1. ¿Chucoch cabʌl lac piʼʌlob maʼañic miʼ ñopob muʼ bʌ i yʌl jiñi Biblia?

 TI ILI ora cabʌl lac piʼʌlob mach yujilobic majqui yom miʼ ñopbeñob i tʼan. Cabʌlob miʼ qʼuelob ti ñuc jiñi políticojob, jiñi científicojob yicʼot jiñi muʼ bʌ i melob (chaʼleñob) negocio tac, pero miʼ cʼajtibeñob i bʌ mi weñʌch chuqui yom i melob ili wiñicob. Cheʼ jaʼel, maʼañix miʼ wen qʼuelob ti ñuc jiñi añoʼ bʌ ñuc bʌ i yeʼtel ti ñopbalʌl. Jin chaʼan, maʼañix miʼ wen ñopob jaʼel ti jiñi Biblia, jiñi libro muʼ bʌ i poj tsajcañob jiñi ñucoʼ bʌ i yeʼtel ti ñopbalʌl.

2. Cheʼ bajcheʼ miʼ yʌl Salmo 119:160 (TNM), ¿chuqui yom mi lac ñop?

² Jiñi i wiñiconbʌla Jehová la cujil chaʼan «mach mejlic ti lot» yicʼot chaʼan tiʼ pejtelel ora yom chuqui wem bʌ chaʼañonla (Is. 48:17; Heb. 6:18). La cujil chaʼan mucʼʌch i mejlel lac ñop muʼ bʌ i yʌl jiñi Biblia come i sujmʌch pejtelel jiñi i tʼan (pejcan Salmo 119:160, TNM). b Cheʼʌch mi lac ñaʼtan bajcheʼ tiʼ tsʼijbu juntiquil biblista: «I sujmʌch pejtelel jiñi albil bʌ i chaʼan Dios yicʼot mucʼʌch i luʼ tsʼʌctiyel. Jiñi i tejclum Dios miʼ mejlel i ñop chuqui miʼ yʌl come miʼ ñopob jiñi Dios tsaʼ bʌ i yʌlʌ».

3. ¿Chuqui mi caj laj qʼuel ti ili estudio?

 ³ ¿Bajcheʼ miʼ mejlel laj coltan jiñi yambʌ lac piʼʌlob chaʼan miʼ ñopob jaʼel jiñi i Tʼan Dios? Laʼ laj qʼuel uxchajp: Maʼañic qʼuextʌyem muʼ bʌ i yʌl jiñi Biblia, jiñi i profecía tac mucʼʌch i tsʼʌctiyel tiʼ pejtelel ora yicʼot an i pʼʌtʌlel chaʼan miʼ qʼuextʌben i cuxtʌlel lac piʼʌlob.

4. ¿Chucoch an muʼ bʌ i ñaʼtañob chaʼan qʼuextʌyemʌch jiñi Biblia?

⁴ Jehová tsiʼ cʼʌñʌ 40 wiñicob chaʼan miʼ tsʼijbuñob jiñi Biblia. Pero ti ili ora maʼañix lac chaʼan jiñi tsʼijbujel tac original bʌ. Copia tac jach an. Jin chaʼan, cabʌlob miʼ cʼajtibeñob i bʌ mi jiñi muʼ bʌ i yʌl jiñi Biblia jiñʌch tsaʼ bʌ i tsʼijbuyob jiñi wiñicob. ¿Bajcheʼ miʼ mejlel lac ñaʼtan mi maʼañic qʼuextʌyem muʼ bʌ i yʌl jiñi Biblia?

5. ¿Bajcheʼ tsaʼ melbenti i copiajlel jiñi Tsʼijbujel hebreo? (Qʼuele jiñi dibujo am bʌ tiʼ tejchibal).

⁵ Jehová tsiʼ yʌlʌ chaʼan miʼ melbentel (pʌtbentel) i copiajlel jiñi i Tʼan chaʼan maʼañic chuqui miʼ chaʼlen. Tiʼ sube jiñi reyob ti Israel chaʼan miʼ melbeñob i copiajlel jiñi Mandar i chaʼan jiñi levitajob miʼ tsictesʌbeñob jiñi tejclum (Dt. 17:18; 31:24-26; Neh. 8:7). Cheʼ bʌ jiñi judíojob tsaʼix loqʼuiyob ti Babilonia, junmojt wiñicob tsaʼ caji i melbeñob cabʌl i copiajlel jiñi Tsʼijbujel hebreo (Esd. 7:6). Ili wiñicob tsaʼʌch i wen cʌntayob jiñi tsaʼ bʌ i meleyob. Ti wiʼil, tsaʼ caji i tsicob jiñi tʼan tac o letra tac chaʼan miʼ wen qʼuelob mi weñʌch woli (choncol) i melob jiñi eʼtel. Pero tsaʼʌch wersa ñajayiyob come xmulilob. Ti wiʼil, tsaʼ tajle baqui tsaʼ ñajayiyob come an yambʌ copia tac. Laʼ laj qʼuel bajcheʼ tsaʼ tajle.

6. ¿Bajcheʼ miʼ mejlel ti ñaʼtʌntel baqui tsaʼ ñajayiyob jiñi tsaʼ bʌ i melbeyob i copiajlel jiñi Biblia?

⁶ Jiñi biblistajob ili ora wen yujilob qʼuelol baqui tsaʼ ñajayiyob jiñi tsaʼ bʌ i melbeyob i copiajlel jiñi Biblia. Laʼcu lac ñaʼtan chaʼan 100 wiñicob miʼ subentelob i melbeñob i copiajlel jumpʼejl jun, i an juntiquil muʼ bʌ i ñajʌyel. ¿Bajcheʼ miʼ mejlel i cʌñob? Jiñʌch cheʼ miʼ lajob pejtelel jiñi copia tac. Cheʼʌch miʼ melob jaʼel jiñi expertojob, miʼ lajob pejtelel jiñi tsʼijbujel chaʼan miʼ tajob baqui tsaʼ ñajayiyob jiñi tsaʼ bʌ i melbeyob i copiajlel.

7. ¿Bajcheʼ la cujil chaʼan tsaʼʌch i wen cʌntayob bajcheʼ tsiʼ melbeyob i copiajlel jiñi Biblia?

⁷ Laʼ laj qʼuel jumpʼejl ejemplo muʼ bʌ i pʌs chaʼan jiñi tsaʼ bʌ i melbeyob i copiajlel jiñi Biblia tsaʼʌch i wen cʌntayob cheʼ bʌ tsiʼ meleyob jiñi eʼtel (troñel). Jiñi tsʼijbujel ñumen ñoxix bʌ chaʼan jiñi Tsʼijbujel hebreo jiñʌch jiñi Códice de Leningrado, tsaʼ bʌ mejli ti jiñi jabil 1008 o 1009. Pero añix ora tsaʼ tajle tsʼijbujel tac yicʼot i xujtʼil tac Biblia ñumen ñoxix bʌ bajcheʼ jiñi Códice de Leningrado come tsaʼ mejli cheʼ bʌ anto yom mil jab chaʼan miʼ loqʼuel jiñi Códice de Leningrado. Tajol an muʼ bʌ i ñaʼtan chaʼan tiʼ caj tsaʼ melbenti cabʌl i copiajlel ti jiñi mil jab, mach lajalic jiñi Códice de Leningrado yicʼot jiñi ñumen ñoxix bʌ tsʼijbujel tac. Pero mach cheʼiqui. ¿Chuqui tsiʼ tajayob i qʼuel jiñi especialistajob cheʼ bʌ tsiʼ lajayob ili ñoxix tac bʌ tsʼijbujel yicʼot jiñi yambʌ? Chaʼan maʼañic qʼuextʌyem chuqui miʼ yʌl jiñi Biblia anquese tsʼitaʼ qʼuexel bajcheʼ tsaʼ tsʼijbunti.

8. ¿Chuqui qʼuexel bʌ tiʼ copiajlel jiñi Tsʼijbujel griego yicʼot yan tac bʌ libro ñoxix bʌ?

⁸ Jiñi ñaxam bʌ xñoptʼañob cheʼʌch tsiʼ meleyob jaʼel bajcheʼ jiñi tsaʼ bʌ i wen melbeyob i copiajlel jiñi Tsʼijbujel hebreo i tsiʼ chaʼleyob wersa i melbeñob i copiajlel jiñi 27 libro  am bʌ ti Tsʼijbujel griego, tsaʼ bʌ i cʼʌñʌyob ti tempa bʌ yicʼot ti subtʼan. Juntiquil biblista tsiʼ laja jiñi Tsʼijbujel griego yicʼot jiñi libro tac am bʌ ti jimbʌ ora. Cheʼ bʌ tsiʼ taja ti tʼan i copiajlel jiñi Biblia, tsiʼ yʌlʌ: «Ili ora ñumen añix copia tac […] yicʼot ñumen tsʼʌcʌl». Jumpʼejl libro tsiʼ yʌlʌ tiʼ tojlel jiñi Tsʼijbujel griego: «Miʼ mejlel lac ñop chaʼan jiñi traducción muʼ bʌ lac pejcan ili ora jiñʌch miʼ yʌl jiñi tsaʼ bʌ i tsʼijbuyob jiñi Biblia ti wajali» (Anatomy of the New Testament).

9. ¿Chuqui miʼ pʌsbeñonla Isaías 40:8 chaʼan muʼ bʌ i yʌl jiñi Biblia?

⁹ Jiñi wem bʌ i yeʼtelob jiñi tsaʼ bʌ i melbeyob i copiajlel jiñi Biblia an i colta chaʼan tsʼʌcʌlʌch c yicʼot i sujmʌch muʼ bʌ lac pejcan. Tsiquil chaʼan Jehová tsiʼ chʼʌmʌ tiʼ wenta chaʼan maʼañic miʼ qʼuextʌyel jiñi i Tʼan (pejcan Isaías 40:8). Pero an muʼ bʌ i mejlel i yʌlob chaʼan jiñi Biblia mach tilemic ti Dios anquese maʼañic qʼuextʌyem chuqui miʼ yʌl. Laʼ laj qʼuel chuqui tac miʼ pʌs chaʼan tilemʌch ti Dios.

10. Alʌ jumpʼejl profecía tsaʼ bʌ tsʼʌctiyi yicʼot muʼ bʌ i pʌs chaʼan i sujmʌch muʼ bʌ i yʌl 2 Pedro 1:21 (qʼuele jiñi dibujo yicʼot foto).

¹⁰ Yaʼ ti Biblia an cabʌl profecía tac tsaʼ bʌ tsʼʌctiyi, i an wajalix bʌ tsaʼ wʌn tsʼijbunti. Jiñi historia miʼ pʌs chaʼan tsaʼʌch tsʼʌctiyi jiñi profecía tac. Cheʼʌch tsaʼ ujti bajcheʼ jiñi come la cujil chaʼan jiñi profecía tac tilem ti Jehová (pejcan 2 Pedro 1:21). Laʼ lac ñaʼtan cheʼ bʌ tsaʼ jisʌnti jiñi tejclum Babilonia. Cheʼ ti siglo 8, Jehová tsiʼ cʼʌñʌ jiñi xʼaltʼan Isaías chaʼan miʼ wʌn sub chaʼan Babilonia mi caj i jisʌntel. Isaías tsiʼ yʌlʌ chaʼan Ciro jiñʌch muʼ bʌ caj i jisan, i tsiʼ yʌlʌ bajcheʼ mi caj i mel (Is. 44:27-45:2). Cheʼ jaʼel, tsiʼ yʌlʌ chaʼan ti wiʼil maʼañix majqui mi caj i chumtʌl ti Babilonia (Is. 13:19, 20). I cheʼʌch tsaʼ luʼ ujti. Cheʼ ti jabil 539 jiñi medojob yicʼot jiñi persajob tsiʼ jisayob jiñi colem bʌ tejclum wen am bʌ i ñuclel ti ñaxan, ti  ili ora xajlel jach an (qʼuele jiñi video Jiñi Biblia tsiʼ yʌlʌ chaʼan Babilonia mi caj i jisʌntel, am bʌ ti jiñi punto 5 ti jiñi cʌntesʌntel 3 ti jiñi edición digital chaʼan jiñi libro Ubin a tijicñʌyel).

11. ¿Bajcheʼ woliʼ tsʼʌctiyel Daniel 2:41-43?

¹¹ Pero jiñi profecía tac am bʌ ti Biblia mach tsaʼ jach tsʼʌctiyi ti wajali. Ili ora woli (yʌquel) laj qʼuel ti tsʼʌctiyel yambʌ profecía tac. Jumpʼejl ejemplo, ñaʼtancu jiñi profecía am bʌ ti Daniel chaʼan jiñi yumʌntel baqui ochem Reino Unido yicʼot Estados Unidos (pejcan Daniel 2:41-43). Jiñi profecía miʼ yʌl chaʼan ili yumʌntel «an tsʼitaʼ i pʼʌtʌlel» bajcheʼ jiñi tsucu taqʼuin i «an i cʼunlel» bajcheʼ jiñi ocʼol. I jiñʌch woli bʌ laj qʼuel. Ili chaʼpʼejl país an i pʌsʌyob chaʼan pʼʌtʌlob bajcheʼ jiñi tsucu taqʼuin come tsiʼ chaʼleyob coltaya chaʼan miʼ mʌjlel jiñi chaʼpʼejl guerra mundial i bej cabʌlto i soldadojob. Pero jiñi lac piʼʌlob chumuloʼ bʌ yaʼi, miʼ melob marcha tac tiʼ contra jiñi empresa tac yicʼot tiʼ tojlel jiñi yumʌlob. Maxto wen jali juntiquil yujil bʌ chaʼan política tsiʼ yʌlʌ chaʼan Estados Unidos jumpʼejlʌch país wen tʼoxol bʌ tiʼ chaʼan bʌ política. ¿Ixcu jiñi Reino Unido? Ti jiñi jabil tac ñumen bʌ, cabʌl tʼox bʌ tiʼ caj bajcheʼ yilal añob yicʼot jiñi yambʌ país tac ti Europa. Tiʼ caj jiñi tʼox bʌ, an chuqui tac maʼañic miʼ mejlel i melob jiñi yumʌntel chaʼan Reino Unido yicʼot Estados Unidos.

12. ¿Bajcheʼ miʼ coltañonla jiñi profecía tac tsaʼix bʌ tsʼʌctiyi?

¹² Cheʼ la cujil chaʼan an profecía tac tsaʼ bʌ tsʼʌctiyi miʼ coltañonla lac ñumen ñop chaʼan mucʼʌch caj i tsʼʌctiyel jaʼel jiñi albil bʌ i chaʼan Dios chaʼan jiñi talto bʌ qʼuin. Cheʼ mi la cubin lac bʌ bajcheʼ juntiquil salmista tsaʼ bʌ i sube Jehová: «Wolic pijtañet jinto maʼ coltañon, pero xucʼul to c pusicʼal ti a tʼan muʼ bʌ caj ti tsʼʌctiyel» (Sal. 119:81). Yaʼ ti Biblia Jehová miʼ subeñonla chaʼan yom i yʌqʼueñonla jumpʼejl lac pijtaya (Jer. 29:11). Jiñi lac pijtaya yaʼ cʌyʌl ti jiñi albil tac bʌ i chaʼan Jehová, mach jiñic ti chuqui miʼ mel wiñicob. Laʼ lac bej chaʼlen wersa chaʼan mi lac tsajin (wen qʼuel) jiñi profecía tac chaʼan mi lac ñumen ñop jiñi i Tʼan Dios.

13. ¿Chucoch yambʌ mi lac ñop jiñi Biblia? (Salmo 119:66, 138).

¹³ Mi lac ñop ti jiñi Biblia jaʼel come miʼ coltan jiñi muʼ bʌ i jacʼob jiñi i ticʼojel (pejcan Salmo 119:66, 138). Jumpʼejl ejemplo, ili ora cabʌl ñujpuñemoʼ bʌ tijicñayob yicʼot temel añob anquese colelix i chaʼleñob i bʌ ti divorciar. I jiñi i yalobilob tijicñayob yicʼot cʼuxbibil miʼ yubiñob i bʌ (Efes. 5:22-29).

14. ¿Chuqui ti ejemplo miʼ pʌs chaʼan jiñi ticʼojel tac am bʌ ti Biblia miʼ coltañonla sujtel ti ñumen wem bʌ lac piʼʌl?

¹⁴ Jinto jaʼel jiñi jontoloʼ (mañajoʼ) bʌ miʼ mejlel i coltañob jiñi ticʼojel tac am bʌ ti Biblia. Laʼ laj qʼuel bajcheʼ tsiʼ colta Jack, d juntiquil tsaʼ bʌ wen ajñi ti cárcel. Wen jontol, i ti jiñi añoʼ bʌ ti cárcel jiñʌch ñumen bʌcʼñʌbil bʌ i tsaʼ aqʼuenti pena de muerte. Pero ti jumpʼejl bʌ qʼuin tsaʼ buchle i ñʌchʼtan jumpʼejl estudio woli bʌ i yʌjqʼuel. Jiñi i yutslel jiñi hermanojob tsaʼ cʼoti tiʼ pusicʼal, jin chaʼan tsaʼ caji i chʼʌm estudio. Cheʼ bʌ tsaʼ caji i jacʼ majlel jiñi ticʼojel tac am bʌ ti Biblia, tsaʼ qʼuextʌyi bajcheʼ yilal. Ti wiʼil tsaʼ sujti ti publicador i tsiʼ chʼʌmʌ jaʼ. Tsiʼ chaʼle wersa i suben jiñi yambʌ xcʌjchelob chaʼan bʌ jiñi i Yumʌntel Dios, i tsiʼ colta chʌntiquil wiñicob chaʼan miʼ cʌñob jiñi i sujmlel. Cheʼ bʌ tsaʼ cʼoti i yorajlel chaʼan miʼ  tsʌnsʌntel, Jack mach lajalix bajcheʼ ti ñaxan. Juntiquil i yabogado tsiʼ yʌlʌ: «Cheʼ bʌ tsaʼ j cʌñʌ Jack añix 20 jab, mach lajalic bajcheʼ wʌleʼli. Jiñi tsaʼ bʌ i cʌñʌ yicʼot jiñi i testigojob Jehová tsaʼʌch i qʼuextʌbe i cuxtʌlel». Anquese Jack tsaʼʌch tsʌnsʌnti, jiñi i yejemplo miʼ pʌs chaʼan mucʼʌch i mejlel lac ñop ti jiñi i Tʼan Dios yicʼot chaʼan an i pʼʌtʌlel chaʼan miʼ coltañonla ti sujtel ti ñumen wem bʌ quixtañu (Is. 11:6-9).

15. ¿Chucoch qʼuexelonla jiñi i wiñiconbʌla Jehová? (Qʼuele jiñi foto tac).

¹⁵ Jiñi i wiñiconbʌla Jehová an lac ñʌchʼtʌlel yicʼot juntemel añonla come mi lac jacʼ muʼ bʌ i yʌl jiñi Biblia (Juan 13:35; 1 Cor. 1:10). Ili wen utsʼatax come chumulonla ti jumpʼejl pañimil (mulawil) baqui an tʼox bʌ tiʼ caj jiñi política, chaʼan mach junlajalic i colorlel i pʌchʌlel jiñi lac piʼʌlob o tiʼ caj bajcheʼ yilal chumulonla. Juntiquil xcolel chʼoyol bʌ ti África i cʼabaʼ Jean tsiʼ wen mulaj cheʼ juntemel añonla. Cheʼ bʌ tsaʼ tejchi jumpʼejl guerra yaʼ tiʼ país, tsaʼ ochi bajcheʼ soldado, pero ti wiʼil tsaʼ majli ti putsʼel ti yambʌ país, baqui tsiʼ cʌñʌyob jiñi i testigojob Jehová. Jean miʼ yʌl: «Tsaʼ j cʌñʌ chaʼan jiñi ochemoʼ bʌ ti jiñi i sujm bʌ ñopbalʌl maʼañic miʼ yotsañob i bʌ ti política yicʼot maʼañic miʼ tʼoxob i bʌ. Miʼ cʼuxbiñob i bʌ tiʼ sujm». Miʼ bej al: «Tsaʼ c chaʼle wersa j coltan jiñi c país, pero cheʼ bʌ tsaʼ j cʌñʌ jiñi i sujmlel tsaʼ cʌcʼʌ c bʌ ti Jehová». Ili xcolel tsaʼʌch i wen qʼuexta i bʌ. Ili ora muqʼuix i sub jiñi wen tʼan chaʼan bʌ ñʌchʼtʌlel, i maʼañix miʼ contrajin jiñi mach bʌ lajalobic yicʼot. Cheʼ jiñi ticʼojel tac am bʌ ti Biblia wolʌch i wen coltan jiñi lac piʼʌlob miʼ pʌsbeñonla chaʼan mucʼʌch i mejlel lac ñop ti jiñi i Tʼan Dios.

16. ¿Chucoch yomʌch mi lac chaʼlen wersa lac ñumen ñop jiñi i Tʼan Dios?

¹⁶ Ili pañimil mi caj i ñumen asiyel majlel, i mi caj i qʼuejlel mi mucʼʌch lac ñop jiñi  i sujmlel. Tajol an muʼ bʌ caj i yʌlob chaʼan mach i sujmic muʼ bʌ i yʌl jiñi Biblia yicʼot chaʼan Jehová maʼañic tsiʼ waʼchoco jiñi xucʼul bʌ xyaj eʼtel chaʼan miʼ coltan i tejclum. Pero mi caj i lʌjtʼel lac chaʼan ili wocol tac mi mucʼʌch lac ñop chaʼan i sujmʌch chuqui miʼ yʌl jiñi i Tʼan Dios. La com lac chʌn jacʼben i mandar Jehová tiʼ pejtelel ora, cʼʌlʌl mi lac chʌmel (sajtel) (Sal. 119:112). Maʼañic mi laj quisñin lac suben yañoʼ bʌ jiñi i sujmlel yicʼot chaʼan mi laj coltañob i jacʼ jiñi ticʼojel tac am bʌ ti Biblia (Sal. 119:46). Cheʼ jaʼel, yicʼot lac pijt yicʼot lac tijicñʌyel mi caj lac lʌtʼ jiñi ñumen tsʌts tac bʌ wocol, bajcheʼ jiñi ticʼlʌntel (Col. 1:11; Sal. 119:143, 157).

17. ¿Chuqui mi caj i cʼajtesʌbeñonla jiñi texto chaʼan jabil 2023?

¹⁷ Mi lac wen qʼuel ti ñuc cheʼ bʌ Jehová tsiʼ coltayonla chaʼan mi laj cʌn jiñi i sujmlel. Anquese chumulonla ti jumpʼejl pañimil ñumen asiyemix bʌ, jiñi i sujmlel miʼ coltañonla, miʼ yʌqʼuen i sujmlel laj cuxtʌlel yicʼot miʼ pʌsbeñonla chuqui yom mi lac mel. Miʼ yʌqʼueñonla jumpʼejl lac pijtaya tiʼ Yumʌntel Dios. Laʼ i coltañonla jiñi texto tsaʼ bʌ yajcʌnti chaʼan jiñi jabil 2023 chaʼan mi lac ñumen ñop chaʼan i sujmʌch pejtelel chuqui miʼ yʌl jiñi i Tʼan Dios (Sal. 119:160, TNM).