1. ¿Bajcheʼ yilal Jehová maʼ ñaʼtan?

 ¿AM BAʼ ñopo a ñaʼtan bajcheʼ yilal Jehová? Tajol an a mele iliyi cheʼ bʌ maʼ mel oración. Anquese maʼañic miʼ mejlel laj qʼuel, jiñi Biblia miʼ yʌl bajcheʼ yilal. Jumpʼejl ejemplo, miʼ yʌl chaʼan «lac Mʌctʌjibʌch, lac Sʌclelʌch», i cheʼ jaʼel miʼ yʌl chaʼan «lajal bajcheʼ cʼajc muʼ bʌ i jisañonla» (Sal. 84:11; Heb. 12:29). Jiñi xʼaltʼan Ezequiel tsaʼ pʌsbenti chaʼan Jehová wen tsʼʌylaw i cʼʌcʼal i buchul ti jumpʼejl trono melbil bʌ ti zafiro, i yaʼ tiʼ joytʌlel an jumpʼejl arcoiris (Ez. 1:26-28). Cheʼ bʌ mi lac ñaʼtan bajcheʼ yilal Jehová, tajol muʼto i toj sajtel lac pusicʼal.

2. ¿Chucoch an wocol bʌ miʼ yubiñob chaʼan miʼ lʌcʼtesañob i bʌ ti Dios?

² Tajol wocol mi la cubin chaʼan mi lac ñop chaʼan Jehová miʼ cʼuxbiñonla come maʼañic mi lac taj laj qʼuel. O tajol mi jiñi lac papá lac mamá maʼañic tsiʼ cʼuxbiyonla, mi lac ñaʼtan chaʼan Jehová maʼañic ba ora mi caj i cʼuxbiñonla jaʼel. Pero Jehová miʼ chʼʌmben i sujm bajcheʼ yubil mi la cubin lac bʌ yicʼot an tac bʌ lac ñusa. Chaʼan miʼ coltañonla lac ñop chaʼan mucʼʌch i cʼuxbiñonla, tsiʼ yʌcʼʌ ti tsʼijbuntel ti Biblia muʼ bʌ i pʌsbeñonla chaʼan juntiquilʌch Dios wen uts bʌ.

3. ¿Chucoch mi caj lac taj ti tʼan Jehová yicʼot i cʼuxbiya?

³ Jehová cʼuxbiyajʌch, jiñʌch muʼ bʌ i yʌl jiñi Biblia: «Dios cʼuxbiyajʌch» (1 Juan 4:8). Pejtelel chuqui miʼ mel chaʼañʌch i cʼuxbiya. I come wen cabʌl jax i cʼuxbiya yicʼot wen pʼʌtʌl, muʼto i tajob jaʼel jiñi maʼañic bʌ miʼ ñopob tiʼ tojlel (Mat. 5:44, 45). Ti ili estudio mi caj lac ñumen cʌn tiʼ tojlel Jehová yicʼot chaʼan i cʼuxbiya, cheʼ bajcheʼ jiñi mi caj lac ñumen cʼuxbin.

JEHOVÁ MIʼ WEN CʼUXBIÑONLA

4. ¿Bajcheʼ yubil maʼ wubin a bʌ cheʼ maʼ ñaʼtan chaʼan Jehová wen yujil cʼuxbiya? (Qʼuele jaʼel jiñi foto).

⁴ «Jehová wen yujil cʼuxbiya» (Sant. 5:11). Jiñi Biblia miʼ yʌl chaʼan lajal bajcheʼ juntiquil ñaʼʌl muʼ bʌ i wen cʼuxbin i yalobil (Is. 66:12, 13). Ñaʼtancu tiʼ tojlel juntiquil ñaʼʌl muʼ bʌ i wen cʌntan i yalobil, miʼ mecʼ, miʼ yʌcʼ tiʼ pix yicʼot utsʼatax miʼ pejcan.  Cheʼ bʌ jiñi alʌl miʼ chaʼlen uqʼuel o an chuqui cʼux miʼ yubin, ti ora miʼ majlel i qʼuel. Cheʼʌch miʼ mel Jehová jaʼel, mi caj i yajñel yicʼotonla cheʼ bʌ chʼijyemonla. Jin chaʼan jiñi salmista tiʼ tsʼijbu: «Cheʼ woliyon ti tsic pusicʼal chaʼan cabʌl chuqui mic ñaʼtan, maʼ ñuqʼuesʌbeñon c pusicʼal» (Sal. 94:19).

5. ¿Chuqui yom i yʌl chaʼañet jiñi i cʼuxbiya Jehová?

⁵ Jehová xucʼulʌch (Éx. 34:6). Maʼañic miʼ cʌy i cʼuxbiñonla anquese mi lac mel mach bʌ weñic. Cheʼʌch tsaʼ ujti tiʼ tojlel jiñi israelitajob, anquese mach junsujtelic jach tsiʼ yʌqʼueyob i chʼijyemlel Jehová, tsiʼ bej cʼuxbiyob cheʼ bʌ tsiʼ qʼuele chaʼan tsaʼʌch i chaʼ ñaʼtayob i bʌ. Junsujtel tiʼ sube jiñi tejclum: «Cʼuxbibiletla c chaʼan, [ . . . ] utsʼatax mij qʼuelet. Ñuquet tic wut» (Is. 43:4, 5). Jehová maʼañic qʼuextʌyem, miʼ mejlel lac ñop chaʼan miʼ cʼuxbiñonla jaʼel. Jinto mi tsaʼ lac mele mach bʌ weñic, maʼañic mi caj i cʌyonla. Mi mucʼʌch lac chaʼ ñaʼtan lac bʌ yicʼot mi lac sʌclan i coltaya, mi caj i bej cʼuxbiñonla. Miʼ yʌcʼ i tʼan chaʼan mi caj i ñusan lac mul tiʼ pejtelel i pusicʼal (Is. 55:7). Cheʼ jaʼel, jiñi Biblia miʼ yʌl chaʼan cheʼ bʌ Jehová miʼ ñusan lac mul, miʼ yʌqʼueñonla lac ñʌchʼtʌlel (Hech. 3:19).

6. ¿Chuqui miʼ pʌsbeñonla Zacarías 2:8 tiʼ tojlel Jehová?

⁶ (Pejcan Zacarías 2:8, TNM). a Jehová miʼ yʌl chaʼan lajalonla bajcheʼ i bʌcʼ i wut. ¿Chucoch? Jiñi lac wut wen ñuc i cʼʌjñibal ti lac bʌcʼtal, i chuqui jach miʼ tsʼitaʼ cʼotel miʼ mejlel i low, jin chaʼan mi lac wen cʌntan. Miʼ mejlel la cʌl chaʼan lajal bajcheʼ Jehová woli (choncol) i subeñonla: «Mi an majqui miʼ lowetla, joñon woliʼ lowon mi cubin». Jehová miʼ cʼuxbiñonla, jin chaʼan cʼux miʼ yubin cheʼ an chuqui mi lac chaʼlen i yom i cʌntañonla. Cheʼ bʌ mi lac ñusan wocol, miʼ mejlel laj cʼajtiben chaʼan miʼ cʌntañonla cheʼ bajcheʼ miʼ cʌntan i wut (Sal. 17:8).

7. ¿Chucoch yomʌch mi lac ñop chaʼan Jehová mucʼʌch i cʼuxbiñonla?

⁷ Jehová yom chaʼan maʼ ñop chaʼan mucʼʌch i cʼuxbiñet, pero miʼ chʼʌmben i sujm cheʼ an i tajol wocol maʼ wubin tiʼ caj chuqui tsaʼ ñusa wajali o woli bʌ a ñusan ili ora. Pero yomʌch maʼ chaʼlen wersa a ñop chaʼan mucʼʌch i cʼuxbiñet. ¿Chuqui mi caj i coltañet? Jiñʌch cheʼ maʼ  qʼuel bajcheʼ an i pʌsʌ chaʼan miʼ cʼuxbin Jesús, jiñi muʼ bʌ caj i majlelob ti panchan yicʼot joñonla. Jiñʌch muʼ bʌ caj laj qʼuel ti ili estudio.

JEHOVÁ MIʼ PɅS I CʼUXBIYA

8. ¿Chucoch Jesús tsaʼʌch i wen ñopo chaʼan Jehová mucʼʌch i cʼuxbin?

⁸ Jehová yicʼot Jesús wen temel añob yicʼot miʼ wen cʼuxbiñob i bʌ. Jiñobʌch jiñi chaʼtiquil ñumen wajalix bʌ lajal añob. Ti Mateo 17:5, Jehová tsiʼ yʌlʌ chaʼan miʼ wen cʼuxbin Jesús. Mach tsaʼic jach i yʌlʌ chaʼan utsʼat miʼ qʼuel, tsiʼ yʌlʌ jaʼel chaʼan jiñʌch cʼuxbibil bʌ i yalobil come yom chaʼan mi lac ñaʼtan bajcheʼ cʼamel miʼ cʼuxbin yicʼot chaʼan mucʼʌch i wen qʼuel ti ñuc (Efes. 1:7). Jesús tsaʼʌch i ñopo chaʼan Jehová mucʼʌch i wen cʼuxbin, jin chaʼan mach junsujtelic jach tsiʼ yʌlʌ chaʼan miʼ wen cʼuxbintel (Juan 3:35; 10:17; 17:24).

9. ¿Bajcheʼ yilal jiñi i cʼuxbiya Jehová tiʼ tojlel jiñi yajcʌbiloʼ bʌ? (Romanos 5:5).

⁹ Jehová miʼ pʌsben i cʼuxbiya jaʼel jiñi yajcʌbiloʼ bʌ chaʼan miʼ majlelob ti panchan (pejcan Romanos 5:5). Ti griego, ili versículo miʼ pʌs chaʼan Jehová miʼ wen cʼuxbin jiñi yajcʌbiloʼ bʌ come miʼ lajeʼ i cʼuxbiya Jehová bajcheʼ pʼʌtʌl bʌ jaʼ woli bʌ (yʌquel bʌ) ti ajñel. Jin chaʼan, jiñi muʼ bʌ caj i majlelob ti panchan yujilob chaʼan cʼuxbibilob ti Dios (Jud. 1). Lajal miʼ yubiñob i bʌ bajcheʼ tsiʼ yʌlʌ jiñi apóstol Juan: «¡Qʼuelela bajcheʼ cʼamel miʼ cʼuxbiñonla jiñi Tatʌl, jin chaʼan muʼto lac subentel tiʼ yalobilob Dios!» (1 Juan 3:1). ¿Pero cojach ba miʼ cʼuxbin Jehová jiñi muʼ bʌ caj i majlelob ti panchan? Maʼañic, mi caj laj qʼuel chaʼan miʼ cʼuxbiñonla ti lac pejtelel.

10. ¿Bajcheʼ tsiʼ pʌsʌ Jehová chaʼan miʼ wen cʼuxbiñonla?

¹⁰ Jiñi ñumen ñuc bʌ bajcheʼ miʼ pʌsbeñonla i cʼuxbiya Jehová jiñʌch cheʼ tsiʼ yʌcʼʌ i yalobil. Ili miʼ pʌs chaʼan maʼañic yambʌ muʼ bʌ i mejlel i cʼuxbiñonla cheʼ bajcheʼ Jehová (Juan 3:16; Rom. 5:8). Jehová tsiʼ yʌcʼʌ i Yalobil chaʼan miʼ chʌmel ti laj caj i cheʼ bajcheʼ jiñi mi lac ñusʌbentel lac mul yicʼot mi lac mejlel ti sujtel tiʼ yamigo (1 Juan 4:10). Cheʼ bʌ mi lac wen ñaʼtan bajcheʼ cʼamel tsiʼ meleyob Jesús yicʼot Jehová ti lac tojlel, mi lac ñumen chʼʌmben i sujm chaʼan mucʼʌch i wen cʼuxbiñonla ti jujuntiquil (Gál. 2:20). Jehová tsiʼ mele iliyi mach chaʼañic jach yom i tsʼʌctesan jumpʼejl mandar, chaʼañʌch miʼ cʼuxbiñonla. Cheʼ bʌ tsiʼ yʌcʼʌ chaʼan jiñi i Yalobil miʼ yubin wocol yicʼot miʼ chʌmel ti laj caj, tsiʼ pʌsʌ chaʼan miʼ cʼuxbiñonla.

11. ¿Chuqui miʼ pʌsbeñonla Jeremías 31:3?

¹¹ Tsaʼix laj qʼuele chaʼan Jehová mach muqʼuic jach i yʌl chaʼan miʼ cʼuxbiñonla, miʼ pʌsbeñonla jaʼel (pejcan Jeremías 31:3). Jin chaʼan, tsiʼ lʌcʼtesayonla tiʼ tojlel (laja yicʼot Deuteronomio 7:7, 8). Maʼañic chuqui o majqui mi caj i mejlel i ñajtʼesañonla tiʼ tojlel Jehová (Rom. 8:38, 39). Cheʼ a wujil iliyi, ¿bajcheʼ yubil maʼ wubin a bʌ? Wʌle mi caj lac pejcan jiñi Salmo 23, i cheʼ bʌ woli lac pejcan majlel, qʼuele bajcheʼ tsiʼ colta David jiñi i cʼuxbiya Jehová i bajcheʼ miʼ mejlel i coltañet jaʼel.

¿BAJCHEʼ YUBIL MAʼ WUBIN CHEʼ MAʼ ÑAʼTAN BAJCHEʼ CʼAMEL MIʼ CʼUXBIÑET JEHOVÁ?

12. ¿Chuqui miʼ yʌl jiñi Salmo 23?

¹² (Pejcan Salmo 23:1-6). Ti Salmo 23, David tsiʼ yʌlʌ chaʼan miʼ wen ñop chaʼan Jehová miʼ cʼuxbin yicʼot chaʼan woliʼ wen cʌntan. Yaʼi tsiʼ yʌlʌ chaʼan Jehová jiñʌch jiñi xcʌnta tʌñʌmeʼ yicʼot chaʼan i yamigojʌch. David yujil chaʼan Jehová woliʼ cʌntan, i jin chaʼan tiʼ sʌcla i coltʌntel. Yujil chaʼan jiñi i cʼuxbiya Jehová mi caj i yajñel yicʼot tiʼ pejtelel ora. Laʼ laj qʼuel chucoch David tsiʼ wen ñopo ti Dios.

13. ¿Bajcheʼ yujil David chaʼan Jehová tsaʼʌch i cʌnta?

¹³ «Maʼanic chuqui anto yom c chaʼan». David  tsiʼ yubi chaʼan Jehová tsaʼʌch i wen cʌnta come tiʼ pejtelel ora tsiʼ yʌqʼue chuqui i cʼʌjñibal i chaʼan. Cheʼ jaʼel, yujil chaʼan i yamigojʌch i chaʼan utsʼat miʼ qʼuel. Jin chaʼan wen yujil chaʼan Jehová mi caj i chʼʌm tiʼ wenta chaʼan mi caj i yʌqʼuen chuqui i cʼʌjñibal i chaʼan, mach yʌlʌyic chuqui miʼ yujtel. Tsiʼ ñopo chaʼan jiñi i cʼuxbiya Jehová ñumen ñucto bajcheʼ jiñi i wocol tac, i jiñi tsiʼ yʌqʼue i tijicñʌyel (Sal. 16:11).

14. ¿Bajcheʼ miʼ pʌsbeñonla i cʼuxbiya Jehová?

¹⁴ Jehová miʼ wen cʌntañonla, ñumento cheʼ bʌ woli lac ñusan wocol tac. Jiñʌch tsaʼ bʌ ujti tiʼ tojlel Claire, b añix bʌ 20 jab i cajel i melben i yeʼtel (troñel) Jehová ti Betel. Claire miʼ yʌl chaʼan jiñi i familia tsaʼ caji i wen taj wocol. Jiñi i papá tsiʼ yʌqʼue jumpʼejl infarto cerebral, tsaʼ chaʼlenti ti expulsar i yijtsʼin, wocol tsaʼ caji i ñusañob chaʼan taqʼuin yicʼot tsiʼ sʌtʌyob i yotot. ¿Bajcheʼ tsiʼ pʌsʌ Jehová chaʼan wolʌch i cʌntañob? Claire miʼ yʌl: «Jehová tsiʼ chʼʌmʌ tiʼ wenta c familia i tsiʼ yʌqʼue chuqui i cʼʌjñibal i chaʼañob, an i tajol ñumento tsiʼ yʌqʼueyob cheʼ bajcheʼ tsaʼ c ñaʼta. Wen lotol tic pusicʼal bajcheʼ tsiʼ wen pʌsʌ i cʼuxbiya Jehová, i mic chʌn cʼajtesan. Jiñi miʼ coltañon chaʼan mic bej chaʼlen wersa cheʼ bʌ woli c ñusan wocol».

15. ¿Bajcheʼ tsiʼ chaʼ taja i pʼʌtʌlel David? (Qʼuele jaʼel jiñi dibujo).

¹⁵ «Miʼ chaʼ xucʼchocobeñon c pusicʼal [o miʼ chaʼ pʼʌtʼesañon]». Cheʼ bʌ David woliʼ wen ñusan wocol, an i tajol wen chʼijyem tsiʼ yubi i bʌ (Sal. 18:4-6). Pero cheʼ tsiʼ yubibe i cʼuxbiya Jehová, tsiʼ chaʼ taja i pʼʌtʌlel. Jin chaʼan, David tsiʼ yubi chaʼan Jehová, jiñi i yamigo, lajal bajcheʼ woliʼ pʌy majlel i cʼaj i yo ti  wem bʌ jamil, baʼ sʌmʌcña bʌ jaʼ. Cheʼ bajcheʼ jiñi, tsaʼ chaʼ mejli i taj i pʼʌtʌlel yicʼot chaʼan tijicña miʼ bej melben i yeʼtel Jehová (Sal. 18:28-32).

16. ¿Bajcheʼ an a wubi chaʼan an i yʌqʼueyet a pʼʌtʌlel Jehová?

¹⁶ Miʼ mejlel la cʌl jaʼel bajcheʼ iliyi: «Cabʌl i yutslel i pusicʼal lac Yum. Jini chaʼan cuxulontola» (Lam. 3:22; Col. 1:11). Laʼ laj qʼuel tsaʼ bʌ ujti tiʼ tojlel Rachel. Wen wocol tsiʼ ñusa cheʼ bʌ jiñi i ñoxiʼal tsiʼ cʌyʌ i tsiʼ ñajtʼesa i bʌ tiʼ tojlel Jehová cheʼ tiʼ yorajlel jiñi pandemia chaʼan COVID-19. Pero Jehová tsaʼʌch i colta, come miʼ yʌl: «Tsiʼ yʌqʼueyon cubin chaʼan mij cʼuxbintel. Tsiʼ yʌqʼueyon cabʌl camigojob tsaʼ bʌ ajñiyob yicʼoton, miʼ chʼʌmbeñoñob majlel chuqui mij cʼux, miʼ chocbeñoñob cʼotel utsʼatax bʌ mensaje tac, miʼ tijicñesañob c pusicʼal i miʼ cʼajtesʌbeñoñob chaʼan Jehová wolʌch i cʌntañon. Mic wen aqʼuen wocolix i yʌlʌ Jehová cheʼ tsiʼ yʌqʼueyon ili utsʼatax bʌ familia wen yujil bʌ cʼuxbiya».

17. ¿Chucoch tsaʼ mejli i yʌl David chaʼan maʼañic chuqui miʼ bʌcʼñan?

¹⁷ «Maʼanic chuqui mic bʌcʼñan come wʌʼañet quicʼot». David tsiʼ taja cabʌl i contrajob i mach junsujtel jach tsiʼ ñopoyob i tsʌnsan. Pero jiñi i cʼuxbiya Jehová tsiʼ yʌqʼue i yubin chaʼan cʌntʌbilʌch. Tsiʼ yubi chaʼan Jehová tiʼ pejtelel ora yaʼan yicʼot. Jin chaʼan tsiʼ yʌlʌ: «Tsiʼ locʼsʌbeyon pejtelel c bʌqʼuen» (Sal. 34:4). I sujmʌch chaʼan David tsaʼʌch i ñusa cabʌl wocol, pero jiñi i cʼuxbiya Jehová ñumen pʼʌtʌl bajcheʼ pejtelel i bʌqʼuen.

18. Cheʼ mi lac ñusan jumpʼejl wocol muʼ bʌ i yotsan lac bʌqʼuen, ¿bajcheʼ miʼ coltañonla cheʼ la cujil chaʼan Jehová miʼ cʼuxbiñonla?

¹⁸ Cheʼ la cujil chaʼan Jehová mucʼʌch i cʼuxbiñonla miʼ coltañonla cheʼ bʌ mi lac ñusan tsʌts tac bʌ wocol. Juntiquil precursora i cʼabaʼ Susi miʼ yʌl bajcheʼ tsiʼ ñusayob yicʼot i ñoxiʼal cheʼ bʌ jiñi i yalobil tiʼ tsʌnsa i bʌ: «Cheʼ mi lac ñusan jumpʼejl wocol bajcheʼ iliyi, wen chʼijyem mi la cubin lac bʌ, miʼ yochel lac bʌqʼuen i mach la cujilic chuqui yom mi lac mel. Pero cheʼ tsaʼ j cubi lojon i cʼuxbiya Jehová, cʌntʌbil tsaʼ cubi lon c bʌ». Rachel, tsaʼ bʌ ajli ti párrafo 16, miʼ yʌl: «Ti jumpʼejl bʌ acʼʌlel wen chʼijyem tsaʼ cubi c bʌ i tsaʼ cajiyon ti bʌqʼuen. Mach cujchix tsaʼ cubi, jin chaʼan wen woliyon ti uqʼuel tsaʼ caji c pejcan Jehová ti oración. Cheʼ jiñi, lajal bajcheʼ juntiquil ñaʼʌl miʼ majlel i mecʼ i yalobil cheʼ woli ti uqʼuel, Jehová tsaʼ tili i mecʼon tsaʼ cubi i tsiʼ tijicñesa  c pusicʼal. Ti wiʼil, tsaʼ cubi c ñʌchʼtʌlel i tsaʼ mejliyon ti wʌyel. Maʼañic mi caj i wis ñajʌyel c chaʼan iliyi». Tasos, juntiquil anciano tsaʼ bʌ ajñi chʌmpʼejl jab ti cárcel come maʼañic tsiʼ jacʼʌ ochel ti soldado, miʼ yʌl bajcheʼ tsiʼ cʌnta Jehová: «Ñumento tsiʼ yʌqʼueyon cheʼ bajcheʼ tsaʼ c ñaʼta, i jiñi tsiʼ ñumen pʼʌtʼesa c ñopoñel tiʼ tojlel. Cheʼ jaʼel, Jehová tsiʼ yʌqʼueyon i yespíritu chaʼan chʌn tijicñayon anquese mach utsʼatic yaʼ baqui añon. Jiñi tsiʼ pʌsbeyon chaʼan cheʼ bʌ mi lac ñumen ñop tiʼ tojlel, ñumento mi la cubiben i cʼuxbiya. Jin chaʼan, cheʼ bʌ yaʼañon ti cárcel, tsaʼ ochiyon ti precursor regular».

LAʼ LAC LɅCʼTESAN LAC BɅ TI JIÑI DIOS YUJIL BɅ CʼUXBIYA

19. a) ¿Bajcheʼ yilal mi caj lac mel la coración cheʼ la cujil chaʼan Jehová miʼ cʼuxbiñonla? b) ¿Baqui tac bʌ texto muʼ bʌ i yʌl chaʼan i cʼuxbiya Jehová miʼ ñumen ñijcan a pusicʼal? (Qʼuele « Versículo tac muʼ bʌ i coltañonla la cubiben i cʼuxbiya Jehová»).

¹⁹ Jiñi experiencia tac tsaʼ bʌ laj qʼuele miʼ pʌs chaʼan Jehová jiñʌch «jiñi Dios chaʼan bʌ cʼuxbiya» (2 Cor. 13:11). Miʼ chʼʌmonla ti ñuc ti jujuntiquilonla i mi lac ñop chaʼan «jini muʼ bʌ i ñop lac Yum joyolʌch tiʼ yutslel» (Sal. 32:10). Cheʼ mi lac ñumen ñaʼtan bajcheʼ tac an i pʌsbeyonla i cʼuxbiya ñumento mi caj lac ñop yicʼot ñumento mi caj lac lʌcʼtesan lac bʌ tiʼ tojlel. Jin chaʼan, miʼ mejlel lac pejcan yicʼot lac laj suben chuqui an ti lac pusicʼal, i mi laj cʼajtiben chaʼan laʼ i cʼuxbiñonla. Miʼ mejlel lac suben pejtelel chuqui mi lac pensarin i la cujil chaʼan mi caj i chʼʌmbeñonla i sujm yicʼot chaʼan mi caj i coltañonla (Sal. 145:18, 19).

20. ¿Chucoch miʼ lʌcʼtesañonla ti Jehová jiñi i cʼuxbiya?

²⁰ Jiñi i cʼuxbiya Jehová lajal bajcheʼ cʼajc cheʼ bʌ an tsʌñal, miʼ qʼuixñesañonla, jin chaʼan chʌn lʌcʼʌl la com ajñel tiʼ tojlel. Jiñi i cʼuxbiya wen pʼʌtʌl i miʼ coltañonla cheʼ bʌ woli lac ñusan wocol ti laj cuxtʌlel. Wen tijicñayonla cheʼ bʌ Jehová miʼ wen cʼuxbiñonla, jin chaʼan la com la cʌl: «Mij cʼuxbin c Yum» (Sal. 116:1).