼ bʌ i cʼʌjñel chaʼan i cʼajtesʌntel i chʌmel Jesús. Ili yom mi lac mel cheʼ maxto cʼotemic i yorajlel jiñi ñuc bʌ qʼuin yicʼot ti jiñi bʌ acʼʌlel (1 Co. 11:23-25). Jiñi caxlan waj maʼañic bʌ i levadurajlel yom i yʌl i bʌcʼtal tsaʼ bʌ i yʌcʼʌ Jesús mach bʌ xmulilic, i jiñi vino yom i yʌl i chʼichʼel tsaʼ bʌ i yʌcʼʌ ti bejqʼuel. Pero mach jasʌlic yom mi lac chʼʌmben isujm iliyi. Yom mi laj cʼajtesan chaʼan jiñi i cuxtʌlel Jesús tsiʼ pʌsʌ jiñi chaʼpʼejl cʼuxbiya ñumen ñuc bʌ: Jiñi cʼuxbiya tsaʼ bʌ i pʌsʌ Jehová cheʼ tsiʼ yʌcʼʌ i Yalobil chaʼan miʼ coltañonla yicʼot jiñi tsaʼ bʌ i pʌsʌ Jesús cheʼ ti jumpʼejl i pusicʼal tsiʼ yʌcʼʌ chaʼañonla. Cheʼ mi lac wen ñaʼtan bajcheʼ miʼ wen cʼuxbiñoñobla, yom miʼ ñijcañonla chaʼan mi laj cʼuxbin jaʼel. Jiñi laj cʼuxbiya tiʼ tojlel Jehová yicʼot la quermañojob lajal bajcheʼ jumpʼejl lazo muʼ bʌ i muchʼchocoñonla yicʼot miʼ pʼʌtʼesan bajcheʼ temelonla.

12. Ti jiñi ejemplo chaʼan jiñi rey yicʼot xʼeʼtelob i chaʼan, ¿bajcheʼ tsiʼ pʌsʌ Jesús chaʼan Jehová yomʌch chaʼan mi lac ñusʌben i mul yambʌlob?

¹² I yuxchajplel muʼ bʌ i mejlel lac mel jiñʌch cheʼ mi lac ñusʌben i mul yambʌlob ti jumpʼejl lac pusicʼal. Cheʼ an majqui miʼ ticʼlañonla i mucʼʌch lac ñusʌben i mul, mi lac pʌsben Jehová chaʼan mi la cʌqʼuen wocolix i yʌlʌ cheʼ miʼ ñusʌbeñonla lac mul tiʼ coltaya i cuxtʌlel Cristo. Laʼ lac ñaʼtan jiñi ejemplo tsaʼ bʌ i yʌcʼʌ Jesús muʼ bʌ lac taj yaʼ ti Mateo 18:23-34. Laʼ laj cʼajtiben lac bʌ: «¿Muʼ ba i ñijcan c pusicʼal chaʼan mic mel bajcheʼ tsiʼ pʌsʌ Jesús? ¿Mach ba cujilic pijt yicʼot mucʼʌch c chʼʌmben isujm muʼ bʌ i mel jiñi hermanojob? ¿Ti jumpʼejl ba c pusicʼal mic ñusʌben i mul jiñi muʼ bʌ i ticʼlañon?». Añʌch mulil tac ñumen tsʌts bʌ cheʼ bajcheʼ yan tac bʌ. Cheʼ jaʼel, an tacʌch wocol bʌ mi la cubin chaʼan mi lac ñusan come laj xmulilonla. Pero jiñi tsaʼ bʌ i yʌlʌ Jesús miʼ pʌs chaʼan Jehová yomʌch chaʼan mi lac ñusan (pejcan Mateo 18:35). Jesús wen tsiquil tsiʼ pʌsʌ chaʼan mi maʼañic mi lac ñusʌben i mul la quermañojob cheʼ bʌ cheʼʌch yom mi lac mel, Jehová maʼañic mi caj i ñusʌbeñonla lac mul jaʼel. Ili jiñʌch junchajp yom bʌ mi lac wen ñaʼtan. Cheʼ mi lac jacʼben i tʼan Jesús yicʼot  mi lac ñusʌben i mul yambʌlob, maʼañic miʼ jejmel jiñi muchʼtʌlel i bej cheʼʌch mi la cajñel la quicʼot yambʌlob.

13. Cheʼ chʌn an ñʌchʼtʌlel la quicʼot la quermañojob, ¿bajcheʼ miʼ yʌcʼ chaʼan chʌn temel mi la cajñel?

¹³ Cheʼ mi lac ñusʌben i mul la quermañojob, an ñʌchʼtʌlel la quicʼotob. Yom mi laj cʼajtesan cheʼ Pablo tsiʼ yʌlʌ chaʼan yom mi lac chaʼlen wersa ‹chaʼan ñʌchʼʌl mi la cajñel ti jumpʼejl jach lac pusicʼal ti jiñi Espíritu› (Ef. 4:3). Cheʼ tiʼ yorajlel chaʼan miʼ Cʼajtesʌntel i chʌmel Jesús, yom mi lac wen ñaʼtan bajcheʼ yilalonla tiʼ tojlel yambʌlob, ñumento yom mi lac ñaʼtan ti jiñi bʌ acʼʌlel. Laʼ laj cʼajtiben lac bʌ: «¿Tsiquil ba tic melbal chaʼan maʼañic mic michʼ qʼuelob jiñi yambʌlob? ¿Muʼ ba i qʼuel yambʌlob chaʼan mucʼoñʌch ti wersa c sʌclan chaʼan chʌn an ñʌchʼtʌlel yicʼot muchʼtʌlel?». Cheʼ tiʼ yorajlel ili ñuc bʌ tempa bʌ, laʼ lac wen ñaʼtan ili cʼajtiya tac.

14. ¿Bajcheʼ miʼ mejlel lac pʌs chaʼan mucʼʌch laj cuchben lac bʌ lac sajtemal?

¹⁴ I chʌnchajplel bajcheʼ mi lac mel chaʼan chʌn muchʼul mi la cajñel jiñʌch cheʼ mi lac pʌs cʼuxbiya cheʼ bajcheʼ miʼ mel Jehová, jiñi Dios cʼuxbiya bʌ (1 Jn. 4:8). Mach yomic mi lac wis al: «Tajol yomʌch mij cuchbeñob i sajtemal, pero maʼañic chucoch yom mij cʼuxbiñob». Mi cheʼ mi lac ñaʼtan bajcheʼ jiñi, woli lac ñusan ti pʼis i ticʼojel Pablo baʼ miʼ yʌl chaʼan yom mi laj ‹cuchbeñob i sajtemal lac piʼʌlob ti laj cʼuxbiya› (Ef. 4:2). Pablo mach cojach tsiʼ yʌlʌ chaʼan yom mi laj cuchben lac bʌ lac sajtemal, tsiʼ yʌlʌ jaʼel chaʼan yom mi lac mel yicʼot ‹cʼuxbiya›. ¿Ñumach chaʼan qʼuexelʌch ili tʼan? Jehová miʼ pʌy pejtelel quixtañujob chaʼan miʼ yochelob tiʼ congregación (Jn. 6:44). Jin chaʼan, mi lac ñaʼtan chaʼan añʌch chuqui miʼ qʼuel chaʼan miʼ cʼuxbiñonla. Mi cheʼ bajcheʼ jiñi, ¿chucoch miʼ mejlel la cʌl chaʼan mach yomic mi laj cʼuxbin juntiquil hermano? Yomʌch mi lac pʌs jiñi cʼuxbiya muʼ bʌ i subeñonla Jehová chaʼan yom mi lac pʌsbeñob (1 Jn. 4:20, 21).

15. ¿Bajcheʼ la cujil chaʼan mucʼʌch caj i yujtel jiñi cojix bʌ i Cʼajtesʌntel i chʌmel Jesús?

¹⁵ Mucʼʌch caj i cʼotel i yorajlel cheʼ mi caj lac mel jiñi cojix bʌ i Cʼajtesʌntel i chʌmel Jesús. ¿Bajcheʼ la cujil? Pablo tiʼ sube jiñi bombiloʼ bʌ chaʼan cheʼ miʼ melob ti jujumpʼejl jab iliyi, woliʼ ‹yʌcʼob ti tsictiyel bajcheʼ tsaʼ chʌmi lac Yum cʼʌlʌl miʼ chaʼ tilel› (1 Co. 11:26). Cheʼ bʌ Jesús woliʼ yʌl chaʼan jiñi cojix bʌ qʼuin, tsiʼ taja ti tʼan jaʼel cheʼ baʼ ora miʼ julel. Tsiʼ yʌlʌ chuqui miʼ cajel ti jiñi ñuc bʌ wocol lʌcʼʌlix bʌ: «[Jiñi] i Yalobil Winic mi caj i pʌs i yejtal i pʼʌtʌlel ti panchan. Miʼ cajelob ti cabʌl uqʼuel pejtelel winicob xʼixicob ti pañimil. Mi caj i qʼuelob i Yalobil Winic cheʼ miʼ tilel ti tocal ti panchan tiʼ pʼʌtʌlel yicʼot tiʼ ñuclel. Mi caj i choc tilel i yángelob yicʼot cʼam bʌ i tʼan trompeta. Mi caj i tempañob tilel tiʼ chʌnwejlel pañimil jini yajcʌbiloʼ bʌ i chaʼan ti junwejl panchan cʼʌlʌl ti yambʌ junwejl» (Mt. 24:29-31). Jesús mi caj i tempan jiñi «yajcʌbiloʼ bʌ» cheʼ baʼ ora miʼ laj pʌyob majlel ti panchan jiñi bombiloʼ bʌ wʌʼto bʌ añob ti Pañimil. Ili mi caj i yujtel cheʼ bʌ tsaʼix tejchi jiñi ñuc bʌ wocol, pero cheʼ maxto tejchemic Armagedón. Ti ili guerra, Jesús yicʼot jiñi 144 mil mi caj i jisañob pejtelel yumʌlob wʌʼ ti Pañimil (Ap. 17:12-14). Baʼ ora miʼ Cʼajtesʌntel i chʌmel Jesús, i ti wiʼil muqʼuix i tilel i pʌyob majlel ti panchan jiñi yajcʌbiloʼ bʌ, jiñʌch jiñi cojix bʌ mi caj i yujtel.

16. ¿Chucoch mach a womic a sʌt a bʌ ti i Cʼajtesʌntel i chʌmel Jesús ili jabil?

¹⁶ Laʼ lac chaʼlen wersa chaʼan maʼañic mi laj cʌy lac bʌ tiʼ Cʼajtesʌntel i chʌmel Jesús cheʼ ti 31 i chaʼan marzo, 2018. Laʼ laj cʼajtiben i coltaya Jehová jaʼel chaʼan mi lac chʌn coltan chaʼan temel miʼ yajñel i tejclum (pejcan Salmo 133:1). Mach ñajʌyic lac chaʼan: Mi caj i cʼotel i yorajlel cheʼ mi caj lac ñusan jiñi cojix bʌ i Cʼajtesʌntel i chʌmel Jesús. Pero wʌle laʼ lac pʌs chaʼan mi lac wen qʼuel ti ñuc cheʼ juntemel mi la cajñel ti ili ñuc bʌ tempa bʌ.