1, 2. ¿Chucoch mi la cajñel ti Conmemoración ti jujumpʼejl jab?

 AÑIX cheʼ bʌ 2 mil jab, Jesús tsiʼ yʌcʼʌ i cuxtʌlel chaʼañonla, i cheʼ bajcheʼ jiñi tsiʼ coltayonla chaʼan mi lac mejlel ti chumtʌl tiʼ pejtelel ora. Cheʼ bʌ an jachix yom jumpʼejl acʼʌlel chaʼan miʼ chʌmel (sajtel) tsiʼ mele jumpʼejl alʌ tempa bʌ baqui tsiʼ cʼʌñʌ pan yicʼot vino. Tiʼ sube jiñi xcʌntʼañob chaʼan miʼ bej melob chaʼan miʼ cʼajtesañob bajcheʼ tsiʼ pʌsʌ i cʼuxbiya (1 Cor. 11:23-26).

² Jiñi xñoptʼañonbʌla mi lac jacʼ tsaʼ bʌ i yʌlʌ come mi lac wen cʼuxbin (Juan 14:15). Tiʼ yorajlel jiñi Conmemoración, cabʌl bajcheʼ mi lac pʌs chaʼan mi laj qʼuel ti ñuc tsaʼ bʌ i mele (chaʼle) Jesús ti lac tojlel. Jumpʼejl ejemplo, mi la cʌqʼuen i yorajlel chaʼan mi lac chaʼlen oración yicʼot mi lac wen ñaʼtan chucoch tsaʼ chʌmi. Cheʼ jaʼel, mi la cʌqʼuen i yorajlel chaʼan mi lac pʌy yambʌ lac piʼʌlob chaʼan miʼ tilelob ti ili ñuc bʌ tempa bʌ. I mach la comic lac sʌt jiñi Conmemoración.

3. ¿Chuqui mi caj laj qʼuel ti ili estudio?

³ Jiñi i wiñiconbʌla Jehová an lac wen chaʼle wersa chaʼan mi laj cʼajtesan jiñi i chʌmel Cristo. Ti ili estudio mi caj laj qʼuel uxchajp muʼ bʌ i pʌs: 1) Mi lac mel jiñi Conmemoración cheʼ bajcheʼ tsiʼ yʌlʌ Jesús, 2) mi lac pʌy yambʌ lac piʼʌlob i 3) maʼañic mi laj cʌy lac mel anquese an wocol tac.

4. a) ¿Chuqui tac miʼ tsictesʌntel ti jujumpʼejl jab yaʼ ti Conmemoración? (Lucas 22:19, 20). b) ¿Chucoch ñucʌch i cʼʌjñibal cheʼ mi lac chʼʌmben i sujm?

⁴ Ti jujumpʼejl jab, cheʼ bʌ mi la cajñel ti Conmemoración, mi lac ñʌchʼtan jumpʼejl discurso muʼ bʌ i jacʼ jiñi laj cʼajtiya tac. Jumpʼejl ejemplo, chucoch i cʼʌjñibal mi laj coltʌntel i bajcheʼ tsaʼ mejli ti ñusʌntel lac mul cheʼ tsaʼ chʌmi Jesús. Mi laj cʼajtesʌbentel majqui miʼ mejlel i cʼuxob jiñi pan yicʼot i japob jiñi vino, i chuqui i sujmlel iliyi (pejcan Lucas 22:19, 20). Cheʼ bʌ miʼ ñusʌntel jiñi discurso, mi lac wen ñaʼtan jiñi bendición tac muʼ bʌ caj i tajob jiñi muʼ bʌ caj i chumtʌlob ila ti Lum (Is. 35:5, 6; 65:17, 21-23). Wen ñucʌch i cʼʌjñibal cheʼ mi lac chʼʌmben i sujm pejtelel iliyi. Yonlel lac piʼʌlob maʼañic miʼ chʼʌmbeñob i sujm i maʼañic miʼ qʼuelob ti ñuc cheʼ Jesús tsiʼ yʌcʼʌ i cuxtʌlel. Cheʼ jaʼel, maʼañic miʼ cʼajtesañob i chʌmel Jesús cheʼ bajcheʼ tsiʼ yʌlʌ. ¿Chucoch?   

5. ¿Bajcheʼ tsaʼ caji i cʼajtesañob i chʌmel Jesús jiñi lac piʼʌlob cheʼ bʌ tsaʼix chʌmiyob lʌcʼʌ tiʼ pejtelel i yapóstolob Jesús?

⁵ Cheʼ bʌ tsaʼix chʌmiyob lʌcʼʌ tiʼ pejtelel jiñi i yapóstolob Jesús, tsaʼ caji ti ochel mach bʌ i sujmic xñoptʼañob yaʼ ti congregación (Mat. 13:24-27, 37-39). Tsaʼ caji i yʌlob «mach bʌ weñic chaʼan miʼ locʼsañob jiñi xcʌntʼañob yicʼot miʼ pʌyob majlel» (Hech. 20:29, 30). Junchajp «mach bʌ weñic» tsaʼ caji i yʌlob jiñʌch cheʼ tsaʼ caji i pʌsob chaʼan Jesús mach «junsujtel jach tsaʼ ajqʼui chaʼan miʼ cuchben i mul cabʌl lac piʼʌlob». Tsaʼ caji i yʌlob chaʼan Cristo yomʌch miʼ chʌn acʼ i bʌ ti laj caj (Heb. 9:27, 28). Ili ora, cabʌl lac piʼʌlob utsoʼ bʌ i pusicʼal mucʼʌch i ñopob ili mach bʌ i sujmic cʌntesa. Miʼ majlelob ti templo ti jujumpʼejl semana, o ti jujumpʼejl qʼuin, chaʼan miʼ melob jiñi cʌmbil bʌ bajcheʼ el sacrificio de la misa. b Cheʼ jaʼel, an ñopbalʌl tac mach bʌ tiʼ pejtelic ora miʼ cʼajtesañob i chʌmel Jesús, pero yonlel i wiñicob maʼañic miʼ chʼʌmbeñob i sujm chuqui yom i yʌl iliyi. Tajol an muʼ bʌ i cʼajtibeñob i bʌ: «¿Tiʼ sujm ba mucʼʌch i ñusʌntel c mul cheʼ tsaʼ chʌmi Jesús?». An muʼ bʌ i melbeñob i bʌ ili cʼajtiya come tsaʼ pʌsbentiyob chaʼan maʼañic miʼ ñusʌntel lac mul anquese tsaʼ chʌmi Jesús. I ¿chuqui an i meleyob jiñi i sujm bʌ xñoptʼañob?

6. ¿Chuqui tsiʼ chʼʌmbeyob i sujm junmojt xpejcaya bibliajob ti 1872?

⁶ Ti jiñi jabil majlel 1870, junmojt xpejcaya bibliajob, am bʌ tiʼ wenta Charles Russell, tsaʼ caji i tsajiñob (wen qʼuelob) jiñi i Tʼan Dios. Yomob i chʼʌmbeñob i sujm chucoch tsaʼ chʌmi Jesús yicʼot bajcheʼ yom miʼ cʼajtesañob jiñi i chʌmel. Ti 1872, jiñi Biblia tsiʼ coltayob i chʼʌmbeñob i sujm chaʼan Jesús tsiʼ yʌcʼʌ i bʌ ti chʌmel chaʼan miʼ toj lac mul. I maʼañic tsiʼ mucuyob jiñi tsaʼ bʌ i cʌñʌyob. Tsiʼ yʌcʼʌyob ti cʌñol ti libro, periódico yicʼot ti revista tac. Cheʼ jiñi, junsujtel jach ti jujumpʼejl jab tsaʼ caji i melob jiñi Conmemoración, cheʼ bajcheʼ tsiʼ meleyob jiñi xñoptʼañob ti ñaxam bʌ siglo.

7. ¿Bajcheʼ miʼ coltañonla pejtelel tsaʼ bʌ i tsajiyob jiñi ñaxam bʌ xpejcaya bibliajob?

⁷ ¿Bajcheʼ miʼ coltañonla pejtelel tsaʼ bʌ i meleyob jiñi xñoptʼañob ti wajali? Jehová tsiʼ yʌqʼueyob i bendición, i ti ili ora muqʼuix lac wen chʼʌmben i sujm chucoch tsiʼ yʌcʼʌ i bʌ ti chʌmel Jesús yicʼot pejtelel muʼ bʌ i mejlel lac taj (1 Juan 2:1, 2). Cheʼ jaʼel, tsaʼ laj cʌñʌ chaʼan an chaʼpʼejl pijtaya muʼ bʌ i yʌl jiñi Biblia tiʼ tojlel jiñi muʼ bʌ i jacʼbeñob  i tʼan Dios: An muʼ bʌ caj i tajob i cuxtʌlel ti panchan yicʼot yonlel miʼ mejlel i tajob i cuxtʌlel mach bʌ añic miʼ jilel ila ti Lum. I ñumen lʌcʼʌl mi la cubin lac bʌ tiʼ tojlel Jehová cheʼ bʌ mi lac wen ñaʼtan bajcheʼ cʼamel miʼ cʼuxbiñonla yicʼot bajcheʼ miʼ coltañonla cheʼ Jesús tsiʼ yʌcʼʌ i bʌ ti chʌmel (1 Ped. 3:18; 1 Juan 4:9). Jin chaʼan, mi lac pʌy yambʌ lac piʼʌlob ti Conmemoración, cheʼ bajcheʼ tsiʼ meleyob jiñi xñoptʼañob ti wajali, come cheʼʌch tiʼ subeyonla Jesús.

8. ¿Chuqui an i meleyob jiñi i wiñicob Jehová chaʼan miʼ pʌyob yambʌlob ti Conmemoración? (Qʼuele jiñi foto tac).

⁸ Jiñi i wiñiconbʌla Jehová cabʌlix jab cajel lac pʌy lac piʼʌlob ti Conmemoración. Ti 1881, ili revista tiʼ sube jiñi hermanojob ti Estados Unidos chaʼan miʼ tempañob i bʌ ti jumpʼejl otot ti Allegheny (Pensilvania) chaʼan miʼ melob ili tempa bʌ. Cheʼ jiñi, jujumpʼejlix congregación tsaʼ caji i bajñel mel i chaʼan. Pero ti marzo ti 1940 tsaʼ subenti jiñi publicadorob chaʼan miʼ mejlel i pʌyob pejtelel lac piʼʌlob yomoʼ bʌ cʼotel. I, ti 1960, Betel cojaxto tsiʼ chocbe majlel jiñi congregación tac jiñi invitación tac impreso bʌ. Cʼʌlʌl ti jimbʌ ora, jiñi i testigojonbʌla Jehová an lac pucu yonlel invitación. ¿Chucoch mi la cʌqʼuen tiempo yicʼot mi lac chaʼlen wersa chaʼan mi lac mel ili eʼtel (troñel)?

9, 10. ¿Majquiyob miʼ tajob i wenlel cheʼ mi lac chaʼlen wersa lac pʌy ti Conmemoración yambʌlob? (Juan 3:16).

⁹ Junchajp chucoch la com lac pʌy yambʌlob ti Conmemoración jiñʌch cheʼ la com miʼ ñumen cʌñob chuqui an i mele Jehová yicʼot Jesús ti lac tojlel (pejcan Juan 3:16). La com chaʼan jiñi muʼ bʌ i qʼuelob yicʼot miʼ ñʌchʼtañob ti jiñi acʼʌlel miʼ ñijcañob chaʼan  miʼ ñumen cʌñob Jehová i miʼ mulañob sujtel tiʼ wiñicob. Pero mach jiñob jach muʼ bʌ i tajob i wenlel cheʼ mi lac chaʼlen wersa lac pʌy yambʌlob.

¹⁰ Yambʌ muʼ bʌ lac pʌyob jiñobʌch jiñi inactivojob. Mi lac pʌyob ti Conmemoración chaʼan mi laj cʼajtesʌbeñob chaʼan Dios miʼ bej cʼuxbiñob. Wen tijicña mi la cubin cheʼ cabʌlob mucʼʌch i cʼotelob. Jiñi tempa bʌ miʼ cʼajtesʌbeñob jiñi tijicñʌyel tsaʼ bʌ i yubiyob cheʼ bʌ tsiʼ melbeyob i yeʼtel Jehová. Laʼ laj qʼuel tsaʼ bʌ ujti tiʼ tojlel Mónica. c Tsaʼ chaʼ caji ti subtʼan cheʼ bʌ an jiñi pandemia chaʼan COVID-19. Tsajñi ti jiñi Conmemoración cheʼ ti 2021 i tsiʼ yʌlʌ: «Tsaʼ c wen mulaj ili Conmemoración. Ti 20 jab cojaxto woli (choncol) c chaʼ suben wen tʼan jiñi lac piʼʌlob yicʼot tsaʼ c pʌyʌyob ti Conmemoración. Tiʼ pejtelel c pusicʼal tsaʼ c mele chaʼan mic pʌs bajcheʼ cʼamel mij qʼuel ti ñuc tsaʼ bʌ i mele Jehová yicʼot Jesús tic tojlel» (Sal. 103:1-4). Mach yʌlʌyic mi jiñi lac piʼʌlob miʼ jacʼob jiñi invitación o maʼañic, mi lac chaʼlen wersa chaʼan mi lac pʌyob come la cujil chaʼan Jehová miʼ qʼuel ti ñuc bajcheʼ mi lac chaʼlen wersa.

11. ¿Bajcheʼ an i yʌqʼueyonla i bendición Jehová cheʼ mi lac chaʼlen wersa lac pʌy yambʌlob ti Conmemoración? (Ageo 2:7).

¹¹ Jehová an i yʌcʼʌ i bendición cheʼ mi lac chaʼlen wersa chaʼan mi lac pʌy yambʌlob ti Conmemoración. Jumpʼejl ejemplo, anquese ti 2021 an jiñi pandemia chaʼan COVID-19, tsaʼ lac tempa lac bʌ ñumen ti 21 millón 367 mil 603 lac piʼʌlob. Ili ñumento tiʼ doblejlel jiñi i testigojob Jehová añoʼ bʌ tiʼ petol pañimil (mulawil). Jiñi ñumen ñuc bʌ i cʼʌjñibal tiʼ tojlel Jehová jiñʌch lac piʼʌlob, mach jiñic jaytiquil miʼ tempañob i bʌ (Luc. 15:7; 1 Tim. 2:3, 4). Tsiquil chaʼan Jehová miʼ cʼʌn jiñi subtʼan cheʼ tiʼ yorajlel jiñi Conmemoración chaʼan miʼ coltañonla lac taj lac piʼʌlob utsoʼ bʌ i pusicʼal (pejcan Ageo 2:7).

12. ¿Chuqui tac miʼ mejlel i mʌctañonla chaʼan maʼañic mi lac mel jiñi Conmemoración? (Qʼuele jiñi foto).

¹² Jesús tsiʼ yʌlʌ chaʼan ti jiñi cojix tac bʌ qʼuin mi caj lac taj wocol tac bajcheʼ tsʼaʼlentel ti lac familia, contrajintel, guerra tac yicʼot cʼamʌjel (Mat. 10:36; Mar. 13:9; Luc. 21:10, 11). Baqui jach bʌ wocol miʼ mejlel i mʌctañonla chaʼan maʼañic mi lac mel jiñi Conmemoración. ¿Chuqui an i meleyob jiñi hermanojob añoʼ bʌ i chaʼan ili wocol tac, i bajcheʼ an i coltayob Jehová?

13. ¿Bajcheʼ tsiʼ yʌcʼʌ i bendición Jehová tiʼ tojlel Artiom chaʼan tsaʼ bʌ i mele chaʼan miʼ mejlel i mel jiñi Conmemoración cheʼ bʌ yaʼan ti cárcel?

¹³ Jiñi cárcel. Jiñi hermanojob ñupʼuloʼ bʌ tiʼ caj chuqui miʼ ñopob miʼ chaʼleñob wersa chaʼan miʼ cʼajtesañob i chʌmel Cristo. Laʼ laj qʼuel tsaʼ bʌ ujti tiʼ tojlel Artiom. Tiʼ yorajlel jiñi Conmemoración ti 2020, an ti cárcel i mach wen colemic baqui tsaʼ otsʌnti, i joʼtiquilto miʼ yotsʌntelob yaʼi. Pero tsaʼʌch mejli i taj pejtelel muʼ bʌ i cʼʌjñel chaʼan jiñi Conmemoración yicʼot tsiʼ chajpa chaʼan miʼ bajñel ñusʌben i bʌ jiñi discurso. Pero i wocolel jiñʌch cheʼ jiñi yambʌlob yaʼ bʌ ñupʼulob mucʼob ti cʼujts i miʼ wen chaʼleñob tsucu tʼan. ¿Chuqui tsiʼ mele Artiom? Tiʼ subeyob mi mejl i cʌyob i ñucʼob cʼujts 1 hora yicʼot maʼañic miʼ chaʼleñob tsucu tʼan. Tsaʼʌch i jacʼʌyob. Artiom miʼ yʌl: «Tsaʼ c subeyob chaʼan miʼ mejlel c tsictesʌbeñob bajcheʼ miʼ mejlel jiñi Conmemoración». Tsiʼ yʌlʌyob chaʼan mach yomobic, pero cheʼ bʌ tsiʼ qʼueleyob bajcheʼ tsiʼ mele tsiʼ mulayob i ñumen cʌn.

14. ¿Chuqui tsiʼ mele jiñi i tejclum Jehová chaʼan miʼ mel jiñi Conmemoración anquese an jiñi pandemia chaʼan COVID-19?

 ¹⁴ Jiñi pandemia chaʼan COVID-19. Tiʼ caj jiñi pandemia, jiñi i tejclum Jehová maʼañic tsaʼ mejli i tempan i bʌ chaʼan miʼ mel jiñi Conmemoración. Pero jiñi maʼañic tsiʼ mʌctayonla. d Jiñi congregación tac añoʼ bʌ i chaʼan internet tsaʼ mejli i melob ti videoconferencia. Pero ¿bajcheʼ tsiʼ meleyob jiñi yambʌ hermanojob maʼañobic bʌ i chaʼan internet? An país tac baqui tsaʼ ñusʌnti jiñi discurso ti televisión o ti radio. Cheʼ jaʼel, jiñi sucursal tac tsiʼ chaʼle ti grabar ti ñumen ti 500 tʼan chaʼan miʼ mejlel i melob jiñi Conmemoración jiñi ñumen ñajt bʌ chumulob. I an hermanojob tsaʼ bʌ ñumi i cʌyob jiñi grabación tac.

15. ¿Chuqui mi laj cʌn tiʼ tojlel juntiquil estudiante i cʼabaʼ Sue?

¹⁵ Jiñi tsʼaʼlentel ti lac familia. Jiñi tsʼaʼlentel ti lac familia jiñʌch ñumen ñuc bʌ wocol am bʌ i tajayob chaʼtiqui uxtiquil chaʼan miʼ melob jiñi Conmemoración. Jiñʌch tsaʼ bʌ ujti tiʼ tojlel juntiquil estudiante i cʼabaʼ Sue.  Ti 2021, cheʼ an jachix yom jumpʼejl qʼuin chaʼan jiñi Conmemoración, Sue tiʼ sube jiñi muʼ bʌ i yʌqʼuen estudio chaʼan maʼañic mi caj i mejlel i mel jiñi Conmemoración come jiñi i familia maʼañic miʼ mulan. Jiñi hermana tsiʼ pejcʌbe Lucas 22:44. Tiʼ sube chaʼan, cheʼ bʌ an lac wocol, jiñi ñumen wem bʌ mi lac mel jiñʌch cheʼ mi lac lajin Jesús, mi lac pejcan Jehová ti oración yicʼot mi lac ñop chaʼan mi caj i coltañonla. Tiʼ yijcʼʌlel, Sue tsiʼ chajpa jiñi pan i tiʼ sʌcla jiñi vino, i tsiʼ qʼuele ti jw.org jiñi programa chaʼan adoración matutina. Cheʼ ti icʼan, tsiʼ ñupʼu i bʌ tiʼ cuarto i tsiʼ ñʌchʼta jiñi Conmemoración ti teléfono. Ti wiʼil, tsiʼ chocbe majlel mensaje jiñi muʼ bʌ i yʌqʼuen estudio: «Acʼbi tsaʼ wen coltayon. Tsaʼ c chaʼle wersa chaʼan maʼañic mic sʌt jiñi Conmemoración, i Jehová tsaʼʌch i coltayon. Wen tijicña mi cubin c bʌ». ¿Muʼ ba i mejlel i coltañet Jehová maʼ wʌl mi cheʼ woli (yʌquel) a ñusan bajcheʼ iliyi?

16. ¿Chucoch miʼ mejlel lac ñop chaʼan Jehová mi caj i yʌqʼueñonla i bendición cheʼ mi lac chaʼlen wersa chaʼan mi la cajñel ti Conmemoración? (Romanos 8:31, 32).

¹⁶ Jehová miʼ wen qʼuel ti ñuc cheʼ mi lac chaʼlen wersa chaʼan mi laj cʼajtesan i chʌmel i Yalobil. Miʼ mejlel lac ñop chaʼan mi caj i yʌqʼueñonla i bendición mi mucʼʌch lac chaʼlen wersa lac pʌs chaʼan mi laj qʼuel ti ñuc tsaʼ bʌ i mele ti lac tojlel (pejcan Romanos 8:31, 32). Mach la comic lac sʌt jiñi Conmemoración. Laʼ lac ñumen melben i yeʼtel Jehová tiʼ yorajlel jiñi Conmemoración ti ili jabil.