1. ¿Chucoch jiñi Conmemoración jiñʌch wen ñuc bʌ qʼuin chaʼañonla? (Lucas 22:19, 20).

 JIÑI Conmemoración jiñʌch jiñi wen ñuc bʌ qʼuin chaʼan jiñi i testigojob Jehová. Cojach tsaʼ bʌ i yʌlʌ Jesús chaʼan yom miʼ mejlel (pejcan Lucas 22:19, 20). ¡Wen la comix chaʼan miʼ cʼotel jiñi qʼuin! Laʼ laj qʼuel chucoch.

2. ¿Chucoch wen la comix chaʼan miʼ cʼotel i qʼuiñilel jiñi Conmemoración?

² Jiñi Conmemoración miʼ coltañonla lac ñaʼtan pejtelel tsaʼ bʌ i mele Jehová yicʼot Jesús chaʼan miʼ locʼsañonla ti jiñi mulil yicʼot chʌmel (sajtel). I miʼ cʼajtesʌbeñonla bajcheʼ miʼ mejlel lac pʌs chaʼan mi lac wen qʼuel ti ñuc cheʼ Jesús tsiʼ yʌcʼʌ i cuxtʌlel (2 Cor. 5:14, 15). Miʼ yʌcʼ chaʼan temel mi la cajñel la quicʼot la quermañujob yicʼot mi lac ñuqʼuesʌben lac bʌ lac pusicʼal (Rom. 1:12). I ti jujumpʼejl jab cabʌl inactivojob miʼ cʼotelob ti jiñi Conmemoración, i cheʼ miʼ qʼuelob bajcheʼ miʼ pʌsbeñob i cʼuxbiya jiñi hermanojob miʼ ñijcʌbeñob i pusicʼal chaʼan miʼ chaʼ sujtelob ti Jehová. Cheʼ jaʼel, cabʌl lac piʼʌlob muʼ bʌ i cʼotelob ti jiñi qʼuin miʼ wen mulañob jiñi muʼ bʌ i qʼuelob yicʼot muʼ bʌ i yubiñob i miʼ techob estudio. Jin chaʼan mi lac wen qʼuel ti ñuc jiñi Conmemoración.

3. ¿Bajcheʼ miʼ pʌs jiñi Conmemoración chaʼan jiñi i tejclum Jehová temelʌch an? (Qʼuele jaʼel jiñi foto).

³ Cheʼ jaʼel, wen la comix chaʼan miʼ cʼotel jiñi qʼuin come yaʼʌch baqui mi laj qʼuel chaʼan jiñi i tejclum Jehová temelʌch an. Jiñi i testigojob Jehová tiʼ pejtelel pañimil miʼ tempañob i bʌ cheʼ bʌ wolix (choncolix) i bʌjlel jiñi qʼuin.  Ti lac pejtelel mi lac ñʌchʼtan jumpʼejl discurso baqui miʼ tsictesʌntel chucoch wen ñucʌch i cʼʌjñibal cheʼ tsaʼ tojle lac mul, mi laj cʼʌyin chaʼpʼejl cʼay, miʼ ñusʌntel jiñi pan yicʼot vino, i ti jiñi chʌmpʼejl oración muʼ bʌ i mejlel ti jumpʼejl lac pusicʼal mi la cʌl: «Amén». Ti jumpʼejl jach qʼuin cheʼʌch mi caj i mejlel ti pejtelel jiñi congregación tac tiʼ petol pañimil. Miʼ mejlel lac ñaʼtan chaʼan Jehová yicʼot Jesús wen tijicña miʼ yubiñob cheʼ bʌ mi la cʌqʼueñob i ñuclel.

4. ¿Chuqui mi caj laj qʼuel ti ili estudio?

⁴ Ti ili estudio mi caj lac jacʼ ili cʼajtiya tac: ¿Bajcheʼ miʼ mejlel lac chajpan lac pusicʼal chaʼan jiñi Conmemoración?, ¿bajcheʼ miʼ mejlel laj coltan yambʌ lac piʼʌlob chaʼan miʼ tajob i wenlel jaʼel?, ¿i bajcheʼ miʼ mejlel laj coltan jiñi inactivojoʼ bʌ? Cheʼ mi laj qʼuel iliyi mi caj i coltañonla chaʼan chajpʌbilonla ti jiñi bʌ qʼuin.

¿BAJCHEʼ MIʼ MEJLEL LAC CHAJPAN LAC PUSICʼAL CHAʼAN JIÑI CONMEMORACIÓN?

5. a) ¿Chucoch yomʌch mi lac wen ñaʼtan tsaʼ bʌ i mele Jesús ti lac tojlel? (Salmo 49:7, 8). b) Alʌ chuqui tsaʼ cʌñʌ ti jiñi video ¿Chucoch tsaʼ chʌmi Jesús?

⁵ Junchajp ñuc bʌ i cʼʌjñibal bajcheʼ mi lac chajpan lac pusicʼal chaʼan jiñi Conmemoración jiñʌch cheʼ mi lac wen ñaʼtan chaʼan wen ñucʌch tsaʼ bʌ i mele Jesús chaʼan miʼ locʼsañonla ti mulil yicʼot chʌmel, tsiʼ yʌcʼʌ i cuxtʌlel chaʼañonla. Iliyi maʼañic baʼ ora mi caj i mejlel lac mel ti lac bajñelil (pejcan Salmo 49:7, 8; qʼuele jaʼel jiñi video ¿Chucoch tsaʼ chʌmi Jesús?). a Jin chaʼan, Jehová tsiʼ ñaʼta chaʼan jiñi cʼuxbibil bʌ i yalobil miʼ yʌcʼ i cuxtʌlel chaʼañonla, i wen lets tsiʼ tojoyob (Rom. 6:23). Cheʼ mi lac ñumen ñaʼtan tsaʼ bʌ i mele Jehová yicʼot Jesús chaʼañonla, ñumento mi caj laj qʼuel ti ñuc jiñi i tojol laj coltʌntel. Wʌle mi caj laj qʼuel chuqui tsiʼ meleyob Jehová yicʼot Jesús ti lac tojlel. Pero mi caj lac ñaxan al chuqui yom i yʌl jiñi i tojol laj coltʌntel.

6. ¿Bajcheʼ tsiʼ tojo Jehová jiñi laj coltʌntel?

⁶ Jehová tsiʼ cʼʌñʌ jiñi i cuxtʌlel Jesús chaʼan miʼ chaʼ mʌn jiñi tsaʼ bʌ i sʌtʌ Adán. Adán juntiquilʌch toj bʌ wiñic cheʼ bʌ tsaʼ mejli, pero cheʼ bʌ tsiʼ chaʼle mulil maʼañix tsaʼ mejli ti chumtʌl tiʼ pejtelel ora i cheʼʌch jaʼel jiñi i yalobilob. Jin chaʼan, Jesús tsiʼ yʌcʼʌ i bʌ ti chʌmel chaʼan i tojol jiñi laj coltʌntel, i cheʼ bajcheʼ jiñi miʼ mejlel lac chaʼ taj tsaʼ bʌ sajti. Cheʼ bʌ Jesús tsajñi wʌʼ ti Pañimil «maʼañic tsiʼ wis chaʼle mulil i mi tsaʼic i chaʼle lot» (1 Ped. 2:22). Cheʼ bʌ tsaʼ chʌmi mach xmulilic, jin chaʼan jiñi i cuxtʌlel lajalʌch bajcheʼ jiñi tsaʼ bʌ i sʌtʌ Adán (1 Cor. 15:45; 1 Tim. 2:6).

7. Alʌ chuqui tac ti wocol tsiʼ ñusa Jesús.

⁷ Cheʼ bʌ Jesús wʌʼan ti Pañimil, tsiʼ jacʼbe i tʼan Jehová anquese tsiʼ ñusa cabʌl wocol. Cheʼ bʌ chutto tsiʼ jacʼbe i tʼan i tat i ñaʼ anquese xmulilob (Luc. 2:51). Cheʼ bʌ woli (yʌquel) i taj majlel i colel, tajol wocolʌch tsiʼ yubi tiʼ tojlel yambʌlob, tajol tsaʼ subenti chaʼan miʼ ñusʌben i tʼan i tat i ñaʼ o chaʼan miʼ mel mach bʌ weñic. I cheʼ bʌ ñuquix, Satanás tsiʼ ñopo i lotin chaʼan miʼ yʌqʼuen i chʼijyemlel Jehová (Mat. 4:1-11). Yom bʌ Satanás jiñʌch chaʼan Jesús miʼ chaʼlen mulil i cheʼ bajcheʼ jiñi maʼañix miʼ tsʼʌctesan jiñi tsaʼ bʌ tili i mel.

8. ¿Chuqui yambʌ wocol tac tsiʼ ñusa Jesús?

⁸ Jesús tsaʼʌch i ñusa yan tac bʌ wocol. Jumpʼejl ejemplo, tsiʼ taja i contrajob i tsiʼ ñopoyob i tsʌnsan (Luc. 4:28, 29; 13:31). Cheʼ jaʼel, jiñi xcʌntʼañob i chaʼan cabʌl jax i sajtemalob (Mar. 9:33, 34). I cheʼ bʌ tsiʼ chucuyob,  tsiʼ wen jatsʼʌyob yicʼot tsiʼ wajleyob. Ti wiʼil, cheʼ bʌ tiʼ tsʌnsayob lajal bajcheʼ juntiquil xujchʼ tsiʼ meleyob i tsiʼ wen ubi wocol (Heb. 12:1-3). Cheʼ bʌ muqʼuix caj i chʌmel, i bajñel jach tsiʼ cuchu jiñi wocol come Jehová tsiʼ cʌyʌ i coltan (Mat. 27:46). b

9. ¿Bajcheʼ yubil mi la cubin cheʼ mi lac ñaʼtan tsaʼ bʌ i mele Jesús ti lac tojlel? (1 Pedro 1:8).

⁹ Tsiquil chaʼan Jesús wen lets tsiʼ tojo chaʼan miʼ coltañonla. Cheʼ mi lac ñaʼtan pejtelel tsaʼ bʌ i mele chaʼañonla, muʼto i ñijcan lac pusicʼal i mi lac wen cʼuxbin (pejcan 1 Pedro 1:8).

10. ¿Wocol ba tsiʼ yubi Jehová chaʼan miʼ yʌcʼ i yalobil, chucoch?

¹⁰ Ixcu Jehová, ¿mach ba wocolic tsiʼ yubi chaʼan miʼ yʌcʼ i yalobil bajcheʼ i tojol laj coltʌntel? Cheʼ bajcheʼ la cujil, Jehová yicʼot Jesús wen lʌcʼʌl añob (Pr. 8:30). Jin chaʼan, miʼ mejlel lac ñaʼtan chaʼan wen chʼijyemʌch tsiʼ yubi cheʼ bʌ tsiʼ qʼuele chaʼan Jesús woliʼ ñusan wocol wʌʼ ti Pañimil. Wen cʼuxʌch tsiʼ yubi cheʼ bʌ tsiʼ qʼuele chaʼan tsiʼ wen ticʼlayob, tiʼ tsʼaʼleyob yicʼot tsiʼ yʌqʼueyob i yubin cabʌl wocol.

11. ¿Chuqui miʼ coltañonla lac ñaʼtan bajcheʼ tsiʼ yubi i bʌ Jehová cheʼ bʌ tsaʼ tsʌnsʌnti i Yalobil?

¹¹ Jiñi am bʌ majqui chʌmen i yalobil yujil chaʼan wen cʼuxʌch ti lac pusicʼal cheʼ bʌ miʼ yujtel bajcheʼ jiñi. Anquese la cujil chaʼan mucʼʌch caj i chaʼ chʼojyel, mach yomic i yʌl chaʼan mach cʼuxic mi la cubin. Iliyi miʼ coltañonla lac chʼʌmben i sujm bajcheʼ tsiʼ yubi i bʌ Jehová ti jiñi bʌ qʼuin cheʼ bʌ tsaʼ tsʌnsʌnti jiñi i Yalobil (Mat. 3:17). c

12. ¿Bajcheʼ miʼ mejlel lac chajpan lac bʌ cheʼ anto yom chaʼan jiñi Conmemoración?

¹² Cheʼ bʌ anto yom chaʼan jiñi Conmemoración miʼ mejlel a tech a qʼuel tema tac chaʼan bʌ jiñi i tojol laj coltʌntel yaʼ ti a chʼujutesaya ti familia o cheʼ bʌ maʼ bajñel chaʼlen estudio. Cʼʌñʌ jiñi Coltʌntel chaʼan estudio o yambʌ lac jun tac chaʼan maʼ ñumen cʌn chaʼan ili tema. d Cheʼ jaʼel, pejcan jiñi texto tac yom bʌ miʼ pejcʌntel tiʼ yorajlel jiñi Conmemoración muʼ bʌ i tilel yaʼ ti lac Jun chaʼan lac tempa bʌ I Subtʼan yicʼot i Melbal jiñi xÑoptʼan. I mach ñajʌyic a qʼuel jiñi chʼujutesaya ti sʌcʼan tiʼ qʼuiñilel jiñi Conmemoración. Mi mucʼʌch lac wʌn chajpan lac pusicʼal chaʼan ili qʼuin,  mi caj i mejlel laj coltan yambʌlob (Esd. 7:10).

LAʼ LAJ COLTAN YAÑOʼ BɅ CHAʼAN MIʼ TAJOB I WENLEL JAʼEL

13. ¿Chuqui yom bʌ mi lac mel chaʼan mi laj coltan yañoʼ bʌ chaʼan miʼ tajob i wenlel ti jiñi Conmemoración?

¹³ ¿Bajcheʼ miʼ mejlel laj coltan yambʌlob chaʼan miʼ tajob i wenlel jaʼel? Yom mi lac chaʼleñob ti invitar. Mach cojach yom mi lac puc jiñi invitación cheʼ mi lac chaʼlen subtʼan, miʼ mejlel lac mel jumpʼejl lista chaʼan majqui yambʌ mi lac mulan lac pʌyob, tajol lac familia, lac piʼʌlob ti eʼtel (troñel), lac piʼʌlob ti escuela o laj cʌñʌyoʼ bʌ. I mi tsaʼ jili lac invitación, miʼ mejlel lac chocbeñob majlel jumpʼejl enlace ti internet. ¡Mach la cujilic jaytiquil mi caj i cʼotelob! (Ec. 11:6).

14. ¿Chuqui miʼ pʌs chaʼan machʌch toʼolic cheʼ mi la cʌqʼuen jumpʼejl invitación juntiquil laj cʌñʌ bʌ?

¹⁴ Mach lac ñaʼtan chaʼan mach wersajix yom mi la cʌqʼuen jumpʼejl invitación juntiquil laj cʌñʌ bʌ. Ñaʼtancu tsaʼ bʌ ujti tiʼ tojlel juntiquil hermana cheʼ bʌ jiñi i ñoxiʼal tsiʼ yʌlʌ chaʼan mi caj i majlel yicʼot ti jiñi Conmemoración. Tsaʼ toj sajti i pusicʼal, ¿chucoch? Come mach junsujtel jach an i lon pʌyʌ majlel, pero maʼañic baʼ i jacʼʌ. Ixcu wʌle, ¿chucoch tsiʼ yʌlʌ chaʼan yomʌch majlel? Come juntiquil anciano i cʌñʌ bʌ tsiʼ yʌqʼue jumpʼejl invitación. Jin chaʼan, cʼʌlʌl ti jimbʌ ora tsiʼ teche majlel ti Conmemoración.

15. ¿Chuqui yom mi laj cʼajtesan cheʼ an majqui mi lac pʌy ti Conmemoración?

¹⁵ Laʼ laj cʼajtesan chaʼan cheʼ bʌ an majqui mi lac pʌy ti Conmemoración tajol añʌch i cʼajtiya tac, ñumento mi cojaxto woliʼ majlel. Jin chaʼan yom mi lac ñaʼtan chuqui mi caj lac suben (Col. 4:6). Tajol miʼ cʼajtiben i bʌ: «¿Chuqui miʼ mejlel yaʼi? ¿Jaypʼejl hora miʼ jalʼan? ¿Bajcheʼ yilal yom jiñi c pislel? ¿Tojbil ba? ¿Muʼ ba i cʼajtintel taqʼuin?». Jin chaʼan, miʼ mejlel laj cʼajtiben mi an i cʼajtiya tac i mi lac tsictesʌben. Miʼ mejlel laj cʼʌn jaʼel jiñi video Laʼ laj cʼajtesan i chʌmel Jesús yicʼot ¿Chuqui miʼ mejlel yaʼ ti i Yotlel Tempa bʌ? Cheʼ  jaʼel, yaʼ ti libro Ubin a tijicñʌyel ti cʌntesʌntel 28, miʼ yʌjlel chaʼpʼejl uxpʼejl muʼ bʌ i mejlel lac tsictesʌben jiñi lac piʼʌl.

16. ¿Chuqui tac yambʌ tajol miʼ cʼajtiben i bʌ jiñi muʼ bʌ i cʼotel ti Conmemoración?

¹⁶ Cheʼ bʌ tsaʼix ñumi jiñi Conmemoración, tajol jiñi tsaʼ bʌ lac pʌyʌ anto i cʼajtiya tac. Tajol miʼ cʼajtiben i bʌ chucoch maʼañic majqui tsiʼ cʼuxu jiñi pan yicʼot tsiʼ japʌ jiñi vino, o maʼañic jaytiquil. Tajol miʼ cʼajtiben i bʌ jaysujtel miʼ mejlel jiñi Conmemoración yicʼot mi lajal jach miʼ mejlel ti jiñi yan tac bʌ tempa bʌ. Anquese iliyi mucʼʌch i tsictesʌntel yaʼ ti discurso chaʼan Conmemoración, tajol yomto miʼ ñumen tsictesʌbentel. Chaʼan miʼ mejlel lac jacʼben i cʼajtiya tac miʼ mejlel laj cʼʌn jiñi tema «¿Chucoch jiñi i testigojob Jehová mach cheʼic miʼ cʼajtesañob i chʌmel Jesús cheʼ bajcheʼ yan tac bʌ ñopbalʌl?» am bʌ ti jw.org. La com lac chaʼlen wersa laj coltan jiñi yomoʼ bʌ i cʌn i sujmlel chaʼan miʼ tajob i wenlel ti jiñi Conmemoración (Hech. 13:48).

LAʼ LAJ COLTAN JIÑI INACTIVOJOʼ BɅ

17. ¿Chuqui miʼ mejlel i melob jiñi ancianojob chaʼan miʼ coltañob jiñi inactivojoʼ bʌ? (Ezequiel 34:12, 16).

¹⁷ ¿Chuqui miʼ mejlel i melob jiñi ancianojob chaʼan miʼ coltañob jiñi inactivojoʼ bʌ tiʼ yorajlel jiñi Conmemoración? Yom miʼ pʌsbeñob i yutslel yicʼot chaʼan mucʼʌch i qʼuelob ti ñuc (pejcan Ezequiel 34:12, 16). Ancianojob, cheʼ bʌ anto yom chaʼan jiñi Conmemoración, chaʼlenla wersa laʼ pejcan jiñi inactivojoʼ bʌ. Subenla chaʼan mucʼʌch laʼ qʼuelob ti ñuc yicʼot chaʼan laʼ wom laʼ coltañob. Pʌyʌla ti Conmemoración i mi mucʼʌch i cʼotelob, pʌsʌla laʼ cʼuxbiya. I cheʼ bʌ tsaʼix ñumi jiñi Conmemoración, bej pejcanla yicʼot julaʼtanla ili hermanojob i aqʼuenla jiñi coltaya i cʼʌjñibal bʌ i chaʼañob chaʼan miʼ chaʼ sujtelob ti Jehová (1 Ped. 2:25).

18. ¿Bajcheʼ miʼ mejlel laj coltan jiñi inactivojoʼ bʌ? (Romanos 12:10).

¹⁸ Ti lac pejtelel miʼ mejlel laj coltan jiñi inactivojoʼ bʌ muʼ bʌ i cʼotelob ti Conmemoración. ¿Bajcheʼ? Jiñʌch cheʼ mi lac pʌsbeñob  laj cʼuxbiya, la cutslel yicʼot chaʼan mi laj qʼuelob ti ñuc (pejcan Romanos 12:10). Laʼ laj cʼajtesan chaʼan ili cʼuxbibil bʌ hermanojob tajol wocolʌch tsiʼ yubiyob chaʼan miʼ chaʼ majlelob ti tempa bʌ. Tajol tsiʼ ñaʼtayob chuqui mi caj i melob jiñi hermanojob cheʼ yaʼix añob. e Jin chaʼan, yom mi laj cʌntan lac bʌ chaʼan maʼañic mi laj cʼajtibeñob muʼ bʌ i mejlel i yʌqʼueñob i chʼijyemlel (1 Tes. 5:11). La quermañujobʌch jaʼel i tijicña mi la cubin cheʼ mi lac chaʼ tem chʼujutesan Jehová yicʼotob (Sal. 119:176; Hech. 20:35).

19. ¿Baqui bʌ i wenlel cheʼ mi laj cʼajtesan cheʼ tsaʼ chʌmi Jesús?

¹⁹ Weñʌch cheʼ Jesús tiʼ subeyonla chaʼan ti jujumpʼejl jab mi laj cʼajtesan cheʼ bʌ tsaʼ chʌmi, i mi lac chʼʌmben i sujm chucoch wen ñuc i cʼʌjñibal cheʼ mi lac mel. Cheʼ bʌ mi lac majlel ti Conmemoración cabʌl bajcheʼ miʼ coltañonla, i cheʼ jaʼel miʼ coltan yambʌ lac piʼʌlob (Is. 48:17, 18). Miʼ coltañonla chaʼan mi lac ñumen cʼuxbin Jehová yicʼot Jesús, mi lac pʌs chaʼan mi lac wen qʼuel ti ñuc tsaʼ bʌ i meleyob yicʼot miʼ ñumen temonla. I miʼ mejlel laj coltan yambʌ lac piʼʌlob chaʼan miʼ ñaʼtañob chuqui yom miʼ melob chaʼan miʼ tajob jiñi bendición tac muʼ bʌ lac taj cheʼ tsaʼ tojle lac mul. Jin chaʼan, laʼ lac chaʼlen wersa lac chajpan lac bʌ chaʼan jiñi Conmemoración, jiñi wen ñuc bʌ qʼuin ti ili jabil.