1, 2. ¿Chuqui ti wocol miʼ mejlel lac ñusan jiñi muʼ bʌ lac melben i yeʼtel Jehová?

 TI LAC pejtelel mi lac mejlel ti waʼ tajtʌl ti wocol. Laʼ laj qʼuel ejemplo tac. Juntiquil hermano i cʼabaʼ Luis, a tsaʼ subenti chaʼan an i chaʼan cáncer i maʼañix jaypʼejl uw cuxul. Monika tijicña woli (choncol) i melben i yeʼtel Jehová yicʼot i ñoxiʼal, anciano bʌ ti congregación, pero ti jumpʼejl bʌ qʼuin tsaʼ cʼoti i qʼuel chaʼan woliʼ mel mach tac bʌ weñic. Olivia, juntiquil hermana i bajñelto bʌ, ti ora jach tsaʼ putsʼi loqʼuel tiʼ yotot tiʼ caj jiñi huracán. Ti ora jach miʼ mejlel ti qʼuextʌyel jiñi laj cuxtʌlel. Ixcu jatet, ¿woli baʼ ñusan jaʼel bajcheʼ iliyi?

² Jiñi muʼ bʌ lac melben i yeʼtel (troñel) Jehová mi lac ñusan wocol tac jaʼel yicʼot mi laj cʼamʼan, lajal bajcheʼ jiñi yambʌ lac piʼʌlob. Cheʼ jaʼel, mi lac tsʼaʼlentel i mi lac ticʼlʌntel. Jehová maʼañic miʼ mʌctan chaʼan maʼañic mi lac ñusan ili wocol tac, pero an i yʌcʼʌ i tʼan chaʼan mi caj i coltañonla (Is. 41:10). Tiʼ coltaya Jehová maʼañic mi caj lac sʌt lac tijicñʌyel, wen jach chuqui mi caj lac yajcan lac mel yicʼot xucʼul mi caj la cajñel anquese woli (yʌquel) lac ñusan tsʌts tac bʌ wocol. Ti ili estudio mi caj laj qʼuel chʌnchajp muʼ bʌ i mel Jehová chaʼan miʼ coltañonla lac lʌtʼ jiñi wocol tac. Cheʼ jaʼel, mi caj  laj qʼuel chuqui yom mi lac mel chaʼan mi lac taj laj coltʌntel.

JEHOVÁ MI CAJ I CɅNTAÑONLA

3. ¿Chuqui miʼ mejlel ti ujtel cheʼ woli lac ñusan tsʌts bʌ wocol?

³ Mi woli lac ñusan tsʌts tac bʌ wocol tajol maʼañix mi caj lac wen ñaʼtan chuqui yom mi lac mel, ¿chucoch? Come tajol wen chʼijyemonla i woli lac wen chaʼlen pensar. Cheʼʌch tsiʼ yubiyob i bʌ jiñi chaʼtiquil hermanajob tsaʼ bʌ ajliyob yaʼ ti ñaxam bʌ párrafo. Olivia miʼ yʌl: «Cheʼ bʌ jiñi huracán tsiʼ jeme cotot, tsaʼ c wen chaʼle pensar i maʼañic tsaʼ c ñaʼta chuqui yom mic mel». Monika miʼ yʌl jaʼel: «Cheʼ bʌ jiñi c ñoxiʼal tsiʼ mele tsʼiʼlel, tsaʼ c wen ubi c chʼijyemlel, lajal bajcheʼ tsiʼ sʌl jecʼbeyon c pusicʼal, i maʼañix chuqui com c mel ti jujumpʼejl qʼuin. Maʼañic tsaʼ c ñaʼta chaʼan cheʼ mi caj cujtel bajcheʼ jiñi». ¿Chuqui mi caj i mel Jehová chaʼan miʼ coltañonla lac lʌtʼ jiñi tsʌts tac bʌ wocol?

4. ¿Chuqui muʼ bʌ i subeñonla Jehová ti Filipenses 4:6, 7?

⁴ Muʼ bʌ i mel Jehová. Miʼ yʌcʼ i tʼan chaʼan mi caj i yʌqʼueñonla i ñʌchʼtʌlel (pejcan Filipenses 4:6, 7). Ili miʼ coltañonla chaʼan wen jach mi la cubin lac bʌ i chaʼan maʼañic mi lac chaʼlen bʌqʼuen come lʌcʼʌl an la quicʼot Jehová. Jiñi Biblia miʼ yʌl chaʼan mi juntiquilic lac piʼʌl miʼ mejlel i chʼʌmben i sujm jiñi ñʌchʼtʌlel muʼ bʌ i yʌcʼ Dios. ¿Am ba a wen mele oración baqui maʼ luʼ suben Jehová bajcheʼ yubil maʼ wubin a bʌ i ti wiʼil maʼ wubin a ñʌchʼtʌlel? Jiñi tsaʼ bʌ a wubi jiñʌch i ñʌchʼtʌlel Dios.

5. ¿Bajcheʼ miʼ cʌntan lac pensar yicʼot lac pusicʼal jiñi i ñʌchʼtʌlel Dios?

⁵ Ti Filipenses 4:7 miʼ yʌl chaʼan jiñi i ñʌchʼtʌlel Dios miʼ cʌntan lac pusicʼal yicʼot lac ñaʼtʌbal. Jiñi tʼan «cʌntan» miʼ cʼʌjñel chaʼan miʼ yʌjlel jiñi soldadojob muʼ bʌ i cʌntañob jumpʼejl tejclum. Jiñi yaʼ bʌ chumulob wen miʼ wʌyelob come yujilob chaʼan cʌntʌbil jiñi tejclum. Cheʼʌch jaʼel jiñi i ñʌchʼtʌlel Dios, miʼ cʌntan lac pusicʼal yicʼot lac ñaʼtʌbal, i cʌntʌbil mi la cubin lac bʌ (Sal. 4:8). Anquese jiñi wocol maʼañic miʼ seb tojʼan, miʼ mejlel lac taj lac ñʌchʼtʌlel, cheʼ bajcheʼ tsaʼ ujti tiʼ tojlel Ana (1 S. 1:16-18). Cheʼ bajcheʼ jiñi, mach wocolic mi caj la cubin chaʼan wen jach chuqui mi lac ñaʼtan yicʼot chuqui mi lac yajcan lac mel.

6. ¿Chuqui yom mi lac mel chaʼan mi la cubin i ñʌchʼtʌlel Dios? (Qʼuele jaʼel jiñi foto).

⁶ Yom bʌ mi lac mel. Lajal bajcheʼ jiñi chumuloʼ bʌ ti jumpʼejl tejclum miʼ cʼajtibeñob juntiquil soldado chaʼan miʼ cʌntañob, joñonla jaʼel miʼ mejlel laj cʼajtiben Jehová  chaʼan miʼ cʌntañonla. Laʼ lac chʌn melben oración jinto mi la cubiben i ñʌchʼtʌlel Dios (Luc. 11:9; 1 Tes. 5:17). Jiñʌch tsaʼ bʌ i mele Luis yicʼot Ana. Cheʼ bʌ tsaʼ subenti Luis chaʼan mach jalix cuxul, miʼ yʌl chuqui tsaʼ ujti: «Wocol mi la cubin chaʼan mi lac ñaʼtan chuqui mi caj lac mel yicʼot chuqui ti tratamiento mi caj lac chʼʌm, pero jiñi oración tsaʼʌch i wen coltayon lon chaʼan mic taj lon c ñʌchʼtʌlel». Ana yicʼot Luis tsiʼ yʌlʌyob chaʼan tsiʼ wen meleyob oración, tsiʼ cʼajtibeyob Jehová chaʼan miʼ yʌqʼueñob i ñʌchʼtʌlel yicʼot i ñaʼtʌbal, i chaʼan wen chuqui miʼ yajcañob i mel. Tsiʼ yubiyob chaʼan Jehová tsaʼʌch i coltayob. Mi jatet woli a ñusan wocol jaʼel, chʌn mele oración i mi caj a qʼuel bajcheʼ Jehová miʼ yʌqʼueñet a ñʌchʼtʌlel, miʼ cʌntan a pusicʼal yicʼot a ñaʼtʌbal (Rom. 12:12).

JEHOVÁ MI CAJ I XUCʼCHOCOÑONLA

7. ¿Bajcheʼ yubil miʼ mejlel la cubin lac bʌ cheʼ woli lac ñusan tsʌts bʌ wocol?

⁷ Cheʼ bʌ woli lac ñusan jumpʼejl tsʌts bʌ wocol, tajol mach cujchix mi la cubin i maʼañix mi lac ñaʼtan chuquito yom mi lac mel. Lajalonla yubil bajcheʼ juncojt barco muʼ bʌ i tajtʌl ti tsʌts bʌ icʼ jaʼal, jiñi jaʼ miʼ jatsʼ i miʼ wen ñijcan, i tajol cheʼʌch mi la cubin lac bʌ. Jiñʌch tsaʼ bʌ ujti tiʼ tojlel Ana cheʼ bʌ tsaʼ chʌmi (sajti) i ñoxiʼal. Tsiʼ yʌlʌ: «An i tajol wen chʼijyem mi cubin c bʌ, i muʼto c michʼan quicʼot Luis come tsiʼ bajñel cʌyʌyon». Ana an i tajol i bajñel miʼ yubin i bʌ come ti ñaxan jiñʌch Luis muʼ bʌ i luʼ chʼʌm ti wenta chaʼan miʼ qʼuel chuqui tac yom melol. Lajal bajcheʼ an tiʼ yojlil tsʌts bʌ icʼ jaʼal tsiʼ yubi i bʌ. ¿Bajcheʼ miʼ coltañonla Jehová cheʼ mi la cujtel bajcheʼ iliyi i mach cujchix mi la cubin?

8. ¿Chuqui miʼ subeñonla Jehová ti 1 Pedro 5:10?

⁸ Muʼ bʌ i mel Jehová. Jehová miʼ yʌcʼ i tʼan chaʼan mi caj i xucʼchocoñonla (pejcan 1 Pedro 5:10). Pero añʌch chuqui yom mi lac mel, ¿chuquiyes? Anquese mi lac ñusan tsʌts bʌ wocol, yomʌch mi lac bej chaʼlen wersa. Laʼcu lac ñaʼtan juncojt barco, cheʼ bʌ miʼ tajtʌl ti tsʌts bʌ icʼ jaʼal, jiñi jaʼ miʼ mejlel i xewulan. Pero chaʼan maʼañic miʼ yujtel bajcheʼ iliyi, an chuqui miʼ yotsʌbentel tiʼ chaʼwejlel jiñi barco muʼ bʌ i coltan chaʼan mach cʌlʌxic miʼ ñijcan i bʌ. Pero chaʼan miʼ mejlel i coltan ti wen, jiñi barco mach yomic miʼ waʼtʌl, yomʌch miʼ bej chaʼlen xʌmbal majlel. Cheʼʌch yom mi lac mel jaʼel, mach yomic mi laj cʌy lac melben i yeʼtel Jehová anquese woli lac ñusan tsʌts bʌ wocol.

9. ¿Bajcheʼ miʼ coltañonla pejtelel am bʌ i yʌqʼueyonla jiñi i yorganización Jehová? (Qʼuele jaʼel jiñi foto).

 ⁹ Yom bʌ mi lac mel. Cheʼ bʌ jiñi wocol tac miʼ chilbeñonla lac tijicñʌyel, mach laj cʌy lac mel oración, jiñi tempa bʌ yicʼot subtʼan. Tajol machʌch mejlic a mel cheʼ bajcheʼ cʼamel a wom o cheʼ bajcheʼ ti ñaxan, pero cʼajtesan chaʼan Jehová miʼ chʼʌmbeñet i sujm (laja yicʼot Lucas 21:1-4). Cheʼ jaʼel, laʼ lac chaʼlen wersa chaʼan mi lac chaʼlen estudio yicʼot mi lac wen ñaʼtan muʼ bʌ lac pejcan. Jiñi organización cabʌl chuqui an i mele chaʼan miʼ coltañonla, an lac chaʼan jiñi aplicación JW Library^®, jiñi Índice de las publicaciones Watch Tower yicʼot jiñi Coltʌntel chaʼan estudio. Jiñʌch muʼ bʌ i mel Monika cheʼ bʌ mach tijicñayic miʼ yubin i bʌ. Miʼ sʌclan tema tac muʼ bʌ i yʌl chaʼan jiñi michʼajel, lotintel o chaʼan bʌ jiñi xucʼtʌlel. Monika miʼ yʌl: «Cheʼ bʌ wolito c sʌclan jiñi información mach tijicñayoñic, yomix loqʼuel c pusicʼal yubil, pero cheʼ bʌ miʼ yujtel c pejcan mi cubin c ñʌchʼtʌlel. Lajal bajcheʼ Jehová woliʼ mecʼon yubil. I cheʼ bʌ wolito c pejcan majlel, mi cubin chaʼan Jehová wolʌch i chʼʌmbeñon i sujm yicʼot chaʼan wolʌch i coltañon». Jehová miʼ mejlel i coltañet jaʼel chaʼan jiñi wocol tac maʼañic miʼ junyajl chilbeñet a tijicñʌyel (Sal. 119:143, 144).

JEHOVÁ MIʼ CHUCONLA

10. ¿Bajcheʼ yubil mi la cubin cheʼ bʌ mi lac ñusan wocol?

¹⁰ Cheʼ bʌ woli lac ñusan tsʌts bʌ wocol an qʼuiñil mi la cubin lac chʼijyemlel yicʼot maʼañix lac pʼʌtʌlel. Lajal bajcheʼ juntiquil xʼajñel muʼ bʌ i lojwel, mach ti orajix miʼ cajel ti ajñel, joñonla jaʼel an i tajol maʼañix mi caj lac mulan lac mel jiñi muʼ bʌ lac mulan ti ñaxan. Cheʼ bajcheʼ Elías, tajol mach la comic tejchel i bej wʌyel jach la com (1 R. 19:5-7). ¿Bajcheʼ mi caj i coltañonla Jehová cheʼ bʌ maʼañix lac pʼʌtʌlel mi la cubin?

11. ¿Chuqui miʼ mel Jehová chaʼan miʼ coltañonla? (Salmo 94:18).

¹¹ Muʼ bʌ i mel Jehová. Mi caj i coltañonla (pejcan Salmo 94:18). Cheʼ bajcheʼ juntiquil xʼajñel muʼ bʌ i lojwel yom miʼ coltʌntel chaʼan miʼ mejlel i ñijcan i bʌ, tajol joñonla jaʼel yom mi laj coltʌntel chaʼan mi lac bej melben i yeʼtel Jehová. Jin chaʼan, Jehová miʼ subeñonla: «Joñon a Yumon, a Dioson. Mi caj c chuquet ti ñoj bʌ a cʼʌb. Mach a chaʼlen bʌqʼuen, come mi caj j coltañet» (Is. 41:13). Cheʼ bʌ jiñi rey David woliʼ ñusan wocol yicʼot woliʼ contrajintel, tsiʼ qʼuele chaʼan  Jehová yaʼʌch an yicʼot, jin chaʼan tsiʼ yʌlʌ: «Maʼ chucon ti a cʼʌb chaʼan maʼanic mic yajlel» (Sal. 18:35). Pero ¿bajcheʼ miʼ chuconla Jehová?

12. ¿Majqui miʼ cʼʌn Jehová chaʼan miʼ coltañonla cheʼ bʌ chʼijyem mi la cubin lac bʌ?

¹² Jehová miʼ chuconla ti laj cʼʌb cheʼ bʌ miʼ cʼʌn yambʌ lac piʼʌlob chaʼan miʼ coltañonla. Ti jumpʼejl bʌ qʼuin, David wen chʼijyem tsiʼ yubi i bʌ, pero Jonatán tsaʼ majli i julaʼtan chaʼan miʼ ñuqʼuesʌben i pusicʼal (1 S. 23:16, 17). Cheʼ jaʼel, Jehová tsiʼ cʼʌñʌ Eliseo chaʼan miʼ coltan Elías (1 R. 19:16, 21; 2 R. 2:2). Ti lac tojlel, Jehová miʼ cʼʌn jiñi lac familia, la camigojob yicʼot jiñi ancianojob chaʼan miʼ coltañoñobla. I sujmʌch chaʼan cheʼ chʼijyem mi la cubin lac bʌ lac bajñel la com ajñel. Pero ¿chuqui yom mi lac mel chaʼan Jehová miʼ coltañonla?

13. ¿Chuqui yom mi lac mel chaʼan Jehová mucʼʌch i mejlel i coltañonla? (Qʼuele jaʼel jiñi foto).

¹³ Yom bʌ mi lac mel. Laʼ lac chaʼlen wersa chaʼan maʼañic mi lac ñajtʼesan lac bʌ tiʼ tojlel yambʌyob. Mi cheʼ mi lac mel, mi caj lac wen ubin lac chʼijyemlel, mi caj lac bajñel ñaʼtan lac bʌ yicʼot jiñi lac wocol tac, i jiñi miʼ mejlel i yʌqʼueñonla lac mel mach bʌ weñic (Pr. 18:1). An i tajol la com bajñel ajñel, ñumento cheʼ bʌ woli lac ñusan wocol. Pero mach yomic mi lac ñajtʼesan lac bʌ tiʼ tojlel yambʌyob, come lajal bajcheʼ mach la comic lac jacʼben i coltaya Jehová. Anquese wocolʌch, laʼ lac jacʼ cheʼ jiñi lac familia, la camigojob yicʼot jiñi ancianojob miʼ coltañoñobla. Laʼ lac ñaʼtan chaʼan jiñʌch muʼ bʌ i cʼʌn Jehová chaʼan miʼ coltañonla (Pr. 17:17; Is. 32:1, 2).

JEHOVÁ MI CAJ I ÑUQʼUESAN LAC PUSICʼAL

14. ¿Chuqui miʼ mejlel i bʌcʼtesañonla?

¹⁴ An i tajol, ti lac pejtelel mi lac chaʼlen bʌqʼuen. Ti wajali, an i wiñicob Dios tsaʼ bʌ i chaʼleyob bʌqʼuen chaʼan woliʼ ñusañob wocol o añob i contrajintel (Sal. 18:4; 55:1, 5). ¿Ixcu joñonla? Tajol mi laj contrajintel tiʼ tojlel lac piʼʌlob ti escuela, ti eʼtel, ti lac familia o ti añoʼ bʌ i yeʼtel. O tajol an tsʌts bʌ a cʼamʌjel i a wujil chaʼan maʼañix mi caj a bej cuch. Tajol cheʼ mi la cubin lac bʌ bajcheʼ juntiquil alʌl mach bʌ yujilic chuqui yom miʼ mel. ¿Chuqui miʼ mel Jehová chaʼan miʼ coltañonla?

15. Cheʼ bajcheʼ miʼ yʌl Salmo 94:19, ¿chuqui mi caj i mel Jehová?

¹⁵ Muʼ bʌ i mel Jehová. Miʼ ñuqʼuesan lac pusicʼal  (pejcan Salmo 94:19). Laʼ lac ñaʼtan tiʼ tojlel juntiquil alʌ xchʼoc. Miʼ chaʼlen bʌqʼuen come wen an chajc i maʼañic miʼ mejlel ti wʌyel. Pero jiñi i papá miʼ tejchel i miʼ majlel i mecʼ, jiñi alʌ xchʼoc miʼ chaʼ wʌyel i maʼañix chuqui miʼ bʌcʼñan. Tajol joñonla jaʼel la com chaʼan jiñi lac Tat am bʌ ti panchan miʼ mecʼonla cheʼ bʌ woliyonla ti bʌqʼuen. Pero ¿chuqui yom mi lac mel?

16. Mi la com chaʼan Jehová miʼ ñuqʼuesan lac pusicʼal, ¿chuqui yom mi lac mel? (Qʼuele jaʼel jiñi foto).

¹⁶ Yom bʌ mi lac mel. Ñuc i cʼʌjñibal cheʼ ñʌmʌl lac ñusan qʼuin la quicʼot Jehová, ¿bajcheʼ? Jiñʌch cheʼ mi lac pejcan ti oración yicʼot mi lac pejcʌben i tʼan, jiñi Biblia (Sal. 77:1, 12-14). Cheʼ bajcheʼ jiñi, cheʼ woli lac ñusan wocol tajol ñaxan mi caj lac sʌclan i coltaya Jehová. Laʼ lac suben chuqui mi lac pensarin yicʼot chuqui mi lac bʌcʼñan, i laʼ la cʌcʼ chaʼan miʼ jacʼbeñonla yicʼot miʼ ñuqʼuesan lac pusicʼal (Sal. 119:28). Yaʼ ti Biblia miʼ mejlel lac taj muʼ bʌ i mejlel i ñuqʼuesan lac pusicʼal cheʼ woli lac ñusan wocol, bajcheʼ jiñi libro chaʼan Job, Salmos, Proverbios yicʼot jiñi tsaʼ bʌ i yʌlʌ Jesús yaʼ ti capítulo 6 chaʼan Mateo. Mi mucʼʌch a mel oración yicʼot maʼ pejcan jiñi Biblia, mi caj a qʼuel bajcheʼ miʼ ñuqʼuesan a pusicʼal Jehová.

17. ¿Chuqui yom chʌn cʼajal lac chaʼan?

¹⁷ Miʼ mejlel lac ñop chaʼan Jehová maʼañic mi caj i cʌyonla cheʼ bʌ wen wocol woli lac ñusan, mi caj i yajñel yicʼotonla chaʼan miʼ coltañonla (Sal. 23:4; 94:14). Laʼ laj cʼajtesan, Jehová tsiʼ yʌcʼʌ i tʼan chaʼan mi caj i cʌntañonla, mi caj i xucʼchocoñonla, mi caj i chuconla yicʼot mi caj i ñuqʼuesan lac pusicʼal. Isaías tiʼ sube Jehová: «Jatet c Yum maʼ cʌntʌben i pusicʼal jini muʼ bʌ i ñopet chaʼan ñʌchʼʌl miʼ yajñel muʼ bʌ i chʌn ñaʼtañet» (Is. 26:3). Ñopo ti Jehová i jacʼʌ jiñi coltʌntel muʼ bʌ i yʌqʼueñet. Mi cheʼʌch maʼ mel, mi caj a taj a pʼʌtʌlel chaʼan maʼ lʌtʼ jiñi ñumen tsʌts tac bʌ wocol.